Na o Lebalela Bjalo ka ge Jehofa a Dira?

“Xobane xe Le lebalêla batho dikaroxô tša bôná, xôna Tata-weno wa maxodimong, le lena ó tlo Le lebalêla. Fêla, xe Le sa lebalele batho dikaroxô tša bôna, Tata-weno le lena a ka se Le lebalêle dikaroxô tša lena.”—MATEO 6:14, 15.

1, 2. Ke Modimo wa mohuta ofe yo re mo nyakago gomme ka baka la’ng?

“MORÊNA ké Moxauxedi, ké wa mabobo, ké Mo-se-fêle-pelo wa botho byo boxolo. A ka se lwe ka mehla, a ka se dule à befetšwe xo ya xo ile. Se a re diraxo sôna xa se xo latiša bokxôpô, xa se xo lefeletša sebe. Ruri, botho bya xaxwe bo e̱tša lexodimo, lè le tletlolo xa lefase; bo tiile bò ukama ba ba mmoifaxo. ’Karoxô tša rena ó di tloša mo xo rena a di iša kxolê, kxolê bo-ka Bohlabêla bò le kxolê le Bodikêla. Morêna ó šôkêlwa ba ba mmoifaxo byalo ka tata xo bana xe a xauxêla bana b’axwe. Xobane Yêna ó tseba lebopô le re lexo ka lôna, xa a lebale xe re le lerole.”—Psalme 103:8-14.

² Ka ge re imilwe sebeng le go belegwa re e-na le phošo, re e-na le go se phethagale ga leabela moo ka mehla go lekago go re lebiša bohlankeng bja molao wa sebe, ruri re tloga re nyaka Modimo yo ‘a gopolago gore re dirilwe ka lerole.’ Nywageng e makgolo a mararo ka morago ga ge Dafida a ile a hlalosa Jehofa ka tsela e botse gakaakaa go Psalme ya bo-103, mongwadi yo mongwe wa Beibele Mika, o ile a reta yena Modimo yo ka tsela e swanago kudu bakeng sa go lebalela ga gagwe ka botho dibe ge di šetše di dirilwe: “Ke modimo ofe yo a ka ipapetšago le wena: yo a tlošago phošo, yo a lebalelago bosenyi, yo a sa kgomarelego bogale go ya go ile eupja a thabela go bontšha kgaugelo? Re buša re re re šokelwe, gatakela diphošo tša rena, lahlela dibe tša rena ka moka tlase lewatleng.”—Mika 7:18, 19, The Jerusalem Bible.

3. Go lebalela go bolela’ng?

³ Mangwalong a Segerika lentšu bakeng sa “lebalela” le bolela go “lesetša.” Ela hloko gore Dafida le Mika bao ba tsopotšwego ka mo godimo, ba fetišetša tlhaloso e swanago ka mantšu a mabose, ao a hlalosago. Gore re lemoge ka mo go feletšego tekanyo e makatšago ya tebalelo ya Jehofa, anke re hlahlobeng mehlala e sego kae ya mehlala e mentši ya go šoma ga yona. Wa pele o bontšha gore mogopolo wa Jehofa o ka retollwa go tloga go senyeng go ya tebalelong.

Moše e ba Morapeledi—Jehofa o a Theetša

4. Ke ka morago ga dipontšho dife tša matla a Jehofa moo ba-Isiraele ba bego ba sa dutše ba boifa go tsena Nageng ya Kholofetšo?

⁴ Jehofa o ile a ntšha setšhaba sa Isiraele Egipita se šireletšegile le go se tliša kgaufsi le naga yeo a bego a se holofeditše yona bjalo ka naga ya sona, eupja se ile sa gana go tšwela pele, se boifa batho feela ba Kanana. Ka morago ga ge ba bone Jehofa a ba phološa Egipita ka dikotlo tše lesome tšeo di senyago, a bula tsela ya go phologa ka Lewatleng le Lehwibidu, a fediša madira a Egipita ao a bego a leka go ba hlomarela, a hloma le bona Thabeng ya Sinai kgwerano ya Molao yeo e ilego ya ba dira setšhaba se se kgethilwego sa Jehofa, gomme ka mohlolo a ba fepa letšatši le letšatši ka manna ao a tšwago legodimong bakeng sa go ba phediša, ba be ba boifa go tsena Nageng ya Kholofetšo ka baka la ba-Kanana bao e bego e le dinatla!—Numeri 14:1-4.

5. Dihlodi tše pedi tše di botegago di ile tša leka go tiiša Isiraele matla bjang?

⁵ Moše le Arone ba ile ba inamiša difahlego tša bona ba gakanegile. Jošua le Kalebe, e lego dihlodi tše pedi tše di botegago ba ile ba leka go phutha Isiraele ba re: ‘Naga ke naga e botse kudu-kudu, naga ye e elago mafsi le dinose. Le se ke la boifa batho; Jehofa o na le rena!’ (NW) Go e na le go kgothatšwa ke mantšu a bjalo, batho ba tšhogilego ba marabele, ba ile ba leka go thuma Jošua le Kalebe ka mafsika.—Numeri 14:5-10.

6, 7. (a) Ke’ng seo Jehofa a ilego a ikemišetša go se dira ge Isiraele e be e gana go tsena Nageng ya Kholofetšo? (b) Ke ka baka la’ng Moše a ile a se dumelelane le kahlolo ya Jehofa go Isiraele, gomme ka mafelelo afe?

⁶ Jehofa o ile a galefa! “Morêna a bolêla le Mošê a re: Sethšaba sé se tlo lesa neng xo nnyatša; se tlo thôma neng xo mpôta ka ’baka la matete ohle ao, a ke a dirilexo mo xo bôná? Ke tlo ba ôtla ka lehu le lebe, ka ba fediša. Xomme wêna ke tlo Xo dira sethšaba se matla se se fetaxo sé. Mošê a fetola a re: Tše byalo Ba-Egipita ba tlo di kwa, ka xobane sethšaba sé O se nthšitše mo xo bôná ka matla a xaxo. Di tlo bolêlwa le xo batho ba naxa yeno, . . . Xe O ka bolaya sethšaba sé wa xo bolaya monna o tee, ba dithšaba ba ba kwilexo tumô ya xaxo ba tlo re: Morêna ó paletšwe ke xo fihliša sethšaba seo naxeng ye a bexo a ba enetše a re ó tlo ba nea yôna; ké ka ’baka leo a ba bolaetšexo xare xa naxa.”—Numeri 14:11-16.

⁷ Moše o ile a rapelela tebalelo, ka baka la leina la Jehofa a re: “Hle a k’o lebalêlê sethšaba sé dibe tša sôna, ka ’baka la boxolo bya botho bya xaxo, byalo ka xe O be O se lebalêla xo tloxa kwa Egipita xo fihla fano. Morêna a re: ke ba lebaletše byalo ka xe O bolêla.”—Numeri 14:19, 20.

Borapedi bja Medimo ya Diswantšho bja Manase le Bohlotlolo bja Dafida

8. Kgoši Manase wa Juda o ile a dira pego ya mohuta ofe?

⁸ Mohlala o mogolo wa go lebalela ga Jehofa ke taba ya Manase morwa wa Kgoši ya go loka Hiskia. Manase o be a e-na le nywaga e 12 ge a thoma go buša Jerusalema. O ile a aga mafelo a phagamego, a hlomela bo-Baali dialetare, a dira dikokwane tše kgethwa, a khunamela dinaledi tša legodimo, a diriša malea le boloi, a dira tša malopo le bodupe, a bea seswantšho se se betlilwego tempeleng ya Jehofa gomme a dira gore barwa ba gagwe ba fete mollong kua Moeding wa Benehinoni. “Ó dirile tše ntši-ntši tše di befetšexo Morêna” gomme “ó arošitše Juda le Jerusalêma, a dira tše mpe tše di fetišaxo tša dithšaba tšela Morêna a di fedišitšexo mola Ba-Isiraele ba fihla.”—2 Koronika 33:1-9.

9. Bogale bja Jehofa bo ile bja kokobela bjang mabapi le Manase, gomme ka mafelelo afe?

⁹ Mafelelong, Jehofa o ile a dira gore ba-Asiria ba hlasele Juda gomme ba ile ba thopa Manase le go mo iša Babele. “Mola a le tlalelong yeo, a rapêla Modimo wa xaxwe, a ikokobetša ruri pele xa Modimo wa bôtat’axwe. A rapêla, Morêna a dumêla thapêlô ya xaxwe, a bá a mmušetša Jerusalêma mmušong wa xaxwe.” (2 Koronika 33:11-13) Manase ke moka o ile a tloša medimo e šele, medimo ya diswantšho le dialetare gomme a dira gore di lahlelwe ka ntle ga motse. O ile a thoma go neela dihlabelo aletareng ya Jehofa gomme a dira gore Juda e thome go hlankela Modimo wa therešo. Ye e be e le pontšho ye e makatšago ya go ikemišetša ga Jehofa go lebalela ge boikokobetšo, thapelo le mogato wa go phošolla di tšweletša dienywa tšeo di swanelago boitsholo!—2 Koronika 33:15, 16.

10. Dafida o ile a leka bjang go uta sebe sa gagwe le mosadi wa Uria?

¹⁰ Sebe sa bohlotlolo bja kgoši Dafida le mosadi wa Uria mo-Hethe se tsebja gabotse. Ga se a dira feela bohlotlolo le yena eupja gape o ile a loga maano-mabe a raraganego a go leka go tima-timetša mohlala ge mosadi yoo a ima. Kgoši e ile ya nea Uria tumelelo ya maikhutšo ntweng, a letetše gore o tla ya ngwakong wa gagwe gomme a robale le mosadi wa gagwe. Eupja ka baka la go hlompha bahlabani-gotee le yena kua ntweng, Uria o ile a gana. Ke moka Dafida o ile a mo laleletša dijong gomme a dira gore a tagwe, eupja lega go le bjalo, Uria ga se a ka a ya go mosadi wa gagwe. Ka gona Dafida o ile a romela molaetša go molaodi wa gagwe gore a bee Uria moo ntwa e lego thata gona e le gore Uria a bolawe, e lego seo se ilego sa direga.—2 Samuele 11:2-25.

11. Dafida o ile a thušwa bjang gore a itshole bakeng sa sebe sa gagwe, lega go le bjalo o ile a welwa ke’ng?

¹¹ Jehofa o ile a romela moporofeta wa gagwe Nathane go Dafida go pepentšha sebe sa kgoši. “Dafida a fetola a re: Ke senyetše Morêna! Nathane a re: Xôna Morêna ó Xo lebalêla sebe sa xaxo; O ka se kê wa hwa.” (2 Samuele 12:13) Dafida o ile a ikwa a le molato ka baka la sebe sa gagwe gomme a bontšha go itshola ga gagwe thapelong ye e tšwago pelong ya go rapela Jehofa: “Xobane se se Xo kxahlaxo xa se sedimo; xe ke tliša dihlabêlô, xa di Xo thabiše. Didimo tše di Xo kxahlaxo, ké môya o rôbêxilexo; pelo xe e rôbêxile, xe e setlêxile, Wene Modimo O ka se e nyatše.” (Psalme 51:16, 17) Jehofa ga se a ka a nyatša thapelo ya Dafida yeo e bego e rapelwa go tšwa pelong e robegilego. Lega go le bjalo, Dafida o ile a welwa ke kotlo e boima, ka go dumelelana le polelo ya Jehofa mabapi le tebalelo go Ekisodo 34:6, 7 e rego: “A se kê a lesa xo ôtla mosenyi.”

Go Neela ga Salomo Tempele

12. Ke eng seo Salomo a ilego a se kgopela nakong ya go neelwa ga tempele, gomme karabo ya Jehofa e bile efe?

¹² Ge Salomo a feditše go aga tempele ya Jehofa, o ile a bolela thapelong ya gagwe ya go e neela gore: “O kwê xe nna mohlanka wa xaxo le sethšaba sé sa xaxo rè Xo llêla rè le felô fá. O kwê Ò le bodulong bya xaxo xodimong; O kwê O ba lebalêlê.” Jehofa o ile a araba ka gore: “Byalo xe nka tswalêla lexodimo, pula ya hlôkwa, xoba xe nka tliša tšiê ya senya naxa, xoba xe nka roma dinkhu tša wêla sethšaba sa-ka, sethšaba sa-ka se se bitšwaxo ka Leina la-ka, xe se ka ikokobetša sa rapêla sa nyaka sefahloxô sa-ka, sa lahla ditsela tše mpe tša sôna, xôna ke tlo ba kwa kè le lexodimong, ka ba lebalêla sebe, ka fodiša naxa ya bôná.”—2 Koronika 6:21; 7:13, 14.

13. Hesekiele 33:13-16 e bontšha’ng mabapi le pono ya Jehofa ka motho?

¹³ Ge Jehofa a go lebelela, o go amogela bakeng sa seo o lego sona ga bjale e sego seo o ilego wa ba sona. Go tla ba bjalo ka ge Hesekiele 33:13-16 e re: “Le xe moloki kè mmoditše ka re: O tlo phela! ’Me yêna, à holofetše tokô ya xaxwe, a dira bokxôpô, xôna tokô ya xaxwe ka moka e ka se xopolwe; ó tlo hwêla bokxôpô byo a bo dirilexo. Le xe yo mobe kè mmoditše ka re: O tlo hwa! ’me yêna a lahla dibe tša xaxwe, a dira ka molaô le ka tokô, a bušetša tša thswarêlêlô, a bušetša tše a di utswitšexo, a ya ka molaô wo o phedišaxo a se hlwê a dira tše bokxôpô, yêna-eo ó tlo phela; a ka se kê a hwa. Dibe tša xaxwe ka moka tše a sentšexo ka tšôna, a ka se hlwê a xopolwa ka tšôna. Ó dirile ka molaô le ka xo loka; xomme ó tlo phela.”

14. Ke’ng se se fapanego ka go lebalela ga Jehofa?

¹⁴ Tebalelo yeo Jehofa Modimo a re neago yona e na le sebopego se se fapanego, seo go lego thata go dibopiwa tše e lego batho go se akaretša le tebalelo yeo ba e neanago—o a lebalela gotee le go lebala. Batho ba bangwe ba tla re, ‘Nka go lebalela seo o se dirilego, eupja nka se kgone go (goba nka se ke ka) se lebala.’ Ka mo go fapanego, ela hloko seo Jehofa a bolelago gore o tla se dira: “Ke tlo ba lebalêla molato wa bôná, ke se hlwê ke xopola sebe sa bôná.”—Jeremia 31:34.

15. Jehofa o na le pego efe ya go lebalela?

¹⁵ Jehofa o be a dutše a lebalela barapedi ba gagwe lefaseng ka dikete tša nywaga. O be a lebalela dibe tšeo ba lemogago gore ba a di dira gotee le tše dintši tše ba sa di lemogego. Tokišetšo ya gagwe ya kgaugelo, go se fele pelo le tebalelo e bile yeo e sa kgaotšego. Jesaya 55:7 e re: “E mobe a a lahlê tsela y’axwe; motho yo kxôpô a lahlê dikêlêlô tš’axwe, a boêlê xo Morêna, a mo xauxêlê; a boêlê xo Modimo wa rena, xobane ké wa tebalêlô e nntši.”

Tebalelo ka Mangwalong a Bakriste a Segerika

16. Ke ka baka la’ng re ka bolela gore go diriša ga Jesu go lebalela go dumelelana le ga Jehofa?

¹⁶ Dipego tša tebalelo ya Modimo ke tše dintši kudu ka pegong ya Mangwalo a Bakriste a Segerika. Jesu o bolela ka yona gantši, a bontšha gore o dumelelana le monagano wa Jehofa mo tabeng ye. Kgopolo ya Jesu e tšwa go Jehofa, e bonagatša Jehofa, ke moemedi wa kgonthe wa seo Jehofa a lego sona; go bona yena ke go bona Jehofa.—Johane 12:45-50; 14:9; Ba-Hebere 1:3.

17. Jesu o ile a bontšha bjang go lebalela ga Jehofa ‘ka tekanyo e kgolo’?

¹⁷ Gore Jehofa o lebalela ka tsela e kgolo go bontšhwa go se sengwe sa diswantšho tša Jesu, e lego sa kgoši yeo e ilego ya lebalela mohlanka molato wa ditalente tše 10 000 (mo e ka bago R120 000 000). Eupja ge mohlanka yoo a be a sa lebalele mohlanka-gotee le yena molato wa di-denarius tše lekgolo (mo e ka bago R220), kgoši e ile ya befelwa. “O mohlanka e mobe. Nka ke Xo lebaletše molato wola ka moka, ka xobane Ò nthapêla. A e be e se thswanêlô xore le wêna O šôkêlwê mohlanka ka wêna, byalo ka xe nna ke Xo šoketšwe? Morêna wa xaxwe a tuka boxale, a mo xafêla bahlokofatši xo bê xo tlê a lefê molato wa xaxwe ka moka.” Ka gona Jesu o ile a bontšha go dirišwa ga se ka gore: “Le Tate wa maxodimong ó tlo Le dira ka mokxwa woo xe Le sa lebalele, xe motho a sa lebalele ngwan’abô dithšitô tša xaxwe ka pelo.”—Mateo 18:23-35.

18. Pono ya Petro ka go lebalela e bile bjang ge e bapišwa le pono ya Jesu?

¹⁸ Pejana ga gore Jesu a nee seswantšho se se lego ka mo godimo, Petro o be a ile a tla go Jesu gomme a botšiša gore: “Morêna, ngwan’ešo xe a nthsenyetša, ke tlo mo lebalêla xa-kae? A nka mo lebalêla xa-šupa?” Petro o be a nagana gore o be a bontšha botho kudu. Gaešita lege ba-mangwalo le Bafarisei ba be ba bea tekanyetšo ya go lebalela, Jesu o ile a re go Petro: “Nna xa ke re xa-šupa; a e bê masome a šupaxo xe a balwa xa-šupa.” (Mateo 18:21, 22) Makga a šupago e be e ka se be a lekanego bakeng sa letšatši le tee, ka ge Jesu a ile a re: “Itoteng. Xe ngwan’eno à Xo senyetša, mo sôlê, xomme xe a sokoloxa O mo lebalêlê. Le xe a ka Xo senyetša xa-šupa ka letšatši, ’me a boêla xo wene xa-šupa, a re: Ke sokoloxile! O mo lebalêlê.” (Luka 17:3, 4) Ge Jehofa a lebalela, ga a boloke pego—ke seo se re thabišago.

19. Ke’ng seo re swanetšego go se dira gore re hwetše tebalelo ya Jehofa?

¹⁹ Ge e ba re e-na le boikokobetšo bja go itshola gomme ra ipolela dibe tša rena, Jehofa o ikemišeditše go re dira ka kgaugelo: “Xe re ipolêla dibe tša rena, xôna ka xe Yêna é le wa pôtêxô le tokô, ó re lebalêla dibe a re hlatswa bokxôpô ka moka.”—1 Johane 1:9.

20. Ke go ikemišetša go lebalela sebe gofe mo go bontšhitšwego ke Stefano?

²⁰ Stefano molatedi wa Jesu, ka moya o makatšago wa tebalelo, o ile a goeletša boipiletšo bjo ge lešaba le le galefilego le be le mo thuma ka mafsika: “Morêna Jesu! Amoxêla môya wa-ka. A khunama ka matôlô, a hlaboša lentšu a re: Morêna, O se ba balêlê sebe sé! A r’yalo, a ithôbalêla.”—Ditiro 7:59, 60.

21. Ke ka baka la’ng go ikemišetša ga Jesu go lebalela bahlabani ba Roma e be e le mo go makatšago kudu?

²¹ Jesu o beile mohlala o makatšago kudu-kudu wa go ikemišetša go lebalela. Manaba a gagwe a ile a mo swara, a mo sekiša ka tsela yeo e sego ya molao, a mmea molato, a mo kwera, a mo tshwela ka mare, a mmetha ka sefepi se se nago le dikgole tše dintši tšeo mohlomongwe di bego di tlemeletšwe ka marapo a manyenyane le tšhipi gomme mafelelong ba mo tlogela a kokotetšwe koteng ka diiri tše dintši. Ba-Roma ba be ba akaretšwa go bontši bja se. Lega go le bjalo, ge Jesu a be a dutše a e-hwa koteng yeo ya tlhokofatšo, o ile a bolela le Tatagwe wa legodimong mabapi le bahlabani bao ba ilego ba mo kokotela koteng gore: “Tata! Ba lebalêlê, xobane xa ba tsebe se ba se diraxo!”—Luka 23:34.

22. Ke mantšu afe ao a tšwago Thutong ya Thabeng ao re swanetšego go leka go a diriša?

²² Thutong ya gagwe ya Thabeng Jesu o ile a bolela gore: “Ratang manaba a lena; ba ba Le roxaxo Le ba šexofatšê.” O ile a kwa molao woo wa motheo yena ka noši mafelelong a bodiredi bja gagwe bja lefaseng. Na seo se nyaka go gontši kudu go rena bao re lwantšhanago le bofokodi bja nama ya rena ya sebe? Bonyenyane re swanetše go leka go diriša mantšu ao Jesu a ilego a a ruta balatedi ba gagwe ka morago ga go ba nea thapelo ya mohlala: “Xobane xe Le lebalêla batho dikaroxô tša bôná, xôna Tata-weno wa maxodimong, le lena Ó tlo Le lebalêla. Fêla, xe Le sa lebalele batho dikaroxô tša bôna, Tata-weno le lena a ka se Le lebalêle dikaroxô tša lena.” (Mateo 5:44; 6:14, 15) Ge e ba re lebalela bjalo ka ge Jehofa a lebalela, gona re tla lebalela gomme ra lebala.

Na o a Gopola?

◻ Jehofa o swaragana bjang le dibe tša rena, gomme ka baka la’ng?

◻ Ke ka baka la’ng Manase a ile a bušetšwa bogošing bja gagwe?

◻ Ke sebopego sefe se se fapanego sa tebalelo ya Jehofa seo e lego tlhohlo go batho gore ba se ekiše?

◻ Go ikemišetša ga Jesu go lebalela e be e le mo go makatšago bjang?

[Seswantšho go letlakala 24]

Nathane o ile a thuša Dafida go bona go nyakega ga tebalelo ya Modimo