“O se ke wa Šomela Dijo tše di Bolago”
KA GE GO ANEGA DAVID LUNSTRUM
Nna le ngwanešo Elwood re be re le ka godimo ga dimithara tše senyane moyeng, re penta leswao le lefsa moagong wa feketori wa Watchtower. Nywaga e fetago 40 ka morago le sa le gona, le kgothaletša gore: “BALA LENTŠU LA MODIMO BEIBELE E KGETHWA LETŠATŠI LE LETŠATŠI.” Bekeng e nngwe le e nngwe batho ba dikete ba bona leswao le ge ba dutše ba tshela Brooklyn Bridge e tumilego.
DILO tša pejana kudu tšeo ke di gopolago di akaretša letšatši la lapa la go hlatswa. Ka 5:00 a.m. mma o be a tsoga a hlatswetša lapa lešo le legolo diaparo gomme tate a thoma go itokišetša go ya modirong. Ba be ba tla ba le e nngwe ya dipoledišano tša bona tše phagamišago maikwelo, tate a bolela gore motho o fetogile ka tsela e itšego nywageng e dimilione gomme mma a tsopola Beibele go hlatsela gore batho ba bopilwe ka go lebanya ke Modimo.
Gaešita le ge ke be ke e-na le nywaga e šupago feela, ke ile ka lemoga gore mma o be a bolela therešo. Le ge ke be ke rata tate kudu, ke be ke kgona go bona gore tumelo ya gagwe e be e sa nee kholofelo bakeng sa bokamoso. Mma a ka be a ile a thaba gakaakang go tseba gore nywaga e mentši ka morago, ba babedi ba barwa ba gagwe ba ile ba penta leswao le le bego le kgothaletša batho go bala Beibele, puku yeo a bego a e rata gakaakaa!
Eupša ga ke bolele taba ya-ka ka thulaganyo. Go tlile bjang gore ke be le modiro o bjalo wa tokelo? Ke swanetše go boela morago ngwageng wa 1906, e lego nywaga e meraro pele ke belegwa.
Mohlala wa Mma wa Potego
Ka nako yeo mma le tate ba be ba sa tšwa go nyalana gomme ba dula tenteng kua Arizona. Morutwana wa Beibele go etša ge Dihlatse tša Jehofa di be di bitšwa bjalo ka nako yeo, o ile a tla gomme a nea mma lelokelelo la dipuku tše di ngwadilwego ke Charles Taze Russell le le nago le sehlogo se se rego Studies in the Scriptures. O ile a dula bošego ka moka a di bala gomme a lemoga gatee-tee gore ye e be e le therešo yeo a bego a dutše a e nyaka. O be a fagahletše kudu gore tate a boe go tsoma modiro.
Tate le yena o be a sa kgotsofatšwe ke seo dikereke di bego di se ruta, ka gona o ile a amogela ditherešo tše tša Beibele ka nakwana. Lega go le bjalo, ka morago o ile a itšeela tsela ya gagwe ya bodumedi gomme a ba a dira gore go be thata bakeng sa mma. Fela le ka mohla mma ga se a ka a tlogela go nea dinyakwa tša nama le tša moya tša bana ba gagwe.
Le ka mohla nka se ke ka lebala mma a theoga manamelong bošegong bjo bongwe le bjo bongwe ka morago ga ge a šomile ka thata letšatši ka moka, go tla go re balela karolo ya Beibele goba go abelana le rena lehumo le itšego la moya. Tate le yena o be a šoma ka thata gomme ge ke be ke gola, o ile a nthuta modiro wa go penta. Ee, tate o nthutile go šoma mola mma a nthutile seo ke swanetšego go se šomela go etša ge Jesu a laetše, ‘dijo tše di sa bolego.’—Johane 6:27, NW.
Mafelelong lapa lešo le ile la dula torotswaneng ya Ellensburg nageng ya Washington, e lego mo e ka bago dikhilomithara tše 180 ka bohlabela bja Seattle. Ge rena bana re be re thoma go ya dibokeng tša Barutwana ba Beibele le mma, re be re kopana ka magaeng a batho. Banna ka moka ba ile ba tlogela sehlopha sa rena sa thuto ge go be go gatelelwa go nyakega ga go tšea karolo bodireding bja ntlo le ntlo. Eupša mma ga se a ka a tekema. Se se ile sa ntlogelela kgopolo e sa phumogego ya go bota tlhahlo ya mokgatlo wa Jehofa ka mehla.
Mafelelong tate le mma ba ile ba ba le bana ba senyane. Ke belegwe ka October 1, 1909 ke le ngwana wa bona wa boraro. Ka kakaretšo, ba tshelelago ba rena re ekišitše mohlala wa mma o mobotse gomme ra ba Dihlatse tše mafolofolo tša Jehofa.
Boineelo le Kolobetšo
Ge ke be ke le kgaufsi le go tšwa mahlalagading, ke ile ka ineela go Jehofa gomme ka bontšha se ka kolobetšo ya meetseng ka 1927. Kolobetšo e ile ya direlwa Seattle ka gare ga moago wa kgale woo pele e bego e le kereke ya Baptist. Ke thabela gore ba be ba tlošitše tora ya kgale. Re ile ra hlahlwa go theogela letangwaneng la go ruthela karolong ya ka tlase ya moago moo re ilego ra newa diaparo tše ditelele tše diso gore re di apare. Go be go bonala eka re be re e-ya polokong.
Ke ile ka boela Seattle gape dikgweding tše sego kae ka morago, gomme mo nakong ye ke ile ka latswa ka lekga la mathomo go nea bohlatse ka ntlo le ntlo. Yo a bego a eteletše pele o ile a ntaela gore, “O tla karolo ye ya dintlo ka mo, gomme ke tla e tla ka mola.” Go sa šetšwe go tšhoga ga-ka, ke ile ka sepedišetša mosadi yo a nago le botho kudu dihlopha tše pedi tša dipukwana. Ke ile ka tšwela pele ka bodiredi bja ntlo le ntlo ge ke be ke boetše Ellensburg, gomme bjale mo e nyakilego go ba nywaga e 70 ka morago ke sa dutše ke thabela kudu tirelo e bjalo.
Tirelo Ntlong-kgolo ya Lefase
Nako e kopana ka morago ga moo motho yo a bego a hlanketše Bethele ya Brooklyn, ntlong-kgolo ya Mokgatlo wa Watch Tower o ile a nkgothaletša go ithapela go hlankela moo. Nakwana ka morago ga poledišano ya rena go ile gwa tšwelela temošo ka makasineng wa Watchtower e bego e tsebiša ka go nyakega ga thušo Bethele. Ka gona ke ile ka dira kgopelo. Nka se ke ka lebala lethabo la-ka ge ke be ke amogela lengwalo la go tla bakeng sa tirelo ya Bethele kua Brooklyn, New York ka March 10, 1930. Ke kamoo go ilego gwa thoma modiro wa-ka wa nako e tletšego wa go šomela ‘dijo tše di sa bolego.’
Motho a ka nagana gore ka ge ke be ke e-na le phihlelo ke le mapentane, nkabe ke ile ka abelwa go penta selo se sengwe. Go e na le moo, modiro wa-ka wa mathomo e be e le go šoma motšheneng wa go roka dipuku feketoring. Gaešita le ge wo e be e le modiro o lešago bodutu, ke ile ka thabela modiro woo ka nywaga e fetago e tshelelago. Motšhene o mogolo wa go gatiša wa rotary wo re ilego ra o bitša ka lerato gore ke sekepe sa kgale sa ntwa o be o tšweletša dipukwana tšeo di bego di romelwa ka lepanta la go fetišetša dilo lebatong la rena la ka tlase. Re be re thabela go bona ge e ba re be re ka roka dipukwana ka lebelo ge re di amogela di e-tšwa sekepeng sa ntwa.
Ka morago ga moo ke ile ka šoma mafapheng a mmalwa, go akaretša le leo go lona re bego re dira dikeremafomo. Re be re dirišetša metšhene ye go bapala melaetša e gatišitšwego ya Beibele mejakong ya beng ba dintlo. Keremafomo e emego e ile ya hlangwa le go tšweletšwa ke baithapi lefapheng la rena. Keremafomo ye e be e sa bapale feela melaetša e gatišitšwego e sa le pele, eupša gape e be e e-na le karolo e kgethegilego ya go tsenya dipukwana mohlomongwe le sangwetši. Ke bile le tokelo ya go bontšha go dirišwa ga motšhene wo o mofsa kopanong kua Detroit, Michigan ka 1940.
Lega go le bjalo, re be re dira se se fetago metšhene e dirilwego ka bokgwari. Re be re bile re dira dipeakanyo tše bohlokwa tša moya. Ka mohlala, Dihlatse tša Jehofa di be di apara sepelete se se nago le sefapano le mphapahlogo. Eupša ka morago re ile ra kwešiša gore Jesu o bolaetšwe koteng e otlologilego, e sego sefapanong. (Ditiro 5:30) Ka gona go apara dipelete tše go ile gwa kgaotšwa. Ke bile le tokelo ya go tloša dingamelo dipeleteng. Ka morago gauta e ile ya tološwa gomme ya rekišwa.
Gaešita le ge re be re e-na le thulaganyo ya go swarega kudu ya modiro ya matšatši a mahlano le seripa beke le beke, re be re e-ya bodireding bja Bokriste mafelo-bekeng. Ka letšatši le lengwe, ba 16 ba rena re ile ra swarwa gomme ra tsenywa kgolegong kua Brooklyn. Ka baka la’ng? Ee, mehleng yeo re be re lebelela bodumedi e le se se swanago le bodumedi bja maaka. Ka gona re be re rwala maswao a balegago ka lehlakoreng le lengwe ka gore “Bodumedi ke Moreo le Kgwebo ya Bofora” gomme ka go le lengwe a re “Hlankela Modimo le Kriste Kgoši.” Re ile ra tsenywa kgolegong ka baka la go rwala maswao a, eupša Hayden Covington yo e lego ramolao wa Mokgatlo wa Watch Tower o ile a re ntšha ka peile. Ka nako yeo melato e mentši e akaretšago tokologo ya bodumedi e be e lwewa pele ga Kgoro-kgolo ya Tsheko ya United States, gomme e be e le mo go kgahlišago go ba Bethele le go ikwela ka noši dipego mabapi le diphenyo tša rena.
Mafelelong ke ile ka abelwa mediro e bego e diriša phihlelo ya-ka ya go penta. Kua Staten Island, e lego o mongwe wa metse ya New York City re be re e-na le seteišene sa rena sa radio sa WBBR. Ditora tša radio tša seteišene e be e le tša botelele bja dimithara tše fetago 60 gomme di e-na le dihlopha tše tharo tša mathale a temošo. Ke be ke dula godimo ga lepolanka la botelele bja disenthimithara tše 90 ka bophara bja disenthimithara tše 20 mola modiri-gotee le nna a be a mphagamišetša godimo. Ke dutše godimo setulong seo se senyenyane, ke ile ka penta mathale a temošo le ditora. Ba bangwe ba ile ba mpotšiša ge e ba re be re sa rapele kudu ge re be re dira modiro woo!
Modiro wa selemo wo nka se kego ka o lebala e be e le wa go hlatswa mafasetere le go penta difaseterepanka tša moago wa feketori. Re be re o bitša maikhutšo a rena a selemo. Re be re hloma sekhafola sa rena sa kota gomme ra ya godimo le fase ka lepolanka le thapo moagong wa mabato a seswai.
Lapa le Thekgago
Ka 1932 tate o ile a hwa gomme ka ipotšiša ge e ba ke be ke swanetše go ya gae gomme ke thuše go hlokomela mma. Ka gona pele ga dijo tša mosegare ka letšatši le lengwe, ke ile ka bea lengwalo tafoleng ya taolo mo go bego go dula Ngwanešo Rutherford, mopresidente wa Mokgatlo. Ka go lona ke ile ka kgopela go boledišana le yena. Eitše ge a lemoga go tshwenyega ga-ka gomme a hwetša gore ke be ke e-na le banabešo le dikgaetšedi bao ba bego ba sa dula ka gae, o ile a botšiša gore, “Na o nyaka go dula Bethele gomme o dire modiro wa Morena?”
Ke ile ka araba ka gore: “Ruri ke a nyaka.”
Ka gona o ile a šišinya gore ke ngwalele mma go bona ge e ba a be a dumelelana le phetho ya-ka ya go dula. Ke sona seo ke ilego ka se dira gomme a nngwalela a hlalosa go dumelelana ga gagwe ka mo go feletšego le phetho ya-ka. Ke ile ka leboga kudu botho le keletšo tša Ngwanešo Rutherford.
Nywageng ya-ka e mentši ke le Bethele, ke be ke ngwalela lapa lešo gantši le go le kgothaletša gore le hlankele Jehofa go fo swana le ge mma a be a nkgothaditše. Mma o ile a hwa ka July 1937. O be a bile tutuetšo e kgolo gakaakang go lapa lešo! Ke feela mogolo’ake le kgaetšedi ya-ka e kgolo e lego Paul le Esther gotee le kgaetšedi ya-ka e nyenyane Lois bao e sa kago ya ba Dihlatse. Lega go le bjalo, Paul o be a rata modiro wa rena gomme o ile a nea dikago tšeo re ilego ra aga Holo ya rena ya mathomo ya Mmušo ka tšona.
Ka 1936 kgaetšedi ya-ka Eva o ile a ba mmulamadibogo goba mmoledi wa nako e tletšego. Ngwageng wona woo o ile a nyalana le Ralph Thomas, gomme ka 1939 ba abelwa modirong wa bosepedi gore ba hlankele diphuthego tša Dihlatse tša Jehofa. Ka morago ba ile ba hudugela Mexico moo ba ilego ba fetša nywaga e 25 ba thuša modirong wa Mmušo.
Ka 1939 dikgaetšedi tša-ka e lego Alice le Frances le bona ba ile ba tsenela tirelo ya bobulamadibogo. E bile lethabo le legolo gakaakang go bona Alice ka kua ga khaonthara kopanong ya St. Louis ka 1941 a bontšha go dirišwa ga motšhene wa keremafomo wo ke bego ke thušitše go o tšweletša! Gaešita le ge Alice a be a swanelwa ke go kgaotša go bula ga gagwe madibogo ka dinako tše dingwe ka baka la boikarabelo bja lapa, ka kakaretšo o feditše nywaga e fetago 40 bodireding bja nako e tletšego. Frances o ile a ya Sekolong sa Beibele sa Watchtower sa Gilead ka 1944 gomme a hlankela ka nakwana e le moromiwa kua Puerto Rico.
Joel le Elwood, e lego ba babedi ba banyenyane ka lapeng e ile ya ba babulamadibogo kua Montana mathomong a nywaga ya bo-1940. Joel o ile a dula e le Hlatse e botegago gomme bjale o hlankela e le mohlanka wa bodiredi. Elwood o ile a ntlatša Bethele ka 1944, a tlišetša pelo ya-ka lethabo le legolo. O be a e-na le nywaga ya ka tlase ga e mehlano ge ke be ke tloga gae. Bjalo ka ge ke boletše pejana, re ile ra šoma gotee re penta leswao lela moagong wa feketori le rego, “Bala Lentšu la Modimo Beibele e Kgethwa Letšatši le Letšatši.” Ke be ke ipotšiša gantši ka palo ya batho bao ba bonego leswao leo nywageng ka moka bao ba ilego ba kgothaletšwa go bala Beibele ya bona.
Elwood o ile a hlankela Bethele go fihlela ka 1956 ge a be a nyalana le Emma Flyte. Elwood le Emma ba ile ba šoma gotee ka nywaga e mentši bodireding bja nako e tletšego ba hlankela ka nakwana kua Kenya, Afrika gotee le kua Sepania. Elwood o ile a swarwa ke kankere gomme a hwa kua Sepania ka 1978. Emma o ile a dula kua Sepania modirong wa bobulamadibogo go fihla le lehono.
Lenyalo le Lapa
Ka September 1953 ke ile ka tloga Bethele go ya go nyalana le Alice Rivera, e lego mmulamadibogo wa Phuthegong ya Brooklyn Center yeo ke bego ke kopanela go yona. Ke ile ka botša Alice gore ke na le kholofelo ya legodimong, eupša o be a sa dutše a kgahlegela go nyalana le nna.—Ba-Filipi 3:14.
Ka morago ga nywaga e 23 ke dula Bethele, e be e le peakanyo e kgolo go thoma modiro wa boiphedišo ke le mapentane gore ke iphepe gotee le Alice modirong wa bobulamadibogo. Alice e be e le yo a thekgago ka mehla gaešita le ge a ile a swanelwa ke go kgaotša go bula madibogo ka mabaka a tša maphelo. Ka 1954 re be re letetše ngwana wa rena wa mathomo. Pelego ga se ya sepela gabotse gaešita le ge morwa wa rena John a be a phela gabotse. Alice o ile a lahlegelwa ke madi a mantši nakong ya go segwa bakeng sa pelego moo dingaka di bego di sa nagane gore o tla phela. Nakong e nngwe ba be ba bile ba sa kgone go kwa morethetho wa pelo. Lega go le bjalo o ile a phologa bošegong bjoo gomme a fola ka mo go feletšego ge nako e dutše e e-ya.
Nywageng e sego kae ka morago ge tatago Alice a be a e-hwa, re ile ra hudugela ka ntle-ntle ga Long Island go ya go dula le mmagwe. Ka ge re be re se na koloi, ke be ke sepela ka maoto goba ke namela pese le setimela sa ka tlase ga mobu. Ka gona ke ile ka kgona go tšwela pele modirong wa bobulamadibogo le go fepa lapa la-ka. Lethabo la bodiredi bja nako e tletšego le fetišitše kudu dilo le ge e le dife tšeo di ilego tša gafša. Go thuša batho—ba bjalo ka Joe Natale yo a ilego a tlogela modiro o holofetšago wa baseball gore e be Hlatse—e bile e nngwe ya ditšhegofatšo tša-ka tše dintši.
Ka 1967 ge maemo a be a befela pele tikologong ya New York, ke ile ka dira phetho ya go bušetša Alice le John toropong ya gešo ya Ellensburg go ya go dula gona. Bjale ke hwetša e le mo go putsago go bona ditlogolo le ditlogo-tlogolwana tše dintši gakaakaa tša mma di tšea karolo bodireding bja nako e tletšego. Tše dingwe di bile di hlankela Bethele. John gotee le mosadi wa gagwe le bana le bona ba hlankela Jehofa ka potego.
Ka manyami, ke ile ka lahlegelwa ke mosadi wa-ka yo a rategago Alice ka lehu ka 1989. Go dula ke swaregile bodireding bja nako e tletšego go nthušitše go kgotlelela tahlegelo. Nna le kgaetšedi ya-ka Alice bjale re thabela go bula madibogo gotee. Ke mo gobotse gakaakang go dula gape ka tlase ga tlhaka e tee le go ikhwetša re swaregile modirong wo o bohlokwa kudu!
Seruthwaneng sa 1994 ke ile ka etela Bethele ka lekga la pele nywageng e ka bago 25. E bile lethabo le legolo gakaakang go bona bontši bja bao ke ilego ka šoma le bona nywageng e fetago 40 e fetilego! Ge ke be ke e-ya Bethele ka 1930 go be go e-na le ba 250 feela ka lapeng, eupša lehono lapa la Bethele kua Brooklyn le na le ba fetago 3 500 ka palo!
Go Thekgwa ke Dijo tša Moya
E sa le ka pela mesong e mentši ke sepela go bapa le Noka ya Yakima kgaufsi le legae la rena. Ke le moo ke kgona go bona Thaba e kgolo ya Rainier e apešitšwego ke kapoko e phagamego ka dimithara tše fetago 4 300 moyeng. Go na le diphoofolo tše dintši tša lešoka. Ka dinako tše dingwe ke bona kgama gomme lebakeng le lengwe ke ile ka bona le elk.
Dinako tše tša setu tša go ba noši di ntumelela go naganišiša ka ditokišetšo tša Jehofa tše di kgahlišago. Ke rapelela matla gore ke tšwele pele ke hlankela Modimo wa rena Jehofa ka potego. Ke bile ke rata le go opela ge ke dutše ke sepela, kudu-kudu kopelo e rego “Go Thabiša Pelo ya Jehofa,” yeo mantšu a yona a rego: “Re enne go go direla wena Modimo wa rena, re phethe thato ya gago le go go thabiša pelo.”
Ke thabela gore ke kgethile go dira modiro o thabišago pelo ya Jehofa. Ke rapela gore eka nka tšwela pele ke dira modiro wo go fihlela ke amogela moputso wa legodimong o holofeditšwego. Ke duma eka pego ye e ka tutuetša ba bangwe gore le bona ba diriše maphelo a bona go ‘šomeleng dijo tše di sa bolego.’—Johane 6:27.
[Seswantšho go letlakala 23]
Elwood a penta leswao la “BALA LENTŠU LA MODIMO BEIBELE E KGETHWA LETŠATŠI LE LETŠATŠI”
[Seswantšho go letlakala 24]
Ke e-na le Grant Suiter le John Kurzen re dira pontšho ya keremafomo e mpsha kopanong ka 1940
[Seswantšho go letlakala 25]
Rena bao re bego re le therešong ka 1944 re be re le bodireding bja nako e tletšego: David, Alice, Joel, Eva, Elwood le Frances
[Seswantšho go letlakala 25]
Bana ba phelago, go tloga go le letshadi: Alice, Eva, Joel, David le Frances