Lethabo La Kgonthe Le Ka Hwetšwa Kae?

BATHO ba bantši ba nagana gore lethabo le ka hwetšwa ka go kgoboketša dithoto tša dilo tše di bonagalago. Go thwe’ng ka wena? Le ge dilo tše di bonagalago di ka tlaleletša e le ka kgonthe lethabong la rena, ga di le kgonthišetše; gaešita le boiketlo bja mmele ga bo age tumelo goba go kgotsofatša dinyakwa tša moya.

Jesu Kriste Thutong ya gagwe ya Thabeng o itše: “Go thabile bao ba lemogago senyakwa sa bona sa moya, ka gobane mmušo wa magodimo ke wa bona.” (Mateo 5:3, NW) Jesu o boletše gape gore: “Phafoxang, Le ilê mexabaru; xobane bophelô bya motho xa bo tšwe lehumong le xo tše a di ruilexo.”—Luka 12:15.

Ba bantši ba tsoma lethabo ka go ba le dikopano tše di gobogilego tša botona le botshadi le go dira “medirô [e mengwe] ya nama.” (Ba-Galatia 5:19-21) Lega go le bjalo, go ineela lethabong la nama ga go tliše lethabo la kgonthe le le le swarelelago. Ge e le gabotse, bao ba dirago dilo tše bjalo ba ka se ke ba hwetša bohwa bja Mmušo wa Modimo.—1 Ba-Korinthe 6:9, 10.

Ba bangwe ba a homola go tsomeng ga bona lethabo ka go leka go aga boitlhompho bja bona ka noši. Makgobapuku le mabenkele a dipuku a tletše dipuku tša go ithuša, eupša dipuku tše bjalo ga se tša tlišetša batho lethabo le le swarelelago. Ka gona-ge, re ka hwetša kae lethabo la kgonthe?

Gore re thabe e le ka kgonthe, re swanetše go lemoga senyakwa sa rena se se logeletšwego sa moya. Jesu o itše: “Go thabile bao ba lemogago senyakwa sa bona sa moya.” Ee, go be go ka se re hole go kwešiša senyakwa se ke moka ra palelwa ke go dira selo le ge e le sefe ka sona. Go nea mohlala: Go be go tla direga’ng ka mokitimi wa lebelo la mokoka yo a paletšwego ke go arabela go nyorelweng ga mmele wa gagwe meetse ka morago ga lebelo? Na o be a ka se fele meetse mmeleng go se go ye kae le go welwa ke mafelelo a mangwe a kotsi kudu? Ka mo go swanago, ge re palelwa ke go arabela senyakweng sa rena sa dijo tša moya re tla pona moyeng mafelelong. Se se tla lebiša go lahlegelweng ke tlhalalo le lethabo.

Jesu o be a lemoga senyakwa sa gagwe sa moya ka mo go tletšego, a ithuta le go naganišiša ka Lentšu la Modimo ka mehla. O be a kgona go hwetša le go bala dikarolo tša Mangwalo a Makgethwa gabonolo, gomme o rutile ba bangwe go dira se se swanago. (Luka 4:16-21; bapiša le Ba-Efeso 4:20, 21.) Gape, Jesu o swantšhitše go dira thato ya Tatagwe wa legodimong le dijo. Go dira thato ya Modimo go be go mo tlišetša lethabo le legolo.—Johane 4:34.

Ee, lethabo la kgonthe le ka se ke la hwetšwa ka go kgoboketša dilo tše di bonagalago; le gona lethabo ga le tlišwe ke go kgotsofatša nama ya sebe. Lethabo la kgonthe ke boemo bja pelo, le theilwe tumelong ya kgonthe le tswalanong e botse le Jehofa Modimo. Ka gona, mopsalme Dafida o opetše ka mo go swanetšego gore: “Go šego [“thabile,” NW] setšhaba seo Jehofa e lego Modimo wa sona.”—Psalme 144:15b, PK.

[Seswantšho go letlakala 23]

Tumelo le tswalano e botse le Modimo di tla go tlišetša lethabo la kgonthe