Puku E Tšwago Go Modimo

“Xa xo ešo xwa bá xwa tšwêlêla porofetô ka xo ithatêla xa motho, xobane batho ba bakxêthwa ba Modimo ba boletše bà išwa ke Môya o mokxêthwa.”—2 PETRO 1:21.

1, 2. (a) Ke ka baka la’ng ba bangwe ba gononwa ge e ba Beibele e le e swanetšego bophelo bja mehleng yeno? (b) Ke mabaka afe a bohlatse ao re ka a dirišago go bontšha gore Beibele e tšwa go Modimo?

NA Beibele e swanetše batho bao ba lego leribeng la lekgolo la bo-21 la nywaga? Ba bangwe ba nagana gore ga se ya ba swanela. Dr. Eli S. Chesen ge a hlalosa lebaka leo ka lona a bego a dumela gore Beibele ke e fetilwego ke nako o ngwadile gore: “Ga go na motho yo a bego a ka bolelela go dirišwa ga kgatišo ya 1924 ya [puku] ya chemistry bakeng sa go e diriša klaseng ya mehleng yeno ya chemistry.” Go bonala polelo ye e le e kwalago. Ke therešo gore motho o ithutile mo gontši ka thutamahlale, bophelo bjo bobotse bja monagano le boitshwaro bja motho ga e sa le go tloga mehleng ya Beibele. Ka gona ba bangwe ba ipotšiša gore: ‘Go ka kgonega bjang gore puku e bjalo ya bogologolo e se ke ya ba le diphošo tša thutamahlale? Go ka kgonega bjang gore e be le keletšo yeo e holago bakeng sa bophelo bja mehleng yeno?’

² Beibele ka boyona e nea karabo. Go 2 Petro 1:21 re botšwa gore baporofeta ba Beibele “ba Modimo ba boletše bà išwa ke Môya o mokxêthwa.” Ka gona Beibele e bontšha gore ke puku e tšwago go Modimo. Lega go le bjalo, ke bjang re ka kgodišago ba bangwe gore go bjalo? Anke re eleng hloko mabaka a mararo a go hlatsela gore Beibele ke Lentšu la Modimo: (1) E nepagetše go ya ka thutamahlale, (2) e swere melao ya motheo ya neng le neng yeo e holago bakeng sa bophelo bja mehleng yeno le gona (3) e swere diporofeto tše di kgethegilego tšeo di ilego tša phethagala ka ge di hlatselwa ke ditherešo tša histori.

Puku Yeo e Dumelelanago le Thutamahlale

3. Ke ka baka la’ng Beibele e se ya bewa kotsing ke dikutollo tša thutamahlale?

³ Beibele ga se puku ya go ruta thutamahlale. Lega go le bjalo, ke puku ya therešo gomme therešo e kgona go lebeletšana le teko ya nako. (Johane 17:17) Beibele ga se ya ka ya bewa kotsing ke dikutollo tša thutamahlale. Ge e kgoma ditaba tšeo di tswalanago le thutamahlale ga e na dikgopolo-kakanywa tša bogologolo “tša thutamahlale” tšeo di ilego tša itlhatsela e le feela dinonwane. Ge e le gabotse, e na le dipolelo tšeo e sego tše di kwalago feela go ya ka thutamahlale, eupša e bile ke tšeo di ganetšago ka go lebanya dikgopolo tšeo di bego di amogelwa tša mehleng yeo. Ka mohlala, ela hloko tumelelano magareng ga Beibele le thutamahlale ya tša kalafo.

4, 5. (a) Ke eng seo dingaka tša bogologolo di bego di sa se kwešiše ka malwetši? (b) Ke ka baka la’ng go se na pelaelo gore Moše o be a tlwaelane le mekgwa ya tša kalafo ya dingaka tša Egipita?

⁴ Dingaka tša bogologolo di be di sa kwešiše ka mo go tletšego kamoo bolwetši bo phatlalalago ka gona gaešita le go lemoga bohlokwa bja bohlweki go thibeleng bolwetši. Go ya ka ditekanyetšo tša mehleng yeno bontši bja mekgwa ya bogologolo ya tša kalafo e be e tla bonala e le e sa hlabologago. O mongwe wa mengwalo ya kgale-kgale wa tša kalafo wo o hwetšagalago ke Ebers Papyrus, e lego kgoboketšo ya tsebo ya tša kalafo ya Egipita yeo e lego ya go tloga mo e ka bago ka 1550 B.C.E. O na le dikalafo tše ka bago 700 bakeng sa mahloko a fapa-fapanego “go tloga tabeng ya go longwa ke kwena go ya bohlokong bja lenala la monwana wa leoto.” Bontši bja dikalafo di be di sa šome le gatee, eupša tše dingwe tša tšona e be e le tše kotsi ka go fetišiša. Bakeng sa go alafa ntho, e nngwe ya ditaelo e bolelela go dirišwa ga motswako o dirilwego ka mantle a batho wo o kopantšwego le ditlabelo tše dingwe.

⁵ Mongwalo wo wa dihlare tša tša kalafo tša Egipita o ile wa ngwalwa mo e ka bago ka nako e swanago le ya dipuku tša mathomo tša Beibele tšeo di bego di akaretša Molao wa Moše. Moše yo a belegwego ka 1593 B.C.E., o goletše Egipita. (Ekisodo 2:1-10) A godišitšwe lapeng la Farao, Moše o ile a “rutwa mabohlale ohle a Ba-Egipita.” (Ditiro 7:22) O be a tlwaelane le “dingaka” tša Egipita. (Genesi 50:1-3) Na mekgwa ya tšona ya tša kalafo yeo e sa thušego le e kotsi e ile ya tutuetša mengwalo ya gagwe?

6. Ke molao ofe wa bohlweki Molaong wa Moše woo o ka bonwago ke thutamahlale ya tša kalafo ya mehleng yeno e le o kwalago?

⁶ Ka mo go fapanego, Molao wa Moše o be o akaretša melao ya bohlweki yeo e ka tšewago ke thutamahlale ya kalafo ya mehleng yeno e le e kwalago. Ka mohlala, molao wa mabapi le mešaša ya tša bohlabani o be o nyaka gore mantle a epelwe kgole le mošaša. (Doiteronomio 23:13) Wo e be e le mogato wa tšhireletšo wo o tšwetšego pele kudu. O thušitše go boloka methopo ya meetse e sa šilafatšwa le go nea tšhireletšo malwetšing ao a bakwago ke dintši a shigellosis le malwetši a mangwe a letšhollo ao a sa dutšego a fetša maphelo a dimilione ngwaga o mongwe le o mongwe, kudu-kudu dinageng tšeo di hlabologago.

7. Ke melao efe ya bohlweki Molaong wa Moše yeo e bego e thuša go thibela go phatlalala ga malwetši a go fetela?

⁷ Molao wa Moše o be o na le melao e mengwe ya bohlweki yeo e bego e thuša go thibela go phatlalala ga malwetši a go fetela. Motho yo a bego a e-na le bolwetši goba a gononelwa gore o na le bolwetši bja go fetela o be a tswalelelwa. (Lefitiko 13:1-5) Diaparo goba dibjana tšeo di bego di ka kgoma phoofolo yeo e bego e hwile ka boyona (mohlomongwe e bolailwe ke bolwetši) di be di swanetše go hlatswiwa pele di ka dirišwa gape goba di senywe. (Lefitiko 11:27, 28, 32, 33) Motho le ge e le ofe yo a bego a kgoma setopo o be a lebelelwa a šilafetše gomme a swanelwa ke go dira tshepedišo ya tlhwekišo yeo e bego e akaretša go hlatswa diaparo tša gagwe le go hlapa. Nakong ya lebaka la matšatši a šupago a tšhilafalo, o be a swanetše go phema go kgoma ba bangwe ka mmele.—Numeri 19:1-13.

8, 9. Ke ka baka la’ng go ka bolelwa gore molao wa bohlweki Molaong wa Moše o be o le pele kudu go feta mehla ya wona?

⁸ Molao wo wa bohlweki o be o utolla bohlale bjo bo bego bo tšwetše pele kudu go feta mehla yeo. Thutamahlale ya tša kalafo ya mehleng yeno e ithutile mo gontši ka go phatlalala le go thibelwa ga bolwetši. Ka mohlala, dikaonefatšo tša tša kalafo lekgolong la bo-19 la nywaga di ile tša lebiša go thongweng ga mokgwa wa tša kalafo wa dibolaya-ditwatši—e lego bohlweki bja go fokotša malwetši a go fetela. Mafelelo e bile go theoga mo gogolo malwetšing a go fetela le mahu a pele ga nako. Ka ngwaga wa 1900 tekanyo e letetšwego ya nywaga ya go phela dinageng tše dintši tša Yuropa le United States e be e le ka tlase ga 50. Ga e sa le go tloga ka nako yeo, e oketšegile kudu e sego feela ka baka la tšwelopele ya tša kalafo go laoleng malwetši eupša gape ka baka la maemo a kaone a tša bohlweki le maphelo.

⁹ Lega go le bjalo, nywaga e dikete-kete pele thutamahlale ya tša kalafo e ithuta kamoo bolwetši bo phatlalalago ka gona, Beibele e neile ditaelo tša megato e kwalago ya tšhireletšo e le go itšhireletša bolwetšing. Ka mo go sa makatšego, Moše o be a ka bolela ka ba-Isiraele ka kakaretšo mehleng ya gagwe e le ba phelago nywaga e 70 goba e 80. (Psalme 90:10) Moše a ka ba a tsebile ka melao yeo ya bohlweki bjang? Beibele ka boyona e a hlalosa: Molao ‘o laeditšwe ka barongwa.’ (Ba-Galatia 3:19) Ee, Beibele ga se puku ya bohlale bja motho; ke puku e tšwago go Modimo.

Puku e Holago Bakeng sa Bophelo bja Mehleng Yeno

10. Gaešita le ge Beibele e feditšwe nywaga e ka bago 2000 e fetilego, ke eng seo e lego sa therešo ka keletšo ya yona?

¹⁰ Dipuku tšeo di neago keletšo di tle di fetwe ke nako gomme go se go ye kae di a boeletšwa goba tša tšeelwa sebaka ke tše dingwe. Eupša Beibele ke moswana-noši e le ka kgonthe. Psalme 93:5 e re: “Mabohlatse ’axo a botexile ruri.” Gaešita le ge Beibele e ile ya fetšwa mo e nyakilego go ba nywaga e 2000 e fetilego, mantšu a yona a sa šoma. Le gona a šoma ka mafelelo a lekanago go sa šetšwe mmala wa letlalo la rena goba naga yeo re dulago go yona. Ela hloko mehlala e mengwe ya keletšo ‘e botegilego kudu’ ya neng le neng ya Beibele.

11. Nywaga-some e mmalwa e fetilego, ke eng seo batswadi ba bantši ba bego ba dirilwe gore ba se dumele mabapi le tayo ya go laya bana?

¹¹ Nywaga-some e mmalwa e fetilego batswadi ba bantši—ba ile ba hlohleletšwa ke “dikgopolo tše difsa” tša mabapi le go godiša bana—ba be ba nagana gore “go iletša go be go ileditšwe.” Ba be ba boifa gore go beela bana mellwane go be go tla baka kgateletšo ya maikwelo le kgakanego. Baeletši ba nago le maikemišetšo a mabotse ba be ba phegelela gore batswadi ba tlogelele selo le ge e le sefe se se lego ka kua ga go phošolla bana ba bona ka boleta. The New York Times e bega gore ditsebi tše dintši tše bjalo bjale “di kgothaletša batswadi gore ba be thata ka mo go oketšegilego, gore ba boele ba laole.”

12. Lentšu la Segerika leo le fetoletšwego e le ‘tayo’ le bolela’ng, gomme ke ka baka la’ng bana ba nyaka tayo e bjalo?

¹² Lega go le bjalo, nako ka moka Beibele e be e dutše e nea keletšo e lebanyago le e leka-lekanego tabeng ya go tlwaetša bana. E eletša ka gore: “Bô-tata-xo-bana! Le se kê la befediša bana ba lena; sa lena a e bê xo ba etetša [“laya,” NW] ka xo ba ruta le xo ba eletša tša Morêna.” (Ba-Efeso 6:4) Lentšu la Segerika leo le fetoletšwego e le ‘tayo’ le bolela “kgodišo, tlwaetšo, thuto.” Beibele e bolela gore tayo goba thuto ke bohlatse bja lerato la botswadi. (Diema 13:24) Bana ba atlega ka tlase ga tlhahlo ya boitshwaro e lebanyago yeo e ba thušago go tšweletša kgethollo ya go kgetholla seo se nepagetšego le se se fošagetšego. Tayo e dirwago ka mo go swanetšego e ba thuša gore ba ikwe ba šireletšegile; e ba botša gore batswadi ba bona ba tshwenyega ka bona le ka mohuta wa motho yoo ba bago yena.—Bapiša le Diema 4:10-13.

13. (a) Ge go tliwa tayong, ke temošo efe yeo Beibele e e neago batswadi? (b) Ke tayo ya mohuta mang yeo Beibele e e kgothaletšago?

¹³ Eupša Beibele e lemoša batswadi tabeng ye ya tayo. Matla a taolo a batswadi ga se a swanela go dirišwa gampe. (Diema 22:15) Ga go ngwana yo a swanetšego go otlwa gasehlogo le ka mohla. Go hlokofatšwa mmeleng o šoro ga go na sebaka lapeng leo le phelago ka Beibele. (Psalme 11:5) Gaešita le bošoro maikwelong—mantšu a sa lokago, go swaya diphošo ka mehla le kgegeo e hlabago e lego tšeo ka moka di ka thubaganyago moya wa ngwana. (Bapiša le Diema 12:18.) Ka bohlale, Beibele e eletša batswadi gore: “Le se kê la befediša bana ba lena, xore ba se tširoxê [goba, “le tla ba nola moko,” Phillips].” (Ba-Kolose 3:21) Beibele e kgothaletša go gata megato e šireletšago. Go Doiteronomio 11:19 batswadi ba kgothaletšwa go diriša dinako tše di sa rulaganyetšwago ka mo go holago bakeng sa go nweletša ditekanyetšo tša boitshwaro le tša moya baneng ba bona. Keletšo e bjalo e kwalago go godišeng bana e loketše lehono go swana le ge e be e loketše mehleng ya Beibele.

14, 15. (a) Ke ka tsela efe Beibele e neago seo e lego go feta keletšo e bohlale? (b) Ke dithuto dife tša Beibele tšeo di ka thušago banna le basadi ba merafo e fapanego le ditšhaba gore ba lebelelane e le ba lekanago?

¹⁴ Beibele e nea seo se fetago keletšo e bohlale feela. Molaetša wa yona o a ipiletša pelong. Ba-Hebere 4:12 e re: “Lentšu la Modimo ké le le phelaxo, ké le matla; ka boxale le phala thšoša efe le efe ya maxale a mabedi; xomme le phololetša la bá la aroxanya pelo le môya, le malokololô le môkô; ’me le tseba xo fênyêka diakanyô le kxopolô tša pelo.” Ela hloko mohlala wa matla a tutuetšago a Beibele.

¹⁵ Lehono batho ba arogantšwe ke mapheko a morafo, botšhaba le moloko. Mapheko a bjalo a maitirelo a tlaleleditše go bolaweng ka bontši ga batho ba se nago molato dintweng lefaseng ka moka. Ka lehlakoreng le lengwe, Beibele e swere dithuto tše di thušago banna le basadi ba merafo le ditšhaba tše di fapanego go lebelelana e le ba lekanago. Ka mohlala, Ditiro 17:26 e re Modimo “ké Yêna a dirilexo xore meloko ka moka ya batho e tšwê mading a o tee.” Se se bontšha gore ka kgonthe go na le morafo o tee feela—morafo wa batho! Beibele e tšwela pele go re kgothaletša go “[ba] baetši ba Modimo,” yoo e bolelago ka yena gore: “Xa a bebe motho. Anthe dithšabeng ka moka ó kxahlwa ke ba ba mmoifaxo, xe ba dira tše di lokilexo.” (Ba-Efeso 5:1; Ditiro 10:34, 35) Tsebo ye e na le mafelelo a kopanyago go bao ba tsomago e le ka kgonthe go phela ka dithuto tša Beibele. E šoma ka gare-gare—ka pelong—ya senya mapheko a maitirelo ao a aroganyago batho. Na e šoma e le ka kgonthe lefaseng la lehono?

16. Laodiša phihlelo yeo e bontšhago gore Dihlatse tša Jehofa ke borwarre bja ditšhaba-tšhaba bja therešo.

¹⁶ Ruri e dira bjalo! Dihlatse tša Jehofa di tsebja kudu ka baka la borwarre bja tšona bja ditšhaba-tšhaba bjo bo kopanyago batho ba ditlogo tše di fapanego bao ka tlwaelo ba bego ba ka se be khutšong gotee. Ka mohlala, nakong ya dintwa tša meloko kua Rwanda, Dihlatse tša Jehofa tša moloko o mongwe di be di šireletša banababo tšona ba Bakriste le dikgaetšedi ba moloko o mongwe, di bea maphelo a tšona kotsing go seo. Tabeng e nngwe, Hlatse ya mo-Hutu e ile ya uta lapeng la yona lapa la ma-Tutsi la ba tshela go tšwa phuthegong ya gabo. Ka manyami, mafelelong lapa la ma-Tutsi le ile la hwetšwa gomme la bolawa. Ngwanabo rena wa mo-Hutu le lapa la gagwe bjale ba ile ba lebana le bogale bja babolai gomme ba ile ba swanelwa ke go tšhabela Tanzania. Diphihlelo tše dintši tše di swanago di ile tša begwa. Dihlatse tša Jehofa di dumela ka ntle le tika-tiko gore botee bjo bo bjalo bo kgonega ka baka la gore dipelo tša tšona di kgomilwe ka mo go tseneletšego ke matla a tutuetšago a molaetša wa Beibele. Gore Beibele e ka kgona go kopanya batho lefaseng le le le tletšego lehloyo ke bohlatse bjo matla bja gore e tšwa go Modimo.

Puku ya Boporofeta bja Therešo

17. Diporofeto tša Beibele di fapana bjang le dipolelelo-pele tša batho?

¹⁷ Petro wa Bobedi 1:20 e re: “[Ga go] porofetô e kaxo hlathollwa ka boithatêlô.” Baporofeta ba Beibele ga se ba ka ba hlahlobišiša mekgwa yeo e lego gona ditabeng tša lefase ke moka ba dira diphopholetšo tše di theilwego tsebong ya ditherešo mo go theilwego kwešišong ya bona ka noši ya ditiragalo tše. Le gona ga se ba ka ba bolela dipolelelo-pele tše sa kwalego tšeo di bego di ka dirwa gore di kwane le tiragalo le ge e le efe ya nako e tlago. Ka mohlala, a re eleng hloko boporofeta bja Beibele bjo e bego e le bjo bo lebanyago ka mo go sa tlwaelegago bjo bo boletšego e sa le pele selo se se fapanego le seo batho ba bego ba phela nakong yeo ba ka bego ba be ba se letetše.

18. Ke ka baka la’ng go se na pelaelo gore badudi ba Babele ba ile ba ikwa ba šireletšegile kudu, eupša ke eng seo Jesaya a bego a se boletše pele ka Babele?

¹⁸ Lekgolong la nywaga la bošupa B.C.E. Babele e be e le motse-mošate o bonalago e le o sa hlaselegego wa Mmušo wa Babele. Motse o be o dikaneditšwe ke Noka ya Eforate gomme meetse a noka a dirišetšwa go bopa moedi wa sephara le o išago le molokeloke wa mekero. Motse o be o bile o šireleditšwe ka tshepedišo e kgolo ya merako e hlatlaganego gabedi, o thekgilwe ka dibo tše dintši tša boiphemelo. Ga go na pelaelo gore badudi ba Babele ba be ba ikwa ba bolokegile. Lega go le bjalo, lekgolong la bo-seswai la nywaga B.C.E. gaešita le pele Babele e phagamela letagong la yona, moporofeta Jesaya o ile a bolela e sa le pele gore: ‘Babele . . . e tlo ribegetšwa bjalo ka Sodoma le Gomora mola e ribegetšwa ke Modimo. E tlo ba lešope go ya go ile e ka se hlwe e agwa neng le neng, le mo-Arabia a ka se tle a hloma mokutwana, go tlo hlokwa le moraka wa modiša.’ (Jesaya 13:19, 20) Ela hloko gore boporofeta ga se bja bolela feela e sa le pele gore Babele e be e tla senywa, eupša le gore e be e tla ba lešope go ya go ile. A polelelo-pele yeo e bego e ka bolelwa ka sebete gakaakang! Na Jesaya a ka ba a ile a ngwala boporofeta bja gagwe ka morago ga ge a bone Babele e sentšwego? Histori e araba ka gore aowa!

19. Ke ka baka la’ng boporofeta bja Jesaya bo be bo sa phethagatšwa ka mo go feletšego ka October 5, 539 B.C.E.?

¹⁹ Bošegong bja October 5, 539 B.C.E., Babele e ile ya wela go madira a ba-Meda le ba-Peresia ka tlase ga Korese yo Mogolo. Lega go le bjalo, boporofeta bja Jesaya bo be bo se bja phethagala ka mo go feletšego ka nako yeo. Ka morago ga go thopša ke Korese, Babele e bego e dulwa ke batho—gaešita le ge e be e le e nyatšegago—e ile ya tšwela pele ka nywaga-kgolo e mentši. Lekgolong la bobedi la nywaga B.C.E. mo e ka bago ka nako ya ge Lengwalo la go Phuthwa la Jesaya la Lewatleng le le Hwilego le ngwalollwa, ba-Pareta ba ile ba thopa Babele yeo ka nako yeo e bego e lebelelwa e le selo se bohlokwa kudu seo ditšhaba tše di bego di e dikologile di bego di se lwela. Radihistori wa mo-Juda Josephus o begile gore “palo e kgolo” ya ba-Juda e be e dula moo lekgolong la pele la nywaga B.C.E. Go ya ka The Cambridge Ancient History, bagwebi ba Palmyra ba ile ba hwetša koloni ya go rekiša e atlegilego Babele ka 24 C.E. Ka gona, gaešita le lekgolong la pele la nywaga C.E., Babele e be e se ya hlwa e senywa ka mo go feletšego; lega go le bjalo, puku ya Jesaya e be e feditšwe kgale pele ga moo.—1 Petro 5:13.

20. Ke bohlatse bofe bjo bo lego gona bja gore mafelelong Babele e ile ya ba “mokxobô [feela] wa mafsika”?

²⁰ Jesaya ga se a ka a phela gore a bone Babele e fetoga lešope. Eupša sa therešo go ya ka boporofeta, Babele mafelelong e ile ya ba “mokxobo [feela] wa mafsika.” (Jeremia 51:37) Go ya ka seithuti sa mo-Hebere Jerome (yo a belegwego lekgolong la bone la nywaga C.E.), mehleng ya gagwe Babele e be e le lefelo la batsomi moo “dibata tša mehuta ka moka” di bego di ralala gomme e sa le lešope go fihlela le lehono. Tsošološo le ge e le efe ya Babele e le go goga basepedi ba go boga naga e ka goketša baeng, eupša “mahloxedi a thitô le a modu” a Babele a fedišeditšwe sa ruri ka ge Jesaya a boletše e sa le pele.—Jesaya 14:22.

21. Ke ka baka la’ng baporofeta ba botegago ba ile ba kgona go bolela bokamoso e sa le pele ka go nepa mo go sa palelwego?

²¹ Moporofeta Jesaya ga se a dira phopholetšo e theilwego tsebong ya ditherešo tše itšego. Le gona ga se a ngwala gape histori gore a e dire gore e bonale e le boporofeta. Jesaya e be e le moporofeta wa therešo. Le baporofeta ba bangwe ka moka ba botegago ba Beibele ba be ba le bjalo. Ke ka baka la’ng banna ba ba be ba kgona go dira seo go bego go se na batho ba bangwe bao ba bego ba ka se dira—ba bolela bokamoso e sa le pele ka go nepa mo go sa palelwego? Karabo e molaleng. Diporofeto di be di e-tšwa go Modimo wa boporofeta, Jehofa ‘yo a kwatšago tša mafelelo e sa le mathomong a tšona.’—Jesaya 46:10, PK.

22. Ke ka baka la’ng re swanetše go dira gohle mo go lego matleng a rena go kgothaletša ba dipelo tše di botegago gore ba itlhahlobele Beibele?

²² Ka gona, na Beibele e swanelwa ke go hlahlobja? Re tseba gore go bjalo! Eupša batho ba bantši ga ba kgodišege. Ba tšweleditše dikgopolo ka Beibele gaešita le ge le ka mohla ba se ba ka ba e bala. Gopola moprofesara yo go boletšwego ka yena mathomong a sehlogo sa pele. O ile a dumela thuto ya Beibele gomme ka morago ga go hlahloba Beibele ka kelohloko a fihla phethong ya gore ke puku e tšwago go Modimo. Mafelelong o ile a kolobetšwa e le yo mongwe wa Dihlatse tša Jehofa gomme o hlankela e le mogolo lehono! A re direng gohle mo go lego matleng a rena go kgothaletša ba dipelo tše di botegago gore ba itlhahlobele Beibele gomme ba tšweletše kgopolo ka yona. Re a kgodišega gore ge ba itlhahlobela ka potego e le bona ka noši ba tla lemoga gore puku ye ya moswana-noši, e lego Beibele ka kgonthe ke puku ya batho ka moka!

Na o ka Hlalosa?

◻ O ka diriša bjang Molao wa Moše go bontšha gore Beibele ga e tšwe bathong?

◻ Ke melao efe ya motheo ya neng le neng ka Beibeleng yeo e holago bophelong bja mehleng yeno?

◻ Ke ka baka la’ng boporofeta bjo bo lego go Jesaya 13:19, 20 e ka se be bjo bo ngwadilwego ka morago ga taba?

◻ Ke eng seo re swanetšego go kgothaletša ba dipelo tše di botegago gore ba se dire gomme ka baka la’ng?

[Seswantšho go letlakala 17]

Moše o ile a ngwala melao ya bohlweki yeo e bego e le pele kudu go feta nako ya bona

[Lepokisi go letlakala 19]

Go Thwe’ng Ka Tšeo Di Sa Hlatselegego?

Beibele e na le dipolelo tše di fapa-fapanego tšeo go bonalago bohlatse bjo bo ikemetšego bo se gona bakeng sa tšona. Ka mohlala, seo e se bolelago ka tikologo e sa bonalego yeo e dulwago ke batho ba moya se ka se ke sa hlatselwa—goba go ganetšwa—go ya ka thutamahlale. Na ditšhupetšo tše bjalo tše sa hlatselegego di dira gore Beibele e ganetšane le thutamahlale?

Ye ke potšišo ye e bego e lebeletšane le rathutafase yo a ilego a thoma go ithuta Beibele le Dihlatse tša Jehofa nywageng e itšego e fetilego. O gopola gore: “Ke swanetše go dumela gore go amogela Beibele go be go le thata go nna mathomong ka gore ke be ke sa kgone go hlatsela dipolelo tše dingwe tša Beibele go ya ka thutamahlale.” Monna yo yo a botegago o ile a tšwela pele a ithuta Beibele gomme mafelelong a kgonthišega gore bohlatse bjo bo lego gona bo bontšha gore ke Lentšu la Modimo. O hlalosa gore: “Se se ile sa fokotša go hlologela go hlatsela taba e nngwe le e nngwe ya Beibele ka go ikemela. Motho yo a sekametšego thutamahlaleng o swanetše go ikemišetša go hlahloba Beibele go tšwa boemong bja moya, go sego bjalo a ka se amogele therešo le ka mohla. Thutamahlale e ka se letelwe gore e tla tiiša polelo e nngwe le e nngwe ya ka Beibeleng. Eupša taba feela ya gore dipolelo tše dingwe ga di hlatselege ga e bolele gore ke tša maaka. Selo sa bohlokwa ke gore kae le kae moo e hlatselegago gona go nepagala ga Beibele go a tiišwa.”