Letšatši La Jehofa Le Kgaufsi
“Kwang, lena bagolo! Sekegang tsebe, lena baagi ba naga ka moka!”—JOELE 1:2, PK.
1, 2. Ke ka baka la boemo bofe kua Juda moo Jehofa a ilego a budulela Joele gore a bolele boporofeta bja gagwe bjo matla?
“JOO, ’tšatši joo! Ka kxonthe ’tšatši la Morêna le kxaufsi; le tla byalo ka thšwal’lanyô ye e tšwaxo xo Ra-matla.” A tsebišo e matla gakaakang! E be e le molaetša wa Modimo go batho ba gagwe o tlišwa ke moporofeta wa gagwe Joele.
2 Mantšu ao a Joele 1:15 a ile a begwa Juda, mohlomongwe mo e ka bago ka ngwaga wa 820 B.C.E. Meboto e metalana ka nako yeo e be e kgabišitše naga. Dienywa le mabele di be di atile. Mafulo e be e le a nabilego le a matala. Lega go le bjalo, selo se sengwe se be se tloga se fošagetše. Borapedi bja Baali bo be bo atile Jerusalema le nageng ya Juda. Batho ba be ba kopanela meletlong ya mašata ya botagwa pele ga modimo yo wa maaka. (Bapiša le 2 Koronika 21:4-6, 11.) Na Jehofa o be a tla dumela se ka moka se tšwela pele?
3. Jehofa o ile a lemoša mabapi le eng, gomme ditšhaba di swanetše go itokišeletša eng?
3 Puku ya Beibele ya Joele ga e tlogele pelaelo ka karabo. Jehofa Modimo o be a tla lwela bogoši bja gagwe le go kgethagatša leina la gagwe le lekgethwa. Letšatši la Jehofa le legolo le be le le kgaufsi. Ka nako yeo Modimo o be a tla phetha kahlolo godimo ga ditšhaba ka moka “moeding wa Josafate.” (Joele 3:12, PK) Anke di itokišetše ntwa ya go lwa le Yo Matla-ohle, Jehofa. Le rena re lebane le letšatši le legolo la Jehofa. Ka gona anke re hlahlobišišeng mantšu a Joele a boporofeta bakeng sa mehla ya rena le nakong e fetilego.
Tlhaselo ya Dikhunkhwane
4. Tiragalo yeo Joele a lemošitšego ka yona e be e tla ba e kgolo gakaaka’ng?
4 Jehofa o bolela ka moporofeta wa gagwe gore: “Kwang, lena bagolo! Sekegang tsebe, lena baagi ba naga ka moka! Afa ditaba tše di kile tša ba gona mehleng ya lena? goba mehleng ya botata weno? Di botšeng bana ba lena, gomme bana ba lena ba di nee bana ba bona, gomme bana ba bona ba botše ditlogolo tše di [sa tlago].” (Joele 1:2, 3, PK) Ba bagolo le batho ka moka ba be ba ka letela selo se sengwe seo se sa kago sa direga nakong ya bophelo bja bona goba mehleng ya bagologolo ba bona. E be e tla ba se se makatšago kudu mo e lego gore se be se tla anegwa go fihla molokong wa boraro! Tiragalo ye e makatšago e be e le eng? Gore re hwetše seo, anke re akanyeng eka re morago kua mehleng ya Joele.
5, 6. (a) Hlalosa kotlo yeo Joele a porofetago ka yona. (b) Mothopo wa kotlo yeo e be e le mang?
5 Theetša! Joele o kwa modumo wa go šutša o le kgole. Leratadima le a fsifala, gomme modumo woo o tšhošago o a oketšega ge lefsifsi le aparela ka godimo. Ke moka leru leo le swanago le muši le a theoga. Ke motšhitšhi wa dikhunkhwane tše dimilione. A tshenyo e kaakang yeo di e bakago! Bjale ela hloko Joele 1:4. Bahlasedi bao e lego dikhunkhwane ga se feela ditšie tša go khuduga tšeo di nago le maphego. Ga go bjalo le gatee! Tše dingwe tšeo le tšona di tlago ke motšhitšhi wa ditšie o swerwego ke tlala tšeo di sepelago fase tše di se nago maphego. Di tlišwa ke phefo, ditšie di fihla gatee-tee, gomme modumo wa tšona o swana le wa dikoloi tša ntwa. (Joele 2:5) Ka baka la kganyogo ya tšona ya megabaru ya dijo, dimilione tša tšona di ka fetola ka lebelo seo e nyakilego e le paradeise go se dira lešoka.
6 Tše dingwe gape tšeo di sepe-sepelago ke diboko—e lego boemo bja dirurubele ge e sa le diboko. Dihlopha tše dikgolo tša diboko tše di swerwego ke tlala di ka kgotha matlakala a dimela ka diripana-ripana, letlakala ka letlakala go ba go fihla ge dimela di nyaka di apotšwe botalana bja tšona. Bontši bja seo di se tlogelago ditšie di a se ja. Le gona, seo se tlogelwago ke ditšie maphene a sepelago ka lebelo a se fediša e le ka kgonthe. Eupša ela se hloko: Go Joele kgaolo 2, temana 11 Modimo o hlalosa motšhitšhi wa ditšie e le “dirá tša xaxwe.” Ee, ke yena e bego e le Mothopo wa kotlo ya ditšie tšeo di bego di tla senya naga le go baka tlala e šoro. Neng? Pejana ga “letšatši la Jehofa.”—PK.
“Hee Lena Mataxwa, Phafoxang”!
7. (a) Boemo bja baetapele ba bodumedi ba Juda e be e le bofe? (b) Baetapele ba Bojakane lehono ba boemong bjo bo swanago le bjola bja baetapele ba bodumedi ba Juda bjang?
7 Baetapele ba bodumedi ba Juda e lego lešaba le le nyatšegago ba hlaolwa ka mo go kgethegilego ge taelo e ntšhwa: “Hee lena mataxwa, phafoxang Le llê! Lena banwi ba sedilá, xôlôlang, Le llêlê sebelá sa xo Le xoma molomong.” (Joele 1:5) Ee, matagwa a moya a Juda a ile a botšwa gore ‘a phafoge,’ a hlaphogelwe. Eupša o se ke wa nagana gore ye ke histori ya bogologolo feela. Gona bjale, pele ga letšatši le legolo la Jehofa, ka tsela ya seswantšhetšo baruti ba Bojakane ba tagilwe ke sebela mo e lego gore ba nyaka ba sa lemoge taelo ye e tšwago go Yo Godimo-dimo. Ba tla makala gakaakang ge ba phafošwa boemong bja bona bja go se kwe selo bja botagwa ke letšatši le legolo le le le boifišago la Jehofa!
8, 9. (a) Joele o hlalosa bjang ditšie le mafelelo a kotlo ya tšona? (b) Lehono ditšie di emela bomang?
8 Bona motšhitšhi woo o mogolo wa ditšie! “Naxa ya-ka e šwahlêlwa ke sethšaba se se matla se se sa balwexo, sa mênô a ditau, sa mehlaxare e kexo ké ya tau-thsadi. Se ladišitše thšemo ya-ka ya merara, se rôbaxanya mexó ya-ka, sa e xolla sa e uša fase, thabe tša šala è le mekhumi. Llang wa mosetsana mo-apara-mankxeretla mo-llêla-mong-wa-xaxwe à s’e ngwana.”—Joele 1:6-8.
9 Na bjo e fo ba boporofeta bja mabapi le “sethšaba” sa ditšie, motšhitšhi wa ditšie tšeo di hlaselago Juda? Aowa, go na le mo gontši go feta moo. Bobedi go Joele 1:6 le Kutollo 9:7, batho ba Modimo ba emelwa ke ditšie. Motšhitšhi wa mehleng yeno wa ditšie ga se a mangwe ge e se madira a bahlabani a ditšie tše di tloditšwego tša Jehofa, tšeo mo nakong ye di tladitšwego ke “dinku tše dingwê” tša Jesu tše ka bago 5600 000. (Johane 10:16) Na ga o thabele go ba karolo ya lešaba le le legolo la barapedi ba Jehofa?
10. Mafelelo a kotlo ya ditšie go Juda ke afe?
10 Go Joele 1:9-12 re bala ka mafelelo a kotlo ya ditšie. Metšhitšhi yeo e latelanago e baka tshenyo e feletšego nageng. Ka go hloka mabele, beine le makhura, baperisita ba sa botegego ga ba kgone go tšwetša mediro ya bona pele. Gaešita le naga ka boyona e hlokofetše, ka gobane ditšie di e hlobodišitše mabele, gomme dihlare tša dienywa di be di tlogetšwe di se na dienywa. Ka ge dirapa tša merara di sentšwe, ga go sa na le beine bakeng sa matagwa ao a go tagwa ke beine a Baali ao a bego a bile e le matagwa a moya.
‘Lena Baperisita, . . . Llang’
11, 12. (a) Ke bomang bao ba ipolelago gore ke baperisita ba Modimo lehono? (b) Baetapele ba bodumedi ba Bojakane ba kgongwa bjang ke kotlo ya mehleng yeno ya ditšie?
11 Theetša molaetša wa Modimo go baperisita bao ba arogilego: “Hee lena baperisita, tšwarang mankxeretla Le llê. Lena ba-hlankêla-aletare, xôlôlang.” (Joele 1:13) Phethagatšong ya pele ya boporofeta bja Joele, baperisita ba ba-Lefi ba be ba hlankela aletareng. Eupša go thwe’ng ka phethagatšo ya mafelelo? Lehono, baruti ba Bojakane ba iphile matla a go hlankela aletareng ya Modimo, ba ipolela gore ke badiredi ba gagwe, “baperisita” ba gagwe. Lega go le bjalo, ke eng seo se diregago mo nakong ye ge ditšie tša mehleng yeno tša Modimo di dutše di gatela pele?
12 Ge “baperisita” ba Bojakane ba bona batho ba Jehofa ba le mafolofolo gomme ba e-kwa temošo ya bona ya go lemoša ka kahlolo ya Modimo, ba a ferekana. Ba itshetla dihuba ka go tshwenyega le ka go galefišwa ke mafelelo a senyago a molaetša wa Mmušo. E bile ba a golola ge mehlape ya bona e ba tšwa ka diatleng. Ka ge mafulo a bona a hlobotšwe, a ba fetše bošego ba apere mekotla, ba llela go lahlegelwa ga bona ke tšhelete ya ditseno. Go se go ye kae, ba tla lahlegelwa le ke mešomo ya bona! Ge e le gabotse, Modimo o ba botša gore ba lle bošego ka moka ka gobane bofelo bja bona bo kgaufsi.
13. Na Bojakane ka moka bo tla arabela ka mo go kgahlišago temošong ya Jehofa?
13 Go ya ka Joele 1:14 (NW), kholofelo ya bona e nnoši e ithekgile ka go itshola ga bona le go llela “Jehofa bakeng sa thušo.” Na re ka letela gore sehlopha ka moka sa baruti ba Bojakane se retologele go Jehofa? Ga go bjalo le gatee! Batho ka o tee ka o tee gare ga bona ba ka arabela temošong ya Jehofa. Eupša boemo bja tlala ya moya bja baetapele ba ba bodumedi le ditho tša dikereke tša bona e le sehlopha bo tla tšwela pele. Moporofeta Amosi o boletše e sa le pele gore: “Tsebang-xê! Ó r’yalo Morêna Mong ’a bohle. Xo tla matšatši a ke tl’o xo romêla tlala mo faseng, e sexo tlala ya boxôbê, e sexo lenyôra la meetse; e tlo ba xo lla xo kwa Lentšu la Morêna.” (Amosi 8:11) Ka lehlakoreng le lengwe, re leboga gakaakang monyanya o humilego wa moya woo Modimo ka lerato a o neago ka “molaki e a bôtêxaxo yo bohlale”!—Mateo 24:45-47.
14. Kotlo ya ditšie ke ketapele ya eng?
14 Kotlo ya ditšie e be e le ketapele ya selo se sengwe, e bile e sa le yona. Ya eng? Joele o re botša ka mo go kwalago ka gore: “Joo, ’tšatši joo! Ka kxonthe ’tšatši la Morêna le kxaufsi; le tla byalo ka thšwal’lanyô ye e tšwaxo xo Ra-matla.” (Joele 1:15) Ditlhaselo tša lefase ka bophara tša motšhitšhi wa ditšie wa Modimo lehono di bontšha gabotse gore letšatši le legolo le le le boifišago la Jehofa le kgaufsi. Ruri batho ba dipelo tše di lokilego ka moka ba hlologetše letšatši leo le le kgethegilego la kahlolo nakong ya ge kahlolo ya Modimo e phethwa malebana le ba kgopo gomme Jehofa a tšwelela a fentše bjalo ka Mmuši wa Legohle.
15. Ka baka la boemo bjo bo nyamišago bja naga, bao ba kwago ditemošo tša Modimo ba arabela bjang?
15 Go etša ge Joele 1:16-20 e bontšha, dijo di ile tša fedišwa Juda ya bogologolo. Go bile bjalo le ka lethabo. Nywako ya polokelo e ile ya šala e se na selo gomme dišego tša swanelwa ke go rutlollwa. Ka go hloka mafulo ka ge ditšie di be di jele dimela tša naga, dikgomo di be di lelera ka kgakanego gomme mehlape ya dinku e ile ya loba. A bošula bjo bokaakang! Gare ga maemo a bjalo, go thwe’ng ka Joele? Go ya ka temana 19 o itše: “Morêna, ke llêla Wene.” Le lehono, ba bantši ba kwa ditemošo tša Modimo gomme ba llela go Jehofa Modimo ka tumelo.
“Letšatši la Jehofa le E-tla”
16. Ke ka baka la’ng “baaxi ba naxa” ba swanetše go tšhoga?
16 Theetša taelo ye e tšwago go Modimo: “’Phalafala a di llê motseng wa Tsione! Hlabang mokxoši thabeng-kxêthwa ya-ka, Le thšoxê, lena baaxi ba naxa ka moka.” (Joele 2:1) Ke ka baka la’ng ba be ba swanetše go arabela ka tsela yeo? Boporofeta bo araba ka gore: “Xobane ’tšatši la [Jehofa le e-tla, PK], le kxaufsi. Ké ’tšatši la kxampi ya lefsifsi, ké ’tšatši la thiti ya leru le leso; se ka mahuba ma-wêla-dithaba.” (Joele 2:1, 2) Go na le maikwelo a kgonthe a go akgofa ga nako ao a kgokaganego le letšatši le legolo la Jehofa.
17. Naga le batho ba Juda ba ile ba kgongwa bjang ke kotlo ya ditšie?
17 Akanya ka go kgoma ga pono ya moporofeta ge ditšie tšeo di sa hwego matwa di be di fetola tšhemo ya kgonthe ya Edene lešoka la leganata. Theetša tlhaloso ya madira a ditšie: “Ba swana le dipitsi x’O ba bôna, ba lebelô bo-ka banamedi. Modumô wo e kexo ké mošitô o kwala kwa xodimo xa dithaba, modumô wo e kexo ké wa mollô xe xo fsa dihlaka; ké sethšaba se se matla xe se e-tšwa dirá. Xe se fihla, batho ba a xakanêxa, ba xaloxa difahloxô, ba a sêhlafala.” (Joele 2:4-6) Nakong ya kotlo ya ditšie mehleng ya Joele, tlalelo ya barapedi ba Baali e ile ya gola, gomme go ata ga pelaelo go be go ka bonwa difahlegong tša bona.
18, 19. Modiro wa batho ba Modimo lehono o bile o swanago le kotlo ya ditšie bjang?
18 Ga go selo seo se ilego sa thiba ditšie tšeo di rulagantšwego le tšeo di sa lapego. Di be di kitima “wa baxale” gomme di bile di namela merako. Ge e ba ‘tše dingwe tša tšona di wela gare ga dibetša, ga di gome.’ (Joele 2:7, 8) A tlhaloso e kwagalago gabotse ya boporofeta ya madira a mehleng yeno a Modimo a ditšie tša seswantšhetšo! Lehono le gona, madira a Jehofa a ditšie a tšwela pele a gatela pele thwii. Ga go ‘morako’ wa kganetšo wo o a šitišago. Ga a kwanantšhe potego ya ona go Modimo eupša a ikemišeditše go lebeletšana le lehu, go etša ge go dirile Dihlatse tše dikete tšeo di ilego tša “wêla xare xa dibetša” ka baka la go gana go bolela gore phološo e tšwa go Hitler nakong ya pušo ya Jeremane ya Nazi.
19 Madira a mehleng yeno a Modimo a ditšie a neile bohlatse bjo bo tseneletšego ‘motseng’ wa Bojakane. (Joele 2:9) A dirile bjalo lefaseng ka moka. A sa dutše a fenya mapheko, a tsena magaeng a dimilione, a batamela batho ditseleng, a bolela le bona ka mogala le go ikopanya le bona ka tsela le ge e le efe yeo e kgonegago ge a dutše a bolela molaetša wa Jehofa. Ka kgonthe, a abile dikgatišo tša Beibele tše dimilione tše dikete gomme a sa dutše a tla aba tše dingwe tše dintši kudu bodireding bja ona bjo bo sa kgaotšego—bobedi phatlalatša le ka ntlo le ntlo.—Ditiro 20:20, 21.
20. Ke mang yo a thekgago ditšie tša mehleng yeno gomme ka mafelelo afe?
20 Joele 2:10 e bontšha gore motšhitšhi o mogolo wa ditšie o swana le leru leo le ka širago letšatši, kgwedi le dinaledi. (Bapiša le Jesaya 60:8.) Na go na le pelaelo le ge e le efe ya gore ke mang yo a thekgago madira a a bahlabani? Go phuleletša modumo wa dikhunkhwane, re kwa mantšu a a Joele 2:11: “Morêna ó roma medumô ya xaxwe xe xo tla dirá tša xaxwe, ké madira a mantši-ntši, ké a matla; ké a xo phêtha se Yêna a se boletšexo. Xobane ’tšatši la Morêna ké le lexolo, le šiiša kudu; ké mang a tl’o xo le kxôna?” Ee, Jehofa Modimo o roma madira a gagwe a bahlabani a ditšie gona bjale—pele ga letšatši la gagwe le legolo.
“Morêna xa a Diexiše”
21. Mafelelo e tla ba afe ge ‘letšatši la Jehofa le e-tla bjalo ka lehodu’?
21 Ka go swana le Joele, moapostola Petro o ile a bolela ka letšatši le legolo la Jehofa. O ngwadile gore: “’Tšatši leo la Morêna le tlo tla bo-ka lehodu le-tla-bošexo; xomme ka lôna maxodimo a tlo široxa ka lešata la modumô o moxolo; xomme tše lefase le bopilwexo ka tšôna di tlo fedišwa ke mollô, xwa tlo fsa xwa fêlêla lefase le medirô ka moka e lexo mo xo lôna.” (2 Petro 3:10) Ka tlase ga tutuetšo ya Sathane Diabolo, “maxodimo” a pušo e kgopo a buša godimo ga “lefase,” ke gore, batho bao ba arogilego go Modimo. (Ba-Efeso 6:12; 1 Johane 5:19) Magodimo le lefase tše tša seswantšhetšo di ka se ke tša phologa phišo ya bogale bja Modimo nakong ya letšatši le legolo la Jehofa. Go e na le moo, di tla tšeelwa sebaka ke “maxodimo a mafsa le lefase le lefsa, moo xo axilexo tokô.”—2 Petro 3:13.
22, 23. (a) Re swanetše go arabela bjang pontšhong ya Jehofa ya go bontšha go se fele pelo? (b) Re swanetše go arabela bjang go go ba kgaufsi ga letšatši la Jehofa?
22 Ka baka la ditšhitišo ka moka tša mehleng yeno le diteko tša tumelo, re ka lahlegelwa ke pono ya go akgofa ga mehla ya rena. Eupša ge ditšie tša seswantšhetšo di dutše di gatela pele le go feta, batho ba bantši ba arabela molaetšeng wa Mmušo. Gaešita le ge Modimo a dumeletše nako bakeng sa se, ga se ra swanela go se kwešiše go se fele pelo ga gagwe e le go diega. “Morêna xa a diexiše tše a di boletšexo a re di tlo tla, bo-ka ba bangwê xe ba re ké xo diexiša; sa xaxwe ké xo se Le fêlêle pelo, xobane xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.”—2 Petro 3:9.
23 Ge re dutše re letile letšatši le legolo la Jehofa, anke re tšeeleng godimo mantšu a Petro ao a ngwadilwego go 2 Petro 3:11, 12: “Byalo xe dilô tše e le tša xo tlo xašanywa, xo swanetše ruri-ruri xe Le le ba xo swara ka tsela e kxêthwa ya borapedi, Lè le ba xo letêla le xo phafoxêla xo tla xa letšatši leo la Modimo, la xe maxodimo a tlo fedišwa à thšumilwe, le tše lefase le bopilwexo ka tšôna tša tlo fsa tša toloxa.” Mekgwa ye le ditiro ka ntle le pelaelo di akaretša gore re sepedišane le madira a ditšie a Jehofa ka go ba le karolo ka tsela e nago le morero le e tsepamego go boleleng ditaba tše di lokilego tša Mmušo pele bofelo bo e-tla.—Mareka 13:10.
24, 25. (a) O arabela bjang tokelong ya go tšea karolo modirong wa madira a ditšie a Jehofa? (b) Joele o rotoša potšišo efe e bohlokwa?
24 Madira a bahlabani a ditšie a Modimo a ka se ke a emiša modiro wa ona go ba go fihla ge letšatši le legolo le le le boifišago la Jehofa le thoma. Gona go ba gona ga madira a a sa thibelegego a ditšie ke bohlatse bjo bogolo bja gore letšatši la Jehofa le kgaufsi. Na ga o thabele go hlankela gare ga ditšie tše di tloditšwego tša Modimo le bagwera ba tšona tlhaselong ya mafelelo pele ga letšatši le legolo le le le boifišago la Jehofa?
25 Letšatši la Jehofa e tla ba le legolo gakaakang! Ga go makatše ge go rotošwa potšišo e rego: “Ke mang yo a kago le emela?” (Joele 2:11, NW) Potšišo ye le tše dingwe tše dintši di tla ahla-ahlwa dihlogong tše pedi tše di latelago.
Na o ka Hlalosa?
◻ Ke ka baka la’ng Jehofa a ile a nea temošo ka kotlo ya dikhunkhwane malebana le Juda?
◻ Phethagatšong ya mehleng yeno ya boporofeta bja Joele, ke bomang bao e lego ditšie tša Jehofa?
◻ Baetapele ba Bojakane ba arabela bjang kotlong ya ditšie, gomme ba bangwe ba bona ba ka phologa bjang ditla-morago tša yona?
◻ Kotlo ya ditšie e bile e kgolo gakaakang lekgolong la bo-20 la nywaga gomme e tla tšwela pele go fihla neng?
[Seswantšho go letlakala 8]
Locust: FAO photo/G. Tortoli; locust swarm: FAO photo/Desert Locust Survey
[Seswantšho go letlakala 9]
Barren tree: FAO photo/G. Singh
[Seswantšho go letlakala 9]
Kotlo ya dikhunkhwane e be e le ketapele ya selo se sengwe seo e bego e bile e le se bohloko le go feta
[Seswantšho go letlakala 10]
Jehofa Modimo ke yena a thekgago kotlo ya mehleng yeno ya ditšie
[Seswantšho go letlakala 12]