Seremo Seo Se Fihleletšwego Bakeng sa Barati Ba Lentšu La modimo

Ka 1998 go ile gwa fihlelelwa seremo se bohlokwa bakeng sa barati ka moka ba Lentšu la Modimo. Ngwageng woo, go ile gwa gatišwa kopi ya milione wa bo-100 ya “New World Translation of the Holy Scriptures.” Ka baka leo e fetoga e nngwe ya Dibeibele tšeo di abjago ka bophara tšeo di tšweleditšwego lekgolong le la nywaga!

MODIRO wo o mogolo ke o lemogegago kudu-kudu ge go naganwa gore ge phetolelo ye e be e lokollwa, e be e solwa o šoro. Lega go le bjalo, ga se ya phologa feela eupša e bile e tšwetše pele kudu, ya tsena malapeng a dimilione​—le dipelong​—lefaseng ka moka! Phetolelo ye ya moswana-noši e tšwa kae? Ke mang yo a e ngwadilego? Le gona o ka holega bjang ka go e diriša?

Ke ka Baka La’ng go Nyakega Phetolelo e Mpsha?

Lebakeng la nywaga ya ka godimo ga e lekgolo, Watch Tower Bible and Tract Society, e lego mokgatlo wa molao wo o emelago Dihlatse tša Jehofa, e ile ya aba Dibeibele. Lega go le bjalo, ke ka baka la’ng Dihlatse tša Jehofa di ile tša bona go nyakega gore go tšweletšwe phetolelo e nngwe ya Lentšu la Modimo? Puku ya So Many Versions?, yeo e ngwadilwego ke Sakae Kubo le Walter Specht e re: “Ga go na phetolelo ya Beibele yeo le ka mohla e ka lebelelwago e le yona ya makgaola-kgang. Diphetolelo di swanetše go sepedišana le kgolo tabeng ya go ithuta Beibele le go feto-fetogeng ga leleme.”

Lekgolong le la nywaga go bile le kgolo e lekanego kwešišong ya Sehebere, Segerika le se-Arama​—maleme ao Beibele e bego e ngwadilwe ka ona mathomong. Gape, go utolotšwe mengwalo ya Beibele yeo e lego ya kgajana le e nepagetšego kutšwanyana go feta yeo e bego e dirišwa ke meloko ya pejana ya bafetoledi ba Beibele. Ka go rialo lehono Lentšu la Modimo le kgona go fetolelwa ka mo go nepagetšego kutšwanyana go feta le ge e le neng pele! Ka gona, e bile ka lebaka le kwagalago gore Komiti ya Phetolelo ya Beibele ya Lefase le Lefsa e bopše bakeng sa go thoma go fetolela Beibele ka maleme a mehleng yeno.

Ka 1950 go ile gwa gatišwa phetolelo ya leleme la Seisemane ya New World Translation of the Christian Greek Scriptures. Sehlogo sa yona ka bosona se be se fapane ka mo go feletšego le mokgwa o tlwaelegilego, se gana go bitšwa ga Beibele e le yeo e bopšago ka testamente ya “Kgale” le e “Mpsha.” Ngwaga-someng o latetšego, go ile gwa gatišwa dikarolo tša Mangwalo a Sehebere ka dikarolwana-karolwana. Ka 1961 go ile gwa lokollwa Beibele ya Seisemane e feletšego ka bolumo e tee.

Gabotse-botse ke mang yo a fetoletšego Beibele ye ya moswana-noši? Morokami (wa Seisemane) wa September 15, 1950, o itše: “Banna bao ba bopago komiti ya bofetoledi ba bontšhitše kganyogo ya bona . . . ya gore maina a bona e dule e le khupa-marama, e bile ka mo go kgethegilego ga ba nyake gore a gatišwe ba sa dutše ba phela goba ge ba šetše ba hwile. Morero wa phetolelo ye ke go godiša leina la Modimo yo a phelago wa therešo.” Baseka-seki ba bangwe ba ile ba bolela gore puku ye e swanetše go tšewa feela e le modiro wa bo-maithutwane, eupša ga se bohle bao ba ilego ba amogela pono e bjalo e feteletšego. Alan S. Duthie o ngwala gore: “Ge e ba re tseba gore bafetoledi goba bagatiši ba phetolelo e itšego ya Beibele ke bomang, na seo se re thuša gore re dire phetho ya ge e ba phetolelo yeo e le e botse goba e mpe? Ga go bjalo. Ga go na seo se ka tšeelago go hlahloba dika tša phetolelo e nngwe le e nngwe ka boyona sebaka.”a

Dibopego tša Moswana-noši

Babadi ba dimilione ba dirile sona seo gomme ba hweditše gore New World Translation ga se yeo e balegago feela eupša e bile ke yeo e nepagetšego ka mo go feletšego. Bafetoledi ba yona ba be ba fetolela go tšwa malemeng a mathomo a Sehebere, se-Arama le Segerika, ba diriša mengwalo e kaone-kaone yeo e hwetšagalago.b Go ile gwa ba gwa bontšhwa šedi e sa tlwaelegago go fetolelweng ga mongwalo wa bogologolo ka go lebanya ka mo go ka kgonegago, eupša ka leleme leo le bego le tla kwešišega gabonolo. Ka go dumelelana le seo, diithuti tše dingwe di ile tša reta phetolelo ye ka baka la potego ya yona le go nepagala ga yona. Ka mohlala, Andover Newton Quarterly ya January 1963 e itše: “Phetolelo ya Testamente e Mpsha ke bohlatse bja go ba gona ga yona mokgatlong wa diithuti tšeo di swanelegago bakeng sa go swaragana ka bohlale le mathata a mantši a go fetolela Beibele.”

Bafetoledi ba ile ba tšweletša lehlakore le lefsa la kwešišo ya Beibele. Mangwalo a Beibele ao nakong e fetilego a bego a sa kwešišwe gabotse a ile a kwagala gabotse kudu. Ka mohlala, lengwalo leo le gakantšhago go Mateo 5:3, leo le rego “ba lehlôxônôlô ké ba ba humanexilexo mo moyeng,” le ile la fetolelwa ka tsela e kwalago gakaone gore: “Go thabile bao ba lemogago dinyakwa tša bona tša moya.” E bile New World Translation ke yeo e sa feto-fetogego le e swanago go fetoleleng ga yona mantšu a motheo. Ka mohlala, lentšu la Segerika psy·kheʹ, le fetoletšwe e le moya (soul) gohle moo le tšwelelago gona. Ka baka leo, babadi ba kgona go lemoga kapejana gore ka go fapana le dithutong tša bodumedi, moya ga se wo o sa hwego!​—Mateo 2:​20; Mareka 3:4; Luka 6:9; 17:​33, bapiša le NW.

Go Bušetša Leina la Modimo Sebakeng sa Lona

Karolo e kgahlišago kudu ya New World Translation e akareditše go bušetšwa ga leina la Modimo, Jehofa sebakeng sa lona. Dikoping tša bogologolo tša Beibele ya Sehebere, leina la Modimo le emelwa ke ditumammogo tše nne tšeo di ka fetolelwago ka go lebanya e le YHWH goba JHVH. Leina le le le hlaolago le tšwelela ka makga a e ka bago a 7 000 go seo se bitšwago Testamente ya Kgale e nnoši. (Ekisodo 3:​15, NW; Psalme 83:​18, NW) Go molaleng gore Mmopi wa rena o be a rerile gore barapedi ba gagwe ba tsebe ba be ba diriše leina leo!

Lega go le bjalo, dipoifo tša tumela-khwele di ile tša dira gore ba-Juda ba kgaotše go diriša leina la Modimo. Ka morago ga lehu la baapostola ba Jesu, bangwalolodi ba Mangwalo a Segerika ba ile ba thoma go tšeela leina la Modimo le le hlaolago sebaka ka mantšu a Segerika a Kyʹri·os (Morena) goba The·osʹ (Modimo). Ka manyami, bafetoledi ba mehleng yeno ba tšweleditše pele mokgwa wo o hlomphollago Modimo, e lego go tloša leina la Modimo Dibeibeleng tše dintši kudu ba ba ba uta le gore Modimo o na le leina. Ka mohlala, go Johane 17:6 go na le mantšu a Jesu a rego: “Ke tsebaditše ’ina l’axo.” Lega go le bjalo, Today’s English Version e e fetolela ka gore: “Ke go tsebaditše.”

Diithuti tše dingwe di thekga go tlošwa ga leina la Modimo ka gobane mmiletšo wa lona o nepagetšego ga o tsebje. Lega go le bjalo, maina a Beibele a tlwaelegilego a bjalo ka Jeremia, Jesaya le Jesu ka mehla a bitšwa ka ditsela tšeo di sa swanego tlwaa le mmiletšo wa ona wa mathomo wa Sehebere. Ka ge sebopego sa leina Jehofa e le tsela ya molao ya go fetolela leina la Modimo​—le gona e le seo se tlwaetšwego ke batho ba bantši—​go ganetšwa ga go dirišwa ga lona ga go na mohola.

Komiti ya Phetolelo ya Beibele ya Lefase le Lefsa e ile ya gata mogato o matla wa go diriša leina Jehofa bobedi dikarolong tša Mangwalo a Sehebere le a Segerika. Ba bile le mohlala wa se diphetolelong tša pele tša baromiwa tšeo di bego di ngwaletšwe batho ba Amerika Bogare, Pacific Borwa le dinaga tša ka Bohlabela. Lega go le bjalo, tirišo e bjalo ya leina la Modimo ga se kgahlego feela ya tša thuto. Go tseba leina la Modimo ke gabohlokwa tabeng ya go mo tseba bjalo ka motho. (Ekisodo 34:​6, 7) New World Translation e kgothaleditše babadi ba dimilione go diriša leina la gagwe!

Go Fihlelela Babadi Bao ba sa Balego Seisemane

Magareng ga 1963 le 1989, New World Translation e ile ya thoma go hwetšagala, e feletše goba e le karolo ya yona, ka maleme a mangwe a lesome. Lega go le bjalo, mošomo wa bofetoledi e be e le o boima, woo o ilego wa dira gore mešomo e mengwe e tšee lebaka la nywaga e 20 goba go feta moo. Ka gona, ka 1989 go ile gwa hlongwa Lefapha la Ditirelo tša Bofetoledi ntlong-kgolo ya lefase ya Dihlatse tša Jehofa. Ka tlase ga tlhahlo ya Komiti ya Bongwadi ya Sehlopha se Bušago, lefapha le le ile la thoma go akgofiša modiro wa go fetolela Beibele. Go ile gwa hlangwa mokgwa wa go fetolela wo o bego o akaretša go ithuta mantšu a Beibele ka thekinolotši ya computer. Thulaganyo ye e šoma bjang?

Gatee-tee ge Komiti ya Bongwadi e neile tumelelo ya gore go fetolelwe Beibele lelemeng le lengwe, e kgetha sehlopha sa Bakriste ba ineetšego gore ba šome e le sehlopha sa bofetoledi. Dihlopha di ka tšweletša diphetolelo tše di kwagalago go phala kamoo motho yo a šomago a nnoši a ka dirago ka gona. (Bapiša le Diema 11:​14.) Ka kakaretšo, setho se sengwe le se sengwe sa sehlopha ke seo se hweditšego phihlelo ka go fetolela dikgatišo tša Mokgatlo. Ka morago sehlopha se hwetša tlwaetšo e feletšego melaong ya motheo ya bofetoledi bja Beibele le tirišong ya mananeo a computer ao a hlametšwego modiro woo ka mo go kgethegilego. Computer ga e dire modiro wa bofetoledi, eupša e kgona go dira gore sehlopha se hwetše tsebišo e bohlokwa le go se thuša gore se boloke pego ya diphetho tša sona.

Mošomo wa go fetolela Beibele o na le megato e mebedi. Mogatong wa pele, bafetoledi ba newa lelokelelo la mantšu le dipolelwana tšeo di dirišwago ka go New World Translation ya Seisemane. Mantšu a swanago le a Seisemane a bjalo ka “atone,” “atonement” le “propitiation” a kgoboketšwa gotee, e le go lemoša bafetoledi ka dibopego tše di sa lemogegego tša tlhaloso ya ona. Ba kgoboketša lelokelelo la mantšu a leleme la setlogo leo go fetolelelwago go lona. Lega go le bjalo, ka dinako tše dingwe mofetoledi a ka thatafalelwa ke go fetolela temana. Thulaganyo ya go diriša nyakišišo ka computer e nea mofetoledi tsebišo mabapi le dipolelwana tša Segerika le Sehebere gomme e mo dira gore a kgone go tsena dikgatišong tša Watch Tower.

Ge mošomo o tsena mogatong wa wona wa bobedi, dipolelwana tše di kgethilwego tša leleme la setlogo di tsenywa ke motšhene lengwalong la Beibele. Se se tšweletša go nepagala mo gogolo le go se feto-fetoge phetolelong. Lega go le bjalo, mongwalo wo o tšwelelago ka tirišo ye ya “search and replace” ga o balege. Go swanetše go dirwe mošomo o mogolo gore go ngwalwe le go ngwalolla ditemana tša Beibele lefsa gore di balege ka go thelela.

Thulaganyo ye ya go fetolela e ipontšhitše e le e šomago ka mo go makatšago. Sehlopha se sengwe se kgonne go fetolela Mangwalo ka moka a Sehebere ka nywaga e mebedi feela. Bapiša sehlopha se le seo se ilego sa šoma ka leleme le le swanago le sa sona se sa diriše computer. Mošomo o ile wa tšea nywaga e 16. Go fihla ga bjale, Mangwalo a Bakriste a Segerika a gatišitšwe ka maleme a mangwe a 18 ga e sa le go tloga ka 1989. Gona bjale New World Translation e a hwetšagala, e feletše goba e le karolo ya yona, ka maleme a 34. Ka go rialo tekanyo ya ka godimo ga 80 lekgolong ya Dihlatse tša Jehofa e na le bonyenyane Mangwalo a Bakriste a Segerika ka leleme la gabo tšona.

United Bible Societies e bega gore malemeng a lefase a 6 500, dikarolo tša Beibele di hwetšagala ka a 2 212 feela.c Lega go le bjalo, bafetoledi ba ka bago 100 ba šomela go tšweletša New World Translation ya Mangwalo a Sehebere le a Segerika ka maleme a 11 le a 8 ka go latelelana. Thato ya Modimo ke “xore batho bohle ba phološwê ba fihlêlê tsebô ya therešô.” (1 Timotheo 2:4) Ka ntle le pelaelo New World Translation e tla tšwela pele e kgatha tema e kgolo tabeng ye.

Ka gona re thabela gore phetolelo ye e fetile seremo sa dikopi tše dimilione tše 100, gomme re rapelela gore go tšweletšwe tše dingwe tše dimilione tše dintši nakong e tlago. Re go kgothaletša gore o itlhahlobele yona ka bowena. O tla thabela dikarolo tše dintši tše di kgethegilego: mongwalo o bonalago gabotse, dihlogo tša matlakala, tlhatlamano yeo e ka go thušago gore o hwetše ditemana tšeo di tlwaelegilego, mebapa yeo e bontšhago gabotse le taba e kgahlišago ya dihlogo tša mametletšo. Sa bohlokwa-hlokwa ke gore o ka bala Beibele ye o kgodišegile gore e fetiša dipolelo tša Modimo ka mo go nepagetšego ka leleme la gago.

[Mengwalo ya tlase]

[Seswantšho go letlakala 29]

“Phetolelo ya Testamente e Mpsha ke bohlatse bja go ba gona ga yona mokgatlong wa diithuti tše di swanelegelago go swaragana ka bohlale le mathata a mantši a go fetolela Beibele.”​—ANDOVER NEWTON QUARTERLY, JANUARY 1963

[Seswantšho go letlakala 30]

“Diphetolelo di swanetše go sepedišana le kgolo tabeng ya go ithuta Beibele le go feto-fetogeng ga leleme”

[Seswantšho go letlakalae 30]

DIITHUTI DI RETA NEW WORLD TRANSLATION

EDGAR J. GOODSPEED, mofetoledi wa “Testamente e Mpsha” ya Segerika ka go An American Translation, o ngwadile mabapi le New World Translation of the Christian Greek Scriptures ka lengwalong la December 8, 1950 gore: “Ke kgahlegela modiro wa batho ba lena wa bodiredi, go ba ga wona wo o dirwago lefaseng ka bophara gomme ke kgahlwa kudu ke phetolelo yeo e beago taba ka go lebanya, e botegago le e kwagalago. E bonagatša tekanyo e kgolo ya go ithuta ka mo go tseneletšego mo go nago le teka-tekano, ka ge ke kgodišegile ka seo.”

Setsebi sa Sehebere le Segerika Alexander Thomson se ngwadile gore: “Go bonagala bofetoledi e le modiro wa diithuti tše di nago le bokgoni le tše bohlale, tšeo di katanetšego kudu go tšweletša bogolo bja seo se bolelwago ke lengwalo la Segerika go ya kamoo leleme la Seisemane le bego le ka kgona go bolela ka gona.”​—The Differentiator, April 1952, matlakala 52-7.

Moprofesara Benjamin Kedar, seithuti sa mo-Hebere kua Isiraele o boletše ka 1989 gore: “Nyakišišong ya-ka ya thuto ya maleme mabapi le Beibele ya Sehebere le diphetolelo tša gona, gantši ke tsopola kgatišo ya Seisemane yeo e tsebjago e le New World Translation. Ka go dira bjalo, ke ile ka hwetša gore ke ikwa ke kgodišegile leboelela gore puku ye e bontšha boiteko bjo bo botegago bja go fihlelela kwešišo ya taba e ngwadilwego yeo e nepagetšego ka mo go ka kgonegago.”