Botee bja Kgonthe bja Bokriste—Bo Fihlelelwa Bjang?
1 Ke’ng seo se ka kopanyago batho ba fetago dimilione tše tshela ba tšwago dinageng tše 234 le dihlopheng tša maleme tše ka bago 380? Ke borapedi bja Jehofa Modimo feela. (Mika 2:12; 4:1-3) Dihlatse tša Jehofa di tseba go tšwa phihlelong ya motho ka noši gore botee bja kgonthe bja Bokriste ke selo sa kgonthe lehono. Re le “mohlape o tee” ka tlase ga “modiši o tee” re ikemišeditše go gana moya wo wa karogano wa lefase.—Joh. 10:16; Ba-Ef. 2:2.
2 Morero wa Modimo wo o sa folotšego ke wa gore dibopiwa ka moka tše bohlale di kopane borapeding bja therešo. (Kut. 5:13) Ka ge a be a tseba bohlokwa bja se, Jesu o ile a rapela ka phišego bakeng sa botee bja barutiwa ba gagwe. (Joh. 17:20, 21) Ke bjang yo mongwe le yo mongwe wa rena a ka tsenyago letsogo boteeng bja phuthego ya Bokriste?
3 Kamoo Botee bo Fihlelelwago ka Gona: Ka ntle le Lentšu la Modimo le moya wa gagwe, botee bja Bokriste bo ka se fihlelelwe. Go diriša seo re se balago ka Beibeleng go dumelela moya wa Modimo go šoma ka bolokologi maphelong a rena. Se se re thuša “xo tiêlêla boteeng bya môya, setlêmô è le kaxišô.” (Ba-Ef. 4:3) Se re tutueletša go rwalana goba go kgotlelelana ka lerato. (Ba-Kol. 3:13, 14; 1 Pet. 4:8) Na o godiša botee ka go naganišiša ka Lentšu la Modimo letšatši le letšatši?
4 Thomo ya rena ya go bolela le go dira barutiwa le yona e a re kopanya. Ge re šoma le ba bangwe bodireding bja Bokriste, “[re] tšea kxopu [re] hlabanêla tumêlô ya Ebangedi,” re ba “bathuši modirong wa therešô.” (Ba-Fil. 1:27; 3 Joh. 8) Ge re dira bjalo, ditlemo tše di tlemaganyago tša lerato ka gare ga phuthego di a matlafatšwa. Ke ka baka la’ng o sa laletše yo mongwe yo o sa kago wa šoma le yena morago bjale gore a sepele le wena go ya bodireding bja tšhemo bekeng ye?
5 A tokelo e kaakang ya go ba karolo ya borwarre bo nnoši feela bja therešo bja ditšhaba-tšhaba lefaseng lehono! (1 Pet. 5:9) Morago bjale, batho ba bantši ba ile ba bona botee bjo bja lefase ka bophara la mathomo Dikopanong tša Ditšhaba-tšhaba tša “Neang Modimo Letago.” Eka yo mongwe le yo mongwe wa rena a ka tsenya letsogo boteeng bjo bjo bohlokwa ka go bala Lentšu la Modimo letšatši le letšatši, ka go rarolla mathata ka lerato le ka go bolela ditaba tše dibotse “ka bopelo-tee.”—Ba-Roma 15:6.