Go Nea Bohlatse go ba Leloko—Bjang?
1. Ke ka baka la’ng re swanetše go ba le temogo ge re nea ba leloko bohlatse?
1 Go tla thabiša kudu gakaakaang go tsena lefaseng le lefsa le ba leloko la rena, re le gotee le bona borapeding bja Jehofa! Ka go nea bohlatse go ba leloko, tebelelo ye e thabišago e ka fetoga selo sa kgonthe. Lega go le bjalo, go dira bjalo ka tsela e lapološago go nyaka temogo. Molebeledi yo mongwe wa tikologo o ile a lemoga gore: “Bao ba tsošago kgahlego go ba leloko ka go ba nea bohlatse ganyenyane-ganyenyane ba ba le mafelelo a mabotse.” Re ka dira bjang se?
2. Go kgahlegela ba leloko e le ka kgonthe go ka re thuša bjang gore re kgone go tsoša kganyogo ya bona ya go nyaka go tseba?
2 Tsoša Kgahlego ya Bona: Naganišiša e sa le pele ka kamoo o kago tsoša kgahlego ya ba leloko ka gona. (Die. 15:28) Ba kgahlegela eng gomme ba kgomegile ka eng? Ba lebeletšane le ditlhohlo dife? Mohlomongwe o ka ba bontšha sehlogo se sengwe goba wa bolela ka Lengwalo le ipiletšago tabeng yeo e ba kgahlago kudu. Ge e ba ba leloko ba sa dule kgaufsi le moo o dulago, mohlomongwe o ka dira se ka go ba ngwalela goba ka go ba leletša mogala. Bjala dipeu tša therešo ntle le go ba botša dilo tše dintši gomme ithekge ka Jehofa bakeng sa gore dipeu tšeo di gole.—1 Ba-Kor. 3:6.
3. Kgahlego yeo ba leloko la rena ba nago le yona go rena e ka re kgorela tsela bjang bakeng sa go ba nea bohlatse?
3 Jesu o ile a laela monna yoo a ilego a mo ntšha matemona gore: “Boêla xaê xo ba xeno, O ba botšê tše kxolo tše Morêna a Xo dirilexo tšôna, ka mo a Xo xauxetšexo.” (Mar. 5:19) Nagana fela ka kamoo se se swanetšego go ba se ile sa kgahla ba leloko la gagwe ka gona! Gaešita le ge o ka se be le phihlelo e bjalo e makatšago, mohlomongwe ba leloko ba kgahlegela mediro ya gago goba ya bana ba gago. Go ba botša ka polelo yeo o e neilego Sekolong sa Bodiredi sa Pušo ya Modimo, kopano yeo o bilego go yona, leeto la ge o be o le Bethele goba selo se se kgahlišago seo se go diragaletšego go ka go kgorela tsela ya go boledišana le bona ka mo go oketšegile ka Jehofa le mokgatlo wa gagwe.
4. Ke mafokodi afe ao re swanetšego go a phema ge re nea ba leloko bohlatse?
4 E-ba le Temogo: Ge o nea ba leloko bohlatse, phema go ba botša dilo tše dintši ka nako e tee. Ngwanabo rena yo mongwe ge a gopola nakong ya ge a be a thoma go ithuta Beibele, o dumela gore: “Ke ile ka hlalosetša mma ka mo e ka bago ka selo se sengwe le se sengwe seo ke bego ke ithutile sona ka Beibeleng gomme se gantši se be se tsoša dingangišano, kudu-kudu le tate.” Gaešita le ge wa leloko a bontšha go kgahlegela molaetša wa Beibele, mo arabe ka tsela yeo e tla dirago gore a nyake go tseba mo go ntši. (Die. 25:7) Ka mehla boledišana le bona ka tlhompho, ka boleta gomme o be le pelo go etša ge o be o tla dira bjalo ge o boledišana le motho yo o sa mo tsebego bodireding.—Ba-Kol. 4:6.
5. Re swanetše go dira’ng ge e ba ba leloko ba sa arabele ka tshwanelo ge re ba nea bohlatse?
5 Nakong e nngwe ba leloko la Jesu ba be ba nagana gore o a gafa. (Mar. 3:21) Lega go le bjalo, ka morago ba bangwe ba bona e ile ya ba badumedi. (Dit. 1:14) Ge e ba maiteko ao o a dirilego mathomong a go boledišana le ba leloko ka therešo a sa atlege, o se ke wa lahlela toulo. Maemo a bona le tsela yeo ba lebelelago dilo ka yona di ka fetoga. Tšwela pele o nyaka sebaka se sengwe sa go ba botša ka ntlha e nngwe yeo e ka tsošago kgahlego ya bona. O ka ba le lethabo la go ba thuša go thoma go sepela tseleng e išago bophelong bjo bo sa felego.—Mat. 7:13, 14.