Dinotlelo tše Pedi tše di Išago Lenyalong le le Swarelelago

1, 2. (a) Lenyalo le be le rulaganyeditšwe go tšea nako e kaaka’ng? (b) Se se kgonega bjang?

GE Modimo a be a kopanya monna le mosadi ba pele lenyalong, go be go se na sešupo sa gore tlamo e be e tla ba ya nakwana feela. Adama le Efa ba be ba swanetše go ba gotee bophelo ka moka. (Genesi 2:24) Tekanyetšo ya Modimo bakeng sa lenyalo le le hlomphegago ke go kopanya monna o tee le mosadi o tee. Ke feela boitshwaro bjo bo gobogilego bja botona le botshadi bja yo mongwe wa balekane goba bja bona ka bobedi bjo bo neago mabaka a Mangwalo a tlhalo ka kgonagalo ya go tsena lenyalong gape.—Mateo 5:32.

² Na go a kgonega gore batho ba babedi ba dule gotee ka lethabo ka nako e telele ka mo go sa lekanyetšwago? Ee, gomme Beibele e hlaola ditherešo tše pedi tše bohlokwa goba dinotlelo tšeo di thušago gore se se kgonege. Ge e ba monna gotee le mosadi ba di diriša, ba tla kgonyolla mojako o išago lethabong le ditšhegofatšong tše dintši. Dinotlelo tše ke dife?

SENOTLELO SA PELE

3. Ke mehuta efe e meraro ya lerato yeo e swanetšego go hlagolelwa ke balekane ba lenyalo?

³ Senotlelo sa pele ke lerato. Ka mo go kgahlišago, go na le mehuta e fapanego ya lerato yeo e hlaolwago ka Beibeleng. O mongwe ke maikwelo a borutho a motho ka noši bakeng sa motho yo mongwe, e lego mohuta wa lerato wo o lego gare ga bagwera ba pelo-bohloko. (Johane 11:3) O mongwe ke lerato leo le golago gare ga ditho tša lapa. (Ba-Roma 12:10) Wa boraro ke lerato leo motho a ka bago le lona go motho wa bong bjo bo sa swanego le bja gagwe. (Diema 5:15-20) Go ba gona, mehuta ye ka moka e swanetše go hlagolelwa ke monna le mosadi. Eupša go na le mohuta wa bone wa lerato, woo o lego bohlokwa go feta e mengwe.

4. Mohuta wa bone wa lerato ke ofe?

⁴ Lelemeng la mathomo la Mangwalo a Bakriste a Segerika, lentšu bakeng sa mohuta wo wa bone wa lerato ke a·gaʹpe. Lentšu leo le dirišitšwe go 1 Johane 4:8, moo re botšwago gore: “Modimo ké Yêna leratô.” Ka kgonthe, “rena a re Mo rateng, xobane [Modimo] ó re ratile pele.” (1 Johane 4:19) Mokriste o hlagolela lerato le le bjalo pele bakeng sa Jehofa Modimo gomme ka morago a le hlagolela go magagabo. (Mareka 12:29-31) Lentšu a·gaʹpe le bile le dirišwa go Ba-Efeso 5:2, yeo e rego: “Le tšeê ka tsela ya leratô, byalo ka Kriste xe Yêna a Le ratile, a ikxafa ka ’baka la lena.” Jesu o itše mohuta wo wa lerato o be o tla hlaola balatedi ba gagwe ba therešo: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô [a·gaʹpe].” (Johane 13:35) Gape ela hloko tirišo ya a·gaʹpe go 1 Ba-Korinthe 13:13: “Ké moka, di šalaxo di le xôna ké tumelô, le kholofêlô le leratô, tše tharo tšé. Xomme se sexolo mo xo tšôna ké leratô [a·gaʹpe].”

5, 6. (a) Ke ka baka la’ng lerato e le le legolo go feta tumelo le kholofelo? (b) Ke mabaka afe a mangwe ao ka ona lerato le tlago go thuša go dira gore lenyalo e be le le swarelelago?

⁵ Ke’ng seo se dirago gore lerato le la a·gaʹpe e be le le fetago tumelo le kholofelo? Le laolwa ke melao ya motheo—melao ya motheo e lokilego—yeo e hwetšwago ka Lentšung la Modimo. (Psalme 119:105) Ke go kgomega mo go hlokago boithati ka go dira ba bangwe seo se nepagetšego le se se lokilego go ya ka pono ya Modimo, go sa šetšwe gore moamogedi o bonala a swanela seo goba go se bjalo. Lerato le le bjalo le dira gore balekane ba lenyalo ba latele keletšo ya Beibele e rego: “Le fêlê Lè rwalana; Le lebalêlanê xe xo na le e a naxo le taba le e mongwê; bo-ka Kriste xe a Le lebaletše, le lena Le dirê ka mokxwa woo.” (Ba-Kolose 3:13) Banyalani ba ba ratanago ba na le “leratanô [a·gaʹpe] le tletšexo, xobane leratô le bipa dikaroxô tšohle,” e bile ba a le hlagolela. (1 Petro 4:8) Ela hloko gore lerato le bipa diphošo. Ga le di tloše, ka ge go se na motho yo a sa phethagalago yo a ka hlokago phošo.—Psalme 130:3, 4; Jakobo 3:2.

⁶ Ge lerato le le bjalo la go rata Modimo le la go ratana le hlagolelwa ke batho ba babedi bao ba nyalanego, lenyalo la bona le tla swarelela gomme ya ba le le thabišago ka gobane “leratô xa le fele neng le neng.” (1 Ba-Korinthe 13:8) Lerato ke “yôna tlêmô ya botlalô.” (Ba-Kolose 3:14) Ge e ba le nyalane, wena le molekane wa gago le ka hlagolela bjang mohuta wo wa lerato? Balang Lentšu la Modimo gotee, gomme le boleleng ka lona. Ithuteng mohlala wa Jesu wa lerato gomme le leke go mo ekiša, go nagana le go dira bjalo ka yena. Go oketša moo, e-bang gona dibokeng tša Bokriste, moo Lentšu la Modimo le rutwago. Rapelelang thušo ya Modimo gore a le thuše go hlagolela mohuta wo wo o phagamego wa lerato, leo e lego seenywa sa moya o mokgethwa wa Modimo.—Diema 3:5, 6; Johane 17:3; Ba-Galatia 5:22; Ba-Hebere 10:24, 25.

SENOTLELO SA BOBEDI

7. Tlhompho ke’ng, gomme ke mang yo a swanetšego go bontšha tlhompho lenyalong?

⁷ Ge e ba batho ba babedi bao ba nyalanego ba ratana e le ka kgonthe, gona le go hlomphana ba tla hlomphana, gomme tlhompho ke senotlelo sa bobedi se se išago lenyalong le le thabišago. Tlhompho e hlaloswa e le “go naganela ba bangwe, go ba godiša.” Lentšu la Modimo le eletša Bakriste ka moka go akaretša banna le basadi ka gore: “Le rakanê pele ka xo xodišana.” (Ba-Roma 12:10) Moapostola Petro o ngwadile gore: “Lena banna, tšwelang pele le dula le [basadi ba lena] ka mokgwa o swanago go ya ka tsebo, le ba nea kgodišo bjalo ka ge eka ke sebjana se se fokolago, motho wa mosadi.” (1 Petro 3:7, NW) Mosadi o eletšwa gore “yêna a boifê monna.” (Ba-Efeso 5:33) Ge e ba o nyaka go godiša motho yo mongwe, o ba yo botho go motho yoo, o hlompha seriti sa motho yoo le dipono tšeo di bolelwago, gomme o ikemišeditše go phethagatša kgopelo le ge e le efe e kwagalago yeo e dirwago go wena.

8-10. Ke ditsela dife tšeo ka tšona tlhompho e tlago go thuša go dira gore tlemo ya lenyalo e be e tiilego le e thabišago?

⁸ Bao ba kganyogago go thabela lenyalo le le thabišago ba bontšha balekane ba bona tlhompho ka go ‘se šetše tša go ikhola, eupša ba šetša tša go hola [balekane ba bona].’ (Ba-Filipi 2:4) Ga ba naganele seo se lokilego go bona feela—e lego seo e bego e tla ba boithati. Go e na le moo ba naganela seo e lego se se kaone kudu le go balekane ba bona. Ka kgonthe ba etiša seo pele.

⁹ Tlhompho e tla thuša balekane ba lenyalo go amogela go fapana ga dipono. Ga se mo go kwagalago go letela gore batho ba babedi ba be le dipono tše di swanago ka selo se sengwe le se sengwe. Seo mo gongwe se ka bago bohlokwa go monna se ka no se be bohlokwa ka mo go swanago go mosadi, gomme seo mosadi a se ratago e ka no se be seo monna a se ratago. Eupša yo mongwe le yo mongwe o swanetše go hlompha dipono le dikgetho tša yo mongwe, ge feela tše di le ka gare ga mellwane ya melao le melao ya motheo ya Jehofa. (1 Petro 2:16; bapiša le Filemone 14.) Go feta moo, yo mongwe le yo mongwe o swanetše go hlompha seriti sa yo mongwe ka go se mo nyatše ka dipolelo goba metlae, e ka ba phatlalatša goba ka thopeng.

¹⁰ Ee, lerato la go rata Modimo le la go ratana le go hlomphana ke dinotlelo tše pedi tše bohlokwa tše di išago lenyalong le le atlegilego. Di ka dirišwa bjang go tše dingwe tša dikarolo tše bohlokwa kudu bophelong bja lenyalo?

BOHLOGO BJO BO SWANAGO LE BJA KRISTE

11. Go ya ka Mangwalo ke mang yo e lego hlogo lenyalong?

¹¹ Beibele e re botša gore monna o bopilwe a e-na le dika tšeo di bego di tla mo dira hlogo e atlegilego ya lapa. Ka baka leo, monna o be a tla ikarabela pele ga Jehofa ka boiketlo bja moya le bja mmele bja mosadi wa gagwe le bana. O be a tla swanelwa ke go dira diphetho tše di leka-lekanego tšeo di bonagatšago seo thato ya Jehofa e lego sona gomme a ba mohlala o mobotse wa boitshwaro bja go boifa Modimo. “Lena Basadi, Le bê ba ba kwaxo banna ba lena, byalo ka xe Le e-kwa Morêna. Xobane monna ké hlôxô ya mosadi, byalo ka xe Kriste è le Yêna hlôxô ya phuthêxô.” (Ba-Efeso 5:22, 23) Lega go le bjalo, Beibele e bolela gore monna le yena o na le hlogo, Motho yo a nago le matla a taolo godimo ga gagwe. Moapostola Paulo o ngwadile gore: “Byale ke rata xe Le tseba xore hlôxô ya monna mang le mang ké Kriste; ’me hlôxô ya mosadi ké monna; hlôxô ya Kriste ké Modimo.” (1 Ba-Korinthe 11:3) Monna yo bohlale o ithuta mokgwa wa go diriša bohlogo ka go ekiša hlogo ya gagwe, Kriste Jesu.

12. Ke mohlala ofe o mobotse woo Jesu a ilego a o bea bobedi wa go bontšha boikokobetšo le go diriša bohlogo?

¹² Jesu le yena o na le hlogo, e lego Jehofa, gomme o ikokobeletša Yena ka mo go swanetšego. Jesu o itše: “Xa ke nyake se Nna ke se rataxo, ke nyaka se se ratwaxo ke E a nthomilexo.” (Johane 5:30) A mohlala o mobotse gakaakang! Jesu ke “tháka-letswálô yá dibopya tšohle.” (Ba-Kolose 1:15) O ile a ba Mesia. E be e tla ba Hlogo ya phuthego ya Bakriste ba ba tloditšwego le Kgoši e kgethilwego ya Mmušo wa Modimo, yeo e lego ka godimo ga barongwa ka moka. (Ba-Filipi 2:9-11; Ba-Hebere 1:4) Go sa šetšwe boemo bjo bo bjalo bjo bo phagamego le ditebelelo tše di phagamego, monna yo e lego Jesu o be a se bogale, e se yo a sa feto-fetogego le maemo goba e le yo a nyakago dilo ka šiši ka go fetišiša. E be e se mogateledi, a fela a gopotša barutiwa ba gagwe gore ba be ba swanetše go mo kwa. Jesu e be e le yo lerato le wa kwelobohloko, kudu-kudu go bao ba gateletšwego. O itše: “Tlang xo Nna bohle ba Le lapišitšwexo, ba Le imêlwaxo; Nna ke tlo Le khutšiša [“lapološa,” NW]. Le ithwešê yoko ya-ka, Le rutwê ke Nna; xobane ke yo boló le wa pelo e kokobetšexo; ’me Le tlo hwetša khutšô ya meôya ya lena. Xobane yoko ya-ka xa e robe, morwalô wa-ka ké o bohwêfê.” (Mateo 11:28-30) Go be go thabiša go ba gotee le yena.

13, 14. Monna yo lerato o tla diriša bjang bohlogo bja gagwe ka go ekiša Jesu?

¹³ Monna yo a kganyogago bophelo bjo bo thabišago bja lapa o dira gabotse ge a naganišiša ka dika tše dibotse tša Jesu. Monna yo botse ga a bogale e bile ga se yo a gatelelago, yo a dirišago bohlogo bja gagwe ka mo go fošagetšego e le molamo wa go tšhošetša mosadi wa gagwe. Go e na le moo, o a mo rata le go mo godiša. Ge e ba Jesu e be e le “wa pelo e kokobetšexo,” gona monna o na le mabaka a oketšegilego le go feta a go ba bjalo ka gobane ka go se swane le Jesu, yena o dira diphošo. Ge a di dira o nyaka kwešišo ya mosadi wa gagwe. Ka baka leo, monna yo a ikokobeditšego o dumela diphošo tša gagwe, gaešita le ge mantšu, “Tshwarelo; o be o nepile,” a ka ba thata go a bolela. Mosadi o tla hwetša go le bonolo kudu go hlompha bohlogo bja monna yo a ipoeditšego le yo a ikokobeditšego go feta bja monna wa moikgogomoši le wa senganga. Ka lehlakoreng le lengwe, mosadi yo a hlomphago le yena o kgopela tshwarelo ge a fošitše.

¹⁴ Modimo o bopile mosadi a e-na le dika tše dibotse tšeo a ka di dirišago go tlaleletša lenyalong le le thabišago. Monna yo bohlale o tla lemoga se gomme a ka se ke a mo gatelela. Basadi ba bantši ba na le tshekamelo ya go ba le kwelobohloko e kgolo le go kgomega ka ba bangwe kudu, e lego dika tšeo di nyakegago bakeng sa go hlokomela lapa le go tiiša ditswalano tša batho. Gantši mosadi ke setsebi sa paala tabeng ya go dira legae lefelo le le kgahlišago leo go ka dulwago go lona. “Mosadi wa sethakxa” yo a hlaloswago go Diema kgaolo 31 o be a e-na le dika tše dintši tše di kgahlišago le ditalente tše dibotse kudu, gomme lapa la gagwe le ile la holwa ka mo go tletšego ke tšona. Ka baka la’ng? Ka gobane pelo ya monna wa gagwe “e dula è mmotile.”—Diema 31:10, 11.

15. Monna a ka bontšha bjang lerato le tlhompho tša go swana le tša Kriste go mosadi wa gagwe?

¹⁵ Ditlogong tše dingwe matla a taolo a monna a gatelelwa kudu, mo e lego gore gaešita le go mmotšiša potšišo go lebelelwa e le go se bontšhe tlhompho. A ka swara mosadi wa gagwe mo e nyakilego go ba bjalo ka lekgoba. Go diriša bohlogo mo go bjalo mo go fošagetšego go feleletša ka tswalano e fokolago, e sego le mosadi wa gagwe feela eupša gape le Modimo. (Bapiša le 1 Johane 4:20, 21.) Ka lehlakoreng le lengwe, banna ba bangwe ba hlokomologa go etelela pele ba dumelela basadi ba bona ba laola lapa. Monna yo a ikokobeletšago Kriste ka tshwanelo ga a sware mosadi wa gagwe gampe goba go mo amoga seriti. Go e na le moo, o ekiša lerato le le hlokago boithati la Jesu, gomme o dira go etša ge Paulo a eleditše: “Banna, ratang basadi ba lena, byalo ka xe Kriste a ratile phuthêxô, a ikxafa ka ’baka la yôna.” (Ba-Efeso 5:25) Kriste Jesu o be a rata balatedi ba gagwe kudu mo a ilego a ba hwela. Monna yo botse o tla leka go ekiša boemo bjo bjalo bja kgopolo bja go hloka boithati, a tsoma sa go hola mosadi wa gagwe, go e na le go nyaka dilo ka šiši go yena. Ge monna a ikokobeletša Kriste gomme a bontšha lerato le tlhompho tše di swanago le tša Kriste, mosadi wa gagwe o tla tutueletšega go ikokobeletša yena.—Ba-Efeso 5:28, 29, 33.

BOIKOKOBETŠO BJA MOSADI

16. Ke dika dife tšeo mosadi a swanetšego go di bontšha tswalanong ya gagwe le monna wa gagwe?

¹⁶ Nakwana e itšego ka morago ga gore Adama a bopše: “Jehofa Modimo a iša pele a re: ‘Ga go botse gore monna a tšwele pele a nnoši. Ke ya go mo direla mothuši, e le motlatši wa gagwe.’” (Genesi 2:18, NW) Modimo o bopile Efa e le “motlatši,” e sego e le mophenkgišane. Lenyalo le be le se la swanela go ba bjalo ka sekepe seo se nago le balaodi ba babedi. Monna o be a swanetše go diriša bohlogo bjo lerato, gomme mosadi o be a swanetše go bontšha lerato, tlhompho le go ikokobetša ka go rata.

17, 18. Ke ditsela dife tše dingwe tšeo ka tšona mosadi e ka bago mothuši wa kgonthe go monna wa gagwe?

¹⁷ Lega go le bjalo, mosadi yo mobotse o dira se se fetago go ikokobetša feela. O leka go ba mothuši wa kgonthe, go ba yo a thekgago monna wa gagwe diphethong tšeo a di dirago. Go ba gona, seo se ba bonolo go mosadi ge e ba a dumelelana le diphetho tša monna. Eupša gaešita le ge a sa dumelelane le tšona, thekgo ya gagwe ya mafolofolo e ka thuša go dira gore phetho ya monna e be le mafelelo a atlegago kudu.

¹⁸ Mosadi a ka thuša monna wa gagwe gore e be hlogo e botse ka ditsela tše dingwe. A ka bontšha tebogo ya go leboga maiteko a monna a go etelela pele go e na le go mo ntšha diphošo goba go mo dira gore a ikwe gore a ka se ke a mo kgotsofatša. Ge a dirišana le monna wa gagwe ka tsela e nepagetšego, mosadi o swanetše go gopola gore “môya wa bolêta le leaxô. Ké tšôna tše Modimo a bônaxo è le tše bohlôkwa,” e sego feela mahlong a monna wa gagwe. (1 Petro 3:3, 4; Ba-Kolose 3:12) Go thwe’ng ge e ba monna e se modumedi? Go sa šetšwe gore ke yena goba go se bjalo, Mangwalo a kgothatša basadi ka gore, “ba rate banna ba bona, ba rate bana ba bona, e be baloti ba nywako ya bona, ba botho ba ipoetšago ka tlase ga banna ba bona, gore lentšu la Modimo le se ke la rogakwa.” (Tito 2:4, 5, PK) Ge e ba ditaba tša letswalo di rotoga, go na le kgonagalo e kgolo ya gore monna yo a sa dumelego a hlomphe boemo bja mosadi wa gagwe ge e ba bo tšweletšwa “ka moya wa boleta le tlhompho e tseneletšego.” (NW) Banna ba bangwe ba ba sa dumelego ba ile ba ‘ruiwa go se lentšu ka go bona tsela e swerwego ke basadi, go se lentšu le le bolelwago, ge ba lemogile tsela ya bona e le ya go boifa le go ila tšhila.’—1 Petro 3:1, 2, 15; 1 Ba-Korinthe 7:13-16.

19. Go thwe’ng ge e ba monna a kgopela mosadi wa gagwe gore a robe molao wa Modimo?

¹⁹ Go thwe’ng ge e ba monna a kgopela mosadi wa gagwe gore a dire selo seo se iletšwago ke Modimo? Ge e ba seo se direga, mosadi o swanetše go gopola gore Modimo ke Mmuši wa gagwe yo a phagamego. O tšea e le mohlala seo baapostola ba ilego ba se dira ge ba be ba laelwa ke babuši gore ba robe molao wa Modimo. Ditiro 5:29 (NW) e a anega: “Petro le baapostola ba bangwe ba ile ba re: ‘Re swanetše go kwa Modimo e le mmuši go e na le batho.’”

POLEDIŠANO E BOTSE

20. Karolo e bohlokwa yeo go yona lerato le tlhompho di nyakegago ke efe?

²⁰ Lerato le tlhompho di bohlokwa karolong e nngwe ya lenyalo—poledišano. Monna yo lerato o tla boledišana le mosadi wa gagwe ka mediro ya mosadi, mathata a mosadi, dipono tša mosadi ka ditaba tše di fapa-fapanego. Mosadi o nyaka se. Monna yo a dirišago nako bakeng sa go bolela le mosadi wa gagwe gomme a theetša e le ka kgonthe seo mosadi a se bolelago o mmontšha lerato la gagwe le tlhompho. (Jakobo 1:19) Basadi ba bangwe ba belaela ka gore banna ba bona ba diriša nako e nyenyane kudu ba boledišana le bona. Seo se a nyamiša. Ke therešo gore mehleng ye ya leema-ema, banna ba ka no šoma diiri tše dintši ka ntle ga legae, gomme maemo a tša boiphedišo a ka feleletša ka gore basadi ba bangwe le bona ba šome mošomo wa boiphedišo. Eupša batho ba babedi ba ba nyalanego ba swanetše go beela nako ka thoko bakeng sa yo mongwe le yo mongwe wa bona. Go sego bjalo, ba ka thoma go ikemela yo mongwe ka ntle ga yo mongwe. Se se ka lebiša mathateng a magolo ge e ba ba ikwa ba gapeletšega go tsoma bogwera bja kwelobohloko ka ntle ga thulaganyo ya lenyalo.

21. Polelo e swanetšego e tla thuša bjang go dira gore lenyalo e dule e le le le thabišago?

²¹ Tsela yeo basadi le banna ba boledišanago ka yona e bohlokwa. “Polêlô tše di ratêxaxo . . . di natefêla pelo, le mmele di a tsoša.” (Diema 16:24) Go sa šetšwe gore molekane ke modumedi goba go se bjalo, keletšo ya Beibele e a šoma: “Polêlô ya lena a e bê ya botho ka mehla, e bê e nokilwexo letswai,” ke gore, e be e kgahlišago. (Ba-Kolose 4:6) Ge e ba motho a bile le letšatši le thata, mantšu a sego kae a botho le a kwelobohloko go tšwa go molekane wa gagwe a ka dira botse bjo bogolo. “Lentšu le le bolelwago lebakeng la gona, le bjalo ka diapola tša gauta mogopšaneng wa silifera.” (Diema 25:11, PK) Segalo sa lentšu le kgetho ya mantšu di bohlokwa kudu. Ka mohlala, ka mokgwa wa go selekega le wa go laela, motho a ka botša yo mongwe gore: “Tswalela lebati leo!” Eupša mantšu a bolelwago ka lentšu le boleta le la kwešišo ke a “nokilwexo letswai” gakaaka’ng, “Na o ka tswalela lebati, hle?”

22. Ke boemo bofe bja kgopolo bjo banyalani ba swanetšego go ba le bjona e le gore ba kgomarele poledišano e botse?

²² Poledišano e botse e a atlega ge e ba go e-na le mantšu ao a bolelwago ka bonolo, go lebelela ga bogwera le ditšhupetšo tša bogwera, botho, kwešišo le boleta. Ka go šoma ka thata go kgomarela poledišano e botse, bobedi monna le mosadi ba tla ikwa ba lokologile go ka bolela ka dinyakwa tša bona, gomme e ka ba methopo ya khomotšo le thušo go yo mongwe le yo mongwe dinakong tša manyami goba kgateletšego. Lentšu la Modimo le opeletša ka gore: “Bolelang ka mo go homotšago le meoya e gateletšegilego.” (1 Ba-Thesalonika 5:14, NW) Go tla ba le dinako tšeo ka tšona monna a nyemilego moko le dinako tšeo ka tšona mosadi a lego bjalo. Ba ka ‘bolela ka mo go homotšago,’ ba agana.—Ba-Roma 15:2.

23, 24. Lerato le tlhompho di tla thuša bjang ge go e-na le go se dumelelane? Nea mohlala.

²³ Balekane ba lenyalo bao ba bontšhago lerato le tlhompho ba ka se bone go se dumelelane mo gongwe le mo gongwe e le tlhohlo. Ba tla šoma ka thata gore ba se ke ba ‘galefelana.’ (Ba-Kolose 3:19) Ka bobedi ba swanetše go gopola gore “phetolô e bolêta e phohliša dipêfêlô.” (Diema 15:1) Ela hloko gore o se ke wa nyenyefatša goba wa nyatša molekane yo a go tšhollelago maikwelo a tšwago pelong. Go e na le moo, lebelela dipolelo tše bjalo e le sebaka sa go hwetša temogo ka pono ya yo mongwe. Lekang go rarolla diphapano gotee gomme le fihlelele phetho e dumelelanago.

²⁴ Gopola lebaka la ge Sara a be a šišinya go monna wa gagwe, Aborahama, tharollo ya bothata bjo itšego gomme e be e sa dumelelane le maikwelo a monna wa gagwe. Lega go le bjalo, Modimo o ile a botša Aborahama gore: “O kwe lentšu la gagwe.” (Genesi 21:9-12, PK) Aborahama o ile a dira bjalo, gomme a šegofatšwa. Ka mo go swanago, ge e ba mosadi a šišinya selo se sengwe se se fapanego le seo monna wa gagwe a naganago ka sona, monna bonyenyane o swanetše go theetša. Ka nako e swanago, mosadi ga se a swanela go laola poledišano eupša o swanetše go theetša seo monna wa gagwe a nyakago go se bolela. (Diema 25:24) Ke go se bontšhe lerato le tlhompho gore monna goba mosadi a phegelele tseleng ya gagwe ka dinako tšohle.

25. Poledišano e botse e tla tlaleletša bjang lethabong dibopegong tša tswalano ya kgaufsi-ufsi ya bophelo bja lenyalo?

²⁵ Poledišano e botse le yona e bohlokwa ditswalanong tša banyalani tša botona le botshadi. Boithati le go hloka boitshwaro di ka senya o šoro tswalano ye ya kgaufsi-ufsi lenyalong. Poledišano ya bolokologi gotee le go se fele pelo di bohlokwa. Ge yo mongwe le yo mongwe ka go hloka boithati a tsoma boiketlo bja yo mongwe, ke ka sewelo dikopano tša botona le botshadi e bago bothata bjo bogolo. Go se, go etša ditabeng tše dingwe, “a motho a se kê a inyakêla tša xaxwe; a a nyakê sa xo hola ba bangwê.”—1 Ba-Korinthe 7:3-5; 10:24.

26. Gaešita le ge lenyalo le lengwe le le lengwe le tla ba le dinako tša lona tše di kgahlišago le tše mpe, go theetša Lentšu la Modimo go tla thuša banyalani bjang go hwetša lethabo?

²⁶ Lentšu la Modimo le nea keletšo e botse gakaakang! Ke therešo gore lenyalo le lengwe le le lengwe le tla ba le dinako tše kgahlišago le tše mpe. Eupša ge e ba balekane ba ikokobeletša tsela ya Jehofa ya go nagana, bjalo ka ge e utolotšwe ka Beibeleng, gomme ba thea tswalano ya bona leratong le le theilwego melaong ya motheo le tlhomphong, ba ka kgodišega gore lenyalo la bona e tla ba le le swarelelago le le le thabišago. Ka go rialo, ba ka se godišane e le bona feela, eupša ba tla godiša le Mothomi wa lenyalo, Jehofa Modimo.