Ke ka Baka la Eng Batho ba re Modimo o Sehlogo?

NA O bona potšišo e rego, “Na Modimo o sehlogo?” e makatša? Ba bangwe ba e bona e makatša, eupša batho ba bantši lehono ba ipotšiša ge e ba Modimo a le sehlogo—goba ba tšea gore o sehlogo. Ka baka la’ng?

Ba bangwe ba phologago dikotsi tša tlhago ba botšiša gore: “Ke ka baka la’ng Modimo a dumelela dilo tše di direga? Na ga a tshwenyege? Goba na o sehlogo?”

Ba bangwe ba tshwenyega ka tsela e swanago ge ba bala Beibele. Ba hwetša dipego tše bjalo ka ya mabapi le Noa le Meetsefula, gomme ba ipotšiša gore, ‘Go tla bjang gore Modimo a bolaye batho bao ka moka? Na o sehlogo?’

Na le wena o fela o ipotšiša dipotšišo tšeo ka dinako tše dingwe? Goba na o ikhwetša o palelwa ke go araba bao ba ipotšišago ge e ba Modimo e le yo sehlogo? Go sa šetšwe boemo bja gago, ela hloko potšišo e nngwe yeo e ka go thušago.

KE KA BAKA LA ENG RE HLOILE DITIRO TŠE SEHLOGO?

Ka boripana, re hloile ditiro tše sehlogo ka gobane re kgona go kgethologanya se se nepagetšego le se se fošagetšego. Se ke sona seo se dirago gore re fapane kudu le diphoofolo. Mmopi wa rena o re dirile “ka seswantšho sa gagwe.” (Genesi 1:27) Seo se ra gore’ng? O re file bokgoni bja go bonagatša dika tša gagwe le ditekanyetšo tša gagwe tša boitshwaro, bokgoni bja gagwe bja go kgethologanya se se nepagetšego le se se fošagetšego. Ela hloko se: Ge e ba Modimo a re file bokgoni bja go kgethologanya se se nepagetšego le se se fošagetšego gomme re hloile ditiro tše sehlogo, na seo ga se bontšhe gore Modimo le yena o di hloile?

Beibele e tiiša gore Modimo le yena o hloile ditiro tše sehlogo, ka gobane ka Beibeleng, Modimo o re kgonthišetša ka gore: “Ditsela tša ka di phagametše ditsela tša lena, gomme menagano ya ka e phagametše menagano ya lena.” (Jesaya 55:9) Ge e ba re ka ahlola Modimo ka gore o sehlogo, na re tla ba re sa ganetšane le seo Beibele e se bolelago—ge e le gabotse re re ditsela tša rena di phagametše tša gagwe? Ruri e tla ba gabohlale gore re hwetše mabaka a oketšegilego pele re ka nagana ka tsela yeo. Mohlomongwe re swanetše go botšiša gore ke ka baka la’ng ditiro tše dingwe tša gagwe di bonagala di le sehlogo, e sego ge e ba Modimo a le sehlogo. Seo se ka re thušago ke go ela hloko seo ge e le gabotse se bolelwago ke lentšu “sehlogo.”

Ge re bolela gore motho yo a itšego o sehlogo, re ahlola maikemišetšo a gagwe. Motho yo sehlogo ke yoo a thabelago go bona ba bangwe ba tlaišega goba yo a sa tshwenyegego ge ba gateletšegile. Ka baka leo, tate yo a layago morwa wa gagwe ka gobane a thabela go kweša morwa wa gagwe bohloko o sehlogo. Eupša tate yo a layago morwa wa gagwe bakeng sa go mo ruta goba go mo šireletša ke yo a lokilego. Go bonolo go se kwešiše maikemišetšo a motho, kudu ge e ba o kile wa latofatšwa ka phošo.

Anke re hlahlobeng a mabedi a mabaka ao ba bangwe ba naganago gore Modimo o sehlogo—dikotsi tša tlhago tšeo re di bonago lehono le dikahlolo tša Modimo tšeo re balago ka tšona ka Beibeleng. Na ruri ditherešo di bontšha gore Modimo o sehlogo?