Go Phadima ga Seetša—Mo Gogolo le mo Gonyenyane (Karolo ya Bobedi)

“Seetša re se bôna rè le seetšeng sa xaxo.”—PSALME 36:9.

1. Ke maiteko afe a pele ao a ilego a dirwa bakeng sa go kwešiša go swantšhetša ga puku ya Kutollo?

PUKU ya Beibele ya Kutollo e ile ya tsoša kgahlego go Bakriste go tloga mehleng ya pele. E nea mohlala o mobotse kudu wa kamoo seetša sa therešo se phadimago kudu go feta le ge e le neng pele. Ka 1917, batho ba Jehofa ba ile ba gatiša tlhaloso ya Kutollo ka pukung ya The Finished Mystery. E ile ya pepentšha ka go se boife baetapele ba bodumedi bja Bojakane le ba bopolitiki, eupša tše dintši tša ditlhaloso tša yona di be di adimilwe go tšwa methopong e fapa-fapanego. Go sa dutše go le bjalo, The Finished Mystery e ile ya šoma go leka go botega ga Barutwana ba Beibele mokerong o bonagalago o Jehofa a bego a o diriša.

2. Sehlogo se se rego “Go Tswalwa ga Setšhaba” se ile sa hlabiša seetša sefe pukung ya Kutollo?

² Go phadima mo go kgahlišago ga seetša go edišitšwe ka pukung ya Kutollo ka go gatišwa ga sehlogo se rego “Go Tswalwa ga Setšhaba” ka go The Watch Tower ya March 1, 1925. Go kile gwa naganwa gore Kutollo kgaolo 12 e be e hlalosa ntwa magareng ga Roma ya boheitene le Roma ya bopapa, go e-na le mošemanyana a emetše bopapa. Eupša sehlogo seo se bontšhitše gore Kutollo 11:15-18 e be e e-na le go swana ga seo se bolelwago ke kgaolo 12, yeo e bontšhago gore e laodiša ka go tswalwa ga Mmušo wa Modimo.

3. Ke dipuku dife tšeo di hlabišitšego seetša se oketšegilego go Kutollo?

³ Se ka moka se ile sa lebiša go kwešišeng mo go kwalago kudu ga Kutollo moo go ilego gwa tla le puku ya Light ka dibolumo tše pedi ka 1930. Le gona tlhwekišo e oketšegilego e ile ya tšwelela ka go “Babylon the Great Has Fallen!” God’s Kingdom Rules! (1963) le “Then Is Finished the Mystery of God” (1969). Lega go le bjalo, go be go sa dutše go e na le mo gontši mo go swanetšego go ithutwa ka puku ya boporofeta ya Kutollo. Ee, seetša se se phadimago kudu se ile sa edišetšwa go yona ka 1988 ka puku ya Seremo se Segolo sa Kutollo se Batametše! Senotlelo bakeng sa go sedimošwa mo go tšwelago pele se ka bolelwa e le therešo ya gore boporofeta bja Kutollo bo direga ‘letšatšing la Morena,’ leo le thomilego ka 1914. (Kutollo 1:10) Ka baka leo puku ya Kutollo e be e tla kwešišwa ka mo go kwalago kudu ge letšatši leo le dutše le tšwela pele.

“Babuši ba Phagamego” ba Hlalositšwe ka mo go Kwalago

4, 5. (a) Barutwana ba Beibele ba ile ba lebelela bjang Ba-Roma 13:1? (b) Ke’ng seo se ilego sa lemogwa ka morago e le boemo bja Mangwalo mabapi le “babuši ba phagamego”?

⁴ Go phadima mo go tagago ga seetša go bonwe ka 1962 mabapi le Ba-Roma 13:1, yeo e rego: “Anke motho yo mongwe le yo mongwe a ikokobeletše babuši ba phagamego [“babuši ba bagolo,” New World Translation].” (King James Version) Barutwana ba pele ba Beibele ba kwešišitše gore “babuši ba phagamego” bao go boletšwego ka bona moo ba be ba šupa go babuši ba lefase. Ba tšere lengwalo le le bolela gore ge e ba Mokriste a be a biletšwa tirelo ya tša bohlabani nakong ya ntwa, o be a tla gapeletšega go apara yunifomo ya tša bohlabani, a atha sethunya gomme a ya lefelong la ntwa go fihla mellwaneng. Go be go lemogilwe gore ka ge Mokriste a be a ka se ke a bolaya mogagabo, o be a tla gapeletšega go thuntšhetša sethunya sa gagwe moyeng ge e ba boemo bo šorofalela pele.a

⁵ The Watchtower ya November 15 le ya December 1, 1962, di ile tša hlabiša seetša ka mo go kwalago tabeng yeo go ahla-ahlwago mantšu a Jesu go Mateo 22:21: “Nthšetšang Kesara tše e lexo tša Kesara; Modimo Le Mo nthšetšê tše e lexo tša Modimo.” Mantšu a baapostola go Ditiro 5:29 e be e le a dumelelanago: “Mo xo batho le Modimo, wa xo kwešešwa ke Modimo.” Bakriste ba ikokobeletša Kesara—“babuši ba phagamego”—ge feela se se sa nyake gore Mokriste a dire ka go fapana le molao wa Modimo. Go ikokobeletša Kesara go lemogilwe e le mo go lekanyeditšwego, e sego ka mo go feletšego. Bakriste ba ntšhetša Kesara feela seo se sa lwantšhanego le ditaelo tša Modimo. E bile mo go kgotsofatšago gakaakang go ba le seetša se segolo tabeng yeo!

Go Phadima ga Seetša Ditabeng tša Thulaganyo

6. (a) Go phema sebopego sa boruti se se bego se laola Bojakaneng, ke molao ofe wa motheo wo o ilego wa amogelwa? (b) Ke’ng seo mafelelong se ilego sa lemogwa e le tsela e nepagetšego bakeng sa bao ba nago le boikarabelo bja go hlokomela phuthego ba ka kgethwago ka yona?

⁶ Go be go e na le taba ya gore ke bomang ba ba bego ba swanetše go hlankela bjalo ka bagolo le batiakone ka diphuthegong. Go phema sebopego sa boruti seo se bego se laola Bojakaneng, go ile gwa phethwa ka gore ba ba swanetše go kgethwa ke batho ka go bolelelwa ka go bouta ga ditho tša phuthego e nngwe le e nngwe. Eupša seetša se oketšegago seo se lego ka go The Watchtower ya September 1 le ya October 15, 1932, se bontšhitše gore Mangwalo ga a nee thekgo bakeng sa bagolo bao ba kgethilwego ka go boutelwa. Ka gona ba ba ile ba tšeelwa legato ke komiti ya tirelo gomme molaodi wa tirelo o ile a kgethwa ke Mokgatlo.

7. Go phadima ga seetša go feleleditše ka dikaonefatšo dife mokgweng woo bahlanka ka phuthegong ba bego ba kgethwa ka wona?

⁷ The Watchtower ya June 1 le ya June 15, 1938, di be di e-na le go phadima ga seetša mo go bontšhago gore bahlanka ka phuthegong ba be ba se ba swanela go kgethwa ka go boutelwa, eupša ba be ba swanetše go kgethwa, seo se ra gore ba be ba swanetše go kgethwa ka tsela ya pušo ya Modimo. Ka 1971 go phadima mo gongwe ga seetša go bontšhitše gore phuthego e nngwe le e nngwe e be e se ya swanela go laolwa ke mohlanka o tee feela wa phuthego. Go e na le moo, e nngwe le e nngwe e swanetše go ba le sehlopha sa bagolo goba balebeledi ba ba abetšwego ke Sehlopha se Bušago sa Dihlatse tša Jehofa. Ka gona go oketšega ga seetša ka nywaga e ka bago e fetago 40, e bile bohlatse bja gore bagolo gotee le batiakone bao mo nakong ye ba tsebjago e le bahlanka ba bodiredi, ba swanetše go kgethwa ke “molaki e a bôtêxaxo yo bohlale” ka Sehlopha sa wona se Bušago. (Mateo 24:45-47) Se ka moka se be se dumelelana le seo se diragetšego mehleng ya baapostola. Banna ba bjalo ka Timotheo le Tito ba ile ba kgethwa bjalo ka balebeledi ke sehlopha se bušago sa lekgolong la pele la nywaga. (1 Timotheo 3:1-7; 5:22; Tito 1:5-9) Se ka moka se dumelelana le go phethagatšwa mo go kgahlišago ga Jesaya 60:17: “’Bakeng sa mphiri ke tlo tliša thsipi e khwibidu; ’bakeng sa thsipi ke tlo tliša thsipi-thsêhla; ’bakeng sa kwata ke tlo tliša mphiri; ’bakeng sa mafsika ke tlo tliša thsipi. Ke tlo bea moláô ya ba molaki wa xaxo; ke tlo bea tokô, ya ba mmuši wa xaxo.”

8. (a) Go oketšega ga therešo go tlišitše dikaonefatšo dife mokgweng woo Mokgatlo o šomago ka wona? (b) Dikomiti tša Sehlopha se Bušago ke dife, gomme maemo a tšona a fapanego ke afe ka modiro goba taolo?

⁸ Gape go be go e na le taba ya go šoma ga Mokgatlo wa Watch Tower. Ka nywaga e mentši, Sehlopha se Bušago sa Dihlatse tša Jehofa e be e le selo se tee le lekgotla la balaodi la Watch Tower Bible and Tract Society of Pennsylvania, gomme ditaba gantši di be di le matsogong a mopresidente wa sona. Bjalo ka ge go bontšhitšwe ka go 1977 Yearbook of Jehovah’s Witnesses (matlakala 258-9), ka 1976 Sehlopha se Bušago se ile sa thoma go šoma ka dikomiti tše tshelelago, e nngwe le e nngwe e abetšwe go hlokomela dikarolo tše itšego tša modiro wa lefase ka bophara. Komiti ya Sehlopha sa Bašomi e šomana le ditaba tša sehlopha sa bašomi go akaretša dikgahlego tša bohle ba ba hlankelago lapeng la Bethele la lefaseng ka bophara. Komiti ya Kgatišo e swaragana le ditaba tša letšatši le letšatši le tša molao, tše bjalo ka thoto le kgatišo. Komiti ya Tirelo e hlokomela modiro wa go nea bohlatse le go okamela balebeledi ba basepedi, babulamadibogo le mediro ya bagoeledi ba phuthego. Komiti ya go Ruta e ikarabelela ka diboka tša phuthego, matšatši a kgethegilego a kopano, dikopano tša tikologo le dikopano tša selete le tša ditšhaba-tšhaba gotee le dikolo tše fapa-fapanego bakeng sa thuto ya moya ya batho ba Modimo. Komiti ya Bongwadi e hlokomela go lokišetšwa le go fetolelwa ga dipuku ka dibopego ka moka, e kgonthišetša gore selo se sengwe le se sengwe se dumelelana le Mangwalo. Komiti ya Modula-setulo e hlokomela ditaba tša tšhoganetšo le tše dingwe tše akgofilego.b Gape ka bo-1970, diofisi tša makala a Mokgatlo wa Watch Tower di ile tša thoma go laolwa ke komiti go e na le go laolwa ke molebeledi.

Seetša se se Tswalanego le Boitshwaro bja Bokriste

9. Seetša sa therešo se ile sa kgoma bjang tswalano ya Bakriste le mebušo ya lefase?

⁹ Go phadima mo gontši ga seetša go ile gwa lebišwa boitshwarong bja Bokriste. Ka mohlala, ela hloko taba ya boema-gare. Go phadima mo go tagago ka mo go kgethegilego kudu ga seetša go ile gwa bonega tabeng ye sehlogong sa “Boema-gare” se se tšwelelago ka go The Watchtower ya November 1, 1939. Se se be se le nakong gakaakang, ka go tla feela ka morago ga ge Ntwa ya II ya Lefase e thomile! Sehlogo se ile sa hlalosa boema-gare gomme sa bontšha gore Bakriste ga se ba swanela go akaretšwa ditabeng tša bopolitiki goba ditlhaselong magareng ga ditšhaba. (Mika 4:3, 5; Johane 17:14, 16) Le ke lebaka la go ba ga bona ba hloilwego ke ditšhaba ka moka. (Mateo 24:9) Dintwa tša Isiraele ya bogologolo ga se tša ka tša nea mohlala bakeng sa Bakriste, go etša ge Jesu a bontšha ka mo go kwalago go Mateo 26:52. Go feta moo, ga go setšhaba se tee sa tša bopolitiki lehono se e lego sa pušo ya Modimo, se se bušwago ke Modimo go etša ge Isiraele ya bogologolo e be e le bjalo.

10. Ke’ng seo go phadima ga seetša go ilego gwa se utolla ge e le kamoo Bakriste ba swanetšego go lebelela madi ka gona?

¹⁰ Seetša se ile sa bonega gape go kgethego ya madi. Barutwana ba bangwe ba Beibele ba be ba nagana gore go iletšwa go ja madi go Ditiro 15:28, 29, go be go lakanyeleditšwe go Bakriste ba ba-Juda. Lega go le bjalo, Ditiro 21:25 e bontšha gore mehleng ya baapostola taelo ye e be e šoma le go ditšhaba tše di bego di e-ba badumedi. Ka gona kgethego ya madi e šoma go Bakriste ka moka, go etša ge go bontšhitšwe go The Watchtower ya July 1, 1945. Seo ga se bolele feela go gana go ja madi a phoofolo go etša a lego ka borosong yeo e nago le madi, eupša gape ka go ila madi a motho go etša tabeng ya ditšhelo tša madi.

11. Ke’ng seo se ilego sa lemogwa mabapi le pono ya Mokriste ka go dirišwa ga motšoko?

¹¹ E le ka baka la seetša se oketšegilego, mekgwa yeo pele e bego e fo šišingwa, ka morago e ile ya lebeledišišwa. Mohlala wa se e be e le mabapi le go dirišwa ga motšoko. Ka go Zion’s Watch Tower ya August 1, 1895, Ngwanabo rena Russell o ile a lebiša tlhokomelo go 1 Ba-Korinthe 10:31 le 2 Ba-Korinthe 7:1 gomme o ngwadile gore: “Ga ke kgone go bona kamoo e bego e tla ba go tumiša Modimo ka gona goba go ikhola ga Mokriste ka noši, gore Mokriste le ge e le ofe a diriše motšoko ka sebopego le ge e le sefe.” Ga e sa le go tloga ka 1973, go ile gwa kwešišwa ka mo go kwalago gore ga go modiriši wa motšoko yo a bego a ka ba yo mongwe wa Dihlatse tša Jehofa. Ka 1976 go ile gwa hlaloswa ka mo go kwalago gore ga go Hlatse yeo e bego e ka thwalwa lefelong la kgwebo ya go leka mahlatse gomme ya dula ka phuthegong.

Tlhwekišo e Nngwe

12. (a) Ke eng seo go phadima ga seetša go ilego gwa se utolla mabapi le palo ya dikgonyu tša Mmušo tšeo di neilwego Petro? (b) Maemo e be e le afe ge Petro a be a diriša sekgonyu se sengwe le se sengwe?

¹² Gape go bile le seetša se oketšegilego mabapi le palo ya dikgonyu tša seswantšhetšo tšeo Jesu a di neilego Petro. Barutwana ba Beibele ba ile ba nagana gore Petro o be a amogetše dikgonyu tše pedi tše di buletšego batho tsela ya go ba majabohwa a Mmušo—se sengwe e be e le sa ba-Juda seo se dirišitšwego ka Pentekoste ya 33 C.E., gomme se sengwe e le sa Ba-ntle, e lego seo se dirišitšwego ka lekga la pele ka 36 C.E. ge Petro a be a bolela le Koronelio. (Ditiro 2:14-41; 10:34-48) Ge nako e dutše e e-ya, go ile gwa lemogwa gore go be go e-na le sehlopha sa boraro se se akaretšwago—Ba-Samaria. Petro o dirišitše sekgonyu sa bobedi ge a be a ba bulela sebaka sa Mmušo. (Ditiro 8:14-17) Ka go rialo, sekgonyu sa boraro se ile sa dirišwa ge Petro a be a bolela le Koronelio.—Morokami, April 1, 1980, matlakala 3-10, 13.

13. Ke’ng seo go phadima ga seetša go se utollotšego mabapi le mašaka a dinku ao go boletšwego ka ona go Johane kgaolo 10?

¹³ Go tšwa mahlaseding a mangwe a seetša, go ile gwa lemogwa gore Jesu o be a sa bolele ka mašaka a mabedi feela a dinku, eupša ka a mararo. (Johane, kgaolo 10) A e be e le (1) lešaka la dinku la ba-Juda leo Johane Mokolobetši e bego e le moleta-mojako wa lona, (2) lešaka la majabohwa a tloditšwego a Mmušo le (3) lešaka la “dinku tše dingwê,” tšeo di nago le kholofelo ya lefaseng.—Johane 10:2, 3, 15, 16; Morokami, August 1, 1984, matlakala 10-20.

14. Seetša se oketšegilego se ile sa hlalosa ditaba bjang ka mo go kwalago mabapi le go thoma ga Ngwaga wa Megobo wa seswantšhetšo?

¹⁴ Go kwešišwa ga Ngwaga wa Megobo wa seswantšhetšo le gona go ile gwa ba le tlhaloso e nngwe e kwalago. Ka tlase ga Molao, ngwaga o mongwe le o mongwe wa bo-50 e be e le Ngwaga o mogolo wa Megobo woo dilo di bego di bušetšwa go beng ba tšona ba mathomo. (Lefitiko 25:10) Go be go kwešišitšwe kgale gore wo o be o swantšhetša Pušo ya Kriste ya Nywaga e Sekete. Lega go le bjalo, mehleng ya morago-rago bjale go lemogilwe gore Ngwaga wa seswantšhetšo wa Megobo ge e le gabotse o thomile ka Pentekoste ya 33 C.E., ge ba ba amogetšego moya o mokgethwa o tšholotšwego ba be ba lokollwa bohlankeng bja kgwerano ya Molao wa Moše.—Morokami, January 1, 1987, matlakala 18-28.

Seetša se Oketšegilego Mabapi le go Bitšwa ga Mantšu

15. Ke seetša sefe se se ilego sa bonega mabapi le go dirišwa ga lentšu “loga maano”?

¹⁵ “Mmoledi yo ó lekile xo hwetša mantšu a ratêxaxo, a ngwala mantšu a therešô ka xo loka.” (Mmoledi 12:10) Mantšu a mo gongwe a ka šomišwa ka mo go kwalago sehlogong sa rena se re se balago gona bjale, ka gobane seetša ga se sa ka sa bonega feela ditabeng tša bohlokwa tše bjalo ka thutatumelo le boitshwaro, eupša gape le tabeng ya go bitšwa ga mantšu ga Bokriste le tlhaloso ya gona e nepagetšego. Ka mohlala, gare ga Barutwana ba Beibele, e nngwe ya dipuku tšeo di bego di ratega kudu e be e le bolumo ya pele ya Studies in the Scriptures, yeo e nago le sehlogo se rego The Divine Plan of the Ages. Lega go le bjalo, ge nako e dutše e e-ya go ile gwa lemogwa gore Lentšu la Modimo le bolela feela ka batho e le ba logago maano. (Diema 19:21) Mangwalo le ka mohla ga a bolele ka Jehofa e le yo a logago maano. Ga go nyakege gore a loge maano. Se sengwe le se sengwe se a se rerago o ba le kgodišego ya gore se tla atlega ka baka la bohlale le matla a gagwe a sa lekanywego, go etša ge re bala go Ba-Efeso 1:9, 10 (PK) gore: “Ka go ikgahlelwa ga gagwe mo a go rerilego pele mo go yena. Gore go tšweletšwe e le ona modiro o laoletšwego phethego ya mabaka.” Ka gona go ile gwa lemogwa ganyenyane-ganyenyane gore lentšu “morero” ke le le swanetšego kudu ge go bolelwa ka Jehofa.

16. Ke’ng seo se ilego sa lemogwa ganyenyane-ganyenyane e le go kwešišwa mo go nepagetšego ga Luka 2:14?

¹⁶ Ka gona, go ile gwa ba le taba ya go hwetša kwešišo e tseneletšego ya Luka 2:14. E balega ka gore: “Tumišô a e yê xo Modimo maxodimo-dimong; lefaseng xo bê le khutšô, kxahlišô bathong.” Go ile gwa lemogwa gore se ga se sa tšweletša kgopolo e nepagetšego, ka gobane kgahlišo ya Modimo ga e bontšhwe go ba kgopo. Ka baka leo Dihlatse di ile tša lebelela se e le taba ya khutšo go batho ba ba bego ba kgahlišwa ke Modimo. Ka gona ba ile ba tšwela pele ba šupa go ba ba thabelago Beibele e le batho ba kgahlišo. Eupša ka morago go ile gwa kwešišwa gore seo se bego se akaretšwa e be e se kgahlišo karolong ya batho, eupša karolong ya Modimo. Ka baka leo, mongwalo wa ka tlase wa New World Translation go Luka 2:14 o bolela ka “batho bao [Modimo] a ba amogelago.” Bakriste ka moka ba ba phelago ka go dumelelana le keno ya bona ya boineelo ba na le kgahlišo ya Modimo.

17, 18. Ke eng seo Jehofa a tlago go se lwela, gomme ke’ng seo a tlago go se kgethagatša?

¹⁷ Ka mo go swanago, Dihlatse di boletše ka nako e telele ka leina la Jehofa e le leo le lwelwago. Eupša na Sathane o ile a belaela ka leina la Jehofa? Mabapi le taba yeo, na badiredi le ge e le bafe ba Sathane ba dirile bjalo, bjalo ka ge eka Jehofa ga a na tokelo ya leina leo? Le gatee-tee. E be e se leina la Jehofa leo le bego le hlohlwa le leo le bego le nyaka gore le lwelwe. Ke ka baka leo dipuku tša morago bjale tša Mokgatlo wa Watch Tower di sa bolele ka leina la Jehofa e le le le lwelwago. Di bolela ka bogoši bja Jehofa e le bjo bo lwelwago gomme leina la gagwe e le le le kgethagatšwago. Se se dumelelana le seo Jesu a re boditšego gore re se rapelele: “Leina la xaxo a le kxêthwê.” (Mateo 6:9, mongwalo o sekamego ke wa rena.) Jehofa o boletše leboelela gore o be a tla kgethagatša leina la gagwe leo ba-Isiraele ba sa kago ba le hlohla, eupša leo ba ilego ba le goboša.—Hesekiele 20:9, 14, 22; 36:23.

¹⁸ Ke mo go kgahlišago gore ka 1971, puku ya “The Nations Shall Know That I Am Jehovah”—How? e dirile pharologanyo ye: “Jesu Kriste o lwela . . . go lwelwa ga Bogoši bja Jehofa bja legohle le go tagafatšwa ga leina la Jehofa.” (Matlakala 364-5) Ka 1973, God’s Kingdom of a Thousand Years Has Approached e itše: “‘Masetla-pelo a magolo’ ao a tlago ke nako ya gore Modimo Yo-Matla-ohle Jehofa a lwele bogoši bja gagwe bja legohle le go kgethagatša leina la gagwe le bohlokwa kudu.” (Letlakala 409) Ke moka ka 1975, Man’s Salvation Out Of World Distress at Hand! e itše: “Tiragalo e kgolo kudu ya histori ya legohle ka nako yeo e tla be e phethagaditšwe, e lego go lwelwa ga bogoši bja Jehofa bja legohle le go kgethagatšwa ga leina la gagwe le le kgethwa.”—Letlakala 281.

19, 20. Re ka bontšha bjang tebogo ya rena bakeng sa go phadima ga seetša sa moya?

¹⁹ Batho ba Jehofa ke ba šegofaditšwego gakaakang ka go ba ba hwetšago lethabo seetšeng se ka moka sa moya! Ka mo go fapanego, Lefsifsi la moya leo baetapele ba Bojakane ba ikhwetšago go lona le bontšhwa ke polelo ye ya moruti e rego: “Ke ka baka la’ng go e na le sebe? Ke ka baka la’ng go e na le tlaišo? Ke ka baka la’ng go e na le bobe? Tše ke dipotšišo tšeo ke nyakago go di botšiša Morena ge ke fihla legodimong.” Eupša Dihlatse tša Jehofa di ka mmotša lebaka: Ke ka baka la kgang ya go loka ga bogoši bja Jehofa le taba ya ge e ba dibopiwa tše e lego batho di ka kgona go kgomarela go botegela Modimo go sa šetšwe kganetšo ya Diabolo.

²⁰ Ka nywaga e mentši, go phadima ga seetša bobedi mo gogolo le mo gonyenyane go edišeditše tsela ya bahlanka ba Jehofa ba ba ineetšego. Se e bile ka go phethagala ga mangwalo a bjalo ka Psalme 97:11 le Diema 4:18. Eupša anke le ka mohla re se ke ra lebala gore go sepela seetšeng go bolela go ba le tebogo bakeng sa seetša se oketšegilego gomme re phele ka go dumelelana le sona. Bjalo ka ge re bone, seetša se se oketšegilego se akaretša boitshwaro bja rena gotee le thomo ya rena ya go bolela.

[Mengwalo ya tlase]

Na o a Gopola?

◻ Ke seetša sefe se se ilego sa bonega mabapi le go ikokobeletša “babuši ba phagamego”?

◻ Go phadima ga seetša go ile gwa feleletša ka tšwelopele efe ya thulaganyo?

◻ Seetša se oketšegilego se kgomile bjang boitshwaro bja Bokriste?

◻ Ke tlhwekišo efe yeo e tšweleditšwego ke seetša sa moya mabapi le kwešišo ya rena ka dintlha tše itšego tša Mangwalo?

[Picture Credit Line on page 25]

Keys on page 24: Drawing based on photo taken in Cooper-Hewitt, National Design Museum, Smithsonian Institution