Kamoo Go Ka Lebeletšanwago Le Bothata Bja Go Diila
NGAKA e nngwe ya Afrika e boletše gore, “Batho ba diila ka baka la gore ba a tšwafa. Motse o tletše ka batho ba go dula ka diatla. Ge e ba ba be ba tloga ba nyaka mošomo, ba be ba ka o hwetša. Mehleng ye ga go lebaka la gore motho lege e le ofe a diile.”
Ga go pelaelo gore batho ba bangwe ba a tšwafa le gore go tšwafa go ka iša bodiiding. Beibele e re: “Ke sa ya le borôkônyana! Ke sa bo re ‘šwaa’! Ke sa hunyetša matsôxô kè robetše. ’Me thšexo ya Xo tlêla byalo ka mokhukhunetši; bohloki bya Xo tlêla wa moxale.” (Diema 24:33, 34) Lega go le bjalo, batho ba bantši ba ba diilago le gatee ga ba tšwafe. Ka mohlala, akanya ka monna yo a ilego a ngwala gore: “Le byale re sa le ba xo bolawa ke tlala le lenyôra le thšexo, re ba xo ôtlwa, re baneneri.” (1 Ba-Korinthe 4:11) Na e be e le sebodu sa go rotha dinala? Le gatee-tee. Mantšu ao a boletšwe ke moapostola Paulo. O ile a kgetha go phela bophelo bjo bo nyakago go ba le tšhelete e sego nene e le gore a ka kgona go phegelela bodiredi bja Bokriste ga kaone. Tše dingwe tša ditlhoko tša gagwe di be di bakilwe ke maemo ao a bego a ka se ke a a laola, a bjalo ka tlaišo ya bodumedi.
Lehono, bontši bja batho bao ba diilago lefaseng ba wetšwe ke maemo ao ba ka se kego ba kgona go a laola—mohlomongwe go hlaelelwa ke thuto, go fokola ga maemo a tša ditšhelete lefelong leo, goba dikgaruru tša bopolitiki. Ba bantši ba šoma ka matla go tloga ka mahube go fihla bošego gomme ba hloka se se lekanego bakeng sa go iphediša. Ka gona, dibaka tša go hwetša tšhelete ka ditsela tša go se botege di ka bonala e le tše di kgahlišago, le go ba tše di swanetšego. Ba bangwe ba ka ba ba bolela gore Beibele e dumelela gore ka nako e nngwe motho a dire phošo! Ka ntle ga fao, Beibele e re: “’Hodu xa xo nyatšwe la xo utswa lè lapile lè swerwe ke tlala.” Le gona monna yo bohlale o ile a rapela ka gore: ‘Ke se ke ka diila gomme ka utswa.’—Diema 6:30; 30:8, 9.
Beibele e Emela Potego
Na ditemana tše tša Beibele ka kgonthe di dumelela go se botege? Anke re di hlahlobeng go ya ka moelelo wa tšona. Ka morago ga go bolela gore batho ga ba ke ba nyatša lehodu leo le utswago bakeng sa go iphepa, Diema 6:31 e iša pele ka gore: “Xe le ka swarwa, le lefa xa-šupa; le ka nthša thoto yohle ya lapeng.” Ka mantšu a mangwe, ge lehodu le swerwe, le lebana le kotlo e tletšego ya molao. Le lefa bakeng sa bokebekwa bja lona! Ka gona, mantšu a go e na le gore a kgothaletše bohodu, a lemoša badiidi gore bohodu bo ka feleletša ka tahlegelo e nngwe gape ya tšhelete, bja ba bakela dihlong, bona gotee le malapa a bona, gomme gwa dira gore ba lahlegelwe ke boitlhompho.
Eupja go thwe’ng ka thapelo ya monna yo bohlale? O ile a kgopela gore a se ke a diila ‘a tla a utswa gomme a senya leina la Modimo wa gagwe.’ (Diema 30:9) Ee, go se botege ga motho yo a ipolelago gore o direla Jehofa go ka goboša leina la Modimo le la phuthego ya batho ba Gagwe. Moapostola Paulo o ngwadile gore: “O iletša xo utswa, wa tla wa utswa.” Ge e ba batho bao ba ipitšago Bakriste ba ka utswa, se se ka dira gore ‘leina la Modimo le gobošwe gare ga ba-ntle.’—Ba-Roma 2:22, 24.
Ka gona, ke ka lebaka le le kwalago Beibele e bolelago gore: “Modiidi xe a swere tsela ya xo loka, ó phala mohumi wa xo kgopamiša tsela.” (Diema 28:6) Lege moapostola Paulo ka noši a be a hlaelelwa ke dilo ka dinako tše dingwe, ga se a ka a dumelela goba go retologela mokgweng wa go se botege. Go e na le moo o ngwadile gore: “E a utswitšexo a se kê a hlwa a utswa; a a kxothalê a dirê tše botse ka diatla tša xaxwe, a tlê a bê le tše a kaxo abêla mohloki.”—Ba-Efeso 4:28.
Tharollo: Go Bota Modimo
Go thwe’ng ka bao ba šomago ka matla eupja ba sa kgone go hwetša tšhelete e lekanego bakeng sa go hlokomela malapa a bona? Na go se botege le go utswa tabeng ya bona ga go na molato, kudu-kudu ge bolwetši bo ka wela setho sa lapa goba ge go tšwelela kotsi e itšego ka tšhoganyetšo? Batho ba bangwe ba akanya bjalo. Moagi o mongwe wa naga ya Afrika o itše: “Nageng ya gabo rena, ge e ba o botega o ka se ke wa phela. Ge e ba o nyaka go phela, o swanetše go fela o phamoga tseleng ya gago ya bophelo.”
Lega go le bjalo, kae le kae Afrika, motho gantši o bona mantšu a rego “Bota Modimo” a ngwadilwe diloring, a ngwadilwe diswantšhong tše di fegwago mabotong, a mamareditšwe dipampareng tša dikoloi. Beibele ka noši e re: “Bôta Modimo ka pelo ka moka.” (Diema 3:5) Go se botege ka tlase ga maemo lege e le afe go ka se ke gwa dumelelana le kgothatšo yeo ya Beibele. Eupja na go bota Modimo ruri ke karabo e šomago bothateng bja go ba modiidi?
Bjalo ka modiredi wa Modimo moapostola Paulo, o ile a ba mathateng a mantši a bjalo ka ‘tlala, go nyorwa, go ikona dijo, go bolawa ke phefo le go hloka diaparo.’ (2 Ba-Korinthe 11:27) Ka kgonthe, Paulo o swanetše go ba a ile a ipotšiša gore o tla phologa bjang! Eupja ka morago ga nywaga e 25 ya phihlelo e le Mokriste, o ile a kgona go ngwala gore: “Bobôtlana ke a bo tseba; le motlalô ke a o tseba. Ke tlwaetše tšohle, e ka ba xo hora le xo kwa tlala; e ka ba xo tlalêlwa ke dilô, e ka ba xo di hlôka. Ke kxôna tšohle ka Eo a mphaxo matla.” (Ba-Filipi 4:12, 13) Ee, Paulo o be a botile Modimo.
Paulo o ile a lemoga gore melao ya motheo ya Mangwalo ga se mantšu a sa rego selo, a boikgopolelo feela. Ke ditaelo tše di tšwago go Modimo yo a phelago, yo a nyakago go thuša le go thekga bao ba nyakago go di diriša. Moporofeta wa bogologolo o ile a re: “Xobane mahlo a Morêna a tsepeletše lefase ka moka, xore a bônatšê matla a xaxwe ka bao ba lebeletšexo Yêna ka pelo ka moka.”—2 Koronika 16:9.
Go Šegofatšwa ka Baka la go Bota Jehofa
Ke ka baka la’ng go bota Modimo go le thata gakaakaa bathong ba bantši? Ka ntle le pelaelo, lebaka ke gore bodumedi ga se bja ba nea lebaka le le kwalago la gore ba dire bjalo. Dikereke di dirile gore Modimo a bonagale e le yo a se nago leina, yo a sa tsebegego, yo e sego motho le yo a ka se kego a kwešišwa ke batho. Eupja ka thuto ya Beibele, Dihlatse tša Jehofa di tsebile Modimo, e sego bjalo ka matla feela ao a ka se kego a tsebja, eupja bjalo ka Motho yo a nago le leina. (Psalme 83:18; Ba-Hebere 9:24) Ba ithutile gore o na le dika tšeo di dirago gore a swanelwe ke gore re ka mmota. Ka mohlala, go ya ka Ekisodo 34:6, Jehofa ke “Modimo yo mabobo le kxauxêlô, wa xo se fêlê pelo, wa botho byo boxolo le therešo.” Dihlatse di bota Modimo gomme di lemoga gore o ‘tletše ka therešo.’ Ka gona ba dumela ka botlalo kholofetšo ya gagwe ya go tliša lefase le lefsa leo le se nago bodiidi bjoo mo nakong ye bo tlaišago karolo e kgolo gakaakaa ya moloko wa batho.—2 Petro 3:13.
Ka gona, Dihlatse tša Jehofa tše dimilione di bontšhitše gore go bota Modimo go a kgonega. Ka mohlala, Rosaline, e lego Hlatse ya kua Sierra Leone, o šoma ka thata go tloga ka iri ya bohlano mesong go fihla bošego kudu bakeng sa go hweletša yena le bana ba gagwe ba tshelelago dijo le diaparo. O bolela gore: “Batho ba bantši ba bolela gore go phela bophelo bja go botega ga go kgonege, eupja nna ke a tseba gore se ga se therešo. Ka dinako tše dingwe ke ba le mathata gomme ke se ke ka tseba gore a tla rarollega bjang. Eupja ke a tseba gore ge ke phela bophelo bja go botega, dilo ka moka di tla ntokela. Ka gona ke leka ka matla gore ke se ke ka nyamiša Jehofa.”
Mongwadi o mongwe o itše: “Monna wa modiidi yo a swerwego ke tlala o nyaka kholofelo . . . go feta senkgwa.” Ee, go felelwa ke kholofelo le manyami a magolo ke mahloko ao a ka fetago tlala. Eupja ga go lebaka la gore motho yo a tsebago Modimo le go mmota a ineele tlalelong. Rosaline o oketša ka gore, “Mo nakong ye ke šoma ka matla, eupja ke thabile ka gobane ke a tseba gore nako e tla tla yeo go ka se kego gwa nyakega gore ke šome ka thata ka tsela ye. Mo nakong ye ke šomela go hweletša nna le lapa la-ka dijo, eupja lefaseng le lefsa la Jehofa go tla ba le dijo tše dintši. Ka gona ke na le kholofelo le lethabo tšeo ke sa kago ka ba le tšona pele ke tseba Jehofa.”—Bapiša le Jesaya 25:6; Kutollo 21:3, 4.
Ke therešo, bao ba botilego Modimo ba ka tšwela pele ba e-na le mathata a tša ditšhelete, bjalo ka moapostola Paulo. Eupja le ka mohla ga go nyakege gore ba retologele tabeng ya go roba melao ya Modimo bakeng sa gore ba ka ba le ditšhelete. Mopsalme Dafida o itše: “Ke be ke le lesoxana, ka bá ka tšofala kè sešo ka bôna moloki à lahlilwe, le bana ba xaxwe bà diila.” (Psalme 37:25) Ee, Modimo o hlokomela le go šegofatša bao ba beago dikgahlego tša gagwe pele maphelong a bona.—Mateo 6:25-33.
Ka gona, ge e ba o le motho yo a se nago sa gagwe, ‘o se ke wa lapa go dira tše botse.’ (2 Ba-Thesalonika 3:13) Le ka mohla o se ke wa retologela tabeng ya go kwanantšha boitshwarong. Aga kwano le Modimo gomme o ithekge ka yena gore a go thuše go lebeletšana le mathata le maima a bophelo. Bao ba direlago Jehofa gomme ba mo holofela ka mo go feletšego ba kgothatšwa ka gore: “Ikokobetšeng ka tlase xa seatla se matla sa Modimo, xore a Le xodiše lebakeng la xôna. Dipelaêlô tša lena ka moka di lahleleng xodimo xa xaxwe, xobane ké Yêna a Le belaêlêlaxo.”—1 Petro 5:6, 7.
[Seswantšho go letlakala 6]
“Monna wa modiidi yo a swerwego ke tlala o nyaka kholofelo go feta senkgwa”
[Seswantšho go letlakala 7]
Dihlatse tša Jehofa di thuša batho go bea kholofelo ya bona go Modimo