• Kgetha Bagwera Gabotse
    O ka Thabela Bophelo go ya go Ile!—Ithute Beibele le Rena o tla Bona
    • Thuto 48. Bagwera ba bane ba tšea senepe sa selfie.

      THUTO 48

      Kgetha Bagwera Gabotse

      Bagwera ba nnete ba thaba le rena ge re thabile, e bile ba a re kgothatša ge re na le mathata. Eupša Beibele e re lemoša gore ga se batho ka moka e ka bago bagwera ba nnete. Bjale o ka kgetha bjang bagwera ba babotse? A re arabeng dipotšišo tše di latelago:

      1. Bagwera bao o ba kgethago ba ka go ama bjang?

      Gantši re dira dilo go swana le batho bao re fetšago nako re na le bona. Batho bao ba ka re thuša gore re dire dilo tše dibotse, goba ba dira gore re dire dilo tše mpe, go sa šetšwe gore re fetša nako re na le bona goba re bolela le bona Inthaneteng. Beibele e re: “Yo a sepelago le ba bohlale o tla hlalefa, eupša yo a gweranago le ditlaela [e lego batho bao ba sa ratego Jehofa] o tla tshereana.” (Diema 13:​20) Bagwera bao ba ratago Jehofa le go mo hlankela, ba tla go thuša gore le wena o be mogwera wa Jehofa le go dira diphetho tše dibotse. Eupša ge o na le bagwera bao ba sa hlankelego Jehofa, ba ka dira gore o se sa ba mogwera wa gagwe. Ke ka baka leo Beibele e re eletšago gore re kgethe bagwera gabotse. Ge re na le bagwera bao ba ratago Jehofa, re tlo holega gomme le bona ba tlo holega. Se se tlo dira gore re ‘kgothatšane e bile re agane.’​—1 Bathesalonika 5:11.

      2. Jehofa o ikwa bjang ka bagwera bao o ba kgethago?

      Jehofa le yena ge a kgetha bagwera o ba kgetha gabotse. Ke ka baka leo Beibele e rego: “Modimo o gwerana kgauswi le baloki.” (Diema 3:​32) Jehofa o ikwa bjang ge re gwerana le batho bao ba sa mo ratego? O nyama kudu! (Bala Jakobo 4:4.) Eupša o a thaba ge re kgetha bagwera bao ba mo ratago, gomme le yena o tlo re kgetha gore re be bagwera ba gagwe.​—Psalme 15:​1-4.

      ITHUTE KA MO GO TSENELETŠEGO

      Ekwa gore ke ka baka la eng go le bohlokwa go kgetha bagwera gabotse, le gore re ka kgona go kgetha bjang bagwera bao ba tlago go re thuša mo bophelong.

      3. Hlokomela gore o se ke wa ba le bagwera ba babe

      Batho bao ba sa ratego Modimo e bile ba sa phele ka melao ya gagwe, ke bagwera ba babe. Bapalang BIDIO ye, gomme le boledišaneng ka potšišo e latelago:

      BIDIO: Ithute go Gana Ditlwaelano tše Mpe (6:17)

      • Re ka gwerana bjang le bagwera ba babe re sa lemoge?

      Balang 1 Bakorinthe 15:​33, gomme le boledišaneng ka dipotšišo tše di latelago:

      • Ke motho wa mohuta mang yo e ka bago mogwera yo mobe go wena? Go re’ng o re’alo?

      Balang Psalme 119:​63, gomme le boledišaneng ka potšišo e latelago:

      • Go ya ka lengwalo le, o swanetše go kgetha bagwera ba mohuta mang?

      Sekotlelo seo se nago le diapola. Apola yeo e bodilego e dira gore go be le dintšhi gomme e thoma go bodiša diapola tše dingwe.

      Apola e tee yeo e bodilego e ka bodiša le diapola tše dingwe. O nagana gore mogwera yo mobe a ka dira gore o feleletše o dirile dilo tša mohuta mang?

      4. Le batho bao ba sa swanego le rena, e ka ba bagwera ba nnete

      Beibele e re botša ka Dafida le Jonathane, bao e bego e le bagwera ba bagolo. Eupša banna ba ba be ba fapane kudu. Jonathane o be a feta Dafida ka mengwaga e mentši e bile e le morwa wa kgoši. Balang 1 Samuele 18:​1, gomme le boledišaneng ka dipotšišo tše di latelago:

      • Na re swanetše go gwerana feela le batho bao ba lekanago le rena ka mengwaga goba bao ba nago le maemo a go swana le a rena? Go re’ng o re’alo?

      Balang Baroma 1:​11, 12, gomme le boledišaneng ka potšišo e latelago:

      • Bagwera bao ba ratago Jehofa ba ka kgothatšana bjang?

      Bidiong e latelago, ekwa gore mofsa yo mongwe o ile a hwetša bagwera bjang gare ga batho bao a bego a sa nagane gore e ka ba bagwera ba gagwe. Bapalang BIDIO ye, gomme le boledišaneng ka dipotšišo tše di latelago:

      BIDIO: Hwetša Bagwera Gare ga Bao o Bego o sa Nagane Gore e ka ba Bagwera ba Gago (5:06)

      • Ke ka baka la’ng batswadi ba Lehumo ba be ba tshwenyegile ka bagwera bao a bego a na le bona kua sekolong?

      • Ke dilo dife tšeo di bego di kgahla Lehumo ka bagwera bao?

      • O ile a thušwa ke’ng gore a se sa lewa ke bodutu?

      5. O ka dira eng gore le wena o be mogwera wa nnete?

      Ekwa gore o ka hwetša bjang bagwera ba nnete, le gore le wena o ka dira eng gore o be mogwera wa nnete. Bapalang BIDIO ye.

      BIDIO: Mogwera wa Paale ke wa Mohuta Mang? (4:14)

      Seswantšho seo se tšwelelago karolwaneng yeo e lego bidiong ya ‘Mogwera wa Paale ke wa Mohuta Mang?’ Mofsa o na le bagwera ba go se lekane ka mengwaga, ba go tšwa ditšong tša go se swane le ba go ba le bokgoni bja go se swane.

      Balang Diema 18:​24 le 27:​17, gomme le boledišaneng ka dipotšišo tše di latelago:

      • Bagwera ba nnete ba thušana bjang?

      • Na le wena o na le bagwera ba mohuta woo? Ge e ba go se bjalo, o ka dira’ng gore o be le bona?

      Balang Bafilipi 2:​4, gomme le boledišaneng ka potšišo e latelago:

      • E le gore o be le bagwera ba nnete, le wena o swanetše go ba mogwera wa nnete. O ka dira seo bjang?

      Diswantšho: Mofsa o etile le bagwera ba gagwe ba bararo. 1. O boledišana le yo mongwe wa bona ka founo. 2. O boledišana le yo mongwe wa bona yo a tšofetšego Holong ya Mmušo. 3. O etetše yo mongwe wa bona yo a nyamilego.

      E le gore o be le bagwera ba nnete, le wena o swanetše go ba mogwera wa nnete

      BATHO BA BANGWE BA RE: “Go kaone gore ke gwerane le motho yo mongwe le yo mongwe go e na le gore ke hloke mogwera.”

      • Wena o ka re’ng go bona?

      O ITHUTILE ENG?

      Ge re kgetha bagwera gabotse re tlo thabiša Jehofa e bile le rena re tlo holega.

      Dipotšišo

      • Ke ka baka la’ng Jehofa a na le taba le gore re kgetha bagwera ba mohuta mang?

      • Ke batho ba mohuta mang bao re sa swanelago go gwerana le bona?

      • Re ka dira’ng gore re hwetše bagwera ba nnete?

      Seo o ka se dirago

      ITHUTE KA MO GO OKETŠEGILEGO

      Ekwa gore bagwera ba nnete ba ka re thuša bjang ge re na le mathata.

      “Šoma ka Thata Gore o be le Bagwera ba Kgonthe ka Phuthegong Pele Bofelo bo Fihla” (Morokami wa November 2019.)

      Ekwa gore o ka dira eng gore o hwetše bagwera ba nnete.

      “Nka Kgetha Bjang Bagwera ba Kgonthe?” (Dipotšišo tša Bafsa le Dikarabo tše Šomago, Bolumo 1, kgaolo 8)

      Ke’ng seo o swanetšego go se tseba ka go dira bagwera Inthaneteng?

      Diriša Social Network Gabotse (4:12)

      E le gore o kwe gore ke eng seo se thušitšego monna yo mongwe gore a kgethe bagwera gabotse, bala sehlogo seo se rego, “Ke be ke Hlologetše go ba le Tate.”

      “Beibele e Fetoša Maphelo” (Morokami wa April 1, 2012.)

  • Kgetha Boithabišo bjo bo Tlago go Thabiša Jehofa
    O ka Thabela Bophelo go ya go Ile!—Ithute Beibele le Rena o tla Bona

    • 1. Re swanetše go dula re gopola eng ge re kgetha boithabišo?

      Wena o rata go dira’ng ge o ithabiša? Batho ba bangwe ba rata go ithabiša ka go no itulela ka gae, gomme ba bala dipuku, ba theetša mmino, ba bogela dimubi goba ba tsena Inthaneteng. Mola ba bangwe ba rata go dira dilo tše itšego ba na le bagwera ba bona. Ba dira dilo tša go swana le go bogela dipapadi thelebišeneng, goba go bapala di-game. Eupša go sa šetšwe gore re dira eng ge re ithabiša, re swanetše go dula re kgetha dilo tšeo di “amogelegago go Morena.” (Baefeso 5:​10) Go bohlokwa gore re kwešiše taba ye ka gobane boithabišo bjo bontši bjo bo tumilego lehono, bo na le dilo tšeo Modimo a di hloilego. Dilo tša go swana le bošoro, go itshwara gampe ka tša thobalano goba boloi. (Bala Psalme 11:5.) Re ka thušwa ke’ng gore re kgethe boithabišo gabotse?

      Ge e ba re kgetha bagwera bao ba ratago Jehofa, ba ka re thuša gore re kgone go kgetha boithabišo bja rena gabotse. Ka ge re šetše re kwele thutong e fetilego, “yo a sepelago le ba bohlale o tla hlalefa, eupša yo a gweranago le ditlaela o tla tshereana.” Se se ra gore ge e ba re gwerana le batho bao ba sa ratego go phela ka melao ya Modimo, ‘re tlo tshereana.’​—Diema 13:20.