Tšwelang Pele le bo Nyaka Bjalo ka Mahumo a Fihlilwego

MAHUMO a bohlale bjo bo hwetšwago Lentšung la Modimo, Beibele, ke a bohlokwa-hlokwa gakaakang! Mahumo a utolla morero wa Modimo gomme a bea dikholofelo tše kgahlišago pele ga rena. A re nea khomotšo le go re bontšha kamoo re ka kgahlišago Modimo ka gona. (Ba-Roma 15:4) Le gona mahumo a a re thuša go dira ka bohlale ditirišanong tša rena le ba bangwe. Ka kgonthe, bohlale bjo bo tšwago go Modimo bo re thuša go sepela ‘mmileng wa bophelo’ ka kgotsofalo le lethabo.—Psalme 16:11; 119:105.

Ka ge mehola ya bohlale e le e mentši, gona re swanetše go bo sema bja bohlokwa kudu. Bohlale ka sebopego sa mothofatšo bo bolela gore, “Polelo tša-ka ke tša toko; xo tšona xa xo bomenetša le xo fora. Wa thlaloxanyo o tlo hwetša di rereša tšohle; mohlalefi o re di lokile. Amoxelang dithsolo tša-ka; di fetiša thsipi-thsehla; le tsebo ya-ka e fetiša thsipi ya bohlokwa. Bohlale bo phala dipheta ka botse; le tsohle tše di ratexaxo xa di bo fihlele.”—Diema 8:8-11.

Ke ka Baka Lang re Swanetše go Tšwela Pele re Nyaka?

Gantši, go nyaka magakabje, gauta, goba silifera e utilwego ga go hole. Se ga se sa swanela go ba sa therešo ka go nyaka bohlale bja Modimo. Eupja re ka atlega bjang lesolong le? Ee, katlego e ithekgile ka tekanyo ya kganyogo ya rena e mafolofolo ya go kganyoga lehumo le, le ya modiro wo re tlago go o dira bakeng sa go le hwetša. Ge e ba re lemoga bohlokwa bja lona bja kgonthe, gona re tla le hlokomela go feta dilo ka moka tše bohlokwa. Sa bohlokwa kudu, “xo huma bohlale xo phala thsipi e khwibidu; xo huma thlaloxanyo xo phala thsipi e thsehla.”—Diema 16:16.

Diema 2:1-6 e kgothatša ka gore: “Ngwan’a-ka! Xe O ka dumela dikeletšo tša-ka, ’me wa hlokomela ditaelo tša-ka, Xe bohlale O bo sekexela tsebe, wa lebiša pelo y’axo mo xo lexo thlaloxanyo, Xe O ka bitša temoxo wa hlabošetša thlaloxanyo ’ntšu la xaxo, Xe O ka e tsoma byalo ka leruo, wa e nyakišiša bo-ka ’humô le le fihlilwexo, Ke mo O tl’o xo tseba xo boifa Morena, wa fihlela xo tseba Modimo. Xobane bohlale motho o bo newa ke Modimo; tsebo le temoxo di tšwa molomong wa xaxwe.”

Ka ge mahumo a epetšwego a utilwe, gona ke gabohlokwa go a nyaka. Ge ba epa, ba bangwe ba gafa dinako tša boitapološo, tša go ja le tša go robala. Eupja boiteko bjo bo bjalo bo lebelelwa e le bjo bo swanetšego ge lehumo le hwetšwa. Re swanetše go dira boikgafo bjo bo swanago ge re nyaka bohlale bja Modimo. Ka ge go tsoma mahumo a fihlilwego go nyaka go epa mo go lapišago, ruri le go tsoma bohlale go nyaka kgotlelelo. Go fo lahlela mahlo ka Beibeleng le dipukung tša Bokriste ga go a lekana. Nako, nyakišišo le go naganišiša di a nyakega bakeng sa go hwetša mahumo a moya. Eupja ke mo go kgahlišago gakaakang ge re hwetša temogo Mangwalong!—Nehemia 8:13.

Lesolo le le Atlegago la go Nyaka Lehumo

Ee, lethabo le tlišwa ke go epa Lentšung la Modimo le go hwetša mahumo a bohlale. (Diema 3:13-18) Bakeng sa mafelelo a bjalo, re ba bohlale ge re dira bokgobapuku bja motho ka noši goba bja lapa. Eupja bo swanetše go ba le’ng? Ka ntle le puku-ntšu e botse, Dihlatse tša Jehofa di hwetša e le mo go holago go ba le diphetolelo tše fapa-fapanego tša Mangwalo, gotee le dipuku tša Beibele tša Bokriste, go akaretša le dikopi tša ngwaga le ngwaga tša Morokami gotee le makasine wo o sepedišanago le wona, e lego Awake! Ee, bokgobapuku bo swanetše go dirišwa ka mo go swanetšego ge e ba bo tla re thuša bjalo ka batsomi ba lehumo.

Lesolong la rena la go tsoma bohlale, re ka ela hloko taba le dikarolo tša Mangwalo tša Watch Tower Publications Index goba ditlhatlamano tša dihlogo ka mafelelong a dipuku tša Mokgatlo wa Watch Tower goba di-volume tše di tlemilwego tša makasine wo. Tše ke didirišwa tša motheo bakeng sa go nyaka bohlale bja Modimo. Ge e le gabotse, di swana le mmapa wo o kago re lebiša go “mahumo a fihlilwexo” a bohlale bja Modimo. (Diema 2:4) Ge e ba re se na dipuku tše itšego tše di nyakegago bakeng sa nyakišišo, mo gongwe di ka hwetšagala Holong ya Mmušo ya Dihlatse tša Jehofa ya lefelong leo.

Bjale, anke re direng mohlala wa lesolo le le atlegago la go nyaka lehumo. Mmalong wa rena wa Beibele, mo gongwe re ka ipotšiša kamoo Judase Isikariothe a hwilego ka gona ka morago ga go eka Jesu Kriste. Mateo 27:5 e bolela gore Judase o ile “a ya a ikxama ka lerala.” Eupja Ditiro 1:18 a re: “A y’o koduma ka hloxo, a palexa ka boxare, mala a xaxwe ka moka a xorometšexa.” Ka gona Judase o hwile bjang? Karabo e ka hwetšwa ka go lebelela tatelano ya ditemana tše ka go “Scripture Index” ya puku ya Insight on the Scriptures. E re botša gore: “Go bonagala Mateo a bolela ka mokgwa wa go leka go ipolaya, mola Ditiro e hlalosa mafelelo. Ge re kopanya dipego tše pedi, go bonala gore Judase o ile a leka go ikgama legageng, gomme thapo goba lekala la sehlare le ile la robega moo a ilego a kodumela gomme a palega ka bogare ge a wela mafsikeng a lego ka tlase. Seswantšho sa Jerusalema se dira tiragalo e bjalo gore a amogelelege.” (Volume 2, letlakala 130) Mabapi le Insight on the Scriptures, hle bona letlakala 10 la makasine wo.

Go diriša concordance go re kgontšha go hwetša ditemana tša Beibele. Ee, ge re boledišana ka lengwalo, re swanetše go ela hloko ditemana tše di le dikologilego. Ka mohlala, anke re ele hloko Psalme 144:12-14 (NW). Ditemana tše di emela batho ba bangwe ka ge di re: “Barwa ba rena ba etša mere, barwedi ba rena ba etša dikokwane tše di betlilwego bjalo ka tša ngwako wa bogoši, dišego tša rena di a tlala, diruiwa tša rena di tswala ka dikete, dikgomo tša rena di duša di sa folotše.” Mo gongwe re be re ka nagana gore mantšu a a dira go batho ba Modimo, eupja ditemana tše di di dikologilego di bontšha gore ga go bjalo. Temaneng 11 Ps 144:11, mopsalme Dafida o kgopela go lokollwa go bao ba bolelago maaka. Ba be ba ikgogomoša ka barwa ba bona, barwedi ba bona, dihuswane tša bona le dikgomo. Go ya ka Ps 144 temana 15, (Phetolelo ya Kgale) bafoši ba bjalo ba itše: “Go sego setšhaba se se dutšego se le bjalo.” Lega go le bjalo, Dafida o ile a makala ka mo go fapanego ka gore: “Go sego setšhaba seo Jehofa e lego Modimo wa sona.”

Mahumo a Moya a a Ata!

Ge e le gabotse lethabo le tlišwa ke lesolo le atlegago la go tsoma bohlale. Mahumo a moya ao a ka hwetšwago ka go nyakišiša a akaretša dikarabo tše di kgotsofatšago tša dipotšišo tša Beibele. A dikarabo tšeo re di hwetšago ge re tšwela pele re nyaka! Ka mohlala, Kaine o hweditše kae mosadi wa gagwe? The Watchtower (October 1, 1981) e itše: “Beibele e re botša gore Adama le Efa ba ile ba ba le bana ba bantši, e sego ba babedi feela [Kaine le Abele]. ‘Xe xo belexwe Sethe [morwa o mongwe] Adama o feditše nywaxa e mengwe e makxolo a seswai, a ba le barwa le barwedi.’ (Genesi 5:4) Ka tsebišo yeo, o be o ka re Kaine o hweditše kae mosadi wa gagwe? Ee, o swanetše go ba a ile a nyala o mongwe wa dikgaetšedi tša gagwe. Lehono se mo gongwe e ka ba se kotsi bakeng sa bana bao ba belegwago ke batswadi ba bjalo ba tswalanego kgaufsi-ufsi. Eupja mathomong a histori ya motho, ge batho ba be ba le kgaufsi-ufsi le phethego, e be e se bothata.

Anke re re re bala puku ya Beibele ya Diema. Mo gongwe re ka makatšwa ke go lemoga seo se bolelwago go Diema 1:7: ‘“Xo boifa Morena” ke’ng?’ Nyakišišo e ka re lebisa go Morokami wa May 15, 1987, wo o boletšego gore: “Ke poifo, tlhompho ya kgonthe le poifo e lokilego ya go boifa go se mo kgahliše ka gobane re lemoga kgaugelo ya gagwe le botho bja gagwe. ‘Xo boifa Morena’ go bolela go dumela gore ke Moahlodi yo a Phagamego le Ramatla-ohle, yo a nago le tshwanelo le matla a go tliša kotlo goba lehu go bao ba sa mo kwego. Le gona go bolela go boifa Modimo ka potego, go mmota ka mo go feletšego le go hloya seo e lego se sebe mahlong a gagwe.”

Tšwelang Pele le Nyaka!

Morokami o gatišeditšwe go thuša batsomi ba mafolofolo ba bohlale go hwetša mahumo a bohlokwa-hlokwa a moya. Ka moka ga rena re nyaka bohlale le kwešišo ya Lentšu la Modimo. Diema 4:7, 8 (Phetolelo ya Kgale) e re: “Segolo-thata ke bohlale, o ithekele bohlale, o ithekele tlhaloganyo ka tsohle tše o nago natšo. Dira bohlale selo se segolo, ke mo bo tlogo go dira e mogolo; gomme ge o ka bo gokarela, bo tlo go godiša.”

Re ka hwetša lethabo la kgonthe ge feela re hwetša temogo Mangwalong gomme re diriša bohlale ka tshwanelo. Ee, re ka kgahliša Jehofa Modimo feela ka go diriša bohlale bja Modimo. Anke go se be le selo se se kago le šitiša go nyaka bohlale bjalo ka lehumo le le fihlilwego.

[Pictures on page 4, 5]

Go tsoma lehumo le le utilwego go nyaka go epa mo go lapišago. Na ga re a swanela go kgotlelela ge re nyaka bohlale bja Modimo?