Dithuto tše Tšwago Mangwalong: Dillo tša Jeremia 1:1–5:22

Jehofa o Nea Kholofelo Manyaming

JEHOFA ke “Modimo yo a neago kholofelo,” gaešita le manyaming. (Ba-Roma 15:13, NW) Ye ke ntlha yeo e hlaloswago gabotse pukung ya Dillo tša Jeremia, yeo e phethilwego ke moporofeta yo e bego e bile e le hlatse ya Jehofa Jeremia ka 607 Pele ga Mehla ya Rena. Eupja anke re gateleleng tše dingwe tša dithuto tšeo e di swerego.

Tlalelo ya Jerusalema

Sebe ga se tliše lethabo. Bona! Jerusalema ya sebe, yeo e kilego ya ba mošate wa Juda woo o tletšego ka batho, e dutše e nnoši e se na motho. Juda ka boyona e swana le mohumagadi yo a llago le yo a dirilwego mohlologadi ka gobane e sentšwe. ‘Bao ba bego ba e rata’ ba bjalo ka Egipita ga se ba ka ba e phološa phenyong ya Babele ka 607 Pele ga Mehla ya Rena. Batho ga ba sa kgeregela Tsione bakeng sa menyanya. Bana ba gagwe ke mathopja, gomme manaba a gagwe a a mo sega ka baka la go wa ga gagwe. Batho bašele ba sa hlwekago ba gobošitše tempele, gomme batho ba gagwe ba swanetše go nea dilo tša bohlokwa bakeng sa dijo. Tše ka moka di tšwelela ka baka la sebe!—1:1-11.

Jehofa o lokile ge a otla bafoši. Se se a amogelwa go etša ge Jerusalema ka noši e ipolela. E botšiša ge e ba go e-na le manyami lege e le afe ao a swanago le bohloko bjoo Jehofa a e tlišeditšego bjona. O rometše mollo wo o fedišitšego tempele. Dibe tša motse di fetogile joko, gomme madi a elela bjalo ka meetsana ge Modimo a o gatakela ‘bofotlelong bja morara.’ Tsione e ile ya phurolla diatla tša yona ka go nyama le ka go rapela eupja ya se hwetše mohomotši, gomme Jehofa o be a lokile ge a otla Jerusalema ya lerabele. Eka a ka otla o šoro ka mo go swanago manaba a yona ao a ikgodišago.—1:12-22.

‘Bogale bja Jehofa’

Bao ba ikarabelelago ba rwala molato ge e ba ba sa kgalemele sebe. Modimo o ‘fološitše Jerusalema legodimong a e lahlela lefaseng,’ a e dumelela gore e senywe go be go senywe le ‘bogato bja dinao tša gagwe,’ e lego tempele. (Psalme 132:7) Ka go rialo ‘o gobošitše mmušo’ wa Juda. Go swana le mošaša feela, tempele e ile ya senywa ke manaba ao mekgoši ya wona ya phenyo e bego e swana le mekgolokwane ya monyanya. Bana bao ba hwago ba be ba kgopela bo-mmago bona dijo. Eupja ke bomang bao kudu-kudu ba bego ba e-na le molato? Baporofeta ba maaka bao ba boletšego dikgoeletšo tše forago go e na le go kgalemela sebe sa Jerusalema. (Jeremia 14:13) Thapelo e swanetše, ka gobane ba bantši kudu gakaakaa ba hwile mo ‘letšatšing le la bogale bja Jehofa’!—2:1-22.

Kgaugelo ya Jehofa ga e Fele

Re swanetše go bota Jehofa ka go se fele pelo. Jeremia o bolela ntlha ye ge a bolelela batho ba bahlaki. Modimo o thibela thapelo ya gagwe, gomme o fetogile yo go bolelwago ka yena mantšung a go kwera a manaba a gagwe. Kholofelo ya gagwe, goba “xo letêla Morêna,” go bonala e fedile. Eupja o be a tla ba le ‘kgopolo ya go holofela’ ka gobane “Morêna ó setša ba ba mmotilexo.”—3:1-27.

Go sokologa ga kgonthe go tliša kgaugelo ya Modimo. Jeremia a kgodišegile ka se, o kgothatša ka gore: “Re boêlê xo Morêna.” Bjalo ka ge eka ke go thibela ka leru le legolo la bogale, Modimo o ile a thibela go batamelwa ka thapelo ka baka la dibe tša batho. Eupja Jeremia o rapela ka gore: “Ka bitša leina la xaxo, Morêna. . . . wa se ithibe tsêbê mola kè fêxêlwa, xe ke xoêlêla.” Ee, manaba ao a sa sokologego a tla fedišwa.—3:28-66.

‘Re Boele’

Re ka itlišetša tshenyego rena ka noši ka sebe sa ka boomo. Ka baka la sebe sa Juda, ‘barwa ba dinatla ba Tsione’ ba be ba lebelelwa bjalo ka pitša e se nago mohola e phumegilego. Ge ba rakeletšwe, bao ba bolailwego ka tšhoša ba be ba le kaone go ba bangwe bao ba ilego ba hwa gasele ka baka la tlala. Ka kgonthe, Modimo “ó thšolotše mollô wa kxalefô y’axwe.” Baporofeta ba gobogilego le baperisita ba ile ba kobakoba ka bofofu, gomme Kgoši Tsedekia, “Motlotšwa wa Morêna,” o be a thopilwe. Bjale Modimo o be a tla lebiša tlhokomelo ya gagwe go Edomo ya bobe.—4:1-22.

Ke Jehofa a nnoši yo a neago kholofelo ya kgonthe manyaming. Jeremia o lemogile se, ka gobane o kgopetše ka gore: “Morêna, se lebalê tše re dirilwexo tšôna.” ‘Nywako ya rena e dulwa ke bašele. Re rwele melato ya bo-tata-wešo, gomme re bušwa ke bašemanyana ba re gapeletša go dira.’ Lega go le bjalo, Jeremia o holofela gore o tla ba kgaugelo, gomme o rapela ka gore: “Morêna re xomišê, re boêlê xo Wene; e bê xôna xo boa xa rena.”—5:1-22.

Ka gona, gopola dithuto tše tšeo di rutilwego ka go Dillo tša Jeremia: Sebe ga se tliše lethabo, Modimo o lokile ge a otla badira-dibe, gomme batho ba ba ikarabelelago ba na le molato ge e ba ba sa kgalemele bosenyi. Re swanetše go holofela Jehofa ka go se fele pelo, re kgodišegile gore kgaugelo ya Modimo e tla ka baka la go sokologa ga kgonthe, mola re ka itlišetša tshenyego rena ka noši ka sebe sa ka boomo. Puku ye e buduletšwego gape e re tiišetša gore ke Jehofa a nnoši yo a neago kholofelo manyaming.

[Lepokisi go letlakala 27]

DITEMANA TŠA BEIBELE TŠEO DI HLAHLOBIŠITŠWEGO

◻ 1:15, NW—‘Jehofa o gataketše bofotlelo bja morara bjona bjoo e lego bja morwedi wa kgarebe wa Juda’ ka gobane a ile a laela gomme a dumelela seo se diragetšego. “Morwedi wa kgarebe wa Juda” e be e le Jerusalema, yeo go bego go naganwa gore e bjalo ka mosadi yo a sego a senywa. Nakong ya ge ba-Babele ba senya motse-mošate woo wa Juda ka 607 Pele ga Mehla ya Rena, go bile le tšhollo e kgolo ya madi, yeo e swanago le meetsana a gamotšwego merareng yeo e lego bofotlelong bja merara. Jehofa o tla kgonthišetša gore Bojakane, bjo e lego Jerusalema wa seswantšhetšo, bo pšhatlwa ka mo go swanago.

◻ 2:6—“Ngwako” wa Modimo e be e le tempele kua Jerusalema. Nakong ya ge sekgethwa se be se senywa ke ba-Babele o be a o dumelela gore ‘o rutlollwe’ ka go swana le mokutwana feela o lego serapaneng. Setšhirelo se se bjalo sa nakwana letšatšing le fišago se a senyega.

◻ 3:16, Phetolelo ya Kgale—Bošula bjo bongwe bjoo Jehofa a bo dumelelago gore bo tle godimo ga Jerusalema yeo e sa botegego e le mafelelo a go thopja ga motse ke ba-Babele e hlaloswa ka mantšu a, “O sentše meno a-ka ka go a phuriša mafsikana.” Go molaleng gore ge ba-Isiraele ba be ba le tseleng go ya bothopja, ba be ba swanetše go apea dinkgwa meleteng yeo e epilwego fase. Ka lebaka leo, dinkgwa di ile tša ba le lekgwara, gomme motho yo a jago dinkgwa tše bjalo o be a ka senyega meno ka go phurela.

◻ 4:3—Sehlogo sa bo-mma go bana ba bona mo se bapišwa le tlhokomelo ya bomma yeo e newago ke diphukubje. Ešita le diphukubje tšeo mo gongwe di ka lebelelwago e le dibatana tše sehlogo, di be di ‘amuša bana ba tšona matswele.’ Ka baka la go hlokega mo gogolo ga dijo Jerusalema yeo e bego e rakeletšwe, basadi ba ba-Juda bao ba bolawago ke tlala ba ile ba ba ba sehlogo mo e lego gore ba be ba se na matutu a go amuša bana ba bona gomme ge e le gabotse ba ile ba ja bana ba bona e le gore ba tšwele pele ba phela. (Dillo tša Jeremia 2:20) Ka lebaka leo, basadi ba ile ba swana gape le dimpšhe tšeo di beelago mae a tšona gomme tša a tlogela.

◻ 5:7—Ba-Juda ba mehleng ya Jeremia ba be ba swanetše go rwala diphošo tša bo-tatago bona, eupja se ga se bolele gore Jehofa o otla ka go lebanya bana bakeng sa dibe tša batswadi ba bona. Ge e le gabotse, mafelelo a mabe a bosenyi a kwewa ke moloko wa morago. (Jeremia 31:29, 30) Ka gona re dira gabotse go gopola gore rena ka noši re swanetše go ikarabelela go Modimo.—Ba-Roma 14:12.