Koloi ya Jehofa ya Legodimong e a Sepela
“Tabeng ya maotwana, gwa goeletšwa ka ditsebeng tša-ka mabapi le na gwa thwe, ‘peakanyo ya maotwana a sepelago!’”—HESEKIELE 10:13, “NW.”
1. Jehofa o na le mohuta ofe wa senamelwa?
MEHLENG ye ya difofane tše di kitimago ka lebelo le legolo tša jet, baetapele ba lefase mo gongwe ba ka nagana gore ba fihleleletše tlhora go tša go sepela. Lega go le bjalo, nywaga e 2 600 e fetilego, Jehofa Modimo o ile a utolla gore o na le senamelwa se phalago tšohle, e lego seo go sego moentšeneare yo a kilego a bona se se swanago le sona. Ke koloi e kgolo e boifišago! Na taba ya gore Mmopi wa legohle o sepela ka senamelwa se swanago le koloi e bonagala e makatša? Aowa, ka gore senamelwa sa Jehofa sa legodimong se fapane kudu le senamelwa lege e le sefe seo se hlamilwego ke batho.”
2. Hesekiele kgaolo 1 e swantšha bjang koloi ya Jehofa ya legodimong, gomme moporofeta o thoma ka go tliša tlhokomelo ya rena go bomang?
2 Go kgaolo 1 ya boporofeta bja Hesekiele, Jehofa o swantšhwa e le yo a nametšego koloi e kgolo ya legodimong. Senamelwa se sa maotwana a mane se se boifišago se a itshepetša gomme se kgona go dira matete. Hesekiele o bone pono ye ya koloi ya legodimong ka 613 B.C.E. ge a be a le kgaufsi le o mongwe wa mekero ya Babele ya kgale. Sa mathomo moporofeta o gogela tlhokomelo ya rena go bao ba rwelego koloi ya legodimong ya Jehofa. Ge re dutše re bala, anke re lekeng go akanya seo Hesekeile a se bonego.
Diphedi tše Nne
3. Difahlego tše nne tša o mongwe le o mongwe wa bakerubi ba bane di emela eng?
3 Hesekiele o a bega: “Ya re xe ke lebêlêla ka bôna xò e-tla ledimo le lexolo lè e-tšwa thokô ya Leboa, è le leru le lexolo le le hlakanexo le mollô, lè e-tša maxadi-xadi thokô tšohle, . . . Xôna-moo xare xwa bônala tše e kexo ké diphedi tše nnê.” (Hesekiele 1:4, 5) Se sengwe le se sengwe sa diphedi tše tše nne goba bakerubi, se be se e-na le diphego tše nne le difahlego tše nne. Di be di e-na le sefahlego sa tau, seo se emelago toka ya Jehofa; sefahlego sa kgomo, seo se emelago matla a Modimo; sefahlego sa leeba, seo se emelago bohlale bja Gagwe. Le gona, di be di e-na le sefahlego sa motho, seo se emelago lerato la Jehofa.—Doiteronomio 32:4; Jobo 12:13; Jesaya 40:26; Hesekiele 1:10; 1 Johane 4:8.
4. Ke ka baka la’ng bakerubi ba be ba e-na le difahlego tše nne, gomme lebelo la bakerubi le be le swana le eng?
4 Mokerubi o mongwe le o mongwe o be a e-na le sefahlego seo se lebeletšego go le lengwe la mahlakore a mane. Ka gona, bakerubi ba be ba ka kgona go fetola tsela ka bjako gomme ba latela sefahlego seo se lebeletšego lehlakoreng leo go iwago go lona. Eupja lebelo la bakerubi bao le be le swana le eng? Ee, ba be ba ka kgona go sepela ka lebelo la legadima! (Hesekiele 1:14) Ga go na senamelwa seo se dirilwego ke batho seo se kilego sa fihlelela lebelo leo.
5. Hesekiele o hlalositše bjang maotwana a koloi le merumo ya ona?
5 Kapejana go bonagala maotwana a koloi. Ke a sa tlwaelegago gakaakang! Ditemana 16 le 18 di re: “À bônala e ke leotwana le tsênana le leotwana. Merumô ya ôna—ka xe a xodile kudu wa xo šiiša—[e] be [e] tletše mahlô mo xo fêla.” Leotwana ka mahlakoreng a mokerubi o mongwe le o mongwe le be le tla fetoga maotwana a mane ka go dumelelana le mahlakore a mane. Maotwana a be a phadima go swana le lefsika le le serolwana goba le le tala-morogo le le bonatšago goba leo le bonatšago ganyenyane. Se se oketša seetša le bobotse ponong ye ya letago. Ka ge merumo ya maotwana e be e “tletše mahlô mo xo fêla,” ba be ba sa fo leba lehlakoreng lege e le lefe ka bofofu. Le gona maotwana e be e le a magolo kudu, ka go rialo a be a kgona go akaretša sebaka se segolo ka go fo kgokologa gatee feela. Go etša bakerubi ba bane, a be a kgona go kitima ka lebelo la legadima.
Maotwana ka Gare ga Maotwana
6. (a) Ke bjang koloi e bego e e-na le maotwana ka gare ga maotwana? (b) Maotwana a be a latela eng?
6 Go be go e-na le selo se sengwe gape seo se bego se sa tlwaelega. Leotwana le lengwe le le lengwe le be le e-na le leotwana ka gare ga lona—e lego le nago le molagare o swanago, leo le bego le ka lekana ka gare ga leotwana la ka ntle. Ke ka tsela ye feela mo go bego go ka thwe maotwana a be a kgona go “ya thokô tšohle tše nnê.” (Temana 17) Maotwana a be a kgona go fetola lehlakore leo a yago go lona ka bjako ka baka la ge go be go e-na le leotwana lehlakoreng le lengwe le le lengwe. Maotwana a be a latela bakerubi ba bane lehlakoreng leo ba yago go lona. Mmele wa koloi ya Modimo o be o kgona go sepetšwa ke thekgo e sa bonagalego maotwaneng a mane go swana le sefofane se matla seo se akaladitšwego ke moya ge se dutše se sepela gasele godimo ga meetse.
7. Mothopo wa matla a maotwana e be e le eng?
7 Maotwana a tšere kae matla a a go latela mesepelo ka moka ya bakerubi ba bane? Moyeng o mokgethwa wa Modimo Ramatla-ohle. Temana 20 e re: “Mo di bexo di išwa ke môya, le ôna a ya xôna. . . . xobane a be a na le môya wa tšôna diphedi.” Matla ona ao a dirago a sa bonagalego a Modimo ao a bego a le ka gare ga bakerubi ke ona ao a bego a le ka gare ga maotwana ao.
8. Maotwana a ile a newa leina lefe gomme ka baka la’ng?
8 Maotwana a bitšwa ka mmolelwana “peakanyo ya maotwana a sepelago.” (Hesekiele 10:13, NW) Se ka ntle le pelaelo e bile ka baka la seo leotwana le lengwe le le lengwe le se dirago. Le a pshikologa goba le a hwidihwitšega. Go hlalosa karolo ye ya koloi ya legodimong ka tsela ye, go re hlokomediša lebelo leo koloi ya legodimong e sepelago ka lona. Gaešita lege maotwana a yona a be a hwidihwitšega ka lebelo le le kaakaa, ka dinako tšohle a be a kgona go bona tsela ya ona ka baka la go tlala ga ona ka mahlo.
9. Hesekiele o hlalositše bjang seo se bego se le ka godimo ga maotwana a mane a koloi ao a kitimago?
9 Eupja mo nakong ye anke re lebeleleng gomme re bone seo se lego ka godimo ga maotwana ao a bogolo bjo boifišago, ao a kitimago ka lebelo. Temana 22 ya Hesekiele kgaolo 1 e re: “Ka xodimo xa diphedi xo be xo le byalo ka e ke ké leratadima la mmala wa lexakabyê le lešweu le phadimaxo, lè bapilwe xodimo xa tšôna.” Leratadima, gaešita lege le be le tiile, le be le bonatša ganyenyane, ‘go etša legakabje le lešweu le le phadimago.’ Le be le phadima go swana le ditaamane tše dikete ge di hlabja ke letšatši. Ruri le be le boifiša!
Monamedi wa Koloi wa Letago!
10. (a) Sedulo sa bogoši le Yo a dutšego godimo ga sona di hlaloswa bjang? (b) Ke eng seo se bolelwago ke therešo ya gore Monamedi wa koloi o apere letago?
10 Ka ntle le pelaelo koloi e a ema e le gore Monamedi a kgone go bolela le Hesekiele. Ka godimo ga leratadima go na le se e kego ke sedulo sa bogoši, seo se nago le ponagalo ya botala-lerata bjo bo nopetšego. Mo sedulong sa bogoši go na le Yoo sebopego sa gagwe e kego ke sa motho. Sebopego sa motho se thušitše Hesekiele go kwešiša ponagalo ye ya Modimo gakaone. Eupja sebopego seo sa motho se apešitšwe ke letago ka ge se phadima go etša mphiri, e lego motswako o phadimago wa silibera le gauta. A sebopego se boifišago! Letago le le lebotse le be le tloga lethekeng la sebopego se e kego ke sa motho go ya godimo le go ya tlase. Ka go rialo sebopego ka moka se dikologilwe ke letago. Se se bontšha gore Jehofa ke yo a tagilego ka tsela e sa hlalosegego. Go oketša moo, Monamedi wa koloi o felegetšwa ke molalatladi o mobotse. A boemo bjo fodilego le bja boiketlo bjoo molalatladi o bo utollago ka morago ga pula! Jehofa ka go ba le kgopolo yeo e fodilego, o kgomarela dika tša gagwe tša bohlale, toka, matla le lerato ka teka-tekanyo e phethegilego.
11. Hesekiele o ile a kgongwa bjang ke pono ya koloi ya Jehofa le sedulo sa gagwe sa bogoši?
11 Koloi ya Jehofa le sedulo sa gagwe sa bogoši di dikologilwe ke seetša le mebala e mebotse. Se se fapane gakaakang le Sathane, e lego kgoši ya lefsifsi le ya sephiri! Ka gona, Hesekiele o ile a kgongwa bjang ke se ka moka? O re: “Ka re xo di bôna, ka khunama ka lothša, ka kwa lentšu la e a bolêlaxo.”—Hesekiele 1:28.
Seo Se Bego Se Swantšhetšwa Ke Koloi
12. Koloi ya Jehofa ya legodimong e swantšhetša eng?
12 Ke’ng seo se swantšhetšwago ke koloi ye e botse? Phuthego ya legodimong ya Jehofa Modimo. E dirilwe ka dibopiwa tša gagwe ka moka tše kgethwa tša moya tikologong e sa bonagalego—diserafi, bakerubi, le barongwa. Bjalo ka ge Jehofa e le Modimo yo Godimo-dimo, dibopiwa tša gagwe tša moya ka moka di ikokobetša go yena gomme o di namela ka kgopolo ya gore o di buša ka tsela ya go di hola gotee le go di diriša ka go ya ka morero wa gagwe.—Psalme 103:20.
13. (a) Ke ka baka la’ng go ka bolelwa gore Jehofa o sepediša phuthego ya gagwe? (b) Pono ya koloi ya Jehofa yeo e nago le maoto a mane yeo e sepelago e go kgoma bjang?
13 Jehofa o namela phuthego ye bjalo ka ge eka o nametše koloi, o e dira gore e ye gohle moo moya wa gagwe o e išago gona. Ga e fo itshepelela ka boyona ka ntle le taolo goba bookamedi bjo bohlale. Modimo ga a tlogele phuthego ye e e-ya lehlakoreng le lengwe le le lengwe leo e ratago go ya go lona. Go e na le moo, e latela ditaelo tša gagwe. Ba le gotee, ka moka ba lebile pele ba kopane bakeng sa go phetha merero ya Modimo ka botlalo. A thulaganyo e botse ya legodimong yeo e utollwago ke pono ye ya koloi ya Jehofa ya legodimong ya maotwana a mane yeo e sepelago! Ka go dumelelana le se, phuthego ya Jehofa e swantšhetšwa e le yeo e nago le dikhutlo tše nne, ye e leka-lekanego ka mo go phethagetšego.
Go Kgethwa e le Mohlapetši
14. Ke mang yo a swantšhetšwago ke moporofeta Hesekiele?
14 Eupja ke mang yo a swantšhetšwago ke moporofeta Hesekiele? Go ya ka ditherešo tša histori, go molaleng gore sehlopha sa Dihlatse tša Jehofa seo se tloditšwego ka moya se be se dutše se dirišana le koloi ya legodimong. Ka go rialo, Hesekiele o swantšhetša gabotse mašaledi a tloditšwego a Dihlatse tša Jehofa ga e sa le go tloga ka 1919. Ka kgopolo ya moya, phuthego ya Modimo ya legodimong e ile ya kgokagana le mašaledi a tloditšwego ngwageng woo bakeng sa go a tsošološa e le Dihlatse tša Jehofa lefaseng ka moka. (Bapiša le Kutollo 11:1-12.) Phuthego yeo ya go swana le koloi ka nako yeo e be e sepela go etša ge e sepela le lehono. Ge e le gabotse, maotwana a yona a tšwelopele a dikologa ka lebelo le legolo kudu go feta lege e le neng pele. Jehofa o tšwela pele go otlela ka lebelo!
15. Lentšu la Monamedi wa koloi ya legodimong le re’ng, gomme ke thomo efe yeo Hesekiele a e amogelago?
15 Hesekiele o be a kganyoga go tseba lebaka leo ka lona koloi ya legodimong e tlilego pele ga gagwe gomme ya ema. O ile a tseba ge a be a tlelwa ke lentšu leo le tšwago go Yo a dutšego godimo ga koloi. A tšhošitšwe ke pono ye yeo e boifišago, Hesekiele o ile a khunama. Theetša ge lentšu la Monamedi wa koloi ya legodimong le bolela: “Wene ngwan’a motho! Êma ka maoto ke bolêlê naxô’.” (Hesekiele 2:1) Jehofa bjale o roma Hesekiele go ba mohlapetši le go lemoša ngwako wa borabele wa Isiraele. O bile o laelwa go bolela ka leina la Modimo. Leina la Hesekiele le bolela gore “Modimo o a Matlafatša.” Ka gona, ke Modimo yo a matlafaditšego sehlopha sa Hesekiele gomme a se roma, a se kgetha gore e be mohlapetši go Bojakane.
16, 17. (a) Pono ya koloi ya legodimong e hotše Hesekiele bjang? (b) Mehleng ya rena, go kwešiša pono ya koloi ya legodimong go kgomile sehlopha sa Hesekiele le lešaba le legolo bjang?
16 Pono ya koloi ya legodimong e bile e boifišago le e makatšago go Hesekiele, eupja gape e ile ya mo hlamela thomo ya gagwe e le mohlapetši bakeng sa go kwatša temošo ya go fedišwa ga Jerusalema. Go bile bjalo le ka sehlopha sa mohlapetši lehono. Go kwešiša ga bona pono ya koloi ya Jehofa ya legodimong yeo e sepelago go bile le tutuetšo e kgolo go mašaledi a tloditšwego. Ka 1931 ba ile ba ithuta mo go oketšegilego ka pono ya Hesekiele, go etša ge e utollwa go Vindication, Puku ya Pele. Ka nako yeo ba ile ba tlala ka lethabo la kgonthe moo e lego gore go tloga ka tokollo ya October 15, 1931 go fihla ka ya August 1, 1950, letlakala la ka ntle la makasine wa The Watchtower le be le e-na le seswantšho sa kakanyo ya pono ya Hesekiele ya koloi ya legodimong sekhutlong sa lona sa ka godimo ka letsogong le letona. Ka gona, sehlopha sa Hesekiele se ile sa phetha thomo yeo se e neilwego, gomme se dirile e le mohlapetši, se goeletša temošo ya Modimo. Nako ya go fedišwa mo go šoro ga Bojakane ke Jehofa a le sedulong sa bogoši godimo ga koloi ya gagwe ya legodimong e be e le kgaufsi go feta lege e le neng!
17 Lehono, “lešaba le lexolo” la batho bao ba swanago le dinku le kopane le mašaledi a tloditšwego. (Kutollo 7:9) Ba le gotee ba kwatša temošo ya phedišo e tlelago Bojakane gotee le tshepedišo ye ka moka ya dilo ya Diabolo. Modiro woo wa go lemoša o tšwela pele ka lebelo, le gona go etša ge go bontšhwa go Kutollo 14:6, 7, barongwa ba a o thekga.
Go Sepela Gotee le Koloi ya Legodimong
18. Ke eng seo se swanetšego go dirwa bakeng sa go hwetša thekgo e tšwelago pele ya barongwa, gomme re swanetše go phafogela eng?
18 Barongwa bao ba ikokobetšago ba sepela ka botee e le phuthego ya Modimo ya legodimong ba dutše ba thuša bahlanka ba Jehofa ba lefaseng go phetha thomo ya bona ya go bolela ditemošo tša kahlolo ya Modimo. Ge e ba re kganyoga tšhireletšo e sa kgaotšego le tlhahlo ya bahlanka ba ba matla ba Modimo bao e lego barongwa, le rena re swanetše go sepela ka botee gotee le go sepela ka lebelo le swanago le maotwana a seswantšhetšo. Go oketša moo, re le karolo ya phuthego e bonagalago ya Jehofa yeo e sepedišanago le koloi ya gagwe ya legodimong, re swanetše go ba bao ba arabelago tlhahlong ya moya wa Modimo. (Bapiša le Ba-Filipi 2:13.) Ge e ba re le Dihlatse tša Jehofa, re swanetše go ya ka lehlakoreng letee le koloi ya legodimong. Ruri ga se ra swanela go fapana le yona ka morero. Ge e ba re newa tlhahlo mabapi le tsela yeo re swanetšego go sepela ka yona, re swanetše go e latela. Ka go dira bjalo, phuthego ga e arogane.—1 Ba-Korinthe 1:10.
19. (a) Go etša ge maotwana a koloi ya legodimong a dikologilwe ke mahlo ka gohle, batho ba Jehofa ba swanetše go phafogela eng? (b) Re swanetše go itshwara bjang mehleng ye ya tlhakatlhakano?
19 Mahlo ao a lego gohle maotwaneng a koloi ya Modimo a laetša go phagofa. Go etša ge phuthego ya legodimong e phafogile, le rena re swanetše go ba ba phafogilego bakeng sa go thekga phuthego ya Jehofa ya lefaseng. Boemong bja phuthego, re ka bontšha thekgo yeo ka go dirišana le bagolo ba tikologong ya rena. (Ba-Hebere 13:17) Le gona mehleng ye e thata, Bakriste ba swanetše go kgomarela phuthego ya Jehofa kgaufsi kudu. Ga re rate go nea dihlathollo tša rena ka noši tša ditiragalo, ka gobane ka go dira bjalo re tla ba re sa sepedišane le koloi ya Jehofa ya legodimong. Anke re ipotšišeng ka mehla gore, ‘Koloi ya legodimong e lebile thoko efe?’ Ge e ba re sepedišana le phuthego e bonagalago ya Modimo, gona re tla ba re sepedišana gape le phuthego e sa bonagalego.
20. Ke keletšo efe e botse yeo moapostola Paulo a e neago go Ba-Filipi 3:13-16?
20 Paulo o ngwadile mabapi le se ka gore: “Bana bešo! Nna xa ke ithseme xore ke šetše ke thopile. Se se lexo xôna sé-sé: Ke lebala tša kwa nthaxo; ke ôbêlêla tša kwa pele; ke kxanyêlêla boyô, mo xo lexo mphapahlôxô wa ba xo biletšwa kwa lexodimong ke Modimo ka Jesu Kriste. Ka moka ba re lexo baphethexi, a re bê le kxopolô yeo. Xe Le ka ba le kxopolô e šele, xôna Modimo ó sa tlo Le utollêla se e lexo taba. Taba-kxolo ké xore mo xo tše re di fihletšexo, re išê pele ka yôna tsela e tee, rè le batee kxopolong.”—Ba-Filipi 3:13-16.
21. Ke ka go latela mokgwa ofe go ka kgonegago go dira tšwelopele ya moya le phuthego ya Modimo?
21 Mo lentšu “tsela” ga le bolele mokgwa o mobe wo re ka se kgonego go intšha go wona. Bahlanka ba Jehofa ba na le mokgwa o mobotse wo ka wona ba kgonago go dira tšwelopele ya moya. Ke mokgwa wa go ba le thuto ya motho ka noši ya Beibele, go ba gona dibokeng tša phuthego, go ya ka mehla boboleding bja ditaba tše di lokilego tša Mmušo le go bontšha dika tša phuthego ya Modimo ya legodimong. Mokgwa o bjalo o ba dira gore ba latele tlhahlo ya phuthego yeo e swanago le koloi ya Jehofa ya legodimong. Ka go phegelela ka mokgwa wo, re tla hwetša moputso wa rena, go sa šetšwe ge e ba e le moputso wa go hwetša bophelo bjo bo se nago lehu magodimong goba bophelo bjo bo sa felego paradeiseng mo lefaseng.
22. (a) Ke eng seo se swanetšego go dirwa bakeng sa gore mašaledi a tloditšwego le lešaba le legolo la dinku tše dingwe e be ba kopanego? (b) Ke eng seo se sa širegego mahlong a Jehofa?
22 Go etša ge Johane 10:16 e bontšha, “dinku tše dingwê” le sehlopha sa Hesekiele ba tla ba ba rulagantšwe ka mo go kopanego. Ka gona, ke gabohlokwa gore bohle bao ba lego ka phuthegong ya Jehofa ba kwešiše moko le bohlokwa bja pono yeo e ngwadilwego go Hesekiele kgaolo 1 ge e ba ba tla sepela ka go dumelelana le koloi ya Modimo ya legodimong. Pono ya yona e re thuša go lemoga gore re swanetše go sepela ka go dumelelana le phuthego ya Modimo e bonagalago le e sa bonagalego. Le gona gopola gore mahlo a Jehofa “a tsepeletše lefase ka moka, xore a bônatšê matla a xaxwe ka bao ba lebeletšego Yêna ka pelo ka moka.” (2 Koronika 16:9) Ga go selo le setee seo se širegago mahlong a Jehofa, kudu-kudu ge e le selo se sengwe le se sengwe seo se lego mabapi le morero wa gagwe wa go mo godiša e le Kgoši ya Legohle.
23. Ge koloi ya Jehofa ya legodimong e dutše e sepela, ke’ng seo re swanetšego go se dira?
23 Koloi ya Jehofa ya legodimong ruri e a sepela lehono. Dilo ka moka di tla tloga di tagafatšwa ka go dumelelana le Raletago yo a sepelago ka koloi—tšohle tše e le go mo phagamiša e le Mmuši wa legohle. Baserafi ba gagwe, bakerubi le barongwa ba re thekga modirong wa rena o mogolo wa boboledi wa lefase ka bophara. Ka gona, a re tšweleng pele le phuthego ya Jehofa ya legodimong. Eupja ke bjang re ka sepelago ka lebelo letee le koloi ya legodimong yeo e kitimago?
O tla Araba Bjang?
◻ Ke dika dife tšeo di emelwago ke diphedi tše nne tšeo di bonwego ke Hesekiele?
◻ Koloi ya Jehofa ya legodimong e swantšhetša eng?
◻ Ke mang yo a swantšhetšwago ke moporofeta wa Modimo Hesekiele?
◻ Go kwešiša koloi ya Jehofa ya legodimong go kgomile sehlopha sa Hesekiele le lešaba le legolo bjang?