Go Nyakega’ng Gore o Thabe?

BO-RA-DIPOLITIKI bao ba kgethilwego ke batho ba leka ka thata go thabiša batho bao ba ba kgethilego. Go ba gona, mešomo ya bona e ithekgile ka seo. Eupja makasine wa ditaba o bolela ka “bakgethi bao ba nyamilego le ba hlokomologilwego” kua Poland. Mongwadi wa ditaba o hlalosa gore United States ke lekoko la batho leo “le tletšego ka go gononela dipolitiki tše di tlwaetšwego.” Mongwadi yo mongwe o re botša ka “go se šetše mo go oketšegago ga dipolitiki kua Fora.” Go se šetše mo go bjalo mo go apareditšego le go se kgotsofale—tšeo le gatee di sa lekanyetšwago dinageng tše tše tharo feela—go bontšha gore bo-ra-dipolitiki ba a palelwa maitekong a bona a go thabiša batho.

Baetapele ba bodumedi le bona ba holofetša lethabo, ge e ba le sa hwetšwe bophelong bjo, gona mohlomongwe le tla hwetšwa bophelong bja nako e tlago. Ba thekga se motheong wa tumelo ya gore batho ba na le moya o sa hwego goba moya wo o yago lefelong le lengwe ge ba e-hwa, yona kgopolo yeo batho ba bantši ba sa e dumelego ka mabaka a fapa-fapanego, gomme e le yeo Beibele e e bontšhago gabotse e le ya maaka. Dikereke tšeo di se nago batho le lelokelelo le le fokotšegago la ditho tša tšona di bontšha gore ba dimilione ga ba sa hlwa ba lebelela bodumedi e le bja bohlokwa tabeng ya go tliša lethabo.—Bapiša le Genesi 2:7, 17; Hesekiele 18:4, 20.

Barati ba ba sa Kgotsofalego ba Silifera

Ge e ba lethabo le sa hwetšwe dipolitiking goba bodumeding, le ka hwetšwa kae? Na mo gongwe le ka hwetšwa lefaseng la kgwebo? Le lona le bolela gore le kgona go tliša lethabo. Le tšweletša taba ya lona ka mokero wa tša papatšo, le bolela ka mo go kwalago gore: Lethabo le hwetšwa ka go ba le dithoto ka moka tša dilo tše di bonagalago le ditirelo tšeo di ka rekwago ka tšhelete.

Go bonagala palo ya batho bao ba nyakago lethabo ka tsela ye e oketšega. Go begilwe nywageng e mmalwa e fetilego gore seripa-gare sa malapa kua Jeremane se be se tsene o šoro dikolotong. Ka gona, ga go makatše ge kuranta e tumilego ya Jeremane ya Die Zeit e boletše e sa le pele gore “a mantši [a ona] a ka se kgone go lefa sekoloto sa ona.” E hlalositše gore: “Go bonolo kudu go goga tšhelete ye e fetago tekanyetšo yeo panka ka mehla e go dumelelago yona—gomme go thata kudu go itanyolla moreong woo wa sekoloto.”

Ditšhabeng tše dingwe tša diintaseteri tše dikgolo le gona boemo ke bjo bo swanago. Nywaga e sego kae e fetilego, David Caplovitz, setsebi sa tša leago kua City University ya New York, o ile a akanyetša gore kua United States malapa a magareng ga dimilione tše 20 le tše 25 a be a tsene o šoro sekolotong. O itše, “Batho ba dikolotong tša go šiiša, gomme se se tliša mathata maphelong a bona.”

Se le gatee ga se kwagale e le se se thabišago! Eupja na re swanetše go letela gore lefase la kgwebo le kgone go dira seo tše dingwe tše pedi (dipolitiki le bodumedi) go lego molaleng gore di ka se kgone go se dira? Kgoši Salomo yo a bego a humile o kile a ngwala gore: “E a ra-taxo mahumô xa a hore ka ôna; mo-lla-boati xa a holexe selô. Le tšôna ké lefêla.”—Mmoledi 5:9.

Go nyaka lethabo mahumong a dilo tše di bonagalago go swana le go lora o e-na le lehumo le lethabo. E ka ba mo go kgahlišago go lora ka dilo tše, eupja ge o phapharega o tla hwetša di se gona.

Lethabo le a Hwetšagala, Eupja Bjang?

Moapostola Paulo o bitša Jehofa gore ke “Modimo yo a thabilego.” (1 Timotheo 1:11, NW) Ka go bopa batho ka seswantšho sa gagwe, Modimo yo a thabilego o ile a ba fa bokgoni bja gore le bona e be ba thabilego. (Genesi 1:26) Eupja lethabo la bona le be le swanetše go ithekga ka go hlankela ga bona Modimo, go etša ge mopsalme a ile a bontšha: “Go thaba batho bao Modimo wa bona e lego Jehofa!” (Psalme 144:15b, NW) Gore tirelo ya rena go Modimo e akaretša eng le kamoo go mo hlankela ga rena go išago lethabong la kgonthe ka gona go ka kwešišwa gakaone ge e ba re ela hloko a sego kae a mafelo a a 110 ao go ona mantšu “go thabile” le “lethabo” a tšwelelago ka go New World Translation.

Go Lemoga Dinyakwa tša Moya

Jesu Kriste, Morwa wa Modimo, o boletše Thutong ya gagwe e tumilego ya Thabeng gore: “Go thabile bao ba lemogago dinyakwa tša bona tša moya.” (Mateo 5:3, NW) Lefase la kgwebo le leka go re aroša ka go re dira gore re nagane gore go reka dilo tša matsaka ke mo go lekanego bakeng sa go hwetša lethabo. Le re botša gore lethabo ke go ba le computer ya ka gae, khamera ya video, mogala, koloi, ditlabakelo tša morago-rago tša dipapadi le diaparo tše sa tlwaelegago. Seo le sa re botšego sona ke gore batho ba masome a dimilione lefaseng ga ba na dilo tše gomme se ga se bolele gore ga se ba thaba. Le ge mohlomongwe di kaonafatša bophelo le go bo nolofatša, dilo tše ga se tšona di tlišago lethabo.

Go etša ge Paulo a dirile, bao ba lemogago dinyakwa tša bona tša moya ba re: “Ké xôna, xe re na le dijô le diaparô, a re kxolweng ke tšôna.” (1 Timotheo 6:8) Ka baka la’ng? Ka gobane go kgotsofatša dinyakwa tša moya ke selo seo se išago bophelong bjo bo sa felego.—Johane 17:3.

Na go thabela dilo tše dibotse ge e ba re e-na le tšhelete ya go di reka ke phošo? Ga go bjalo. Lega go le bjalo, go ithuta go se nwelele go kgotsofatšeng selo se sengwe le se sengwe seo re se nyakago goba go reka selo se sengwe feela ka gobane re ka kgona go se reka go matlafatša boemo bja rena bja moya. Ka go dira bjalo re ithuta go kgotsofala ka tšeo re nago le tšona gomme ra kgomarela lethabo, bjalo ka ge Jesu a ile a dira bjalo, gaešita lege maemo a gagwe a tša boiphedišo e be e se a kaone-kaone go ya ka ditekanyetšo tša lefase. (Mateo 8:20) Le gona Paulo o be a sa bontšhe go se thabe ge a be a ngwala gore: “Nna ke ithutile xo kxôlwa ke tše ke naxo le tšôna. Bobôtlana ke a bo tseba; le motlalô ke a o tseba. Ke tlwaetše tšohle, e ka ba xo hora le xo kwa tlala; e ka ba xo tlalêlwa ke dilô, e ka ba xo di hlôka.”—Ba-Filipi 4:11, 12.

Go Bota Jehofa

Go lemoga ga motho dinyakwa tša gagwe tša moya go bontšha go ikemišetša go bota Modimo. Se se tliša lethabo, go etša ge Kgoši Salomo a ile a hlalosa gore: “Go thabile yo a botago Jehofa.”—Diema 16:20, NW.

Lega go le bjalo, na ga se therešo gore batho ba bantši ba bota tšhelete le mahumo a bona kudu go feta kamoo ba botago Modimo ka gona? Ge se se lebelelwa ka pono ye, ga go na lefelo leo e ka bago le le fošagetšego kudu go ka bea moano “Re Botile Modimo” go feta tšheleteng, gaešita lege mantšu ao a ngwadilwe mo tšheleteng ya U.S.

Kgoši Salomo, yo a bego a sa hloke le se tee sa dilo tše botse tšeo tšhelete e bego e di reka, o ile a lemoga gore go bota mahumo a dilo tše di bonagalago ga go iše lethabong la ka mo go sa felego. (Mmoledi 5:12-15) Tšhelete yeo e lego ka pankeng e ka lobja ka go wa ga panka goba ka tlhatlogo ya ditheko. Dithoto tše e lego meago di ka fedišwa ke madimo a šoro. Le ge ditumelelano tša phemelo di ka thuša ganyenyane go lefelela ditshenyagalelo tša dilo tše di bonagalago, fela le ka mohla go ka se kgone go fediša tahlegelo maikwelong. Di-stock le di-bond di ka fetoga dilo tše se nago mohola ka bošego bjo tee ge mmaraka o e wa ka bjako. Gaešita le mošomo wo o lefago gabotse—ka mabaka a mantši—o ka ba gona mo nakong gomme wa tsoga o fedile ka le le latelago.

Ka lebaka la mabaka a, yo a botilego Jehofa o bona bohlale bja go theetša temošo ya Jesu: “Le se kê la ikxobêlêla mahumô lefaseng, mo xo senyaxo thswêlê le diji, mo xo phulaxo mahodu a utswa. Mahumô ikxobeleng lexodimong, mo xo sa senyexo thswêlê le diji, mo xo sa phulexo mahodu a utswa.”—Mateo 6:19, 20.

Ke maikwelo afe a fetišago a polokego le a lethabo ao motho a ka bago le ona go feta a go tseba gore o botile Modimo Ra-matla-ohle, yo a neago tše di nyakegago ka mehla?—Psalme 94:14; Ba-Hebere 13:5, 6.

Go Amogela Tsholo ya Modimo

Keletšo, gaešita le tsholo, di a amogelwa ge e di newa ke mogwera wa kgonthe ka moya wa lerato. Yo a bego a ipolela gore ke mogwera wa mohlanka wa Modimo Jobo o kile a mmotša ka mokgwa wa go itokafatša gore: “Yo šexo ké mo-sôlwa-ke-Modimo.” Lege polelo yeo e le therešo, seo Elifase a bego a se bolela ka mantšu—gore Jobo o be a e-na le molato wa go dira bobe bjo bogolo—e be e se therešo. A ‘mohomotši wa go tena motho’ gakaakang! Lega go le bjalo, ka morago ge Jehofa a sola Jobo ka tsela e lerato, Jobo o ile a amogela tsholo yeo ka boikokobetšo gomme a itsenya tseleng ya go hwetša lethabo le legolwanyana.—Jobo 5:17, NW; Jb 16:2; 42:6, 10-17.

Lehono, Modimo ga a bolele le bahlanka ba gagwe ka go lebanya go etša ge a ile a bolela le Jobo. Go e na le moo, o ba sola ka Lentšu la gagwe le ka mokgatlo wa gagwe wo o hlahlwago ke moya. Lega go le bjalo, Bakriste bao ba phegelelago dikgahlego tša dilo tše di bonagalago, gantši ga ba na nako, matla goba tshekamelo ya go ithuta Beibele ka mehla le go ba gona dibokeng ka moka tšeo di lokišeditšwego ke mokgatlo wa Jehofa.

Motho yo Modimo a mo solago, ka go dumelelana le Diema 3:11-18, o lemoga bohlale bja go amogela tsholo e bjalo: “[“Lethabo,” NW] le n’e khwetša-bohlale, mo-tlêlwa-ke-temoxô. Mošabô wa bohlale o phala wa lehumô; bo ruiša motho tše di fetišaxo thsipi e khwibidu. Bohlale bo feta le pheta ya thaxa; le talama tša xaxo tšohle xa di bo fihlêle. Bo swere bolelele bya bophelô ka ’atla sa le letona; ka sa ntsôxôšô bo swere khumô le kxodišô. ’Tsela tša byôna ké ’tsela-thatexi; ’me yohle mebila ya byôna ké ya kaxišô. Bohlale ké sehlare sa bophêlô sa ba bo swerexo; wà swara wa tiiša, O tlo ba [“yo a thabilego,” NW].”

Go ba yo a Sekilego le yo a Ratago Khutšo

Jesu o hlalositše batho ba thabilego e le ba “pelo-thsekexi” le ba “ba-dira-khutšô.” (Mateo 5:8, 9) Eupja lefaseng leo le kgothaletšago mokgwa wa bophelo wa go rata le dilo tše di bonagalago kudu, go bonolo gakaakang gore dikganyogo tša boithati, mohlomongwe gaešita le tše sa sekago, di thome go mela ka dipelong tša rena! Ge e ba re sa hlahlwe ke bohlale bja Modimo, go bonolo gakaakang go rena gore re arošetšwe tabeng ya go nyaka katlego ya tša ditšhelete ka ditsela tšeo di belaetšago tšeo di ka fedišago ditswalano tša khutšo le ba bangwe! Ga se ka ntle le lebaka ge Beibele e lemoša gore: “Mexabaru ké wôna modu wa bobe ka moka; xomme ba bangwê ba xo kêkêla xo tšôna ba aroxile tumêlô ba ikôbêla mehlakô e mentši.”—1 Timotheo 6:10.

Lerato la tšhelete le hlohleletša kgopolo ya boithati yeo e tšweletšago go se kgotsofale, go se leboge le megabaru. Go phema gore moya o bjalo o fošagetšego o se ke wa tšwelela, Bakriste ba bangwe pele ba dira diphetho tše dikgolo tša tša ditšhelete, ba ipotšiša dipotšišo tše swanago le tše: Na ke tloga ke nyaka se? Na ke nyaka selo se se bitšago tšhelete ya godimo goba ke mošomo wo wo o lefago gabotse le wo o jago nako go feta batho ba bangwe ba dimilione bao ba phelago ka ntle le tšona? Na mohlomongwe nka diriša gakaone tšhelete ya-ka goba nako ya-ka ka go oketša go ba ga-ka le karolo borapeding bja therešo, ka go thekga modiro wa lefase ka bophara wa boboledi, goba ka go thuša batho bao ba se nago dilo tše ke nago le tšona?

Go Bontšha Kgotlelelo

Ye nngwe ya diteko tšeo Jobo a ilego a swanela ke go di kgotlelela e bile go lahlegelwa ke mahumo a gagwe. (Jobo 1:14-17) Bjale ka ge mohlala wa gagwe o bontšha, kgotlelelo e a nyakega sebopegong se sengwe le se sengwe sa bophelo. Bakriste ba bangwe ba swanetše go kgotlelela tlaišo; ba bangwe, ba swanetše go kgotlelela teko; mola ba bangwe, ba swanetše go kgotlelela maemo a sa kgahlišego a tša boiphedišo. Eupja kgotlelelo ya mohuta ofe le ofe e tla putswa ke Jehofa, go etša ge morutiwa wa Mokriste Jakobo a ile a ngwala mabapi le Jobo gore: “Re re go thabile bao ba kgotleletšego.”—Jakobo 5:11, NW.

Go hlokomologa dikgahlego tša moya e le gore re kaonefatše boemo bja rena bja tša boiphedišo go ka tliša kimollo ya nakwana ya tša boiphedišo, eupja na go tla re thuša gore re boloke pono ya rena ya kimollo ya ka mo go sa felego ya tša boiphedišo ka tlase ga Mmušo wa Modimo e le e tagilego? Na ke go lekela hlogong mo re swanelago ke go go dira?—2 Ba-Korinthe 4:18.

Go Hwetša Lethabo mo Nakong ye le ka mo go sa Felego

Batho ba bangwe ka ntle le pelaelo ba ganetšana le kgopolo ya Jehofa ya seo se nyakegago go dira gore batho ba thabe. Ka go hlokomologa mehola e bohlokwa ya nako e telele, ga ba bone mehola ya motho ka noši ya mo nakong ye ya go dira seo Modimo a se laelago. Ba palelwa ke go lemoga gore go bota dilo tše di bonagalago ke lefeela gomme go lebiša kgakanegong. Mongwadi wa Beibele o botšiša ka tshwanelo gore: “Mo menônô e ataxo, xo ata le ba e jaxo; ’me beng ba yôna ba holêxa ka’ng, xe e se xo e bôna ka mahlô?” (Mmoledi 5:10; bona gape le Mmoledi 2:4-11; 7:12.) Kgahlego e hwelela ka pela gakaakang gomme dilo tše re bego re nagana ruri re swanetše go ba le tšona re feleletša re di beile gomme ra di lebala!

Mokriste wa kgonthe a ka se ke a ineela kgateletšong ya ‘go se nyake go phalwa’ ge go tliwa tabeng ya dilo tše di bonagalago. O a tseba gore lehumo la therešo ga le elwe ka seo motho a nago le sona, eupja ka seo motho e lego sona. Ga a na pelaelo le gatee monaganong wa gagwe ka seo se nyakegago gore motho a thabe—e lego go thaba e le ka kgonthe: go ba le tswalano e botse le Jehofa le go dula o swaregile tirelong ya Gagwe.

[Seswantšho go letlakala 20]

Dilo tše di bonagalago di nnoši le ka mohla di ka se tliše lethabo la ka mo go sa felego

[Seswantšho go letlakala 22]

Beibele e re: “Go thabile bao ba lemogago dinyakwa tša bona tša moya”