²⁵ Lega go le bjalo, Beibele e re hlokomediša ka mohuta o mongwe wa sebata seo se bakilego poifo e kgolo nywageng ya morago bjale. Moporofeta Hesekiele o ile a bapetša batho ba šoro le diphoofolo tša nageng ge a be a re: “Bakxôma ba xôna ba byalo ka diphiri tša dibata; ba thšolla madi, ba bolaya batho xore ba boêlwê ke mahumô.” (Hesekiele 22:27) Jesu ge a be a porofeta ka “xo ata xa makxôpô,” ge e le gabotse o be a bolela gore “dibata” di tla ipha matla lefaseng nakong ya go ba gona ga gagwe. (Mateo 24:12) Paulo mongwadi wa Beibele o oketša ka gore “mehleng ya bofêlô,” batho e tlo ba “ba mexabaru [“barati ba tšhelete,” NW] . . . ba sa tsebexo xo ithswara, manaba a tše boló.” (2 Timotheo 3:1-3) Na se se bile bjalo ga e sa le go tloga ka 1914?

26-28. Ke dipego dife tše di tšwago lefaseng ka moka tše di bontšhago gore “dibata” tša dikebekwa di gwanta le lefase di tsoma dijo?

²⁶ Ka kgonthe se bile bjalo. Ge e ba o dula mo e ka bago motseng lege e le ofe o mogolo lefaseng, gona o šetše o tseba se. Eupja ge e ba o belaela se, gona ela hloko ditsopolo tša kuranta tše latelago tša gona bjale. Go tšwa Colombia: “Ngwagola maphodisa a begile . . . dipolao tše ka bago tše 10 000 le ditiragalo tša bohlakodi bja go ithlama ka dibetša tše ka bago 25 000.” Go tšwa Victoria, Australia: “Go Hlatloga mo Gogolo Bokebekweng bjo bo Šoro.” Go tšwa United States: “Dipolao New York di Lebile Bogolong bjo Fetišago.” “Detroit e fetile Gary, Ind., ngwagola e le bjalo ka motse o mogolo o nago le ditekanyetšo tše phagamego kudu tša polao setšhabeng—e lego tše 58 go badudi ba 100 000.”

²⁷ Go tšwa Zimbabwe: “Babolai ba masea ke bao ba oketšegilego kudu.” Go tšwa Brazil: “Go na le bokebekwa bjo bontši kudu mo le go kgobelwa mo gogolo ga dibetša, moo le ka ditaba tša bošoro di se sa hlwago di tšweletša poifo e kgolo.” Go tšwa New Zealand: “Ditlhaselo tša botona le botshadi le bokebekwa bjo bo šoro di tšwela pele go ba selo seo se tshwenyago maphodisa kudu.” “Tekanyo ya bošoro magareng ga badudi ba New Zealand seng sa bona e ka hlaloswa feela e le bokgema.” Go tšwa Sepania: “Sepania e lwa le bothata bjo bo golago bja bokebekwa.” Go tšwa Italy: “Sehlopha sa ma-Mafia sa Sicily ka morago ga go palelwa, se ile sa baka dipolao tše dintši kudu.”

29, 30. Boemo bja bodumedi ke bofe Bojakaneng, ka go phethagatša boporofeta bja Jesu?

²⁹ Bodumedi bo be bo tla ba bjang nakong ya mehla e huduegilego ya go ba gona ga Jesu? Ka lehlakoreng le lengwe, Jesu o porofetile gore go tla ba le koketšego modirong wa bodumedi: “Xo tla ba le baporofeta ba bantši ba maaká ba xo tlo fora ba bantši.” (Mateo 24:11) Ka lehlakoreng le lengwe gape, o boletše e sa le pele gore go kgahlišwa ke Modimo Bojakaneng ka kakaretšo go be go tla ya ka monga wa seloko. “Xo tlo nôtlêxa leratô la ba bantši.”—Mateo 24:12.

³⁰ Se ruri se hlalosa seo se diregago lehono Bojakaneng. Ka lehlakoreng le lengwe, dikereke tše dikgolo kae le kae di a wa ka baka la go hloka thekgo. Mafaseng ao a kilego a ba a Boprotestanta bjo matla a ka leboa la Yuropa le Engelane, bodumedi bo nyakile bo hwelela ruri. Ka nako e swanago, Kereke ya Katholika e hlasetšwe ke tlhaelelo ya baperisita le ke go thekgwa mo go fokotšegago. Ka lehlakoreng le lengwe, go na le kgolo e itšego dikarolong tše nyenyane tša bodumedi. Meetlo yeo e theilwego bodumeding bja ka Bohlabela e a ata, mola baebangedi ba megabaru ba thelebišene ba ikhweletša ka kgang diranta tše dimilione.