Ke Bomang Bao ba Bolelago Ditaba tše Dibotse?

“ . . . di tla bolelwa lefaseng ka moka.”—MATEO 24:14.

DITABA tše dibotse di bolelwa lefaseng ka bophara ke Dihlatse tša Jehofa. Di dira se ka ditsela tše di fapafapanego. Tsela e nngwe ke ka . . .

Go Bolela. Go swana le Jesu le barutiwa ba gagwe, Dihlatse tša Jehofa di iša ditaba tše dibotse bathong. (Luka 8:1; 10:1) Ga di fo letela gore batho ba tle go tšona. Go nea batho bohlatse mabapi le Mmušo wa Modimo ke selo seo Dihlatse ka moka—tšeo ga bjale di lego ka godimo ga dimilione tše šupago—di swaregilego ka sona. Di dira boboledi ka ntlo le ntlo, setarateng, ka mogala le ka ditsela tše dingwe. Ngwagola, Dihlatse di feditše diiri tša ka godimo ga tše dimilione tše sekete le seripa modirong wo.

Ga di rute batho ka Mmušo wa Modimo feela eupša gape di ba ruta “dilo tšohle tšeo [Jesu a di] laetšego.” (Mateo 28:20) Di swara dithuto tša ka mehla tše sa lefelelwego tša legae tša Beibele tša ka godimo ga tše dimilione tše seswai.

Dihlatse di dira boboledi lefaseng ka bophara—dinageng tše 236. Di dira boboledi go batho ba ditlogo ka moka. Di dira boboledi dinagamagaeng le ditoropong, dithokgweng tša Amazon le sethokgweng (taiga) sa Siberia, maganateng a Afrika le Dithabeng tša Himalaya. Ga di lefše bakeng sa modiro wo; di o dira ka ditshenyagalelo tša tšona e bile di diriša nako ya tšona, di tutuetšwa ke lerato leo di ratago Modimo le baagišani ka lona. Le gona di bolela ditaba tše dibotse di diriša . . .

Dikgatišo. Makasine wo, woo sehlogo sa wona se se feletšego se rego Morokami o Tsebatša Mmušo wa Jehofa, ga bjale o gatišwa ka maleme a 185 gomme go gatišwa dikopi tša ka godimo ga tše dimilione tše 42 tša tokollo e nngwe le e nngwe. Makasine wo o sepedišanago le wona wa Phafoga!, woo le wona o bolelago ka Mmušo, o gatišwa ka maleme a 83 gomme go gatišwa dikopi tše e ka bago tše dimilione tše 40 tša tokollo e nngwe le e nngwe.

Dipuku, diporoutšha, dipampišana, diCD/diMP3 le diDVD tšeo di hlalosago dithuto tša Beibele di hwetšagala ka maleme a e ka bago a 540. Dihlatse di tšweleditše le go aba dikopi tša ka godimo ga tše dimilione tše dikete tše 20 tša dilo tše nywageng e lesome feela e fetilego, palogare ya tše tharo bakeng sa motho yo mongwe le yo mongwe yoo a phelago lefaseng!

Dihlatse tša Jehofa e bile di gatišitše goba di laetše gore go gatišwe diphetolelo tše di fapafapanego tša Beibele. Phetolelo ya Lefase le Lefsa ya Mangwalo a Makgethwa—yeo e fetoletšwego, ya gatišwa le go phatlalatšwa ke Dihlatse—ga bjale e hwetšagala e feletše goba ka karolo ya yona ka meleme a 96. Go phatlaladitšwe dikopi tša ka godimo ga tše dimilione tše 166. Dihlatse gape di bolela ditaba tše dibotse tša Mmušo . . .

Dibokeng tša Bokriste. Diboka tša beke le beke tšeo di swarelwago Diholong tša Mmušo ga se feela ditirelo tša bodumedi; di hlametšwe go nea thuto. Go newa dipolelo tša ditaba tšeo di theilwego Beibeleng e bile go ithutwa Beibele ka thušo ya makasine wa Morokami gotee le dikgatišo tše dingwe. Dibokeng tšeo, Dihlatse gape di ithuta go ba baboledi ba atlegago ba ditaba tše dibotse.

Dihlatse di ithuta taba e swanago diphuthegong tša ka godimo ga tše 107 000 lefaseng ka bophara, gomme seo se dira gore di be le botee. Batho bohle ba a amogelwa dibokeng tše. Ga go tšewe koleke. Ke therešo gore tše ka moka e be e tla ba lefeela ge nkabe Dihlatse di palelwa ke go dira seo di se bolelago. Ka baka leo, di leka go emela ditaba tše dibotse . . .

Ka Mohlala wa Tšona. Di katanela go bea mohlala o mobotse boitshwarong bja Bokriste, di dira sohle seo di ka se kgonago go swara batho ba bangwe ka tsela yeo di nyakago gore ba di sware ka yona. (Mateo 7:12) Gaešita le ge di se tša phethagala gomme di dira diphošo ka dinako tše dingwe, di tloga di kganyoga go dirišana le batho ka tsela e lerato e sego feela ka go bolela ditaba tše dibotse eupša le ka go ba thuša nako le nako ge go nyakega.

Dihlatse tša Jehofa ga di leke go sokolla lefase ka modiro wa tšona wa boboledi. Go e na le moo, ge modiro woo o dirilwe go fihlela ge Jehofa a kgotsofala, bofelo bo tla tla, bjalo ka ge Jesu a boletše. Seo se tla bolela’ng ka lefase le batho ba lego go lona?

[Seswantšho go letlakala 7]

Ditaba tše dibotse di bolelwa lefaseng ka bophara ke Dihlatse tša Jehofa

“Bofelo” ke Eng?

“. . . ke moka bofelo bo tla tla.”—MATEO 24:14.

GO BONAGALA go se na tlhaelelo ya dipapadi tšeo di bolelago ka bofelo bja lefase. Dipuku, difilimi le dimakasine, go tloga go tša metlae go ya go tša thutamahlale, di fetiša kgopolo ya mabapi le masetlapelo a letšatši la bofelo. Di akaretša phedišo ya ntwa ya nuclear, go thulana ga sekanaledi le lefase, twatši e bolayago, go fetofetoga mo go sa laolegego ga boemo bja leratadima goba tlhaselo ya batho ba tšwago dipolaneteng tše dingwe.

Dipono tša madumedi le tšona di a fapana; a mangwe a ruta gore “bofelo” bo tla fediša diphedi ka moka mo lefaseng. Ge rathutatumelo yo mongwe a nea ditlhaloso ka Mateo 24:14, o ngwadile mantšu a ao a boifišago: “Temana ye ke e nngwe ya tše bohlokwahlokwa ka Lentšung la Modimo ka moka . . . Moloko wa rena o lebeletšane le kgonagalo ya tshenyego yeo e lego e kgolo kudu moo e lego gore ke ba sego kae ba rena bao ba lekago go akanya ka masetlapelo a tlago go direga.”

Dipono tše bjalo gantši di hlokomologa taba e bohlokwa: Jehofa Modimo o ‘theile lefase ka go tia’; ga se a ‘le bopela lefeela, o le hlametše go dulwa ke batho.’ (Jesaya 45:18) Ka gona ge Jesu a be a bolela ka “bofelo,” o be a sa bolele gore polanete ye e be e tlo senywa; e bile o be a sa bolele gore batho ka moka ba be ba tlo fedišwa. O be a bolela gore go tlo fedišwa ba kgopo—bao ka bohlogothata ba ganago go phela ka go dumelelana le tlhahlo ya Jehofa e lerato.

Ela hloko papišo ye. A re re o be o ena le legae le lebotse gomme o dumeletše batho go dula go lona ntle le tefo. Badudi ba bangwe ba be ba dudišana ka khutšo gomme ba hlokomela legae la gago gabotse. Lega go le bjalo, ba bangwe ba be ba baka mathata, ba lwantšhana e bile ba swara badudi ba babotse gampe. Ba sentše diphahlo tša gago gomme ka bohlogothata ba ganne go go kwa ge o leka go dira gore ba kgaotše go dira bjalo.

O be o tla dira’ng go lokiša boemo? Na o be o tla pšhatlaganya legae la gago? Ga go bonale o be o ka dira bjalo. Mohlomongwe o be o tla raka badudi ba sa lokago gomme wa lokiša tshenyo yeo ba e bakilego.

Jehofa le yena o tlo dira se se swanago. O buduletše mopsalme go ngwala gore: “Badirabobe bona ba tla fedišwa, eupša bao ba holofetšego Jehofa ke bona bao e tlago go ba beng ba lefase. Go se gokae yo kgopo o tla be a se sa le gona; wena o tla lebelela lefelo la gagwe, gomme yena o tla be a se gona. Eupša ba boleta bona e tla ba beng ba lefase, ba tla thaba kudu ka baka la go ata ga khutšo.”—Psalme 37:9-11.

Moapostola Petro o boletše ka taba e swanago. A buduletšwe, o ile a ngwala gore: “Go kile gwa ba le magodimo le lefase leo le tšwilego le tiile meetseng le gare ga meetse ka lentšu la Modimo; ka go dirišwa ga tšona, lefase la nakong yeo le ile la senywa ge le be le apešwa ke meetse.” (2 Petro 3:5, 6) Moapostola mo o bolela ka Meetsefula a mehleng ya Noa. Lefase la batho ba sa boifego Modimo le ile la fedišwa, eupša lefase ka bolona ga se la ka la fedišwa. Meetsefula ao a lefase ka moka a ile a beela “batho ba sa boifego Modimo mohlala wa dilo tše di tlago go tla.”—2 Petro 2:6.

Ke moka Petro o ile a oketša ka gore: “Magodimo le lefase tšeo gona bjale di lego gona di boloketšwe mollo.” Ge re ka ema gona moo, re ka ba le kwešišo e fošagetšego. Lega go le bjalo, ela hloko gore temana e tšwela pele ka gore: “Le . . . tshenyego ya batho ba sa boifego Modimo.” Phedišo ga se ya lefase ka bolona eupša ke ya batho ba sa boifego Modimo. Go tla direga’ng ka morago? Petro o ngwadile gore: “Go na le magodimo a mafsa [Mmušo wa Modimo ka Mesia] le lefase le lefsa [lekoko la batho ba lokilego] tše re di letetšego go ya ka kholofetšo ya gagwe gomme toko e tla aga go tšona.”—2 Petro 3:7, 13.

Boporofeta bja Beibele bo bontšha gore nako ya “bofelo” bjo bo tlago e batametše. Bala Mateo 24:3-14 le 2 Timotheo 3:1-5 go bona dilo tšeo di hlatselago gore se ke therešo.a

Na ga o makatšwe ke gore go na ke kgakanego e kgolo mabapi le Mateo 24:14, temana yeo le ngwana a ka e kwešišago? Go na le mabaka a dirago gore go be bjalo. Sathane o foufaditše batho gore ba se bone ditherešo tše bohlokwa tšeo di lego ka Lentšung la Modimo. (2 Bakorinthe 4:4) Gape, Modimo o utetše baikgogomoši merero ya gagwe gomme a e utollela baikokobetši. Jesu o boletše mabapi le seo gore: “Ke go tumiša phatlalatša wena Tate, Morena wa legodimo le lefase, gobane o utetše ba bohlale le ba tlhaologanyo dilo tše gomme wa di utollela bana.” (Mateo 11:25) Ruri ke tokelo e kgolo go ba gare ga baikokobetši bao ba kwešišago seo Mmušo wa Modimo e lego sona le gore ke bomang bao ba ka lebelelago pele ditšhegofatšong tšeo di tlago go tlela bao ba o thekgago!