Ke Nako ya go Dula re Phafogile

“Xomme Ebangedi e swanetše xo kwatšwa pele dithšabeng ka moka. . . . E a tl’o xo tiišetša xo fihla bofelong, ké yêna a tl’o xo phološwa.”—MAREKA 13:10, 13.

1. Ke ka baka la’ng re swanetše go kgotlelela le go ba le sebete?

RE SWANETŠE go tiišetša—gare ga moloko o sa dumelego le o kgopamilego! Ga e sa le go tloga ka 1914 moloko wa batho e bile o gobogilego, go fo swana le mehleng ya Jesu. Lehono kgobogo e aparetše lefase ka moka. “Mehleng [ye] ya bofelo,” “dinako tše hlobaetšago tšeo go lego thata go lebeletšana le tšona” tšeo di hlalositšwego ke moapostola Paulo di tlaiša batho. “Batho ba babe le baaroši, bobe bya bôná bò tlo fêla bò xola bò e-ya.” Go molaleng gore, “lefase ka moka le rapaletše [matleng a yo mobe]” e lego Sathane Diabolo, yo a dirago maiteko a gagwe a mafelelo mo nakong ye a go senya lefase. Eupša tia matla! Go na le ‘masetla-pelo a magolo’ a atlago go tlišetša bohle bao ba ratago toko tlhakodišo ya ka mo go sa felego.—2 Timotheo 3:1-5, 13, bapiša le NW; 1 Johane 5:19; Kutollo 7:14.

2. Boporofeta bo phethagaditšwe bjang ka 1914?

² Ka mo go thabišago, mo nakong ye Jehofa o beile Morena Jesu Kriste sedulong sa bogoši magodimong, e le go lokišetša go tloša manaba ao a gatelelago a batho. (Kutollo 11:15) Go swana le maboong a mathomo a Mesia, le lekgolong le la nywaga boporofeta bjo bo lemogegago bjo bo ngwadilwego ke Daniele bo a phethagala. Go Daniele 4:16, 17, 32, re botšwa ka go kgaotšwa ga bogoši bjo bo swanetšego lefaseng ka lebaka la “mabaka a šupaxo.” Phethagalong ya ona e kgolo, mabaka a a šupago a lekana le nywaga e šupago ya Beibele ya ‘matšatši’ a 360 o mongwe le o mongwe, goba palo-moka ya nywaga e 2 520.a E thomile ka 607 B.C.E. ge Babele e be e thoma go gatakela mmušo wa Isiraele go ya go 1914 C.E., e lego ngwaga wa go bewa ga Jesu sedulong sa bogoši legodimong e le Kgoši e swanetšego ya batho. Ka gona “mabaka a ba-ntlê” a ile a fela. (Luka 21:24) Eupša ditšhaba di ganne go ikokobeletša Mmušo o tlago wa Mesia.—Psalme 2:1-6, 10-12; 110:1, 2.

3, 4. (a) Ditiragalo tša lekgolong la pele la nywaga di ka bapišwa bjang le tša mehleng ya rena? (b) Ke dipotšišo dife tše di swanetšego tšeo di ka botšišwago?

³ Ge beke ya bo-70 ya nywaga (29-36 C.E.) e dutše e batamela le ge ngwaga wa 1914 o dutše o batamela, batho ba boifago Modimo ba be ba letetše go goroga ga Mesia. O ile a goroga e le ka kgonthe! Lega go le bjalo, boemong bjo bongwe le bjo bongwe mokgwa wo a tšwelelago ka wona o ile wa fapana le se se letetšwego. Boemong bjo bongwe le bjo bongwe gape ka morago ga mo e ka bago lebaka le le kopana la nako, “moloko” o mobe mafelelong o welwa ke kahlolo ka taelo ya Modimo.—Mateo 24:34.

⁴ Sehlogong sa rena se se fetilego, re lemogile kamoo moloko o kgopo wa ba-Juda o bego o nyaka madi a Jesu o ilego wa fedišwa ka gona. Eupša go thwe’ng ka moloko o senyegilego wa batho o mo ganetšago goba go mo hlokomologa gaešita le mo nakong ye? Kahlolo e tla phethwa neng molokong wo o sa dumelego?

“Phakxamang”!

5. (a) Ke ka lebaka lefe le le kwagalago go sa nyakegego gore re tsebe ‘letšatši le nako’ tša Jehofa? (b) Go ya ka Mareka, Jesu o phethile boporofeta bja gagwe ka keletšo efe e nago le tlhaologanyo?

⁵ Ka morago ga ge a porofetile ditiragalo tšeo di lebišago nakong ya ‘masetla-pelo a magolo,’ Jesu o okeditše ka gore: “Xe e le letšatši leo, le nakô ya tšôna, xa xo e a di tsebaxo. Le Barongwa ba maxodimong, le Yêna Morwa, xa ba di tsebe. Xo tseba Tate a nnoši.” (Mateo 24:3-36; Mareka 13:3-32) Ga go nyakege gore re tsebe nako e lebanego ya ditiragalo. Go e na le moo, tlhokomelo ya rena e swanetše go lebišwa go beng ba phakgamego, re hlagolele tumelo e matla gomme re dule re swaregile tirelong ya Jehofa—e sego ka go bala nako. Jesu o phethile boporofeta bja gagwe bjo bogolo ka gore: “Fahloxang, Le phakxamê . . . xobane lebaka la tšôna xa Le le tsebe. . . . Phakxamang-xê, . . . xomme tše ke Le botšaxo tšôna ke botša bohle, ke re: Phakxamang!” (Mareka 13:33-37) Kotsi e laletše lefase la mehleng yeno. Re swanetše go dula re phakgame!—Ba-Roma 13:11-13.

6. (a) Tumelo ya rena e swanetše go ithekga go eng? (b) Re ka “bala matšatši a rena” bjang? (c) Ge e le gabotse Jesu o bolela’ng ka “moloko”?

⁶ Ga se feela gore re swanetše go ela hloko diporofeto tše di buduletšwego tše di lego mabapi le mehla ye ya bofelo ya tshepedišo e kgopo, eupša re swanetše go thekga tumelo ya rena kudu sehlabelong se bohlokwa sa Kriste Jesu le dikholofetšong tše di kgahlišago tša Modimo tšeo di theilwego go sona. (Ba-Hebere 6:17-19; 9:14; 1 Petro 1:18, 19; 2 Petro 1:16-19) Ba fagahletše go bona bofelo bja tshepedišo ye e mpe, batho ba Jehofa ka dinako tše dingwe ba ile ba phopholetša nako yeo ‘masetla-pelo a magolo’ a bego a tla thoma ka yona gaešita le go e kgokaganya le go balelwa ga seo nako ya go phela ya moloko e lego sona ga e sa le go tloga ka 1914. Lega go le bjalo, ‘re filwe pelo tše bohlale’ e sego go phopholetša palo ya nywaga goba matšatši a bopago moloko, eupša ka go nagana kamoo re ‘balago matšatši a rena’ ka gona tabeng ya go tlišetša Jehofa theto ya lethabo. (Psalme 90:12) Go e na le go nea molao bakeng sa go lekanya nako, lentšu “moloko” kamoo Jesu a le dirišitšego ka gona le šupa kudu-kudu batho ba phelago nakong e itšego ya lebaka le itšego la histori gotee le dika tša bona tše ba kgethollago.b

7. Moprofesara wa histori o ngwala’ng mabapi le “moloko wa 1914,” gomme se se kgokagana bjang le boporofeta bja Jesu?

⁷ Go dumelelana le se se lego ka mo godimo, moprofesara wa histori e lego Robert Wohl o ngwadile ka pukung ya gagwe ya The Generation of 1914 gore: “Moloko wa histori ga o hlaolwe ka ditekanyo tša tatelano ya wona ya dinako . . . Ga se karolo ya dinako.” Eupša o hlalositše gore Ntwa ya I ya Lefase e bakile “maikwelo a nolago moko a go arogana le nako e fetilego” gomme o oketša ka gore: “Bao ba phologilego ntwa le ka mohla ba ka se ke ba itokolla tumelong ya gore lefase le lengwe le ile la fela gomme le lengwe la thoma ka August 1914.” Seo ke therešo gakaakang! E lebiša tlhokomelo modung wa taba. “Moloko wó” wa batho o bile le diphetogo tše di boifišago ga e sa le go tloga ka 1914. O bone lefase le kolobišwa ka madi a ba dimilione. Dintwa, go fedišwa ga merafo, botšhošetši, bosenyi le go hloka molao di phulegile lefaseng ka bophara. Tlala, bolwetši le boitshwaro bjo bo gobogilego di khukhuneditše lefase la rena. Jesu o porofetile gore: “Dirang byalo le tabeng yé; xe Le [barutiwa ba gagwe] bôna dilô tšeo di dirêxa, Le tsebê xore mmušô wa Modimo o batametšê. Ruri, ke a Le botša, di tlo dirêxa tšohle moloko wó ò sešo wa fêla.”—Luka 21:31, 32.

8. Baporofeta ba Jehofa ba gatelela bjang go nyakega ga go dula re phakgame?

⁸ Ee, phenyo e feletšego ya Mmušo wa Mesia e kgaufsi! Ka gona, na go na le se se ka hwetšwago ka go lebelela dinako goba ka go phopholetša nako ya kgonthe ya go phela ya “moloko”? Le gatee! Habakuku 2:3 e bolela ka mo go kwalago gore: “Xobane pônô e beetšwe lebaka la yôna; e bola tša bofêlô, xa e fore. Xe e sa phêthêxe ka pelá, xôna e letêlê. Xo tla di tlo tla, di ka se diêxe.” Letšatši la Jehofa la tsheko le batamela ka lebelo go feta le ge e le neng.—Jeremia 25:31-33; Maleaki 4:1.

9. Ke ditiragalo dife tšeo di bontšhago gore nako ke e kopana ga e sa le go tloga ka 1914?

⁹ Ge pušo ya Mmušo wa Kriste e be e thoma ka 1914, Sathane o ile a lahlelwa lefaseng. Se se ile sa bolela “madi-mabe [go] lena ba Le axilego lefaseng . . . xobane Diabolo ó theoxetše xo lena à tuka boxale ka kudu; ó tseba xe a sa šaletšwe ke lebakanyana fêla.” (Kutollo 12:12, mongwalo o sekamego ke wa rena.) Ruri nako yeo ke e kopana ge e bapišwa le nywaga e dikete ya pušo ya Sathane. Mmušo o kgaufsi, gomme go bjalo le ka letšatši la Jehofa le nako ya go phetha kahlolo molokong wo o kgopo!—Diema 3:25; 10:24, 25.

“Moloko” o Felago

10. “Moloko wó” o swana bjang le wola wa mehleng ya Noage?

¹⁰ Anke re hlahlobišišeng polelo ya Jesu go Mateo 24:34, 35 ye e rego: “Ruri, ke a Le botša, di tlo tšwêlêla moloko wó ò sešo wa fêla. Lexodimo le lefase di tlo feta; xomme dipolêlô tša-ka di ka se kê tša feta.” (Mongwalo o sekamego ke wa rena.) Mantšu a Jesu a latelago a bontšha gore ‘ga go na yo a tsebago letšatši le nako.’ Se bohlokwa kudu, o bontšha gore re swanetše go phema mereo yeo e re dikologilego molokong wo. Ka gona Jesu o oketša ka gore: “Maboong a Morwa-motho xo tlo ba byalo ka mehleng ya Noaxe. Ba tlo dira tše ba di dirilexo mola meetse-fula à sešo a tla, xe ba-e-ja, bà e-nwa, bà nyala, bà nyadiša, xwa bá xwa tla ’tšatši le Noaxe a tsenexo polokelong ka lôna. Ba be ba sa šetše selô; meetse-fula a bá a tla, a ba tšea ka moka. Le maboong a Morwa-motho xo tlo ba byalo.” (Mateo 24:36-39, NW; bona le mongwalo wa ka tlase.) Mo Jesu o bapišitše moloko wa mehleng ya gagwe le wa mehleng ya Noage.—Genesi 6:5, 9.

11. Jesu o ile a bapiša bjang ‘meloko,’ go etša ge Mateo le Luka ba begile?

¹¹ Le e be e se lekga la mathomo leo baapostola ba ilego ba kwa Jesu a bapiša ‘meloko’ ka tsela ye, ka gobane matšatšing a sego kae pejana o be a ile a bolela mabapi le yena gore: “Fêla, Morwa-motho sa xaxwe ké xore a thômê xo tlaišwa ka tše ntši, le xo lahlwa ke moloko wó. Matšatšing a Morwa-motho xo tlo dirwa tše di dirilwexo mehleng ya Noaxe.” (Luka 17:24-26, mongwalo o sekamego ke wa rena.) Ka go rialo, Mateo kgaolo 24 le Luka kgaolo 17 di dira papišo e swanago. Mehleng ya Noage “nama ka moka è [sentšego] tsela ya yôna lefaseng” le yeo e ilego ya fedišwa Meetse-fuleng e be e le “moloko wó.” Mehleng ya Jesu batho ba bahlanogi ba ba-Juda bao ba bego ba gana Jesu e be e le “moloko wó.” (Mongwalo o sekamego ke wa rena.)—Genesi 6:11, 12; 7:1.

12, 13. (a) Lehono “moloko wó” o swanetšego go fela ke eng? (b) Batho ba Jehofa ba lebeletšana bjang le “moloko o kgopamilego o arogilego”?

¹² Ka gona, phethagalo ya mafelelo ya boporofeta bja Jesu lehono ya “moloko wó,” go bonagala bo šupa bathong ba lefase bao ba bonago pontšho ya go ba gona ga Jesu eupša ba šitwa go lokiša ditsela tša bona. Ka mo go fapanego, rena ka ge re le barutiwa ba Jesu re gana go fetolwa ke tsela ya go phela ya “moloko wó.” Le ge re le lefaseng, ga se ra swanela go ba karolo ya lona “xobane lebaka le kxaufsi.” (Kutollo 1:3; Johane 17:16) Moapostola Paulo o re eletša ka gore: “Dirang tšohle xò se na xo duma-duma le xo belaêla. Xore Le bê ba ba se naxo bosodi le lengalatsepa, Le bê bana ba Modimo ba ba se naxo senyalô Lè le xare xa [moloko o kgopamilego o arogilego, PK] bao—Lè le mo xare xa bôná—Le kaxo bônêxa byalo ka dietša lefaseng.”—Ba-Filipi 2:14, 15; Ba-Kolose 3:5-10; 1 Johane 2:15-17.

¹³ Go “bônêxa [ga rena] byalo ka dietša” ga go akaretše feela go bontšha semelo se se hlwekilego sa Bokriste, eupša go feta tšohle go akaretša go phetha thomo ya Jesu ya boporofeta ye e rego: “Ditaba tše tše di lokilego tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo bo fihlago.” (Mateo 24:14, NW) Ga go na motho yo a ka bolelago nako yeo bofelo bjoo bo tla tlago ka yona, eupša re a tseba gore bofelo bja “moloko wó” wa batho ba kgopo bo tla tla ge feela bohlatse bo neilwe ka tsela e kgotsofatšago Modimo “xo fihla maxomong a lefase.”—Ditiro 1:8.

“Letšatši Leo, le Nakô”

14. Jesu le Paulo ba neile keletšo efe mabapi le ‘mabaka le nako,’ gomme re swanetše go arabela bjang?

¹⁴ Ge go nea bohlatse ga lefase ka bophara go phethilwe go fihla bokgoleng bjoo Jehofa a bo rerilego, e tla ba ‘letšatši [la gagwe] le nako’ tša go senya tshepedišo ya lefase le. Ga go nyakege gore re tsebe letšatši e sa le pele. Ka go rialo, moapostola Paulo ka go latela mohlala wa Jesu, o eleditše ka gore: “Xe e le tša mabaka ao le tša nakô ya xôna, Bana bešo, xa e sa le tše Le swanetšexo xo ngwalêlwa tšôna. Xobane lena beng Le tseba xabotse xore letšatši leo la Morêna le tlo tla bo-ka lehodu xe le tla bošexo. Xe xo tlo thwe: Xo khutšô! Xo iketlilwe! ké mo ba tl’o xo wêlwa xodimo ke thsenyêxô byalo ka moima xe a wêlwa ke lešôkô; ’me ba ka se kê ba phônyôkxa.” Ela hloko moo Paulo a lebišago tlhokomelo gona: ‘Ke ge go tlo thwe.’ Ee, ge go e-na le polelo ya “khutšo le tšhireletšego,” (NW) kahlolo ya Modimo e tla phethwa gatee-tee ka nako yeo e tla bego e sa letelwa. Keletšo ya Paulo ke e swanetšego gakaakang: “Byale xomme, a re se keng ra rôbala bo-ka ba bangwê bao. A re phakxameng rè fahloxile”!—1 Ba-Thesalonika 5:1-3, 6; bona le ditemana 7-11; Ditiro 1:7.

15, 16. (a) Ke ka baka la’ng re sa swanela go nagana gore Haramagedone e kgole kudu go feta kamoo re bego re dumela ka gona? (b) Bogoši bja Jehofa bo swanetše go godišwa bjang nakong e tlago e lego kgaufsi?

¹⁵ Na kgopolo ya rena e lebanego kudu ka “moloko wó” e bolela gore Haramagedone e kgole kudu go feta kamoo re bego re nagana ka gona? Le gatee! Le ge le ka mohla re sa ka ra tseba ‘letšatši le nako,’ Jehofa Modimo o be a dutše a di tseba, gomme ga a fetoge. (Maleaki 3:6) Go molaleng gore lefase le nwelela gare-gare tshenyegong e bolayago. Go nyakega ga go dula re phakgame ke gabohlokwa kudu go feta kamoo go kilego gwa ba ka gona pele. Jehofa o re utolletše dilo “tše di tl’o xo dirêxa ka pelá” gomme re swanetše go arabela ka temogo e feletšego ya go akgofa ga nako.—Kutollo 1:1; 11:18; 16:14, 16.

¹⁶ Ge nako e dutše e batamela, dula o phakgame ka gobane Jehofa o kgaufsi le go tliša kotsi tshepedišong ka moka ya Sathane! (Jeremia 25:29-31) Jehofa o re: “Ke tla iponatša bogolo le bokgethwa; ke tla itsebiša pele ga mahlo a ditšhaba tše ntši, gore ba tsebe ge Nna ke le Jehofa.” (Hesekiele 38:23, PK) ‘Letšatši leo la Jehofa’ la makgaola-kgang le a batamela!—Joele 1:15; 2:1, 2; Amosi 5:18-20; Tsefanya 2:2, 3.

“Maxodimo a Mafsa le Lefase le Lefsa” tša go Loka

17, 18. (a) Go ya ka Jesu le Petro, “moloko wó” o fela bjang? (b) Ke ka baka la’ng re swanetše go dula re phakgame ge e le ka boitshwaro le ditiro tša boineelo go Modimo?

¹⁷ Mabapi le ‘dilo ka moka tše swanetšego go direga,’ Jesu o itše: “Lexodimo le lefase di tlo feta; xomme dipolêlô tša-ka di ka se kê tša feta.” (Mateo 24:34, 35) Mohlomongwe Jesu o be a nagana ka “lexodimo le lefase”—e lego babuši le babušwa—tša “moloko wó.” Moapostola Petro o dirišitše mantšu a swanago ge a be a šupa “maxodimo a mehla yeno le lefase” tšeo di ‘boloketšwego mollo wa letšatšing la kahlolo le la tshenyego ya batho ba banyatši.’ Se se latelago, o hlalosa kamoo “’tšatši leo la Morêna le [tlago go] tla bo-ka lehodu . . . xomme ka lôna maxodimo [a mebušo] a tlo široxa” gotee le lekoko le gobogilego la batho goba “lefase,” le mediro ya lona ya sebe. Ka gona moapostola o re kgothaletša gore re be “ba xo swara ka tsela e kxêthwa ya [boineelo go Modimo, NW] [ge re le] ba xo letêla le xo phafoxêla xo tla xa letšatši leo la Modimo, la xe maxodimo a tlo fedišwa à thšumilwe, le tše lefase le bopilwexo ka tšôna tša tlo fsa tša toloxa.” Ke’ng seo se latelago? Petro o lebiša tlhokomelo ya rena go “maxodimo a mafsa le lefase le lefsa, moo xo axilexo tokô.”—2 Petro 3:7, 10-13.c

¹⁸ “Maxodimo [ao] a mafsa,” e lego pušo ya Mmušo ka Kriste Jesu le dikgoši-gotee le yena a tla tšhollela ditšhegofatšo lekokong la go loka la “lefase le lefsa” la batho. Na o tla ba setho sa lekoko leo? Ge e ba go le bjalo, gona o na le lebaka la go thabela bokamoso bjo bobotse bjo o bo boloketšwego!—Jesaya 65:17-19; Kutollo 21:1-5.

19. Ke tokelo efe e kgolo yeo re ka e thabelago gona bjale?

¹⁹ Ee, “moloko” o lokilego wa batho o a kgoboketšwa gaešita le mo nakong ye. Lehono “molaki e a bôtêxaxo yo bohlale” yo a tloditšwego o nea thuto ya Modimo ka go dumelelana le mantšu a Psalme 78:1, 4 (PK) a rego: “Wena setšhaba sa-ka, theetša molao wa-ka, sekegelang dipolelo tša molomo wa-ka tsebe! . . . Re tlo laodišetša ditlogolo ditheto tša Jehofa, le matla a gagwe le mehlolo ye a e dirilego.” (Mateo 24:45-47) Ka April 14 ngwageng wo, batho ba fetago 12 000 000 ba bile gona Segopotšong sa lehu la Kriste diphuthegong tše di fetago 75 000 dinageng tše ka bago 230. Na o be o le gare ga bona? Eka o ka thea tumelo ya gago go Jesu Kriste gomme ‘o bitše leina la Jehofa bakeng sa phologo.’—Ba-Roma 10:10-13, NW.

20. Ka ge “lebaka [e le] la pitlaxanô,” re swanetše go dula re phakgame bjang, gomme re e-na le tebelelo efe monaganong?

²⁰ Moapostola Paulo o itše: “Lebaka ké la pitlaxanô.” Ka gona, ke nako ya gore re dule re phakgame go feta le ge e le neng e bile re swaregile modirong wa Jehofa ge re dutše re kgotleletše meleko le lehloyo leo le bontšhwago ke moloko o kgopo wa batho. (1 Ba-Korinthe 7:29; Mateo 10:22; 24:13, 14) Anke re duleng re phakgame, re šeditše dilo ka moka tšeo di boletšwego e sa le pele ka Beibeleng gore di tla tlela “moloko wó.” (Luka 21:31-33) Ka go phonyokga dilo tše le ka go ema pele ga Morwa wa motho ka go amogelwa ke Modimo, mafelelong re ka hwetša moputso wa bophelo bjo bo sa felego.

[Mengwalo ya tlase]

Dipotšišo tša Tlhahlobo:

◻ Ka ge re bone go phethagala ga Daniele 4:32, re swanetše go dula re ‘phakgame’ bjang gona bjale?

◻ Diebangedi tša Mateo le Luka di hlaola “moloko wó” bjang?

◻ Ge re dutše re letetše “letšatši leo, le nakô,” re bona’ng, gomme re swanetše go arabela bjang?

◻ Tebelelo ya “maxodimo a mafsa le lefase le lefsa” tša go loka di swanetše go re kgothaletša go dira’ng?

[Pictures on page 17]

Batho ba ba tlaišegago ba tla phološwa ge moloko wo o šoro le o kgopo o fedišwa

[Credit Line]

Alexandra Boulat/Sipa Press

[Credit Line]

Left and below: Luc Delahaye/Sipa Press

[Seswantšho go letlakala 18]

“Maxodimo a mafsa le lefase le lefsa” tša letago di beilwe ka pele ga merafo ka moka ya batho