Barwadi ba Seetša—Ka Morero Ofe?
“Ke Xo bea seetša sa dithšaba.”—DITIRO 13:47.
1. Moapostola Paulo o tutueditšwe bjang ke molao wo go bolelwago ka wona go Ditiro 13:47?
MOAPOSTOLA Paulo o itše: “Ké tšôna tše Morêna a re laetšexo tšôna, xe a re: Ke Xo bea seetša sa dithšaba, xore O bê phološô ’pheletšong tša lefase.” (Ditiro 13:47) Ga se a bolela seo feela, eupja o ile a ba a lemoga bohlokwa bja sona. Ka morago ga gore a be Mokriste, Paulo o ile a gafela bophelo bja gagwe go phethagatšeng taelo yeo. (Ditiro 26:14-20) Na taelo yeo e beetšwe gaešita le rena? Ge e ba go le bjalo, ke ka baka la’ng e le ya bohlokwa mehleng ya rena?
Ge Moloko wa Batho o be o ‘Timelwa ke Mabone’
2. (a) Ge lefase le be le dutše le tsena nakong ya lona ya bofelo, go ile gwa direga’ng se se ilego sa kgoma boemo bja lona bja moya le bja boitshwaro kudu? (b) Mokgomana wa naga ya Brithania o ile a re’ng mabapi le seo a bonego se direga ka August 1914?
2 Pele bontši bja batho bao ba phelago lehono ba ka belegwa, lefase le le ile la tsena nakong ya lona ya bofelo. Ditiragalo tše kgolo di ile tša direga ka tatelano ya ka pela kudu. Sathane Diabolo yo e lego mohlohleletši o mogolo wa lefsifsi la moya le la boitshwaro o ile a lahlelwa lefaseng. (Ba-Efeso 6:12; Kutollo 12:7-12) Moloko wa batho o be o šetše o nweletše ntweng ya wona ya pele ya lefase. Mathomong a August ka 1914, ge go be go bonagala eka ntwa e ka se ke ya phengwa, mongwaledi wa naga ya Brithania wa merero le ditaba tša ka ntle Mohlomphegi Edward Grey, a eme hleng ga lefasetere la ofisi ya gagwe kua London, o ile a re: “Yuropa ka moka e timelwa ke mabone; a ka se sa tšhuma gape nakong ya bophelo bja rena.”
3. Ke katlego efe yeo baetapele ba lefase ba bilego le yona ge ba leka go hlabišetša moloko wa batho seetša?
3 E le maiteko a go gotetša mabone ao gape, go ile gwa dirwa Kgwerano ya Ditšhaba ka 1920. Eupja mabone a ile a palelwa gaešita le ke go kunyelela. Bofelong bja ntwa ya bobedi ya lefase, baetapele ba lefase ba ile ba leka go a gotetša gape ka go hlama mokgatlo wa Ditšhaba tše Kopanego. Mabone a ile a buša a gana go tšhuma ka mo go tagilego. Lega go le bjalo, ka baka la ditiragalo tše di diregilego morago bjale, baetapele ba lefase ba boletše ka “thulaganyo ya lefase le lefsa.” Eupja go ka se ke gwa bolelwa gore “lefase le lefsa” leo ba le dirago le tlišitše khutšo ya kgonthe le polokego. Go fapana le seo, dintwa tša dibetša, dintwa magareng ga merafo, bokebekwa, go hlokega ga mešomo, bodiidi, go šilafatšwa ga tikologo le malwetši di sa dutše di šulafaletša batho bophelo.
4, 5. (a) Lefsifsi le aparetše moloko wa batho neng le gona bjang? (b) Ke eng se se nyakegago e le gore go ka hwetšwa kimologo?
4 Ge e le gabotse, moloko wa batho o timetšwe ke mabone kgale pele ga 1914. Seo se diregile kua Edene nywageng e fetilego e ka bago 6 000, ge batho ba pele bao e bego e le batswadi ba rena ba be ba ikgethela go itirela diphetho ka noši ba sa šetše thato ya Modimo yeo a bego a e boletše. Manyami ao a wetšego moloko wa batho ga e sa le go tloga ka nako yeo ke feela tše dingwe tša ditiragalo tšeo di diregago ka tlase ga seo Beibele e rego ke “matla a lefsifsi.” (Ba-Kolose 1:13) Motho wa pele Adama ka tlase ga tutuetšo ya Sathane Diabolo o gohlomeleditše lefase sebeng; gomme sebe le lehu di ile tša nabela bathong ka moka di e-tšwa go Adama. (Genesi 3:1-6; Ba-Roma 5:12) Moloko wa batho o ile wa lahlegelwa ke kamogelo ya Jehofa yo e lego Mothopo wa seetša sa bophelo ka sona sebopego seo.—Psalme 36:9.
5 Tsela e tee feela yeo ka yona seetša se bego se ka hlabela batho lege e ka ba bafe e be e tla ba ya ge ba ka hwetša kamogelo ya Mmopi wa batho, Jehofa Modimo. E be e tla ba gona ‘lešira leo le širilego ditšhaba tšohle’ le kago tlošwa. Se se be se tla kgonega bjang?—Jesaya 25:7.
Yo a Neetšwego Gore e be “Seetša sa Dithšaba”
6. Ke dikholofelo dife tše kgolo tšeo Jehofa ka Jesu Kriste a dirilego gore re kgone go ba le tšona?
6 Gaešita le pele ga gore Adama le Efa ba rakwe Paradeiseng, Jehofa o boletše e sa le pele ka “peu” yeo e bego e tla ba mophološi wa barati ba go loka. (Genesi 3:15) Ka morago ga gore Peu yeo e tswalwe e le motho, Jehofa o ile a dira gore Simeone yo a bego a tšofetše kua tempeleng ya Jerusalema a mo hlalose e le “seetša se-iša-kutollô-xo-ba-ntlê.” (Luka 2:29-32) Ka go ba le tumelo sehlabelong se se phethagetšego sa Jesu e le motho, batho ba be ba ka lokollwa kahlolong ya sebe sa leabela. (Johane 3:36) Ka go dumelelana le thato ya Jehofa, bjale ba be ba ka kgona go letela bophelo bjo bo sa felego boemong bja phethego e le karolo ya Mmušo goba e le balata ba Mmušo paradeiseng ya lefaseng. Tokišetšo ye ke e makatšago gakaakang!
7. Ke ka baka la’ng ge dikholofetšo tše di lego go Jesaya 42:1-4 gotee le phethagalo ya tšona lekgolong la pele la nywaga di re fa kholofelo e kgolo?
7 Jesu Kriste ka noši ke tiišo ya gore dikholofelo tše tše kgolo di tla phethega. Mabapi le go fodiša ga Jesu batho ba ba babjago, moapostola Mateo o ile a diriša go yena seo se ngwadilwego go Jesaya 42:1-4. Karolo ya lengwalo leo e re: “Bônang mohlanka wa-ka yo ke mo thêkxaxo, yo ke mo hlaotšexo, ’me pelo ya-ka ya mo thabêla. Ke beile môya wa-ka mo xo yêna, ’me o tlo iša tokô xo ba-ntlê.” Na se ga se sona seo batho ba ditšhaba ka moka ba se nyakago? Boporofeta bo tšwela pele ka gore: “Xa a na lešata, xa a hlaboše lentšu la kwala mekxotheng. Lehlaka le le thinyexilexo a ka se kê a le thokxêla ruri; ’me lebônênyana le le kunyêlêlaxo a ka se le timêlê ruri.” Ka go dumelelana le se, Jesu ga se a ka a ba bogale bathong bao ba bego ba šetše ba tlaišega. O ile a ba šokelwa, a ba ruta ka merero ya Jehofa gomme a ba fodiša.—Mateo 12:15-21.
8. Ke ka kgopolo efe Jehofa a ilego a neela ka Jesu e le “kxwêranô ya sethšaba” le “seetša sa ba-ntlê”?
8 Monei wa boporofeta bjo o botša Mohlanka wa gagwe, e lego Jesu ka yena gore: “Nna Morêna [Jehofa, NW] ke Xo bileditše tokô; ke swara seatla sa xaxo. Ke Xo lôta xore ke Xo dirê wa kxwêranô [“ke go beile go ba kgwerano,” PK] ya sethšaba le seetša sa ba-ntlê, xore o budullê mahlô a difofu, O lokololê ba ba tlemilwexo; ba ba dutšexo lefsifsing O ba nthšê kxôlexong.” (Jesaya 42:6, 7) Ee, Jehofa o neetše ka Jesu Kriste e le kgwerano, e le tiišo ya go phethagatšwa ga kholofetšo. Seo se kgothatša gakaakang! Jesu ge a be a le mono lefaseng o bontšhitše lerato la kgonthe bakeng sa batho; o ile a ba a gafa bophelo bja gagwe ka baka la moloko wa batho. Ke yena yo Jehofa a mo neilego pušo godimo ga ditšhaba ka moka. Ga go makatše ge Jehofa a ile a mmitša seetša sa ditšhaba. Jesu ka noši o itše: “Ké Nna seetša sa lefase.”—Johane 8:12.
9. Ke ka baka la’ng Jesu a sa ka a ineela tabeng ya go kaonafatša tshepedišo ya nakong yeo ya dilo?
9 Jesu e bile seetša sa lefase ka morero ofe? Ruri e be e ka se be ka morero wa go hwetša dilo tša lefase goba mahumo. O ile a gana go leka go lokiša boemo bja nakong yeo bja dipolitiki gomme a gana go amogela bogoši bjoo a bego a bo newa ke Sathane, mmuši wa lefase goba ke batho. (Luka 4:5-8; Johane 6:15; 14:30) Jesu o bontšhitše kwelobohloko e kgolo go batho bao ba bego ba tlaišega, gomme a ba tlišetša khunologo ka ditsela tšeo ba bangwe ba bego ba ka se kgone go e tliša ka tšona. Eupja o be a tseba gore go be go ka se kgonege gore khunologo e sa felego e tlišwe bathong bao ba bego ba le ka tlase ga kahlolo ya Modimo ka baka la sebe sa leabela le bao ba bego ba bušwa ke meoya e mebe e sa bonagalego. Jesu ka bohlale bjo bo swanago le bja Modimo o ile a thea bophelo bja gagwe ka moka go direng thato ya Modimo.—Ba-Hebere 10:7.
10. Ke ka ditsela dife le ka morero ofe Jesu e bilego seetša sa lefase?
10 Ge go le bjalo, ke ka ditsela dife le ka morero ofe Jesu e bilego seetša sa lefase? O ile a ineela go boleleng ditaba tše di lokilego tša Mmušo wa Modimo. (Luka 4:43; Johane 18:37) Ka go hlatsela therešo mabapi le morero wa Jehofa, Jesu le gona o godišitše leina la Tatagwe wa legodimong. (Johane 17:4, 6) Go tlaleletša moo, Jesu ka ge e be e le seetša sa lefase, o pepentšhitše maaka a bodumedi gomme ka go dira bjalo a nea bao ba bego ba tlemilwe bohlankeng bja bodumedi khunologo ya moya. O ile a utolla Sathane e le molaodi yo a sa bonagalego wa bao ba itlogelelago gore a ba šomiše. Le gona Jesu o beile kgakala mediro yeo e lego ya lefsifsi. (Mateo 15:3-9; Johane 3:19-21; 8:44) Se segolo kudu e bile go ipontšha ga gagwe gore ke seetša sa lefase ka go gafa bophelo bja gagwe bjo bo phethegilego gore e be topollo, ka go rialo a bulela batho bao ba dumelago tokišetšo ye tsela ya go hwetša tebalelo ya dibe, tswalano e botse le Modimo, gotee le go ba le kholofelo ya bophelo bjo bo sa felego e le karolo ya lapa la Jehofa la legohle. (Mateo 20:28; Johane 3:16) Le gona mafelelong, Jesu ka baka la go kgomarela ga gagwe boineelo bjo bo feleletšego go Modimo bophelong bja gagwe ka moka o ile a phagamiša bogoši bja Jehofa gomme a bontšha gore Diabolo ke moaketši, gomme ka go dira bjalo a dira gore barati ba go loka ba kgone go hwetša mehola e sa felego. Na ke gore Jesu bjale e be e tla ba yena feela morwadi wa seetša?
“Lena le Seetša sa Lefase”
11. Gore barutiwa ba Jesu e be barwadi ba seetša, ba be ba swanetše go dira’ng?
11 Jesu go Mateo 5:14 o boditše barutiwa ba gagwe gore: “Lena le seetša sa lefase.” Ba be ba swanetše go latela mehlala ya gagwe. Ka tsela yeo ba phelago ka yona le ka boboledi bja bona, ba be ba swanetše go lebiša ba bangwe go Jehofa e le Mothopo wa seetša sa kgonthe. Ba be ba swanetše go ekiša Jesu ka go tsebatša leina la Jehofa le go phagamiša bogoši bja Gagwe. Bjalo ka Jesu, ba be ba swanetše go tsebatša Mmušo wa Modimo e le yona feela kholofelo yeo batho ba ka bago le yona. Le gona ba be ba swanetše go pepentšha maaka a bodumedi le mediro ya lefsifsi gotee le yo mobe yo e lego yena mohlohleletši wa dilo tše. Balatedi ba Kriste ba be ba swanetše go botša batho kae le kae ka tokišetšo ya phološo yeo ka lerato Jehofa a e dirilego ka Jesu Kriste. Bakriste ba pele ba ile ba phetha kabelo yeo ka mafolofolo a magolo kudu, go thoma kua Jerusalema le Judea le go fihla Samaria bjalo ka ge Jesu a be a laetše!—Ditiro 1:8.
12. (a) Seetša sa moya se be se tla katologa go fihla kae? (b) Moya wa Jehofa o ile wa dira gore Paulo a kgone go lemoga eng mabapi le Jesaya 42:6, le gona boporofeta bjoo bo swanetše go kgoma maphelo a rena bjang?
12 Lega go le bjalo, go bolelwa ga ditaba tše di lokilego go be go ka se dirwe tšhemong yeo feela. Jesu o laetše barutiwa ba gagwe gore ba “dirê dithšaba ka moka barutiwa.” (Mateo 28:19) Nakong ya ge Saulo wa Tareso a be a sokologa, Morena o ile a bolela ka go lebanya gore Saulo (yo a ilego a ba moapostola Paulo) o be a tla bolela ebangedi e sego go ba-Juda feela, eupja le go Ba-ntle. (Ditiro 9:15) Ka thušo ya moya o mokgethwa, Paulo o ile a kwešiša gore seo se be se akaretša’ng. Ka gona o ile a lemoga gore boporofeta bjo bo lego go Jesaya 42:6 bjoo bo phethagalago ka go lebanya go Jesu Kriste, ka tsela e nngwe gape ke taelo ye e newago bao ba bontšhago tumelo go Kriste. Ka gona, ge Paulo go Ditiro 13:47 a be a tsopola pukung ya Jesaya o itše: “Ke tšôna tše Morêna [Jehofa] a re laetšexo tšôna, xe a re: Ke Xo bea seetša sa dithšaba, xore O bê phološo ’pheletšong tša lefase.” Go thwe’ng ka wena? Na o amogetše boikarabelo bjo bja go ba morwadi wa seetša? Go etša Jesu le Paulo, na le wena o theile bophelo bja gago go direng thato ya Modimo?
Seetša le Therešo tše di Tšwago go Modimo di tla re Hlahla
13. Ka go dumelelana le Psalme 43:3, thapelo ya rena e tšwago pelong ke efe, gomme re swanetše go hlokomela eng?
13 Ge re be re ka leka go ‘gotetša mabone gape’ ka borena gore re bonišetše bokamoso bja moloko wa batho, gona re tla ba re timeletšwe o šoro ke seo se bolelwago ke Lentšu le le buduletšwego la Modimo. Lega go le bjalo, go sa šetšwe seo lefase ka kakaretšo le se dirago, Bakriste ba therešo ba lebelela Jehofa e le yena Mothopo wa kgonthe wa seetša. Ba rapela thapelo e swanago le yeo e ngwadilwego go Psalme 43:3, yeo e rego: “Roma Seetša sa xaxo le Therešô ya xaxo, ke hlahlwê ke tšôna, di nkišê kwa thabeng e kxêthwa, madulô[ng] a xaxo.”
14, 15. (a) Jehofa mo nakong ye o romela seetša sa gagwe le therešo ya gagwe ka ditsela dife? (b) Re ka bontšha bjang gore seetša sa Modimo le therešo ya gagwe ruri di a re hlahla?
14 Jehofa o tšwela pele go araba thapelo yeo ya bahlanka ba gagwe ba botegago. O romela seetša ka go tsebiša morero wa gagwe, ka go dira gore bahlanka ba gagwe ba o kwešiše le ka go phetha seo a se boletšego. Ge re rapela Modimo, ga se feela setlwaedi goba selo se re se dirago feela gore re bonagale re le ba bakgethwa. Selo se segolo se re se kganyogago ke gore seetša se se tšwago go Jehofa se re hlahle, go etša ge psalme e bolela. Re amogela boikarabelo bja go ba le seetša se se newago ke Modimo. Go etša moapostola Paulo, re kwešiša gore go phethagala ga Lentšu la Jehofa go rwele taelo yeo e newago bohle ba ba bontšhago tumelo go yena. Re ikwa re e-na le molato bathong ba bangwe go fihlela ge re ba file ditaba tše di botse tšeo Modimo a re neilego tšona ka morero woo.—Ba-Roma 1:14, 15.
15 Seetša gotee le therešo tšeo Jehofa a di rometšego mehleng ya rena di dira gore go bonagale gore Jesu Kriste o buša a le sedulong sa gagwe sa bogoši sa kua legodimong. (Psalme 2:6-8; Kutollo 11:15) Jesu o boletše e sa le pele gore nakong ya go ba gona ga gagwe e le kgoši, ditaba tše tše botse tša Mmušo di be di tla bolelwa lefaseng ka moka gore e be bohlatse. (Mateo 24:3, 4) Modiro woo gona bjale o dirwa lefaseng ka moka, le gona ka phišego e kgolo. Ge e ba re dira gore modiro woo e be selo sa bohlokwa kudu bophelong bja rena, gona ruri go etša ge mopsalme a boletše, re hlahlwa ke seetša sa Modimo le therešo ya gagwe.
Letago la Jehofa le Hlabile
16, 17. Jehofa o hlabišeditše mokgatlo wa gagwe wo o swanago le mosadi ka letago la gagwe bjang ka 1914, gomme ke taelo efe ye a ilego a mo nea yona?
16 Mangwalo a hlalosa ka mantšu a ruthetšago pelo kudu mokgwa woo seetša se se tšwago go Modimo se phatlalatšwago ka wona bakeng sa go hola batho kae le kae. Jesaya 60:1-3 (NW), yeo e lebišitšwego go “mosadi” wa Jehofa goba phuthego ya gagwe ya legodimong ya bahlanka ba botegago e re: “Ema, Wena mosadi, hlabiša seetša, ka gobane seetša sa gago se tlile gomme letago la Jehofa ka noši le go hlabetše. Ka gore, bona! lefsifsi le tla aparetša lefase, gomme pshifalo e kgolo e tla aparetša dihlopha tša ditšhaba; eupja Jehofa o tla go phadimela, gomme letago la gagwe yena mong le tla bonwa godimo ga gago. Le gona ditšhaba ruri di tla ya seetšeng sa gago, gomme dikgoši di tla ya phadimong ya go taga ga gago.”
17 Letago la Jehofa le ile la phadimela phuthego ya gagwe ye e swanago le mosadi ka ngwaga wa 1914 ge e be e belega Mmušo wa Mesia woo Jesu Kriste e lego Kgoši ya wona ka morago ga go leta ka nako e telele. (Kutollo 12:1-5) Seetša se se tagilego sa Jehofa se phadima phadimo ya go amogelwa godimo ga mmušo woo e le mmušo wo o swanetšego bakeng sa lefase ka moka.
18. (a) Ke ka baka la’ng boso bo aparela lefase, bjalo ka ge go boletšwe e sa le pele go Jesaya 60:2 (NW)? (b) Ke bjang batho ka o tee ka o tee ba ka phološwago lefsifsing la lefase?
18 Go fapana le seo, lefase le aparetšwe ke boso, gomme ditšhaba di lefsifsing le leso-leso. Ka baka la’ng? Ka gobane ditšhaba di gana mmušo wa Morwa yo a rategago wa Modimo gomme di kgetha pušo ya batho. Di nagana gore di tla rarolla mathata a tšona ka go lesa mohuta o itšego wa pušo ya batho le go amogela o mongwe. Eupja se ga se tliše khunologo ye di e holofetšego. Di palelwa ke go bona yo a hlohleletšago ditšhaba a le lefelong la moya. (2 Ba-Korinthe 4:4) Di gana Mothopo wa seetša sa kgonthe gomme ka baka leo di lefsifsing. (Ba-Efeso 6:12) Lege ditšhaba di ka dira eng goba eng, batho ka o tee ka o tee ba ka phološwa lefsifsing leo. Ka tsela efe? Ka go ba le tumelo e tletšego Mmušong wa Modimo le ka go ikokobeletša wona.
19, 20. (a) Ke ka baka la’ng le gona ke bjang letago la Jehofa le ilego la phadima godimo ga balatedi ba ba tloditšwego ba Jesu? (b) Ke ka baka la’ng Jehofa a dirile gore batlotšwa ba gagwe e be barwadi ba seetša? (c) Bjalo ka ge go boletšwe e sa le pele, ke bjang “dikgoši” le “ditšhaba” di ilego tša tanywa ke seetša se se tšwago go Modimo?
19 Bojakane ga se bo bontšhe tumelo Mmušong wa Modimo gomme ga se bo ikokobeletše wona. Eupja balatedi ba Jesu Kriste ba ba tloditšwego ka moya ba dirile seo. Ka baka la seo, seetša sa Jehofa sa kamogelo ya gagwe se phadimetše baemedi ba ba ba bonagalago ba mosadi wa gagwe wa legodimong, gomme letago la gagwe le bonagetše godimo ga bona. (Jesaya 60:19-21) Ba seetšeng sa moya seo phetogo lege e ka ba efe go tša bopolitiki goba tša boiphedišo lefaseng e ka se kego ya kgona go se tloša. Jehofa o ba phološitše go Babele o Mogolo. (Kutollo 18:4) Ba amogelwa ke yena ka gobane ba amogetše tayo ya gagwe gomme ka potego ba godišitše bogoši bja gagwe. Ba na le kholofelo e botse ka bokamoso, gomme ba thabela kholofelo yeo a ba beetšego yona.
20 Eupja morero wa Jehofa ka go dirišana le bona ka tsela ye e be e le ofe? Bjalo ka ge yena ka noši a boletše go Jesaya 60:21, o dirile seo ka nepo ya gore ‘a ithetiše,’ e le gore leina la gagwe le godišwe, gomme ba bangwe ba tle go yena ka gore e le yena feela Modimo wa therešo—gomme seo se ba tlišeditše mehola e sa felego. Ka go dumelelana le se, barapedi ba ba Modimo wa therešo ka 1931 ba ile ba amogela leina Dihlatse tša Jehofa. Na ka baka la go neela ga bona bohlatse “dikgoši” di ile tša tla seetšeng seo ba bego ba se hlabiša go ya kamoo Jesaya a bego a boletše ka gona e sa le pele? Ee! Ba ba tlilego ga se babuši ba lefase ba dipolitiki, eupja ke palo e šetšego ya bao ba letetšego go buša e le dikgoši gotee le Kriste Mmušong wa gagwe wa legodimong. (Kutollo 1:5, 6; 21:24) “Ditšhaba” tšona go thwe’ng ka tšona? Na le tšona di kgahlilwe ke seetša se? Go feela bjalo! Ga se setšhaba se setee feela sa bopolitiki se se ilego sa kgahlwa ke seetša, eupja lešaba le legolo la batho ba ba tšwago ditšhabeng ka moka le eme ka lehlakoreng la Mmušo wa Modimo gomme le fagahletše go phologela lefaseng le lefsa la Modimo. Lefase leo e tla ba lefase le lefsa e le ka kgonthe leo go lona go loka go tlago go buša.—2 Petro 3:13; Kutollo 7:9, 10.
21. Re ka bontšha bjang gore ga se re lahlegelwe ke morero wa botho bjo bo sa re swanelago bja Jehofa bjo a bo bontšhitšego ka go re nea ga gagwe kwešišo ya thato ya gagwe?
21 Na o karolo ya lešaba leo le le golago la barwadi ba seetša? Jehofa o re neile kwešišo ya thato ya gagwe gore bjalo ka Jesu, le rena re be barwadi ba seetša. Anke ka moka ga rena re bontšhe gore ga se ra lahlegelwa ke morero wa botho bjo bo sa re swanelago bjo Modimo a bo bontšhitšego go rena ka go bontšha mafolofolo modirong wo Jehofa a o neilego bahlanka ba gagwe mehleng ya rena. (2 Ba-Korinthe 6:1, 2, NW) Ga go na modiro o lego bohlokwa go feta wo mo mehleng ya rena. Le gona ga go na tokelo yeo re ka e fiwago e fetago ya gore re tumiše Jehofa ka go bonegela ba bangwe ka seetša se segolo se se tšwago go yena.
O ka Araba Bjang?
◻ Dilo tšeo e lego modu wa mathata a magolo a batho ke dife?
◻ Ke ka ditsela dife Jesu gotee le barutiwa ba gagwe e lego “seetša sa lefase”?
◻ Seetša sa Jehofa le therešo ya gagwe di re hlahla bjang?
◻ Jehofa o phadimišitše letago la gagwe bjang godimo ga mokgatlo wa gagwe?
◻ Jehofa o dirile gore batho ba gagwe e be barwadi ba seetša ka morero ofe?
[Pictures on page 9]
Tiragalo ye e diregilego kua Edene e re thuša go kwešiša mathata a magolo ao moloko wa batho lehono o lebanego le ona
[Credit Lines]
Tom Haley/Sipa
Paringaux/Sipa