Ye ke Tetragrammaton, leina le lekgethwa la Modimo e lego Jehofa ka Seheberu, gomme e balwa go tloga ka go le letona go ya ka go le letshadi
Re Ithuta Eng ka Tlhaka e Nyenyane ya Seheberu?
Na re ka kgodišega e le ka kgonthe gore dilo ka moka tšeo Modimo a di tshepišitšego di tla phethagala? Jesu o be kgodišegile gore di tla phethagala gomme dithuto tša gagwe di ile tša thuša batheetši ba gagwe gore ba be le tumelo. Nagana ka papišo yeo a boletšego ka yona Thutong ya gagwe ya Thabeng, yeo e lego go Mateo 5:18, e rego: “Ruri ke a le botša, legodimo le lefase di be di tla feta kapejana go e na le gore tlhaka e tee e nyenyane goba karolwana e tee ya tlhaka e fete Molaong go fihlela dilo tšohle di direga.”
Tlhaka e nyenyane ditlhakeng tša Seheberu ke י (yod), yeo e lego tlhaka ya mathomo ya Tetragrammaton, e lego leina la Modimo le lekgethwa la Jehofa.a Bamangwalo le Bafarisei ba be ba sa lebelele feela mantšu le ditlhaka tša Molao wa Modimo di le bohlokwa, eupša ba be ba lebelela le ‘karolwana e nngwe le e nngwe ya tlhaka’ e le bohlokwa kudu.
Jesu o be a e ra gore le ge legodimo le lefase di be di ka feta, eupša ge e le karolwana e nyenyane ya Molao e be e tlo phethagala. Lega go le bjalo, Beibele e re kgonthišetša gore legodimo la kgonthe le lefase di tlo dula di le gona. (Psalme 78:69) Ka gona, taba ye e kgahlišago e re botša gore go tla phethagala le karolwana e nyenyane ya Molao.
Na Jehofa Modimo o tshwenyega ka ditaba tše dinyenyane? Ee, go bjalo. Ka mohlala: Baisiraele ba bogologolo ba be ba boditšwe gore ba se ke ba roba lerapo le ge e le lefe la kwana ya Paseka. (Ekisodo 12:46) Mohlomongwe yeo e be e le taba e nyenyane. Na ba be ba kwešiša gore gore’ng ba be ba sa swanela go roba lerapo le ge e le lefe? Mohlomongwe ba be ba sa kwešiše. Lega go le bjalo, Jehofa Modimo o be a tseba gore taba yeo e be e le boporofeta bja gore ge Mesia a bolawa koteng, go be go ka se be le lerapo la gagwe leo le robjago.—Psalme 34:20; Johane 19:31-33, 36
Mantšu a Jesu a re ruta’ng? Le rena re ka kgodišega ka botlalo gore dilo ka moka tšeo Jehofa Modimo a re tshepišitšego tšona, go akaretša le tše dinyenyane, di tlo phethagala. Ruri ye ke kgonthišetšo e matla go tšwa tlhakeng e nyenyane ya Seheberu!
a Tlhaka e nyenyane ditlhakeng tša Segerika ke iota gomme e swana le tlhaka ya Seheberu ya י (yod). Go ka direga gore Jesu o be a bolela ka tlhaka ya Seheberu ka ge mathomong Molao wa Moshe o be o ngwadilwe ka Seheberu.