Lebogang​—Mmušo wa Jehofa wa Mesia o a Buša

“Re a Xo leboxa Wene Morêna Modimo Ra-matla-ohle, . . . xe O tšere matla a maxolo a xaxo wa buša.”​—KUTOLLO 11:17.

1. Mookamedi wa Mokgatlo wa Watch Tower o ile a re’ng ka morago ga leeto la gagwe la go ralala le Yuropa ka 1911?

MATHOMONG a 1911, mookamedi wa Mokgatlo wa Watch Tower, C. T. Russell, o ile a nea lelokelelo la dipolelo tša Beibele metseng e megolo ya Yuropa. Ge a be a bolela ka tša leeto leo la go ralala le naga, Russell o ngwadile se se latelago ka go The Watch Tower ya May 1911: “Re ile ra makatšwa ke go hwetša bohlatse bjo bontši gakaakaa bja katlego gohle . . . Babadi ba rena ba a tseba gore ka nywaga e mentši re be re dutše re letetše gore Mehla ye e feleletše ka nako ya mathata, gomme re letetše gore e fihle ka bjako le ka šiši kapejana ka morago ga October 1914, e lego nako yeo go ya ka kwešišo yeo re nago le yona gona bjale ya Mangwalo, Mabaka a Ba-ntle​—nako ya pušo ya Ba-ntle godimo ga lefase​—a tlago go fela; e lego nako yeo ka yona mmušo wa Mesia o swanetšego go thoma pušo ya wona.” Na kholofelo ye e ile ya phethega?

2. Khutšo e ile ya fela bjang ka 1914, gomme ke mafelelo afe a bohloko ao a bilego gona?

² Seripeng sa pele sa 1914, lefase le be le bonala le bolokegile ntweng. Eupja khutšo e ile ya fela ka bjako ge moja-bohwa wa mmušo wa Austria a be a bolawa ka go khukhunetšwa ke mo-Serb ka June 28, 1914. Kapejana Austria le Hungary di ile tša tsogela Serbia matla. Russia e ile ya ema le Serbia, ka gona Jeremane ya tsogela Russia ka marumo ka August 1. Ka morago Jeremane e ile ya tsogela Fora matla ka August 3; Brithania ya hlasela Jeremane ka August 4; Montenegro ya lwa le Austria le Hungary ka August 7; Japane ya lwa le Jeremane ka August 23; Austria le Hungary tša lwa le Belgium ka August 28. Ba bantši ba be ba nagana gore ntwa e be e tla fela kapejana. Go e na le moo, e ile ya loya gomme ya ba ntwa e šoro ka go fetišiša historing go fihla ka nako yeo, gomme dinaga tše dingwe tše 19 di ile tša tsenya letsogo polaong e kgolo ya ditšhaba ka moka yeo go yona madira gotee le batho feela ba 13 000 000 ba ilego ba loba maphelo, gomme ba fetago 21 000 000 ba ilego ba kgaoga ditho goba ba gobala kudu.

3, 4. Go ile gwa direga’ng ntlong-kgolo ya Mokgatlo mesong ya Labohlano la October 2, 1914?

³ Ka Labohlano mesong, October 2, 1914, Russell o ile a hlabela bašomi ba ntlong-kgolo ya Mokgatlo wa Watch Tower kua Brooklyn, New York mokgoši wa gore: “Mabaka a Ba-ntle a fedile; nako ya dikgoši tša bona e fedile.” Se se ile sa amogelwa ka magofsi a lethabo ke lapa la Bethele, e lego “ngwako wa Modimo.”

⁴ Lebaka la gore C. T. Russell le bagwera ba gagwe ba thabe gakaakaa mesong yeo ya October e be e le lefe? Polelwana “Mabaka a Ba-ntle” e tšwa kae? Bohlatse bja gore Mabaka a Ba-ntle a ile a fela ka October 1914 ke bofe? Le gona seo se swanetše go go kgoma bjang?

Jerusalema le Mabaka a Ba-ntle

5. Polelwana “Mabaka a Ba-ntle” e tšwa kae?

⁵ Polelwana “Mabaka a Ba-ntle” goba “mehla e beilwego ya ditšhaba” e tšwa boporofeteng bjo bogolo bja Jesu bjo bo lego mabapi le go senywa ga Jerusalema. (Luka 21:​5-36, King James Version) Matšatši a mabedi pele a bo nea, Jesu o ile a itšweletša go baagi ba Jerusalema bjalo ka Mesia wa bona. Ge ka boikokobetšo a dutše a lebile motseng a nametše pokolo, mašaba a ba-Juda a ile a goeletša bjalo ka ge Sakaria 9:9 e ile ya bolela e sa le pele. Ba ile ba goeletša ka gore, “A xo rêtwê Kxoši e tlaxo ka Leina la Morêna.”​—Luka 19:​28-40.

6, 7. Ke molato ofe o mogolo wa madi wo baagi ba Judea ba lekgolong la pele la nywaga ba ithwešitšego wona, gomme mafelelo e bile afe?

⁶ Eupja Jesu o be a tseba gore kapejana setšhaba se be se tla mo fetogela ka baka la lehloyo le legolo la baetapele ba bodumedi ba Jerusalema ka tlase ga tutuetšo ya tatago bona Diabolo. (Genesi 3:​15; Johane 8:​44) Kapejana ka morago ga fao, ka Nisani 14, lešaba la ba-Juda ka legoa le ile la nyaka gore Jesu a bolawe. Ba ile ba goeletša go mmuši wa mo-Roma yo a bego a sa nyake, ka gore: “Madi a xaxwe a a tlê xodimo xa rena le xodimo xa bana ba rena!” (Mateo 27:​24, 25) Go e na le gore ba amogele Jesu bjalo ka Kgoši ya Mesia, baperisita ba bagolo ba ile ba goeletša: “Xa re na kxoši xe e se Kesara.” (Johane 19:​15) Mesia wa kgonthe o ile a kokotelwa koteng ya tlhokofatšo gore a hwe, a beilwe molato wa maaka wa go ba molwantšha-mmušo malebana le Roma le go ba morogaki wa Modimo wa ba-Juda.​—Mareka 14:​61-64; Luka 23:2; Johane 18:​36; 19:7.

⁷ Bogale bja Modimo ruri bo be bo tla tlela baagi ba Judea ka baka la molato wa bona o mogolo wa madi. Jerusalema, gotee le tempele ya yona e botse kudu, e be e ka se sa hlwa e bitšwa “motse wa Yêna Kxoši e kxolo,” e lego Jehofa. (Mateo 5:​35; Luka 13:​33-35) Matšatši a sego kae pele ga lehu la Jesu, barutiwa ba gagwe ba ile ba reta meago ya tempele ya motse woo. Jesu ge a araba o ile a porofeta gore: “Xe e le tšeo le di bôxêlaxo, xo e-tla matšatši ao xo ka se kexo xwa šadišwa lebye lè sa hlatlaxane le le lengwê, le sa ka la šuthišwa.”​—Luka 21:​5, 6.

8. Ge Jesu a be a nea ‘pontšho’ ya ditiragalo tšeo di bego di tla feleletša ka go senywa ga Jerusalema, ke selo sefe se sengwe seo se bego se akaretšwa?

⁸ Barutiwa ba Jesu ba ile ba botšiša ba maketše gore: “Moruti, ké tša xo tlo dirêxa neng? Xomme re tlo bôna ka’ng xe di šetše di tlo tšwêlêla?” (Luka 21:7) Jesu ge a araba o ile a bolela ka go nepa ditiragalo tšeo di ilego tša feleletša ka go senywa ga Jerusalema, gomme a oketša ka mantšu a a bohlokwa: “Jerusalema o tlo xatakêlwa ke Ba-ntlê, xo bê xo phêthêxê mabaka a ba-ntlê.” (Luka 21:​8-24) Jesu ka go rialo o ile a šupa pele go se sengwe seo se fetago go senywa ga Jerusalema​—selo seo se bego se tla leta “xo bê xo phêthêxê mabaka a ba-ntlê.” Jesu ge a bolela ka ‘pontšho’ o itše: “Xe le bôna dilô tšeo di dirêxa, Le tsebê xore mmušô wa Modimo o batametšê.” (Luka 21:​31) Ka gona, pontšho e be e tla phethagala gabedi. Phethagalo ya pele goba tekanyo e nyenyane ya phethagalo, e be e tla bontšha gore ‘go phušolwa ga Jerusalema go batametše.’ (Luka 21:​20) Phethagalo ya bobedi le e kgolwanyane e be e tla tla ge Mabaka a Ba-ntle a fedile, gomme e be e tla bontšha gore “mmušô wa Modimo o batametše.”​—Bapiša le Mateo 24:3.

Jerusalema wa Lefaseng o Tšeelwa Legato ke Motse o Phagamego

9. Jerusalema ya lefaseng e lahlegetšwe ke maemo a yona ao a amogelegago neng, gomme legatong la yona go beilwe eng?

⁹ Na ge Jesu a be a re, “Jerusalêma o tlo xatakêlwa ke ba-ntlê, xo bê xo phêthêxê mabaka a ba-ntlê,” o be a bolela gore motse wa lefaseng mafelelong o be o tla hwetša kgaugelo ya Modimo gape? Aowa. Ka morago ga go bolawa ga Morwa-moratwa wa Modimo, Jerusalema ya lefaseng e ile ya lahlegelwa sa ruri ke boemo bja yona bjo bo kgethegilego gomme e tšeetšwe legato ke ‘motse wa Modimo e a phelago, Jerusalema wa legodimong,’ wo o phagamego kudu.​—Ba-Hebere 12:​22; Mateo 23:​37, 38; 27:​50, 51.

10. Polelwana “Jerusalema ya lexodimong” e bolela’ng?

¹⁰ Polelwana “Jerusalêma wa lexodimong,” e dirišwa ka Beibeleng go hlalosa Mmušo wa legodimong wo o ka se kego wa šwalalanywa, wo Bakriste ba ba tloditšwego ba bileditšwego go wona.a (Ba-Hebere 11:​10; 12:​22, 28) Ge moapostola Paulo a be a ngwala se, motse wa lefaseng gotee le tempele ya wona di be di sa dutše di ratwa kudu ke Ba-Juda. Ka gona Paulo o ile a gopotša Bakriste ba ba-Hebere gore “mono xa re na motse wo o tiilexo; re nyaka wo o tl’o xo tla.”​—Ba-Hebere 13:14.

Lebaka Leo ka Lona o Bitšwago Jerusalema ya Legodimong

11. Pele Jerusalema e ka lahlegelwa ke kamogelo ya Jehofa, e be e emela’ng?

¹¹ Jerusalema ka nako e telele e be e dutše e le motse-mošate wa setšhaba sa Isiraele, seo dikgoši tša sona go bego go thwe di “dula sedulong sa boxoši sa Morêna [Jehofa].” (1 Koronika 29:​23) Le gona, Jehofa o ile a dira kgwerano le Dafida, ya gore bogoši bo be bo tla dula ka lapeng la gagwe ka mo go sa felego. Go etša ge metse-mešate ya mehleng yeno e bjalo ka Washington, Moscow, Canberra le Pretoria e dirišwa bakeng sa go hlaola mebušo ya yona e fapa-fapanego, Jerusalema le yona e dirišwa ka Beibeleng bakeng sa go emela mmušo wa Dafida.​—2 Samuele 7:​16; Luka 1:32.

12. Polelwana “Mabaka a Ba-ntle” e swanetše go dirišwa bjang?

¹² Mmušo wa Dafida o be o buša lefelong le le lekanyeditšwego, o goma feela ka mellwane yeo Modimo a bego a e beetše Isiraele ya bogologolo. Ka gona Jerusalema wa lefaseng e be e fo ba seswantšhetšo feela sa Mmušo wa kgonthe wa Mesia wo o bego o tla buša go tšwa legodimong gomme wa buša lefase ka moka. (Psalme 2:​2, 7, 8; Daniele 7:​13, 14; 2 Timotheo 4:​18) Ka gona, puku The Time Is At Hand, yeo e gatišitšwego ke Mokgatlo wa Watch Tower ka 1889, e ile ya bolela gabotse gore: “Polelwana ‘Mabaka a Ba-ntle’ e ile ya dirišwa ke Mong wa rena mabapi le nako ya magareng ya histori ya batho ya ge go be go tlošwa Mmušo wa seswantšhetšo wa Modimo, e lego Mmušo wa Isiraele (Hesekiele 21:​30-32), le go thoma gaešita le go hlongwa ga mmušo wo o bego o o swantšhetša, e lego mmušo wa kgonthe wa Modimo.”

Mabaka a Ba-ntle​—A tla Tšea Nako e Kaaka’ng?

13. Mabaka a Ba-ntle a thomile neng, gona ke ka baka la’ng o araba bjalo?

¹³ Mmušo wa seswantšhetšo wa Modimo o ile wa menolwa ke kgoši ya Babele, Nebukadinetsara, ka 607 B.C.E. Ka kgwedi ya bošupa ya Sejuda, mo e ka bago bogareng bja October, naga e ile ya dirwa lešope.b (2 Dikxoši 25:​8, 9, 22, 25, 26) E le go bontšha gore se se diregile ka tumelelo ya gagwe, Jehofa Modimo o ile a nea Nebukadinetsara toro. E be e le mabapi le sehlare seo se ilego sa rengwa gomme sa dumelelwa go hloga gape ka morago ga “mabaka a šupaxo.” Toro e bile le phethagalo ya yona ya mathomo ge Nebukadinetsara a be a bušetšwa sedulong sa gagwe sa bogoši ka morago ga gore a lahlegelwe ke tlhaloganyo ka nakwana.​—Daniele 4:​10-17, 28-36.

14. Taba-kgolo ya toro ya Nebukadinetsara e be e le efe?

¹⁴ Lega go le bjalo, tlhaloso ya toro ya Nebukadinetsara e ile ya bontšha gore phethagalo ya yona e kgolo e be e akaretša mmušo wa Modimo wa seswantšhetšo, woo kgoši yeo ya Ba-ntle e bego e dumeletšwe go o ‘rema.’ Toro e ile ya phetha ka polelo ye ye e nago le morero wa yona: “Xore ba ba phelaxo ba tsebê xe Yo-xodimo-dimo à buša boxoši bya batho; ó bo nea yo a rataxo xo mo nea byôna; le mothwana wa mmotlana a ka mmea a ba buša.”​—Daniele 4:17.

15. Jesu Kriste o ile a swanelega bjang go ba ‘mmotlana gare ga batho ka moka’? (Mateo 11:29)

¹⁵ Ke motho o tee feela yo a ilego a ba yo a swanelegago ka mo go feletšego go ka bitšwa ‘mmotlana bathong ka moka.’ Morwa yo a tswetšwego a nnoši wa Modimo o ipontšhitše e le yo bjalo ka go tlogela letago la gagwe la legodimong e le gore a tle a belegwe e le motho, e le Jesu, yo a hwilego lehu le le kokobetšago kudu le le sehlogo kudu diatleng tša Sathane. (Ba-Filipi 2:​3, 5-11) Ka morago ga go tsošetšwa ga gagwe gape letagong la legodimong, Jesu o ile a swanelwa ke go leta go fihlela ge mabaka a šupago a go buša ga ba-ntle a fela, pele ga ge a ka bewa sedulong sa bogoši e le Kgoši ya Mesia godimo ga batho.​—Ba-Hebere 10:​12, 13.

16. Puku ya Kutollo e thuša Bakriste go tseba nako yeo mabaka a šupago a fedilego ka yona bjang?

¹⁶ Eupja Dihlatse tša Jehofa di kwešišitše bjang botelele bja mabaka a šupago? Beibele e utolla gore “lebaka, le mabaka, le seripa sa lebaka,” goba mabaka a mararo le seripa, a lekana le matšatši a 1 260. (Kutollo 12:​6, 14) Ka gona, palo yeo ge e balwa gabedi, goba mabaka a šupago, e be e tla ba matšatši a 2 520. Ge go latelwa tlhahlo ya boporofeta ya gore “letšatši letee ’bakeng sa ngwaxa o tee,” gona mabaka a šupago a tla lekana le nywaga e 2 520. (Numeri 14:​34; Hesekiele 4:6) Go ya ka tsela ye ya go bala, Mabaka a Ba-ntle ao a thomilego ka October 607 B.C.E., a ile a fela nywaga e 2 520 ka morago, ka October 1914.

17. Ke kgoeletšo efe ya lethabo yeo e bego e tla dirwa ka 1914?

¹⁷ Jehofa Modimo, ka October 1914, o ile a bea Morwa-moratwa wa gagwe, Morena Jesu Kriste, sedulong sa bogoši Mmušong wa legodimo. Mafelelong, pono ya Kutollo ya moapostola wa Mokriste, Johane, e ile ya thoma go phethagala, gomme go be go ka dirwa kgoeletšo e rego: “Mebušo ya lefase e tlile ya ba Mmušô wa Mong wa rena [Jehofa] le wa Motlotšwa wa xaxwe. Xomme ó [Jehofa] tlo buša xo iša mehleng ya neng le neng!” (Kutollo 1:​10; 4:1; 11:​15) Ditaba tše ke tše bose gakaakang, gomme bohle bao e lego baji ba bohwa le balata ba Mmušo ba na le lebaka la go hlalala gakaakang!​—Kutollo 11:17.

18. Ke ka baka la’ng maemo ao a kwešago bohloko a ile a tlaiša batho ga e sa le go tloga ka 1914?

¹⁸ Ke therešo gore bontši bja batho ga se bja ka bja hwetša lethabo lefaseng ga e sa le go tloga ka 1914. Eupja maemo ao a kwešago bohloko lefaseng ke bohlatse bja gore pušo ya Sathane e kgaufsi le go fela. Re tseba se bjang? Puku ya Kutollo e ile ya bontšha gore go hlongwa ga Mmušo wa Modimo go be go tla tswala ntwa legodimong. Sathane le batemona ba gagwe ba be ba tla rakwa legodimong gomme ba tswalelelwa tikologong ya lefase la rena. Ka morago ga go bona phenyo ye ponong ya boporofeta, Johane o ile a kwa lentšu le legolo le re: “Thabang-xê, lena Maxodimo, le ba ba axilexo xôna. Ba madi-mabe ké lena ba le axilexo lefaseng le lewatleng, xobane Diabolo ó theoxetše xo lena à tuka boxale ka kudu; ó tseba xe a šaletšwe ke lebakanyana fêla.”​—Kutollo 12:​1-12.

19. Ke ka baka la’ng Bakriste ba therešo ba leboga kudu gore ba phela mehleng ye?

¹⁹ Maemo a lefase ao a senyegelago pele ga e sa le go tloga ka 1914 ke bohlatse bja gore pono ya Johane e phethegile le gore bofelo bja batho ka moka bao ba ganago go ipea ka tlase ga bogoši bja Modimo bo kgaufsi ka mo go boifišago. (Luka 21:​10, 11, 25-32) Ke mo go thabišago gakaakang go phela nakong ye e kgahlišago, ge Jehofa Modimo, Ra-matla-ohle, a tla tla a rarolla kgang e kgolo ya bogoši bja gagwe godimo ga lefase! Ka morago lefase le tla fetolwa paradeise e botse, gomme baphologi bao ba lokilego ba tla išwa phethegong. Gaešita le bahu ba tla tsošwa gomme ba newa sebaka sa go swanelegela bophelo bjo bo sa felego.​—Kutollo 20:​1-3, 12, 13; 21:​3-5.

Go Nyakega ga go Dira Tokišo Mehleng Yeno

20. (a) Ke bomang bao ba ipontšhitšego e le bahlanka ba kgonthe ba Jehofa lefaseng pele ga 1914? (b) Ke ditokišo dife tšeo Bakriste ba ba botegago bao ba tloditšwego ba ilego ba dumela go di dira?

²⁰ Ka nywaga e 38 pele ga 1914, Barutwana ba Beibele, bjalo ka ge Dihlatse tša Jehofa ka nako yeo di be di bitšwa bjalo, ba ile ba šupa nako yeo e le ngwaga woo Mabaka a Ba-ntle a bego a tla fela ka wona.c Bjo ke bohlatse bjo bogolo gakaakang bja gore e be e le bahlanka ba kgonthe ba Jehofa! Lega go le bjalo, go etša bahlanka ba Modimo ba lekgolong la pele la nywaga, le bona ba be ba e-na le dikholofelo tše fošagetšego. Ka mohlala, ba be ba letetše gore Bakriste ka moka ba ba tloditšwego ba be ba tla tsošetšwa legodimong ka October 1914. Le gona ba be ba nagana gore ntwa yeo e ilego ya thoma ka 1914 e be e tla lebiša bofelong bja lefase la Sathane.

21. Ke tayo efe yeo Bakriste ba therešo ba ilego ba e hwetša nakong ya Ntwa ya I ya Lefase?

²¹ Lega go le bjalo, ge nako e dutše e e-ya, Bakriste ba ba tloditšwego ba ile ba lemoga gore ba be ba e-na le modiro o montši wo ba swanetšego go o dira lefaseng. Ka baka la go phegelela ga bona go nea bohlatse bja phatlalatša nakong ya Ntwa ya I ya Lefase, ba ile ba welwa ke tlaišo e šoro go tšwa go babuši ba bopolitiki bao ba bego ba huetšwa ke baruti ba Bojakane. (Psalme 2:​1-6) Modiro wa Bakriste ba therešo o ile wa šitišwa o šoro ka June 21, 1918, ge bahlankedi ba ba etelelago pele ba Mokgatlo wa Watch Tower kua United States ba be ba lahlelwa kgolegong nywaga e 20 ka ditatofatšo tša maaka.

22, 23. (a) Bakriste bao ba botegago ba ba tloditšwego ba dirile’ng ga e sa le go tloga ka 1919, gomme go bile le karabelo efe e lego gabedi? (b) Ke’ng yeo e swantšheditšwego ke Jerusalema e sa botegego?

²² Ntwa ya I ya Lefase e ile ya kgaotša ka bjako ka November 1918. Ka morago ka March 25, 1919, bahlankedi ba Mokgatlo wa Watch Tower ba ile ba lokollwa kgolegong. Ka morago ba ile ba tlošwa molato ka mo go feletšego. Nako ya khutšo yeo e bego e sa letelwa e ile ya bulegela Bakriste bao ba tloditšwego, go etša dibaka tšeo di ilego tša bulegela barutiwa ba pele ba Kriste ka morago ga gore ba newe matla ka moya o mokgethwa ka 33 C.E.​—Ditiro 2:​17-21, 41.

²³ Ga e sa le go tloga ka 1919, Bakriste ba ba tloditšwego ba ba botegago, e le sehlopha ba ile ba kwa taelo yeo e akareditšwego mantšung a Jesu ao a lego go Mateo 24:​14 ka phišego: “Ebangedi yé ya mmušô wa maxodimong e tlo xoêlêlwa lefaseng ka moka xore e bê bohlatse mo xo dithšaba tšohle; ya tlo ba xôna bofêlô bo fihlaxo.” Ka baka la se, “dinku tše dingwê” tša Kriste tše di nyakilego go ba dimilione tše nne di neetše maphelo a tšona bakeng sa go hlankela Jehofa e le ngata e tee le mašaledi a tloditšwego. (Johane 10:​16) Bojakane, ka tlase ga tutuetšo ya baruti ba bjona, bo tšwela pele go gana molaetša wa Mmušo. Go rata ga bjona maano a batho a bopolitiki le go tlaiša ga bjona Dihlatse tša Jehofa go swana le tsela e šoro yeo baagi ba Judea ba lekgolong la pele la nywaga ba ilego ba swara Kriste ka yona. Bjalo ka ge Jehofa a ile a tliša kahlolo ya gagwe godimo ga Jerusalema, o tla dira bjalo le ka se se swantšheditšwego ke Jerusalema, e lego Bojakane. Le gona bjalo ka ge moloko wo o kwelego molaetša wa Kriste wa kahlolo o ile wa bona tshenyego yeo a e boletšego e sa le pele, moloko wa gona bjale wa go tloga ka 1914 ‘o ka se ke wa feta’ pele ‘masetla pelo a magolo’ a e-tla.​—Mateo 24:​21, 22, 34.

24. Gore re phologele lefaseng le lefsa la Modimo, re swanetše go dira’ng?

²⁴ Re swanetše go dira’ng gore re phologe masetlapelo a magolo gomme re tsene lefaseng le lefsa la Modimo? Go sa šetšwe dikholofelo tše fošagetšego tšeo mang goba mang go rena a ka bago a bile le tšona, re swanetše go itiša malebana le go otsela ge e le mabapi le mediro ya rena ya Bokriste. (Habakuku 2:3; 1 Ba-Thesalonika 5:​1-6) Palo ya bao ba sa dutšego ba gopola ditiragalo tša 1914 e fokotšega ka mehla. Ka gona, re swanetše go phafoga; tiego e tswala tahlego. (Mateo 24:​42) Batho ka moka bao ba nyakago go phologa bofelo bja lefase le kgopo la Sathane ba swanetše gore gona bjale ba gate mogato ka go dumelelana le mantšu ao a buduletšwego: “Re a Xo leboxa Wene Morêna Modimo Ra-matla-ohle, . . . xe O tšere matla a maxolo a xaxo wa buša.”​—Kutollo 11:17.

[Mengwalo ya tlase]

O Tla Araba Bjang?

◻ Jerusalema ya bogologolo e be e emela’ng, eupja e lahlegetšwe ke maemo a yona a hlomphegago bjang?

◻ Mabaka a Ba-ntle a thomile le go fela neng, gomme ka mafelelo afe ao a boletšwego e sa le pele?

◻ Go senywa ga Jerusalema e sa botegego go be go swantšhetša’ng?

◻ Re tseba bjang gore masetla-pelo a magolo a kgaufsi, gomme re swanetše go dira’ng gore re a phologe?

[Seswantšho go letlakala 16]

Jerusalema le tempele ya yona di ile tša lahlegelwa ke maemo a tšona a a hlomphegago, eupja Modimo o ile a tšwela pele a šegofatša Morwa wa gagwe, e lego Mesia, gaešita le go bolela le yena ka go lebanya a le legodimong