Dithuto tše Tšwago Mangwalong: Maleaki 1:1–4:6

Morena wa Therešo o Tlela Kahlolo

“MODIMO, ké lefêla xe re Mo hlankêla.” (Maleaki 3:14) Pelaelo e bjalo e ile ya bolelwa ke batho ba Modimo ka noši nakong ya ge Maleaki a be a porofeta lekgolong la bohlano la nywaga B.C.E. Ka baka la’ng? Ka gobane go ile gwa ba le maemo a nyamišago Juda, kudu-kudu gare ga baperisita. Boikemišetšo bja bona bjo bogolo e be e le go huma ka boithati. Maleaki o ile a pepentšha baetapele bao ba baikaketši ba bodumedi ka mokgwa o lebanyago le o matla, gomme a lemoša gore Morena wa therešo o be a tlela kahlolo.—Maleaki 1:6-8; 2:6-9; 3:1.

Boporofeta bja Maleaki bo phethagala mehleng ya rena ka noši. Ka gona, re dira gabotse ge re ela hloko dithuto tšeo bo di huperego.

Go Nyatša Leina la Modimo

Jehofa o letetše gore batho ba gagwe ba mo nee sohle seo ba ka se kgonago. Modimo o bontšhitše lerato la gagwe pele bathong ba gagwe. Lega go le bjalo, baperisita ba nyatša leina la gagwe ka go amogela diphoofolo tše foufetšego, tše babjago le tše di fokolago bathong bakeng sa sehlabelo. Jehofa ga a kgahlišwe ke baperisita bao ba direlago dikgahlego tša bona goba dibego tše nyenyane tšeo di tšwago diatleng tša bona. Eupja go sa šetšwe seo ba se dirago, “leina la Jehofa le tla boifša ditšhabeng.”—1:1-14, NW.

Barutiši ba na le boikarabelo bjo boima. (Jakobo 3:1) Baperisita ba “kxopišitše ba bantši ka ya [bona] thutô.” Go bjalo bjang? Ka go palelwa ke go laya batho ka molao wa Modimo le ka go beba sefahlogo. Jehofa o ba befeletšwe ka tshwanelo, “xobane molomo wa moperisita ké wa go lôta tsebô; thutô batho ba e nyaka molomong wa xaxwe.”—2:1-9.

Jehofa ga a tshediše bao ba bontšhago go se hlomphe thulaganyo ya lenyalo mahlo. Ka mo go fapanego le molao wa Modimo, banna ba Juda ba nyetše basadi bašele. (Doiteronomio 7:3, 4) Ba radiile basadi ba bofsa bja bona ka go ba hlala. Maleaki o lemoša gore, Jehofa ‘o hloile tlhalo.’—2:10-17.

Kahlolo le go Sekišwa

Jehofa ga a kgotlelele phošo ka mo go sa felego. “Morena wa therešo” (NW) o tla tla tempeleng ya gagwe, a e-na le “motseta wa kxwêranô.” O tla sekiša le go hlwekiša barwa ba Lefi. Jehofa o tla ba hlatse ya kapejana malebana le baloi, dihlotlolo, bao ba enago maaka, bao ba hlalefetšago le bagateledi.—3:1-5.

Bao ba sa neego Jehofa dibego tša bona ba itira badiidi. Jehofa ga a fetoge. Ge motho yo a sa kwego a boela go yena, o tla boela go yena ka kgaugelo. Ba be ba dutše ba utswetša Modimo ka go gana go mo nea karolo ya lesome le meneelo. Eupja ge ba tliša karolo ya lesome, Jehofa o ba holofetša go ba šegofatša “wa xo tlo [ba] xolêla.” Ba tla hwetša dienywa tše dintši.—3:6-12.

Mahlo a Jehofa a lebeletše batho ba gagwe. Modimo o sekišana le bao ba boletšego ka matla malebana le yena. Ka mo go fapanego o theetša ka kelohloko bao ba mmoifago. “Puku ya kxopotšô” e tla ngwalelwa “ba sa lebalexo ’ina l’axwe.” Batho ba gagwe ba tla bona phapano magareng ga baloki le ba babe.—3:13-18.

Letšatši la Jehofa le a tla!

Letšatši la Jehofa le tla bolela tshenyego e feletšego go ba babe. Letšatši la Jehofa le a tla, gomme ba babe ba tla fedišwa bjalo ka dihlaka leubeng la mollo. Ba tla fedišwa, gwa se šadišwe ‘modu lege e le lekala.’ Ge e le bao ba boifago leina la Jehofa, ba tla thabela mehola e fodišago ya “’tšatši la tokô.” Pele ga go tla ga letšatši la gagwe le boifišago, Jehofa o tla romela Eliya moporofeta gore a dire modiro wa tsošološo.—4:1-6.

Dithuto bakeng sa lehono: Ge go tliwa borapeding, Jehofa o nyaka gore batho ba gagwe ba mo nee sohle seo ba ka se kgonago. (Bapiša le Mateo 22:37, 38.) Barutiši ba Lentšu la Modimo ba na le boikarabelo bja go ruta ka mo go swanetšego le go iša ba bangwe borapeding bja therešo. Re dira gabotse ge re gopola gore mahlo a Modimo wa toka a tsepeletše bao ba palelwago ke go bontšha tlhompho e swanetšego ya go hlompha lenyalo le bao ba dirago diphošo. Eka re ka ikokobeletša ka boleta modiro wa go sekiša le go hlwekiša wa Morena wa therešo ge re dutše re letetše ka phišego go “fihla [ga] ’tšatši leo le lexolo le le šiišaxo la [Morêna]”!

[Lepokisi go letlakala 30]

DITEMANA TŠA BEIBELE TŠEO DI HLAHLOBIŠIŠITŠWEGO

○ 1:10—Baperisita ba baithati, ba megabaru ya tšhelete ba be ba direla go ikhola ka noši. Ba be ba nyaka tšhelete ya ditirelo tše bonolo-nolo tša tempele, tše swanago le go tswalela mejako goba go gotša mello ya aletara. Ga go makatše ge ‘Jehofa a sa ka a kgahlišwa ke dibego tše di tšwago diatleng tša bona’!

○ 1:13—Baperisita bao ba se nago tumelo ba ile ba lebelela dihlabelo e le tirelo e lapišago, e le morwalo. Ba ile ba sola, goba go kwera dilo tše kgethwa tša Jehofa. Le ka mohla ga se ra swanela go dumelela gore ‘dibego tša melomo’ ya rena di neelwe feela ka tlwaelo!—Hosea 14:3; Ba-Hebere 13:15.

○ 2:13—Banna ba bantši ba ba-Juda ba be ba hlala basadi ba bofsa bja bona, mo gongwe e le gore ba nyale basadi ba bafsa ba baheitene. Aletare ya Jehofa e ile ya khupetšwa ke megokgo—go molaleng gore ke ya basadi bao ba lahlilwego bao ba tlilego sekgethwa-kgethweng go tšhollela manyami a bona pele ga Modimo.—Maleaki 2:11, 14, 16.

○ 3:1—“Morena wa therešo” (NW) ke Jehofa Modimo, gomme “motseta wa kxwêrano” ke Jesu Kriste. Phethagalo ya mathomo ya boporofeta e diregile nakong ya ge Jesu a hlwekiša tempele. (Mareka 11:15-17) Ye e bile nywaga e meraro le seripa ka morago ga go tlotšwa ga gagwe e le Kgoši e Kgethilwego. Ka mo go swanago, nywaga e meraro le seripa ka morago ga ge Jesu a beilwe sedulong sa bogoši e le Kgoši lehlabuleng la 1914, o ile a ya le Jehofa tempeleng ya moya gomme a hwetša batho ba Modimo ba nyaka go sekišwa le go hlwekišwa.

○ 3:2, 3—Modiro wa bogologolo wa go hlwekiša o tšere nako e telele. Ka gona, gantši mosekiši o be a ka “dula,” a letile go fihlela ge seela se bonala bjalo ka seiponi se se phadimišitšwego gabotse, gomme a kgona go ipona go sona. Ka mo go swanago, Jehofa o tšwetše pele go sekiša batho ba gagwe lehono, a tloša dithuto le mediro e sa hlwekago. Se se ba thušitše go tšweletša seswantšho sa gagwe gabotse-botse.—Ba-Efeso 5:1.

○ 4:2—Ye ke tlhaloso ya ditšhegofatšo tša nakong e tlago tšeo di tlago go thabelwa ke bao ba boifago leina la Modimo. Ba na le kholofelo ya go orela seetša sa letšatši sa go amogelwa ke Modimo ge malwetši a mmele, monagano le maikwelo ao a bego a tlaiša lapa la motho a fodišitšwe.—Kutollo 21:3, 4.

○ 4:5—Moporofeta Eliya o phetše nywageng e 500 pele ga ge boporofeta bjo bo ka newa. Lekgolong la nywaga la pele C.E., Jesu Kriste o hlaotše Johane Mokolobetši e le yo a boletšwego e sa le pele e le yo a swanago le Eliya. (Mateo 11:12-14; Mareka 9:11-13) Lega go le bjalo, “Eliya” e be e swanetše go ba ketapele ya “’tšatši. . . la Morêna,” go bontšha phethagalo e tšwelago pele mehleng ye ya “go ba gona” ga Kriste.—2 Ba-Thesalonika 2:1, 2, NW.

[Seswantšho go letlakala 31]

Nakong ya bodiredi bja gagwe bja lefaseng, Jesu o ile a hlwekiša tempele. Ka 1918 a ya le Jehofa tempeleng ya moya go ya go hlwekiša batho ba Modimo