“Eba Molatedi wa ka”—Jesu o be a Bolela Eng?

1, 2. Ke taletšo efe yeo e di phalago ka moka yeo motho a ka e hwetšago, gona re ka ipotšiša potšišo efe?

KE TALETŠO efe yeo e di phalago ka moka yeo o kilego wa e hwetša? O ka nagana ka nako yeo o bego o laleditšwe tiragalong ya bohlokwa, mohlomongwe monyanyeng wa batho ba babedi bao o ba ratago kudu. Goba o ka gopola letšatši leo o bego o laleditšwe go dira mošomo wa bohlokwa. Ge e ba o kile wa hwetša ditaletšo tše bjalo, ga go pelaelo gore o be o thabetše kudu go di hwetša e bile o ikwa o hlomphilwe. Lega go le bjalo, therešo ke gore o hweditše taletšo yeo e di phalago ka moka. Yo mongwe le yo mongwe wa rena o hweditše taletšo yeo. Ka gona tsela yeo re kgethago go arabela taletšong yeo e re kgoma kudu. Ke kgetho ya bohlokwa kudu yeo re ka e dirago bophelong.

² Taletšo yeo ke efe? E tšwa go Jesu Kriste, e lego Morwa yo a tswetšwego a nnoši wa Modimo Ramatlaohle Jehofa, gomme e hwetšwa ka Beibeleng. Go Mareka 10:21, re bala mantšu a Jesu ao a rego: ‘Tlaa o be molatedi wa ka.’ Ge e le gabotse, yeo ke taletšo ya Jesu go yo mongwe le yo mongwe wa rena. Re dira gabotse go ipotšiša gore: ‘Ke tla arabela bjang?’ Karabo e ka bonagala e le molaleng. Ke mang yo a ka ganago taletšo e kgahlišago ka tsela ye? Se se makatšago ke gore batho ba bantši ba a e gana. Ka baka la’ng?

3, 4. (a) Ke’ng seo se ka bonagalago se kganyogega ka monna yo a ilego a batamela Jesu go mmotšiša ka bophelo bjo bo sa felego? (b) Go ka direga gore Jesu o bone dika dife tše dibotse go mmuši yo yo mofsa wa mohumi?

³ Ela hloko mohlala wa monna yo a ilego a hwetša taletšo yeo ka go lebanya go tšwa go Jesu nywageng e 2 000 e fetilego. E be e le monna yo a bego a hlompšha kudu. Bonyenyane o be a na le dilo tše tharo tšeo batho ba di lebelelago di ratega e bile di kganyogega—bofsa, mahumo le matla a go laola. Pego ya Beibele e mo hlalosa e le “lesogana,” a “humile kudu” gomme e le “mmuši.” (Mateo 19:20; Luka 18:18, 23) Lega go le bjalo, go be go na le selo sa bohlokwa kudu ka lesogana le. Le be le kwele ka Morutiši yo Mogolo e lego Jesu, gomme le be le ratile seo le bego le se kwele.

⁴ Babuši ba bantši mehleng yeo ba paletšwe ke go nea Jesu tlhompho yeo e bego e mo swanetše. (Johane 7:48; 12:42) Eupša mmuši yo o ile a dira dilo ka mo go fapanego. Beibele e re botša gore: “Ge [Jesu] a be a le tseleng a sepela, monna yo mongwe a mo kitimela a fihla a wa ka matolo pele ga gagwe ke moka a mmotšiša a re: ‘Morutiši yo Botse, ke swanetše go dira’ng gore ke je bohwa bja bophelo bjo bo sa felego?’” (Mareka 10:17) Ela hloko kamoo monna yoo a bego a fagahlela ka gona go bolela le Jesu, a mo kitimela phatlalatša go etša ge motho le ge e le ofe yo a diilago le wa maemo a fase a bego a ka dira. Go oketša moo, o ile a khunama ka tlhompho pele ga Kriste. Ka go re’alo o be a na le tekanyo e itšego ya boikokobetšo e bile a lemoga gore o nyaka dilo tša moya. Jesu o be a tšeela godimo dika tše bjalo tše dibotse. (Mateo 5:3; 18:4) Ka gona, ga go makatše gore ge “Jesu a mo lebelela, [o ile] a kwa a mo rata.” (Mareka 10:21) Jesu o ile a araba potšišo ya lesogana leo bjang?

Taletšo ya Bohlokwa Kudu

5. Jesu o ile a araba lesogana la mohumi bjang, le gona re tseba bjang gore “selo setee” seo se bego se hlaela go lona e be e se gore le diile? (Bona le mongwalo wa ka tlase.)

⁵ Jesu o ile a bontšha gore Tatagwe o be a šetše a mo neile tsebišo potšišong ya bohlokwa ya mabapi le go hwetša bophelo bjo bo sa felego. O ile a lebiša lesogana leo Mangwalong, gomme le ile la dumela gore le be le latela Molao wa Moshe ka potego. Lega go le bjalo, Jesu ka temogo ya gagwe e makatšago o ile a bona seo se tlogago se le ka gare ga lesogana leo. (Johane 2:25) O ile a lemoga gore mmuši yo o be a na le bothata bjo bogolo bjo bo bego bo kgoma tswalano ya gagwe le Modimo. Ka gona, Jesu o ile a re: “Go na le selo setee se se hlaelelago go wena.” ‘Selo seo setee’ e be e le eng? Jesu o itše: “Sepela o yo rekiša dilo tše o nago le tšona o nee badiidi.” (Mareka 10:21) Na Jesu o be a bolela gore motho o swanetše go hloka sente ya lešidi e le gore a ka hlankela Modimo? Aowa.a Kriste o be a utolla selo sa bohlokwa kudu.

6. Jesu o ile a ntšha taletšo efe, gona karabelo ya mmuši yo mofsa wa mohumi e ile ya utolla’ng ka pelo ya gagwe?

⁶ Ge a mo utollela seo se bego se hlaela, Jesu o ile a bulela monna yo sebaka se sebotse ka go mmotša gore: ‘Tlaa o be molatedi wa ka.’ Nagana feela—Morwa wa Modimo yo Godimodimo o laleditše monna yoo ka nama gore a mo latele! Jesu o ile a boela a mo holofetša moputso o kgahlišago woo motho a bego a ka se tsoge a o naganne. O itše: “O tla ba le letlotlo legodimong.” Na mmuši yo yo mofsa wa mohumi o ile a amogela le semeetseng taletšo ye e kgahlišago e le ruri? Pego e balega ka gore: “[O ile] a nyamišwa ke karabo yeo gomme a sepela a kwele bohloko, gobane o be a na le dilo tše dintši.” (Mareka 10:21, 22) Ka go re’alo mantšu a Jesu ao a bego a se a letelwa a ile a utolla bothata ka pelong ya monna yo. O be a rata mahumo a gagwe kudu, gomme ga go pelaelo gore o be a rata matla le maemo tšeo di bego di tlišwa ke wona. Ka manyami, lerato la gagwe la go rata dilo tše bjalo e be e le le matla kudu go feta lerato le ge e le lefe leo a bego a na le lona ka Kriste. “Selo setee” seo se bego se hlaela ka nako yeo, e be e le lerato leo le tšwago pelong le la boikgafo ka Jesu le Jehofa. Ka ge lesogana leo le be se na lerato le bjalo, le ile la gana taletšo ya bohlokwa kudu! Lega go le bjalo, taletšo yeo e go kgoma bjang?

7. Ke ka baka la’ng re ka kgonthišega gore taletšo ya Jesu e akaretša rena lehono?

⁷ Taletšo ya Jesu ga se ya felela feela go monna yo goba ya lekanyetšwa feela bathong ba mmalwa. Jesu o itše: “Ge e ba motho le ge e le ofe a nyaka go ntšhala morago, . . . a ntatele ka go se kgaotše.” (Luka 9:23) Ela hloko gore “motho le ge e le ofe” a ka fetoga molatedi wa Kriste ge e ba a tloga “a nyaka.” Modimo o gogela batho ba bjalo ba dipelo tše di lokilego go Morwa wa gagwe. (Johane 6:44) Ga se bahumi feela goba badiidi feela, ga se feela ba morafo goba setšhaba se itšego, gomme ga se feela bao ba phetšego nakong e fetilego bao ba buletšwego ke sebaka sa go amogela taletšo ya Jesu, eupša ke batho ka moka. Ka gona mantšu a Jesu ao a rego: ‘Tlaa o be molatedi wa ka,’ a tloga a šoma le go wena. Ke ka baka la’ng o swanetše go nyaka go ba molatedi wa Kriste? Le gona seo se akaretša’ng?

Ke ka Baka La’ng o Swanetše go ba Molatedi wa Kriste?

8. Batho ka moka ba na le senyakwa sefe, gona ka baka la’ng?

⁸ Therešo yeo re swanetšego go e amogela še: Re tloga re nyaka boetapele bjo bobotse. Ga se batho ka moka bao ba amogelago seo, eupša se se šalago ke gore go bjalo. Moporofeta wa Jehofa e lego Jeremia o ile a budulelwa go ngwala therešo ye yeo e ka se fetogego: “Ke tseba gabotse, wena Jehofa, gore tsela ya motho ga e matleng a gagwe. Ga go matleng a motho yo a sepelago gore a laole dikgato tša gagwe.” (Jeremia 10:23) Batho ga ba na bokgoni goba tshwanelo ya go ipuša. Therešo ke gore histori ya batho e tletše ka pego ya boetapele bjo bobe. (Mmoledi 8:9) Mehleng ya Jesu, baetapele ba be ba gatelela batho, ba ba tlaiša e bile ba ba timetša. Jesu o ile a lemoga gabotse gore batho ba tlwaelegilego ba be ba le “bjalo ka dinku tše di se nago modiši.” (Mareka 6:34) Seo ke therešo le ka batho lehono. Re le sehlopha goba re le motho ka o tee ka o tee, re nyaka boetapele bjo re ka bo botago le go bo hlompha. Na Jesu o kgotsofatša senyakwa seo? Ela hloko mabaka a mmalwa ao karabo e lego ee.

9. Ke’ng seo se dirago gore Jesu a fapane le baetapele ba bangwe ka moka?

⁹ Lebaka la pele ke gore Jesu o be a kgethilwe ke Jehofa Modimo. Baetapele ba bantši ba batho ba kgethilwe ke batho bao ba swanago le bona bao ba sego ba phethagala, bao gantši ba forilwego e bile ba ahlolago gampe. Jesu ke moetapele yo a fapanego. Sereto sa gagwe ka bosona se re botša seo. Lentšu “Kriste,” go swana le lentšu “Mesia,” le bolela gore “Motlotšwa.” Ee, Jesu o tloditšwe, goba o kgethilwe ka go lebanya go ba maemong a gagwe a makgethwa, o kgethilwe ke Mmuši Morena wa legohle ka boyena. Jehofa Modimo o boletše ka Morwa wa gagwe gore: “Bonang! Mohlanka wa ka yo ke mo kgethilego, moratwa wa ka, yo moya wa ka o mo amogetšego! Ke tla bea moya wa ka godimo ga gagwe.” (Mateo 12:18) Ga go na motho yo a tsebago gakaone go feta Mmopi wa rena gore re nyaka moetapele wa mohuta mang. Bohlale bja Jehofa ga se bja lekanyetšwa, ka gona re na le lebaka le le kwagalago la go bota kgetho ya gagwe.—Diema 3:5, 6.

10. Ke ka baka la’ng mohlala wa Jesu e le o mobotse kudu bakeng sa gore batho ba o latele?

¹⁰ Lebaka la bobedi ke gore Jesu o re beetše mohlala o phethagetšego le o re šušumetšago. Moetapele yo mobotse o na le dika tšeo balata ba gagwe ba di tšeelago godimo le go di ekiša. O buša ka go bea mohlala, a šušumeletša ba bangwe go ba batho ba bakaone. Ke dika dife tšeo o ka di tšeelago godimo kudu go moetapele? Sebete? Bohlale? Kwelobohloko? Go thwe’ng ka kgotlelelo ge a lebeletšane le mathata? Ge o dutše o ithuta pego ya bophelo bja Jesu mo lefaseng, o tla hwetša gore o be a na le dika tšeo—le tše dingwe tše dintši. Ka ge e le seswantšho se se phethagetšego sa Tatagwe wa legodimong, Jesu o be a na le dika ka moka tša Modimo ka botlalo. E be e tloga e le motho yo a phethagetšego dikarolong ka moka. Ka go re’alo selong se sengwe le se sengwe seo a se dirilego, lentšung le lengwe le le lengwe leo a le boletšego, maikwelong le ge e le afe a ka gare ao a a utolotšego, re hwetša selo seo se swanelwago ke go ekišwa. Beibele e re o re beetše “mohlala gore [re] latele dikgato tša gagwe kgauswi.”—1 Petro 2:21.

11. Jesu o hlatsetše bjang gore ke “modiši yo boleta”?

¹¹ Lebaka la boraro ke gore Kriste o pheletše ka botlalo seo a bego a se bolela ge a re: “Ke nna modiši yo boleta.” (Johane 10:14) Seka seo sa polelo se be se tlwaelegile kudu bathong ba mehleng ya Beibele. Badiši ba be ba šoma ka thata go hlokomela dinku. “Modiši yo boleta” o be a kgonthišetša gore tšhireletšego le polokego ya mohlape di tla pele. Ka mohlala, rakgolokhukhu wa Jesu e lego Dafida, e be e le modiši ge e be e sa le yo mofsa gomme mabakeng a mmalwa o ile a bea bophelo bja gagwe kotsing ge a be a elwa le phoofolo e šoro kudu yeo e bego e hlasela dinku tša gagwe. (1 Samuele 17:34-36) Jesu o diretše balatedi ba gagwe se se fetago seo. O ile a ba hwela. (Johane 10:15) Ke baetapele ba bakae bao ba nago le moya o bjalo wa boikgafo?

12, 13. (a) Modiši o tseba dinku tša gagwe ka kgopolo efe, le gona dinku di mo tseba ka tsela efe? (b) Ke ka baka la’ng o nyaka go ba ka tlase ga boetapele bja Modiši yo Boleta?

¹² Jesu e be le “modiši yo boleta” ka kgopolo e nngwe gape. O itše: “Ke tseba dinku tša ka le dinku tša ka di a ntseba.” (Johane 10:14) Naganišiša ka papišo ye ya Jesu. Go motho yo a sego šedi, mohlape wa dinku o ka bonagala e le sehlopha feela sa diruiwa tšeo di tletšego boya. Lega go le bjalo, modiši wa tšona o tseba nku e nngwe le e nngwe. O tseba gore ke dinku dife tšeo di tlago go nyaka thušo ya gagwe ge di tswala, le gore ke dikwana dife tšeo di sa dutšego di nyaka gore a di rwale ka ge e sa le tše dinyenyane kudu e bile di sa kgone go sepela monabo o motelele ka botšona, le gore ke dinku dife tšeo di sa tšwago go babja goba go gobala. Dinku le tšona di tseba modiši wa tšona. Di tseba lentšu la gagwe, e bile di ka se le tswalanye ka phošo le la modiši le ge e le ofe. Ge di ekwa gore modiši o di lemoša ka kotsi e tlago goba di ekwa a di bitša ka go akgofa, di arabela kapejana. Mo a di išago gona di a mo latela. Le gona o tseba moo a swanetšego go di iša gona. O tseba moo bjang e lego bjo bobotse le bjo botala gona, moo meetse e lego a hlwekilego le ao a sekilego le moo mafulo e lego a šireletšegilego. Ge a di hlokometše, dinku di ikwa di šireletšegile.—Psalme 23.

¹³ Na ga o fagahlele boetapele bjo bjalo? Modiši yo Boleta o na le pego yeo e sa bapišwego le selo ya go swara balatedi ba gagwe ka yona tsela yeo. O holofetša go go hlahla le go go iša bophelong bjo bo thabišago le bjo bo kgotsofatšago gona bjale le go iša bokamosong bja ka mo go sa felego! (Johane 10:10, 11; Kutollo 7:16, 17) Ka baka leo, re swanetše go tseba seo se akaretšwago ke go latela Kriste.

Seo se Bolelwago ke go ba Molatedi wa Kriste

14, 15. E le gore o swanelege go ba molatedi wa Kriste, ke ka baka la’ng go se gwa lekana go fo ipolela gore o Mokriste goba go fo bolela gore o rata Jesu ka moya ka moka?

¹⁴ Batho ba dimilione tše makgolo lehono ba nagana gore ba amogetše taletšo ya Kriste. Ge e le gabotse, ba kgethile go ipitša Bakriste. Mohlomongwe ba tsena kereke yeo batswadi ba bona ba ba kolobeditšego go yona. Goba ba ka fo bolela gore ba rata Jesu ka moya wa bona ka moka gomme ba mo amogela e le yena Mophološi wa bona. Eupša na seo se ba dira balatedi ba Kriste? Na se ke seo Kriste a bego a se naganne ge a be a re laletša gore re be balatedi ba gagwe? Go ba molatedi wa Kriste go akaretša se se fetago seo.

¹⁵ Ela hloko lefase la Bojakane—ditšhabeng tšeo batho ba bantši ba ipolelago gore ke balatedi ba Kriste. Na Bojakane bo bontšha gore bo latela dithuto tša Jesu Kriste? Goba na ga re bone dinageng tšeo go tletše lehloyo, kgatelelo, bosenyi le go hloka toka tšeo di bonagalago lefaseng ka bophara? Moetapele yo a hlompšago wa Mohindu e lego Mohandas Gandhi o kile a bolela gore: “Ga go na motho yo ke mo tsebago yo a diretšego batho dilo tše dintši go feta Jesu. Ge e le gabotse, ga go na phošo ka Bokriste.” O okeditše ka gore: “Bothata bo na le lena Bakriste. Ga le phelele dithuto tša lena.”

16, 17. Gantši ke’ng seo se hlaelago gare ga bao ba ipolelago gore ke Bakriste, gona ke’ng seo se hlaolago balatedi ba kgonthe ba Kriste?

¹⁶ Jesu o boletše gore balatedi ba gagwe ba therešo ba ka se tsebje feela ka mantšu a bona goba ka seo ba ipitšago sona eupša sa bohlokwa kudu ke gore ba tla tsebja ka ditiro tša bona. Ka mohlala, o itše: “Ga se yo mongwe le yo mongwe yo a rego go nna: ‘Morena, Morena,’ a tlago go tsena Mmušong wa magodimo, eupša go tla tsena yo a dirago thato ya Tate yo a lego magodimong.” (Mateo 7:21) Ke ka baka la’ng batho ba bantši bao ba bolelago gore Jesu ke Morena wa bona ba palelwa ke go dira thato ya Tatagwe? Gopola mmuši yola yo mofsa wa mohumi. Gantši go na le “selo setee” seo se hlaelago gare ga bao ba ipolelago gore ke Bakriste—go rata Jesu ka pelo ka moka le Yo a mo romilego.

¹⁷ Seo se bjalo bjang? Na dimilione tša batho bao ba ipitšago Bakriste ga di bolele gore di rata Kriste? Ka ntle le pelaelo di bolela bjalo. Eupša go rata Jesu le Jehofa go akaretša seo se fetago go fo bolela ka mantšu. Jesu o boletše gore: “Ge e ba motho le ge e le ofe a nthata, o tla boloka lentšu la ka.” (Johane 14:23) Le gona ge a bolela bjalo ka modiši o itše: “Dinku tša ka di theetša lentšu la ka e bile ke a di tseba gomme di a ntatela.” (Johane 10:27) Ee, teko e kgolo ya lerato la rena go Kriste ga e fo bonagala mantšung a rena goba maikwelong eupša e bonagala kudu ditirong tša rena.

18, 19. (a) Go ithuta ga rena ka Jesu go swanetše go re kgoma bjang? (b) Morero wa puku ye ke ofe, gona e tla hola bjang bao e lego kgale ba itebelela e le balatedi ba Kriste?

¹⁸ Lega go le bjalo, ditiro tša rena di swanetše go ba le moo di theilwego gona. Di bontšha motho yo re tlogago re le yena ka gare. Mošomo wa rena o swanetše go thoma moo. Jesu o boletše gore: “Se se bolela bophelo bjo bo sa felego, gore ba tsebe wena Modimo a nnoši wa therešo le yo o mo romilego, Jesu Kriste.” (Johane 17:3) Ge e ba re bala le go naganišiša ka tsebo e nepagetšego ka Jesu, gona dipelo tša rena di tla kgomega. Re tla mo rata kudu le go feta gomme ra godiša kganyogo e kgolo ya go mo latela letšatši le lengwe le le lengwe.

¹⁹ Morero wa puku ye ke go godiša kganyogo ya go latela Jesu. Morero wa yona ga se go fo re nea kakaretšo ya bophelo le bodiredi bja Jesu, eupša ke go re thuša go bona gabotse kamoo re ka mo latelago ka gona.b E diretšwe go re thuša go itebelela re diriša seipone sa Mangwalo le go ipotšiša gore: ‘Na ruri ke latela Jesu?’ (Jakobo 1:23-25) Mohlomongwe ke kgale o itebelela o le nku yeo e hlahlwago ke Modiši yo Boleta. Lega go le bjalo, na ga o dumele gore re ka dula re hwetša ditsela tša go kaonefatša? Beibele e re kgothaletša gore: “Dulang le itekola go bona ge e ba le sa le tumelong, dulang le itlhatsela seo lena ka noši le lego sona.” (2 Bakorinthe 13:5) Ke gabohlokwa kudu go kgonthišetša gore ruri re hlahlwa ke Modiši wa rena yo Boleta le yo lerato e lego Jesu, yena yo Jehofa a mo kgethilego ka noši gore a re hlahle.

20. Re tla ahlaahla’ng kgaolong e latelago?

²⁰ Anke go ithuta ga gago puku ye go go thuše go matlafatša lerato la gago la go rata Jesu le Jehofa. Ge lerato le bjalo le dutše le go hlahla bophelong, o tla hwetša tekanyo e kgolo kudu ya khutšo le kgotsofalo tšeo motho a ka di hwetšago lefaseng le, gomme o tla phelela go tumiša Jehofa ka mo go sa felego ka ge a re neile Modiši yo Boleta. Go ba gona, go ithuta ga rena ka Kriste go swanetše go thewa motheong o nepagetšego. Ka baka leo, ke mo go swanetšego gore go Kgaolo 2 re ahlaahle karolo ya Jesu morerong wa Jehofa legohleng.