Ke ka Baka La’ng o Swanetše go Rata wa Geno?

BOPHELO bjo sa felego bo ithekgile ka lerato la rena la go rata Modimo le wa gabo rena. Ntlha yeo e ile ya bolelwa nakong ya poledišano yeo e bilego gona mo e nyakilego e ka ba nywaga e 2 000 e fetilego.

Monna yo a nago le tsebo ka Molao wa Moše o botšišitše Jesu Kriste gore: “Bophelô byo bo sa felexo ke tlo bo rua xe ke dira’ng?” Jesu o ile a fetola ka gore: “Xo ngwadilwe’ng Molaong? O bala’ng?” Ge a tsopola Molao, monna o itše: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka matla a xaxo ka moka, le ka thlaoloxanyô ya xaxo ka moka, le wa xeno O mo ratê ka mokxwa wo O ithataxo ka wôna.” Jesu a re: “O fetotše ka xôna, dira seo, ké mo O tl’o xo phela.”—Luka 10:25-28.

Ge a e-kwa a rialo, mmotšiši wa Jesu o ile a botšiša ka gore: “Xomme wa xešo ké mang?” Go e na le go araba ka go lebanya, Jesu o ile a araba ka kanegelo ya go swantšhetša ka monna wa mo-Juda yo a ilego a hlakolwa, a bethwa, gomme a tlogelwa a idibetše. Gwa tšwelela ba-Juda ba babedi—wa pele e le moperisita a latelwa ke mo-Lefi. Ka bobedi bja bona ba ile ba bona boemo bja mo-Juda wa gabo bona eupja ga ba ka ba dira selo go mo thuša. Ka morago go ile gwa tla mo-Samaria. Ka go tutuetšwa ke kwelobohloko a tlema dintho tša mo-Juda yo a gobaditšwego, a mo iša ngwakong wa baeti gomme a mo nea tlhokomelo e oketšegilego.

Jesu o ile a botšiša mmotšiši wa gagwe ka gore: “Byale xe O bôna, xo ba bararo bao ké ofe a tlilexo a ba wa xabô-eo wa xo wêla xare xa bahlakodi?” Go molaleng gore, e bile mo-Samaria wa kgaugelo. Ka gona Jesu o bontšhitše gore lerato la kgonthe la go rata wa gabo motho le tshela mellwane ya merafo.—Luka 10:29-37.

Go Hloka Lerato la go Rata wa Geno

Lehono go na le lehloyo le le golago magareng ga batho ba dihlopha tša merafo e fapanego. Ka mohlala, ma-Nazi a mehleng yeno kua Jeremane morago bjale a ile a wišetša monna fase gomme ba mo gataka ka dieta tša bona tše boima, ba roba mo e nyakilego e e ba dikgopo tša gagwe ka moka. Ba ile ba mo tšhela ka bjala bjo bogale gomme ba mo tšhuma ka mollo. Monna yo a bego a tlogetšwe gore a hwe o ile a hlaselwa ka ge go be go naganwa gore ke mo-Juda. Tiragalong e nngwe, ntlo e nngwe kgaufsi le Hamburg e ile ya tšhungwa ka pomo, gwa swa batho ba bararo ba e lego ma-Turkey ka setlogo go fihla ba e-hwa—o mongwe wa bona e be e le ngwanenyana wa nywaga e lesome.

Ka gona, kua dinageng tša pheninsuleng ya Balkan le bohlabela bja kgole, dintwa tša bomorafe di be di bolaya ba dikete. Ba bangwe ba hwile dintweng tše di lego magareng ga batho ba ditšo tše fapanego kua Bangladesh, India le Pakistan. Mo Afrika, dintwa tša ditšhaba le merafo e fapa-fapanego di bolaile maphelo a ba bangwe gape.

Batho ba bantši ba tšhošwa ke bošoro bjo bjalo gomme ba ka se sa dira selo go gobatša magagabo bona. Ge e le gabotse, dipontšho tše dikgolo kua Jeremane di tšwile bošoro bja bomorafo. Lega go le bjalo, The New Encyclopædia Britannica e re: “Ditho tša mo e nyakilego go ba ditšo tša lefase ka moka di lebelela tsela ya tšona ka noši ya go phela e le e phagametšego gaešita le ya magagabo bona a tswalanego le bona kgaufsi.” Dipono tše bjalo di thibela lerato la go rata wa gabo motho. Na go ka dirwa se sengwe mabapi le se, kudu-kudu ka ge Jesu a boletše gore bophelo bo ithekgile ka lerato la go rata Modimo le wa gabo motho?

[Picture Credit Line on page 2]

Cover: Jules Pelcog/Die Heilige Schrift

[Picture Credit Line on page 3]

The Good Samaritan/The Doré Bible Illustrations/Dover Publications, Inc.