Dithuto Mabapi le go Amogela Baeng le Thapelo

Moeding wa ka bohlabela wa Thaba ya Mehlware, mo e ka bago monabo wa dikhilomithara tše tharo go tšwa Jerusalema, go na le motse wa Bethania. (Johane 11:18) Jesu o ya moo gomme o tsena ntlong yeo go nago le bana ba motho ba babedi e lego Mareta le Maria. Bona le kgaetšedi ya bona e lego Latsaro, ke bagwera ba Jesu gomme ba mo amogela ka borutho.

Ba tšea go etelwa ke Mesia e le tokelo. Mareta o ikemišeditše go hlokomela Jesu gabotse, ka gona o thoma go apea dijo tše dintši kudu. Ge Mareta a le gare a šoma, ngwanabo e lego Maria, o dula dinaong tša Jesu gomme a mo theetša. Ge nako e dutše e eya, Mareta o re go Jesu: “Morena, na ga o na taba ge ngwanešo a ntlogetše ke dira dilo ke nnoši? Ka gona, mmotše gore a nthuše.”—Luka 10:40.

Go e na le go sola Maria, Jesu o kgala Mareta ka baka la go tshwenyega kudu ka dilo tša nama, o re: “Mareta, Mareta, o belaela le go tshwenyega ka dilo tše dintši. Lega go le bjalo, go nyakega dilo tše sego kae goba selo setee feela. Maria yena o kgethile kabelo e botse gomme a ka se ke a e amogwa.” (Luka 10:41, 42) Ee, Jesu o bolela gore ga go nyakege gore go fetšwe nako e ntši go apewa dijo tše di fapafapanego. Dijo tše bonolo di lokile.

Maikemišetšo a Mareta ke a mabotse. O nyaka go ba yo a amogelago baeng. Eupša go tshwenyega kudu ga gagwe ka dijo go bolela gore o lahlegelwa ke thuto e bohlokwa e tšwago go Morwa wa Modimo! Jesu o gatelela gore Maria o dirile kgetho e bohlale, yeo e tlago go dula e mo hola gotee le thuto yeo ka moka ga rena re swanetšego go e gopola.

Lebakeng le lengwe, Jesu o nea thuto e fapanego eupša yeo le yona e lego bohlokwa. Morutiwa yo mongwe o a mmotšiša o re: “Morena, re rute go rapela go etša ge Johane le yena a ile a ruta barutiwa ba gagwe.” (Luka 11:1) Jesu o be a šetše a ile a ba ruta mo e ka bago ngwaga le seripa pejana Thutong ya gagwe ya Thabeng. (Mateo 6:9-13) Lega go le bjalo, morutiwa yo a ka ba a be a se gona nakong yeo, ka gona Jesu o boeletša dintlha tša motheo. Ke moka o bolela ka seswantšho go gatelela go nyakega ga go phegelela thapelong.

O re: “A re re yo mongwe wa lena o na le mogwera gomme a ya go yena bošegogare, a re go yena: ‘Mogweraka, nkadime dinkgwa tše tharo, gobane mogweraka yo mongwe o sa tšwa go fihla go nna a le leetong gomme ga ke na seo nka mo neago sona.’ Eupša yoo a araba a le ka gare a re: ‘Lesa go ntshwenya. Mojako o šetše o notletšwe gomme bana ba ka ba na le nna malaong; nka se ke ka tsoga ka go nea selo.’ Ke a le botša ke re: Gaešita le ge a ka se ke a tsoga a mo nea se sengwe gobane e le mogwera wa gagwe, ruri ka baka la go phegelela ga gagwe ka sebete o tla tsoga a mo nea dilo le ge e le dife tšeo a di nyakago.”—Luka 11:5-8.

Jesu ga a bolele gore Jehofa ga a nyake go arabela dikgopelo tša rena, go swana le mogwera yo. Go e na le moo, o bontšha gore ge e ba mogwera yo a sa nyakego a kgona go arabela dikgopelong tša motho yo a phegelelago, ga go pelaelo gore Tatago rena yo lerato wa legodimong o tla arabela dikgopelong tša kgonthe tša bahlanka ba gagwe ba botegago! Jesu o tšwela pele ka gore: “Ke re go lena: Tšwelang pele le kgopela gomme le tla newa; tšwelang pele le tsoma gomme le tla hwetša; tšwelang pele le kokota gomme le tla bulelwa. Gobane yo mongwe le yo mongwe yo a kgopelago o a amogela, gomme yo mongwe le yo mongwe yo a tsomago o a hwetša, le yo mongwe le yo mongwe yo a kokotago o tla bulelwa.”—Luka 11:9, 10.

Ke moka Jesu o gatelela ntlha ya gagwe ka go bapiša ka botate bao e lego batho, o re: “Ke tate ofe mo gare ga lena yo e ka rego ge morwa wa gagwe a kgopela hlapi, yena a mo nea noga go e na le hlapi? Goba ge e ba a bile a kgopela lee, a ka mo neago phepheng? Ka gona, ge e ba lena gaešita le ge le le kgopo le tseba go nea bana ba lena dimpho tše dibotse, gona Tate yo a lego legodimong o tla nea gakaakang moya o mokgethwa go bao ba mo kgopelago!” (Luka 11:11-13) A kgothatšo e botse gakaakaang ya gore Tatago rena o ikemišeditše go re kwa le go arabela dinyakweng tša rena!