Bophelo le Bodiredi bja Jesu

Keletšo go Mareta le Thuto Mabapi le Thapelo

JESU nakong ya bodiredi bja gagwe kua Judea, o tsena motseng wa Bethania. Moo ke moo Mareta, Maria gotee le kgaetšedi ya bona Latsaro ba dulago gona. Jesu mo gongwe o ile a kopana le ba ba bararo mathomong a bodiredi bja gagwe gomme mo nakong ye e šetše e le bagwera ba bagolo. Lega go le bjalo, Jesu bjale o ya lapeng la Mareta gomme Mareta o a mo amogela.

Mareta o kganyoga go lokišeletša Jesu dilo tše kaone kudu tšeo a nago le tšona. E tloga e le tokelo e kgolo kudu gore motho a etelwe ke Mesia lapeng la gagwe! Ka gona Mareta o swarega kudu ka go lokišetša dijo tše bose kudu le go lokišetša dilo tše dingwe tše dintši tša go dira gore ketelo ya Jesu e be yeo e thabišago kudu.

Ka lehlakoreng le lengwe, Maria ngwanabo Mareta o dula fase maotong a Jesu gomme o a mo theetša. Ka morago ga nakwana, Mareta o a batamela gomme o re go Jesu: “Morêna, a xa O re selô xe ngwan’ešo a ntesa kè dira kè nnoši? A k’O mmotšê hlê a tlê a nthswarišê.”

Eupja Jesu o gana go botša Maria lege e ka ba eng. Go e na le seo, o eletša Mareta mabapi le go swarega kudu ka dilo tše bonagalago. O mo kgalemela ka botho ka gore, “Mareta! Mareta! O a belaêla, O itapiša ka tše ntši. Sa hlôkô ké se tee.” Jesu o bolela gore ga go nyakege go senya nako e ntši ka go lokiša disola tše dintši tša dijo. Disola tše sego kae feela goba gaešita le se tee se lekane.

Maikemišetšo a Mareta ke a mabotse; o nyaka go ba moamogedi yo mobotse wa baeng. Lega go le bjalo, ka baka la go hlokomela kudu ditokišeletšo tša dilo tše bonagalago, o lahlegelwa ke sebaka sa go amogela tayo e tšwago go Morwa wa Modimo! Ka gona Jesu o phetha ka gore: “Maria ó ikxethetše yôna kabêlô e botse, ye a ka se kexo a e amoxiwa.”

Ka morago lebakeng le lengwe, morutiwa o kgopela Jesu: “Morêna, re rutê xo rapêla, byalo ka Johane le yêna à rutile barutiwa ba xaxwe.” Mo gongwe morutiwa yo o be a se gona ka nako e ka bago ngwaga le seripa pelenyana ge Jesu a be a ruta thapelo ya mohlala Thutong ya gagwe ya Thabeng. Ka gona Jesu o bušeletša dithuto tša gagwe eupja o tšwela pele ka go nea seswantšho seo se gatelelago go nyakega ga go phegelela thapelong.

Jesu o thoma ka gore, “E ka re xe e mongwê wa lena à na le moxwêra, ’me a ya xo yêna è le mašexo-xare, a mo kxopêla a re: Moxwêr’a-ka! Nkadimê dinkxwa tše tharo; ke etetšwe ke moxwêra wa-ka wa moeti; ’me ke hlôka sa xo mo apeêla ka sôna. Wa ka ngwakong, a Le re a ka fetola a re: Lesa xo nthswenya; lemati le šetše le tswaletšwe; ’me bana ba-ka ba robetše dilaong le nna; xa ke kxône xo tsoxa ka Xo fa.—A a ka r’yalo? Nna ke re: Xe a sa tsoxe a mo fa ka xe e le moxwêr’axwe, ó tlo tsoxa, ’me tšohle tše a di nyakaxo ó tlo mo fa ka xe a mmobolêla.”

Jesu ka papišo ye ga a leke go hlalosa gore Jehofa Modimo ga a rate go araba dithapelo go swana le mogwera wa tabeng ya gagwe. Aowa, eupja o bontšha gore ge e ba mogwera yo a sa ratego go thuša a ka arabela ge a kgopelwa ka go phegelela, gona go thwe’ng ka Tatago rena yo lerato wa legodimong! Ka gona Jesu o tšwela pele: “Le Nna ke re: Kxopêlang, ké mo Le tl’o xo fiwa, nyakang, ké mo Le tl’o xo bôna; ôpa-ôpang, ké mo Le tl’o xo bulêlwa. Xobane e a kxopêlaxo ó tlo tšea; e a nyakaxo ô tlo bôna; e a ôpa-ôpaxo ó tlo bulêlwa.”

Jesu bjale o lebiša go bo-tate ba batho ba sa phethegago le ba nago le sebe ka gore: “Ké mang mo xo lena, yo e lexo tata xo ngwana, e rexo xe ngwana wa xaxwe a mo kxopêla boxôbê, a mo fe lebye? Xe a kxopêla sešeba, a mo fe nôxa bakeng sa hlapi? Xoba xe a kxopetše lee, a ka mo fa phepheng? Byale, xe ešita lena Le lexo ba babe, Lè tseba xo nea bana ba lena dineô tše botse, a Tata-weno wa maxodimong xa a Le fetiše kxolê? Ba ba Mo kxopêlaxo o ba nea Môya o mokxêthwa.” A kgothatšo e matla gakaakang yeo Jesu a e neago mabapi le go phegelela thapelong. Luka 10:38–11:13.

◆ Ke ka baka la’ng Mareta a direla Jesu ditokišetšo tše dintši gakaakaa?

◆ Maria o dira’ng, gomme ke ka baka la’ng Jesu a mo reta go e na le go reta Mareta?

◆ Ke’ng seo se ilego sa tutueletša Jesu gore a bušeletše dithuto tša gagwe mabapi le thapelo?

◆ Jesu o ile a bontšha bjang go nyakega ga go phegelela thapelong?