Dipotšišo tše Tšwago go Babadi

◼ Ke ka baka la’ng Jesu a ile a holofetša gore bao ba mo dumelago ‘ba ka se ke ba hwa le ka mohla,’ mola ge e le gabotse batheetši ba gagwe ka moka ba ile ba hwa?—Johane 11:25, 26.

Nakong ya ge Jesu a be a bolela ka go se hwe goba go phela ka mo go sa felego, ge e le gabotse o be a sa bolele gore batheetši ba gagwe morago kua ba be ba ka se ke ba hwa lehu la motho le ka mohla. Taba ya motheo yeo Jesu a bego a e gatelela e be e le gore go mo dumela go ka iša bophelong bjo bo sa felego.

Lebakeng le lengwe Jesu o ile a ipitša “boxôbê bya bophelô.” Ka morago a oketša ka gore: “Boxôbê šo-bo byo bo foloxaxo lexodimong, byo motho a bo jaxo a se hlwe a e-hwa. Boxôbê byoo bya xo phela, byo bo foloxilexo lexodimong, ké Nna. Xe motho a e-ja boxôbê byo bya-ka, o tlo phela xo ya xo ile.”—Johane 6:48-51.

Ge motho a hlahloba mantšu ao feela, mo gongwe o be a ka phetha ka gore Jesu o be a botša batheetši ba gagwe gore ba be ba tla phema go hwa. Lega go le bjalo, moko wa taba ga o thekge phetho yeo. Jesu o be a sa tšwa gore: “Thato ya Tate e a nthomilexo ke xore ke se lahle le o tee wa ba a nneilexo bona, bohle ke ba tsoše ka ’tšatši la mafelelo. . . . Mang le mang a bonaxo Morwa ’me a mo dumela, a be le bophelo byo bo sa felexo, ke mo tsoše ka ’tšatši la mafelelo. . . . Xa xo motho e a kxônaxo xo tla xo Nna, xe a sa xôxwe ke Tate e a nthomilexo; xomme ke Nna ke tl’o xo mo tsoša ka ’tšatši la mafelelo.” (Johane 6:39-44) Ka morago o ile a oketša ka gore: “E a naxo le bophelô byo bo sa felexo ke eo a jaxo nama ya-ka a nwa madi a-ka, ’me Nna ke tlo mo tsoša ka ’tšatši la mafelelo.” (Johane 6:54) Ka gona, kholofetšo ya Jesu ya ‘go phela ka mo go sa felego’ e be e ka se kwešišwe ka tshwanelo e le yeo e bolelago gore batheetši ba gagwe ba be ba ka se ke ba hwa le ka mohla.

E swana gabotse le kholofetšo e tsebjago kudu ya Jesu go Mareta: “Ke Nna tsoxô le bophelô. E a ntumetšexo o tlo phela le xe a ka hwa. Xomme e a phelaxo a ntumela, a ka se ke a ba a hwa xo iša xo sa felexo.” (Johane 11:25, 26) Ka mohlala, go molaleng gore Jesu o be a sa bolele gore baapostola ba botegago, le ka mohla ba be ba ka se hwe bjalo ka ge batho ba bangwe ba ile ba hwa. Mo e ka bago ka lebaka la ngwaga ba be ba tla tlotšwa ka moya o mokgethwa gomme ba be ba tla newa kholofelo ya go buša e le dikgoši legodimong. Gore ba amogele moputso woo, ba be ba tla swanelwa ke go hwa e le batho. (Ba-Roma 8:14-23; 1 Ba-Korinthe 15:36-50) Le gona ela hloko gore Jesu o be a itše: “E a ntumetšexo o tlo phela le xe a ka hwa.”

Kholofetšo ya Jesu e tla phethagala go bahlanka ba ineetšego ba Modimo bao ba ilego ba phela gomme ba hwa pele ga ge nako ya bophelo bjo sa felego e thoma go newa. Babotegi ba bjalo ba emetše tsogo ya nakong a tlago. Ka go dula ba botega ka morago ga ge ba tsošitšwe, le ka mohla ba ka se sa hlwa ba e-hwa “lehu la bobedi,” e lego lehu la ka mo go sa felego.—Kutollo 20:15; 21:8; Johane 8:51.

Eupja boporofeta bja Beibele bo bontšha gore rena lehono re na le sebaka se se kgethegilego. Bjalo ka ge re phela bofelong bja tshepedišo ye ya dilo, re ka phologa ‘masetlapelo a magolo’ a tlago gomme ra fetela lefaseng le lefsa. Ba bjalo ba nago le kholofelo ya bophelo bjo sa felego lefaseng la paradeise le bao ba dulago ba botegela Modimo ba ka se ke ba swanelwa ke go hwa lehu la motho le gatee. Ka morago ga go phologa ‘masetlapelo a magolo; ba tla lebišwa “didibeng tša meetse a bophelo.”—Kutollo 7:9-17.

[Seswantšho go letlakala 31]

Mantšu a Jesu go Maretha yo a nyamilego a re nea kholofelo ya bophelo bjo bo sa felego