“Seetša se Tlile Lefaseng”

“Kahlolô yôna šé: Seetša se tlile lefaseng; xomme batho ba rata lefsifsi xa-xolo, ba nyatša seetša.”​—JOHANE 3:19.

1. Ke ka baka la’ng o mongwe le o mongwe a swanetše go kgomega mabapi le kahlolo ya Modimo?

BATHO ba bantši lehono ga ba tshwenyege kudu ka kahlolo ya Modimo. Ba bangwe ba fo nagana gore Modimo o tla ba ahlola gabotse ge ba e-ya kerekeng ka mehla gomme ba sa gobatše magagabo bona. Go ba bantši dithuto tša Bojakane tšeo di lego mabapi le mollo wa dihele le pakatori di nyatšišitše kgopolo ka moka yeo e lego mabapi le kahlolo ya Modimo. Eupja go hlokomologa mo go hwetšwago ka gohle le maaka a Bojakane di ka se fetole therešo ya gore motho o mongwe le o mongwe mafelelong o tla ahlolwa ke Modimo. (Ba-Roma 14:​12; 2 Timotheo 4:1; Kutollo 20:​13) Go gontši go tla ithekga ka kahlolo ye. Bao ba ahlolwago gabotse ba tla hwetša mpho ya Modimo ya bophelo bjo bo sa felego, mola bao ba ahlolwago o šoro ba tla hwetša moputso o feletšego wa sebe: lehu.​—Ba-Roma 6:23.

2. Motheo wa kahlolo ya Modimo ke ofe?

² Ka gona, Bakriste ba kgonthe ba kgomega ka kahlolo ya Modimo, gomme ba tloga ba rata go mo kgahliša. Ba ka dira se bjang? Go Johane 3:​19, Jesu o re nea senotlolo. O re: “Kahlolô yôna šé: Seetša se tlile lefaseng; xomme batho ba rata lefsifsi xa-xolo, ba nyatša seetša xobane medirô ya bôná e le e mebe.” Ee, kahlolo ya Modimo e tla thewa tabeng ya ge e ba re rata seetša go e na le lefsifsi.

“Modimo ké Seetša”

3. Lefsifsi ke’ng, gomme seetša ke’ng?

³ Ka kgopolo ya moya lefsifsi le tswalana le go se tsebe le go hloka kholofelo mo go lego tikologong ya Sathane​—gaešita lege Sathane gantši a itira “Morongwa wa seetša.” (2 Ba-Korinthe 4:4; 11:​14; Ba-Efeso 6:​12) Ka lehlakoreng le lengwe, seetša se tswanala le kwešišo le go edišetšwa mo go tšwago go Jehofa Modimo. Paulo o boletše ka seetša ge a be a ngwala gore: “Xobane ké Yêna Modimo e a itšexo: Seetša a se bônêxê mo xo lexo lefsifsi. Ké Yêna a bonexetšexo dipelo tša rena, ya ba xo edišwa ka xo tseba letaxô la Modimo ka sefahloxô sa Jesu Kriste.” (2 Ba-Korinthe 4:6) Seetša sa moya se tswalanywa kgaufsi-ufsi le Jehofa Modimo moo moapostola Johane a ngwadilego gore: “Modimo ké Seetša.”​—1 Johane 1:5; Kutollo 22:5.

4. (a) Jehofa o dirile bjang gore seetša se be gona? (b) Re ka bontšha bjang lerato la go rata seetša?

⁴ Jehofa o dirile gore seetša se be gona ka lentšu la gagwe, leo lehono le lego gona ka bontši e le leo le ngwadilwego ka Beibeleng e Kgethwa. (Psalme 119:​105; 2 Petro 1:​19) Ka gona, mopsalme o be a tloga a bontšha lerato la gagwe la go rata seetša ge a be a ngwala gore: “Melaô ya xaxo ke e rata xakaka’ng! Ke eleletša yôna mehla yohle. Môya wa-ka o lôtôla mabohlatse a ’axo, ke a rata xa-xolo.” (Psalme 119:​97, 167) Na o rata seetša bjalo ka ge mopsalme a be a se rata? Na o bala Lentšu la Modimo ka mehla, wa naganišiša ka lona le go leka ka matla go diriša seo le se bolelago? (Psalme 1:​1-3) Ge e ba go le bjalo, gona o nyaka go hwetša kahlolo e botse e tšwago go Jehofa.

“Ke Seetša sa Lefase”

5. Seetša sa Modimo se bonegela go mang?

⁵ Seetša se se neago bophelo se se tšwago go Jehofa se bonegela go motho yo e lego Jesu Kriste. Mathomong a Ebangedi ya Johane, re bala gore: “Bophêlô bo be bo le mo xo Yêna [Jesu]; ’me bophêlô byoo e be e le sôna seetša sa batho. ’Me seetša seo se bônêxa lefsifsing; fêla, lefsifsi xa la ka la se amoxêla.” (Johane 1:​4, 5) Ka kgonthe, Jesu o tswalana kgaufsi-ufsi le seetša mo e lego gore o bitšwa “Seetša-etša sa xo bônêxêla batho bohle.” (Johane 1:9) Jesu ka noši o itše: “Xe ke sa le mo lefaseng, ke seetša sa lefase.”​—Johane 9:5.

6. Ke’ng seo motho a swanetšego go se dira e le gore a tle a hwetše kahlolo e botse yeo e lebišago bophelong bjo bo sa felego?

⁶ Ka baka leo, bao ba ratago seetša ba rata Jesu gomme ba a mo dumela. Go hwetša kahlolo e botse ga go kgonege ka ntle le go lebiša tlhokomelo go Jesu. Ee, ke feela ka go mo lebelela e le tsela e kgethilwego ke Modimo ya phološo mo re ka hwetšago kahlolo e botse. Jesu o itše: “E a dumêlaxo Morwa, ó na le bophelô byo bo sa felexo. E a sa mo dumelexo, a ka se kê a bá a bo bôna; se se tl’o xo dula sè mo okametše ké boxale bya Modimo.” (Johane 3:​36) Lega go le bjalo, ke’ng seo se bolelwago ke go bontšha tumelo go Jesu?

7. Go dumela go Jesu go bolela go dumela go mang gape?

⁷ Sa pele, Jesu ka noši o itše: “E a ntumêlaxo xa se xore ó dumêla Nna; ó dumêla E a nthomilexo. Le e a bônaxo Nna, ó bôna E a nthomilexo. Ke tlile mo lefaseng kè le seetša, xore mang le mang e a ntumêlaxo a se kê a dula lefsifsing.” (Johane 12:​44-46) Bao ba ratago Jesu le go bontšha tumelo go yena ba bile ba swanetše go ba le lerato le tumelo tše di tseneletšego go Modimo yo e bilego e le Tatago Jesu, Jehofa. (Mateo 22:​37; Johane 20:​17) Bohle bao ba dirišago leina la Jesu borapeding bja bona eupja ba sa nee Jehofa tlhompho e kgolo ga ba bontšhe lerato la kgonthe la go rata seetša.​—Psalme 22:​27; Ba-Roma 14:​7, 8; Ba-Filipi 2:​10, 11.

“Moemedi o Mogolo” wa Modimo

8. Seetša sa Modimo se ile sa bonegela bjang go Jesu gaešita le pele a tswalwa e le motho?

⁸ Go bontšha tumelo go Jesu gape go bolela go amogela ka botlalo karolo ya gagwe mererong ya Jehofa. Bohlokwa bja karolo ye bo ile bja gatelelwa ge morongwa a be a botša Johane gore: “Bohlatse bya Jesu ke Môya wa xo porofeta.” (Kutollo 19:​10; Ditiro 10:​43; 2 Ba-Korinthe 1:​20) Go tloga boporofeteng bja mathomo-thomo kua Edene, diporofeto ka moka tšeo di buduletšwego ke Modimo mafelelong di mabapi le Jesu le boemo bja gagwe phethagatšong ya merero ya Modimo. Ka mo go swanago, Paulo o boditše Bakriste ba Galatia gore kgwerano ya Molao e be e le “moetetši wa xo re iša xo Kriste.” (Ba-Galatia 3:​24) Kgwerano yeo ya bogolo-golo ya Molao e be e rulaganyeditšwe go hlama setšhaba bakeng sa go tla ga Jesu e le Mesia. Ka gona, gaešita le pele ga go belegwa ga gagwe e le motho, seetša se se tšwago go Jehofa se ile sa bonegela go Jesu.

9. Ke’ng seo go rata seetša go ilego gwa se akaretša ga e sa le go tloga ka 33 C.E.?

⁹ Ka 29 C.E. Jesu o ile a itšweletša bakeng sa kolobetšo gomme a tlotšwa ka moya o mokgethwa, ka go rialo a ba Mesia yo a holofeditšwego. Ka 33 C.E. o ile a hwa e le motho yo a phethagetšego, a tsošwa, a rotogela legodimong, gomme ge a le moo a neela mohola wa bophelo bja gagwe bakeng sa dibe tša rena. (Ba-Hebere 9:​11-14, 24) Lelokelelo le la ditiragalo le be le swaya phetogo e bohlokwa ditirišanong tša Modimo le batho. Jesu bjale e be e le “Moemedi o Mogolo wa bophelo,” “Moemedi o Mogolo wa phološo,” “Moemedi o Mogolo le Mophethagatši wa tumelo ya rena.” (Ditiro 3:​15, NW; Ba-Hebere 2:​10, NW; 12:2, NW; Ba-Roma 3:​23, 24, NW) Go tloga ka 33 C.E. go ya pele, barati ba seetša ba ile ba lemoga le go amogela gore ka ntle le Jesu “xa xo phološô xo e mongwê; le xôna ka tlase xa lexodimo xa xo Leina le lengwê le batho ba le neilwexo, le re kaxo phološwa ka lona.”​—Ditiro 4:12.

10. Ke ka baka la’ng go le bohlokwa kudu gore re theetše mantšu a Jesu gomme re a kwe?

¹⁰ Go bontšha tumelo go Jesu gape go bolela go mo amogela e le “LENTŠU” le “Matete, Moeletši.” (Johane 1:1; Jesaya 9:5) Seo Jesu a se bolelago ka mehla se bonagatša therešo ya Modimo. (Johane 8:​28; Kutollo 1:​1, 2) Go mo theetša ke taba ya bophelo le lehu. Jesu o boditše ba-Juda ba mehleng ya gagwe gore: “E a kwaxo se ke se bolêlaxo a dumêla E a nthomilexo, ó na le bophelô byo bo sa felexo, a ka se kê a tsêna kahlolong; ó tloxile lehung a selêla bophelong.” (Johane 5:​24) Lekgolong la pele la nywaga C.E., bao ba ilego ba diriša mantšu a Jesu go be go le bjalo ka ge eka ba hlakodišwa lefsifsing la lefase la Sathane gomme ba tla bophelong. Ba ile ba balelwa go loka ka tebelelo ya go ba maja-bohwa-gotee le yena Mmušong wa gagwe wa legodimo. (Ba-Efeso 1:1; 2:​1, 4-7) Lehono, go kwa seo Jesu a se bolelago go bulela ba bantši tsela ya go balelwa go loka ka tebelelo ya go phologa Haramagedone le go hwetša bophelo bjo bo phethagetšego bja motho lefaseng le lefsa.​—Kutollo 21:​1-4; bapiša le Jakobo 2:​21, 25.

‘Hlogo Dilong Tšohle’

11. Ke matla afe a phagamego ao ilego a newa Jesu ka 33 C.E.?

¹¹ Jesu ka morago ga tsogo ya gagwe o ile a utollela balatedi ba gagwe karolo e nngwe ya seetša. O itše: “Ke neilwe matla ka moka lexodimong le lefaseng.” (Mateo 28:​18) Ka go rialo Jesu o be a phagamišetšwa maemong a phagamego phuthegong ya Jehofa ya legohle. Paulo o nea ditaba tše dingwe ka botlalo ge a re: “[Modimo o ile] a tsoša Kriste bahung, a mo dudiša ka letsoxong le letona la xaxwe kwa maxodimong, A mo phaxamiša xodimo xa babuši bohle le ba matla bohle le maina ohle a kaxo bolwa, e sexo a lebakeng leno fêla, le a lebakeng le le tl’o xo tla. Xomme dilô tšohle ó di beile ka tlase xa maoto a xaxwe, a mmea a ba hlôxô ya ’phuthêxo tšohle dilong tšohle. Phuthêxo ya ba mmele wa xaxwe mo xo tlalaxo Yêna Motlala-tšohle-xo-bohle.” (Ba-Efeso 1:​20-23; Ba-Filipi 2:​9-11) Ga e sa le go tloga ka 33 C.E., go rata seetša go ile gwa akaretša go lemoga maemo a a phagamego a Jesu.

12. Ke’ng seo Bakriste ba tloditšwego ba ilego ba se amogela ka lethabo go tloga mathomong-thomong, gomme ba bontšhitše se bjang ka tsela ya kgonthe?

¹² Mafelelong batho ka moka ba tla swanelwa ke go lemoga matla a Jesu. (Mateo 24:​30; Kutollo 1:7) Lega go le bjalo, barati ba seetša ka lethabo ba ile ba se lemoga go tloga mathomong-thomong. Ditho tše di tloditšwego tša phuthego ya Bokriste di ile tša amogela Jesu e le “Yêna Hlôxô ya mmele, Hlôxô ya phuthêxô.” (Ba-Kolose 1:​18; Ba-Efeso 5:​23) Ge ba e-ba karolo ya mmele woo, ba ‘ubulwa matleng a lefsifsi gomme ba khudušetšwa mmušong wa Morwa-moratwa wa gagwe.’ (Ba-Kolose 1:​13) Go tloga moo go ya pele, ba latela boetapele bja Jesu ka phišego sebopegong se sengwe le se sengwe sa maphelo a bona, gomme mehleng ya rena ba rutile “dinku tše dingwê” gore di dire se se swanago. (Johane 10:​16) Go hlompha bohlogo bja Jesu ke senyakwa sa motheo bakeng sa go hwetša kahlolo e botse.

13. Ke neng moo Jesu a ilego a thoma go diriša matla a Mmušo, gomme ke’ng seo se ilego sa latela mono lefaseng?

¹³ Jesu nakong ya go rotogela ga gagwe legodimong ka 33 C.E., ga se a diriša matla a gagwe ka bjako ka tekanyo e tletšego. Gaešita lege e be e le Hlogo ya phuthego ya Bokriste, o ile a emela nako e swanetšego gore a diriše matla ka botlalo godimo ga batho ka kakaretšo. (Psalme 110:​1; Ditiro 2:​33-35) Nako yeo e tlile ka 1914, ge Jesu a be a bewa go ba Kgoši ya Mmušo wa Modimo le ‘mehla ya bofelo’ ya lefase e thoma. (2 Timotheo 3:1) Ga e sa le go tloga ka 1919, go kgoboketšwa ga mašaledi a batlotšwa go ile gwa tšwela pela go ya go phethweng. Kudu-kudu ga e sa le go tloga ka 1935, Jesu o be a dutše a kgethologanya batho bjalo ka “dinku,” e lego bao ba tlago go ja bohwa bja ‘mmušo wo ba o lokišeditšwego’ le “dipudi,” e lego bao ba “yago phedišong ya ka go sa felego.”​—Mateo 25:​31-34, 41, 46, NW.

14. Lešaba le legolo le bontšhitše bjang lerato la go rata seetša, gomme se se tla feleletša ka’ng go lona?

¹⁴ Ka mo go thabišago, dinku di itlhatsetše e le tše dintši mehleng ye ya bofelo. Lešaba le legolo la tšona leo le balwago ka dimilione le bonagetše lefaseng ‘go tšwa ditšhabeng ka moka le melokong ka moka le malemeng ka moka.’ Ka go swana le bagwera ba bona, e lego batlotšwa, batho ba ba go swana le dinku ba rata seetša. Ba “hlatswitše mašela [diaparo, NW] a bôná ba a taxafatša mading a kwana,” gomme ba goeletša ka lentšu le le phagamego ba re: “Xo phološa ké xa Modimo wa rena e a dutšexo sedulong sa boxoši, [le] xa Kwana.” Ka baka la se, lešaba le legolo e le sehlopha le tla hwetša kahlolo e botse. Ditho tša lona di ‘tšwa tlaišegong e kgolo,’ di phologa phedišo ya Haramagedone ya bao ba ratago lefsifsi.​—Kutollo 7:9, 10, 14.

“Bana ba Seetša”

15. Ke ka tsela efe mediro ya rena e bontšhago go ikokobeletša ga rena Kgoši, Jesu Kriste?

¹⁵ Lega go le bjalo, barati ba seetša, e ka ba batlotšwa goba dinku tše dingwe ba ikokobeletša Jesu bjang ka tsela ya kgonthe e le yo a beilwego go ba Kgoši ke Modimo le yo a dirago e le Moahlodi? Tsela e nngwe ke ka go leka go ba mohuta wa batho bao Jesu a ba amogelago. Nakong ya ge a be a le mo lefaseng, Jesu o ile a bontšha tebogo bakeng sa dika tše bjalo ka go botega, go ba ka pelo ka moka le go fišegela therešo, gomme yena ka noši o bonagaditše dika tše. (Mareka 12:​28-34, 41-44; Luka 10:​17, 21) Ge e ba re rata go hwetša kahlolo e botse, re swanetše go hlagolela dika tše bjalo.

16. Ke ka baka la’ng go le bohlokwa go apola mediro yeo e lego ya lefsifsi?

¹⁶ Se ke sa therešo kudu-kudu ka ge lefsifsi la lefase la Sathane le dutše le e-ba kgampi ge bofelo bo dutše bo batamela. (Kutollo 16:​10) Ka gona, mantšu ao Paulo a a ngwaletšego ba-Roma ke ao a swanetšego kudu: “Bošexo e šetše e le bya matla-xo-sa, letšatši le kxaufsi. Ké xôna a re apoleng medirô ya lefsifsi, re apareng marumô a seetša. A re sepeleng senatla sa mosexare, e sexo ka bohori le botaxwa, e sexo ka bootswa le dithšila, e sexo ka phapang le pefêlô.” (Ba-Roma 13:​12, 13) Gaešita lege bophelo bjo bo sa felego e le mpho e tšwago go Modimo, fela go ba ga kgonthe ga tumelo ya rena le go rata ga rena seetša go hlatselwa ke mediro ya rena. (Jakobo 2:26) Ka gona, kahlolo yeo re e hwetšago e tla ithekga kudu ka gore re dira mediro e mebotse le go široga mediro e mebe gakaaka’ng.

17. Go bolela’ng go ‘apara Morena Jesu Kriste’?

¹⁷ Ka morago ga go nea keletšo ya gagwe go Ba-Roma 13:​12, 13, moapostola Paulo o phetha ka gore: “Aparang Morêna Jesu Kriste; xomme pabalêlô ya mmele Le se kê la e fetišetša dikxanyoxong.” (Ba-Roma 13:​14) Go bolela’ng go ‘apara Morena Jesu Kriste’? Go bolela gore Bakriste ba swanetše go latela Jesu kgaufsi-ufsi, go be bjalo ka ge eka ba ikapeša mohlala wa gagwe le tshekamelo ya gagwe, ba katanele go ba bjalo ka Kriste. Petro o itše, “Ké sôna se Le bileditšwexo sôna; xobane le Kriste ó tlaišitšwe ka ’baka la lena, a ba kêta-pele ya lena, xore Le tšeê ka mohlala wa xaxwe.”​—1 Petro 2:21.

18. Ke diphetogo dife tše dikgolo tšeo di ka swanelwago ke go dirwa ge e ba re rata go hwetša kahlolo e botse?

¹⁸ Se gantši se ile sa akaretša diphetogo tše kgolo bophelong bja Mokriste. Paulo o itše: “Xobane kxalê Le be Le le lefsifsi; byale xomme Le seetša Moreneng. Swarang tsela bo-ka bana ba seetša. Xobane seenywa sa seetša se mo bothakxeng ka moka le xo lokeng le therešong.” (Ba-Efeso 5:​8, 9) Bohle bao ba itlwaeditšego go dira mediro ya lefsifsi ga se barati ba seetša gomme ba ka se hwetše kahlolo e botse ka ntle le ge ba ka dira phetogo.

“Lena Le Seetša sa Lefase”

19. Mokriste a ka bonagatša seetša ka ditsela dife tše fapanego?

¹⁹ Sa mafelelo, go rata seetša go bolela go bonagatša seetša e le gore ba bangwe ba tle ba se bone gomme ba kgahlišwe ke sona. Jesu o itše: “Lena Le seetša sa lefase.” O ile a oketša ka gore: “Sa lena seetša a se bônêxêlê batho ka mokxwa woo, xore ba bônê medirô e mebotse ya lena, ba tumišê Tata weno wa maxodimong.” (Mateo 5:​14, 16) Mediro e mebotse ya Mokriste e akaretša go bontšha mohuta o mongwe le o mongwe wa go loka le toko le therešo, ka ge boitshwaro bjo bjalo bjo bobotse bo nea bohlatse bjo matla bja go hlatsela therešo. (Ba-Galatia 6:​10; 1 Petro 3:1) Kudu-kudu bo akaretša go bolela le ba bangwe ka therešo. Lehono, se se bolela go ba le karolo lesolong la lefase ka bophara la go bolela “ditaba tše di lokilego tša mmušo . . . lefaseng ka moka leo go agilwego go lona gore e be bohlatse go ditšhaba ka moka.” Gape go bolela go boela go batho bao ba thabelago, go ithuta Beibele le bona le go ba thuša gore le bona ba tšweletše mediro ya seetša.​—Mateo 24:​14, NW; 28:​19, 20.

20. (a) Seetša se phadima ka letago le le kaaka’ng lehono? (b) Ke ditšhegofatšo dife tšeo di humilego tšeo di thabelwago ke bao ba amogelago seetša?

²⁰ Mehleng ya rena ka baka la modiro wa go bolela ditaba tše di lokilego ka phišego ga Bakriste ba botegago, ditaba tše di lokilego di kwewa dinageng tše fetago 200, gomme seetša se phadima go feta lege e le neng pele. Jesu o itše: “Ké Nna seetša sa lefase. E a ntatêlaxo a ka se kê a sepela lefsifsing; ó tlo ba le seetša sa bophelô.” (Johane 8:​12) Go thabiša gakaakang go ba le karolo phethagatšong ya kholofetšo ye! Maphelo a rena a humile kudu ka baka la gore ga re sa hlwa re phopholetša lefsifsing la lefase la Sathane. Le gona, ditebelelo tša rena ke tšeo di tlabago e le ka kgonthe ka ge re lebeletše pele kahlolong e botse yeo e tšwago go Moahlodi yo a kgethilwego ke Jehofa. (2 Timotheo 4:8) E tla ba mo go nyamišago gakaakang ge ka morago ga go ba seetšeng re ka boela lefsifsing gomme ra hwetša kahlolo e šoro! Sehlogong se se latelago, re tla ahla-ahla tsela yeo ka yona re ka tšwelago pele re tiile tumelong.

Na o ka Hlalosa?

◻ Motheo wa kahlolo ya Modimo ke ofe?

◻ Ke karolo efe ya motheo yeo Jesu a nago le yona mabapi le merero ya Modimo?

◻ Re bontšha bjang gore re ikokobeletša Jesu bjalo ka yo a beilwego go ba Kgoši ke Jehofa?

◻ Re ka itlhatsela bjang re le “bana ba seetša”?

◻ Lefsifsing la lefase le, ke ka tsela efe seetša se phadimago go feta lege e le neng pele?

[Seswantšho go letlakala 10]

Mafelelong batho ka moka ba tla swanelwa ke go lemoga matla a Jesu

[Seswantšho go letlakala 12]

Re bontšha gore re rata seetša ge re se bonagatša go ba bangwe