Ke Bomang Bao ba Latelago Seetša sa Lefase?
‘Le bonega bjalo ka dietša lefaseng.’—BA-FILIPI 2:15.
1. Beibele e re’ng ka dietša tša mankekišane tša bodumedi?
BEIBELE e hlaola Jesu ka mo go kwalago e le “seetša se sexolo,” e lego sona “seetša sa lefase.” (Jesaya 9:1; Johane 8:12) Lega go le bjalo, ke ba sego kae feela bao ilego ba mo latela ge a be a le mo lefaseng. Bontši bo kgethile go latela dietša tša mankekišane, tšeo ge e le gabotse e bego e le barwadi ba lefsifsi. Ge e le ka bona Lentšu la Modimo le re: “Batho bao ké baapostola ba maaká, ké ba xo dira ka maanô, ba ikxanthša ba itira baapostola ba Kriste. Xa se taba e kxotsišaxo; xobane le yêna Sathane ó ikxanthša a itira Morongwa wa seetša. Ké xôna re se kê ra tlabêxa xe bahlanka ba xaxwe ba itira bahlanka ba tokô, bao pheletšô ya bôná e tl’o xo ba matšô a medirô ya bôná.”—2 Ba-Korinthe 11:13-15.
2. Ke’ng seo Jesu a boletšego gore e tla ba motheo wa go ahlola batho?
2 Ka gona, ga se batho ka moka bao ba nyakago seetša, gaešita le ge e le se se kgahlišago. Jesu o itše: “Kahlolô yôna šé: Seetša se tlile lefaseng; xomme batho ba rata lefsifsi xa-xolo, ba nyatša seetša xobane medirô ya bôná e le e mebe. Xobane mo-dira-tše-mpe mang le mang ó hloile seetša, xa a tle xo sôna, xore medirô ya xaxwe e se kê ya kxalwa.”—Johane 3:19, 20.
Barati ba Lefsifsi
3, 4. Baetapele ba bodumedi ba mehleng ya Jesu ba bontšhitše bjang gore ba be ba sa nyake go latela seetša?
3 Ela hloko kamoo go bilego bjalo ka gona ge Jesu a be a le lefaseng. Modimo o be a file Jesu matla gore a dire mehlolo e tlabago e le tsela ya go hlatsela gore e be e le Mesia. Ka mohlala, ka letšatši le lengwe la Sabatha o ile a dira gore monna o mongwe yo a bego a belegwe a sa bone, a bone. A tiro e makatšago gakaakang ya kgaugelo! Monna yo o lebogile gakaakang! E be le la mathomo-thomo a kgona go bona! Lega go bjalo, karabelo ya baetapele ba badumedi e bile efe? Johane 9:16 e a laodiša: “Ba bangwê ba bafarisei ba re [mabapi le Jesu]: Motho eo xa se wa Modimo, ka xobane a sa hlôkômele Sabatha.” Dipelo tša bona e be e le tše di senyegilego gakaakang! Phodišo e makatšago e be e sa tšwa go direga, eupja go e na le gore ba bontšhe go thabela monna yoo pele e bego e le sefofu le go leboga mofodiši wa gagwe, ba ile ba sola Jesu! Ka go dira bjalo, ga go na pelaelo gore ba dirile sebe malebana le go bonagatšwa ga moya o mokgethwa wa Modimo, e lego sebe seo se sa lebalelwego.—Mateo 12:31, 32.
4 Ka morago, ge baikaketši bao ba be ba bo botšiša monna yo pele e bego e le sefofu mabapi le Jesu, monna o itše: “Moo xomme xo a kxotsiša, xe Le sa tsebe mo a [Jesu] tšwaxo, etšwe a budulotše mahlô a-ka. Modimo re tseba xe a sa kwe ba-dira-dibe; xe motho è le wa borapedi, ’me a dira se Modimo a se rataxo, xôna Modimo o a mo kwa. Xo tloxa mehleng le mehla xa xo ešo xwa kwala xore motho ó budulotše mahlo a wa xo tswalwa è le sefofu. Xe motho [Jesu] eo e ka be e se wa Modimo, a ka be a s’a kxôna xo dira selô.” Baetapele ba bodumedi ba ile ba arabela bjang? “Ba fetola ba re: Wêna O tswaletšwe xo ba wa sebe ka xo fêla, wa tla wa re O a re ruta? ’Me ba mo lêlêkêla ntlê.” A go hloka kwelobohloko mo gokaakang! Ba be ba thatafetše dipelo. Ka gona, Jesu o ile a ba botša gore lege ba be ba kgona go bona ka mahlo a bona a nama, ba be ba foufetše ka tsela ya moya.—Johane 9:30-41.
5, 6. Baetapele ba bodumedi ba lekgolong la pele la nywaga ba ile ba dira’ng se se bontšhago gore ba be ba rata lefsifsi?
5 Gore baikaketši ba ba bodumedi ba be ba dira sebe malebana le moya wa Modimo go bonala gabotse tiragalong e nngwe ge Jesu a tsošitše Latsaro lehung. Ka baka la mohlolo woo, bontši bja ba e lego batho feela bo ile bja dumela go Jesu. Lega go le bjalo, ela hloko seo baetapele ba bodumedi ba se dirilego. “Baperesita ba baxolo le bafarisei ba napa ba kxobêla pitšô, ba re: Re tlo re’ng? Motho é ó dira mehlôlô e mentši. Xe re ka fêla rè mo lesa, bohle ba tlo mo dumêla, ’me Ba-Rôma ba tlo tla ba re amoxa naxa le batho.” (Johane 11:47, 48) Ba be ba tshwenyega ka maemo a bona le botumo. Go sa šetšwe mafelelo a seo, ba be ba rata go kgahla ba-Roma e sego Modimo. Ka gona, ba ile ba dira’ng? “Ké lôna ’tšatši le ba tloxilexo bà tlemile la xo re ba tlo mmolaya [Jesu].”—Johane 11:53.
6 Na seo e be e le sona phetho? Aowa. Seo ba se dirilego ka morago se bontšha kamoo ba bego ba rata lefsifsi ka gona: “Ké mo baperisita ba baxolo ba lakanexo xore le yêna Latsaro ba mmolayê; ka xobane e be e le ka ’baka la xaxwe xe Ba-Juda bà e-ya ’me ba dumêla Jesu.” (Johane 12:10, 11) A bokgopo bjo bo šiišago gakaakang! Gaešita lege ba ile ba dira se ka moka gore ba šireletše maemo a bona, go ile gwa direga’ng? Molokong wona woo, ba ile ba hlanogela ba-Roma, bao ba ilego ba tla go tlo ba hlasela ka 70 C.E. gomme ba thopha lefelo la bona, setšhaba sa bona gotee le maphelo a bona!—Jesaya 5:20; Luka 19:41-44.
Kwelobohloko ya Jesu
7. Ke ka baka la’ng barati ba therešo ba ile ba kgeregela go Jesu?
7 Ka mo go swanago le mehleng ya rena, ga se bohle bao ba nyakago tshedimošo ya moya. Eupja bao ba ratago therešo ba tloga ba nyaka go tla seetšeng. Ba nyaka gore Modimo e be Mmuši wa bona, gomme ba retologela ka phišego go Jesu yoo Modimo a mo romilego gore a tle a hlalose seo seetša e lego sona, gomme ba a mo latela. Seo ke se baikokobetši ba se dirilego ge Jesu a be a le lefaseng. Ba ile ba kgeregela go yena. Gaešita le Bafarisei ba ile ba swanela go dumela seo. Ba ile ba ngongorega ka gore: “Lefase ka moka le mo šetše nthaxo.” (Johane 12:19) Batho bao ba swanago le dinku ba ratile Jesu ka gobane o be a fapana le baetapele bodumedi ba baithati, ba baikgogomoši le bao ba nyoretšego matla bao Jesu a itšego ka bona: “Ba tlêma merwalô e boima e rôbaxo, ’me ba e rweša batho maxetleng, mola bôná bà sa rate xo e kxwatha le ka monwana o tee. Medirô ya bôná ka moka ba e dirêla xo bônwa ke batho.”—Mateo 23:4, 5.
8. Ka go fapana le baetapele ba baikaketši ba bodumedi, ke boemo bofe bja monagano bjoo Jesu a bilego le bjona?
8 Ka mo go fapanego, ela hloko boemo bja Jesu bja monagano bja kwelobohloko: “Xe a bôna mašaba a batho a ba šôkêlwa; ka xobane ba be ba lapile, bà lahlexile wa dinku tše di se naxo modiši.” (Mateo 9:36) Le gona, ke’ng seo a ilego a se dira ka se? Go bao ba bego ba dirišitšwe gampe ke tshepedišo ya Sathane o itše: “Tlang xo Nna bohle ba Le lapišitšwexo, ba Le imêlwaxo; Nna ke tlo Le khutšiša. Le ithwešê yoko ya-ka, Le rutwê ke Nna; xobane ke yo boló le wa pelo e kokobetšexo; ’me Le tlo hwetša khutšô ya meôya lena. Xobane yoko ya-ka xa e robe, morwalô wa-ka ké o bohwêfê.” (Mateo 11:28-30) Jesu o dirile seo a boletšwego ka sona e sa pele go Jesaya 61:1, 2, yeo e balegago ka gore: “Morêna ó mpeetše xo bexêla babôtlana ’taba tše di botse; O nthometše xo alafa ba dipelo tše robexilexo, xore ba ba thopilwexo ke ba xoêlêlê khunoloxô, ke xoêlêlê ba ba tlemilwexo xo xololwa. Ke xoêlêlê ngwaxa wa kxahlêxô wa Morêna, le ’tšatši la tefetšô ya Modimo wa rena, xore xo homotšwê bohle ba ba nyamilexo.”
Go Kgoboketša Barwadi ba Seetša
9. Ke ditiragalo dife tša bohlokwa tšeo di diregilego ka 1914?
9 Ka morago ga go rotogela ga gagwe legodimong, Jesu o be a swanetšê go leta go fihla ge nako e e-tla ya gore Modimo a mo nee matla a Mmušo. Ke moka o be a tla kgethologanya “dinku” go “dipudi.” (Mateo 25:31-33; Psalme 110:1, 2) Nako yeo e tlile ge ‘mehla ya bofelo’ e be e thoma ka 1914. (2 Timotheo 3:1-5) Jesu, a filwe matla a go ba Kgoši ya Mmušo wa Modimo wa legodimong, o ile a thoma go kgobokeletša bao ba bego ba nyaka go latela seetša ka letsogong la gagwe le letona la go amogelwa. Ka morago ga Ntwa ya I ya Lefase, go kgoboketšwa moo go ile gwa tšwela pele ka lebelo leo le oketšegago.
10. Ke potšišo efe yeo mo gongwe e ka botšišwago mabapi le bao Jesu a ba dirišago modirong wa go kgoboketša?
10 Ka tlase ga boetapele bja Kriste Jesu, modiro wa go kgoboketša o ile wa putswa ka katlego e kgolo. Historing go be go se gwa ka gwa ba le batho ba bantši gakaakaa go tšwa ditšhabeng ka moka ba kgobokeletšwa borapeding bjo bo edišitšwego bja therešo. Ke bomang bao lehono ba latelago seetša seo se tšwago go Modimo le Kriste? Ke bomang bao ba dirago seo Ba-Filipi 2:15 e se bolelago, e lego ‘go bonega bjalo ka seetša lefaseng,’ ka go laletša ba bangwe go ‘tlo tšea meetse a bophelo a go fiwa feela’?—Kutollo 22:17.
11. Boemo bja Bojakane ke bofe mabapi le seetša sa moya?
11 Na Bojakane bo dira seo? Bojakane, ka madumedi a bjona ao a aroganego, ruri ga bo bonege bjalo ka seetša. Ge e le gabotse, baruti ba swana le baetapele ba bodumedi ba mehleng ya Jesu. Ga ba hlabiše seetša sa kgonthe seo se tšwago go Modimo le Kriste. Nywaga e 33 e fetilego, makasine wa Theology Today o itše: “Ka manyami go swanetše go amogelwe gore seetša se ga se bonege ka Kerekeng ka phadimo e matla. . . . Kereke e sekametše kudu tabeng ya go ba yeo e swanago kudu le go feta le dihlopha tša batho tšeo di e dikologilego. Ga se yeo e tlogago e le seetša sa lefase, ge e se yeo e hlabišago seetša seo se phadimago lefaseng ka bolona.” Le gona boemo bja Bojakane bo mpefetše kudu le go feta lehono. Selo seo se bitšwago seetša seo bo se hlabišago go tšwa lefaseng, ge e le gabotse ke lefsifsi ka gobane seo ke sohle seo Sathane le lefase la gagwe ba ka se neago. Aowa, ga go na seetša sa therešo seo se tšwago madumeding ao a lwantšhanago le ao a tlogago e le a selefase a Bojakane.
12. Ke bomang bao ba bopago mokgatlo wa kgonthe wo o rwalago seetša lehono?
12 Go ka bolelwa ka kgodišego gore lekoko la lefase le lefsa la Dihlatse tša Jehofa ke mokgatlo wa kgonthe wo o rwelego seetša lehono. Ditho ka moka tša wona, ka botee—banna, basadi le bafsa ka mo go swanago—di dira gore seetša sa tšona seo se tšwago go Jehofa le Kriste se bonegele batho ka moka. Ngwagola, ka diphuthegong tšeo di nyakilego go ba 70 000 tša Dihlatse tša Jehofa lefaseng ka moka, barwadi ba fetago dimilione tše nne ba seetša ba ile ba swarega ka go botša ba bangwe ka Modimo le merero ya gagwe. Le gona ngwaga o mongwe le o mongwe ga bjale, re bona go kgoboketšwa mo gogolo mo go tšwelago pele ga batho bao le bona ba nyakago go edišetšwa moyeng. Ba dikete tše makgolo ba kolobetšwa ka morago ga go ithuta Beibele gomme ba ba le tsebo e nepagetšego ya therešo. Ka kgonthe, Modimo “ke Yêna a rataxo xore batho bohle ba phološwê ba fihlêlê tsebô ya therešô.”—1 Timotheo 2:4.
13. Re ka bapiša seetša seo se tšwago go Jehofa le eng?
13 Re ka bapiša tshedimošo yeo gona bjale e tšwago go Jehofa le seo se ilego sa direga ge batho ba Modimo ba mehleng ya bogologolo ba tloga Egipita: “Morêna ó ba etile pele ka leru la thololo xe e le mosexare; ya ba xo ba laetša tsela, bošexo ya ba mollô wa thololo; ya ba xo ba bônêxêla, xore ba kxônê xo sepela mosexare le bošexo.” (Ekisodo 13:21, 22) Leru mosegare le mollo bošego tšeo di bego di e-tšwa go Modimo e be e le bahlahli bao ba botegago. Di be di ka botwa bjalo ka letšatši leo Modimo a le bopetšego gore le re nee seetša sa mosegare. Le gona, re ka ithekga ka Jehofa gore o tla tšwela pele a bonegela tsela ya batsomi ba therešo ka tsela ya moya mehleng ye e kgopo ya bofelo. Diema 4:18 e a re kgonthišetša: “Mmila wa baloki ó étša bo-ka mahuba xe a hlatloxa, ’tšatši la bá la hlaba.”
Go Hlabiša Seetša sa Mmušo
14. Morero o mogolo wa barwadi ba seetša e swanetše go ba ofe?
14 Mola Jehofa e le Mothopo wa tshedimošo, gomme Kriste e le Mohlabiši o Mogolo wa seetša seo, balatedi ba Jesu le bona ba swanetše go hlabiša seetša seo. O itše ka bona: “Lena Le seetša sa lefase. . . . Sa lena seetša a se bônêxêlê batho ka mokxwa woo, xore ba bônê medirô e mebotse ya lena, ba tumišê Tata weno wa maxodimong.” (Mateo 5:14, 16) Sehlogo se segolo sa seetša se seo balatedi ba gagwe ba bego ba swanetše go bonegela batho ka sona e be e le sefe? Ba be ba swanetše go ruta’ng seremong se sa histori ya lefase? Jesu ga se a bolele gore balatedi ba gagwe ba be ba swanetše go ruta pušo ka batho, pušo ya bonkgwete, go kopanywa ga Kereke le Mmušo goba kgopolo lege e le efe ya lefase. Go e na le moo, go Mateo 24:14 (NW), o boletše e sa le pele gore ge go lebanwe le kganetšo ya lefase ka bophara, “ditaba tše tše di lokilego tša mmušo [di be di tla] bolelwa lefaseng ka moka leo go agilwego go lona gore e be bohlatse go ditšhaba ka moka; gomme [e be] e tla ba gona bofelo bo fihlago.” Ka go rialo, barwadi ba seetša lehono ba botša ba bangwe ka Mmušo wa Modimo woo o tlago go fediša lefase la Sathane gomme wa tšweletša lefase le lefsa la go loka.—1 Petro 2:9.
15. Bao ba nyakago seetša ba tla retologela kae?
15 Bao ba ratago seetša ba ka se arošwe ke dipolelo le dipakane tša lefase. Dipolelo tšeo ka moka le dipakane go se go ye kae di tla nyamelela, ka ge lefase le le batamela bofelo bja lona. Go e na le moo, barati ba toko ba tla rata go retologela ditabeng tše di lokilego tšeo di tsebatšwago ke bao ba dirago gore seetša sa Mmušo wa Modimo se bonege dikhutlong tša kgole tša lefase. Ba ke bao ba boletšwego e sa le pele go Kutollo 7:9, 10, yeo e rego: “Ka buša ka ba le pônô, ka bôna lešaba le lexolo la batho ba xo sexo motho e a kxônaxo xo ba bala, ba dithšaba ka moka, le meloko ka moka le merafô ka moka, le maleme ka moka; ka bôna bá eme pele xa sedulô [sa Modimo le pele ga] Kwana [Kriste] . . . Ba hlaboša mantšu xa-xolo ba re: Xo phološa ké xa Modimo wa rena e a dutšexo sedulong sa boxoši [le] xa Kwana.” Kut 7 Temana 14 e re: “Ké bôná ba tšwaxo tlaišexong e kxolo.” Ee, ba phologa bofelo bja lefase le gomme ba tsena lefaseng le lefsa le le se nago bofelo ka tlase ga Mmušo wa Modimo.
Lefase le Lefsa Leo le Edišeditšwego
16. Ke’ng seo se tlago go diregalela lefase la Sathane masetla-pelong a magolo?
16 Lefase le lefsa le tla apešwa ke seetša seo se phadimago sa therešo. Ruri, nagana ka se boemo bo e tlago go ba sona letšatši ka morago ga ge Modimo a fedišitše tshepedišo ye ya dilo. Sathane, batemona ba gagwe, ditshepedišo tša gagwe tša bopolitiki, tša kgwebo le tša bodumedi di tla ba di se gona—e nngwe le e nngwe ya tšona! Ditlabakelo ka moka tša ditaba tša bofora tša Sathane le tšona di tla ba di ile. Ka gona, ka morago ga masetla-pelo a magolo, go ka se sa hlwa go gatišwa kuranta le e tee, makasine, puku le pukwana goba matlakalana tšeo di thekgago lefase le le kgopo. Go ka se sa hlwa go e-ba le ditutuetšo tšeo di gobošago tšeo di gašwago go tšwa diteišeneng tša thelebišene le tša radio tša lefase. Tikologo ka moka yeo e nago le mpholo ya lefase la Sathane e tla tlošwa ka tlhaselo e tee e matla!—Mateo 24:21; Kutollo 7:14; 16:14-16; 19:11-21.
17, 18. O ka hlalosa bjang boemo bja moya bja ka morago ga bofelo bja lefase la Sathane?
17 Seo e tla ba kimollo e kgolo gakaakang! Go tloga letšatšing leo, seetša se se lokilego, se se matlafatšago moyeng go tšwa go Jehofa le Mmušo wa gagwe ke sona feela se tlago go ba le tutuetšo go batho. Jesaya 54:13 e bolela e sa le pele gore: “Baaxi ba xaxo ka moka ba tlo rutwa ke Morêna; ’me moláô wa bana ba xaxo e tlo ba o moxolo.” Ka ge pušo ya Modimo e tla ba e buša lefase ka moka, kholofetšo ya gagwe go etša ge Jesaya 26:9 e bolela, ke ya gore, “ba ba axilexo mo xo lôna ba [tla] rutwa tokô.”
18 Boemo bja monagano le bja moya ka kakaretšo bo tla kaonefala ka bjako. Dilo tšeo di agišago e tla ba tša ka mehla go e na le dilo tšeo di nyamišago, dilo tša boitshwaro bjo bo gobogilego tšeo gona bjale di apareditšego. Bohle bao ba tlago go ba ba phela ka nako yeo ba tla rutwa therešo mabapi le Modimo le merero ya gagwe. Boporofeta bja Jesaya 11:9, bjo bo rego: “Xo tseba Morêna xo tlo tlala ’fase lohle bo-ka meetse xe a nabile lewatleng,” bo tla phethegatšwa ka kgopolo e feletšego.
Ke mo go Akgofilego go Latela Seetša
19, 20. Ke ka baka la’ng bao ba nyakago go latela seetša ba swanetše go dula ba phafogile?
19 Gona bjale, nywageng ya mafelelo ya tshepedišo ye e mpe ya dilo, ke mo go akgofilego go latela seetša sa lefase. Le gona re swanetše go itiša, ka gobane go na le ntwa e kgolo yeo e lwewago gore re dule re sepela seetšeng. Kganetšo ye e tšwa matleng a lefsifsi—go Sathane, batemona ba gagwe le go mokgatlo wa gagwe wa lefaseng. Ke ka baka leo moapostola Petro a lemošago ka gore: “Le phafoxê le phakxamê, xobane Diabolo lenaba la lena ó Le dikoloxa bo-ka tau e bôpaxo; ó nyaka yo a kaxo mo metša.”—1 Petro 5:8.
20 Sathane o tla bea tšhitišo e nngwe le e nngwe tseleng ya bao ba thomago go kopana le seetša, ka gobane o nyaka go ba dira gore ba tšwele pele ba le lefsifsing. Mo gongwe e ka ba kgateletšo e tšwago go ba leloko goba bao e kilego ya ba bagwera bao ba lwantšhago therešo. Mo gongwe e ka ba dipelaelo tša go belaela Beibele ka baka la go foufatšwa ga motho ke dithuto tša bodumedi bja maaka goba ditaba tša bofora tša baila-Modimo ba se nago tumelo le ba-agnostic. Mo gongwe e ka ba ditshekamelo tša motho ka noši tša sebe tšeo di dirago gore go phela ka go dumelelana le ditekanyetšo tša Modimo go be thata.
21. Ke mogato ofe woo o swanetšego go gatwa ke bohle bao ba nyakago go phela lefaseng le lefsa la Modimo?
21 Go sa šetšwe gore ke ditšhitišo dife tšeo di bago gona, na o rata go thabela bophelo lefaseng le lefsa le le se nago bodiidi, bosenyi, go hloka toka le ntwa? Na o rata go thabela bophelo bjo bo phethagetšego bja mmele le bophelo bjo bo sa felego lefaseng la paradeise? Gona amogela gomme o latele Jesu bjalo ka seetša sa lefase le go theetša molaetša wa bao ba kgomaretšego “Lentšu la bophelô” ka go tia le bao ba ‘bonegago bjalo ka dietša.’—Ba-Filipi 2:15, 16.
O be o ka Araba Bjang?
◻ Baetapele ba bodumedi ba bontšha bjang gore ke barati ba lefsifsi?
◻ Ke boemo bofe bja monagano bjoo Jesu a ilego a ba le bjona ka batho?
◻ Go kgoboketšwa ga barwadi ba seetša go tšwetše pele bjang?
◻ Ke diphetogo dife tša bohlokwa tšeo di tlago go direga kgaufsinyane?
◻ Ke ka baka la’ng go latela seetša sa lefase e le mo go akgofilego lehono?
[Seswantšho go letlakala 14, 15]
Bafarisei ba dipelo tše thata ba ile ba raka monna yo a bego a budulotšwe mahlo ke Jesu