Bophelo le Bodiredi bja Jesu

Kholofelo ya Tsogo

MAFELELONG Jesu o fihla mollwaneng wa Bethania, motsana wo o lego mo e ka bago dikhilomithara tše tharo go tloga Jerusalema. E bile feela matšatši a sego kae ga e sa le go tloga ge Latsaro a e-hwa le go bolokwa. Dikgaetšedi tša gagwe Maria le Mareta ba sa hlokofetše, gomme ba bantši ba tlile legaeng la bona go ba homotša.

Ge ba sa dutše ba hlokofetše, motho o mongwe o tsebiša Mareta gore Jesu o a tla. Ka gona o a tloga gomme o akgofela go mo gahlanetša, mo gongwe a se a botša ngwanabo. Ge a fihla go Jesu, Mareta o boeletša seo yena le ngwanabo ba swanetšego go ba ba ile ba se bolela gantši nakong ya matšatši a mane a fetilego: “Xe O ka be O be O le fá, kxaetšedi ya-ka a ka be a sa ka a hwa.”

Lega go le bjalo, Mareta o bontšha kholofelo, o bolela gore Jesu mo gongwe a ka dira se sengwe bakeng sa kgaetšedi ya gagwe. O re, “Ke tseba xobane tšohle tše O di kxopêlaxo xo Modimo, Modimo ó tlo Xo fa.”

Jesu o a holofetša, “Kxaetšedi ya xaxo e tlo tsoxa.”

Mareta o kwešiša gore Jesu o bolela ka tsogo ya nakong e tlago ya lefaseng, e lego yeo Aborahama le bahlanka ba bangwe ba Modimo ba e lebeletšego. Ka gona o a araba: “Ke tseba xore ó tlo tsoxa ka tsoxô ya letšatši la bofêlô.”

Lega go le bjalo, Jesu o nea kholofelo ya kimollo ya kapejana, o a araba: “Ké Nna tsoxô le bophelô.” O gopotša Mareta gore Modimo o mo file matla a go laola lehu, o bolela gore: “E a ntumêlaxo ó tlo phela le xe a ka hwa. Xomme e a phelaxo à ntumêla, a ka se kê a bá a hwa xo iša xo sa felexo.”

Jesu ga a botše Mareta gore ba botegago ba ba phelago ka nako yeo ba ka se ke ba hwa. Aowa, eupja ntlha ye a e rotošago ke ya gore go bontšha tumelo go yena go ka iša bophelong bjo sa felego. Bophelo bjo bjalo bo tla thabelwa ke batho ba bantši ka baka la go tsošwa ga bona ka letšatši la bofelo. Eupja ba bangwe ba botegago ba tla phologa bofelo bja tshepedišo ye ya dilo lefaseng, gomme go ba mantšu a Jesu a tla phethaga e le ka kgonthe. Le ka mohla ba ka se ke ba hwa! Ka morago ga polelo ye e bohlokwa, Jesu o botšiša Mareta, “A Lentšu lé O a le dumêla?”

O a araba, “E, Morêna! Nna ke dumetše xe Kriste Morwa wa Modimo Mo-tla-faseng è le Wêna.”

Ka gona Mareta o boela morago ka go akgofa go yo bitša ngwanabo, o mmotša thopeng gore: “Moruti ó fihlile; ó a Xo bitša.” Maria o tloga lapeng kapejana. Ge ba bangwe ba mmona a tloga, ba mo latela ba nagana gore o ya lebitleng la kgopotšo.

Ge a fihla go Jesu, Maria o wela maotong a gagwe a lla. O re, “Morêna, xe O ka be O be O le fá, kxaetšedi ya-ka a ka be a sa ka a hwa.” Jesu o kgomegile ka kudu ge a bona Maria le mašaba a batho ba ba mo latelago ba lla. O a botšiša, “Le mmeile kae?”

Ba araba ka gore, “Morêna, tlaa O bônê.”

Jesu le yena o a lla, o dira gore ba-Juda ba re: “Bônang, xale ó be a mo rata!”

Ba bangwe ba gopola gore Jesu, nakong ya Monyanya wa Ntlo-kgethwa dikgweding tše sego kae pele, o ile a fodiša lesogana le le belegwego le foufetše, gomme ba a botšiša: “Yêna-é wa xo budulola mahlô a sefofu, a xa a ka a kxôna xo diba lehu la motho é?” Johane 5:21; 6:40; 9:1-7; 11:17-37.

◆ Mafelelong Jesu o fihla neng kgaufsi le Bethania, gomme boemo ke bofe moo?

◆ Mareta o na le lebaka lefe la go dumela tsogo?

◆ Jesu o kgongwa bjang ke lehu la Latsaro?