Bophelo le Bodiredi bja Jesu

Selalelo sa Segopotšo

KA MORAGO ga gore Jesu a hlapiše baapostola ba gagwe maoto, o tsopola lengwalo la Psalme 41:9 ka gore, “E a bexo a e-ja boxôbê le Nna ó ntsošeditše serêthe sa xaxwe.” Bjale o huduega moyeng gomme o re: “E mongwê wa lena ó tlo nkêka.”

Baapostola ba thoma go nyama gomme ba botšiša Jesu ka o tee ka o tee gore: “A e ka ba nna?” Judase Isikariothe le yena o a botšiša. Johane yo a dutšego kgaufsi ga Jesu tafoleng o sekamela kgareng ya Jesu gomme o a botšiša: “Morêna, ké mang?”

Jesu o araba ka gore: “Ké e mongwê wa lena ba lesome le metšô e mebedi; ké yo a tl’o xo ina le Nna morufsing. Xe e le Morwa-motho, Yêna ó ikêla ka mo mangwalô a mmoletšexo; fêla, yo madi-mabe ké motho eo a mo êkaxo. Xo ka be xo le kaone xe a ka be a sa ka a tswalwa.” Ka morago ga moo Sathane o tsena gape go Judase ka go diriša gabotse sekgoba seo se lego pelong ya gagwe yeo e fetogilego e kgopo. Ka morago bošegong bjoo, Jesu o bitša Judase ka mo go swanetšego ka gore ke “morwa-molahlexi.”

Jesu bjale o botša Judase gore: “Se O se diraxo, akxofiša xo se dira.” Ga go le o tee wa baapostola ba bangwe yo a kwešišago seo Jesu a se bolelago. Ba bangwe ba nagana gore ka ge Judase a swara sekhwama sa tšhelete, Jesu o mmotša gore: ‘Reka tše re di nyakago bakeng sa monyanya,’ goba gore a ye go nea badiitšana se sengwe.

Ka morago ga gore Judase a tloge, Jesu o thoma monyanya o mofsa ka mo go feletšego goba segopotšo gotee le baapostola ba gagwe ba botegago. O tšea senkgwa, o rapela thapelo ya go leboga, o a se ngwathaganya gomme o ba nea sona, o re: “Tšeang Le jê.” O a hlalosa: “Ké mmele wa-ka o newaxo ka ’baka la lena. Dirang byalo xore e bê xo nkxopola.”

Ge o mongwe le o mongwe a jele senkgwa, Jesu o tšea senwelo sa beine, mohlomongwe e le senwelo sa bone seo se dirišitšwego tirelong ya Paseka. Ka mo go swanago, le sona o se rapelela thapelo ya go leboga, o se fetišetša go bona, o re ba nwe, gomme o re: “Senwêlô sé ké kxwêranô e mphsa mading a-ka a a tšhollwaxo ka ’baka la lena.”

Ka gona, se ge e le gabotse, ke segopotšo sa lehu la Jesu. Bjalo ka ge Jesu a bolela, se swanetše go boeletšwa ngwaga le ngwaga ka Nisani 14 e le go mo gopola. Se tla gopotša babini seo Jesu gotee le Tatagwe wa legodimong ba se dirilego bakeng sa go phološa batho kahlolong ya lehu. Bakeng sa ba-Juda bao ba fetogilego balatedi ba Jesu monyanya o tla tšea legato la Paseka.

Kgwerano e mpsha, yeo e šomago ka madi a tšholotšwego a Jesu, e emela kgwerano ya kgale ya Molao. Go yona Jesu Kriste ke mmoelanyi magareng ga mahlakore a mabedi​—ka lehlakoreng le lengwe ke Jehofa Modimo gomme ka go le lengwe ke Bakriste ba tswetšwego ka moya ba 144 000. Ka ntle ga go nea tebalelo ya dibe, kgwerano e dumelela go bopja ga setšhaba sa legodimo sa dikgoši le baperisita. Mateo 26:​21-29; Mareka 14:​18-25; Luka 22:​19-23; Johane 13:​18-30; 17:​12; 1 Ba-Korinthe 5:7.

◆ Ke boporofeta bofe bja Beibele bjo Jesu a bo tsopolago mabapi le mogwera wa gagwe gomme o bo diriša ka tsela efe?

◆ Jesu o botša Judase gore a dire eng, eupja baapostola ba bangwe ba kwešiša bjang ditaelo tše?

◆ Ke monyanya ofe wo Jesu a o thomago ka morago ga gore Judase a sepele gomme morero wa ona ke ofe?

◆ Ke dihlopha dife tšeo di lego kgweranong e mpsha gomme ke eng seo kgwerano e se phethago?