Jehofa, Modimo ‘Yo A Ikemišeditšego Go Lebalela’

“Wene Jehofa, o lokile gomme o ikemišeditše go lebalela.”—PSALME 86:5, NW.

1. Ke morwalo ofe o boima wo Kgoši Dafida a bego a o rwele gomme o ile a hweletša pelo ya gagwe yeo e bego e tshwenyegile khomotšo bjang?

KGOŠI DAFIDA wa Isiraele ya bogologolo o be a tseba kamoo morwalo wa letswalo le molato o ka bago boima ka gona. O ngwadile gore: “Xobane melato ya-ka e nthibexetše hlôxô; e nthôba byalo ka morwalô o boima. Matla a mpheletše; ke robexetše ruri; ke bobola kè hlokoxile pelo.” (Psalme 38:4, 8) Lega go le bjalo, Dafida o ile a hweletša pelo ya gagwe yeo e tshwenyegilego khomotšo. O be a tseba gore le ge Jehofa a hloile sebe, ga a hloya modira-dibe—ge e ba yoo a itshola ka kgonthe gomme a gana tsela ya gagwe ya sebe. (Psalme 32:5; 103:3) A e-na le kholofelo e tletšego ya go rata ga Jehofa go katološetša bao ba itsholago kgaugelo ya gagwe Dafida o itše: “Wene Jehofa, o lokile gomme o ikemišeditše go lebalela.”—Psalme 86:5, NW.

2, 3. (a) Ge re dira sebe, ke morwalo ofe wo re ka o rwalago ka baka leo, gomme ke ka baka la’ng se e le se se holago? (b) Ke kotsi efe e lego gona go ‘metšweng’ ke molato? (c) Ke kgonthišetšo efe yeo Beibele e re neago yona mabapi le go ikemišetša ga Jehofa go lebalela?

² Le rena ge re dira sebe, re ka rwala morwalo o thubaganyago wa letswalo le bohloko ka lebaka leo. Maikwelo a a go nyama ke a tlwaelegilego e bile ke a holago. A ka re tutueletša gore re gate megato e nepagetšego ya go lokiša diphošo tša rena. Lega go le bjalo, Bakriste ba bangwe ba fentšwe ke maikwelo a go ba le molato. Dipelo tša bona tšeo di ba beago molato di ka phegelela gore Modimo a ka se ba lebalele ka mo go tletšego go sa šetšwe kamoo ba itsholago ka gona. Kgaetšedi yo mongwe ge a be a bolela ka phošo yeo a ilego a e dira o itše: “Ke maikwelo a tšhošago ge o nagana gore Jehofa a ka fo se sa go rata le ka mohla le ge e le ofe.” Gaešita le ka morago ga ge a itshotše gomme a amogetše keletšo e thušago go tšwa go bagolo ba phuthego, o ile a tšwela pele a ikwa a sa swanelwe ke tebalelo ya Modimo. O hlalosa gore: “Ga go letšatši le le fetago ke se ka kgopela Jehofa tebalelo ya gagwe.” Ge re “metšwa” ke maikwelo a molato, Sathane a ka leka go re dira gore re nyeme moko, re ikwe eka ga se ra swanela go hlankela Jehofa.—2 Ba-Korinthe 2:5-7, 11.

³ Eupša yeo ga se tsela yeo Jehofa a lebelelago ditaba ka yona le gatee! Lentšu la gagwe le re kgonthišetša gore ge re bontšha tshokologo ya kgonthe yeo e tšwago pelong, Jehofa o itokišeditše, ee, o ikemišeditše go lebalela. (Diema 28:13) Ka gona ge e ba go ile gwa bonala eka o ka se kgone go fihlelela tebalelo ya Modimo, mohlomongwe seo se nyakegago ke kwešišo e kaone ya lebaka leo a lebalelago le kamoo a lebalelago ka gona.

Ke ka Baka La’ng Jehofa a “Ikemišeditše go Lebalela”?

4. Ke eng seo Jehofa a se gopolago ka tlhago ya rena gomme se se kgoma bjang tsela yeo a re swarago ka yona?

⁴ Re bala gore: “’Karoxô tša rena ó di tloša mo xo rena a di iša kxolê, kxolê bo-ka Bohlabêla bò le kxolê le Bodikêla. Morêna ó šôkêlwa ba ba mmoifaxo byalo ka tata xo bana xe a xauxêla bana b’axwe.” Ke ka baka la’ng Jehofa a sekametše go bontšheng kgaugelo? Temana e latelago e araba ka gore: “Xobane Yêna ó tseba lebopô le re lexo ka lôna, xa a lebale xe re le lerole.” (Psalme 103:12-14) Ee, Jehofa ga a lebale gore re dibopiwa tša lerole, tšeo di nago le mafokodi ka baka la go se phethagale. Polelo ya gore o tseba “lebopô le re lexo ka lôna” e re gopotša gore Beibele e swantšha Jehofa le mmopi wa dilo tša letsopa gomme rena le dipitša tšeo a di bopago.a (Jeremia 18:2-6) Mmopi wa dilo tša letsopa o swara dipitša tša gagwe tša letsopa ka go tia eupša ka go di neneketša a dula a nagana ka tlhago ya tšona. Ka gona Jehofa le yena e lego Mmopi yo Mogolo, o lekanyetša ditirišano tša gagwe le rena ka go ya ka bofokodi bja tlhago ya rena ya sebe.—Bapiša le 2 Ba-Korinthe 4:7.

5. Puku ya Ba-Roma e hlalosa bjang go ngaparela ga sebe nameng ya rena ya sebe?

⁵ Jehofa o kwešiša kamoo sebe se lego matla ka gona. Mangwalo a hlalosa sebe e le matla a magolo ao a ngaparetšego batho ka go tia dinaleng tša ona tša lehu. Ge e le gabotse, go ngaparela ga sebe go matla gakaaka’ng? Pukung ya Ba-Roma moapostola yo a buduletšwego Paulo o hlalosa se ka mantšu a kwalago: Re “bušwa ke sebe” go swana le ge mašole a le ka tlase ga molaodi wa ona (Ba-Roma 3:9); se ‘bušitše’ batho bjalo ka kgoši (Ba-Roma 5:21); se ‘agile’ mo go rena (Ba-Roma 7:17, 20); “molaô” wa sona o šoma mo go rena ka mehla, ge e le gabotse o leka go laola tsela ya rena. (Ba-Roma 7:23, 25) A ntwa e thata gakaakang yeo re nago le yona ya go ganetša go ngaparela ga sebe nameng ya rena ya sebe!—Ba-Roma 7:21, 24.

6. Jehofa o lebelela bjang bao ba nyakago kgaugelo ya gagwe ka pelo e bohloko?

⁶ Ka gona Modimo wa rena wa kgaugelo o tseba gore go kwa ka mo go phethagetšego ga go kgonege go rena go sa šetšwe kamoo dipelo tša rena di ka ratago go dira bjalo go yena ka gona. (1 Dikxoši 8:46) O re kgonthišetša ka lerato gore ge re nyaka kgaugelo ya gagwe ya botate ka pelo e nyamilego o tla re lebalela. Mopsalme Dafida o itše: “Didimo tše di Xo kxahlaxo, ké môya o rôbêxilexo; pelo xe e rôbêxile, xe e setlêxile, Wene Modimo O ka se e nyatše.” (Psalme 51:17) Jehofa a ka se ke a ba a gana goba a gomiša pelo yeo e robegilego e bile e setlegile ka go rwala morwalo wa molato. Seo se hlalosa gabotse gakaakang go ikemišetša ga Jehofa go lebalela!

7. Ke ka baka la’ng re ka se tšeele kgaugelo ya Modimo fase?

⁷ Eupša na se se bolela gore re ka fo se iše felo ka kgaugelo ya Modimo, re diriša tlhago ya rena ya sebe e le lebaka la go dira sebe? Le gatee! Jehofa ga a hlahlwe ke maikwelo feela. Kgaugelo ya gagwe e na le mellwane. Le gatee a ka se lebalele bao ba dirago sebe se se šiišago ka dipelo tše thata ka boomo ba sa sokologe. (Ba-Hebere 10:26-31) Ka lehlakoreng le lengwe, ge a bona pelo yeo e ‘robegilego ge e setlegile,’ o ‘ikemišetša go lebalela.’ (Diema 17:3) A re eleng hloko karolo e nngwe ya polelo e hlathollago yeo e dirišwago ka Beibeleng go hlalosa botlalo bja tebalelo ya Modimo.

Jehofa o Lebalela ka mo go Tletšego Gakaaka’ng?

8. Ge e le gabotse ke’ng seo Jehofa a se dirago ge a re lebalela dibe tša rena gomme ke mafelelo afe ao se se swanetšego go ba le ona go rena?

⁸ Kgoši Dafida yo a bego a itshola o itše: “Ka ba ka bobola dibe tša-ka go wene, mme ka se ke ka uta bokgopo bja-ka, ka re: Ke tlo bobola dikarogo tša-ka go Jehofa. Ke mo o ntebaletšego bokgopo bja dibe tša-ka.” (Psalme 32:5, PK, mongwalo o sekamego ke wa rena.) Polelo e rego ‘lebaletše’ e fetolela lentšu la Sehebere leo gabotse le bolelago gore “kuka,” “rwala.” Go dirišwa ga lona mo go swaya ‘go tloša molato, sebe goba go tshela molao.’ Ka gona go bjalo ka ge eka Jehofa o kukile dibe tša Dafida gomme a di tloša. (Bapiša le Lefitiko 16:20-22.) Se ka ntle le pelaelo se bebofaditše maikwelo a molato ao Dafida a bego a a rwele. (Bapiša le Psalme 32:3.) Le rena re ka ba le kholofelo e tletšego go Modimo yo a lebalelago bao ba nyakago tebalelo ya gagwe motheong wa tumelo ya bona sehlabelong sa topollo sa Jesu Kriste. (Mateo 20:28; bapiša le Jesaya 53:12.) Bao Jehofa a kukago dibe tša bona ka tsela e bjalo gomme a di tloša ga se ba swanela go tšwela pele ba rwele morwalo wa maikwelo a go ba le molato bakeng sa dibe tše di fetilego.

9. Mantšu a Jesu a gore: “Re lebalêlê melato ya rena,” a bolela’ng?

⁹ Jesu o ile a diriša tswalano ya bao ba kolotwago le bao ba kolotago go bontšha kamoo Jehofa a lebalelago ka gona. Ka mohlala, Jesu o re kgothaleditše go rapela gore: “Re lebalêlê melato ya rena.” (Mateo 6:12) Ka gona Jesu o ile a swantšha “dibe” le “melato.” (Luka 11:4) Ge re dira sebe re ba “bakoloti” go Jehofa. Lediri la Segerika leo le fetoletšwego e le “lebalela” le ka bolela “go tlogela sekoloto ka go se nyake tefo.” Ka tlhaologanyo e itšego ge Jehofa a lebalela o phumola molato wo nkabego o tla lefišwa sekolotong sa rena ka tsela e itšego. Ka gona badira-dibe ba ba itsholago ba ka homotšega. Jehofa a ka se ke a nyaka tefo ya molato wo a ilego a o phumola!—Psalme 32:1, 2; bapiša le Mateo 18:23-35.

10, 11. (a) Taba e bolelwago ke lentšu “phomolwê” bjalo ka ge le hwetšwa go Ditiro 3:19 ke efe? (b) Botlalo bja tebalelo ya Jehofa bo bontšhwa bjang?

¹⁰ Go Ditiro 3:19 Beibele e diriša seka-polelo se sengwe gape seo se phelago go hlalosa tebalelo ya Modimo: “Ké xôna ithsoleng-xê, Le sokoloxê, xore Le phomolwê dibe tša lena.” Lentšu “phomolwê” le fetolela lediri la Segerika leo ge le šomišwa ka tsela ya tshwantšhanyo le ka bolelago go “timeletša, go fediša goba go senya.” Go ya ka diithuti tše dingwe, taba yeo e bolelwago ke ya go phumola mongwalo wa seatla. Se se be se kgonega bjang? Enke yeo e bego e dirišwa ka tlwaelo mehleng ya bogologolo e be e dirilwe ka motswako wo o bego o akaretša carbon, moti le meetse. Kapejana ka morago ga go diriša enke e bjalo, motho o be a ka tšea sepontšhe gomme a phumola mongwalo.

¹¹ Tlhaloso e botse ya botlalo bja tebalelo ya Jehofa ke yeo. Ge a re lebalela dibe tša rena go bjalo ka ge eka o tšea sepontšhe gomme a di phumola. Ga se ra swanela go boifa gore o tla re swara ka pelo malebana le dibe tše bjalo ka moso, gobane Beibele e utolla selo se sengwe gape ka kgaugelo ya Jehofa seo se tlogago se kgahliša: Ge a lebalela o a lebala!

“[Nka] se Hlwê ke Xopola Sebe sa Bôná”

12. Ge Beibele e bolela gore Jehofa o lebala dibe tša rena, na e bolela gore ga a kgone go di gopola gomme ke ka baka la’ng o araba bjalo?

¹² Jehofa o ile a holofetša mabapi le bao ba lego kgweranong e mpsha ka moporofeta Jeremia gore: “Ke tlo ba lebalêla molato wa bôná, ke se hlwê ke xopola sebe sa bôná.” (Jeremia 31:34) Na se se bolela gore ge Jehofa a lebalela ga a sa kgona go gopola dibe gape? Seo e ka se be sa therešo le gatee. Beibele e re botša ka dibe tša batho ba bantši bao Jehofa a ilego a ba lebalela go akaretša le Dafida. (2 Samuele 11:1-17; 12:1-13) Go molaleng gore Jehofa o sa tseba diphošo tšeo ba di dirilego gomme le rena re swanetše. Pego ya dibe tša bona gotee le ya tshokologo ya bona le go lebalelwa ke Modimo di boloketšwe go hola rena. (Ba-Roma 15:4) Ka gona-ge, ke eng seo se bolelwago ke Beibele ge e re Jehofa ga a sa “xopola” dibe tša bao a ba lebalelago?

13. (a) Ke’ng seo se akaretšwago go seo se bolelwago ke lediri la Sehebere leo le fetoletšwego e le “xopola”? (b) Ge Jehofa a re: “[Nka] se hlwê ke xopola sebe sa bôná,” o re kgonthišetša ka eng?

¹³ Lediri la Sehebere leo le fetoletšwego e le “xopola” le bolela se se fetago go fo gopola dilo tše di fetilego. Go ya ka Theological Wordbook of the Old Testament, le akaretša “tšhupetšo e oketšegilego ya go gata mogato o swanetšego.” Ka gona ka kgopolo ye, go “xopola” sebe go akaretša go gata mogato malebana le badira-dibe. Ge moporofeta Hosea a be a bolela ka ba-Isiraele bao ba bego ba na le hlogo tše thata gore, “O [Jehofa] tlo gopola melato ya bona,” moporofeta o be a bolela gore Jehofa o be a tla gata mogato malebana le bona bakeng sa go se sokologe ga bona. Ka gona, temana ka moka e oketša ka gore: “O tlo ba otla ka baka la dibe tša bona.” (Hosea 9:9, PK) Ka lehlakoreng le lengwe ge Jehofa a re, “[Nka] se hlwê ke xopola sebe sa bôná,” o re kgonthišetša gore ge a lebaletše modira-dibe yo a itsholago a ka se ke a mo gatela mogato ka dibe tšeo nakong e nngwe e tlago. (Hesekiele 18:21, 22) Ka gona o lebala ka kgopolo ya gore ga a re gopotše dibe tša rena leboelela e le gore a re latofatše goba a re otle leboelela. Ka gona Jehofa o re beela mohlala o mobotse kudu gore re o ekiše ditirišanong tša rena le ba bangwe. Ge go tsoga diphapano go kaone kudu gore re se ke ra tsošološa dikgopišo tše di fetilego tšeo re ilego ra dumela go di lebalela.

Go Thwe’ng ka Ditla-morago?

14. Ke ka baka la’ng tebalelo e sa bolele gore mofoši yo a itsholago o lokolotšwe go ditla-morago ka moka tša tsela ya gagwe e fošagetšego?

¹⁴ Na go ikemišetša go lebalela ga Jehofa go bolela gore modira-dibe yo a itsholago o lokolotšwe go ditla-morago ka moka tša tsela ya gagwe e fošagetšego? Le gatee. Re ka se dire sebe ka ntle le go otlwa. Paulo o ngwadile gore: “Se motho a se byalaxo, ké sôna se a tl’o xo se buna.” (Ba-Galatia 6:7) Re ka lebeletšana le ditla-morago tše dingwe tša tiro goba mathata a rena eupša ka morago ga go lebalela, Jehofa ga a dire gore mathata a re wele. Ge mathata a tsoga Mokriste ga se a swanela go nagana gore, ‘Mohlomongwe Jehofa o nkotlela dibe tše di fetilego.’ (Bapiša le Jakobo 1:13.) Ka lehlakoreng le lengwe, Jehofa ga a re šireletše go mafelelo ka moka a ditiro tša rena tše di fošagetšego. Tlhalo, boimana bjo bo sa nyakegego, malwetši a fetetšwago ka dikopano tša botona le botshadi, go lahlegelwa ke go botwa goba go hlompšhwa—tše ka moka e ka ba mafelelo a nyamišago a sebe gomme Jehofa a ka se re šireletše malebana le ona. Gopola gore gaešita le ge a ile a lebalela Dafida dibe tša gagwe mabapi le Batseba le Uria, Jehofa ga se a ka a šireletša Dafida mafelelong a kwešago bohloko a ilego a latela.—2 Samuele 12:9-14.

15, 16. Molao wo o begilwego go Lefitiko 5:20-26 o be o hola mofošetšwa le mofoši bjang?

¹⁵ Dibe tša rena di ka ba le mafelelo a mangwe gape. Ka mohlala, ela hloko pego e lego go Lefitiko 5:20-26. Molao wa Moše mo o bolela ka boemo bjo go bjona motho a dirago phošo e kgolo ka go tšea thoto ya mo-Isiraele-gotee le yena ka go e utswa, go amoga goba ka go pata. Modiradibe ke moka o gana gore o na le molato, a bile a sa boife go ena ka maaka. Ke taba ya batho ba babedi yeo e se nago bohlatse. Lega go le bjalo, ka morago mofoši o tlaišwa ke letswalo gomme a ipobola sebe sa gagwe. Gore a hwetše tebalelo ya Modimo, o swanetše go dira dilo tše dingwe gape tše tharo: a bušetše seo a bego a se tšere, a lefe motho yoo a utsweditšwego tefo ya 20 lekgolong gomme a nee kwana e le sehlabelo sa selefa. Ke moka molao o re: “Moperisita a mo dirêlê poêlanyô pele xa Morêna; ’me ó tlo lebalêlwa.”—Lefitiko 5:20-26; bapiša le Mateo 5:23, 24.

¹⁶ Molao wo e be e le tokišetšo ya kgaugelo ya Modimo. O be o hola motho yo a utsweditšwego yoo thoto ya gagwe e bego e bušwa, yo ka ntle le pelaelo a bego a ikwa a imologile kudu ge mofoši mafelelong a dumela sebe sa gagwe. Ka nako e swanago, molao o be o hola yoo letswalo la gagwe mafelelong le bego le mo tutueleditše gore a dumele molato wa gagwe le go lokiša phošo ya gagwe. Ka kgonthe, ge a be a ka gana go dira bjalo go be go ka se be le tebalelo ya Modimo go yena.

17. Ge ba bangwe ba kwešitšwe bohloko ke dibe tša rena, Jehofa o letetše gore re dire’ng?

¹⁷ Gaešita le ge re se ka tlase ga Molao wa Moše, o re nea temogo e bohlokwa ya monagano wa Jehofa go akaretša le kgopolo ya gagwe ka tebalelo. (Ba-Kolose 2:13, 14) Ge ba bangwe ba ile ba kwešwa bohloko goba ba dirwa bahlaselwa ba dibe tša rena, Jehofa o kgahlišwa ke ge re dira seo re ka se kgonago go ‘lokiša phošo.’ (2 Ba-Korinthe 7:11, NW) Se se akaretša go dumela sebe sa rena, go amogela molato wa rena gaešita le go kgopela tshwarelo go mofošetšwa. Ke moka re ka dira kgopelo go Jehofa motheong wa sehlabelo sa Jesu gomme ra hwetša kimologo ya letswalo le le hlwekilego le kgonthišetšo ya gore re lebaletšwe ke Modimo.—Ba-Hebere 10:21, 22.

18. Ke tsholo efe yeo e ka sepelago le tebalelo ya Jehofa?

¹⁸ Go fo swana le motswadi le ge e le ofe yo a nago le lerato, Jehofa a ka nea tebalelo gotee le tekanyo e itšego ya tsholo. (Diema 3:11, 12) Mokriste yo a itsholago a ka swanelwa ke go tlogela tokelo ya go hlankela e le mogolo, mohlanka wa bodiredi goba mmulamadibogo. E ka ba mo go kwešago bohloko go yena gore a lahlegelwe ka lebaka la nako e itšego ke ditokelo tšeo di bego di ratega go yena. Lega go le bjalo, tsholo e bjalo ga e bolele gore o lahlegetšwe ke go ratwa ke Jehofa goba gore Jehofa ga se a mo lebalela. Go oketša moo, re swanetše go gopola gore tsholo e tšwago go Jehofa ke bohlatse bja lerato la gagwe go rena. Go e amogela le go e diriša go hola rena kudu gomme go ka lebiša bophelong bjo bo sa felego.—Ba-Hebere 12:5-11.

19, 20. (a) Ge e ba o dirile diphošo, ke ka baka la’ng o sa swanela go ikwa eka o ka se fihlelelwe ke kgaugelo ya Jehofa? (b) Ke eng seo se tla ahla-ahlwago sehlogong se se latelago?

¹⁹ Ke mo go lapološago gakaakang go tseba gore re hlankela Modimo ‘yo a ikemišeditšego go lebalela’! Jehofa o bona go feta dibe tša rena le diphošo tša rena. (Psalme 130:3, 4) O tseba seo se lego ka dipelong tša rena. Ge e ba o e-kwa eka pelo ya gago e robegile e bile e setlegile ka baka la diphošo tša nakong e fetilego, o se ke wa phetha ka gore o ka se fihlelelwe ke kgaugelo ya Jehofa. Go sa šetšwe diphošo tšeo o di dirilego, ge e ba o itshotše e le ka kgonthe, o gatile megato ya go lokiša phošo gomme o rapeletše tebalelo ya Jehofa go tšwa pelong motheong wa madi a Jesu a tšholotšwego, o ka ba le kholofelo e tletšego ya gore mantšu a 1 Johane 1:9 a šoma go wena: “Xe re ipolêla dibe tša rena, xôna ka xe Yêna è le wa pôtêxô le tokô, ó re lebalêla dibe a re hlatswa bokxôpô ka moka.”

²⁰ Beibele e re kgothaletša gore re etše tebalelo ya Jehofa ditirišanong tša rena seng sa rena. Eupša ke go fihla bokgoleng bofe moo re ka letelwago gore re lebalele re be re lebale ge ba bangwe ba re senyetša? Se se tla ahla-ahlwa sehlogong se se latelago.

[Mengwalo ya tlase]

O be o tla Araba Bjang?

◻ Ke ka baka la’ng Jehofa a ‘ikemišeditše go lebalela’?

◻ Beibele e hlalosa bjang botlalo bja tebalelo ya Jehofa?

◻ Ge Jehofa a lebalela, o lebala ka kgopolo efe?

◻ Ke eng seo Jehofa a letelago gore re se dire ge ba bangwe ba kwešitšwe bohloko ke diphošo tša rena?

[Seswantšho go letlakala 12]

Ge ba bangwe ba kwešitšwe bohloko ke dibe tša rena, Jehofa o letela gore re dire ditokišo