‘Modimo O Re Ratile Ka Mokgwa Woo’
“Xe Modimo a re ratile ka mokxwa woo, xôna xo swanetše xe re ratana.”—1 JOHANE 4:11.
1. Ka March 23 ka morago ga ge letšatši le sobetše, ke ka baka la’ng batho ba dimilione ba tla bokana Diholong tša Mmušo le mafelong a mangwe a diboka go dikologa lefase?
KA Sontaga, March 23, 1997 ka morago ga ge letšatši le sobetše, ga go na pelaelo gore go tla ba le batho ba fetago 13 000-000 lefaseng ka bophara bao ba tlago go bokana Diholong tša Mmušo le mafelong a mangwe a diboka ao a dirišwago ke Dihlatse tša Jehofa. Ka baka la’ng? Ka gobane dipelo tša bona di kgomilwe ke pontšho e kgolo kudu ya Modimo ya lerato go batho. Jesu Kriste o ile a lebiša tlhokomelo ponagatšong yeo e kgolo ya lerato la Modimo, ge a re: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.”—Johane 3:16.
2. Ke dipotšišo dife tšeo ka moka ga rena re ka ipotšišago tšona ka mo go holago mabapi le karabelo ya rena leratong la Modimo?
2 Ge re dutše re naganišiša ka lerato leo Modimo a le bontšhitšego, re dira gabotse go ipotšiša gore, ‘Na ke leboga e le ka kgonthe seo Modimo a se dirilego? Na tsela yeo ke dirišago bophelo bja-ka ka yona e nea bohlatse bja tebogo yeo?’
“Modimo ke Lerato”
3. (a) Ke ka baka la’ng go bontšha lerato e se mo go sa tlwaelegago go Modimo? (b) Matla le bohlale di bonagatšwa bjang medirong ya gagwe ya tlholo?
3 Go bontšha lerato ka bogona ga se selo se se sa tlwaelegago lehlakoreng la Modimo ka gobane “Modimo ke lerato.” (1 Johane 4:8, PK) Lerato ke seka se segolo sa gagwe. Ge a be a lokišeletša lefase bakeng sa go dulwa ke batho, go tšweletša ga gagwe dithaba le go kgoboketša meetse ka matsheng le mawatleng e be e le pontšho e makatšago ya matla. (Genesi 1:9, 10) Ge Modimo a be a hlama modikologo wa meetse le modikologo wa okisetšene, ge a be a hlama diphedi tše dinyenyane-nyenyane tše di sa balegego le mehuta-huta ya dimela bakeng sa go fetola dikarolo tša dikhemikhale tša lefase gore e be sebopego seo batho ba bego ba ka se šila e le gore se thekge maphelo a bona, ge a be a hlama medikologo ya rena ya tlhago ya nako gore e dumelelane le botelele bja matšatši le bja dikgwedi polaneteng ya Lefase, se se bonagaditše bohlale bjo bogolo. (Psalme 104:24; Jeremia 10:12) Lega go le bjalo, se se lemogegago kudu le go feta tlholong ya kgonthe ke ponagatšo ya lerato la Modimo.
4. Tlholong e bonwago, ke pontšho efe ya lerato la Modimo yeo ka moka ga rena re swanetšego go e bona le go e leboga?
4 Magalagapa a rena a re botša ka lerato la Modimo ge re kgema seenywa se boleta sa go butšwa seo go lego molaleng gore se be se sa direlwa feela go re fepa eupša gape le go re tlišetša lethabo. Mahlo a rena a bona bohlatse bjo bo sa fošego bja lona go sobeleng ga letšatši mo go botse kudu, magodimo a tletšego dinaledi bošegong bjo bo apogilego, dibopego tše di fapa-fapanego le mebala e tagilego ya matšoba, makatika a diphoofolo tše dinyenyane le go myemyela go borutho ga bagwera. Dinko tša rena di dira gore re le lemoge ge re hema monkgo o bose wa matšoba a seruthwane. Ditsebe tša rena di a le kwa ge re theetša modumo wa diphororo, melodi ya dinonyana le mantšu a batho bao re ba ratago. Re a le kwa ge motho yo re mo ratago a re gokarela ka borutho. Diphoofolo tše dingwe di neilwe bokgoni bja go bona, go kwa goba go dupelela dilo tšeo batho ba sa kgonego go di dira. Eupša batho bao ba dirilwego ka seswantšho sa Modimo, ba na le bokgoni bja go kwa lerato la Modimo ka mokgwa woo ka wona go se nago phoofolo yeo e ka kgonago go le kwa.—Genesi 1:27.
5. Jehofa o ile a bontšha bjang lerato le le tletšego go Adama le Efa?
5 Ge Jehofa Modimo a be a bopa batho ba pele, e lego Adama le Efa, o ile a ba fara-fara ka gohle ka bohlatse bja lerato la gagwe. O be a bjetše serapa, e lego paradeise gomme a dirile gore dihlare tša mehuta ka moka di mele go yona. O be a tšweleditše noka bakeng sa go e nošetša gomme a e tlatša ka dinonyana tše di kgahlišago le diphoofolo. O ile a nea Adama le Efa se ka moka e le legae la bona. (Genesi 2:8-10, 19) Jehofa o ile a dirišana le bona bjalo ka bana ba gagwe, e lego karolo ya lapa la gagwe la legohle. (Luka 3:38) Ka ge a be a tšweleditše Edene e le mohlala, Tate wa legodimong wa batho ba ba babedi ba pele o ile a bea pele ga bona kabelo e kgotsofatšago ya go katološa Paradeise gore e aparetše lefase. Lefase ka moka le be le swanetše go dulwa ke bana ba bona.—Genesi 1:28.
6. (a) O ikwa bjang mabapi le tsela ya borabele yeo e tšerwego ke Adama le Efa? (b) Ke’ng seo mo gongwe se ka bontšhago gore re ithutile go seo se diregilego Edene le gore re hotšwe ke tsebo yeo?
6 Lega go le bjalo, go se go ye kae Adama le Efa ba ile ba lebana le teko ya go kwa, e lego teko ya potego e sa kwanantšhego. Mathomong o tee gomme ka morago le yo mongwe ba ile ba palelwa ke go bontšha tebogo bakeng sa lerato leo ba bego ba le neilwe. Seo ba se dirilego se be se tšhoša. E bile se se ka se lokafatšwego! Ka baka leo, ba ile ba lahlegelwa ke tswalano ya bona le Modimo, ba rakwa lapeng la gagwe gomme ba ntšhetšwa ka ntle ga Edene. Rena lehono re sa dutše re e-kwa mafelelo a sebe sa bona. (Genesi 2:16, 17; 3:1-6, 16-19, 24; Ba-Roma 5:12) Eupša na re ithutile go seo se diregilego? Re arabela bjang leratong la Modimo? Na diphetho tšeo re di dirago letšatši le lengwe le le lengwe di bontšha gore re leboga lerato la gagwe?—1 Johane 5:3.
7. Go sa šetšwe seo Adama le Efa ba se dirilego, Jehofa o bontšhitše bjang lerato go bana ba bona?
7 Gaešita le go hloka tebogo mo gogolo mo batswadi ba rena ba pele ba batho ba go bontšhitšego bakeng sa tšohle tšeo Modimo a bego a ba diretše tšona ga se gwa ka gwa fediša lerato la Modimo ka noši. Ka baka la go kwela batho bao ba bego ba sa hlwa ba belegwa ka nako yeo bohloko—go akaretša le rena bao re phelago lehono—Modimo o ile a dumelela Adama le Efa gore ba godiše lapa pele ba e-hwa. (Genesi 5:1-5; Mateo 5:44, 45) Ge nkabe a se a dira seo, ga go le o tee wa rena yo a ka bego a ile a belegwa. Ka go utollwa mo go tšwelago pele ga thato ya gagwe, Jehofa gape o ile a nea motheo wa kholofelo bakeng sa bohle bao e lego bana ba Adama bao ba bego ba tla bontšha tumelo. (Genesi 3:15; 22:18; Jesaya 9:5, 6) Thulaganyo ya gagwe e be e akaretša tsela yeo ka yona batho ba ditšhaba ka moka ba bego ba ka hwetša seo Adama a se lahlilego, e lego bophelo bjo bo phethagetšego bjalo ka ditho tše amogelegago tša lapa la Modimo la legohle. O dirile se ka go nea topollo.
Ke ka Baka La’ng go Nyakega Topollo?
8. Ke ka baka la’ng Modimo a be a ka se fo laela gore gaešita le ge Adama le Efa ba be ba swanelwa ke go hwa, ga go na le o tee wa bana ba bona ba ba kwago yo a bego a tla swanelwa ke go hwa?
8 Na e be e le mo go nyakegago e le ka kgonthe gore theko ya topollo yeo e lego ka sebopego sa bophelo bja motho e lefše? Na Modimo o be a ka se ke a fo laela gore gaešita le ge Adama le Efa ba be ba swanetše go hwa ka baka la borabele bja bona, bana ba bona ka moka bao ba bego ba tla kwa Modimo ba be ba ka kgona go phela ka mo go sa felego? Go tšwa ponong ya motho ya go bonela kgaufsi, seo se be se ka kwala e le sa tlhaologanyo. Lega go le bjalo, Jehofa ke “morati wa toko le toka.” (Psalme 33:5, NW) Ke feela ka morago ga gore Adama le Efa ba be badira-dibe moo ba ilego ba ba le bana; ka gona ga go le o tee wa bana bao yo a belegwego a phethagetše. (Psalme 51:5) Ka moka ga bona ba be ba e-na le bohwa bja sebe gomme kotlo ya sebe ke lehu. Ge nkabe Jehofa a ile a hlokomologa se, ke mohlala wa mohuta ofe woo seo se ka bego se o beetše ditho tša lapa la gagwe la legohle? O be a ka se ke a hlokomologa ditekanyetšo tša gagwe ka noši tša go loka. O be a hlompha dinyakwa tša toka. Ga go le o tee yo a bego a ka swaya phošo ka mo go swanetšego tsela yeo Modimo a ilego a swaragana ka yona le dikgang tše di bego di akaretšwa.—Ba-Roma 3:21-23.
9. Go ya ka tekanyetšo ya Modimo ya toka, ke topollo ya mohuta mang yeo e bego e nyakega?
9 Ka gona, motheo o swanetšego o be o ka newa bjang bakeng sa go phološa bana ba Adama bao ba bego ba tla bontšha go kwa mo go lerato go Jehofa? Ge e ba motho yo a phethagetšego a be a ka hwa ka mokgwa wa sehlabelo, toka e be e ka dumelela gore bohlokwa bja bophelo bjoo bjo bo phethagetšego bo nee seširo bakeng sa dibe tša bao ba bego ba tla amogela topollo ka tumelo. Ka ge sebe sa motho o tee Adama, se ile sa ikarabela bakeng sa go dira lapa ka moka la motho gore e be badira-dibe, madi a tšholotšwego a motho yo mongwe yo a phethagetšego, e le a mohola o lekanago, a be a tla leka-lekanya dikala tša toka. (1 Timotheo 2:5, 6) Eupša motho yo bjalo o be a ka hwetšwa kae?
E be e le Tahlegelo e Kgolo Gakaaka’ng?
10. Ke ka baka la’ng bana ba Adama ba be ba sa kgone go nea topollo e nyakegago?
10 Gare ga bana ba Adama wa modira-dibe, go be go se le o tee yo a bego a ka nea seo se bego se nyakega e le gore go rekollwe ditebelelo tša bophelo tšeo Adama a di lobilego. “Motho a ka se kê a bá a lopolla ngwana wabô, a nthša sa xo mmoêlanya le Modimo. Sa xo rêkolola moy’a-motho se a hlôkwa; a bá a di lesa moká, xo phela xo ya xo ile, le xo se bone lebitla.” (Psalme 49:7-9) Go e na le go tlogela batho ba se na kholofelo, Jehofa ka boyena o ile a dira tokišetšo ka kgaugelo.
11. Ke ka go diriša eng moo Jehofa a ilego a nea bophelo bjo bo phethagetšego bja motho bjo bo bego bo nyakega bakeng sa topollo e swanetšego?
11 Jehofa ga se a ka a romela morongwa lefaseng bakeng sa go itira eka o hwile ka go gafa mmele wo a ikapešitšego wona wa nama mola a tšwela pele a phela e le moya. Go e na le moo, ka go dira mohlolo woo e lego Modimo, Mmopi a nnoši a bego a ka o rulaganya, o ile a fetišetša matla a bophelo le semelo sa morwa wa legodimong popelong ya mosadi, e lego Maria morwedi wa Eli wa moloko wa Juda. Matla a šomago a Modimo, e lego moya o mokgethwa, a ile a šireletša go gola ga ngwana ka popelong ya mmagwe gomme a belegwa e le motho yo a phethagetšego. (Luka 1:35; 1 Petro 2:22) Ka gona yena yo go yena ka noši o be a e-na le theko yeo e bego e nyakega bakeng sa go nea topollo yeo e bego e tla kgotsofatša ka mo go tletšego dinyakwa tša toka ya Modimo.—Ba-Hebere 10:5.
12. (a) Ke ka kgopolo efe Jesu e lego “Morwa . . . Mo-tswalwa-esi” wa Modimo? (b) Go romela ga Modimo motho yo bakeng sa go nea topollo go gatelela bjang lerato la Gagwe go rena?
12 Ke ofe wa barwa ba gagwe ba legodimong ba dimiriate yo Jehofa a ilego a mo nea kabelo ye? Ke yo a hlaloswago ka Mangwalong e le “Morwa . . . Mo-tswalwa-esi” wa gagwe. (1 Johane 4:9) Polelwana ye e dirišwa go hlalosa e sego seo a bilego sona ge a belegwa e le motho, eupša seo a bego a le sona pele ga moo magodimong. Ke yena a nnoši yo Jehofa a mmopilego ka go lebanya ka ntle le go dirišana le motho le ge e le ofe yo mongwe. Ke Leitšibulo la tlholo yohle. Ke yena yo a ilego a dirišwa ke Modimo go dira gore dibopiwa tše dingwe ka moka di be gona. Barongwa ke barwa ba Modimo, go etša ge Adama e be e le morwa wa Modimo. Eupša Jesu o hlaloswa e le yo a nago le “letaxô la xaxwe, letaxô la Mo-tswalwa-esi wa Tat’axwe.” O bolelwa e le yo a dulago “difarong tša Tat’axwe.” (Johane 1:14, 18) Tswalano ya gagwe le Tate ke ya kgaufsi, e tseneletšego le ya lerato. O na le lerato le le swanago le la Tatagwe ka batho. Diema 8:30, 31 e bontšha kamoo Tatagwe a ikwago ka gona ka Morwa yo le kamoo Morwa a ikwago ka gona ka batho: “Kè mo [Jehofa] kxahla mehla yohle, kè bapala pele xa xaxwe ka mehla, . . . kè [Jesu, Mošomedi yo Mogolo wa Jehofa, e lego go mothofatšwa ga bohlale] kxahlwa ke bana ba batho.” E bile Morwa yo yo bohlokwa kudu yo Modimo a mo rometšego lefaseng bakeng sa go nea topollo. Ka baka leo, polelo ya Jesu ke ya bohlokwa gakaakang ya gore: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši”!—Johane 3:16.
13, 14. Pego ya Beibele ya go leka ga Aborahama go gafa Isaka e swanetše go re thuša bjang go leboga seo Jehofa a se dirilego? (1 Johane 4:10)
13 Go re thuša go kwešiša ka tekanyo e itšego seo se se se bolelago, kgale pele ga ge Jesu a e-tla lefaseng, Modimo o ile a laela Aborahama nywageng e ka bago 3890 e fetilego gore: “Tšea morwa wa xaxo e lexo o tee, yo O mo rataxo, yêna Isaka, O yê naxeng ya Moriya; xôna moo O mo dirê sehlabêlô thabeng ya xôna, ye ke tl’o xo Xo laetša yôna.” (Genesi 22:1, 2) Aborahama o ile a kwa ka tumelo. Ipee boemong bja Aborahama. Go thwe’ng ge e ba yoo e be e le morwa wa gago, morwa wa gago a nnoši yo o mo ratago kudu? O be o tla ba le maikwelo afe ge o dutše o phapha dikgong bakeng sa sehlabelo, o tšea leeto la matšatši a mmalwa o e-ya nageng ya Moriya, gomme o bea morwa wa gago aletareng?
14 Ke ka baka la’ng motswadi wa kwelobohloko a e-na le maikwelo a bjalo? Genesi 1:27 e re Modimo o bopile motho ka seswantšho sa Gagwe. Maikwelo a rena a lerato le kwelobohloko a bonagatša lerato le kwelobohloko tša Jehofa ka noši ka tsela e lekanyeditšwego kudu. Tabeng ya Aborahama, Modimo o ile a tsena ditaba gare moo e lego gore Isaka o ile a se ke a dirwa sehlabelo e le ka kgonthe. (Genesi 22:12, 13; Ba-Hebere 11:17-19) Lega go le bjalo, tabeng ya gagwe ka noši Jehofa ga se a ka a goma kgaufsi le go nea topollo, gaešita le ge e ile ya dirwa ka tahlegelo e kgolo go yena ka noši gotee le Morwa wa gagwe. Seo se dirilwego e be e se ka baka la tlamo le ge e le efe ka lehlakoreng la Modimo, eupša go e na le moo, e le pontšho ya botho bjo bo sa swanelago ka mo go fetišišago. Na re bo leboga ka mo go tletšego?—Ba-Hebere 2:9.
Seo e se Dirago Gore se Kgonege
15. Topollo e kgomile bjang maphelo gaešita le tshepedišong ye ya gona bjale ya dilo?
15 Tokišetšo yeo e lerato yeo e dirilwego ke Modimo e na le mafelelo a magolo maphelong a bao ba e amogelago ka tumelo. Mathomong ba be ba arogantšwe le Modimo ka baka la sebe. Go etša ge Lentšu la gagwe le bolela, e be e le ‘manaba ka gobane menagano ya bona e be e le medirong yeo e bego e le kgopo.’ (Ba-Kolose 1:21-23, NW) Eupša ba ile ba “boêlanywa le Modimo ka xo hwa xa Morwa wa xaxwe.” (Ba-Roma 5:8-10) Ka ge ba fetotše tsela ya bona ya bophelo le ka ge ba amogetše tebalelo yeo Modimo a e dirago gore e kgonege go bao ba bontšhago tumelo sehlabelong sa Kriste, ba šegofatšwa ka go ba le letswalo le le hlwekilego.—Ba-Hebere 9:14; 1 Petro 3:21.
16. Ke ditšhegofatšo dife tšeo di neilwego ba mohlatswana o monyenyane ka baka la go dumela ga bona topollong?
16 Jehofa o fetišeditše go palo e lekanyeditšwego ya ba, e lego mohlatswana o monyenyane, kgaugelo e sa swanelago ya go kopanela le Morwa wa gagwe Mmušong wa legodimong, ka kgopolo ya go phetha morero wa mathomo wa Modimo wa lefase. (Luka 12:32) Ba ba tšerwe “xo ba meloko yohle le maleme ohle le dithšaba tšohle le xo Ba-ntlê bohle, [go ba] maxoši le baperisita ba Modimo wa rena; ’me ba tlo buša mo lefaseng.” (Kutollo 5:9, 10) Go bona ba, moapostola Paulo o ile a ngwala gore: “Le filwe môya wa xo ba bana, woo, xe re na le wôna, ra hlaboša mantšu ra re: Baba! Tata! Môya-mokxêthwa Yêna mong ké hlatse ya xo kwana le môya wa rena, hlatse ya xo re re bana ba Modimo. Byale, xe re le bana, xôna re baji ba bohwa, baji ba bohwa ba Modimo, ba xo ja bohwa le Kriste.” (Ba-Roma 8:15-17) Ka go ba ba amogetšwego ke Modimo bjalo ka barwa ba gagwe, ba newa tswalano e bohlokwa kudu yeo Adama a e lahlilego; eupša barwa ba ba tla newa ditokelo tše oketšegilego tša tirelo ya legodimong—e lego selo seo Adama a sa kago a ba le sona le ka mohla. Ga go makatše ge moapostola Johane a itše: “Bônang! Ké leratô le lekaaka’ng le Modimo a re seditšexo ka lôna, xe re bile re bitšwa bana ba Modimo!” (1 Johane 3:1) Go batho ba bjalo Modimo ga a bontšhe feela lerato le theilwego melaong ya motheo (a·gaʹpe) eupša gape le maikwelo a borutho (phi·liʹa), e lego seka sa tlemo yeo e lego gona magareng ga bagwera ba kgonthe.—Johane 16:27.
17. (a) Go bohle bao ba bontšhago tumelo topollong, ke sebaka sefe seo se newago? (b) “Tokoloxô ya xe bana ba Modimo bà e-ya letaxong” e tla bolela’ng go bona?
17 Le go ba bangwe gape—bohle bao ba bontšhago tumelo tokišetšong ya Modimo ya go fa kudu ya bophelo ka Jesu Kriste—Jehofa o bula sebaka sa go hwetša tswalano e bohlokwa yeo Adama a e lahlilego. Moapostola Paulo o hlalositše ka gore: “Thloloxêlô ya dibopya [tlholo yeo e lego batho bao ba tšwago go Adama] ké xo letêla kutollô yeo ya bana ba Modimo [ke gore, ba letela nako ya ge go e-ba molaleng kudu gore barwa ba Modimo bao e lego baja-bohwa gotee le Kriste ba Mmušo wa legodimong ba gata mogato o nepagetšego bakeng sa batho]. Xobane dibopya di imêlwa ke lôna lefêla [ba be ba belegetšwe sebeng ba e-na le tebelelo ya lehu gomme go be go se kamoo ba bego ba ka ikhunolla ka gona] dì sa le rate: di na le e a di rwešitšexo; E le xore xo bê le kholofêlô [e neilwego ke Modimo] ya xore le tšôna dibopya di tlo hunollwa bohlankeng bya thsenyêxô, di bê le tokoloxô ya xe bana ba Modimo bà e-ya letaxong.” (Ba-Roma 8:19-21) Tokologo yeo e tla bolela’ng? Gore ba lokolotšwe bokgobeng bja sebe le lehu. Ba tla ba le phethego ya monagano le mmele, Paradeise e le legae la bona le bophelo bjo bo sa felego bjo go bjona ba tlago go thabela phethego ya bona gomme ba bontšha tebogo ya bona go Jehofa, Modimo a nnoši wa therešo. Le gona se ka moka se dirilwe bjang gore se kgonege? Ka sehlabelo sa topollo sa Morwa yo a tswetšwego a nnoši wa Modimo.
18. Ka March 23 ka morago ga ge letšatši le sobetše, re tla be re dira’ng, gomme ka baka la’ng?
18 Ka Nisani 14, 33 C.E. ka phapošing ya ka godimo kua Jerusalema, Jesu o ile a thea Segopotšo sa lehu la gagwe. Go gopolwa ga ngwaga le ngwaga ga lehu la gagwe go fetogile tiragalo e bohlokwa maphelong a Bakriste ka moka ba therešo. Jesu ka boyena o ile a laela gore: “Dirang byalo xore e bê xo nkxopola.” (Luka 22:19) Ka 1997 Segopotšo se tla swarwa ka morago ga ge letšatši le sobetše ka March 23 (e lego nakong ya ge Nisani 14 e thoma). Letšatšing leo, ga go na selo seo se ka bago bohlokwa kudu go feta go ba gona bakeng sa tiragalo ye ya Segopotšo.
O be o tla Araba Bjang?
◻ Ke ka ditsela dife Modimo a bontšhitšego lerato le le tletšego bakeng sa batho?
◻ Ke ka baka la’ng go be go nyakega bophelo bjo bo phethagetšego bja motho bakeng sa go lopolla bana ba Adama?
◻ Jehofa o neile topollo ka tahlegelo efe e kgolo?
◻ Ke eng seo topollo e se dirago gore se kgonege?
[Seswantšho go letlakala 10]
Modimo o neile Morwa wa gagwe yo a tswetšwego a nnoši