Go Thuša Batho Go batamela Go Jehofa

“Xa xo e a tlaxo xo Tate xe e se ka Nna.”​—JOHANE 14:6.

1. Ke taelo efe yeo Jesu yo a tsošitšwego a e neilego barutiwa ba gagwe, gomme ge Dihlatse tša Jehofa di dutše di e latela mafelelo e ile ya ba afe?

JESU KRISTE o laetše balatedi ba gagwe go “[dira] dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa.” (Mateo 28:​19) Nywageng e lesome e fetilego, Dihlatse tša Jehofa di thušitše batho ba fetago dimilione tše tharo go tla go Modimo, ge nako e dutše e feta di ba kolobetša e le pontšho ya go ineela ga bona go yena gore ba dire thato ya gagwe. Re thaba gakaakang go ba thuša gore ba batamele Modimo!​—Jakobo 4:8.

2. Gaešita le ge ba bantši ba bafsa ba kolobetšwa, ke eng seo se diregilego?

² Lega go le bjalo, dinageng tše dingwe moo barutiwa ba bantši ba bafsa ba kolobeditšwego, ga se gwa ba le koketšego e sepedišanago le palo ya bagoeledi ba Mmušo. Ke therešo gore go swanetše go naganwa ka bao ba hwilego, ka ge tekanyo ya batho bao ba hwago ngwaga le ngwaga e le mo e ka bago o tee lekgolong. Lega go le bjalo, nywageng e sego kae e fetilego palo e kgolo e ile ya wa ka lebaka le itšego. Ka baka la’ng? Sehlogo se le se se latelago di tla hlahloba kamoo batho ba batametšwago go Jehofa ka gona le mabaka a ka bego a dirile ba bangwe gore ba we.

Morero wa Boboledi bja Rena

3. (a) Thomo yeo e gafetšwego barutiwa ba Jesu e sepedišana bjang le ya morongwa yo a bolelwago go Kutollo 14:6? (b) Ke tsela efe yeo e itlhatsetšego e le e šomago go tsoša kgahlego ya batho mabapi le molaetša wa Mmušo, eupša go na le bothata bofe?

³ ‘Lebakeng le la bofelo’ barutiwa ba Jesu ba romilwe go phatlalatša “tsebo ya therešo” (NW) mabapi le “Ebangedi yé ya mmušô.” (Daniele 12:4; Mateo 24:​14) Thomo ya bona e sepedišana le ya morongwa yo ‘a swerego Ebangedi ya neng le neng ya go tsebišwa ba ba agilego lefaseng, ditšhaba tšohle le meloko yohle, le maleme ohle le merafo yohle.’ (Kutollo 14:6) Lefaseng le leo le swaregilego kudu ka ditaba tše tlwaelegilego, ka kakaretšo tsela e atlegago kudu ya go dira gore batho ba kgahlegele Mmušo wa Modimo le go ba thuša gore ba batamele kgaufsi le Jehofa ke go ba botša ka kholofelo ya bophelo bjo bo sa felego lefaseng la paradeise. Le ge se e le se se kwešišegago, bao ba gweranago le batho ba Modimo bakeng sa go tsena Paradeiseng feela, maoto a bona ga se a tsema ka mo go tiilego tseleng e tshesane e išago bophelong.​—Mateo 7:​13, 14.

4. Go ya ka Jesu le morongwa yo a fofago bogareng bja legodimo, morero wa modiro wa rena wa boboledi ke ofe?

⁴ Jesu o boletše gore: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3) Morongwa yo a fofago gare ga legodimo o bolela “Ebangedi ya neng le neng” gomme o botša bao ba dulago lefaseng gore: “Boifang Modimo Le rêtê Yêna, xobane nakô ya kahlolô ya xaxwe e tlile. Le khunamêlê Yêna E a dirilexo lexodimo le lefase le lewatlê le didiba tša meetse.” (Kutollo 14:7) Ka gona morero o mogolo wa go bolela ga rena ditaba tše di lokilego ke go thuša batho gore ba batamele Jehofa ka Kriste Jesu.

Karolo ya Rena Modirong wa Jehofa

5. Ke mantšu afe a boletšwego ke Paulo le Jesu ao a bontšhago gore re dira modiro wa Jehofa e sego wa rena?

⁵ Moapostola Paulo ge a be a ngwalela Bakriste-gotee le yena ba ba tloditšwego o ile a bolela ka “bodiredi bja . . . poelano” (PK) gomme o re Modimo o boelanya batho le yena motheong wa sehlabelo sa Jesu Kriste sa topollo. Paulo o re “e ke re molomo wa Modimo” le gore “re kxopêla ’bakeng sa Kriste re re: A nke Le boêlanywê le Modimo!” A kgopolo e thabišago! Go sa šetšwe ge e ba re le ‘batseta ba ba tloditšwego bakeng sa Kriste’ goba re le baemedi bao ba nago le dikholofelo tša lefaseng, le ka mohla ga se ra swanela go lebala gore modiro wo ke wa Jehofa e sego wa rena. (2 Ba-Korinthe 5:​18-20) Ge e le gabotse Modimo ke yena a gogago batho gomme o ruta bao ba tlago go Kriste. Jesu o boletše gore: “Xa xo motho e a kxônaxo xo tla xo Nna, xe a sa xôxwe ke Tate e a nthomilexo; xomme ké Nna ke tl’o xo mo tsoša ka ’tšatši la mafêlêlô. Baporofeta ba ngwadile ba re: Bohle e tlo ba ba rutilwexo ke Modimo. Bohle ba ba kwaxo tše Tate a di boletšexo ’me ba ithuta, ba tla xo Nna.”​—Johane 6:​44, 45.

6. Jehofa o šišinya ditšhaba bjang e sa le pele gomme ka nako e swanago ke bomang bao ba hwetšago tšhireletšego ‘ntlong’ ya gagwe ya borapedi?

⁶ Mehleng ye ya bofelo, Jehofa o goga batho bjang gomme a ba bulela “mojako wa tumelo”? (Ditiro 14:​27, mongwalo wa ka tlase wa NW; 2 Timotheo 3:1) Tsela ya motheo ke ya gore Dihlatse tša gagwe di bolele melaetša ya gagwe ya phološo le ya kahlolo malebana le tshepedišo ye e kgopo ya dilo. (Jesaya 43:​12; 61:​1, 2) Kgoeletšo ye ya lefase ka bophara e šišinya ditšhaba​—e lego sešupo sa tšhwalalanyo ya kahlolo yeo e tlago kgaufsinyane. Ka nako e swanago, batho bao ba lego “bohlokwa” mahlong a Modimo ba ntšhwa tshepedišong ye ya dilo gomme ba hwetša tšhireletšego ‘ntlong’ ya gagwe ya borapedi bja therešo. Ka gona Jehofa o phethagatša mantšu a gagwe a boporofeta ao a ngwadilwego ke Hagai: “Le dithšaba ka moka ke tlo di šišinya, xwa tseb’o tla matsaka a dithšaba ka moka; ’me Ntlo yé ke tlo e tlatša letaxô.”​—Hagai 2:​6, 7, mongwalo wa ka tlase wa NW; Kutollo 7:​9, 15.

7. Jehofa o bula bjang dipelo tša batho gomme a gogela batho go yena le Morwa wa gagwe?

⁷ Jehofa o bula dipelo tša batho ba ba ba boifago Modimo​—“dilo tše botse kudu ditšhabeng ka moka”​—e le gore ba ‘kwe tše di bolelwago’ ke Dihlatse tša gagwe. (Hagai 2:​7, Jewish Publication Society; Ditiro 16:​14) Go etša lekgolong la pele la nywaga, ka dinako tše dingwe Jehofa o diriša barongwa ba gagwe gore ba hlahle Dihlatse tša gagwe go ya bathong bao ba botegago bao ba mo lletšego bakeng sa thušo. (Ditiro 8:​26-31) Ge batho ba dutše ba ithuta ka ditokišetšo tše botse tšeo Modimo a ba diretšego tšona ka Jesu Kriste Morwa wa gagwe, ba gogelwa go Jehofa ke lerato la gagwe. (1 Johane 4:​9, 10) Ee, Modimo o gogela batho go yena le go Morwa wa gagwe ka “botho” bja gagwe goba “lerato le le botegago.”​—Jeremia 31:3, mongwalo wa ka tlase wa NW.

Ke Bomang Bao Jehofa a ba Gogago?

8. Ke batho ba mohuta ofe bao Jehofa a ba gogago?

⁸ Jehofa o gogela bao ba Mo nyakago go yena le go Morwa wa gagwe. (Ditiro 17:​27) Ba ba akaretša batho bao ba ‘llago ba hlokofetše ka go bona makgapha a a dirwago’ Bojakaneng, ge e le gabotse le lefaseng ka moka. (Hesekiele 9:4) Ba ‘lemoga dinyakwa tša bona tša moya.’ (Mateo 5:3, NW) Ruri ke “babôtla [“baikokobetši,” mongwalo wa ka tlase wa NW] bohle ba lefase,” bao ba tlago go phela lefaseng la paradeise ka mo go sa felego.​—Tsefanya 2:3.

9. Jehofa o kgona bjang go bona batho bao “ba sekametšego ka mo go swanetšego bophelong bjo bo sa felego” gomme o ba goga bjang?

⁹ Jehofa o kgona go bala pelo ya motho. Kgoši Dafida o ile a botša morwa’gwe Salomo gore: “Morêna ó fenyêka dipelo ka moka, ó hlaoloxanya thopa tšohle tša dikêlêlô; xe O mo nyaka, ó tlo re: Ké Nna é!” (1 Koronika 28:9) Jehofa o kgona go bona motheong wa boemo bja pelo le moya wa motho, goba boemo bja motho bja kgopolo bjo bo mo laolago, ge e ba motho a ka arabela ditokišetšong tša Modimo bakeng sa tebalelo ya dibe le kholofelo ya bophelo bjo bo sa felego tshepedišong e mpsha ya Modimo ya toko. (2 Petro 3:​13) Ka Lentšu la gagwe leo le bolelwago le go rutwa ke Dihlatse tša gagwe, Jehofa o gogela “bohle bao ba sekametšego ka mo go swanetšego bophelong bjo bo sa felego” (NW) gomme ba “dumêla” go yena le go Morwa wa gagwe.​—Ditiro 13:48.

10. Ke eng seo se bontšhago gore go goga ga Jehofa batho ba bangwe gomme a sa goge ba bangwe ga go akaretše go laolela pheletšo e sa le pele?

¹⁰ Na go goga ga Jehofa ba bangwe gomme a sa goge ba bangwe ga go akaretše sebopego sa go laolela pheletšo e sa le pele? Le gatee-tee! Go goga batho ga Modimo go ithekgile ka dikganyogo tša bona. O hlompha tokologo ya bona ya boikgethelo. Pele ga badudi ba lefase lehono Jehofa o bea yona kgetho yeo a kilego a e bea pele ga ba-Isiraele nywageng e fetago 3 000 e fetilego ge Moše a be a re: “Lehono fá pele xa xaxo ke beile bophelô le tše botse, le lehu le tše mpe. . . . Lehono lexodimo le lefase ké dihlatse tša-ka xe ke beile bophelô le lehu, le thšexofatšô le thoxô, pele xa lena. Hlê ikxetheleng bophelô xore Le phelê, lena le bana ba lena, Lè le ba ba rataxo Morêna Modimo wa lena, Lè e-kwa se a se bolelaxo, Le mo xomaretše; ka xobane xo phela xa xaxo le xo atêlwa ke matšatši di na le Yêna.”​—Doiteronomio 30:​15-20.

11. Ba-Isiraele ba be ba swanetše go kgetha bophelo bjang?

¹¹ Ela hloko gore ba-Isiraele ba be ba swanetše go kgetha bophelo ka ‘go ba ba ba ratago Morena Modimo wa bona, ba e-kwa se a se bolelago ba mo gomaretše.’ Ge mantšu ao a be a bolelwa, batho ba Isiraele ba be ba se ba hlwa ba tšea Naga ya Kholofetšo. Ba be ba eme Melaleng ya Moaba, ba itokišetša go sela Noka ya Jorodane gomme ba tsene Kanana. Gaešita le ge e be e le ga tlhago gore ba retološetše megopolo ya bona “naxeng e botse ye e ahlamexo, ye e êlaxo mafsi le nose” yeo ba bego ba tla e hwetša go se go ye kae, go phethagatšwa ga dikholofelo tša bona go be go ithekgile ka lerato la bona la go rata Jehofa, go theetša ga bona lentšu la gagwe le go mo gomarela. (Ekisodo 3:8) Moše o ile a hlalosa se ka mo go kwagalago, a bolela gore: “Ge e ba o ka theetša ditaelo tša Jehofa Modimo wa gago, tšeo ke go laelago tšona lehono, e le gore o rate Jehofa Modimo wa gago, o sepele ditseleng tša gagwe gomme o boloke ditaelo tša gagwe le melao-taelo ya gagwe le diphetho tša gagwe tša boahlodi, gona kantle le pelaelo o tla tšwela pele o phela gomme o ata, gomme Jehofa Modimo wa gago o tla go šegofatša nageng yeo o yago go e tšea.”​—Doiteronomio 30:​16, NW.

12. Mohlala wa ba-Isiraele o swanetše go re ruta’ng ka modiro wa rena wa boboledi le wa go ruta?

¹² Na se ga se sa swanela go re ruta se sengwe ka boboledi bja rena le modiro wa rena wa go ruta mehleng ye ya bofelo? Re nagana ka lefase le le tlago la Paradeise gomme re bolela ka lona bodireding bja rena. Eupša rena goba barutiwa bao re ba dirago re ka se bone phethagalo ya kholofetšo ye ge e ba rena goba bona re hlankela Modimo ka baka la mabaka a boithati. Ka go swana le ba-Isiraele, rena le bao re ba rutago re swanetše go ithuta go ‘rata Jehofa, re theetše seo a se bolelago gomme re mo gomarele.’ Ge e ba re gopola se ge re dira bodiredi bja rena, gona re tla ba re dirišana le Modimo go gogeleng batho go yena.

Badirišani ba Modimo

13, 14. (a) Go ya ka 1 Ba-Korinthe 3:​5-9 re ba badirišani le Modimo bjang? (b) Ke mang yo a swanetšwego ke go godišwa bakeng sa koketšego le ge e le efe gomme ka baka la’ng?

¹³ Paulo o ile a swantšha go dirišana le Modimo ka go šupa go go lema tšhemo. O ngwadile gore: “Byale Apôllô ké mang? Paulo ké mang? Ké bahlanka ba Le dumetšexo ka bôná, ka mo Mong wa bôná a filexo e mongwê le e mongwê ka xôna. Nna ke byetše; Apôllô ó nošeditše; xomme Modimo ké Yêna a medišitšexo. Mobyadi le monošetši xa se selô; Yo e lexo selô ké Mmediši, ké Modimo. Mobyadi le monošetši ba a lekana; e mongwê le e mongwê ó tlo fiwa moputsô wa xaxwe, wo o lebanexo modirô wa xaxwe. Rena re badirišani ba Modimo; lena Le thšemo ya Modimo.”​—1 Ba-Korinthe 3:​5-9.

¹⁴ Ka ge re le badirišani ba Modimo, re swanetše go bjala “lentšu la mmušô wa maxodimo” dipelong tša batho ka potego, ke moka re nošetše kgahlego le ge e le efe e bontšhitšwego ka maeto a go boela le dithuto tša Beibele tšeo di lokišeditšwego gabotse. Ge e ba mobu, e lego pelo, o le botse Jehofa o tla kgatha tema ya gagwe ka go dira gore peu ya therešo ya Beibele e mele gore e be sehlare se se enywago dienywa. (Mateo 13:​19, 23) O tla gogela motho yoo go yena le go Morwa wa gagwe. Ka gona mafelelong, koketšego le ge e le efe palong ya bagoeledi ba Mmušo e ba gona ka baka la modiro wa Jehofa dipelong tša batho, ge a dira gore peu ya therešo e mele gomme a gogela ba bjalo go yena le go Morwa wa gagwe.

Go Aga Modiro wo o Tlago Dula o le Gona

15. Ke seswantšho sefe seo Paulo a ilego a se diriša go bontšha kamoo re thušago ba bangwe ka gona gore ba be le tumelo?

¹⁵ Le ge re thabela koketšego, re tloga re nyaka go bona batho ba tšwela pele ba rata Jehofa, ba theetša seo a se bolelago gomme ba mo gomarela. Ge re bona ba bangwe ba fola gomme ba e-wa re a nyama. Na go na le seo re ka se dirago go thibela se? Paulo seswantšhong se sengwe o bontšha kamoo re ka thušago ba bangwe gore ba godiše tumelo. O ngwala gore: “Xa xo e a kaxo bea mothêô o šele ka ntlê xa wo o beilwexo, Yêna Jesu Kriste. Byale xe motho a e-tla a axa xodimo xa mothêô woo, a axa ka xauta le ka silifêra le ka mabyê-mahlôkwa le ka dikwata le ka mabya’ng le ka dihlaka, modirô wa e mongwê le e mongwê o tlo bônaxala; xo na le letšatši la xo tlo o bônaxatša, la xo tlo utoloxa ka mollô woo o tl’o xo lekola modirô wa mang le mang wo o dirilwexo, xwa tlo bônala xe e le modirô-dirô.”​—1 Ba-Korinthe 3:​11-13.

16. (a) Diswantšho tše pedi tšeo Paulo a di dirišitšego di fapana bjang ka merero ya tšona? (b) Modiro wa rena wa go aga o ka feleletša bjang e le wo o sa kgotsofatšego le o fišwago ke mollo?

¹⁶ Seswantšhong sa Paulo sa tšhemo, kgolo e ithekgile ka go bjala ka kelohloko, go nošetša ka mehla le tšhegofatšo ya Modimo. Seswantšho se sengwe sa moapostola se bontšha boikarabelo bja modiredi wa Mokriste bakeng sa seo modiro wa gagwe wa go aga o feleletšago o le sona. Na o agile motheong o tiilego ka ditlabakelo tša maemo? Paulo o lemoša ka gore: “Mang le mang e a axaxo a bônê ka mo a hlatlaxanyaxo dikaxô.” (1 Ba-Korinthe 3:​10) Ge re tsošitše kgahlego ya motho ka go mmotša ka kholofelo ya bophelo bjo bo sa felego Paradeiseng, na re tsepelela thuto ya rena dithutong tša motheo feela tša Mangwalo gomme ra gatelela kudu-kudu seo motho a swanetšego go se dira bakeng sa go hwetša bophelo bjo bo sa felego? Na e ka ba thuto ya rena e theilwe kudu-kudu tabeng e rego: ‘Ge e ba o nyaka go phela ka mo go sa felego Paradeiseng, o swanetše go ithuta, o ye dibokeng gomme o tšee karolo modirong wa boboledi’? Ge e ba go le bjalo, ga re age tumelo ya motho yoo motheong o tiilego le gona seo re se agago se ka fo se emele mollo wa diteko goba go kgotlelela ka nako e telele. Go leka go gogela batho go Jehofa feela ka kholofelo ya bophelo Paradeiseng bakeng sa nywaga e sego kae ya go mo direla go swana le go aga ka “dikwata le ka mabya’ng le ka dihlaka.”

Go Aga Lerato la go Rata Modimo le Kriste

17, 18. (a) Ke eng seo go ka se kgonegego gore tumelo ya motho e tie ka ntle le sona? (b) Re ka thuša motho bjang gore Kriste a dule pelong ya gagwe?

¹⁷ Tumelo e swanetše go thewa tswalanong ya motho ka noši le Jehofa Modimo ka Jesu Kriste gore e kgotlelele. Ka ge re le batho ba sa phethagalago, re ka hwetša tswalano e bjalo ya khutšo le Modimo ka Morwa wa gagwe feela. (Ba-Roma 5:​10) Gopola gore Jesu o itše: “Xa xo e a tlaxo xo Tate xe e se ka Nna.” Go thuša ba bangwe go aga tumelo “xa xo e a kaxo bea mothêô o šele ka ntlê xa wo o beilwexo, Yêna Jesu Kriste.” Se se akaretša’ng?​—Johane 14:6; 1 Ba-Korinthe 3:11.

¹⁸ Go aga godimo ga motheo wa Kriste go bolela go ruta ka tsela yeo morutwana wa Beibele a tlago go godiša lerato le tseneletšego la go rata Jesu ka baka la go tseba ka mo go tletšego karolo ya Gagwe e le Molopolodi, Hlogo ya phuthego, Moperisita yo lerato yo Mogolo le Kgoši e bušago. (Daniele 7:​13, 14; Mateo 20:​28; Ba-Kolose 1:​18-20; Ba-Hebere 4:​14-16) Go bolela go dira gore Jesu e be wa kgonthe kudu go bona mo e bilego eka o dula ka dipelong tša bona. Thapelo ya rena ya go ba rapelela e swanetše go swana le topo ya Paulo legatong la Bakriste ba Efeso. O ngwadile gore: “Kè khunamêla Tata xo Mong wa rena Jesu Kriste . . . xore Kriste a axê dipelong tša lena ka tumêlô, Le bê ba ba tsemilexo medu leratong [“motheong,” NW].”​—Ba-Efeso 3:​14-17.

19. Go aga lerato la go rata Kriste dipelong tša barutwana ba rena ba Beibele go swanetše go feleletša ka eng, eupša ke eng seo se swanetšego go rutwa?

¹⁹ Ge e ba re aga ka mokgwa wo e lego gore lerato la go rata Kriste le a gola dipelong tša barutwana ba rena, ka mo go kwagalago se se tla feleletša ka go aga lerato la go rata Jehofa Modimo. Lerato la Jesu, maikwelo le kwelobohloko ke pontšho e botegago ya dika tša Jehofa. (Mateo 11:​28-30; Mareka 6:​30-34; Johane 15:​13, 14; Ba-Kolose 1:​15; Ba-Hebere 1:3) Ka gona, ge batho ba fihlela go tseba le go rata Jesu, ba tla fihlela go tseba le go rata Jehofa.a (1 Johane 4:​14, 16, 19) Re swanetše go ruta barutwana ba Beibele gore Jehofa ke yena a hlamilego dilo tšohle tše Kriste a di diretšego batho le gore ka gona re swanetše go Mo leboga, re mo tumiše gomme re mo rapele e le “Modimo Mophološi.”​—Psalme 68:​19, 20; Jesaya 12:​2-5; Johane 3:​16; 5:19.

20. (a) Re ka thuša batho bjang gore ba batamele Modimo le go batamela Morwa wa gagwe? (b) Ke eng seo se tlago go hlahlobja sehlogong se se latelago?

²⁰ Ka ge re le badirišani ba Modimo, anke re thušeng batho gore ba mmatamele gomme ba batamele le Morwa wa gagwe, re ba thuše gore ba be le lerato le tumelo dipelong tša bona. Ka go rialo, Jehofa e tla ba wa kgonthe go bona. (Johane 7:​28) Ba tla kgona go thea tswalano ya kgaufsi le Modimo ka Kriste gomme ba tla mo rata le go mo gomarela. Ba ka se bee tekanyo ya nako bakeng sa tirelo ya bona e lerato, gomme ba tla bontšha tumelo ya gore dikholofelo tše botse tša Jehofa di tla phethagala nakong ya gagwe e swanetšego. (Dillo tša Jeremia 3:​24-26; Ba-Hebere 11:6) Lega go le bjalo, ge re thuša ba bangwe go ba le tumelo, kholofelo le lerato, re swanetše go aga tumelo ya rena e le gore e swane le sekepe se se tiilego seo se kgonago go feta madimong a šoro. Se se tla hlahlobja sehlogong se se latelago.

[Mongwalo wa tlase]

E le go Boeletša

◻ Gantši re tsoša bjang kgahlego ya batho ya go kgahlegela molaetša wa Mmušo, eupša go na le kotsi efe?

◻ Ke batho ba mohuta ofe bao Jehofa a ba gogelago go yena le go Morwa wa gagwe?

◻ Go tsena ga ba-Isiraele Nageng ya Kholofetšo go be go ithekgile ka eng, gomme re ka ithuta’ng go se?

◻ Re kgatha tema efe go thušeng batho gore ba batamele go Jehofa le go Morwa wa gagwe?

[Seswantšho go letlakala 10]

Gaešita le ge re botša batho ka kholofelo ya go phela bophelo bjo bo sa felego Paradeiseng, morero wa rena o mogolo ke go ba gogela go Jehofa

[Seswantšho go letlakala 13]

Maeto a rena a go boela e ka ba a atlegago kudu ge e ba re lokišetša gabotse