Go Bula Tsela ya go Boela Paradeiseng

“[Jesu] a re go yena: Ruri ke a go botša lehono, O tla ba le nna Paradeiseng.”—LUKA 23:43, “NW.”

1, 2. (a) “Paradeise” e bolela’ng, gomme tšhemo ya Edene e swanetše go ba e be e swana le eng? (b) Lentšu la Sehebere bakeng sa “tšhemo” le fetoletšwe bjang Mangwalong a Bakriste a Segerika?

LAPA la motho le thomile Paradeiseng. Mabapi le go bopja ga motho, re bala pukung ya mathomo ya Mangwalo a Makgethwa gore: “Morêna Modimo a na a bopa motho, [ka] lerole la mmu; mo dinkong tša xaxwe a budulêla môya wa bophelô, motho a napa a ba môya o phelaxo. Byale Morêna Modimo a dira thšemo ya Edene thokô ya Bohlabêla, ’me motho yo a mmopilexo a mmea xôna-moo.” (Genesi 2:7, 8) Leina “Edene” le bolela “Lethabo,” ka gona tšhemo ya Edene e be e le phaka e kgolo e thabišago, e nago le dibopego tše ntši tše botse le tše fapa-fapanego.

² Lentšu “paradeise” le tšwa lelemeng la Segerika, gomme ka leleme leo le bolela tšhemo e swanago le phaka. Lentšu la Segerika leo le dirišeditšwego go fetolela leina la Sehebere gan, leo le bolelago “tšhemo,” ke pa·raʹdei·sos. Mangwalo a be a ngwadilwe ka leleme la Segerika go tloga go Mateo go ya go Kutollo, gomme lentšu le la Segerika le dirišeditšwe go ngwala dipolelo tša Morena Jesu Kriste ge a be a bolawa koteng ya tlhokofatšo Gologotha ka Nisan 14 ya ngwaga wa 33 C.E.

Kholofetšo ya Jesu ya Paradeise go Modiradibe

3. (a) Modiradibe yo a nago le kwelobohloko o kgopetše’ng go Jesu? (b) Kgopelo ya modiradibe e bontšhitše’ng mabapi le tumelo ya gagwe ka Jesu?

³ Ka nako yeo, badiradibe ba babedi ba be ba kokotetšwe ka mahlakoreng ka bobedi a Jesu. O mongwe o be a tlogetše go goboša Jesu ka tsela yeo mohlakodi wa bobedi yo a kokotetšwego ka lehlakoreng le lengwe la Jesu a bego a tšwela pele a dira. Modiradibe yo a nago le kwelobohloko o ile a retologa gomme a re: “Morêna! O Nkxopolê xe O e-tla ka mmušô wa xaxo,” ka go rialo a dumela gore Jesu, ešita lege a kokotetšwe ka lehlakoreng la gagwe, o be a letetše go newa mmušo wa nako e tlago. (Luka 23:42; Mareka 15:32) Seo se swanetše go ba se ile sa kgoma pelo ya Morena Jesu gakaakang! Sekebekwa seo se botho se be se dumela gore Jesu Kriste o be a se na molato le gore o be a sa swanelwe ke kotlo e bjalo e šoro e swanago le go gobošwa ka go kokotelwa phatlalatša. (Luka 23:41) O bontšhitše ka kgopelo ya gagwe gore o be a dumela gore Jesu o be a tla tsošwa bahung le gore o be a tla tsena mmušong. Le gona modiradibe o bontšhitše tumelo ya gore yena ka noši o be a ka tsošwa le gore Jesu e be e tla ba Yena yo a tlago go mo tsoša bahung gomme a mo nea bophelo bjo bo mpshafaditšwego lefaseng.

4. Jesu o arabile bjang kgopelo ya modiradibe, a bontšha’ng?

⁴ Ge Jesu a be a re go yena: “Ruri ke a go botša lehono, O tla ba le nna Paradeiseng,” o be a šupa go tsošwa ga modiradibe yoo yo a nago le kwelobohloko. Seo e swanetše go ba e ile ya ba kgothatšo ya kgonthe go sekebekwa seo se bontšhitšego tumelo. Gore tsogo ya monna yoo e direge, Jesu o be a swanetše go tsošwa pele. Ka morago, ka go diriša matla a gagwe a go tsoša ao a a neilwego ke Modimo, Jesu o be a tla tsoša modiradibe yo bahung ka letšatši la tsogo ya lefase la batho.—Luka 23:43; Johane 5:28, 29; 1 Ba-Korinthe 15:20, 23; Ba-Hebere 9:15.

5, 6. (a) Mmušiši Pontio Pilato o ile a re go ngwalwe eng ka godimo ga Jesu yo a kokotetšwego? (b) Jesu mo gongwe o boletše le modiradibe ka leleme lefe?

⁵ Jesu o neile kholofetšo yeo ka leleme lefe? Maleme a mantšinyana a be a dirišwa moo ka nako yeo. Se se bontšhwa ke mantšu ao Mmušiši Pontio Pilato a ilego a re a ngwalwe ka godimo ga hlogo ya Jesu Kriste yo a bego a kokotetšwe, a mo hlaola gore bafeti ka moka ba bale. Pego e lego go Johane 19:19, 20 e re: “Pilato a ngwala lengwalô, a le bea nthleng ya [kota ya hlokofatšo]; a ngwala a re: JESU WA NATSARETHA KXOŠI YA BA-JUDA. Ba-Juda ba bantši ba bala lengwalô leo, xobane felô mo Jesu a bapotšwexo, e be e le kxaufsi le motse; xomme le be le ngwadilwe ka Se-Hebere le ka Se-Gerika le ka Se-Roma.”

⁶ Ka go belegelwa ga gagwe Betlehema ke mmagwe wa kgarebe Maria, Jesu o tswetšwe e le mo-Juda, goba mo-Hebere. Ka mo go swanetšego, ge a be a bolela ka nywaga e meraro le seripa nageng yeo a tswaletšwego go yona, go molaleng gore o boletše ka leleme la se-Juda la nakong yeo, goba Sehebere. Ka gona, ge a be a nea dipolelo tše kgonthišetšago go modiradibe yo a nago le kwelobohloko, mo gongwe o boletše ka Sehebere. Ka gona o swanetše go ba a dirišitše lentšu la Sehebere gan ge a be a šupa Paradeise—lentšu le le hwetšwago go Genesi 2:8. Moo, phetolelo ya Segerika ya Septuagint ya Mangwalo a Makgethwa e diriša lentšu pa·raʹdei·sos ge e fetolela lentšu la mathomo gan.

7. Jesu o ile a phagamišwa bjang ge a be a tsošwa?

⁷ Jesu o tsošitšwe bahung ka letšatši la boraro ka morago ga go kokotelwa ga gagwe, goba ka Nisani 16 ya almanaka ya Sehebere. Matšatši a masome a mane ka morago o ile a boela legodimong, legaeng la gagwe la mathomo, e lego feela mo nakong ye moo a ilego a ba boemong bjo bo phagamego kudu. (Ditiro 5:30, 31; Ba-Filipi 2:9) Bjale o be a apešitšwe go se hwe, e lego seka seo Tatagwe wa legodimong a nago le sona. Jehofa Modimo e be e le yena a nnoši Mong wa go se hwe go fihlela go tsošweng ga Jesu bahung Sontageng seo sa Nisan 16.—Ba-Roma 6:9; 1 Timotheo 6:15, 16.

Topollo e Bula Tsela

8. Morero wa Jehofa wa mathomo e be e le ofe ka lefase, gomme ke’ng se se bontšhago gore o kgomarela morero woo?

⁸ Tše ka moka e be e le megato ye e lebilego morerong wa Modimo wa go apeša lefase ka moka ka botse bja paradeise, ee, gore le be paradeise ya lefase ka moka. (Genesi 1:28; Jesaya 55:10, 11) Go 1 Ba-Korinthe 15:45, moapostola Paulo o šupa Jesu e le “Adama wa mafêlêlô.” Se se bontšha gore Modimo o kgomaretše morero wa gagwe wa mathomo mabapi le lefase le gore o mongwe o tla phethagatša morero woo Adama wa mathomo a paletšwego ke go o phetha.

9. Jesu o neile’ng bakeng sa go bula tsela ya go boela Paradeiseng?

⁹ Go ya ka Paulo, Jesu o neile “selefá.” (1 Timotheo 2:6) Jesu Kriste ka boyena o be a ile a bolela gore: “A etšê Morwa-motho e a sa kaxo a tlêla xo dirêlwa, à tlile xo dirêla, le xo neêla bophelô bya xaxwe xore e bê topollô ya ba bantši.” Se se dirile gore go hwetša bophelo bjo bo sa felego go kgonege go bao ba bontšhago tumelo go Jesu Kriste.—Mateo. 20:28; Johane 3:16.

10. (a) Modimo o ile a ikemišeditša’ng ka palo e lakanyeditšwego ya batho ba gaugetšwego? (b) Go kgethwa ga “mohlatswana o monyenyane” go thomile neng, gomme ka bomang?

¹⁰ Nakong ya ge Jesu a rotogela legodimong ka morago ga go tsoga ga gagwe bahung, o be a ka kgona go tliša mohola wa sehlabelo sa gagwe sa topollo go Modimo bakeng sa lapa la motho. Fela, e be le morero wa Tatagwe wa legodimong Jehofa Modimo, go ntšha ditšhabeng tša lefase ‘batho ba leina la gagwe.’ (Ditiro 15:14) Go ya ka Kutollo 7:4 le 14:1-4, ba e swanetše go ba feela batho ba 144 000, ba “mohlatswana o monyenyane” bao ba bileditšwego Mmušong wa Modimo legodimong. (Luka 12:32) Go kgethwa ga batho ba ba gaugetšwego kudu ke Jehofa Modimo go thomile ka baapostola ba 12 ba Jesu Kriste. (Mateo 10:2-4; Ditiro 1:23-26) Jesu o itše go ditho tša mathomo tša phuthego ya gagwe: “Xa se lena Le nthlaotšexo; ké Nna ke hlaotšexo bô-lena.” (Johane 15:16) Ba ba be ba tla etelela pele modiro wa go goeletša Paradeise e tlago ya lefase ka moka tlase ga pušo ya Mmušo.

Nako ya go Hlongwa ga Mmušo

11. Nako ya go hlongwa ga Mmušo wa Mesia e bile neng?

¹¹ Leineng la Morena Jesu Kriste, lehono re tšwela pele go rapela Jehofa gore Mmušo wa Gagwe o tle. (Mateo 6:9, 10; Johane 14:13, 14) Mmušo wa Mesia o be o swanetše go hlongwa nakong ya bofelo bja “dinako tše beilwego tša baditšhaba.” (Luka 21:24, NW) Dinako tšeo tša Ba-ntle di ile tša fela ka ngwaga wa 1914.a

12. Go diregile’ng ka 1914 ka go dumelelana le boporofeta bja Jesu bja dilo tše di lemogegago tšeo di bego di tla swaya go ba gona ga gagwe mo go sa bonagalego?

¹² Ngwaga woo o swailwe ke ntwa ya pele ya lefase ya histori ya batho. Se se be se dumelelana le boporofeta bja Jesu mabapi le dilo tšeo di lemogegago tšeo di bego di tla swaya go ba gona ga gagwe mo go sa bonagalego a le matleng a Mmušo lefaseng. Barutiwa ba gagwe ba ile ba mmotšiša potšitšo: “O k’O re botšê; tšeo di tlo dirêxa neng? O re botšê le mahlolá a re tl’o xo bôna ka ôna, xe xo fihla maboô a xaxo le bofêlô bya mabaka ano.” Jesu ge a araba o itše: “Xobane sethšaba se tlo tsoxêla sethšaba; mmušô o tlo tsoxêla mmušô; xomme xo tlo ba le ditlala le dinkhu, le dithšišinyêxô kua le kua. Tšé ka moka e tlo ba ôna mathômô a ditlalêlô. Xomme Ebangedi yé ya mmušô wa maxodimong e tlo xoêlêlwa lefaseng ka moka [le le agilwego] xore e bê bohlatse mo xo dithšaba tšohle; ya tlo ba xôna bofêlô bo fihlaxo.”—Mateo 24:3, 7, 8, 14; Mareka 13:10.

13. (a) Ke ka tsela efe go bolelwa ga Mmušo wa Modimo e lego ditaba tše di lokilego? (b) Thapelo ya go rapelela gore Mmušo wa Modimo o tle e rapetšwe ka nako e kaaka’ng, le gona na dihlatse tša gagwe lefaseng le ka mohla ga se tša ka tša lapišwa ke go rapela dithapelo tše?

¹³ Ditaba tše tše di lokilego tša Mmušo wa Jehofa bjale di bolelwa dinageng tše fetago 200, gomme go dirwa boiteko bja go di fetišetša mafelong a mangwe. Ke ditaba, e sego tša mmušo wa lefase wo o sa dutšego o tla tla, eupja tša mmušo woo bjale o lego matleng wo o šetšego o buša. Mmušo woo o hlomilwe ka 1914. O lokišeletša nako ya go nea karabo thapelong yeo Jesu a e rulagantšego nywageng e fetago 1 900 e fetilego. Thapelo yeo e be e dutše e rapelwa go Mong wa Mmušo woo ga e sa le go tloga ge yo e bego e swanetše go ba Kgoši ya mmušo woo a rutile barutiwa ba gagwe gore ba o rapelele. Ka gona Mong wa Mmušo o be a dutše a e-kwa kgopelo ya wona ka nako e telele kudu. O be a dutše a kgahlišwa ke go kwa thapelo ye e tlišwago go yena ke dihlatse tša gagwe lefaseng ka nako yeo ka moka, ka gobane seo se bontšhitše gore ba kgomaretše tumelo ya bona ya go dumela go tla ga Mmušo woo. Ga se ba ka ba lapišwa ke go rapela thapelo yeo go ‘Tate wa magodimong’ bjalo ka ge eka e fetogile selo se se se nago mohlodi go bona.—Mateo 6:9, 10.

14. Ke ka baka la’ng Dihlatse tša Jehofa di phegelela go bolela ditaba tše di lokilego tša Mmušo wa Modimo?

¹⁴ Lege Dihlatse tša Jehofa di dumela le go bolela gore Mmušo o hlomilwe magodimong ka 1914, ruri di phegelela go bolela ditaba tše tše di lokilego tša Mmušo. Di dira bjalo ka gobane Mmušo woo o hlomilwego ga se wa hlwa o tšea taolo ya lefase ka mo go feletšego eupja o sa dumeletše mebušo ya lefase le gore e tšwele pele go buša godimo ga meloko ka moka le merafo ya batho. (Ba-Roma 13:1) Ka gona o swanetše go tla ka mo go feletšego, ke gore, ka tekanyo ya gore e be mmušo o feletšego o bušago lefaseng ka moka.—Daniele 2:44.

15. Ke’ng seo se bego se dutše se direga ga e sa le go tloga ka Pentekoste ya 33 C.E. seo se phagamego go feta nakong ya ge go be go tlotšwa dikgoši tša Isiraele?

¹⁵ Gaešita lege a kgethilwe e le Kgoši ya Mmušo woo, Jesu ga a buše a nnoši. Jehofa Modimo o kgethile balatedi ba 144 000 ba Morwa wa gagwe yo e lego kgoši go ba maja-bohwa-gotee Mmušong wa Modimo wa Mesia. (Daniele 7:27) Go etša ge dikgoši tša kgale tša Isiraele di be di tlotšwa ka oli e kgethwa ke moperisita o mogolo, ga e sa le go tloga ka Pentekoste ya 33 C.E., Jehofa o tloditše maja-bohwa-gotee le Jesu a 144 000 ka moya wa Gagwe o mokgethwa, a ba tswalela bophelong bja moya magodimong gotee le “Kxoši ya maxoši, le Morêna wa marêna.”—Kutollo 19:16; bapiša le 1 Dikgoši 1:39.

Paradeise e tla Tsošološwa ke “Adama wa Mafêlêlô”

16. Ponagalo ya Mmušo e be e le efe ge Jesu a be a kokotelwa, eupja ke ka baka la’ng e be e se segoeledi sa ditaba tše fošagetšego?

¹⁶ Nakong ya ge Jesu a kokotelwa ka 33 C.E., go be go tloga go sa bonagale a ka ba le mmušo le gatee. Eupja ge a be a bolela ka Mmušo wa Modimo, e be e se segoeledi sa ditaba tše fošagetšego. Letšatšing la boraro ka morago ga go kokotelwa ga gagwe, Mong wa Mmušo o kgonthišeditše gore barutiwa ba Jesu ba be ba ka se rapelele mmušo wo o bego o ka se be gona. Jehofa o ile a tsoša Yo a bego a swanetše go Mo emela Mmušong o rapelelwago gomme a mo apeša go se hwe.

17, 18. (a) Go bitšwa ga Jesu “Adama wa mafêlêlô” go bolela’ng? (b) Ditiragalo tša lefase ga e sa le go tloga ka 1914 di bontšha’ng?

¹⁷ Jesu o be a tseba gore Mmopi wa Paradeise ya mathomo lefaseng o be a tla mo nea boikarabelo bja go tsošološa Paradeise le go dira gore tšhemong ya lefase ka moka go be le batho. Re bala go 1 Ba-Korinthe 14:45, 47 gore: “Byalo ka xe xo ngwadilwe xwa thwe: Motho wa pele, Adama, a napa a ba môya o phelaxo, le Adama wa mafêlêlô Yêna ké môya wo o phedišaxo. Motho wa pele ó tšwa mmung; motho wa bobedi o tšwa lexodimong, ké wa xôna-kua.” Adama wa bobedi o fologile a e-tšwa legodimong gomme ke yena yo Jehofa a mo dirišago go tsošološa Paradeise mo lefaseng. Ke motheong wo moo Morena Jesu a itšego go modiradibe yo a nago le kwelobohloko: “O tlo ba le Nna Paradeiseng.” (Luka 23:43) Go tšwa poledišanong ye go bile go molaleng gore Paradeise e tla tsošološwa lefaseng tlase ga Mmušo wa legodimo diatleng tša Jesu Kriste yo a tagafaditšwego, “Adama wa mafêlêlô.”

¹⁸ Ditiragalo tša lefase ga e sa le go tloga ka 1914 di dumelelana le diporofeto tše di boletšwego ke Jesu Kriste gomme ka go rialo di hlatsela gore Jesu o be a dutše a buša ga e sa le go tloga ka nako yeo. Mo e ka bago ka nywaga-some e fetago e šupa mo nakong ye, batho ba moloko wa lekgolo le la bo-20 la nywaga bao ba phetšego ga e sa le go tloga ka 1914 ba bone go phethagala ga ditiragalo tšeo di lokeleditšwego boporofeteng bja Jesu bjo bo hwetšwago go Mateo kgaolo 24. Ka gona, nako ye e batamela bofelo bja yona, gomme go tsošološwa ga Paradeise lefaseng go kgaufsi-ufsi.—Mateo 24:32-35; bapiša le Psalme 90:10.

Mehla e Kgahlišago ya Lefase le Lefsa e ka Pejana

19, 20. (a) Ka morago ga Haramagedone, Jehofa o tla tsenya bao ba mo ratago go eng? (b) Ke’ng seo se tlago go swanelwa ke go dirwa kapejana ka morago ga Haramagedone?

¹⁹ Tshepedišo ya dilo yeo Jehofa a tlago go tsenya bao ba mo ratago go yona ka morago ga go godiša bogoši bja gagwe bja legohle ka mo go sa belaetšego mogoleng wa ntwa wa Haramagedone e ka se be e lešago bodutu. Mehla e tlago ya pušo e botse ya Kgoši ya Mesia Jesu, Morwa wa Modimo, e tla ba e kgahlišago e le ka kgonthe bakeng sa lapa la motho. A modiro o holago gakaakang wo o tlago go swanelwa ke go dirwa moo! Tshenyo lege e le efe yeo e tlago go šala godimo ga lefase ka baka la ntwa ya lefase ka moka magareng ga madira a legodimo a Jehofa le madira a rulagantšwego a bobe e tla tlošwa. Ga go leswao le le tlago go šala.

²⁰ Eupja go thwe’ng ka ditlabakelo ka moka tša ntwa tšeo ditšhaba di tlago go di tlogela? Ka baka la botelele bja nako ya seswantšhetšo yeo go tlago go e tšea go fediša karolo ya tšona e thuthupago, ruri e tla ba e le tše ntši. (Hesekiele 39:8-10) Baphologi ba Haramagedone mo gongwe ba ka kgona go tšea dithoto tše dingwe tša mašalela a ntwa tša ditšhaba bakeng sa merero e holago.—Jesaya 2:2-4.

21. Ka go swana le phihlelo ya baphologi ba Meetse-fula, baphologi ba Haramagedone ba tla lebeletšana le boemo bofe, eupja ka phapano efe e kgolo?

²¹ Bašegofatšwa ba mehleng yeno bao ba swanago le Noage le lapa la gagwe bao ba phologilego Meetse-fula a lefase ka moka ka mohlolo ba tla lebeletšana le maemo a lefase a swanago le ao lapa la Noage le a hweditšego. Lega go le bjalo, Sathane Diabolo le madira a gagwe a batemona ba ka se sa hlwa ba tshwenya magodimo a sa bonagalego a dikologilego lefase eupja ba tla ba ba beilwe boemong bja go se dire ka mo go feletšego ka nywaga-kgolo e lesome. (Kutollo 20:1-3) Baphologi ba Haramagedone ba tla ba le modiro o thata wa go buša lefase leo le fetilego go “mohla-moxolo wa Modimo Ra-matla-ohle,” ba lebeletšane le mafelelo lege e le afe ao se se tlago go ba se a tlogetše polaneteng ye.—Kutollo 16:14.

22. Baphologi ba Haramagedone ba tla arabela bjang modirong o kgahlišago wa go katološetša Paradeise lefaseng ka bophara?

²² Baphologi ba bao ba tlogago ba se nene ba ntwa ya Haramagedone mo gongwe ba ka letelwa ka tlwaelo gore ba boife ka kudu ge ba neilwe modiro o mogolo kudu wa go katološetša Paradeise lefaseng ka bophara. Eupja ka mo go fapanego, ba tletše lethabo le le fetišago, ba tla o dira ka sebete le ka potego. Ba lemoga ka botlalo gore lefase le ke bogato bja seswantšhetšo bja dinao tša Modimo, gomme ba ikemišeditše ka go botega go tliša tikologo ye ya lefase boemong bjo bo kgahlišago le bjo bobotse bjo bo swanelwago ke gore dinao tša gagwe di khutše go yona.

23. Baphologi ba Haramagedone ba tla hwetša thekgo efe e le go kgonthišetša gore modiro wa bona wa go tsošološa Paradeise o tla atlega?

²³ Ke mo go thabišago le go kgothatša go tseba gore ba ka se tlogelwe ba nnoši gomme ba sa thušwe ka morago ga go amogela tirelo ye e thabišago ya go phethagatša taelo ya Modimo mabapi le lefase. (Bapiša le Jesaya 65:17, 21-24.) Ba tla hwetša thekgo e feletšego, e sa lekanyetšwago ya Yo a dirilego kholofetšo ya Paradeise e tsošološitšwego le yo a itšego ka letšatši la go rotogela ga gagwe legodimong: “Ke neilwe matla ka moka lexodimong le lefaseng.” (Mateo 28:18) O sa dutše a e-na le matla ao, gomme o kgona go phethagatša kholofetšo ya gagwe e kgolo go modiradibe yo a nago le kwelobohloko, bjalo ka ge re tla bona sehlogong se se latelago.

[Mongwalo wa tlase]

Dipotšišo tša Tlhahlobo

◻ Kholofetšo ya Jesu kua Gologotha e kgonthišetša batho le sekebekwa se sengwe eng?

◻ Motheo wa go bula tsela ya go boela Paradeiseng ke ofe?

◻ Adama wa mathomo o paletšwe ke go dira’ng, eupja “Adama wa mafêlêlô” o tla phetha’ng?

◻ Jehofa o tla tsenya bao ba mo ratago tshepedišong ya mohuta ofe ya dilo ka morago ga Haramagedone?

[Seswantšho go letlakala 13]

Sehlogo se se rego: “End of All Kingdoms in 1914” se tšweletše ka go “The World Magazine” ya August 30, 1914