O ka Dira Eng Gore le Dule le Thabile ka Lapeng la Gago?​—Karolo 1

Ka letšatši la lenyalo banyalani ba thaba kudu, e bile ba tshepa gore ba tlo dula ba thabile bophelo ka moka. Ka nnete ba ka kgona go dula ba thabile. Bakriste bao e lego kgale ba nyalane e bile ba šoma ka thata gore ba diriše dikeletšo tša Beibele, ba a tseba gore taba ye e a kgonega.

1. Beibele e nea banna keletšo efe?

Jehofa o kgethile monna gore e be hlogo ya lapa. (Bala Baefeso 5:​23.) Jehofa o nyaka gore monna a dire diphetho tšeo di tlago go hola lapa la gagwe. Beibele e botša banna gore: “Tšwelang pele le rata basadi ba lena.” (Baefeso 5:​25) Se se ra go re’ng? Se se ra gore monna o swanetše go rata mosadi wa gagwe gomme a mo sware gabotse ge ba le ka gae le ge ba le bathong. O swanetše go leka go šireletša mosadi wa gagwe, le go dira gore a dule a thabile e bile a mo hlokomele ka dilo tšeo a di hlokago. (1 Timotheo 5:8) Sa bohlokwa le go feta, o thuša mosadi wa gagwe gore a dule a na le segwera se sebotse le Jehofa. (Mateo 4:4) Ka mohlala, o swanetše go rapela le go bala Beibele a na le mosadi wa gagwe. Ge monna a rata mosadi wa gagwe e bile a mo hlokomela, se se dira gore a dule a na le segwera se sebotse le Jehofa.​—Bala 1 Petro 3:7.

2. Beibele e nea basadi keletšo efe?

Beibele e re: “Mosadi o swanetše go ba le tlhompho e tseneletšego go monna wa gagwe.” (Baefeso 5:​33) Mosadi a ka bontšha bjang gore o hlompha monna wa gagwe ka mo go tseneletšego? A ka nagana ka dika tše dibotse tša monna wa gagwe, le maiteko ao a a dirago a go mo hlokomela le go hlokomela bana ba bona. Le gona mosadi a ka bontšha gore o hlompha monna wa gagwe ka go thekga diphetho tšeo a di dirago, e bile o swanetše go bolela le yena gabotse le go bolela ka yena gabotse ge a na le batho ba bangwe. O swanetše go dira se le ge monna wa gagwe a sa hlankele Jehofa.

3. Monna le mosadi ba ka tiiša lenyalo la bona bjang?

Beibele e bolela ka monna le mosadi bao ba nyalanego gore: “Ba babedi ba e tla ba nama e tee.” (Mateo 19:5) Se se ra gore ga se ba swanela go dumelela selo le ge e le sefe se ba dira gore lerato la bona le fole. Ba dira se ka go fetša nako ba le ka moka, e bile ba swanetše go botšana gore ba ikwa bjang, ba dira bjalo ka tsela e lerato. Ga ba dumelele selo le ge e le sefe goba motho le ge e le ofe a eba bohlokwa go feta molekane wa bona. Eupša Jehofa ke yena feela a bago bohlokwa go feta molekane wa bona. Ba swanetše go itlhokomela gore ba se ke ba fetša nako e ntši kudu goba ba gwerana ka mo go feteletšego le batho bao e sego balekane ba bona.

ITHUTE KA MO GO TSENELETŠEGO

4. Banna ba swanetše go rata basadi ba bona le go ba hlokomela

BIDIO: Banna, Ratang Basadi ba Lena Bjalo ka ge le Ithata (9:53)

• Monna a ka dira’ng go bontšha gore o rata mosadi wa gagwe le go mo hlokomela?

Balang Bakolose 3:​12, gomme le boledišaneng ka potšišo e latelago:

• Monna a ka bontšha bjang dika tšeo go bolelwago ka tšona lengwalong le ge a dirišana le mosadi wa gagwe?

5. Basadi ba swanetše go rata banna ba bona le go ba hlompha

Beibele e kgothaletša mosadi gore a hlomphe monna wa gagwe go sa šetšwe gore o hlankela Jehofa goba ga a mo hlankele. Balang 1 Petro 3:​1, 2, gomme le boledišaneng ka dipotšišo tše di latelago:

• Ge e ba o na le monna yo a sa hlankelego Jehofa, re a tseba gore o nyaka gore monna wa gago a hlankele Jehofa go swana le wena. Bjale o nagana gore tsela e botse ya go mo thuša ke efe? Na ke go no dula o mo rerela goba go dula o mmotša ka Beibele? Goba na o bona go le kaone gore o dule o le mosadi yo botho le yo a hlomphago? Go re’ng o re’alo?

Monna le mosadi ba kgona go dira diphetho tše dibotse ge ba le ka moka. Eupša ka dinako tše dingwe mosadi a ka no se dumelelane le monna wa gagwe. A ka mmotša seo a se naganago ka tlhompho. Eupša o swanetše go gopola gore Jehofa o file monna wa gagwe boikarabelo bja gore a dire diphetho tšeo di tlago go hola lapa la gagwe. Mosadi o swanetše go dula a leka go thekga diphetho tša monna wa gagwe. Ge a dira bjalo, o tlo dira gore ka lapeng ba dule ba thabile. Balang 1 Petro 3:​3-5, gomme le boledišaneng ka potšišo e latelago:

• Jehofa o ikwa bjang ge mosadi a hlompha monna wa gagwe?

6. O ka kgona go lokiša mathata lenyalong la gago

BIDIO: Kamoo Banyalani ba ka Tiišago Lenyalo la Bona (5:44)

• Bidiong ye, ke dilo dife tšeo di bontšhago gore banyalani ba e be e se sa le bagwera?

• Ba ile ba dira’ng gore ba tiiše lenyalo la bona?

Balang 1 Bakorinthe 10:​24, gomme le boledišaneng ka potšišo ya ka mo fase. Balang le Bakolose 3:​13, gomme le boledišaneng ka potšišo e latelago:

• Go diriša keletšo yeo e lego lengwalong le go ka le thuša bjang gore le tiiše lenyalo la lena?

Beibele e re re swanetše go godišana. Go godišana go bolela gore re swanetše go swara motho yo mongwe gabotse le go mo hlompha. Balang Baroma 12:​10, gomme le boledišaneng ka dipotšišo tše di latelago:

• Na monna goba mosadi o swanetše go emela molekane wa gagwe gore e be yena a thomago go mo godiša? Go re’ng o re’alo?

O ITHUTILE ENG?

Monna le mosadi ba ka kgona go dula ba thabile lenyalong la bona, ge e ba ba ratana, ba hlomphana e bile ba diriša dikeletšo tša ka Beibeleng.

Dipotšišo

• Monna a ka dira’ng gore yena le mosadi wa gagwe ba dule ba thabile?

• Mosadi a ka dira’ng gore yena le monna wa gagwe ba dule ba thabile?

• Ge e ba o nyetše, ke lengwalo lefe leo le ka go thušago gore o tiiše lenyalo la gago?

ITHUTE KA MO GO OKETŠEGILEGO

Ekwa gore ke dilo dife tše o ka di dirago gore o ipshine ka lenyalo la gago.

Lapa la Gago le ka Thaba (poroutšha)

Bogela bidio ya koša ye gore o kwe gore go kwa dikeletšo tša Beibele go ka go tlišetša ditšhegofatšo dife lenyalong la gago.

Leratorato (4:26)

Ekwa gore ge Beibele e re monna ke hlogo ya lapa e ra gore’ng.

“Basadi, ke ka Baka La’ng le Swanetše go Ikokobeletša Bohlogo?” (Morokami wa May 15, 2010.)

Ekwa gore banyalani ba bangwe ba ile ba lokiša lenyalo la bona bjang le ge ba be ba hlalane.

Re Lokišitše Lenyalo la Rena ka Thušo ya Jehofa (5:14)