Dipotšišo tše Tšwago go Babadi

Moapostola Paulo o be a bolela’ng ge a be a re o “lebala tša kwa nthaxo; [o] ôbêlêla tša kwa pele”? (Ba-Filipi 3:14) Na motho a ka lebala selo ka boomo?

Aowa, mabakeng a mantši ga re kgone go tloša mogopolo ka boomo menaganong ya rena. Therešo ke gore re lebala bogolo bja tšeo re bego re ka rata go di gopola gomme ra gopola bontši bja tšeo re bego re tla di lebala go se go ye kae. Ka gona, Paulo o be a bolela’ng ge a be a ngwala mantšu a lego go Ba-Filipi 3:14? Taba ye e e dikologilego e re thuša go kwešiša.

Go Ba-Filipi kgaolo 3, Paulo o hlalosa ‘mabaka [a gagwe] a go bota tša nama.’ O bolela ka setšo sa gagwe se se se nago bosodi sa Sejuda gotee le go fišegela ga gagwe Molao—e lego dilo tšeo di ka bego di ile tša mo nea mehola e mentši setšhabeng sa Isiraele. (Ba-Filipi 3:4-6, bapiša le NW; Ditiro 22:3-5.) Lega go le bjalo, o ile a furalela mehola e bjalo, a e lebelela bjalo ka ge eka ke tshenyegelo. Ka baka la’ng? Ka gobane o be a hweditše selo se sengwe se sekaone—“boxolo bya tsebô ya xo tseba Jesu Kriste.”—Ba-Filipi 3:7, 8.

Pakane ya Paulo e kgolo e be e se go hwetša boemo lefaseng le, eupša e le go hwetša “tsogo [ya pele, NW] ya bahu.” (Ba-Filipi 3:11, 12, PK) Ka gona o ngwala gore: “Ke lebala tša kwa nthaxo; ke ôbêlêla tša kwa pele; ke kxanyêlêla boyô, mo xo lexo mphapahlôxô wa ba xo biletšwa kwa lexodimong ke Modimo ka Jesu Kriste.” (Ba-Filipi 3:14) Ge Paulo a be a bolela gore o “lebala tša kwa nthaxo,” o be a sa bolele gore o be a phumotše ka tsela e itšego “tša kwa nthaxo” monaganong wa gagwe. Go molaleng gore o be a sa dutše a di gopola ka ge a be a sa tšwa go di lokeletša. Ka ntle le moo, Segerikeng sa mathomo o diriša sebopego sa lediri se se bontšhago mogato o tšwelago pele, o sešogo wa phethwa. O re “lebala” e sego “lebetše.”

Lentšu la Segerika le fetoletšwego e le “lebala” (e·pi·lan·thaʹno·mai) le na le tlhaloso ya dibopego tše fapanego, tšeo se sengwe sa tšona e lego “go se tshwenyege ka” goba “go hlokomologa.” Go ya ka Exegetical Dictionary of the New Testament (e ngwadilwego ke Horst Balz le Gerhard Schneider), se ke seo “lebala” e lego go Ba-Filipi 3:14 e se bolelago. Paulo o be a sa dulele go nagana ka dilo tšeo a bego a di gafile. O be a ithutile go di lebelela e le tše sa tshwenyego. Di be di le bjalo ka “maudi fêla” ge di bapišwa le kholofelo ya legodimong.—Ba-Filipi 3:8.

Mantšu a Paulo a ka šoma bjang lehono? Ee, Mokriste a ka ba a gafile dilo tše dingwe gore a hlankele Modimo bjalo ka Paulo. A ka ba a tlogetše modiro o lefago gabotse wa boiphedišo ka baka la tirelo ya nako e tletšego. Goba a ka ba a e-tšwa ka lapeng le humilego le le sa mo thekgego ka tša ditšhelete ka ge le sa amogele therešo. Boikgafo bjo bo bjalo bo a retwa, eupša ga se selo seo go swanetšwego go dulelwa go tshwenyega ka sona. Mokriste o a “lebala,” a kgaotša go tshwenyega ka “tša kwa nthaxo” ka baka la bokamoso bjo bo thabišago bjo bo mo letetšego.—Luka 9:62.

Molao wa motheo wo mantšu a Paulo a theilwego go wona mo mongwe o ka dirišwa ka tsela e nngwe. Go thwe’ng ka Mokriste yo ilego a wela boitshwarong bjo bo fošagetšego pele ga ge a ithuta ka Modimo? (Ba-Kolose 3:5-7) Goba, anke re re ka morago ga ge e bile Mokriste o ile a dira sebe se segolo gomme a kgalemelwa ke phuthego. (2 Ba-Korinthe 7:8-13; Jakobo 5:15-20) Ge e ba a sokologile e le ka kgonthe e bile a fetotše ditsela tša gagwe, o “hlatswitšwe.” (1 Ba-Korinthe 6:9-11) Se se diregilego se fetile. A ka fo se lebale e le ka kgonthe seo a se dirilego—ee, a ka ba a le bohlale ge a ka ithuta phihlelong yeo e le gore a se ke a boeletša sebe gape. Lega go le bjalo, o “lebala” ka kgopolo ya go se dulele go ikomanya. (Bapiša le Jesaya 65:17.) Ka ge a lebaletšwe motheong wa sehlabelo sa Jesu, o katanela go furalela tše di fetilego.

Go Ba-Filipi 3:13, 14, Paulo o itlhalosa e le mokitimi yo a lego lebelong, a “ôbêlêla tša kwa pele” gore a fihlelele pakane. Mokitimi o lebelela pele, e sego morago. Ka mo go swanago, Mokriste o swanetše go lebelela ditšhegofatšong tše di lego ka pele e sego dilong tšeo a di tlogetšego morago. Paulo o bolela gape gore: “Xe Le ka ba le kxopolô e šele, xôna Modimo ó sa tlo Le utollêla se e lexo taba.” (Ba-Filipi 3:15) Ka gona, rapela Modimo gore a go thuše go hlagolela pono ye. Tlatša monagano wa gago ka dikgopolo tša Modimo bjalo ka ge di hwetšwa ka Beibeleng. (Ba-Filipi 4:6-9) Naganišiša ka lerato la Jehofa go wena gotee le ka ditšhegofatšo tšeo o di thabelago ka baka la lona. (1 Johane 4:9, 10, 17-19) Ka gona, Jehofa o tla go thuša ka moya o mokgethwa gore o se ke wa tshwenyega ka seo o se tlogetšego morago. Go e na le moo, o tla lebelela bjalo ka Paulo bokamosong bjo bo kgahlišago bjo bo lego ka pele.—Ba-Filipi 3:17.