‘Hlankelang Morena Kriste’

HISTORING ka moka, batho ba dimilione ba ile ba kgotlelela morwalo wa bokgoba. Ka mohlala, nywageng e dikete e fetilego ba-Isiraele ba ile ba tlaišega o šoro ka tlase ga balebeledi ba ba-Egipita. Go etša ge Beibele e bolela, ba ile ba “beela ba-Isiraele balaodi ba makgoba gore ba ba imetše ka merwalo e boima” ba foroma ditena ka mo go kgethegilego.—Ekisodo 1:11, The Jerusalem Bible.

Dinageng tše dintši lehono batho e ka ba e se makgoba ka kgopolo ya kgonthe, eupša ba bantši ba swanelwa ke go šoma diiri tše dintši ka tlase ga maemo a tlamago—ka dinako tše dingwe e le a sa rategego. Ba ka tlase ga morwalo o boima wa seo se ka bitšwago bokgoba bja tša boiphedišo.

Lega go le bjalo, go na le sebopego se tee sa bokgoba seo se sego boima. Moapostola Paulo o kgothaleditše badumedi-gotee le yena gore: ‘Hlankelang Morena Kriste.’ (Ba-Kolose 3:24) Bao ba kgethago go ba makgoba a Kriste ba imollwa merwalo ya bona e boima. Jesu ka boyena o itše: “Tlang xo Nna bohle ba Le lapišitšwexo, ba Le imêlwaxo; Nna ke tlo Le khutšiša. Le ithwešê yoko ya-ka, Le rutwê ke Nna; xobane ke yo boló le wa pelo e kokobetšexo; ’me Le tlo hwetša khutšô ya meôya ya lena. Xobane yoko ya-ka xa e robe, morwalô wa-ka ké o bohwêfê.”—Mateo 11:28-30.

Go amogela joko ya Kriste ga go lokolle motho boikarabelong bja go fepa lapa la gagwe ka dilo tše di bonagalago. (1 Timotheo 5:8) Lega go le bjalo, go lokolla dilong tše dintši tše di tanyago tša dikgahlego tša dilo tše di bonagalago. Go e na le go dira boiketlo bja dilo tše di bonagalago pakane ya motheo bophelong, Bakriste ba kgotsofatšwa ke dinyakwa tša motheo.—1 Timotheo 6:6-10; bapiša le 1 Ba-Korinthe 7:31.

Bakriste ba bile ba hwetša kgotsofalo go phethagatšeng boikarabelo bja bona bja go bolela “Ebangedi” ya Mmušo wa Modimo. (Mateo 24:14) Se se tliša lethabo la kgonthe le kgotsofalo!

Re swanetše go leboga gore re ka ‘hlankela Morena Kriste’!

[Picture Credit Line on page 32]

Pictorial Archive (Near Eastern History) Est.