Kamoo go ka Thušwago Batho ba ba Nyamilego Gore ba Hwetše Lethabo Gape

EPAFORODITO morutiwa wa Mokriste wa lekgolong la pele la nywaga o be a nyamile. O be a rometšwe gore a hlokomele dinyakwa tša moapostola Paulo yo a bego a golegilwe, eupja o ile a babja o šoro. Gaešita lege Epaforodito a be a fodile, fela o be a nyamile ka gobane phuthego ya gabo yeo e bego e mo rometše Roma, e be e “kwile xore ó a babya.” (Ba-Filipi 2:​25, 26) Ka ge a be a le kgole gakaakaa eupja a be a rata go se ba kweše bohloko ka se, o ile a welwa ke manyami. Mo gongwe a ka ba a ile a nagana gore ba tla mo lebelela e le motho yo a paletšwego. O be a ka thušwa bjang gore a hwetše lethabo la gagwe gape?

Epaforodito o ile a romelwa morago ga gabo Filipi a swere lengwalo le le tšwago go moapostola Paulo. Paulo ka go lona o laetše phuthego gore: “Mo amoxeleng-xê Moreneng ka lethabô le le tletšexo; xomme banna ba ba byalo Le ba xodišê.” (Ba-Filipi 2:​27-30) Bakriste ba Filipi ba ile ba kgothaletšwa go batametša Epaforodito go bona ka tsela yeo e bego e tla swanela seka se se hlaolegago sa bogwera bjo bo hlaolago phuthego ya Bokriste. Mantšu a bona a homotšago a be a tla mmontšha gore o be a lebelelwa e le yo bohlokwa kudu, ee, ‘a godišwa.’ Tlhokomelo ye ya lethabo e be e tla dira se segolo tabeng ya go mo thuša go hwetša kimollo kgateletšong ya gagwe ya monagano.

Mohlala wo o bontšha gore gaešita lege Bakriste ka moka ba ‘thaba Moreneng,’ fela ba bangwe gare ga bona ba kwešwa bohloko ke dibopego tše di fapa-fapanego tša manyami. (Ba-Filipi 4:4) kgateletšego e šoro ya monagano ke bolwetši bjo bogolo bja maikwelo bjoo bo išitšego gaešita le tabeng ya go ipolaya. Ka dinako tše dingwe, kagego ya bjoko le dibopego tše dingwe tša mmele di a akaretšwa. Lega go le bjalo, manyami gantši a ka fokotšwa ka thušo e dirwago ka temogo ke ba bangwe. Ka gona, Paulo o ile a nea kgothatšo: “Le tsošê ba dipelo tše di tapilexo.” (1 Ba-Thesalonika 5:​14) Ka gona, diphuthego tša Dihlatse tša Jehofa di swanetše go nea ka lethabo thekgo ya maikwelo meoyeng yeo e nyamilego. Boikarabelo bjo bo ile bja lemogwa ke mokgatlo wa mehleng yeno wa Bokriste morago kua ka 1903, ka gobane The Watch Tower ka nako yeo e ile ya bolela ka meoya yeo e nyamilego goba batho bao ba boifago, ka gore: “Bao ba swerwego ke poifo le ba fokolago ba tla nyaka thušo, thekgo le kgothatšo.” Eupja o ka thuša bjang batho bao ba nyamilego?

Sa pele, ka go bontšha ‘kwelobohloko’ mo gongwe o ka kgona go thuša motho yo a nyamilego gore a utolle “manyami” a lego pelong ya gagwe. Ka morago ga moo, “lentšu la botho” leo le tšwago go wena mo gongwe le ka mo thuša gore a thabe. (1 Petro 3:8; Diema 12:​25, Phetolelo ya Kgale) Go mo dira gore a bolele a hunologile gomme a bone go kgomega ga gago ka yena, mo gongwe go ka tliša kimollo e kgolo. Mary, Mokriste yo a se a nyalwago yo a bego a katana le manyami o boletše gore: “Ke be ke e-na le bagwera ba bantši bao ruri ke bego nka ba utollela tša pelong ya-ka. Ke be ke nyaka motho yo a ka ntheetšago.” Go ba le motho o mongwe yo o ka abelanago le yena dikgopolo tše di tšwago pelong tšeo di lego mabapi le ditlalelo tša bophelo, go ka bolela mo gogolo kudu.

Lega go le bjalo, go nyakega mo gontši kudu go feta go theetša le go nea keletšo yeo e se nago matla kudu e bjalo ka gore, “se iše pelo mafiša” goba “Di lebale.” Dipolelo tše bjalo di ka bontšha go hlaelela ga kwelobohloko le go itira yo a sa hwetšwego nakong ya ge motho o mongwe a nyamile, go etša ge le Diema 25:​20 e bontšha ka gore: “Xo ôpêlêla mo-ja-pelo koša ké xo apola kobô xe xo tonya.”dikgothatšo tše e sego tša kgonthe le tšona mo gongwe di ka tlogela motho yo a nyamilego a tshwenyegile kudu. Ka baka la’ng? Ka gobane maiteko a bjalo ga a bontšhe mabaka a manyami a gagwe.

Matlafatša ka Mantšu

Motho yo a nyamilego kudu ga a kwe a nyamile feela, eupja o bile o hwetša a se na mohola le go hloka kholofelo. Lentšu la Segerika leo le fetolelago “batho bao ba nyamilego” gabotse-botse le bolela “batho ba moya o monyenyane.” Moithuti o mongwe wa Mogerika o hlalosa lentšu ka tsela ye: “Motho yo a katanago tlase ga mathata a bjalo, yoo pelo ya gagwe e nyamilego.” Ka gona, methopo ya gagwe ya maikwelo e pšhele gomme go ikholofela ga gagwe go fedile.​—Bapiša le Diema 17:22.

Mopatriareka Jobo o itše: “Nkabe ke Le tiiša ka molomo wa-ka.” (Jobo 16:5) Lentšu la Sehebere bakeng sa ‘matlafatša’ ka dinako tše dingwe le bolelwa e le “tiiša.” Le dirišwa go hlalosa kamoo tempele e ilego ya ‘tiišwa’ ka gona ka go lokišwa gape. (Jesaya 41:​10; Nahume 2:3; 2 Koronika 24:​13) Mantšu a gago a swanetše gore a age gape go ikholofela ga motho yo a nyamilego go etša ge ekare ke go aga ka go bea setena godimo ga setena. Go dira se go nyaka gore o kgahliše ‘monagano’ wa gagwe. (Ba-Roma 12:1) Tokollo ya The Watch Tower ya 1903 yeo e bontšhitšwego mathomong e boletše mabapi le batho bao ba nyamilego gore: “Ka go hlaelelwa . . . ke go ikholofela, ba swanetše gore ba kgoromeletšwe pele ganyenyane, e le gore ba tle ba tšweletše bokgoni bjoo ba nago le bjona e le ka kgonthe e le gore ba tle ba kgothatšege le bakeng sa go go ba tšhegofatšo ntlong ka moka ya tumelo.”

Mohlala wa Beibele wa Elikana le mosadi wa gagwe Hanna yo a bego a nyamile o bontšha kamoo o ka matlafatšago ka gona ka mantšu, go etša ge Jobo a dirile. Elikana o be a e-na le basadi ba babedi. O mongwe wa bona e lego Penina o be a e-na le bana ba bantši, eupja Hanna e be e le moopa. Mo gongwe Hanna o ile a ipona a hloka mohola. (Bapiša le Genesi 30:1.) Go etša ge ekare morwalo wo o be o se boima ka mo go lekanego, Penina o ile a mo hlakiša go fihlela moo a ilego a ba a lla gomme a felelwa ke kganyogo ya dijo. Gaešita lege Elikana a be a sa tsebe bogolo bja ditlaišego tša gagwe, feela ge a bona boemo bja gagwe o ile a botšiša ka gore: “Hanna, o llêla’ng? O re’ng O sa je selô? Pelo ya xaxo e šulafetše’ng?”​—1 Samuele 1:​1-8.

Dipotšišo tša Elikana tša botho tšeo di bego di sa bee Hanna molato, di ile tša mo nea sebaka sa gore a bolele maikwelo a gagwe. Go sa šetšwe ge e ba a ile a araba goba a se arabe, fela o ile a thušwa gore a hlahlobišiše lebaka leo le ka bago le bakile gore a nagane gore ga a na mohola. Motho yo a nyamilego mo gongwe a ka bolela gore, ‘Ke upja ke le motho yo mobe.’ O ka botšiša gore, ‘ke ka baka la’ng o ikwa ka tsela yeo?’ Bjale theetša ka tlhokomelo ge a go utollela maikwelo a pelo ya gagwe.​—Bapiša le Diema 20:5.

Elikana bjale o ile a botšiša Hanna potšišo ye e matlafatšago: “A nna xa ke a Xo lekana ka fetiša barwa ba lesome?” Hanna o ile a gopotšwa ka lerato leo Elikana a mo ratago ka lona, go sa šetšwe boopa bja gagwe. O be a mo tšea e le yo bohlokwa, gomme Hanna ka gona o be a ka fetša ka gore: ‘Ruri, ga ke motho yo a hlokago mohola le gatee-tee. Ruri, ke ratwa ke monna wa-ka kudu!’ Mantšu a Elikana a ile a tiiša Hanna, ka gobane o ile a thoma go ja gomme a ya ka tempeleng.​—1 Samuele 1:​8, 9.

Go etša ge Elikana a be a bolela ka go lebanya gomme a dira gore mosadi wa gagwe a ele hloko lebaka le le kwalago la gore a ikwe a le kaone, bao ba ratago go thuša batho ba ba nyamilego ba swanetše go dira ka mokgwa o swanago. Ka mohlala, Mokriste yo a bitšwago Naomi o boletše se mabapi le seo se mo thušitšego gore a hwetše lethabo la gagwe gape: “Bagwera ba bangwe ba retile tsela yeo ke godišitšego morwa wa-ka ka yona, tsela yeo ke hlokometšego legae la-ka ka yona gaešita le tsela yeo ke hlokometšego ponagalo ya-ka ka yona go sa šetšwe manyami a-ka. Kgothatšo ye e boletše se segolo kudu go nna!” Ee, theto e swanetšego e thuša motho yo a nyamilego gore a bone dika tša gagwe tše dibotse gomme a kgone go lekanya go ikholofela ga gagwe ka tshwanelo.

Ge e ba mosadi wa gago a nyamile, ke ka baka la’ng o sa tsome go mo matlafatša ka go dumelelana le mantšu a Diema 31:​28, 29? Moo re bala gore: “Monna wa xaxwe ó a mo rêta. Ò re: Basadi ba dinatla ké ba bantši; xo hlôkwa wa xo phala wêna.” Lega go le bjalo, mosadi yo a nyamilego mo gongwe a ka se ke a amogela theto e bjalo, ka ge a ka kwa a paletšwe ka baka la ge a sa kgone go hlokomela mediro ya lapa kamoo a naganago gore o swanetše go e hlokomela ka gona. Lega go le bjalo, ka go mo gopotša ka seo a lego sona pelong ya gagwe le seo a bego a le sona pele ga ge a ka welwa ke manyami, mo gongwe o ka kgona go mo kgodiša gore go mo reta ga gago ga se ga lefeela. Le gona o swanetše go dumela gore seo a se dirago mo nakong ye se bontšha boiteko bjo bogolo. O ka bolela gore: ‘Ke tseba kamoo o katanego ka gona gore o dire se. Boiteko bja gago bjo bogolo bo kgahliša gakaakaang!’ Go hwetša kamogelo le theto ya molekane wa motho le bana ba gagwe, bona batho bao ba mo tsebago kaone ruri ke gabohlokwa bakeng sa go matlafatša go ikholofela.​—Bapiša le 1 Ba-Korinthe 7:​33, 34.

Go diriša mehlala ya Beibele go ka thuša motho yo a nyamilego gore a bone diphetogo tša monagano tšeo di ka nyakegago. Ka mohlala, motho mo gongwe o nagana kudu ka dikgopolo tša ba bangwe. O ka bolela ka mohlala wa Epaforodito gomme wa mmotšiša: ‘Ke ka baka la’ng o nagana gore o ile a nyama ge a e-kwa gore phuthego ya gabo e tsebile ka bolwetši bja gagwe? Na ruri o be a paletšwe? Ke ka baka la’ng Paulo a ile a bolela gore ba swanetše go mo amogela ka lerato? Na mohola wa kgonthe wa Epaforodito bjalo ka motho o be o ithekgile ka tokelo ya tirelo yeo a bego a e-na le yona?’ Dipotšišo tše bjalo mo gongwe di ka thuša Mokriste yo a nyamilego gore a di diriše go yena gomme a lemoge gore ga se a palelwa.

“Le Thekxetšê Bafokodi”

Beibele e a kgothatša: “Le thekxetšê bafokodi.” (1 Ba-Thesalonika 5:​14) Go ba gona ga sehlopha sa bagwera bao e lego Bakriste ba ba ka hlokomelago ka mo go holago, ke mohola o mongwe wa bodumedi bja therešo. Bagwera ba kgonthe ke bao ba ‘tswaletšwego motho mohla wa tlalelo,’ gomme ke bao ba kgomarelanago e le ka kgonthe le motho yo a nyamilego. (Diema 17:​17) Nakong ya ge moapostola Paulo a be a e-kwa a ‘botlanegile’ gomme a ‘e-na le poifo ka teng,’ o ile a homotšwa ke “xo tla xa Tito.” (2 Ba-Korinthe 7:​5, 6) Ka mo go swanago, maeto a thobago pelo le megala yeo e amogelwago ka dinako tše di swanetšego, ke tšeo di ka lebogwago e le ka kgonthe ke batho bao ba nyamilego. O ka botšiša ge e ba go e-na le tsela e nngwe yeo o ka thušago ka yona yeo e swanago le go sepediša melaetša, go dira mediro ya ka lapeng goba le tše dingwe.a Mokriste yo a bitšwago Maria o re: “Nakong ya ge ke be ke nyamile, mogwera wa-ka o be a nngwalela gantši gomme ka mehla a akaretša mangwalo a kgothatšago. Ke be ke bala lengwalo gantši gomme ke lla ge ke dutše ke le bala. Mangwalo a bjalo a be a swana le gauta go nna.”

Paulo ka morago ga go kgothatša phuthego gore e thuše “ba dipelo tše di tapilexo,” o re: “Le se kê la fêlêla motho pelo. Le bônê xore xo se kê xwa ba le e a lefetšaxo bobe ka bobe.” (1 Ba-Thesalonika 5:​14, 15) Kgotlelelo ke ya bohlokwa ka gobane ka baka la bohloko bja monagano, kgopolo e fošagetšego le go lapa mo go tlišwago ke go se robale, motho yo a nyamilego mo gongwe a ka araba ka ‘polelo e bogale’ go etša ge Jobo a dirile. (Jobo 6:​2, 3) Rachelle, Mokriste yo mmagwe a ilego a nyama kudu, o bolela gore: “Mma ka dinako tše dintši o be a bolela se sengwe seo se sa rategego kudu. Dinakong tše ka moka, ke be ke leka go ikgopotša ka mohuta wa motho yo Mma a bego a le yena e le ka kgonthe​—yo lerato, yo botho le yo a fago kudu. Ke ile ka ithuta gore batho bao ba nyamilego ba bolela dilo tše dintši tšeo ba se ba ikemišetšago go di bolela. Selo se sebe seo motho a ka se dirago ke go ipušeletša ka mantšu a mabe goba ditiro tše mpe.”

Basadi ba bangwe bao ba gotšego ka tsebo ba Bakriste ba ka ba boemong bja go tliša kimollo basading ba bangwe bao ba ferekanego maikwelong. (Bapiša le 1 Timotheo 5:​9, 10.) Basadi ba ba ba swanelegago ba Bakriste ba ka ikemišetša go bolela le batho ba ba bjalo ka go ba homotša dinakong tše di swanetšego. Ka dinako tše dingwe ke mo go swanetšego gore dikgaetšedi tše di gotšego ka tsebo di tšwele pele go thuša mosadi, go e na le gore seo se dirwe ke banababo rena. Bagolo ba Bakriste ka go rulaganya ditaba le go di sepediša ka tshwanelo, ba ka bona gore batho bao ba nyamilego ba hwetša tlhokomelo ye e nyakegago.

Bagolo Bao ba Nago le Maleme a Rutegilego

Badiši ba moya ba swanetše gore ba be le “tsebô le bohlale,” e le gore ba tle ba tsebe “kamoo ba ka bolelago ka gona go kgothatša ba ba nyamilego.” (Jeremia 3:​15; Jesaya 50:​4, Beck) Lega go le bjalo, ge e ba mogolo a sa hlokomele a ka dira e sego ka boomo gore motho yo a nyamilego a kwe a nyamile kudu. Ka mohlala, bagwera ba Jobo ba bararo ba ile ba lakana go ya go ‘hloboga Jobo le go mo homotša.’ Eupja mantšu a bona ao a bego a tutuetšwa ke kgopolo e fošagetšego ka tlalelo ya Jobo, a ile a mo ‘setlaganya’ go e na le go mo homotša.​—Jobo 2:​11; 8:​1, 5, 6; 11:​1, 13-19; 19:2.

Dihlogo tše di fapa-fapanego tše di lego dipukung tša Watch Tower di bontšhitše melao ya motheo yeo e ka dirišwago ge go eletšwa batho.b Bagolo ba bantši ba dirišitše ditaba tše bjalo. Lega go le bjalo, mabakeng a mangwe dipolelo tšeo di se nago tlhaloganyo tše di boletšwego ke bagolo​—mo gongwe di bolelwa ke bona ka go lebanya goba dipolelong—​e bile tšeo di gobatšago kudu. Ka gona, anke bagolo ba se ke ba ba ‘babolabodi bao mantšu a bona a hlabago bjalo ka lerumo,’ eupja ba be le ‘leleme leo le fodišago la ba lego bohlale.’ (Diema 12:​18) Ge e ba mogolo a ka nagana pele ka mafelelo a ka tlišwago ke dipolelo tša gagwe, gona mantšu a gagwe a ka ba a thobago. Ka gona, bagolo akgofelang go theetša gomme le diege go dira diphetho ka ntle ga ge le kwele taba ka moka.​—Diema 18:13.

Ge bagolo ba bontšha kgahlego ya kgonthe bathong bao ba nyamilego, batho ba bjalo ba kwa ba ratwa le go hlompšha. Tlhokomelo e bjalo yeo e sego ya boithati mo gongwe e ka tutueletša batho ba gore ba hlokomologe dipolelo lege e le dife tšeo di nyamišago. (Jakobo 3:2) Batho bao ba nyamilego gantši ba fenywa kudu ke phošo, gomme bagolo ba ka ba thuša gore ba be le pono e leka-lekanego ya ditaba. Gaešita lege phošo e kgolo e dirilwe, fela tlhokomelo ya moya yeo e newago ke bagolo e ka thuša ‘sehlotša gore se fodišwe.’​—Ba-Hebere 12:13.

Ge batho bao ba nyamilego ba e-kwa gore dithapelo tša bona ke tšeo di se nago matla, gona bagolo ba ka rapela gotee le bona le go ba rapelela. Bagolo ka go bala gotee le bona dihlogo tšeo di theilwego Beibeleng tše di bolelago ka manyami, ba ka ‘tloša’ batho ba ka mantšu a thobago a moya. (Jakobo 5:​14, 15) Bagolo le gona ba ka thuša motho yo a nyamilego gore a gate megato ya Mangwalo ya go lokiša diphapano lege e le dife tša gagwe tšeo a nago le tšona le ba bangwe, ge e ba bjo e le bjona bothata. (Bapiša le Mateo 5:​23, 24; 18:​15-17.) Dintwa tše bjalo tšeo gantši di lego ka lapeng, ke tšeo di bakago manyami.

Ela hloko gore go fola go tšea nako. Gaešita le maiteko a lerato a Elikana ga se a ka a imolla Hanna manyaming a gagwe kapejana. Dithapelo tša gagwe gotee le go bewa pelo ke moperisita o mogolo, di ile tša feleletša ka go mo imolla. (1 Samuele 1:​12-18) Ka gona, se fele pelo ge e ba karabelo e lego gona e le e nyenyane. Ee, bagolo ka kakaretšo ga se dingaka gomme mo gongwe ba ka hwetša maiteko a bona e le ao a lekanyeditšwego ditabeng tše dingwe. Bona, gotee le ditho tša lapa labo motho yo a nyamilego, ba ka swanelwa ke go kgothatša motho yoo gore a tsome thušo ya ditsebi. Ge e ba go nyakega, bagolo goba ditho tša lapa ba ka hlalosetša gabotse ngaka lege e le efe bohlokwa bja go hlompha tumelo ya bodumedi ya motho yo a nyamilego.

Go fihlela lefase le lefsa la Modimo le e-tla, ruri ga go na motho yo a tlago go ba le bophelo bjo bo phethagetšego mmeleng, monaganong goba maikwelong. Mo nakong ye, Mokriste lege e le ofe yoo a felelwago ke lethabo la gagwe ka baka la manyami ba ka hwetša matla e sego feela phuthegong ya Bokriste, eupja gaešita le go a hwetša go Tatago rena wa legodimo “yo a homotšago bao ba nyamilego.”​—2 Ba-Korinthe 7:​6, New American Standard Bible.

[Mongwalo wa tlase]

[Lepokisi go letlakala 29]

KAMOO O KA BOLELAGO KA GONA KA GO HOMOTŠA

□ THEETŠA KA TLHOKOMELO​—‘Hwetša’ maikwelo a pelo ya motho ka dipotšišo tše di botšišwago ka temogo. Akgofela go theetša gomme o diege go dira diphetho lege e le dife pele ga ge o ka tseba taba ka moka.​—Diema 20:5; 18:13.

□ BONTŠHA KWELOBOHLOKO​—‘Kwelobohloko’ e swanetše go kopanywa le ‘bonolo’ ge o dutše o leka go boledišana le motho yo a nyamilego. ‘Lla le motho yo a llago.’​—1 Petro 3:8; Ba-Roma 12:15.

□ E-BA YO A SA FELEGO PELO​—Mo gongwe go ka nyaka dipoledišano tšeo di boeletšwago gantši, ka gona e-ba yo a kgotlelelago. Hlokomologa ‘dipolelo tše bogale’ tšeo motho yo a nyamilego mo gongwe a ka di bolelago ka baka la tlalelo.​—Jobo 6:3.

□ MATLAFATŠA KA MANTŠU​—Thuša motho yo a nyamilego go bona dika tša gagwe tše di botse. Nea theto yeo e lebanego. Bontšha gore mathata, diphihlelo tše mpe tša nako e fetilego goba diphošo ga se tšona tše di bolelago mohola wo e lego wa motho ka noši. Hlalosa lebaka leo ka lona Modimo a mo ratago le go mo hlokomela.​—Jobo 16:5.