“Dilo Tšeo di Agago Dikholofelo tša Rena”

E BE e le meso e borutho ya Sontaga, ka September 10 ge batho ba 4 155 ba bokana Holong e botse ya Kopano ya Dihlatse tša Jehofa kua Jersey City, New Jersey, bakeng sa lenaneo la go fetša sekolong la sehlopha sa bo-87 sa Sekolo sa Beibele sa Watchtower sa Gilead. Go be go e-na le baithuti ba 24 le baeng ba bona ba laleditšwego gotee le ditho tša lapa la Bethele go tšwa Brooklyn le go tšwa dipolaseng tša Mokgatlo.

Batheetši ba ile ba homotšwa kapejana ka 10:00 a.m. ke Albert Schroeder, yo a ilego a dira bjalo ka modula-setulo wa letšatši. Ka morago ga kopelo ya go bula, thapelo e ile ya dirwa ke John Barr. Banababo rena ka bobedi ke ditho tša Sehlopha se Bušago. Ngwanabo rena Schroeder o ile a nea tlhaloso e kopana ka sehlopha, gomme a bolela gore bao ba fetšago sekolo ba be ba “itokišeleditše go ba le karolo modirong wa lefase ka moka wa Dihlatse tša Jehofa, woo mo nakong ye o dirwago dinageng tše 210.” Ka morago o ile a tšwela pele a rola diboledi tše dingwe tše šupago.

Robert Wallen, yo a dirago Diofising tša Bolaodi ntlong-kgolo ya kua Brooklyn, o ile a thea sehlogo sa gagwe se rego “Ratanang ka Lerato le Tiilego” go 1 Petro 4:8. O ile a bolela gore baromiwa ba swanetše go thušana, gomme ka ge baithuti ka moka sehlopheng se ba le lenyalong, o ile a lebiša ditlhaloso tša gagwe kudu-kudu go banyalani. O ile a eletša ka gore, “Mosadi o swanetše go rata monna wa gagwe gaešita lege a ka ithuta leleme le šele ka pela go feta yena. O swanetše go kwešiša le go bontšha kwelobohloko. Le gona o swanetše go leka go mo kwešiša ge e le letšatši la gagwe la go apea bekeng!” (Ka tlwaelo moromiwa o mongwe le o mongwe o abelwa letšatši la ka mehla leo ka lona a tlago go apeela ka moka bao ba lego lapeng la baromiwa.) Ka morago seboledi se ile sa hlalosa mathata le diphihlelo tšeo di segišago tšeo banna ba bangwe ba bago le tšona ge ba ithuta go apea, bjalo ka phihlelo ya monna yo a ilego a diriša baking soda go e na le go diriša baking powder. Ngwanabo rena Wallen o ile a bolela gore monna o swanetše “go kwešiša dinyakwa tša mosadi wa gagwe,” ka ge nako e ntši ya monna e ka dirišetšwa go phetha boikarabelo bja ka phuthegong. Go banna gotee le go basadi o ile a re: “E-bang bao ba aganago ka dinako tšohle; le se ke la bolela dilo tše sa swanelago, gaešita le magareng ga lena. Phemang go ipea lekatana. Le gona ge le dirile diphošo, le kgopele tshwarelo.”

Seboledi se latelago, Daniel Sydlik, setho sa Sehlopha se Bušago, o ile a kgetha sehlogo se rego: “Bolokang Mollo wa Moya wa Modimo o Tuka ka Mehla,” seo se theilwego go 1 Ba-Thesalonika 5:19. O boletše gore: “Mollo o ka ruthetša wa ba wa senya. Ka dinako tše dingwe baromiwa ba a kgothatša gomme ka dinako tše dingwe ba a tšhošetša. Monna wa kgale wa mo-Afrika o kile a re: ‘Butšwetša ganyenyane,’ go etša ge o nyaka go dira gore tlhasenyana ya mollo o monyenyane e gole! Ge o bolela ka dilo tšeo mo gongwe o tlago go di hwetša kabelong ya gago—tshepedišo ya ditšhila yeo e lego kgakala, dintšhi, lešata la dikoloi, naga e mpsha, bodumedi bjo bo sa tlwaelegago—bontšha tlhompho. O ka kgona go thuša batho ba bantšhi ge o diriša boleta go feta ge o diriša bogale. Ithute go ‘butšwetša ganyenyane’ le go dira gore mollo wa moya wa Jehofa o dule o tuka.”

Ka morago sehlogo se se rego “Swarega Kabelong ya Gago ka Mafolofolo le Kelohloko” se ile sa godišwa ke Kenneth Flodin, molebeledi wa Legae la Bethele Dipolaseng tša Watchtower. Ka ge Sekolo sa Gilead mo nakong ye se le Dipolaseng tša Watchtower, bao ba fetšago sekolong ka moka ba be ba tseba Ngwanabo Rena Flodin gabotse. Polelong ya gagwe go ile gwa tšweletšwa dikarolo tše pedi tšeo di nyakago tlhokomelo: (1) go rata dilo tše di bonagalago le (2) dipolelo tše sa nepagalago le dikgopolo tše sa nepagalago. Keletšo e be e le gore, “Phemang boithati. Lebelelang pele lefaseng le lefsa bakeng sa matsaka le dilo tše botse; le se ke la di nyaka gona bjale.” Bakeng sa go thuša baithuti go phema pono e sa swanelago, seboledi se ile sa tsopola Numeri 13:28, 32. O itše, “ka dinako tše dingwe batho ba bona selo se se swanago, gomme ba bangwe ba tla ba le kgopolo e fošagetšego mola ba bangwe ba tla ba le kgopolo e nepagetšego. Go swana le Kalebe wa kgale, botang Jehofa. Botšang ba bangwe ka dikgopolo tša lena tše nepagetšego. Ge le ka ba le kgopolo e sa nepagalago, fetogelang tabeng e nngwe e le gore le pheme dikgopolo tše fošagetšego.”

Lloyd Barry, setho sa Sehlopha se Bušago yo le yena ka noši e kilego ya ba moromiwa, o ile a nea keletšo e šomago. O itše: “Lerato, lethabo, gotee le khutšo ke dika tše bohlokwa bakeng sa baromiwa ba bafsa. Le tla lemoga mafokodi a ba bangwe legaeng la lena la baromiwa, eupja hlokomelang mafokodi a lena ka noši.” O ile a gopola matšatši a gagwe a mathomo kua Japane ge baromiwa ba be ba e-ja hlapi ka mehla, eupja ka morago gwa goroga baromiwa ba bafsa bao ba bego ba ila hlapi. Ka gona dijo di ile tša fetolwa ka baka la go bontšha lerato go ba bafsa. Le gona o ile a eletša ka gore: “Le se ke la lesa go dira metlae; le se ke la tlogela gore letšatši le sobele le sa na le mathata a itšego. Bolokang khutšo legaeng, gomme le tla thaba bophelong bja lena le le baromiwa.”—Ba-Efeso 4:26.

Ka morago Jack Redford e lego o mongwe wa barutiši kua Gilead, o ile a bolela ka sehlogo seo se rego: “Jehofa o tla Phetha go Tlwaetšwa ga Lena” a theile ditlhaloso tša gagwe go 1 Petro 5:10. O itše: “Jehofa a ka le tlwaetša ka go dumelela gore go rotoge maemo ao go lego thata go lebeletšana le wona. Bjalo ka ge a ile a tlwaetša baapostola go rarolla diphapano magareng ga bona, le lena o tla le tlwaetša. Le se ke la nyama ge le fapana ka dikgopolo. Ikemišetšeng go fetola dimelo tša lena. Boikgogomošo bo dira gore se se be thata, eupja boikokobetšo bo dira gore se se kgonege. Ithuteng go feto-fetoga. Le gona Jehofa o tla le tlwaetša go phedišana gabotse le ba bangwe. Fela ‘le se ke la bea dipelo tša lena dilong tšeo batho ba ka di bolelago’ ka lena.” (Mmoledi 7:21, 22) Tlaišo le yona e dira e le tlwaetšo. Baromiwa bao ba ilego ba kgotlelela tlaišo ba thabile gomme ga ba itshole, eupja ba thabile ka ge ba tlwaeditšwe ke tlaišo.

Ka morago Ulysses Glass, e lego morutiši o mongwe, o ile a bolela mantšu a gagwe a mafelelo go bao ba fetšago sekolo. O ile a lebiša tlhokomelo go Ba-Efeso 4:1-3, gomme a reta sehlopha ka go bontšha dika tše kopanyago tše di boletšwego go yona le go ba kgothaletša go tšwela pele ba dira bjalo ka go re: “Khutšo ke selo se dirago tlemagano, gomme e a nyakega bakeng sa go ba le botee.” Ka morago o ile a tšwela pele ka Ba-Efeso 4:4-6, a bolela ka matla a moya wa Modimo, gomme a gopotša bohle gore “Jehofa ke Mothopo wa matla ka moka a magolo. Re swanetše go mmoifa; go a boifiša go wela diatleng tša gagwe.”—Ba-Hebere 10:31.

Dikholofelo tše Kgolo

Ka morago ka moka ba ile ba theetša ka ditsebe tše pedi ge go bolela Theodore Jaracz, setho sa Sehlopha se Bušago sa Dihlatse tša Jehofa yo a ilego a bolela sehlogong sa thwadi se se bego se re: “Dilo Tšeo di Agago Dikholofelo tša Rena.” A hlalosa 1 Ba-Korinthe 2:9, o ile a re: “Temana ye ga e bolele ka dilo tša nama, ka gobane temana e latelago, 1 Ba-Korinthe 2:10, e bolela ka ‘dilo tše di tseneletšego tša Modimo.’ Se se ile sa akaretša ‘bohlale bja Modimo’ mabapi le ‘thopa e kgethwa,’ e lego ‘bohlale bja gagwe bjo bo fihlilwego’ bjo bo tšwago ka ntle ga tikologo yeo re lego go yona ya dipolanete tšeo di dikologilego letšatši, ee, bohlale bjo bo tšwago go Modimo ka noši.” ( 1 Ba-Korinthe 2:7) Batheetši bjale ba ile ba balelwa Jesaya 64:4, yeo e nago le kgopotšo ya gore re ‘holofele’ go Modimo le dilong tšeo a di lokišeleditšego.

Ke dikholofelo tše kgolo gakaakang tšeo ruri batho ba Modimo ba nago le tšona! Ngwanabo rena Jaracz o ile a bolela tše latelago: “Ka 1919 go ile gwa ba le go wa ga Babele o Mogolo; ka 1922 gwa ba le kgothatšo e kgahlišago ya ‘go tsebagatša Kgoši le Mmušo wa gagwe,’ go bolela ka Mmušo wo o hlomilwego lefaseng ka bophara; ka 1935 batho ba Modimo ba ile ba ithuta tlhaloso ya ‘lešaba le legolo’ go Kutollo 7:9; ka 1943 ba ile ba bona Sekolo sa Gilead se thoma go romela baromiwa dikarolong tša lefase; lehono, ka 1989, lena bao ba fetšago sekolo le na le tokelo ya go tsebiša ditaba tše botse go batho bao ba fišegelago go kwa dikabelong tša lena.”

Thapama, Lon Schilling, molomaganyi wa Komiti ya Dipolasa tša Watchtower o ile a swara Thuto e khutsofaditšwego ya Morokami. Ka morago baithuti ba ile ba neela lenaneo le le bose la mmino gomme ba bapala tše dingwe tša diphihlelo tša bona tša tirelong ya tšhemo. Ka morago ga se, bagoeledi ba lefelong leo ba ile ba bapala papadi e lego nakong e bego e e-na le sehlogo se se rego: “Go Lebeletšana le Ditiro tša Bohwirihwiri tša Sathane.” Mafelelong, ka morago ga go theetša poledišano gotee le baromiwa ba bafsa ba tshelelago, lešaba le le thabilego le ile la opela kopelo ya go phetha gomme la thabela go kopanela thapelong gotee le mookamedi wa Sekolo sa Gilead yo a nago le nywaga e 96, Frederick Franz.

[Lepokisi go letlakala 23]

DIPALO-PALO TŠA SEHLOPHA

Palo ya dinaga tšeo di emetšwego: 5

Palo ya dinaga tšeo ba abetšwego go tšona: 10

Palo ya dihlopha tša banyalani: 12

Palo-moka ya baithuti: 24

Palo-gare ya nywaga ya bogolo: 30,9

Palo-gare ya nywaga ya go ba therešong: 13,4

Palo-gare ya nywaga ya go ba bodireding bja nako e tletšego: 9,2

[Seswantšho go letlakala 23]

Sehlopha sa bo-87 sa Dialoga tša Sekolo sa Beibele sa Watchtower sa Gilead

Lelokelelong le le lego ka mo tlase, methaladi e balwa go tloga ka pele go ya ka morago, gomme maina a lokologantšwe go tloga letsogong le letshadi go ya ka go le letona mothalading o mongwe le o mongwe.

(1) Heindel, E.; Andrews, D.; Casavant, D.; Montanez, E.; Nale, P.; Koukaras, S. (2) Miell, T.; Heithaus, M.; Melton, T.; Hagberg, N.; Kettinen, M. (3) Kettinen, L.; Andrews, W.; Koukaras, E.; McCollough, S.; Melton, G.; McCollough, J. (4) Heindel, W.; Casavant, G.; Miell, G.; Montanez, J.; Nale, M.; Hagberg, I.; Heithaus, K.