Sepela Bjalo ka ge o Rutilwe ke Modimo
“A re yeng, re rotogeleng thabeng ya Jehofa . . . , gore a re rute ditsela tša gagwe, re sepele mebileng ya gagwe.”—MIKA 4:2, PK.
1. Go ya ka Mika, ke’ng se Modimo a bego a tla se direla batho ba gagwe mehleng ya bofelo?
MOPOROFETA wa Modimo Mika o ile a bolela e sa le pele gore “mehleng ya bofelo,” e lego mehla ya rena, batho ba bantši ba be ba tla tsoma Modimo ka mafolofolo gore ba mo rapele. Ba ba be ba tla kgothatšana ka gore: “A re yeng, re rotogeleng thabeng ya Jehofa . . . , gore a re rute ditsela tša gagwe, re sepele mebileng ya gagwe.”—Mika 4:1, 2, PK.
2, 3. Polelelo-pele ya Paulo mabapi le go ba ga batho barati ba tšhelete e phethagala bjang lehono?
2 Go ithuta ga rena 2 Timotheo 3:1-5 go ka re thuša go bona mafelelo a go ba bao ba rutwago ke Modimo “mehleng ya bofelo.” Sehlogong se se fetilego, re thomile ka go bolela ka mehola ye e tlelago bao ba išago pelong temošo ya Paulo ya gore e se be “ba ba ithatago.” Paulo o okeditše ka gore mehleng ya rena batho e be e tla ba “ba megabaru [“barati ba tšhelete,” NW].”
3 Ga go motho yo a swanetšego go ba le grata ya kholetšhe ya histori ya mehleng yeno gore a kwešiše kamoo se se swanelago mehla ya rena ka gona. Na ga se wa ka wa bala ka bakgoboketši ba ditšhelete tša setšhaba le baokamedi ba dikhamphani bao ba sa kgotsofatšwego ke go hwetša dimilione tše dintši tša tšhelete ngwaga le ngwaga? Barati ba ba tšhelete ba tšwela pele ba nyaka ye e oketšegilego, gaešita le ka mekgwa ye e sego ya molao. Mantšu a Paulo gape a swanela ba bantši lehono bao gaešita lege ba se ba huma, e lego ba ba dumago ka mo go swanago, le ka mohla ba sa kgotsofale. O ka ba o tseba ba bantši ba ba bjalo tikologong ya geno.
4-6. Beibele e thuša bjang Bakriste go phema go ba barati ba tšhelete?
4 Na seo Paulo a se boletšego e fo ba sebopego se se sa phemegego sa tlhago ya motho? E sego go ya ka Mohlami wa Beibele yo a boletšego therešo ye kgale-kgale: “Lerato la go rata tšhelete ke modu wa mehuta ka moka ya dilo tše di gobatšago, gomme ka go katanela lerato le ba bangwe ba arošitšwe tumelong gomme ba itlhaba gohle ka mahloko a mantši.” Ela hloko gore Modimo ga se a re, ‘Tšhelete ke modu wa dilo ka moka tšeo di gobatšago.’ O boletše gore ke “lerato la go rata tšhelete.”—1 Timotheo 6:10, NW.
5 Ka mo go kgahlišago, taba ye e dikologilego mantšu ao a Paulo e dumetše gore Bakriste ba bangwe ba babotse lekgolong la pele la nywaga ba be ba humile tshepedišong ya gona bjale ya dilo, go sa šetšwe gore ba hweditše lehumo leo e le lefa goba ba le hweditše ka go le šomela. (1 Timotheo 6:17) Ka gona, go swanetše go ba molaleng gore go sa šetšwe boemo bja rena bja tša ditšhelete, Beibele e re lemoša ka kotsi ya go ba morati wa tšhelete. Na Beibele e nea thuto lege e le efe e nngwe mabapi le go phema bofokodi bjo bjo bogolo le bjo bo tlwaelegilego? Ruri e a e nea, go etša Thutong ya Jesu ya Thabeng. Bohlale bja yona bo tumile lefaseng ka moka. Ka mohlala, ela hloko seo Jesu a se boletšego go Mateo 6:26-33.
6 Bjalo ka ge go begilwe go Luka 12:15-21, Jesu o boletše ka monna wa mohumi yo a ilego a tšwela pele a leka go kgoboketša lehumo le le oketšegilego, eupja gatee-tee a loba bophelo bja gagwe. Nepo-kgolo ya Jesu e be e le efe? O itše: “Phafoxang, Le ilê mexabaru; xobane bophelô bya motho xa bo tšwe lehumong le xo tše a di ruilexo.” Go sepedišana le keletšo e bjalo, Beibele e nyatša go tšwafa gomme e gatelela bohlokwa bja go šoma ka potego. (1 Ba-Thesalonika 4:11, 12) Ao, ba bangwe ba ka ganetša ka gore dithuto tše ga di swanele mehla ya rena—eupja di a e swanela, gomme di a šoma.
Go Rutwa le go Holega
7. Re na le lebaka lefe la go ba le kholofelo ya gore re ka diriša ka katlego keletšo ya Beibele mabapi le mahumo?
7 Ditšhabeng tše dintši o tla hwetša mehlala ya kgonthe ya banna le basadi bao ba tšwago maemong ka moka a tša leago le a tša boiphedišo ba ba ilego ba diriša melao ye ya motheo ya Modimo ka tšhelete. Ba ile ba ikhola le go hola malapa a bona, bjalo ka ge le batho ba ka ntle ba ka lemoga seo. Ka mohlala, ka pukung ya Religious Movements in Contemporary America, go tšwa go mogatiši yo a gatišetšago Yunibesithi ya Princeton, moithuti wa setlogo sa batho o ngwadile gore: “Ka dipukung [tša Dihlatse] le dipolelong tša phuthego ba gopotšwa gore ga se ba ithekga ka dikoloi tše difsa, diaparo tša go bitša tšhelete ya godimo goba mokgwa wa go phela ka go diriša dilo ka go senya bakeng sa boemo bja bona. Ka nako e swanago Hlatse e swanetše go šomela mothwadi wa yona letšatši le le tletšego ka tshwanelo [le gona e swanetše go] botega e le ka kgonthe . . . Dika tše di bjalo di dira gore gaešita le motho yo a se nago dilo tše dintši tšeo a di kgonago e be mothwalwa yo a nago le mohola, gomme Dihlatse tše dingwe Philadelphia Leboa [U.S.A.] di hlatlošeditšwe maemong a boikarabelo bjo bogolo kudu modirong.” Ka mo go kwagalago, batho bao ba amogetšego thuto ye e tšwago go Modimo ka Lentšu la gagwe ba phafošitšwe malebana le dikgopolo tše di dirago gore go be thata go lebeletšana le maemo a gona bjale. Diphihlelo tša bona di bontšha gore thuto ya Beibele e lebiša bophelong bjo bokaone le bjo bo thabišago.
8. Ke ka baka la’ng “banyatši,” “ba ba ikgodišago” le “barogaki” ba ka gokaganywa, gomme ke’ng seo se bolelwago ke dipolelwana tše tše tharo?
8 Re ka kgokaganya dilo tše di latelago tše tharo tše Paulo a di lokeletšago. Mehleng ya bofelo batho e be e tla ba “banyatši, le ba go ikgodiša, le barogaki.” Tše tše tharo ga di swane, eupja ka moka ga tšona di tswalane le boikgantšho. Ya pele ke “banyatši.” Pukuntšu e bolela gore lentšu la motheo la Segerika mo le bolela: “‘Motho yoo a ipeago godimo go feta moo boemo bja kgonthe bo mmeago gona,’ goba ‘yoo a holofetšago go gontši go feta kamoo a ka kgonago go dira.’” O ka kwešiša lebaka leo ka lona Dibeibele tše dingwe di dirišago polelwana yeo e rego “ba ba nago le boikgantšho.” Ka morago go latela “ba ba ikgodišago” goba ka go lebanya “ba ba bonagalago ba phagame.” Ya mafelelo ke “barogaki.” Ba bangwe mo gongwe ba ka nagana ka barogaki e le bao ba bolelago Modimo ka go mo nyatša, eupja lentšu la motheo le akaretša polelo ye e gobatšago, ye e senyago leina goba ye e gobošago ye e lebišwago go batho. Ka gona, Paulo o šupa go thogako yeo e lebišwago go Modimo le go motho.
9. Ka go fapana le dikgopolo tše di atilego tše di gobatšago, ke dikgopolo dife tše Beibele e kgothaletšago batho go di hlagolela?
9 O ikwa bjang ge o le gare ga batho ba ba swanelago tlhaloso ya Paulo, e ka ba bašomi-gotee le wena, bao o tsenago le bona sekolo goba ba leloko? Na se se go nolofaletša bophelo? Goba na batho ba ba bjalo ba hlakahlakanya bophelo bja gago, ba dira gore go be thata kudu go wena go lebeletšana le mehla ya rena? Lega go le bjalo, Lentšu la Modimo le re ruta gore re pheme boemo bjo bo bjalo bja kgopolo, gomme le nea thuto ya go etša yeo e hwetšwago go 1 Ba-Korinthe 4:7; Ba-Kolose 3:12, 13; le Ba-Efeso 4:29.
10. Ke’ng se se bontšhago gore batho ba Jehofa ba holwa ke go amogela thuto ya Beibele?
10 Gaešita lege Bakriste ba se ba phethagala, fela go diriša ga bona tayo ye e botse go ba thuša kudu mehleng ye e thata. Makasine wa Setaliana wa La Civiltà Cattolica o boletše gore lebaka le tee leo ka lona Dihlatse tša Jehofa di tšwelago pele di oketšega “ke gore mokgatlo wo o nea ditho tša wona semelo se se lebanego le se se tiilego.” Eupja ge a re ‘semelo se se tiilego,’ na mongwadi o be a bolela gore ke “banyatši, le ba ba ikgodišago, le barogaki”? Ka mo go fapanego, makasine wa ma-Jesuit o bolela gore mokgatlo “o nea ditho tša wona semelo se se lebanego le se se tiilego, gomme ke lefelong la bona moo ba amogelwago gona ka borutho le maikwelo a borwarre le botee.” Na ga go molaleng gore dilo tšeo Dihlatse di di rutilwego di a di thuša?
Thuto e Hola Ditho tša Malapa
11, 12. Paulo o bontšhitše bjang ka mo go nepagetšego kamoo boemo bo bego bo tla ba ka gona ka malapeng a mantši?
11 Re ka akaretša dilo tše nne tše di latelago gotee, tšeo di nyakilego di tswalane ka tsela e itšego. Paulo o boletše e sa le pele gore mehleng ya bofelo batho ba bantši e be e tla ba “ba ba sa kwego batswadi ba bona, ba ba sa lebogego, le ba bokgopo [“ba ba sa botegego,” NW], le ba ba se nago lerato.” O a tseba gore a mabedi a mafokodi a—go se leboge le go se botege—a gohle go re dikologa. Lega go le bjalo, re ka bona gabonolo lebaka leo ka lona Paulo a a beilego magareng ga ‘go se kwe batswadi’ le ‘go se be le lerato.’ Tše tše nne di a nyalelana.
12 Mo e nyakilego e ka ba motho yo mongwe le yo mongwe yo a elago hloko, e ka ba yo mofsa goba yo mogolo, o tla swanela go dumela gore go se kwe batswadi go iphile matla, gomme go mpefala go e-ya pele. Batswadi ba bantši ba lla ka gore bafsa go bonala ba sa leboge dilo tšohle tše ba di direlwago. Bafsa ba bantši ba belaela ka gore batswadi ba bona ga ba ba botegele e le ka kgonthe (goba go botegela lapa ka moka) eupja ba swaregile ka mešomo ya bona, maipshino goba ka bona ka noši. Go e na le go leka go nyakišiša gore ke mang yo a lego phošo, lebelela ditla-morago tša se. Go se tlwaelane ga batho ba bagolo le bafsa gantši go feleletša go dirile gore bafsa ba itlhamele ditekanyetšo tša bona tša boitshwaro goba tša go hloka boitshwaro. Mafelelo e ba afe? Tekanyo ye e golago ya go ima ga bafsa, go ntšha dimpa le malwetši ao a fetetšwago ka kopano ya botona le botshadi. Gantši go hloka lerato la tlhago ka gae go feleletša ka bošoro. Mo gongwe o ka laodiša mehlala go tšwa tikologong ya geno, e lego bohlatse bja gore lerato la tlhago le a nyamelela.
13, 14. (a) Ge re lebeletšane le go senyega ga malapa a mantši, ke ka baka la’ng re swanetše go lebiša tlhokomelo Beibeleng? (b) Ke keletšo ya mohuta ofe e bohlale ye Modimo a e neago mabapi le bophelo bja lapa?
13 Se mo gongwe se ka hlalosa lebaka leo ka lona ba bantši ba fetogelago bao ka nako e nngwe ba kilego ba bonagala e le karolo ya lapa la bona le le katološitšwego, ba lešika, ba setšhaba se tee goba morafo o tee. Lega go le bjalo, gopola gore ga re bolele dilo tše bakeng sa go lebiša tlhokomelo go dilo tše di sa kgahlišego tša bophelo lehono. Dilo tše pedi tša motheo tše re nago le kgahlego ka tšona ke gore: Na dithuto tša Beibele di ka re thuša go phema go tlaišwa ke diphošo tše Paulo a di lokeleditšego, le gona na re tla holwa ke go diriša dithuto tša Beibele maphelong a rena? Dikarabo e ka ba ee, bjalo ka ge go hlatselwa ke dintlha tšela tše nne lelokelelong la Paulo.
14 Polelo ye e akaretšago e amogelwa ka tshwanelo: Ga go na thuto ye e phalago ya Beibele tabeng ya go tšweletša bophelo bja lapa bjo bo ruthetšago pelo le bjo bo nago le katlego e botse. Seo se hlatselwa ke mohlala feela wa keletšo ya yona ye e ka thušago ditho tša lapa e sego feela go phema mereo, eupja gape le go atlega. Ba-Kolose 3:18-21 e bontšha seo gabotse, gaešita lege go e-na le ditemana tše dingwe tše dintši tše di botse le tše di šomago tše di lebišwago go banna, basadi le bana. Thuto ye e a šoma mehleng ya rena. Ke therešo gore gaešita le ka malapeng a Bakriste ba therešo go na le mathata le ditlhohlo. Lega go le bjalo, mafelelo ka kakaretšo a hlatsela gore Beibele e nea thuto ye e holago kudu bakeng sa malapa.
15, 16. Ke boemo bofe bjo monyakišiši a ilego a bo hwetša ge a be a nyakišiša ka Dihlatse tša Jehofa kua Zambia?
15 Monyakišiši wa Yunibesithing ya Lethbridge, Canada, o ile a ithuta bophelo bja leago Zambia ngwaga le seripa. O phethile ka gore: “Dihlatse tša Jehofa di ba le katlego e kgolo go feta ditho tša madumedi a mangwe tabeng ya go kgomarela ditlemo tše di tiilego tša lenyalo. . . . Katlego ya bona e emela ditswalano tše di kaonefaditšwego magareng ga monna le mosadi bao maitekong a bona a ba sa tšwago go a utolla ao e sego a go tšhošetša a tirišano, ba fetogilego ba ba ikarabelago mabapi le tsela ye ba swaranago ka yona go moetapele yo mofsa, yena Modimo. . . . Monna yo e lego Hlatse ya Jehofa o rutwa gore a gole tsebong tabeng ya go bontšha boikarabelo bakeng sa boiketlo bja mosadi wa gagwe le bana. . . . Monna le mosadi ba kgothaletšwa gore e be batho ba ba nago le potego . . . Senyakwa se se segolo se tiiša lenyalo.”
16 Nyakišišo yeo e be e theilwe diphihlelong tše dintšinyana tša kgonthe. Ka mohlala, monyakišiši yo o ile a bolela gore ka go fapana le mokgwa wo o tlwaetšwego, “Banna ba e lego Dihlatse tša Jehofa ba hwetšwa gantši kudu ba thuša basadi ba bona ka dirapaneng, e sego feela nakong ya go di lokiša, eupja le nakong ya go bjala le go epa.” Ka gona go molaleng gore diphihlelo tše dintši-ntši lefaseng ka bophara di bontšha gore thuto ya Beibele e kgoma maphelo.
17, 18. Ke mafelelo afe a a thabišago ao a ilego a tšwelela nyakišišong ya mabapi le lefa la bodumedi le kopano ya botona le botshadi pele ga lenyalo?
17 Sehlogo se se fetilego se boletše ka dilo tše di hweditšwego ka go Journal for the Scientific Study of Religion. Ka 1991 e ile ya ba le sehlogo se se rego “Lefa la Bodumedi le Kopano ya Botona le Botshadi Pele ga Lenyalo: Bohlatse bjo bo Tšwago Mehlaleng ya Ditšhaba ya Bafsa ba ba Godilego.” O ka no ba o tseba kamoo kopano ya botona le botshadi pele ga lenyalo e atilego ka gona. Ba bantši ba ineela kganyogong ya botona le botshadi e sa le ba banyenyane, gomme bafsa ba bantši ba ba lego mahlalagading ba na le balekane ba bantši ba kopano ya botona le botshadi. Na dithuto tša Beibele di ka fetola mokgwa wo wo o tlwaelegilego?
18 Ditho tše tharo tša thuto ye e phagametšego ya mothuša-moprofesara tšeo di ilego tša nyakišiša taba yeo, di ile tša letela go hwetša ‘gore bafsa ba ba lego mahlalagading le ba ba godilego bao ba godišitšwego ka mekgwa ye e sa fetogego kudu ya setlogo sa Bokriste go be go ka se be le kgonagalo e kgolo ya gore ba be le kopano ya botona le botshadi pele ga lenyalo.’ Eupja ditherešo di bontšhitše eng? Ka kakaretšo, ba magareng ga ba 70 lekgolong le 82 lekgolong ba be ba bile le kopano ya botona le botshadi pele ga lenyalo. Go ba bangwe “lefa la go kgomarela setlogo [le ile la fokotša] kgonagalo ya go ba le kopano ya botona le botshadi pele ga lenyalo, eupja e sego tabeng ya ‘kopano ya botona le botshadi pele ga lenyalo ya bafsa.’” Banyakišiši ba ile ba bolela ka bafsa ba bangwe ba ba tšwago malapeng ao a bonalago eka ke a bodumedi bao “ba ilego ba bontšha kgonagalo e kgolo ya go ba le kopano ya botona le botshadi pele ga lenyalo ge ba be ba bapišwa le Maprotestanta a Dikereke tše Kgolo.”—Mongwalo wo o sekamego ke wa rena.
19, 20. Thuto ya Modimo e thušitše bjang le go šireletša bafsa ba bantši gare ga Dihlatse tša Jehofa?
19 Baprofesara ba ile ba hwetša se se fapanego kudu gare ga bafsa ba Dihlatse tša Jehofa, bao ba bego ba le gare ga “sehlopha seo se bego se arogile kudu go tše dingwe.” Ka baka la’ng? “Tekanyo ya boineelo le go tswakana le setšhaba mo go medišitšwego ke diphihlelo, ditebelelo le go tšea karolo . . . ka kakaretšo e ka hlola ditekanyo tše di phagamego tša go kgomarela melaong ya motheo ya tumelo.” Ba okeditše ka gore: “Dihlatse di lebeletšwe gore di phethe boikarabelo bja boromiwa e le bafsa ba ba lego mahlalagading le ba ba gotšego.”
20 Ka gona, thuto ya Beibele e kgomile Dihlatse tša Jehofa ka tsela e botse ka go di thuša gore di pheme boitshwaro bjo bo gobogilego. Seo se bolela tšhireletšo malwetšing ao a fetetšwago ka kopano ya botona le botshadi, ao a mangwe a ona e lego a a sa alafegego gomme a mangwe e le a a bolayago. Se se bolela go se be le kgateletšo ya go ntšhwa ga dimpa, e lego seo Beibele e rutago gore se swana le go fediša bophelo. Gape se bolela bafsa ba ba gotšego ba ba kgonago go tsena lenyalong ka matswalo a hlwekilego. Seo se bolela manyalo ao a theilwego motheong wo o tiilego kudu. Ke dithuto tše bjalo tše di ka re thušago go kgotlelela, go ba ba phetšego gakaone kudu mmeleng le ba thabilego kudu.
Thuto ye e Agago
21. Ke dilo dife tše Paulo a ilego a di bolela e sa le pele ka go nepagala bakeng sa mehla ya rena?
21 Bjale anke o boele go 2 Timotheo 3:3, 4 (PK), gomme o ele hloko se sengwe gape seo Paulo a boletšego gore se be se tla dira gore mehla ya rena e be e thata go lebeletšana le yona go ba bantši—eupja e sego go bohle: “[Batho e be e tla ba] ba ba sa lebalelanego, le baphari, le ba ba sa tsebego go itshwara, le ba sehlogo, le ba ba hloyago tše botse, le baeki, le ba bogale, le baikgogomoši, le ba ba ratago kgahlego ya nama go fetiša Modimo.” Seo se nepagetše gakaakang! Lega go le bjalo, thuto ye e tšwago Beibeleng e ka re šireletša le go re hlamela go lebeletšana le boemo, go atlega.
22, 23. Paulo o ile a phetha lelokelelo la gagwe ka kgothatšo efe e botse, gomme e na le bohlokwa bofe?
22 Moapostola Paulo o phetha lelokelelo la gagwe ka mantšu a kgothatšago. O fetola karolo ya mafelelo taelo ya Modimo yeo gape e ka re tlišetšago mohola wo o sa lekanywego. Paulo o bolela ka ba “ba nago le sebopego sa borapedi, eupja ba latola matla a bjona. Gomme o furalele ba ba bjalo.” Gopola gore bafsa ka dikerekeng tše dingwe ge e le gabotse ba na le tekanyo ye e phagamego ya kopano ya botona le botshadi pele ga lenyalo go feta tekanyo ya kakaretšo. Ee, gaešita lege nkabe boitshwaro bjo bo gobogilego bja ba ba tsenago kereke bo be bo le tekanyong ya magareng, na seo se be se ka se bontšhe gore sebopego sa bona sa borapedi ga se na matla? Go feta moo, na dithuto tša bodumedi di fetola kamoo batho ba itshwarago ka gona kgwebong, kamoo ba dirišanago ka gona le ba ba lego ka tlase ga bona, goba kamoo ba swarago ba leloko ka gona?
23 Mantšu a Paulo a bontšha gore re swanetše go diriša seo re ithutago sona Lentšung la Modimo, ka ge re e-na le tsela ya borapedi ye e bonagatšago matla a kgonthe a Bokriste. Mabapi le bao sebopego sa bona sa borapedi se se nago matla, Paulo o re botša gore: “O furalele ba ba bjalo.” Yeo ke taelo ye e kwagalago gabotse, ye e tlago go re tlišetša mehola ya kgonthe.
24. Kgothatšo ye e lego go Kutollo kgaolo 18 e swana bjang le keletšo ya Paulo?
24 Ka tsela efe? Ee, puku ya mafelelo ya Beibele e hlalosa mosadi wa seswantšhetšo, e lego seotswa, se se bitšwago Babele yo Mogolo. Bohlatse bo bontšha gore Babele yo Mogolo o emela mmušo wa lefase ka bophara wa bodumedi bja maaka, woo Jehofa Modimo a o lekotšego gomme a o lahla. Eupja ga se ra swanela go akaretšwa. Kutollo 18:4 e re opeletša ka gore: “Khuduxang! lena ba setšhaba sa-ka, xore Le se tlo xwêrana le dibe tša motse woo, la tlo wêlwa ke ’kôtlô tša wôna.” Na wo ga se molaetša wo o swanago le woo Paulo a o fetišeditšego wo o rego, “O furalele ba ba bjalo”? Go dumelelana ga rena le se ke tsela e nngwe ye ka yona re ka holwago ke thuto ya Modimo.
25, 26. Ke bokamoso bofe bjo bo boloketšwego bao mo nakong ye ba amogelago le go diriša thuto ye e tšwago go Jehofa Modimo?
25 Go se go ye kae Modimo o tla tsena ditaba tša batho gare. O tla fediša bodumedi ka moka bja maaka gotee le tshepedišo ka moka ya gona bjale e kgopo. Seo e tla ba lebaka la go thaba go etša ge Kutollo 19:1, 2 e bontšha. Mo lefaseng ba ba amogelago le go latela thuto ya Modimo ba tla dumelelwa go tšwela pele ba latela dithuto tša gagwe ge mapheko a mehla ye e thata a fetile.—Kutollo 21:3, 4.
26 Go phela Paradeiseng ye e tsošološitšwego ya lefaseng ruri e tla ba mo go thabišago go feta kamoo re ka kgonago go akanya. Modimo o holofetša gore se se a kgonega go rena, gomme re ka mmota ka mo go feletšego. Ka go rialo o re nea lebaka le le tletšego la go amogela le go latela thuto ya gagwe ye e holago. Neng? Anke re lateleng dithuto tša gagwe gona bjale mehleng ya rena e thata le go fetela Paradeiseng ye a e holofetšago.—Mika 4:3, 4.
Dintlha tše go ka Naganišišwago ka Tšona
◻ Batho ba Jehofa ba holwa bjang ke keletšo ya gagwe mabapi le mahumo?
◻ Makasine wa ma-Jesuit o hlatsetše mafelelo afe a mabotse a a tlelago bahlanka ba Modimo ka go diriša Lentšu la gagwe?
◻ Nyakišišo ye e dirilwego Zambia e ile ya utolla mehola efe ye e tletšego malapa a a dirišago thuto ya Modimo?
◻ Ke tšhireletšo efe ye thuto ya Modimo e e neago bafsa?
[Lepokisi go letlakala 15]
A MAFELELO A ŠIIŠAGO GAKAAKANG!
Pego ye e tšweleditšwego lekgotleng la mabapi le AIDS le bafsa ba ba lego mahlalagading e re, “Bafsa ba ba lego mahlalagading ba lebane le kotsi e kgolo ya AIDS ka baka la gore ba rata go dira boitekelo ka kopano ya botona le botshadi le dihlare-tagi, ba lekela hlogong le go phelela nakwana, le ka gobane ba ikwa e le ba ba sa hwego gomme ba nyatša taolo.”—Daily News ya New York ya Sontaga, March 7, 1993.
“Banenyana ba ba lego mahlalagading ba ba bago le dikopano tša botona le botshadi ba tšwelela ka bontši e le ba ba latelago ‘sehlopha se se latelago se se lego ka pele’ sa ba ba tsenwago ke leuba la AIDS, e lego seo nyakišišo ye e dirilwego ke Ditšhaba tše di Kopanego kua Yuropa, Afrika le Asia Borwa-bohlabela e se hweditšego.”—The New York Times, Labohlano, July 30, 1993.
[Pictures on page 16, 17]
Thuto ya Beibele e hola Dihlatse tša Jehofa ka phuthegong le ka gae