Neang Dihlabelo Tšeo di Kgahlišago Jehofa
“Ka [Jesu Kriste] anke ka mehla re neeng Modimo sehlabelo sa theto go Modimo, e lego seenywa sa melomo yeo e bolelago leina la gagwe phatlalatša.”—BA-HEBERE 13:15, “NW.”
1. Ke’ng seo Jehofa a ilego a kgothaletša ba-Isiraele ba badiradibe gore ba se dire?
JEHOFA ke Mothuši go ba ba mo neago dihlabelo tšeo di amogelegago. Ka gona, kgaugelo ya gagwe e kile ya ba godimo ga ba-Isiraele bao ba bego ba dira dihlabelo tša diphoofolo. Eupja go ile gwa direga’ng ka morago ga ge ba ile ba dira sebe leboelela? Ba ile ba kgothatšwa ka moporofeta Hosea, gore: “Hee Isiraele! Boêla xo Morêna Modimo wa xaxo, xobane O ušitšwe ke dibe tša xaxo. Tlang le ditaba tša lena, Le boêlê xo Modimo Lè re: Re lebalêlê molato ka moka, O re dirê ka botho; re tlê re Xo leboxê ka dibexô [“dipowana,” NW] tša molomo.”—Hosea 14:2, 3.
2. ‘Dipowana tša melomo’ e be e le eng, gomme moapostola Paulo o ile a diriša bjang boporofeta bja Hosea?
2 Ke kamoo batho ba Modimo ba kgale ba ilego ba kgothaletšwa ka gona go nea Jehofa Modimo ‘dipowana tša melomo ya bona.’ Tše e be e le eng? Ee, dihlabelo tša theto ya kgonthe! Moapostola Paulo ge a šupa boporofeteng bjo, o ile a kgothaletša Bakriste ba ba-Hebere go ‘nea Modimo sehlabelo sa theto, e lego seenywa sa melomo yeo e bolelago leina la gagwe phatlalatša.’ (Ba-Hebere 13:15) Ke’ng seo se ka thušago Dihlatse tša Jehofa go nea dihlabelo tše bjalo lehono?
‘Ekišang Tumelo ya Bona’
3. Ge e le gabotse, ke’ng seo moapostola Paulo a se boletšego go Ba-Hebere 13:7, gomme se rotoša potšišo efe?
3 Go diriša keletšo yeo Paulo a e neilego ba-Hebere go tla re thuša gore re kgone go nea dihlabelo tše amogelelegago go Mothuši wa rena o Mogolo, Jehofa Modimo. Ka mohlala, moapostola o ngwadile gore: “Xopolang baruti [“bao ba etelelago pele,” NW] ba lena ba ba Le boditšexo Lentšu la Modimo. Le bônê pheletšô ya tsela ya bôná, Le etšê bôná ka tumêlô.” (Ba-Hebere 13:7) Paulo o be a lebišitše go bomang ge a be a re: “Gopolang bao ba etelelago pele magareng ga lena,” goba “bao e lego babuši ba lena”?—New World Translation Reference Bible, mongwalo wa ka tlase.
4. (a) Bao “ba etelelago pele” ba dira’ng, go ya ka temana ya Segerika? (b) Bao “ba etelelago pele” magareng ga Dihlatse tša Jehofa ke bomang?
4 Paulo o boletše ka “bao ba etelelago pele,” goba bao ba bušago. (Heb 13 Ditemana 7, 17, 24, NW) Lentšu la Seisemane “govern [buša]” le tšerwe ka Selatine go tšwa lentšung la Segerika ky·ber·naʹo, leo le bolelago go “otlela sekepe, go hlahla, go buša.” Bagolo ba Bakriste ba buša ka go diriša ‘bokgoni bja bona bja go hlahla’ (Segerika, ky·ber·neʹseis) ge ba nea ketelelopele le tlhahlo diphuthegong tša gabo bona. (1 Ba-Korinthe 12:28) Eupja baapostola le bagolo ba bangwe kua Jerusalema ba ile ba dira e le sehlopha bakeng sa go nea tlhahlo le keletšo go diphuthego ka moka. (Ditiro 15:1, 2, 27-29) Ka gona, lehono sehlopha se bušago sa bagolo se nea tlhahlo ya moya go Dihlatse tša Jehofa lefaseng ka bophara.
5. Ke ka baka la’ng gomme ke bjang re swanetšego go rapelela bagolo ba phuthego le ditho tša Sehlopha se Bušago?
5 Bagolo ba tikologong le ditho tša Sehlopha se Bušago ba re etelela pele; ka gona, re swanetše go ba hlompha gomme re rapelele gore Modimo a ba nee bohlale bjo bo nyakegago go buša phuthego. (Bapiša le Ba-Efeso 1:15-17.) Ke mo go swanetšego gakaakang gore re gopole motho lege e le ofe ‘yo a boletšego lentšu la Modimo go rena’! Timotheo o ile a rutwa e sego feela ke mmagwe le makgolo’age eupja o ile a ba a rutwa ka morago ke Paulo le ba bangwe. (2 Timotheo 1:5, 6; 3:14) Ka gona Timotheo o be a ka akanya ka tsela yeo ka yona boitshwaro bja bao ba bego ba etelela pele bo feleleditšego ka gona gomme o be a ka kgona go ekiša tumelo ya bona.
6. Re swanetše go ekiša tumelo ya bomang, eupja re latela mang?
6 Batho ba bjalo ka Abele, Noage, Aborahama, Sara, Rahaba le Moše ba bontšhitše tumelo. (Ba-Hebere 11:1-40) Ka gona, re ka ekiša tumelo ya bona ka ntle le tika-tiko ka gobane ba ile ba hwa ba botegela Modimo. Eupja re ka ba ra ‘ekiša tumelo’ ya banna ba botegago bao mo nakong ye ba etelelago pele magareng ga rena. Ee, ga re latele batho ba sa phethagalago, ka gobane re tsepeletša mahlo a rena go Kriste. Go etša ge mofetoledi wa Beibele Edgar J. Goodspeed a boletše: “Bagale ba kgale ga se mehlala ya modumedi, ka gobane o na le mohlala o kaone go Kriste . . . Mokitimi wa Mokriste o swanetše go tsepamiša mahlo a gagwe go Jesu.” Ee, ‘Kriste o hlokofaditšwe ka baka la rena, a re tlogelela mohlala wo re swanetšego go o latela kgaufsi.’—1 Petro 2:21; Ba-Hebere 12:1-3.
7. Ba-Hebere 13:8 e swanetše go kgoma bjang kgopolo ya rena mabapi le go tlaišetšwa Jesu Kriste?
7 Paulo ge a lebiša tlhokomelo go Morwa wa Modimo, o okeditše ka gore: “Kriste Jesu ké wa maabane, le wa lehono ’me e tlo ba Yêna wa neng le neng.” (Ba-Hebere 13:8) Dihlatse tše botegago tše bjalo ka Stefano le Jakobo ba ile ba bontšha potego e sa šišinyegego, ge ba latela mohlala o tsepamego wa Jesu. (Ditiro 7:1-60; 12:1, 2) Ka ge ba be ba ikemišeditše go hwa e le balatedi ba Kriste, gona tumelo ya bona ke yeo re swanetšego go e ekiša. Batho ba boifago Modimo nakong e fetilego, nakong ya bjale gaešita le nakong e tlago, ga ba kgopele go efošwa go hwela tumelo e le barutiwa ba Jesu.
Phema Dithuto tša Maaka
8. O tla bea bjang ka mantšu a gago mantšu a Paulo go Ba-Hebere 13:9?
8 Go se fetoge ga dika le dithuto tša Jesu go swanetše go re dira gore re kgomarele seo yena le baapostola ba gagwe ba se rutilego. Ba-Hebere ba ile ba botšwa gore: “Le se kê la xôxêlwa kua le kua ke dithutô tša mabala-bala le tše šele; xobane ké mo xo botse xe pelo e e-ba ye e tiilexo ka kxauxêlô, e sexo ka dijô tše ba ba kêkaxo le tšôna ba sa kaxo ba holêxa ka tšôna.”—Ba-Hebere 13:9.
9. Paulo o ile a šupa go dilo dife tše kgolo lengwalong la gagwe le le yago go Bakriste ba ba-Hebere?
9 Ba-Juda ba be ba šupa go dilo tše bjalo ka go newa mo go tlabago ga Molao Thabeng ya Sinai le bogoši bja neng le neng bja Dafida. Eupja Paulo o bontšhitše Bakriste ba ba-Hebere gore gaešita lege go hlongwa ga kgwerano ya Molao e be e le mo go boifišago, Jehofa o ile a nea bohlatse ka matla kudu ka dipontšho, mehlolo, mediro e matla le go abja ga moya o mokgethwa ge kgwerano e mpsha e be e hlongwa. (Ditiro 2:1-4; Ba-Hebere 2:2-4) Mmušo wa Kriste wa legodimong o ka se ke wa šišinywa, go etša ge bogoši bja lefaseng bja babuši ba lešika la Dafida bo ile bja šišinywa ka 607 B.C.E. (Ba-Hebere 1:8, 9; 12:28) Go feta moo, Jehofa o kgoboketša batlotšwa pele ga selo se sengwe seo se boifišago kudu go feta pontšho ya mohlolo Thabeng ya Sinai, ka gobane ba tla Thabeng ya Tsione ya legodimong.—Ba-Hebere 12:18-27.
10. Ke’ng seo se neago pelo matla, go ya ka Ba-Hebere 13:9?
10 Ka gona ba-Hebere ba be ba swanetše go phema go “xôxêlwa kua le kua ke dithutô tša mabala-bala le tše šele” tša bakgothaletši ba mekgwa ya Sejuda. (Ba-Galatia 5:1-6) Ga se ka dithuto tše bjalo eupja ke ‘ka botho bjo sa swanelago bja Modimo moo pelo e ka tiišwago,’ e le gore re dule re tiile therešong. Go bonala ba bangwe ba ile ba ngangišana ka dijo le dihlabelo, ka gobane Paulo o boletše gore pelo e be e sa tiišwe ke “dijô tše ba ba kêkaxo le tšôna ba sa kaxo ba holêxa ka tšôna.” Mehola ya moya e tšweletšwa ke boineelo go Modimo le go leboga topollo, e sego ka go tshwenyega ka mo go sa swanelago mabapi le go ja dijo tše itšego le go bina matšatši a itšego. (Ba-Roma 14:5-9) Go feta moo, sehlabelo sa Kriste se dirile gore dihlabelo tša ba-Lefi e be tše di se sa hlwago di šoma.—Ba-Hebere 9:9-14; 10:5-10.
Dihlabelo Tšeo di Kgahlišago Modimo
11. (a) Moko wa mantšu a Paulo go Ba-Hebere 13:10, 11 ke ofe? (b) Bakriste ba na le aletare efe ya seswantšhetšo?
11 Baperisita ba ba-Lefi ba be ba e-ja nama ya diphoofolo tša sehlabelo, eupja Paulo o ngwadile gore: “Re na le aletare ya rena, ye ba ba hlankêlaxo Ntlo-kxêthwa, [tabarenakele] yela ba se naxo tokêlô ya xo ja tše di tšwaxo mo xo yôna. Xobane ditoto tša dikxomo, tšeo madi a tšôna a išwaxo Sekxêthwa-kxethweng ke moperisita e moxolo è le xo hlatswa dibe, ditoto tšeo di fišwa kwa ntlê xa mešaša” ka Letšatši la Poelano. (Ba-Hebere 13:10, 11; Lefitiko 16:27; 1 Ba-Korinthe 9:13) Bakriste ba na le aletare ya seswantšhetšo yeo e emelago go batamela Modimo motheong wa sehlabelo sa Jesu seo se lefago sebe gomme sa feleletša ka tebalelo ya Jehofa le go phologela bophelong bjo bo sa felego.
12. Bakriste ba tloditšwego ba ile ba kgothaletšwa go dira’ng go Ba-Hebere 13:12-14?
12 Paulo ga a gatelele go swana ga Letšatši la Poelano, fela o a oketša: “Ké tše Jesu a di dirilwexo mola à hlatswa sethšaba ka madi a xaxwe; ba mmolaetše kwa ntlê xa kxôrô” ya Jerusalema. Moo Jesu o ile a hwa gomme a nea sehlabelo sa seloba seo se tlogago se hola ka mo go feletšego. (Ba-Hebere 13:12; Johane 19:17; 1 Johane 2:1, 2) Moapostola Paulo o kgothaditše Bakriste-gotee le yena bao ba tloditšwego ka gore: “Ké xôna a re tšweleng xo Yêna kwa ntlê xa mešaša, re rwalê xo xobošwa xa xaxwe. Xobane mono xa re na motse wo o tiilexo; re nyaka wo o tl’o xo tla.” (Ba-Hebere 13:13, 14; Lefitiko 16:10) Re le Dihlatse tša Jehofa, ruri re a kgotlelela gaešita lege re gobošwa go etša ge Jesu a ile a gobošwa. Re ‘lahla go nyatša Modimo le go lahla dikganyogo tša lefase gomme re phela ka kgopolo e hlwekilego le ka toko le boineelo go Modimo gare ga tshepedišo ya gona bjale ya dilo,’ mola re dutše re lebeletše pele lefaseng le lefsa. (Tito 2:11-14, bapiša le NW; 2 Petro 3:13; 1 Johane 2:15-17) Le gona batlotšwa bao ba lego gare ga rena ba tsoma ka potego “motse” woo e lego Mmušo wa legodimo.—Ba-Hebere 12:22.
13. Dihlabelo tšeo di kgahlišago Modimo ga di akaretše feela eng?
13 Se se latelago, Paulo o ile a bolela ka dihlabelo tšeo di kgahlišago Modimo gomme a ngwala gore: “Ka yena [Jesu] anke ka mehla re neeng Modimo sehlabelo sa theto, e lego seenywa sa melomo yeo e bolelago leina la gagwe phatlalatša. Go feta moo, le se ke la lebala go dira tše botse le go abelana dilo le ba bangwe, ka gobane Modimo o kgahlišwa kudu ke dihlabelo tše bjalo.” (Ba-Hebere 13:15, 16, NW) Dihlabelo tša Bokriste ga di dirwe feela ka mediro ya setho. Batho ka kakaretšo ba dira dilo tše bjalo. Ka mohlala, se se ile sa direga ge batho ba ditšhaba tše dintši ba phalalela bao ba wetšwego ke tšhišinyego ya lefase kua Soviet Armenia bofelong bja 1988.
14. Go nea Modimo sehlabelo seo a se amogelago go gatelela modiro ofe?
14 Tirelo e kgethwa yeo re e neelago Jehofa “ka go mmoifa” e theilwe leratong la go ikgafa leo Jesu a le bontšhitšego. (Ba-Hebere 12:28; Johane 13:34; 15:13) Tirelo ye e gatelela modiro wa rena wa boboledi, ka gobane ka Kriste Moperisita o Mogolo ‘re nea Modimo sehlabelo sa theto, e lego seenywa sa melomo yeo e bolelago leina la gagwe phatlalatša.’ (Hosea 14:3; Ba-Roma 10:10-15; Ba-Hebere 7:26) Ee, ga re ‘lebale go dira tše botse le go abelana dilo le ba bangwe,’ go akaretša le ka ba bangwe bao e sego “batho ba-bô-rena ba tumêlô.” (Ba-Galatia 6:10) Re nea thušo e lerato ka tsela ya dilo tše di bonagalago le ya tša moya, kudu-kudu ge Bakriste-gotee le rena ba wetšwe ke kotsi goba ge ba hloka goba ba le tlalelong. Ka baka la’ng? Ka gobane re a ratana. Re rata gore le bona ba kgomarele ka go tia go bolela kholofelo ya bona phatlalatša ka go se šišinyege, “ka gobane Modimo o kgahlišwa ke dihlabelo tše bjalo.”—Ba-Hebere 10:23-25; Jakobo 1:27.
Ikokobetšeng
15. (a) O tla hlalosa bjang keletšo ya Ba-Hebere 13:17? (b) Ke ka baka la’ng re swanetše go hlompha bao ba etelelago pele?
15 Go nea dihlabelo tše amogelegago, ruri re swanetše go dirišana ka botlalo le phuthego ya Modimo. Paulo ka ntle le go touta taba ya bolaodi, o ile a ngwala gore: “Kwang bao ba le etelelago pele gomme le ikokobetše, ka gobane ba diša meoya ya lena ka ge e le bao ba tlago go ikarabelela; gore ba dire se ba thabile, e sego ka diphegelo, gobane go ba diriša ka mokgwa wo e tla ba mo go gobatšago go lena.” (Ba-Hebere 13:17, NW.) Re swanetše go hlompha bagolo ba kgethilwego bao ba etelelago pele ka phuthegong, e le gore ba se ke ba fegelwa ka kgateletšo ka baka la go hloka ga rena tirišano. Go palelwa ga rena ke go ba ba ikokobeditšego go tla itlhatsela e le morwalo go balebeledi gomme go tla feleletša ka go gobala ga rena moyeng. Moya wa tirišano o dira gore go be bonolo go bagolo go nea thušo gomme o tlaleletša boteeng le tšwelopeleng ya modiro wa boboledi bja Mmušo.—Psalme 133:1-3.
16. Ke ka baka la’ng e le mo go swanetšego go ikokobeletša bao ba etelelago pele magareng ga rena?
16 Ke mo go swanetšego gakaakang gore re be ba ikokobetšago go bao ba etelelago pele! Ba a re ruta dibokeng tša rena gomme ba re thuša bodireding. Ba tsoma seo se ka re tlišetšago katlego, ka ge e le badiši. (1 Petro 5:2, 3) Ba re thuša gore re kgomarele kwano e botse le Modimo le phuthego. (Ditiro 20:28-30) Ka go ikokobeletša tlhahlo e bohlale le e lerato, re bontšha tlhompho go Molebeledi yo a Phagamego, Jehofa Modimo le Molebeledi wa gagwe wa Moemedi, Jesu Kriste.—1 Petro 2:25; Kutollo 1:1; 2:1–3:22.
E-ba yo a Rapelago
17. Ke dithapelo dife tšeo Paulo a ilego a di kgopela, gomme ke ka baka la’ng a be a ka di kgopela ka mo go swanetšego?
17 Ka ge Paulo le bagwera ba gagwe mohlomongwe ka baka la tlaišo ba be ba arogantšwe le ba-Hebere, o itše: “Re rapeleleng! Xe e le rena re holofetše ka xo kwa matswalô a rena a rotše, ka xe re ratile xo ya ka tsela e botse dilong tšohle. Xomme ke Le rapêla xa-xoloxolo xore Le dirê byalo, xore ke bušetšwê xo lena ka pelá.” (Ba-Hebere 13:18, 19) Ge nkabe Paulo e be e le motho yo a arogilego yo letswalo la gagwe le retetšego, gona ke tshwanelo efe yeo a bego a ka be a bile le yona ya go kgopela ba-Hebere gore ba rapelele gore a bušetšwe go bona? (Diema 3:32; 1 Timotheo 4:1, 2) Ee, e be le modiredi yo a botegago yo ka letswalo le lebotse, a ilego a ganetša bakgothaletši ba mekgwa ya Sejuda. (Ditiro 20:17-27) Paulo le gona o be a kgodišegile gore o be a tla kgona go boelana le ba-Hebere kapejana ge e ba ba be ba rapelela gore se se direge.
18. Ge e ba re letetše gore ba bangwe ba re rapelele, gona ke dipotšišo dife tšeo mo gongwe re ka ipotšišago tšona?
18 Kgopelo ya Paulo ya gore ba-Hebere ba mo rapelele e bontšha gore ke mo go swanetšego bakeng sa Bakriste go rapelelana, gaešita le ka go bitšana ka maina. (Bapiša le Ba-Efeso 6:17-20.) Eupja ge e ba re letetše gore ba bangwe ba re rapelele, na ga se ra swanela go swana le moapostola gomme re kgonthišetše gore re ‘na le letswalo le botegago le gore re itshwara ka tsela e botegago dilong ka moka’? Na o a botega ditirišanong tša gago ka moka? Le gona na o holofela thapelo go swana le kamoo Paulo a bilego ka gona?—1 Johane 5:14, 15.
Mantšu a go Phetha le Kgothatšo
19. (a) Tlhologelo ya Paulo ya thapelo bakeng sa ba-Hebere e be e le efe? (b) Ke ka baka la’ng kgwerano e mpsha e le kgwerano ya ka mo go sa felego?
19 Paulo ka ge a ile a tsoma go rapelelwa ke ba-Hebere, o ile a bontšha tlhologelo ye e nago le thapelo, a bolela gore: “Modimo Ra-khutšô, E a tsošitšexo bahung Modiši e moxolo wa dinku ka madi a kxwêranô ya neng le neng, e lexo Yêna Mong wa rena Jesu Kriste, a a Le dirê ba boló-ka-tlalô medirong e botse yohle, xore Le dirê se Yêna a se rataxo, a Le dirišê se se Mo kxahlaxo ka Jesu Kriste Yêna Mong wa borêna bya mehleng le neng le neng. Amene.” (Ba-Hebere 13:20, 21) “Modimo Ra-khutšô” ka go gopola ka lefase la khutšo, o tsošeditše Kriste bophelong bja legodimo bja go se hwe moo Jesu a tlišitšego mohola wa madi a gagwe a tšholotšwego ao a tiišago kgwerano e mpsha. (Jesaya 9:5, 6; Luka 22:20) Ke kgwerano ya ka mo go sa felego ka gobane bao ba lego lefaseng ba amogela mehola ya neng le neng go tšwa tirelong ya barwa ba moya ba Modimo ba 144 000 bao ba bušago le Jesu legodimong le bao ba lego kgweranong e mpsha. (Kutollo 14:1-4; 20:4-6) Ke ka Kriste moo Modimo yo re mo neago letago, ‘a re hlamago ka selo se sengwe le se sengwe se sebotse seo se nyakegago go dira thato ya gagwe le go ba bao ba kgahlišago mahlong a gagwe.’
20. O tla bea bjang ka mantšu a gago le go hlalosa kgothatšo e phethago ya Paulo go Bakriste ba ba-Hebere?
20 Paulo ka go se kgonthišege kamoo ba-Hebere ba bego ba tla arabela ka gona lengwalong la gagwe, o itše: “Ke a Le rapêla lena Bana bešo ke re: Lentšu lé la keletšô [ya go theetša Morwa wa Modimo, e sego bakgothaletši ba mekgwa ya Sejuda] Le le amoxêlê; le xôna ke Le ngwaletše ka boripana fêla [ge go elwa hloko dikagare tša lona tše matla]. Le tsebê xore Timotheo ngwan’ešo ó lokolotšwe [kgolegong]; xe a ka tla ka pela, re tlo bônana ke na naê’.” Moapostola mohlomongwe a be a ngwala a le Roma, o be a holofetše gore yena gotee le Timotheo ba be ba tla etela ba-Hebere kua Jerusalema. Ka morago Paulo o itše: “Ntumedišetšeng bohle bao ba etelelago pele [bagolo ba šomago ka thata] magareng ga lena le bakgethwa ka moka [ba ba nago le kholofelo ya legodimo]. Bao ba lego Italy ba romela ditumedišo tša bona. Botho bjo sa swanelago bja [Modimo] bo be le lena ka moka.”—Ba-Hebere 13:22-25, NW.
Lengwalo la Bohlokwa bjo bo sa Felego
21. Lengwalo la Ba-Hebere le re thuša go kwešiša dintlha dife tše kgolo?
21 Lengwalo la Ba-Hebere mohlomongwe go feta puku lege e le efe ya Mangwalo a Makgethwa, le re thuša go kwešiša bohlokwa bja dihlabelo tšeo di bego di newa ka tlase ga Molao. Epistola e bontšha gore sehlabelo sa Jesu Kriste ke sona feela seo se neago tefo e nyakegago bakeng sa batho ba badiradibe. Le gona molaetša wa bohlokwa wo o hwetšwago lengwalong le ke wa gore re swanetše go theetša Morwa wa Modimo.
22. Ke mabaka afe a mangwe ao ka ona re swanetšego go ba ba lebogago lengwalo la Ba-Hebere?
22 Go feta moo, ka ge re bone dihlogong tše pedi tšeo di fetilego, re na le mabaka a mangwe a go leboga lengwalo leo le buduletšwego ke Modimo la Ba-Hebere. Le re thuša gore re se ke ra lapa bodireding bja rena, gomme le re tlatša ka mafolofolo ka gobane re tseba gore Jehofa ke Mothuši wa rena. Go feta moo, le re kgothaletša go diriša melomo ya rena le bokgoni bja rena ka go hloka boithati tabeng ya go dira tirelo e kgethwa mosegare le bošego le go nea dihlabelo tše tšwago pelong tšeo di kgahlišago Modimo wa rena yo a swanetšego ke go retwa le yo lerato, Jehofa.
O Tla Araba Bjang?
◻ Lengwalo leo le yago go ba-Hebere le ba thušitše bjang go phema dithuto tša maaka?
◻ Dihlabelo tšeo di kgahlišago Modimo di šupa modirong ofe wa bohlokwa?
◻ “Bao ba etelelago pele” ke bomang, gomme ke ka baka la’ng re swanetše go ikokobetša go bona?
◻ Lengwalo leo le yago go ba-Hebere le gatelela bjang thapelo?
◻ Ke ka baka la’ng re ka bolela gore lengwalo leo le yago go Bakriste ba ba-Hebere ke la bohlokwa bjo bo sa felego?
[Pictures on page 23]
Dihlabelo tšeo di kgahlišago Modimo di akaretša go dira maeto a bodiši le go aga Bakriste-gotee ka keletšo e lerato