Go Tiišwa Ke Kholofelo Le Go Tutuetšwa Ke Lerato

“Ké moka, di šalaxo di le xôna ké tumêlô, le kholofêlô le leratô, tše tharo tšé. Xomme se sexolo mo xo tšôna ké leratô.”​—1 BA-KORINTHE 13:13.

1. Moapostola Paulo o re nea temošo efe?

MOAPOSTOLA PAULO o re lemoša gore tumelo ya rena e ka robega go swana le sekepe. O bolela ka go “[ba] le tumelo le letswalo le lebotse, leo ba bangwe ba le kgoromeditšego, gomme ba robegetšwe ke sekepe sa bona mo tumelong.” (1 Timotheo 1:​19, PK) Lekgolong la pele la nywaga C.E. dikepe tšeo di bego di sesa lewatleng di be di dirilwe ka kota. Go swanelegela ga tšona go sesa lewatleng go be go ithekgile ka boemo bja kota le go agwa ga dikepe ka bokgoni.

2. Ke ka baka la’ng sekepe sa tumelo ya rena se swanetše go ba se se agilwego gabotse gomme se se nyaka’ng go rena?

² Seo se ka bitšwago sekepe sa tumelo ya rena se swanetše go dula se phaphametše godimo ga mawatle a bilokanago a batho. (Jesaya 57:​20; Kutollo 17:​15) Ka gona se swanetše go ba se se agilwego gabotse, gomme se se ithekgile ka rena. Ge “mawatle” a ba-Juda le ba-Roma a be a bilokanela Bakriste ba pele o šoro ka mo go kgethegilego, Juda o ngwadile gore: “’Me lena Baratexi Le bê ba ba ikaxetšexo xodimo xa mothêô wa tumêlô ya lena e kxêthwa-kxêthwa, Le rapêlê Lè le ba Môya o mokxêthwa. Le dulê Lè ipatile ka leratô la Modimo Lè letetše kxauxêlô ya Mong wa rena Jesu Kriste ye e išaxo bophelong byo bo sa felexo.” (Juda 20, 21) Ka ge Juda a bile a boletše ka go hlabanela “tumêlô yé bakxêthwa ba e filwexo,” polelwana e rego “tumêlô ya lena e kxêthwa-kxêthwa” e ka šupa go dithuto ka moka tše di fapa-fapanego tša Bokriste, go akaretša le ditaba tše di lokilego tša phološo. (Juda 3) Kriste ke motheo wa tumelo yeo. Go nyakega tumelo e matla ge e ba re tla kgomarela tumelo ya therešo ya Bokriste.

Go Feta Ledimong la “Poifo ya Dihlotswana”

3. Ba bangwe ba diriša “poifo ya dihlotswana” bjang?

³ Nywageng ya morago bjale, go bile le ditiragalo tše mmalwa tše tšhošago tša go ipolaya ga batho ka bontši, dipolao le ditlhaselo tša batšhošetši tšeo di akaretšago dihlotswana. Ka mo go kwagalago, batho ba bantši, go akaretša le baetapele ba botegago ba dipolitiki ba bontšhitše go tshwenyega ka go šireletša batho ba se nago molato dihlotswaneng tše bjalo tše kotsi, kudu-kudu bana ba banyenyane. “Modimo wa lefase lé” yo ka ntle le pelaelo a hlohleletšago bosenyi bjo bo garošago matswalo, o bakile seo batho ba bangwe ba se bitšago poifo ya dihlotswana gomme o e diriša malebana le batho ba Jehofa. (2 Ba-Korinthe 4:4; Kutollo 12:​12) Ba bangwe ba dirišitše boemo bjo e le gore ba tsoše kganetšo malebana le modiro wa rena. Dinageng tše dingwe, ba rulagantše lesolo leo go bonalago e le la go šireletša batho “dihlotswaneng tše kotsi” eupša ba akaretša Dihlatse tša Jehofa ka phošo gomme ba re bea molato ka go se lebanye. Se se dirile gore go nea bohlatse ka ntlo le ntlo go be thata dinageng tše dingwe tša Yuropa gomme se dirile gore batho ba bangwe bao ba bego ba ithuta Beibele le rena ba kgaotše go ithuta ga bona. Ke moka se se notše banababo rena ba bangwe moko.

4. Ke ka baka la’ng kganetšo e se ya swanela go re nola moko?

⁴ Lega go le bjalo, go e na le go re fetša matla, kganetšo e swanetše go tiiša kgodišego ya rena ya gore re Bokristeng bja therešo. (Mateo 5:​11, 12) Bakriste ba pele ba be ba bewa molato wa go ba sehlotswana se se lwantšhago batho le mmušo, gomme ba “xanetšwa” kae le kae. (Ditiro 24:5; 28:​22) Eupša moapostola Petro o ile a tiiša badumedi-gotee le yena a ngwala gore: “Baratexi, Le se kê la tlabya ke phišô ye e Le wetšexô xore Le lekwê ka yôna; e se kê ya Le tlaba bo-ka selô se Le sa se tsebexo. Sa lena a e bê xo thaba xe le lena Lè e-ba batee le Kriste ka xo tlaišwa, xore mohla letaxô la xaxwe le bônalaxo, Le tlê Le thabê Le hlalalê.” (1 Petro 4:​12, 13) Ka mo go swanago, setho sa sehlopha se bušago sa lekgolong la pele la nywaga se ngwadile gore: “Bana bešo, xe Le wêla melekong ya mehuta-huta, Le re: ké lethabô fêla. Le fêlê Le tseba xore xo lekwa xa tumêlô xo tšweletša kxôtlêlêlô. Kxôtlêlêlô yôna a e bê le modirô wo o tletšexo, xore Le bê ba-boló-ka-tlalô ba ba se naxo senyalô, Le se bê le mo Le hlaetšaxo.” (Jakobo 1:​2-4) Go fo swana le ge diphefo tše matla di leka go swanelegela ga sekepe go sesa lewatleng, madimo a kganetšo a tla utolla bofokodi le ge e le bofe sekepeng sa tumelo ya rena.

Tlaišego e Tšweletša Kgotlelelo

5. Re ka kgodišega bjang gore tumelo ya rena e eme e tiile tlase ga tlaišego?

⁵ Bakriste ba ka kgonthišega ka kgotlelelo ya bona le go se šišinyege ga tumelo ya bona feela ka morago ga go feta madimong a tlaišego. Kgotlelelo ya rena e tla ba le “modirô wo o tletšexo” mawatleng a madimo ge feela re le ‘ba bolo-ka-tlalo ba ba se nago senyalo, re se na mo re hlaetšago’ go akaretša le tumelo e matla. Paulo o ngwadile gore: “Dilong ka moka re re re bônalê rè le bahlanka ba Modimo: ka kxôtlêlêlô e kxolo, rè le ditlalelong, le bothateng, le pitlaxanong.”​—2 Ba-Korinthe 6:4.

6. Ke ka baka la’ng re swanetše ‘go thaba ge re wela melekong’ gomme se se tiiša bjang kholofelo ya rena?

⁶ Diphefo tše matla tša tlaišego tšeo re ka bago go tšona ka dinako tše dingwe di swanetše go lebelelwa e le dibaka tša go hlatsela gore sekepe sa rena sa tumelo se tiile ga se šišinyege. Paulo o ile a ngwalela Bakriste ba Roma gore: “Re kxanthša le ditlaišêxô rè tseba xore di tšweletša kxôtlêlêlô, kxôtlêlêlô ya tlo tšweletša pôtêxô; pôtêxô ya tlo tšweletša kholofêlô. Xomme kholofêlô xa e lahletše.” (Ba-Roma 5:​3-5) Go ema re tiile melekong go dira gore re amogelwe ke Jehofa. Ke moka se se tiiša kholofelo ya rena.

Lebaka Leo ka Lona ba Bangwe ba Robegelwago ke Sekepe

7. (a) Bjalo ka ge mantšu a Paulo a bontšha, ba bangwe ba ile ba robegelwa ke sekepe sa moya bjang? (b) Ba bangwe lehono ba arogile bjang therešong?

⁷ Ge Paulo a be a lemoša ka go ‘robegelwa ke sekepe,’ o be a gopotše ka ba bangwe bao ba bego ba ‘kgoromeditše’ letswalo la bona le lebotse gomme ba lahlegetšwe ke tumelo ya bona. (1 Timotheo 1:​19, PK) Gare ga bona go be go le Himeneo le Alesandere bao ba ilego ba wela bohlanoging, ba arogana le therešo gomme ba bolela gampe. (1 Timotheo 1:​20, mongwalo wa ka tlase wa NW; 2 Timotheo 2:​17, 18) Lehono, bahlanogi bao ba arogago therešong, ba itia “molaki e a bôtêxaxo yo bohlale” ka mantšu, ge e le gabotse ba loma seatla seo se bego se ba fepa moyeng. Ba bangwe ba swana le ‘molaki e mobe,’ ka gona ba re “Mong wa-ka ó sa ile!” (Mateo 24:​44-49; 2 Timotheo 4:​14, 15) Ba gana gore bofelo bja tshepedišo ye ya dilo bo kgaufsi gomme ba ntšha sehlopha sa molaki seo se phafogilego moyeng diphošo bakeng sa go boloka ga bona boemo bjo bo akgofilego gare ga batho ba Jehofa. (Jesaya 1:3) Bahlanogi ba bjalo ba atlega ‘go phekgoleng tumelo ya ba bangwe’ gomme ba dira gore sekepe sa moya se robege.​—2 Timotheo 2:18.

8. Ke’ng seo se baketšego ba bangwe gore ba robe goba ba nweletše sekepe sa tumelo ya bona?

⁸ Bakriste ba bangwe ba ineetšego ba robile sekepe sa tumelo ya bona ka go phaela ka thoko letswalo la bona le go tšea karolo go nyakeng maipshino mo go se nago mellwane ga lefase le le boitshwaro bja lona bjo bo gobogilego bja botona le botshadi. (2 Petro 2:​20-22) Ba bangwe gape ba nweletša sekepe sa bona sa tumelo ka gobane ponong ya bona botšhabelo bja tshepedišo e mpsha ya dilo bo bonala bo se bja hlwa bo nyaretša nko. Ka ge ba sa kgone go bala dinako tša go phethagala ga boporofeta bjo bo itšego gomme ba beela ‘letšatši la Jehofa’ kgole menaganong ya bona, ba tlogela borapedi bja therešo. (2 Petro 3:​10-13; 1 Petro 1:9) Go se go ye kae ba ikhwetša ba boetše meetseng a mabilo-bilo a tshepedišo ye ya dilo. (Jesaya 17:​12, 13; 57:​20) Batho ba bangwe bao ba kgaoditšego go kopanela le phuthego ya Bokriste ba sa dutše ba dumela gore ke bodumedi bja therešo. Lega go le bjalo, go bonagala ba fela pelo e bile ba se na kgotlelelo, e lego dika tšeo di nyakegago bakeng sa go letela lefase le lefsa leo Jehofa Modimo a le holofeditšego. Bophelo Paradeiseng ga se bja tla kapejana ka mo ba bego ba gopotše ka gona.

9. Ke’ng seo Bakriste ba sego kae ba ineetšego ba se dirago, gomme ditherešo tše di swanetše go re dira gore re hlahlobe eng?

⁹ Dikarolong tše dingwe tša lefase, Bakriste ba sego kae ba ineetšego ba bonagala ba phuthile diseila tša dikepe tša bona tša tumelo. Sekepe se sa phaphametše, eupša go e na le gore se tšwele pele ka tumelo e tletšego, ba sesa eka ga go na mo ba yago gona. Ka ge ba be ba gogwa ke kholofelo ya gore “Paradeise ye e bego e tla tloga e e-tla,” ba bangwe ba be ba ikemišeditše go šoma ka matla a bona ka moka gore ba e hwetše​—ba fišega modirong wa boboledi gomme ba e-ba gona ka mehla dibokeng ka moka, dikopanong tše nyenyane le tše dikgolo. Bjale ge ba nagana gore go phethagala ga dikholofelo tša bona go kgole kudu go feta kamoo ba bego ba letetše ka gona, ba thomile go rothiša dinala. Se se bonala modirong o theogilego wa boboledi, go se be gona ka mehla dibokeng le go foša ka boomo dikarolo le mananeo a mangwe a dikopano tše dinyenyane le tše dikgolo. Ba bangwe ba dirišetša nako ya bona e ntši kudu boitapološong le go hwetšeng matsaka a dilo tše di bonagalago. Dintlha tše di re dira gore re hlahlobe seo se swanetšego go ba se tutuetša maphelo a rena ka go dumelelana le boineelo bja rena go Jehofa. Na phišego ya rena tirelong ya gagwe e swanetše go ithekga ka kholofelo ya gore “Paradeise e tla tloga e e-tla”?

Tumelo e Bapišwa le Tshetledi

10, 11. Paulo o ile a bapiša kholofelo ya rena le eng, gomme ke ka baka la’ng papišo ye e swanetše?

¹⁰ Paulo o ile a bontšha gore Jehofa o be a dirile kholofetšo ya ditšhegofatšo tšeo di tlago ka Aborahama. Ke moka moapostola o ile a hlalosa gore: “Modimo . . . a tiiša taba ka kênô. Xore ka mafokô a mabedi a a sa fetoxexo [lentšu la gagwe le keno ya gagwe], ka xe Modimo a sa aketše, re bê le khomotšô e matla rè hweditše sethšabêlô, rè xomaretše kholofêlô ya xo holofêla se se lexo kwa pele. Kholofêlô yé e ke ké yôna thêkxô [“tshetledi,” NW] e tiilexo ya meôya ya rena, thêkxô [“tshetledi,” NW] ye e sa tomoxexo.” (Ba-Hebere 6:​17-19; Genesi 22:​16-18) Kholofelo yeo e beilwego pele ga Bakriste ba tloditšwego ke ya bophelo bja go se hwe legodimong. Lehono bontši bja bahlanka ba Jehofa bo na le kholofelo e botse ya bophelo bjo bo sa felego lefaseng la paradeise. (Luka 23:​43) Motho a ka se kgone go ba le tumelo ka ntle le kholofelo e bjalo.

¹¹ Tshetledi ke sešireletšo se matla, seo se nyakegago e le ka kgonthe bakeng sa go dira gore sekepe se eme felo-gotee le go se thibela go tšewa ke moela wa meetse. Ga go mosesiši yo a tlogago boema-kepeng a se na tshetledi. Ka ge Paulo a ile a robegelwa ke sekepe ka makga a mmalwa, o be a tseba go tšwa phihlelong gore bophelo bja batho bao ba sesago lewatleng gantši bo be bo ithekgile ka ditshetledi tša dikepe tša bona. (Ditiro 27:​29, 39, 40; 2 Ba-Korinthe 11:​25) Lekgolong la pele la nywaga, sekepe se be se se na entšene ya go thuša molaodi gore a se sepediše ka mo a ratago ka gona. Dikepe di be di ithekgile kudu ka phefo bakeng sa go sesa, ka ntle le dikepe tša ntwa tšeo di bego di otlelwa ka mahuduo. Ge e ba sekepe sa gagwe se be se le kotsing ya go sesela mafsikeng, tsela e tee feela yeo molaodi a bego a ka retologela go yona e be e le go lahlela tshetledi ke moka a emele gore ledimo le fete, a holofetše gore tshetledi yeo e ka se tshwamoge lebatong la lewatle. Ka gona Paulo o ile a bapiša kholofelo ya Mokriste le “tshetledi ya moya, yeo e lego ya kgonthe le ye e tiilego.” (Ba-Hebere 6:​19, NW) Ge re akga-akgwa ke madimo a kganetšo goba re feta melekong e mengwe, kholofelo ya rena e botse e swana le tshetledi yeo e re emišago re tiile re le meoya e phelago, e le gore sekepe sa rena sa tumelo se se ke sa sesela lešaba-šabeng le kotsi la dipelaelo le mafsika a senyago a bohlanogi.​—Ba-Hebere 2:1; Juda 8-13.

12. Re ka phema bjang go tlogela Jehofa?

¹² Paulo o ile a lemoša Bakriste ba ba-Hebere ka gore: “Lebêlêlang-xê, lena Bana bešo, xore mo xo lena xo se kê xwa ba wa pelo e mpe ya xo se dumêle, e a kaxo hlanôxêla Modimo e a phelaxo.” (Ba-Hebere 3:​12) Temaneng ya Segerika, go “hlanôxêla” ka go lebanya go bolela “go emela kgole,” ke gore go ba mohlanogi. Eupša re ka phema go robegelwa thokge-thokge mo go bjalo ke sekepe sa tumelo. Tumelo le kholofelo di tla re thuša gore re kgomarele Jehofa gaešita le madimong a befilego kudu a go lekwa. (Doiteronomio 4:4; 30:​19, 20) Tumelo ya rena e ka se swane le sekepe seo se akga-akgwago ke diphefo tša dithuto tša bohlananogi. (Ba-Efeso 4:​13, 14) Le gona ge kholofelo e le tshetledi ya rena, re tla kgona go feta madimong a bophelo re le bahlanka ba Jehofa.

Go Tutuetšwa ke Lerato le Moya o Mokgethwa

13, 14. (a) Ke ka baka la’ng tshetledi ya kholofelo ya rena e se e lekanego ka boyona? (b) Matla a re tutueletšago go nea Jehofa tirelo e kgethwa e swanetše go ba afe gomme ka baka la’ng?

¹³ Mokriste a ka se tšwele pele go ya lefaseng le lefsa ge e ba morero wa gagwe o nnoši wa go direla Jehofa e le kholofelo ya go phela ka mo go sa felego lefaseng la paradeise. Ge a dutše a boloka tshetledi ya gagwe e le yona e mo emišago a tiile bophelong bja gagwe, o swanetše go okeletša go yona le tumelong ya gagwe matla a tutuetšago a lerato. Paulo o ile a gatelela ntlha ye ge a be a ngwala gore: “Ké moka, di šalaxo di le xôna ké tumelô, le kholofêlô le leratô, tše tharo tšé. Xomme se sexolo mo xo tšôna ké leratô.”​—1 Ba-Korinthe 13:13.

¹⁴ Matla a re tutuetšago go neeleng tirelo e kgethwa e swanetše go ba lerato le le tšwago pelong la go rata Jehofa, e le go arabela leratong la gagwe le le sa lekanywego le a re ratago ka lona. Moapostola Johane o ngwadile gore: “E a se naxo leratô xa a tsebe Modimo, xobane Modimo ké Yêna leratô. Leratô la Modimo le a re ratilexo ka lôna, le bônaxetše ka xe a roma Morwa wa xaxwe Mo-tswalwa-esi, a tla lefaseng xore re phelê ka yêna. Rena a re Mo rateng, xobane ó re ratile pele.” (1 Johane 4:​8, 9, 19) Selo seo re swanetšego go tshwenyega kudu ka sona ka baka la tebogo ya go leboga Jehofa e swanetše go ba go nea bohlatse bja go kgethagatšwa ga leina la gagwe le lekgethwa le go godišwa ga bogoši bja gagwe bjo bo lokilego, e sego go ikhweletša phologo.

15. Lerato la rena la go rata Jehofa le tswalana bjang le taba ya bogoši bja gagwe bjo bo phagamego?

¹⁵ Jehofa o nyaka gore re mo hlankele ka baka la ge re mo rata, e sego ka ge re rata Paradeise feela. Ensaeklopedia ya Beibele ya Insight on the Scripturesa e bolela gore: “Jehofa o thabišwa kudu ke therešo ya gore bogoši bja gagwe bjo bo phagamego le go thekgwa ga bjona ke dibopiwa tša gagwe kudu-kudu di theilwe leratong. O nyaka feela bao ba ratago bogoši bja gagwe bjo bo phagamego ka baka la dika tša gagwe tše botse le ka baka la gore bo lokile, bao ba ratago bogoši bja gagwe go feta bogoši le ge e le bofe. (1Ba-Kor 2:9) Ba kgetha go hlankela tlase ga bogoši bja gagwe go e na le go leka gore ba ipuše​—se ba se dira ka baka la go mo tseba ga bona le go tseba lerato la gagwe, toka ya gagwe le bohlale bja gagwe tšeo ba lemogago gore di feta kgole tša bona ka bobona. (Ps 84:​10, 11)”​—Bolumo 2, letlakala 275.

16. Lerato la go rata Jesu ke matla a tutuetšago bjang maphelong a rena?

¹⁶ Re le Bakriste re bile re bontšha lerato la go rata Jesu e le go arabela leratong leo a re ratilego ka lona. Paulo o ile a bolela gore: “Xobane re xapeletšwa ke leratô la Kriste, xomme re re: Xe Yêna a hwetše bohle è le o tee, xôna xo hwile bohle. Ó hwile ’bakeng sa bohle, xore ba ba phelaxo ba se kê ba hlwa ba iphelêla, ba phelêlê Yêna e a hwilexo ’bakeng sa bôná ’me a tsoxa bahung ’bakeng sa bôná.” (2 Ba-Korinthe 5:​14, 15) Kriste ke wona motheo woo maphelo a rena a moya, tumelo ya rena le kholofelo ya rena di agilwego go wona. Lerato la rena la go rata Kriste Jesu le tiiša kholofelo ya rena le tumelo ya rena, kudu-kudu dinakong tša diteko tše di swanago le madimo.​—1 Ba-Korinthe 3:​11; Ba-Kolose 1:​23; 2:​6, 7.

17. Ke matla afe a magolo ao Jehofa a re neago ona, gomme bohlokwa bja ona bo bontšhwa bjang go Ditiro 1:8 le Ba-Efeso 3:16?

¹⁷ Le ge e le gore lerato la rena la go rata Modimo le Morwa wa gagwe ke tutuetšo e matla maphelong a rena re le Bakriste, Jehofa o re nea selo se sengwe gape seo se re tutuetšago, se se re neago mafolofolo gomme sa re nea matla a gore re tšwele pele tirelong ya gagwe. Ke matla a gagwe a šomago goba moya o mokgethwa. Mantšu a Sehebere le a Segerika ao a fetoletšwego e le “moya” ge e le gabotse a šupa mosepelong o matla wa moya, bjalo ka phefo. Dikepe tša go sesa tša go swana le tšeo Paulo a bego a di namela di be di ithekgile ka matla a sa bonagalego a phefo gore di fihle mo di bego di e-ya gona. Ka mo go swanago, re nyaka lerato le go šoma ka matla a sa bonagalego a Modimo ge e ba sekepe sa rena sa tumelo se tla re iša pele tirelong ya Jehofa.​— Ditiro 1:8; Ba-Efeso 3:16.

A re Tšweleng Pele go ba go Fihla mo re Yago Gona!

18. Ke eng seo se tlago go re dira gore re kgotlelele diteko le ge e le dife tše sa tlago tša tumelo ya rena?

¹⁸ Tumelo ya rena le lerato la rena di ka lekwa o šoro pele re fihla tshepedišong e mpsha ya dilo. Eupša Jehofa o re neile tshetledi “yeo e lego ya kgonthe le ye e tiilego”​—kholofelo ya rena e botse. (Ba-Hebere 6:​19, NW; Ba-Roma 15:​4, 13) Ge re tlaletšwe ke kganetšo goba diteko tše dingwe, re ka kgotlelela ge e ba re tiišitšwe ke kholofelo ya rena. Ka morago ga ge ledimo le lengwe le okobala eupša pele ga ge le lengwe le tsoga, a re ikemišetšeng go matlafatša kholofelo ya rena gomme re tiišeng tumelo ya rena.

19. Re ka boloka bjang sekepe sa tumelo ya rena se sesa gomme ra fihla botšhabelong bja lefase le lefsa la Modimo?

¹⁹ Pele a ka bolela ka “tshetledi ya moya” (NW) Paulo o itše: “Se re se dumaxo ké xore ka moka xa lena Le bônwê Lè na le phišêxô [go “akgofiša,” mongwalo wa ka tlase wa NW] e byalo, xo fêlê xo phêthêxa se re se holofetšexo, xo bê xo fihlê bofêlô, xore Le se kê la ba ba botšwá, eupya ka tumêlô Le kxôtlêlêlê Le bê baetši ba bao ba ruilexo tše di holofedišitšwexo.” (Ba-Hebere 6:​11, 12) Anke re tšweleng pele re sesiša sekepe sa tumelo ya rena go fihla re fihla botšhabelong bja lefase le lefsa le le holofeditšwego la Modimo re tutuetšwa ke lerato la go rata Jehofa le la go rata Morwa wa gagwe, gomme re newa matla ke moya o mokgethwa.

[Mengwalo ya tlase]

E le go Boeletša

◻ Ke temošo efe yeo Paulo a ilego a re nea yona mabapi le tumelo ya rena?

◻ Ba bangwe ba ile ba robegelwa ke sekepe sa moya sa tumelo bjang gomme ba bangwe ba fokotša lebelo bjang?

◻ Ke seka sefe sa Modimo seo se swanetšego go sepedišana le tumelo ya rena?

◻ Ke eng seo se tlago go re thuša gore re fihle botšhabelong bja lefase le lefsa la Modimo?

[Seswantšho go letlakala 16]

Sekepe sa tumelo ya rena se swanetše go ba se se agilwego gabotse e le gore se kgone go emelana le madimo a bophelo

[Seswantšho go letlakala 17]

Tumelo ya rena e ka robega bjalo ka sekepe

[Seswantšho go letlakala 18]

Kholofelo ke tshetledi ya maphelo a rena re le Bakriste