THUTO 44
Na Meletlo ka Moka e Thabiša Modimo?
Jehofa o nyaka gore re ipshine ka bophelo. E bile ka dinako tše dingwe o nyaka gore re fele re e ba le menyanya le meletlo go bontšha gore re thabela bophelo. Eupša na meletlo ka moka le matšatši a maikhutšo di a mo thabiša? Re ka bontšha bjang gore re rata Jehofa ge re kgetha meletlo yeo re e ketekago?
1. Ke ka baka la eng meletlo e mentši e sa thabiše Jehofa?
Mohlomongwe o tlo makala ge o ekwa gore meletlo e mentši ga e dumelelane le dithuto tša Beibele, e bile e thomile bodumeding bja maaka. Le gona e ka no ba e sepedišana le botemona, goba e etšwa thutong ya gore moya ga o hwe. Meletlo e mengwe etšwa ditumelong tša gore ge motho a dira dilo tše itšego, a ka no ba le mahlatse goba a welwa ke madimabe. (Jesaya 65:11) Eupša Jehofa o botša batho bao ba mo rapelago gore: “[Itlhaoleng] le lese go kgwatha selo se se sa hlwekago.”—2 Bakorinthe 6:17.a
2. Jehofa o ikwa bjang ka meletlo yeo e dirago gore batho ba hlomphe batho ba bangwe ka tsela e feteletšego?
Jehofa o re lemoša gore re se ke ra ‘bota batho.’ (Bala Jeremia 17:5.) Matšatši a mangwe a maikhutšo a dira gore batho ba hlomphe batho bao ba bušago goba mašole ka tsela e feteletšego. A mangwe ke a ge batho ba keteka maswao a naga a bjalo ka difolaga, goba letšatši leo naga ya bona e hweditšego tokologo ka lona. (1 Johane 5:21) Mola matšatši a mangwe a maikhutšo batho ba keteka dilo tša dipolotiki goba mekgatlo e itšego. Na Jehofa o tlo ikwa bjang ge e ba re hlompha motho goba mokgatlo o itšego ka tsela e feteletšego, kudukudu ge e ba mokgatlo woo goba motho yoo a dira dilo tšeo di ganetšanago le dilo tšeo Modimo a di nyakago?
3. Ke ka baka la eng Modimo a sa amogele meletlo e itšego?
Beibele e re Jehofa ga a nyake batho ba ‘enwa ka mo go feteletšego, le go dira menyanya ya mašata le diphadišano tša go nwa.’ (1 Petro 4:3) Meletlong e mengwe, batho ga ba itshware gabotse moo ba feleletšago ba dira dilo tše di lešago dihlong. Ge e ba re nyaka go dula re le bagwera ba Jehofa, re swanetše go ba kgole le dilo tšeo batho ba di dirago tšeo di sa hlwekago.
ITHUTE KA MO GO TSENELETŠEGO
Ekwa gore o ka dira eng gore o thabiše Jehofa ge o kgetha meletlo yeo o nyakago go e keteka.
4. Gana meletlo yeo e dirago gore Jehofa a se ke a retwa
Balang Baefeso 5:10, gomme le boledišaneng ka dipotšišo tše di latelago:
Re swanetše go netefatša’ng pele re kgetha go keteka letšatši le itšego la maikhutšo?
Ke matšatši afe a maikhutšo ao batho ba ratago go a keteka mo o dulago gona?
Na o nagana gore matšatši ao a maikhutšo a thabiša Jehofa?
Ka mohlala, na o kile wa ipotšiša gore Jehofa o nagana’ng ka go keteka matšatši a matswalo? Ga go na mo Beibele e re botšago gore bahlanka ba Jehofa ba ile ba keteka matšatši a matswalo. Eupša e re botša ka batho ba babedi bao ba bego ba sa hlankele Jehofa bao kilego ba keteka matšatši ao. Balang Genesi 40:20-22 le Mateo 14:6-10, gomme le boledišaneng ka dipotšišo tše di latelago:
Meletlo ye e mebedi ya matšatši a matswalo e swana ka’ng?
Go ya ka mangwalo a a mabedi, o nagana gore Jehofa o ikwa bjang ka go keteka matšatši a matswalo?
Eupša o ka no ba o ipotšiša gore: ‘Na ka nnete Jehofa o na le taba le gore ke keteka letšatši la matswalo goba moletlo o mongwe wo o sa dumelelanego le Beibele?’ Bala Ekisodo 32:1-8. Ke moka le bapaleng BIDIO ye, gomme le boledišaneng ka dipotšišo tše di latelago:
Ke ka baka la’ng re swanetše go dula re netefatša gore dilo tšeo re di dirago di thabiša Jehofa?
Re ka dira seo bjang?
Ipotšiše dipotšišo tše di latelago gore o tsebe gore Jehofa o ikwa bjang ka moletlo o itšego
Na Modimo o nyaka re keteka moletlo wo? Gore o tsebe karabo, nyakišiša gore moletlo wo o thomile kae.
Na moletlo wo o dira gore batho ba hlomphe batho, mekgatlo goba maswao a naga ka tsela e feteletšego? Jehofa ke yena feela re swanetšego go mo hlompha kudu go feta batho, e bile re dumela gore ke yena feela a tlago go fediša mathata a lefase.
Na dilo tšeo di dirwago mo moletlong woo di dumelelana le Beibele? Jehofa o nyaka gore re dule re itshwere gabotse.
5. Thuša batho ba bangwe gore ba hlomphe ditumelo tša gago
Ka dinako tše dingwe go ka ba thata gore o gane ge batho ba go gapeletša gore o keteke le bona moletlo o itšego wo o sa thabišego Jehofa. Ba hlalosetše gore ke ka baka la eng o gana, o dire bjalo ka tlhompho e bile o sa ba felele pelo. Go bona gore o ka dira seo bjang, bapalang BIDIO ye.
Balang Mateo 7:12, gomme le boledišaneng ka dipotšišo tše di latelago:
Go ya ka temana ye, na o swanetše go botša batho ba geno bao e sego Dihlatse tša Jehofa gore ga se ba swanela go keteka letšatši le itšego la maikhutšo?
Ke dilo dife tšeo o ka di direlago batho ba geno go ba bontšha gore le ge o sa keteke le bona matšatši ao, o a ba rata e bile o na le taba le bona?
6. Jehofa o nyaka gore re thabe
Jehofa o nyaka gore re ipshine re na le batho ba gabo rena le bagwera. Balang Mmoledi 8:15, gomme le boledišaneng ka potšišo e latelago:
Lengwalo le le bontšha bjang gore Jehofa o nyaka go bona re thabile?
Jehofa o nyaka gore batho ba gagwe ba thabele bophelo le go ipshina ba na le batho ba bangwe. Go bona gore taba ye ke nnete, bapalang BIDIO ye ya dikopano tša rena tša ditšhabatšhaba.
Balang Bagalatia 6:10, gomme le boledišaneng ka dipotšišo tše di latelago:
Na re swanetše go keteka matšatši a itšego a maikhutšo, e le ge re nyaka go bontšha gore re nyaka go “[direla] bohle botse”?
Na wena o ka thabela go fa batho dimpho o gapeletšega ka gobane e le letšatši le itšego la maikhutšo, goba o ka thabela go fa batho dimpho ka gobane o rata go dira bjalo?
Batho ba bantši bao e lego Dihlatse tša Jehofa ba fela ba efa bana ba bona dimpho le go ba direla dilo tše itšego gore ba thabe. Ge e ba o na le bana, ke dilo dife tše di kgahlišago tšeo o ka ba direlago tšona?
BATHO BA BANGWE BA RE: “A go na taba gore letšatši la maikhutšo le thomile bjang. Selo se bohlokwa ke ge o ipshina o na le batho ba geno le bagwera.”
Wena o ka re’ng go bona?
O ITHUTILE ENG?
Jehofa o nyaka gore re ipshine ka bophelo re na le ba gabo rena le bagwera. Eupša ga a nyake re keteka meletlo yeo a sa e nyakego.
Dipotšišo
Re swanetše go ipotšiša dipotšišo dife ge re nyaka go tseba ge e ba moletlo o itšego o thabiša Jehofa goba o sa mo thabiše?
Re ka thuša bjang batho ba gabo rena le bagwera gore ba kwešiše gore ke ka baka la eng re gana go keteka matšatši a itšego a maikhutšo?
O tseba bjang gore Jehofa o nyaka re ipshina ka bophelo?
ITHUTE KA MO GO OKETŠEGILEGO
Ekwa gore Bakriste ga ba keteke meletlo efe.
Ekwa mabaka a mane ao a dirago gore re dumele gore Jehofa ga a nyake re keteka matšatši a matswalo.
Ekwa kamoo bana ba ka thabišago Jehofa nakong ya matšatši a maikhutšo.
O Bohlokwa Kudu go Jehofa (11:35)
Batho ba bantši kudu bao e lego Bakriste, ba kgethile go se keteke dikeresemose. Ba ikwa bjang ka phetho yeo ba e dirilego?
“Ba Hweditše Selo se Sekaone” (Morokami wa December 1, 2012.)
a E le gore o kwe gore o ka dira eng ge batho ba bangwe ba keteka matšatši a itšego a maikhutšo, bona Tlhaloso 5.