Dulang Le Gopola Letšatši La Jehofa
“Mehleng ya bofêlô xo tlo tsoxa bakweri.”—2 PETRO 3:3.
1. Ke go lemoga gofe ga go akgofa ga nako moo Mokriste yo mongwe wa mehleng yeno a bilego le gona?
MODIREDI wa nako e tletšego ka nywaga e fetago 66 o ngwadile gore: “Ka mehla ke ile ka bona go akgofa ga nako. Ka mehla ke be ke dutše ke nagana ka Haramagedone e le letšatšing le le hlatlamago la ka moswane. (Kutollo 16:14, 16) Go swana le tate le rakgolo, ke ile ka phela bophelo bja-ka bjalo ka ge moapostola [Petro] a kgothaleditše gore, ‘phafogelang go tla ga letšatši la Modimo.’ Ka mehla ke ile ka lebelela lefase le lefsa leo le holofeditšwego e le ‘selo sa kgonthe gaešita le ge se sa bonwe.’”—2 Petro 3:11, 12; Ba-Hebere 11:1; Jesaya 11:6-9; Kutollo 21:3, 4.
2. Go dula re gopola letšatši la Jehofa go bolela’ng?
2 Polelwana ya Petro e rego “dulang le gopola” ge a šupa letšatši la Jehofa e bolela gore re se le tloše menaganong ya rena. Ga se ra swanela go lebala gore letšatši leo ka lona Jehofa a tlago go fediša tshepedišo ye ya dilo e le mathomo a go hloma lefase la gagwe le lefsa le le holofeditšwego le kgaufsi kudu. Le swanetše go ba la kgonthe kudu go rena moo re le bonago gabotse, bjalo ka ge eka le gona mo pele ga rena. Ke kamoo le bego le le la kgonthe ka gona go baporofeta ba Modimo ba kgale gomme ba be ba bolela gantši ka lona le le kgaufsi.—Jesaya 13:6; Joele 1:15; 2:1; Obadya 15; Tsefanya 1:7, 14.
3. Ke eng seo se bonalago se ile sa hlohleletša keletšo ya Petro mabapi le letšatši la Jehofa?
3 Ke ka baka la’ng Petro a re kgothaletša gore re lebelele letšatši la Jehofa bjalo ka ge eka le ka tla “letšatšing le le hlatlamago la ka moswane” ge go bolelwa ka go swantšhetša? Ka gobane ba bangwe go be go bonala ba thomile go kwera kgopolo ya go ba gona ga Kriste mo go holofeditšwego nakong yeo ka yona bafoši ba bego ba tla otlwa. (2 Petro 3:3, 4) Ka gona go kgaolo 3 ya lengwalo la gagwe la bobedi leo re tlago go le ahla-ahla gona bjale, Petro o araba ditatofatšo tša bakweri ba.
Boipiletšo bjo bo Kgahlišago bjo bo Swanetšego go Gopolwa
4. Petro o nyaka gore re gopole eng?
4 Kgaolong ye maikwelo a borutho a Petro bakeng sa banababo a bontšhwa ka go ba bitša leboelela gore ke “baratexi.” Ge a dira boipiletšo bjo bo kgahlišago go bona gore ba se ke ba lebala seo ba bego ba ithutile sona, Petro o thoma ka gore: “Baratexi, . . . ke rata xo tsoša kxopolô-thsekexi ka xo Le eletša, xore Le xopolê mantšu a a boletšwexo ke baporofeta ba bakxêthwa, le taêlô ya Morêna Mophološi, ye e Le tletšexo ka rena baapostola ba lena.”—2 Petro 3:1, 2, 8, 14, 17; Juda 17.
5. Baporofeta ba bangwe ba ile ba bolela eng ka letšatši la Jehofa?
5 “Mantšu a a boletšwexo ke baporofeta ba bakxêthwa” ao Petro a kgothaletšago babadi gore ba a gopole ke afe? Ka kgonthe, ke ao a lego mabapi le go ba gona ga Kriste matleng a Mmušo le mabapi le kahlolo ya ba ba sa boifego Modimo. Petro pejana o be a lebišitše tlhokomelo mantšung a. (2 Petro 1:16-19; 2:3-10) Juda o bolela ka Henoge yo e bego e le moporofeta wa mathomo yo a begilwego wa go lemoša ka kahlolo e sehlogo ya Modimo go bakgopo. (Juda 14, 15) Baporofeta ba bangwe ba ile ba latela Henoge gomme Petro ga a nyake re lebala seo ba se ngwadilego.—Jesaya 66:15, 16; Tsefanya 1:15-18; Sakaria 14:6-9.
6. Ke mantšu afe a Kriste le baapostola ba gagwe ao a re sedimošago mabapi le letšatši la Jehofa?
6 Go oketša moo, Petro o botša babadi ba gagwe gore ba gopole “taêlô ya Morêna Mophološi.” Taelo ya Jesu e akaretša kgothatšo e rego: “Le itôtê xore dipelo tša lena di se kê tša imêlwa . . . ’me letšatši leo la tlo Le wêla sehloxo . . . [go] etša sefu.” “Fahloxang, Le phakxamê Le rapêlê, xobane lebaka la tšôna xa Le le tsebe.” (Luka 21:34-36; Mareka 13:33) Petro gape o re kgothaletša gore re kwe mantšu a baapostola. Ka mohlala, moapostola Paulo o ngwadile gore: “Letšatši leo la Morêna le tlo tla bo-ka lehodu xe le tla bošexo. Byale xomme, a re se keng ra rôbala bo-ka ba bangwê bao. A re phakxameng rè fahloxile.”—1 Ba-Thesalonika 5:2, 6.
Dikganyogo tša Bakweri
7, 8. (a) Batho bao ba kwerago melaetša ya Modimo ya temošo ke ba mohuta mang? (b) Ke eng seo bakweri ba se bolelago?
7 Ka ge re bone pele, lebaka la keletšo ya Petro ke gore ba bangwe ba be ba thomile go kwera ditemošo tše bjalo, go etša ge ba-Isiraele ba mehleng ya pele ba ile ba kwera baporofeta ba Jehofa. (2 Koronika 36:16) Petro o hlalosa gore: “Sa pele se Le swanetšexo xo se tseba ké sé: Mehleng ya bofêlô xo tlo tsoxa bakweri ka dikwêrô, ba xo ya ka tsela ya dikxanyoxô tša bôná.” (2 Petro 3:3, mongwalo o sekamego ke wa rena.) Juda o re dikganyogo tša bakweri ba ke “tša dilo tša go se boife Modimo.” O ba bitša “batho ba ba swanago le diphoofolo, ba ba se nago boemo bja moya.”—Juda 17-19, NW.
8 Barutiši ba maaka bao Petro a itšego “ba . . . latêla nama bà xôxwa ke dikxanyoxô tša dithšila,” go bonala ba le gare ga bakweri ba bao ba se nago boemo bja moya. (2 Petro 2:1, 10, 14) Ba botšiša Bakriste ba botegago ka tsela ya go kwera gore: “Di kae tša xe xo thwe Morêna ó tlo boa? xobane e sa le mola bô-tate bà ithôbalêla, le lehono dilô ka moka di sa dutše di swana le tša mathomong a thlôlô!”—2 Petro 3:4.
9. (a) Ke ka baka la’ng bakweri ba leka go nyatša go akgofa ga nako moo go tseneletšego Lentšung la Modimo? (b) Go dula re gopola letšatši la Jehofa ke tšhireletšo bjang go rena?
9 Ke ka baka la’ng go kwerwa bjalo? Ke ka baka la’ng go šišinywa gore go ba gona ga Kriste go ka no se direge le ka mohla, gore Modimo ga se a ka a tsena ditaba tša batho gare le gore le ka mohla a ka se ke a di tsena? Ge e le gabotse, ka go nyatša go akgofa ga nako mo go tseneletšego Lentšung la Modimo, bakweri ba ba swanago le diphoofolo ba tsoma go kunkureletša ba bangwe boemong bja go se šetše moyeng gomme ka go rialo ba ba dira bahlaselwa ba bonolo dikgoketšong tša boithati. Ke kgothatšo e matla gakaakang go rena lehono gore re dule re phafogile moyeng! Eka re ka dula re gopola letšatši la Jehofa gomme ka mehla re gopole gore mahlo a gagwe a re lebeletše! Ka go rialo, re tla tutueletšega go hlankela Jehofa ka phišego gomme re kgomarele tshekego ya rena ya boitshwaro.—Psalme 11:4; Jesaya 29:15; Hesekiele 8:12; 12:27; Tsefanya 1:12.
Ka Boomo le ka go Nyatšega
10. Petro o hlatsela bjang gore bakweri ba fošitše?
10 Bakweri ba bjalo ba hlokomologa therešo e bohlokwa. Ba e hlokomologa ka boomo gomme ba leka go dira gore ba bangwe ba e lebale. Ka baka la’ng? E le gore ba kgone go goketša batho gabonolo kudu. Petro o ngwala gore: “Batho bao ba dira ka boomo xe ba sa hlathe [therešo ye, NW].” Ke therešo efe? “Xore xo tloxa kxaleng xo dutše xò na le maxodimo, le lefase la xo tšwêlêla lè e-tšwa meetseng ka matla a meetse, ka Lentšu la Modimo. Meetse ao a buša a apeša lefase la mehla yela, ’me la lôba.” (2 Petro 3:5, 6, mongwalo o sekamego ke wa rena.) Ee, Jehofa o ile a fediša lefase le kgopo Meetse-fuleng a mehleng ya Noage, e lego therešo yeo Jesu le yena a ilego a e gatelela. (Mateo 24:37-39; Luka 17:26, 27; 2 Petro 2:5) Ka gona ka go fapana le seo bakweri ba se bolelago, dilo ka moka ga se tša tšwela pele “di swana le tša mathomong a thlôlô!”
11. Ke ditebelelo dife tše e bego e le tša pele ga nako tša Bakriste ba pele tšeo di ilego tša dira gore ba bangwe ba di kwere?
11 Bakweri ba ka no ba ba ile ba kwera Bakriste ba botegago ka gobane ba ba be ba sa na le ditebelelo tšeo di bego di sa hlwa di phethagala. Pejana ga ge Jesu a e-hwa, barutiwa ba gagwe “ba be ba re Mmušô wa Modimo o tlo tloxa o bônala byale.” Ke moka ka morago ga tsogo ya gagwe ba ile ba botšiša ge e ba Mmušo o be o tla hlongwa gatee-tee. Gape, mo e ka bago nywaga e lesome pele Petro a ngwala lengwalo la gagwe la bobedi, ba bangwe ba ile ba “xakanthšwa” ke “lentšu” (PK) goba “lengwalô,” mohlomongwe go tšwa go moapostola Paulo goba badirišani-gotee le yena, “xwa tla xwa thwe: Letšatši la Kriste le kxaufsi!” (Luka 19:11; 2 Ba-Thesalonika 2:2; Ditiro 1:6) Lega go le bjalo, ditebelelo tše bjalo tša barutiwa ba Jesu e be e se tša maaka, e be e le feela tša pele ga nako. Letšatši la Jehofa le be le tla tla!
Lentšu la Modimo le a Botega
12. Lentšu la Modimo le itlhatsetše bjang e le le botegago diporofetong tša lona mabapi le “letšatši la Jehofa”?
12 Ka ge re bone pejana, baporofeta ba pele ga Bokriste ba be ba lemoša gantši gore letšatši la Jehofa la tefetšo le be le le kgaufsi. “Letšatši la Jehofa” (PK) le ile la tla ka tekanyo e nyenyane ka 607 B.C.E. ge Jehofa a lefetša batho ba gagwe ba dinganga. (Tsefanya 1:14-18) Ka morago, ditšhaba tše dingwe go akaretša Babele le Egipita di ile tša lebana le “letšatši [le le bjalo] la Jehofa.” (Jesaya 13:6-9, PK; Jeremia 46:1-10; Obadya 15, PK) Bofelo bja tshepedišo ya dilo ya ba-Juda ya lekgolong la pele la nywaga le bjona bo ile bja bolelwa e sa le pele gomme bja direga ge madira a Roma a be a šwalalanya Judea ka 70 C.E. (Luka 19:41-44; 1 Petro 4:7) Eupša Petro o šupa “letšatši la Jehofa” la nakong e tlago, e lego leo le tlago go feta gaešita le Meetse-fula a lefase ka moka ka bogolo!
13. Ke mohlala ofe wa histori wo o bontšhago go ba ga kgonthe ga bofelo bja tshepedišo ye ya dilo?
13 Petro o rola tlhaloso ya gagwe ya phedišo yeo e tlago ka go bolela gore: “[Ka] lôna Lentšu leo.” O be a sa tšwa go bolela gore “ka Lentšu la Modimo,” lefase la pele ga Meetse-fula le ile la tšwelela “lè e-tšwa meetseng ka matla a meetse.” Boemo bjo bjo bo hlaloswago ka pegong ya Beibele ya tlholo, bo ile bja dira gore Meetse-fula a kgonege ge meetse a tšhologa ka taelo goba ka lentšu la Modimo. Petro o tšwela pele gore: “[Ka] lôna Lentšu leo [la Modimo], di sa lôtôlwa xwa tlo bá xwa tla mollô wa letšatši la kahlolô la xo tlo lôba xa batho ba banyatši.” (2 Petro 3:5-7; Genesi 1:6-8) Re na le lentšu la Jehofa le le botegago! O tla fediša ‘magodimo le lefase’—e lego tshepedišo ye ya dilo—ka bogale bjo bo tukago bja letšatši la gagwe le legolo! (Tsefanya 3:8) Eupša neng?
Go Fišegela Gore Bofelo bo tle
14. Ke ka baka la’ng re ka kgodišega gore ga bjale re phela “mehleng ya bofêlô”?
14 Barutiwa ba Jesu ba be ba nyaka go tseba nako yeo bofelo bo bego bo tla tla ka yona, ka gona ba ile ba mmotšiša gore: “Pontšho ya go ba gona ga gago le ya bofelo bja tshepedišo ya dilo e tla ba eng?” (NW) Go bonala ba be ba botšiša ka nako yeo tshepedišo ya ba-Juda e bego e tla fela ka yona, eupša karabo ya Jesu e be e tsepeleditšwe kudu nakong yeo ‘magodimo le lefase’ tša mehleng yeno di bego di tla fedišwa ka yona. Jesu o boletše e sa le pele ka dilo tše bjalo ka dintwa tše kgolo, tlhaelelo ya dijo, ditšhišinyego tša lefase, bolwetši le bosenyi. (Mateo 24:3-14; Luka 21:5-36) Pontšho yeo Jesu a e neilego bakeng sa “bofelo bja tshepedišo ya dilo” re e bone e phethagatšwa ga e sa le go tloga ka 1914 gotee le dilo tšeo moapostola Paulo a di boletšego gore di be di tla hlaola ‘mehla ya bofelo.’ (2 Timotheo 3:1-5) Ke therešo gore bohlatse ke bjo bogolo kudu bja gore re phela mehleng ya bofelo ya tshepedišo ye ya dilo!
15. Ke eng seo Bakriste ba sekametšego go se dira go sa šetšwe temošo ya Jesu?
15 Dihlatse tša Jehofa di be di dutše di fišegela go tseba nako yeo letšatši la Jehofa le tlago go tšwelela ka yona. Ka dinako tše dingwe phišegong ya tšona di ile tša dira maiteko a go akanya nako yeo bo bego bo ka tla ka yona. Eupša ka go dira bjalo, di ile tša palelwa go etša ge barutiwa ba pele ba Jesu ba paletšwe ke go ela hloko temošo ya Mong wa bona ya gore “lebaka la tšôna xa [re] le tsebe.” (Mareka 13:32, 33) Bakweri ba ile ba kwera Bakriste ba botegago ka baka la ditebelelo tša bona tša pele ga nako. (2 Petro 3:3, 4) Lega go le bjalo, Petro o tiišetša gore letšatši la Jehofa le tla tla go ya ka tšhupamabaka ya Gagwe.
Re Swanetše go ba le Pono ya Jehofa
16. Ke keletšo efe yeo re e elago hloko ka bohlale?
16 Re swanetše go ba le pono ya Jehofa mabapi le nako, go etša ge Petro bjale a re gopotša gore: “Fêla, Baratexi, taba ye nngwê ye e se kexo ya Le xaka šé: Xo Morêna nywaxa e sekete e ke ké letšatši le tee.” Bophelo bja rena bja nywaga e 70 goba 80 ke bjo bokopana gakaakang ge bo bapišwa le seo! (2 Petro 3:8; Psalme 90:4, 10) Ka gona ge e ba phethagatšo ya dikholofetšo tša Modimo e bonala e diega, re swanetše go amogela keletšo ya moporofeta wa Modimo e rego: “Xe [nako e beilwego] e sa phêthêxe ka pelá, xôna e letêlê. Xo tla di tlo tla, di ka se diêxe.” (Mongwalo o sekamego ke wa rena.)—Habakuku 2:3.
17. Gaešita le ge mehla ya bofelo e ile ya tšwela pele ka lebaka le letelele go feta kamoo ba bantši ba bego ba letetše ka gona, re ka kgodišega ka eng?
17 Ke ka baka la’ng mehla ya bofelo bja tshepedišo ye e tšwetše pele ka lebaka le letelele go feta kamoo ba bantši ba letetšego ka gona? Ke ka lebaka le le kwalago, go etša ge Petro a hlalosa se se latelago: “Morêna xa a diexiše tše a di boletšexo a re di tlo tla, bo-ka ba bangwê xe ba re ké xo diexiša; sa xaxwe ké xo se Le fêlêle pelo, xobane xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.” (2 Petro 3:9) Jehofa o ela hloko tšeo e lego tše holago kudu go batho ka moka. O kgomega ka maphelo a batho, bjalo ka ge a bolela gore: “Ruri xa ke kxahlwe ke lehu la mo-dira-dibe. Se se nkxahlaxo ké xe mo-dira-dibe à boa, a lahla tsela yeo ya xaxwe, a phela.” (Hesekiele 33:11) Ka gona re ka kgodišega gore bofelo bo tla tla ka nako e swanetšego bakeng sa go phethagatša morero wa Mmopi wa rena yo lerato le yo bohlale ka mo go feletšego!
Ke Eng Seo se Tlago go Feta?
18, 19. (a) Ke ka baka la’ng Jehofa a ikemišeditše go fediša tshepedišo ye ya dilo? (b) Petro o hlalosa bjang bofelo bja tshepedišo ye, gomme ke eng seo se tlago go fedišwa e le ka kgonthe?
18 Ka ge Jehofa a rata bao ba mo hlankelago e le ka kgonthe, o tla fediša bohle bao ba ba bakelago kgateletšo. (Psalme 37:9-11, 29) Go etša ge Paulo a dirile pejana, Petro ge a ngwala gore tshenyego yeo e be e tla tla ka nako e sa letelwago, o re: “’Tšatši leo la Morêna le tlo tla bo-ka lehodu le-tla-bošexo; xomme ka lôna maxodimo a tlo široxa [“feta,” NW] ka lešata la modumô o moxolo; xomme tše lefase le bopilwexo ka tšôna di tlo fedišwa ke mollô, xwa tlo fsa xwa fêlêla lefase le medirô ka moka e lexo mo xo lôna.” (2 Petro 3:10; 1 Ba-Thesalonika 5:2) Magodimo a kgonthe le lefase la kgonthe ga se tša ka tša fedišwa ka Meetse-fula, gomme le letšatšing la Jehofa di ka se ke tša fedišwa. Ka gona, ke’ng seo se tlago ‘go feta’ goba go fedišwa?
19 Mebušo ya batho yeo e bušitšego batho go swana le “maxodimo” e tla fela gomme go tla ba bjalo le ka “lefase” goba lekoko la batho le le sa boifego Modimo. Mohlomongwe “lešata la modumô o moxolo” le bontšha go feta ka lebelo ga magodimo. “Dilo” tšeo di bopago lekoko la mehleng yeno le le gobogilego la batho di tla “fedišwa” goba tša senywa. “Lefase” go akaretša le “medirô ka moka e lexo mo xo lôna” di tla “fêlêla.” Jehofa o tla pepentšha ka mo go feletšego ditiro tše kgopo tša batho ge a fediša tshepedišo ka moka ya lefase ka mo go swanetšego.
Dula o Tsepeletše Kholofelong ya Gago
20. Maphelo a rena a swanetše go kgongwa bjang ke tsebo ya rena ya go tseba ditiragalo tšeo di sa tlago?
20 Ka ge ditiragalo tše tše dikgolo di batamela, Petro o re re swanetše go ba “ba xo swara ka tsela e kxêthwa ya borapedi, [re] le ba xo letêla le xo phafoxêla xo tla xa letšatši leo la Modimo.” Go ka se ke gwa ba le pelaelo ka seo! “Maxodimo a tlo fedišwa à thšumilwe, le tše lefase le bopilwexo ka tšôna tša tlo fsa tša toloxa.” (2 Petro 3:11, 12) Therešo ya gore ditiragalo tše tše dikgolo di be di ka thoma go direga gosasa e swanetše go kgoma selo se sengwe le se sengwe seo re se dirago goba seo re rerago go se dira.
21. Ke eng seo se tlago go emela magodimo le lefase tša mehleng yeno legato?
21 Bjale Petro o re botša seo se tlago go ema legatong la tshepedišo ya kgale ka gore: “Se re se letetšexo ka xo kwa dikholofedišô tša xaxwe ké maxodimo a mafsa le lefase le lefsa, moo xo axilexo tokô.” (2 Petro 3:13; Jesaya 65:17) A kimollo e kgolo gakaakang! Kriste le babuši-gotee le yena ba 144 000 ba tla bopa “maxodimo” a “mafsa” a mmušo gomme batho bao ba phologago bofelo bja lefase le ba tla bopa “lefase le lefsa.”—1 Johane 2:17; Kutollo 5:9, 10; 14:1, 3.
Kgomarelang go Akgofa ga Nako le Tshekego ya Boitshwaro
22. (a) Ke eng seo se tlago go re thuša go phema tšhila goba bosodi le ge e le bofe bja moya? (b) Ke kotsi efe yeo Petro a lemošago ka yona?
22 Petro o tšwela pele gore: “Ké xôna Baratexi, xe Le letetše tšeo, phêxêlêlang xo tlo hwetšwa kè Yêna Lè se na bosodi le senyalô, Lè le ba moláô. Le tsebê xore se se Le phološaxo ké xo se fêle pelo xa Morêna.” Go letela ka phišego e kgolo le go lebelela seo se bonalago e le go diega le ge e le gofe ga letšatši la Jehofa e le pontšho ya go se fele pelo ga Modimo go tla re thuša go phema tšhila goba bosodi le ge e le bofe bja moya. Lega go le bjalo, go na le kotsi! Petro o lemoša gore mengwalong ya “Paulo ngwan’ešo e a ratêxaxo . . . xo na le tše thata xo kwêxa, tše ba xo se rutêxê le ba ba sešoxo ba tia, ba di retollaxo ka mokxwa wo ba retollaxo le a mangwê mangwalô ka xôna, ba ikiša tahlexong ka nnoši.”—2 Petro 3:14-16.
23. Keletšo ya Petro ya go phetha ke efe?
23 Go bonala barutiši ba maaka ba ile ba retolla mengwalo ya Paulo mabapi le botho bjo bo sa swanelago bja Modimo ka go a diriša e le seširo sa boitshwaro bjo bo hlephilego. Mohlomongwe Petro o be a nagana se ge a be a ngwala keletšo ya gagwe ya taelano ka gore: “Xomme lena Baratexi, ka xe Lè le ba xo tseba, Le itôtê xore batimedi bao ba xo se tsebe molaô ba se kê ba Le xôxa la tloxa moo xo lexo mothêô wa lena wo o tiilexo.” Ke moka o phetha lengwalo la gagwe ka go kgothaletša gore: “Sa lena a e bê xo tšwêlêla pele Lè le ba xo xauxêlwa le ba xo tseba Mong wa rena Mophološi Jesu Kriste.”—2 Petro 3:17, 18.
24. Ke boemo bofe bja kgopolo bjo bahlanka ka moka ba Jehofa ba swanetšego go bo kgomarela?
24 Go molaleng gore Petro o nyaka go matlafatša banababo. O kganyoga gore bohle ba be le boemo bja kgopolo bjo bo bontšhitšwego ke Hlatse e botegago ya nywaga e 82 yeo e tsopotšwego mathomong gore: “Ke ile ka phela bophelo bja-ka bjalo ka ge moapostola a kgothaleditše gore, ‘phafogelang go tla ga letšatši la Modimo.’ Ka mehla ke ile ka lebelela lefase le lefsa leo le holofeditšwego e le ‘selo sa kgonthe gaešita le ge se sa bonwe.’” Eka ka moka ga rena re ka phela bophelo bja rena ka tsela e swanago.
O be o tla Araba Bjang?
◻ ‘Go dula re gopola’ letšatši la Jehofa go bolela’ng?
◻ Ke eng seo bakweri ba se hlokomologago ka boomo, gomme ka baka la’ng?
◻ Ke ka baka la’ng bakweri ba ile ba kwera Bakriste ba botegago?
◻ Ke kgopolo efe yeo re swanetšego go e kgomarela?
[Seswantšho go letlakala 23]
Dulang le gopola letšatši la Jehofa . . .
[Seswantšho go letlakala 24]
. . . le lefase le lefsa le le tlago go latela