Kgaolo 38

Tumišang Jah ka Baka la Dikahlolo tša Gagwe!

1. Johane o kwa mantšu afe a “lentšu le le hlabošago la lešaba le legolo la ba lego legodimong”?

BABILONA O MOGOLO ga e sa le gona! Tše ruri ke ditaba tše di thabišago. Ga go makatše ge Johane a e-kwa mekgoši ya lethabo ya theto legodimong! “Ka morago ga dilo tše ka kwa seo e kego ke lentšu le le hlabošago la lešaba le legolo la ba lego legodimong. Ba re: ‘Tumišang Jah!a Phološo le letago le matla ke tša Modimo wa rena, gobane dikahlolo tša gagwe ke tša therešo e bile di lokile. Gobane o ahlotše mogweba-ka-mmele yo mogolo yo a sentšego lefase ka bootswa bja gagwe, gomme o lefeleditše madi a bahlanka ba gagwe seatleng sa gagwe.’ Gona moo ba re ka lekga la bobedi: ‘Tumišang Jah!b Muši o tšwago go yena wa tšwela pele o kuelela go iša mehleng ya neng le neng.’”—Kutollo 19:1-3.

2. (a) Lentšu “Haleluya” le bolela’ng, gomme go le kwa ga Johane gabedi mo nakong ye go bontšha’ng? (b) Ke mang yo a hwetšago theto bakeng sa go senya Babilona o Mogolo? Hlalosa.

² Haleluya e le ka kgonthe! Lentšu le le bolela gore, ‘Tumišang Jah,’ gomme ‘Jah’ ke mokgwa wa go khutsofatša leina la Modimo, Jehofa. Mo re gopotšwa ka kgothatšo ya mopsalme yeo e rego: “Tšohle tše di bušaxo môya di rêtê Morêna. Haleluya!” (Psalme 150:6) Go kwa ga Johane sehlopha sa legodimong seo se thabilego se opela “Haleluya!” gabedi mo nakong ye go Kutollo, go bontšha go tšwela pele ga go utolla ga Modimo therešo. Modimo wa Mangwalo a Bakriste a Segerika, e sa le yena Modimo wa Mangwalo ao a ngwadilwego pele a Seheberu, gomme leina la gagwe ke Jehofa. Modimo yo a ilego a dira gore Babilona ya bogologolo e we, mo nakong ye o ahlotše le go senya Babilona o Mogolo. Theto ka moka a e išwe go yena ka baka la tiro yeo! Matla ao a e wešitšego ga se a ditšhaba tšeo a di dirišitšego di le bjalo ka didirišwa tša go e senya, eupša ke a gagwe. Re swanetše go lebelela phološo go Jehofa a nnoši.—Jesaya 12:2; Kutollo 4:11; 7:10, 12.

3. Ke ka baka la’ng mogweba-ka-mmele yo mogolo a swanelwa ke kahlolo ya gagwe?

³ Ke ka baka la’ng mogweba-ka-mmele yo mogolo a swanelwa ke kahlolo ye? Go ya ka molao wo Jehofa a bego a o neile Noa, le wo o ilego wa fetišetšwa bathong ka moka ka yena, kahlolo ya go tšholla madi ka boomo e be e le lehu. Se se ile sa bolelwa gape Molaong wa Modimo go Baisiraele. (Genesi 9:6; Numeri 35:20, 21) Go feta mo, ka tlase ga Molao woo wa Moše kotlo ya bootswa bja kgonthe gotee le bja moya e be e le lehu. (Lefitiko 20:10; Doiteronomio 13:1-5) Babilona o Mogolo o bile le molato wa madi ka nywaga e dikete-kete, gomme ke seotswa sa mosadi se se gobogilego. Ka mohlala, molao wa Kereke ya Roma Katholika wa go ganetša baperisita ba yona go nyala o feleleditše ka gore ba bantši ba bona ba tšee karolo boitshwarong bjo bo gobogilego, gomme ba bantši ba bona lehono ba swerwe ke AIDS. (1 Bakorinthe 6:9, 10; 1 Timotheo 4:1-3) Eupša dibe tša yona tše dikgolo tše di ‘fihlago legodimong’ ke ditiro tša yona tše di tšhošago tša bootswa bja moya, bjo e bo dirago ka go ruta dithuto tša maaka le go gwerana ga yona le bo-radipolitiki ba ba gobogilego. (Kutollo 18:5) Ka ge mafelelong e wetšwe ke kotlo ya yona, bjale lešaba la legodimong le opela Haleluya ya bobedi.

4. Ke’ng seo se swantšhetšwago ke taba ya gore muši o tšwago go Babilona o Mogolo o “tšwela pele o kuelela go iša mehleng ya neng le neng”?

⁴ Babilona o Mogolo o tšhumilwe ka mollo go swana le motse o fentšwego, gomme muši o tšwago go yona o “tšwela pele o kuelela go iša mehleng ya neng le neng.” Ge motse wa kgonthe o tšhumilwe ke madira a o fentšego, muši o kuelela o sa kgaotše ge fela melora e dutše e fiša. Mang le mang yo a lekago go o tsoša nakong ya ge o sa dutše o kuelela muši, o tla tšhungwa ke mašope ao a tupago muši. Ka ge muši o tšwago go Babilona o Mogolo o tla kuelela “go iša mehleng ya neng le neng” e le go bontšha mafelelo a kahlolo ya yona, ga go na motho yo a tlago go kgona go tsoša motse woo o mobe. Bodumedi bja maaka bo fedišeditšwe ruri. Haleluya, e le ka kgonthe!—Bapiša le Jesaya 34:5, 9, 10.

5. (a) Bagolo ba 24 le diphedi tše nne ba dira’ng le go bolela’ng? (b) Ke ka baka la’ng go opelwa ga Haleluya e le mo gobose kudu go phala Dihaleluya tšeo di opelwago dikerekeng tša Bojakane?

⁵ Johane ponong ya gagwe ya pejana, o bone sedulo sa bogoši se dikologilwe ke diphedi tše nne tšeo di bego di le gotee le bagolo ba 24 bao ba swantšhetšago baja-bohwa ba Mmušo madulong a bona a letago a legodimong. (Kutollo 4:8-11) Bjale o ba bona gape ge ba goeletša Haleluya ya boraro mabapi le tshenyego ya Babilona o Mogolo: “Bagolo ba masome-pedi-nne le dibopiwa tše phelago tše nne ba wela fase ba rapela Modimo yo a dutšego sedulong sa bogoši, ba re: ‘Amene! Tumišang Jah!’”c (Kutollo 19:4) Mogoo wo o mogolo wa Haleluya bjale o tlaleletša ‘kopelong e mpsha’ ya go reta Kwana. (Kutollo 5:8, 9) Bjale ba opela kopelo e botse ya phenyo gomme ba iša theto ka moka go Mmuši Morena Jehofa ka baka la go fenya ga gagwe ka mo go sa belaetšego mogweba-ka-mmele yo mogolo, e lego Babilona o Mogolo. Dihaleluya tše ke tšeo di kgahlišago kudu go phala Dihaleluya tšeo di opelwago dikerekeng tša Bojakane moo Jehofa goba Jah a hlompholotšwego kudu goba go nyatšwa. Go opela mo go bjalo ga boikaketši mo go gobošago leina la Jehofa, bjale go homoleditšwe ruri!

6. Ke “lentšu” la mang le le kwewago, le kgothaletša’ng, gomme ke bomang bao ba arabelago?

⁶ E be e le ka 1918 ge Jehofa a thoma go putsa ‘bao ba boifago leina la gagwe, ba banyenyane le ba bagolo,’ bao ba pele ba bona e lego Bakriste ba tloditšwego bao ba ilego ba hwa ba botega, bao a ba tsošitšego le go ba bea madulong a legodimong a bagolo ba 24. (Kutollo 11:18) Ba bangwe ba tlatša ba ge ba opela Dihaleluya, ka gobane Johane o bega gore: “Le gona, lentšu la tšwa sedulong sa bogoši la re: ‘Tumišang Modimo wa rena, lena bahlanka ba gagwe ka moka bao ba mmoifago, ba banyenyane le ba bagolo.’” (Kutollo 19:5) Le ke “lentšu” la Mmoleledi wa Jehofa, e lego Morwa wa gagwe Jesu Kriste, yo a emago “gare ga sedulo sa bogoši.” (Kutollo 5:6) “Lena bahlanka ba gagwe ka moka” ba legodimong le lefaseng, le opela gotee le sehlopha se se tloditšwego sa Johane se se etelelago pele mo lefaseng. Ba ba thabišwa gakaakang ke go ba le karolo tabeng ya go kwa taelo e rego: “Tumišang Modimo wa rena”!

7. Ke bomang ba tlago go reta Jehofa ka morago ga ge Babilona o Mogolo e sentšwe?

⁷ Ee, ba lešaba le legolo le bona ba balelwa gare ga bahlanka ba. Ba ga e sa le go tloga ka 1935 ba tšwile go Babilona o Mogolo, gomme ba bone phethagatšo ya kholofetšo ya Modimo yeo e rego: “Ó šexofatša ba ba mmoifaxo, ba banyenyane le ba baxolo.” (Psalme 115:13) Ge Babilona ya go swana le mogweba-ka-mmele e sentšwe, dimilione tša bona di tla ‘tumiša Modimo wa rena’ di le gotee le sehlopha sa Johane le lešaba ka moka la legodimong. Ka morago, bao ba tsošeditšwego lefaseng go sa šetšwe gore ba kile ba tuma goba go se bjalo, ka ntle le pelaelo ba tla opela Dihaleluya tše dingwe ge ba lemoga gore Babilona o Mogolo o fedišeditšwe ruri. (Kutollo 20:12, 15) Theto ka moka a e išwe go Jehofa bakeng sa go fenya mogweba-ka-mmele wa kgale-kgale!

8. Ke tšhušumetšo efe yeo dikopelo tša legodimong tša theto tše di kwelwego ke Johane di swanetšego go re nea yona gona bjale, pele ga ge Babilona o Mogolo a ka senywa?

⁸ A tšhušumetšo e kaakang yeo se se re neago yona, ya gore re be le karolo e tletšego modirong wa Modimo lehono! Eka bahlanka ka moka ba Jah ba ka ineela ka mafolofolo a magolo tabeng ya go bolela dikahlolo tša Modimo gotee le go bolela ka kholofelo e kgolo ya Mmušo gona bjale, pele ga ge Babilona o Mogolo a ka theošwa sedulong gomme a fedišwa.—Jesaya 61:1-3; 1 Bakorinthe 15:58.

‘Haleluya, Jehofa ke Kgoši!’

9. Ke ka baka la’ng Haleluya ya mafelelo e le modumo o mogolo le o matla?

⁹ Go na le mabaka a mangwe a go thaba, bjalo ka ge Johane a tšwela pele go re botša gore: “Ka kwa seo e kego ke lentšu la lešaba le legolo le se e kego ke modumo wa meetse a mantši le se e kego ke medumo e matla ya legadima. Ba lešaba ba re: ‘Haleluya,d gobane Jehofa Modimo wa rena, Ra-matla-ohle o thomile go buša e le kgoši.’” (Kutollo 19:6) Haleluya ye ya mafelelo ke yeo e dirago gore mogoo wo e be o kwalago goba o leka-lekanego. Ke mogoo o matla wa legodimong, o mogolo kudu go feta wa sehlopha sa baopedi le ge e le sefe sa batho, o mogolo kudu go feta wa phororo le ge e le efe ya lefaseng, le go ba o boifišago kudu go feta modumo wa pula ya magadima le ge e le efe lefaseng. Mantšu a dikete-kete tša legodimong a thabela therešo ya gore “Jehofa Modimo wa rena, Ra-matla-ohle o thomile go buša e le kgoši.”

10. Ke ka kwešišo efe go ka bolelwago gore Jehofa o thoma go buša e le kgoši ka morago ga go senywa ga Babilona o Mogolo?

¹⁰ Ke bjang Jehofa a thomago go buša? Go šetše go fetile nywaga e dikete-kete ga e sa le mopsalme a bolela gore: “Modimo ke kgoši ya-ka go tloga kgaleng.” (Psalme 74:12, PK) Bogoši bja Jehofa gaešita le nakong yeo e be e le bja kgale, ka gona sehlopha sa legodimong sa baopedi se ka opela bjang gore “Jehofa . . . o thomile go buša e le kgoši”? Se dira bjalo ka gore nakong ya ge Babilona o Mogolo a senywa, Jehofa le ka mohla a ka se sa ba le lenaba leo la moikgogomoši leo le tlago go dira gore a se ke a kwewa e le Mmuši wa Legohle. Bodumedi bja maaka le ka mohla bo ka se sa šušumetša babuši ba lefase gore ba mo ganetše. Nakong ya ge Babilona ya bogologolo e felelwa ke matla a go buša lefase, Sione e ile ya kwa mogoo wa phenyo o rego: “Modimo wa xaxo ó tšere boxoši!” (Jesaya 52:7) Bagolo ba 24 ka morago ga go tswalwa ga Mmušo ka 1914, ba ile ba goeletša ka gore: “Re a go leboga wena Jehofa Modimo, . . . gobane o tšere matla a gago a magolo gomme wa thoma go buša o le kgoši.” (Kutollo 11:17) Bjale ka morago ga go senywa ga Babilona o Mogolo, mokgoši woo o hlabja gape: “Jehofa . . . o thomile go buša e le kgoši.” Ga go na modimo yo a dirilwego ke batho yo a šaletšego go ganetšana le bogoši bja Modimo wa therešo, Jehofa!

Lenyalo la Kwana le Batametše!

11, 12. (a) Jerusalema ya bogologolo e ile ya bitša Babilona ya bogologolo eng, gomme e bea mohlala ofe ge e le mabapi le Jerusalema o Mofsa le Babilona o Mogolo? (b) Mašaba a legodimong a opela’ng le go tsebiša’ng, ge e le ka go fenywa ga Babilona o Mogolo?

¹¹ “Hee wene lenaba la-ka!” Ke kamoo Jerusalema, lefelo la tempele ya Jehofa ya borapedi e bitšago ka gona Babilona ya go rapela medimo ya diswantšho. (Mika 7:8) Ka mokgwa o swanago, “motse o mokgethwa, Jerusalema o Mofsa” wo o bopilwego ka monyadiwa wa ditho tše 144 000, o na le mabaka ka moka a go bitša Babilona o Mogolo lenaba la wona. (Kutollo 21:2) Eupša mafelelong mogweba-ka-mmele yo mogolo o wetšwe ke tlalelo, kotsi le tshenyego. Mediro ya gagwe ya malea le balepi ba gagwe ba dinaledi ba paletšwe ke go mo phološa. (Bapiša le Jesaya 47:1, 11-13.) Ye ke phenyo e kgolo e le ka kgonthe ya borapedi bja therešo!

¹² Ge mogweba-ka-mmele yo a gobogilego, e lego Babilona o Mogolo a senyeditšwe ruri, bjale go ka lebišwa tlhokomelo go monyadiwa yo e lego kgarebe e sekilego ya Kwana! Ka gona, mašaba a legodimong a opela ka go hlalala ge a reta Jehofa a re: “A re thabeng re hlalaleng kudu, a re mo neeng letago gobane lenyalo la Kwana le tlile gomme mosadi wa yona o itokišitše. Ee, o dumeletšwe gore a tšhepe ka linene e tagilego, e hlwekilego le e botse, gobane linene e botse e emela ditiro tša go loka tša bakgethwa.”—Kutollo 19:7, 8.

13. Ke tokišetšo efe ya lenyalo la Kwana yeo e dirilwego go theoša le nywaga-kgolo?

¹³ Go theoša le nywaga-kgolo, Jesu o dirile tokišetšo e lerato bakeng sa lenyalo le la legodimong. (Mateo 28:20; 2 Bakorinthe 11:2) O be a dutše a hlwekiša ba 144 000 ba Isiraele ya moya, e le gore “a tšweletše phuthego go yena e le letagong la yona, e se na sepatso goba lešošo goba le ge e le sefe sa dilo tše bjalo, eupša gore e be e kgethwa gomme e hloke bosodi.” (Baefeso 5:25-27) Mokriste yo mongwe le yo mongwe yo a tloditšwego, ka go lebelela go hwetša “moputso wa pitšo ya godimo ya Modimo,” o swanetše go apola motho wa kgale le mediro ya gagwe gomme a apare motho e mofsa wa Bokriste, a dire ditiro tše di lokilego “ka moya ka moka bjalo ka ge eka [o] direla Jehofa.”—Bafilipi 3:8, 13, 14; Bakolose 3:9, 10, 23.

14. Sathane o lekile bjang go šilafatša bao e tlago go ba ditho tša mosadi wa Kwana?

¹⁴ Go tloga ka Pentekoste ya 33 C.E. go ya pele, Sathane o dirišitše Babilona o Mogolo e le sedirišwa sa gagwe tabeng ya go leka go šilafatša bao e tlago go ba ditho tša mosadi wa Kwana. Mafelelong a lekgolo la pele la nywaga, o be a šetše a bjetše dipeu tša bodumedi bja Babilona ka phuthegong. (1 Bakorinthe 15:12; 2 Timotheo 2:18; Kutollo 2:6, 14, 20) Moapostola Paulo o hlalosa bao ba bego ba phekgola tumelo ka mantšu a: “Gobane batho ba bjalo ke baapostola ba maaka, badiri ba bofora, bao ba itirago baapostola ba Kriste. Ga go makatše, gobane Sathane ka boyena o dula a itira morongwa wa seetša.” (2 Bakorinthe 11:13, 14) Nywaga-kgolong e latetšego, Bojakane bja bohlanogi ka go swana le karolo e nngwe ka moka ya Babilona o Mogolo, bo ile bja ikapeša diaparo tša matsaka le tša maemo, e lego tša “mmala o mophepolo le wa sekareleta, . . . gauta le lefsika le bohlokwa le diperela.” (Kutollo 17:4) Baruti ba bjona le bo-mopapa ba ile ba gwerana le babuši ba nyoretšwego madi ba bjalo ka Constantine le Charlemagne. Le ka mohla ga se bja ka bja ikapeša “ditiro tša go loka tša bakgethwa.” Ka go ba ga bjona monyadiwa wa mankekišane, ruri e bile sedirišwa se segolo sa bofora bja Sathane. Bo feleleditše ka go tlošetšwa sa ruri!

Mosadi wa Kwana o Itokišitše

15. Go swawa go direga bjang, gomme go nyakega’ng go Mokriste yo a tloditšwego?

¹⁵ Ka gona, ba 144 000 ka moka ba sehlopha sa monyadiwa ka morago ga nywaga e ka bago 2 000, ke bao bjale ba itokišitšego. Eupša ke go tloga nakong efe mo go ka bolelwago gore ‘mosadi wa Kwana o itokišitše’? Ge e le gabotse, go tloga ka Pentekoste ya 33 C.E. go ya pele, batlotšwa ba dumelago ba ile ba “swawa ka moya o mokgethwa wo o holofeditšwego,” gomme se e le ka baka la “letšatši la go lokollwa ka topollo” leo le tlago. Bjalo ka ge moapostola Paulo a bolela, Modimo “o re swaile gomme o re neile pontšho ya seo se tlago go tla, ke gore moya dipelong tša rena.” (Baefeso 1:13; 4:30; 2 Bakorinthe 1:22) Mokriste yo mongwe le yo mongwe yo a tloditšwego o ‘biditšwe le go kgethwa,’ gomme o ipontšhitše a “botega.”—Kutollo 17:14.

16. (a) Go swawa ga moapostola Paulo go ile gwa felela neng, gomme re tseba bjang? (b) Ke neng mo mosadi wa Kwana a tlago go ba a “itokišitše” ka mo go feletšego?

¹⁶ Paulo ka noši ka morago ga nywaga e masome-some ya go lekwa, o be a ka re: “Ke lwele ntwa e botse, ke kitimile lebelo go fihla mafelelong, ke bolokile tumelo. Go tloga mo nakong ye go ya pele ke boloketšwe mphapahlogo wa toko, woo Morena, moahlodi wa go loka a tlago go mpha wona e le moputso letšatšing leo, fela e sego nna ke nnoši, eupša le bohle bao ba ratilego ponagatšo ya gagwe.” (2 Timotheo 4:7, 8) Go swawa ga moapostola go bonala e le mo go bego go feletše, gaešita le ge a be a sa dutše a phela gomme a be a tla lebana le go bolaelwa tumelo. Ka mo go swanago, go swanetše go tla nako yeo ka yona ka moka bao ba sa šetšego lefaseng ba ba 144 000 ba tlago go swawa e le ba Jehofa. (2 Timotheo 2:19) Ye e tla ba nako ya ge mosadi wa Kwana a tla ba a itokišitše ka mo go feletšego, ge ba bantši ba ba 144 000 ba tla ba ba šetše ba amogetše moputso wa bona wa legodimong gomme bao ba sa dutšego ba le lefaseng ba tla ba ba feleleditše ka go amogelwa le go swawa e le bao ba botegago.

17. Lenyalo la Kwana le ka direga neng?

¹⁷ Mo nakong ye go ya ka tšhupa-mabaka ya Jehofa, ge go swawa ga ba 144 000 go feditšwe, barongwa ba lokolla diphefo tše nne tša masetlapelo a magolo. (Kutollo 7:1-3) Kahlolo e thoma ka go phethwa motseng wa Babilona o Mogolo wo o swanago le mogweba-ka-mmele. Kriste yo a fentšego bjale o tsena gatee-tee ka Haramagedone gore a fediše mokgatlo ka moka wa Sathane mo lefaseng, gomme o feleletša ka go lahlela Sathane le batemona ba gagwe sekoting. (Kutollo 19:11–20:3) Ka ntle le pelaelo, ge e ba batlotšwa ba tla be ba sa dutše ba phela mo lefaseng, ba tla tsena moputsong wa bona wa legodimong gatee-tee ka morago ga ge Kriste a phethile phenyo ya gagwe, gomme ba tla ba gotee le ditho-gotee le bona tša sehlopha sa monyadiwa. Ka gona, ka nako e beilwego ya Modimo, lenyalo la Kwana le ka direga!

18. Psalme 45 e kgonthišetša bjang tatelano ya ditiragalo tše di lego mabapi le lenyalo la Kwana?

¹⁸ Pego ya boporofeta yeo e lego go Psalme 45 e hlalosa kamoo ditiragalo di tlago go latelana ka gona. Sa pele, Kgoši e beilwego sedulong sa bogoši e tšwa dira go ya go lwa le manaba a yona. (Ps 45 Ditemana 1-7) Bjale monyanya o a dirwa gomme monyadiwa wa legodimong o fara-farilwe mo lefaseng ke bagwera ba gagwe ba dikgarebe, e lego lešaba le legolo. (Ps 45 Ditemana 8-15) Se se latelago, lenyalo le tšweletša bana ge bao ba tsošitšwego ba bušetšwa phethegong ka tlase ga go hlokomelwa ke “bakxôma lefaseng ka moka.” (Ps 45 Ditemana 16, 17) A ditšhegofatšo tša letago tšeo di sepedišanago le lenyalo la Kwana!

Go Thaba Bao ba Laleditšwego

19. Lethabong la bone go mathabo a šupago a lego go Kutollo ke’ng, gomme ke bomang bao ba bago le karolo go thabeng mo?

¹⁹ Johane bjale o ngwala lethabo la bone go mathabo a šupago ao a lego go Kutollo: “A [morongwa yo a bego a dutše a utolla dilo tše go Johane] re go nna: ‘Ngwala: Go thaba bao ba laleditšwego selalelong sa lenyalo la Kwana.’ Gape a re go nna: ‘A ke mantšu a therešo a Modimo.’” (Kutollo 19:9)e Bao ba laleleditšwego “selalelong sa lenyalo la Kwana,” ke ditho tša sehlopha sa monyadiwa. (Bapiša le Mateo 22:1-14.) Sehlopha ka moka sa monyadiwa yo a tloditšwego se thabišwa ke go amogela taletšo ye. Ba bantši ba bao ba laleditšwego ba šetše ba ile legodimong, e lego moo monyanya wa lenyalo o tlago go ba gona. Bao ba sa dutšego ba le lefaseng le bona ba thabišitšwe ke ge ba laleditšwe. Madulo a bona monyanyeng wa lenyalo a bolokilwe. (Johane 14:1-3; 1 Petro 1:3-9) Ge ba tsošeditšwe legodimong, sehlopha ka moka se se kopanego sa monyadiwa se tla tšwela pele go ba le karolo gotee le Kwana lenyalong leo le le thabišago kudu.

20. (a) Ke’ng seo se bolelwago ke mantšu a rego: “A ke mantšu a therešo a Modimo”? (b) Johane o ile a kgongwa bjang ke mantšu a morongwa, gomme karabo ya morongwa e bile efe?

²⁰ Morongwa o oketša ka gore “a ke mantšu a therešo a Modimo.” Lentšu le “therešo” le fetoletšwe go tšwa go a·le·thi·nosʹ ya Segerika, gomme le bolela “ya kgonthe” goba “e ka botwago.” Ka ge mantšu a ge e le gabotse a e-tšwa go Jehofa, gona a a botega gomme a ka holofelwa. (Bapiša le 1 Johane 4:1-3; Kutollo 21:5; 22:6.) Johane ka ge a laleleditšwe monyanyeng woo wa lenyalo, o swanetše go ba a thabile kudu ka go kwa se le ka go nagana ka ditšhegofatšo tšeo di lego ka pele bakeng sa sehlopha sa monyadiwa. Ge e le gabotse, o be a kgomilwe kudu ke se moo morongwa a ilego a ba a mo nea keletšo, bjalo ka ge yena Johane a bolela gore: “Ge a re’alo ka wela fase pele ga dinao tša gagwe gore ke mo rapele. Eupša a re go nna: ‘Hlokomela! O se ke wa dira bjalo! Nna ke upša ke le feela mohlanka-gotee le wena le bana beno bao ba nago le modiro wa go nea bohlatse ka Jesu. Rapela Modimo.’”—Kutollo 19:10a.

21. (a) Kutollo e bolela’ng ka barongwa? (b) Bakriste ba swanetše go ba le maikwelo afe ka barongwa?

²¹ Puku ka moka ya Kutollo e nea bohlatse bjo bogolo mabapi le go botega ga barongwa le mafolofolo a bona. Ba akaretšwa mokerong wa therešo e utolotšwego. (Kutollo 1:1) Ba šoma gotee le batho go boleleng ditaba tše dibotse le go tšholleng dikotlo tša seswantšhetšo. (Kutollo 14:6, 7; 16:1) Ba ile ba lwa ba le ka lehlakoreng la Jesu ge a be a raka Sathane le barongwa ba gagwe legodimong, gomme ba tla lwa gape ba le ka lehlakoreng la gagwe ntweng ya Haramagedone. (Kutollo 12:7; 19:11-14) Ruri, ba kgona go bona Jehofa. (Mateo 18:10; Kutollo 15:6) Lega go le bjalo, ke bahlanka ba ikokobeditšego kudu ba Modimo. Borapeding bjo bo sekilego ga go na sebaka sa go rapela barongwa goba gaešita le sa borapedi bjo bo lekaneditšwego, e lego go iša borapedi go Modimo ka “mokgethwa” goba morongwa. (Bakolose 2:18) Bakriste ba rapela Jehofa a nnoši, gomme ba dira dikgopelo tša bona go yena ka leina la Jesu.—Johane 14:12, 13.

Karolo ya Jesu Boporofeteng

22. Morongwa o botša Johane eng, gomme mantšu ao a bolela’ng?

²² Morongwa bjale o re: “Go nea bohlatse ka Jesu ke gona go tutueletšago go porofeta.” (Kutollo 19:10b) Bjang? Se se bolela gore boporofeta ka moka bjo bo buduletšwego bo tšweleditšwe ka baka la Jesu le tema yeo a e kgathago mererong ya Jehofa. Boporofeta bja pele ka Beibeleng bo holofeditše go tla ga peu. (Genesi 3:15) Jesu e bile Peu yeo. Dikutollo tše di latelago di nea bohlatse bjo bogolo bja therešo ya boporofeta kholofetšong ye ya motheo. Moapostola Petro o ile a botša Koronelio motho wa Bantle yo a bego a dumela gore: “Baporofeta ka moka ba nea bohlatse ka yena [Jesu].” (Ditiro 10:43) Moapostola Paulo nywageng e 20 ka morago, o itše: “Go sa šetšwe gore dikholofetšo tša Modimo ke tše dintši gakaakang, di bile Ee ka yena [Jesu].” (2 Bakorinthe 1:20) Johane ka noši ka morago ga nywaga e mengwe e 43, o re gopotša gore: ‘Therešo e bile gona ka Jesu Kriste.’—Johane 1:17.

23. Ke ka baka la’ng madulo a phagamego le matla a Jesu di sa re fapoše borapeding bja rena go Jehofa?

²³ Na se se re fapoša ka tsela le ge e le efe borapeding bja rena go Jehofa? Aowa. Gopola keletšo ya temošo ya morongwa yeo e rego: “Rapela Modimo.” Jesu le ka mohla ga se a ka a leka go itekanya le Jehofa. (Bafilipi 2:6) Ke therešo gore barongwa ka moka ba botšwa gore ba “khunamele [Jesu],” gomme tlholo ka moka e swanetše go lemoga boemo bja gagwe bjo bo phagamego e le gore ‘letolo le lengwe le le lengwe le khuname leineng la Jesu.’ Eupša ela hloko gore se se dirwa gore “go išwe letago go Modimo Tate,” le gona se dirwa ka taelo ya gagwe. (Baheberu 1:6; Bafilipi 2:9-11) Jehofa o neile Jesu matla a gagwe a phagamego, gomme ka go dumela matla ao re reta Modimo. Ge e ba re gana go ikokobetša pušong ya Jesu, gona seo se swana le go gana Jehofa Modimo ka noši.—Psalme 2:11, 12.

24. Ke ditiragalo dife tše pedi tše dikgolo tšeo re di letetšego, gomme ke mantšu afe ao re swanetšego go a bolela?

²⁴ Ka gona, anke re boleleng re le batee mantšu a mathomo a Dipsalme 146 go ya go 150 Ps 146:1; 147:1; 148:1; 149:1; 150:1 ao a rego: “Haleluya [“Retang Jah!” NW].” Eka go opelwa ga Haleluya go ka kwagala kudu ge go letetšwe go fenya ga Jehofa mmušo wa lefase wa Babilona wa bodumedi bja maaka! Eka lethabo le ka gola ge lenyalo la Kwana le dutše le batamela!

[Mengwalo ya ka tlase]

[Lepokisi go letlakala 273]

“Lengwalo le le Yago go Sodoma le Gomora”

Tlase ga sehlogo se segolo sa ditaba, Daily Telegraph ya London ya November 12, 1987, e begile ka kgopelo e dirilwego pele ga Lekgotla la Kakaretšo la Kereke ya Engelane. Le kgopetše gore bao ba ipitšago gore ke Bakriste e le gore ke basodoma ba rakwe ka kerekeng. Mongwadi wa dikuranta Godfrey Barker o itše: “Mopišopo yo mogolo wa Canterbury o boletše maabane ka go nyama gore: ‘Ge e ba Mokgethwa Paulo a be a ka ngwalela Kereke ya Engelane lengwalo, gona mo gongwe re ka botšiša gore e be e ka ba lengwalo la mohuta ofe.’” Mohlomphegi Barker ka noši o boletše gore: “Karabo ke lengwalo le le yago go Sodoma le Gomora,” gomme a oketša ka gore: “Ngaka Runcie [mopišopo yo mogolo] o akantše gore le be le tla balega go swana le Baroma, Kgao. 1.”

Mongwadi o tsopotše mantšu a Paulo a lego go Baroma 1:26-32: “Ke ka baka leo Modimo a ba gafetšego dikganyogong tše di hlabišago dihlong, . . . ba batona le ba batona, ba dira se se lešago dihlong, . . . gaešita le ge ba tseba gabotse-botse taelo e lokilego ya Modimo, gore bao ba tlwaetšego go dira dilo tše bjalo ba swanelwa ke lehu, ga ba tšwele pele feela ba di dira, eupša ba bile ba dumelelana le bao ba tlwaetšego go di dira.” O phethile ka gore: “Mokgethwa Paulo o be a tshwenyega feela ka batho bao ba dulago ditulong tša ka kerekeng. Bothata bja ngaka Runcie ke batho bao ba lego dipulupiting.”

Ke ka baka la’ng mopišopo yo mogolo a e-na le bothata bjo bo bjalo? Dihlogo tše dikgolo tša ditaba go Daily Mail ya London ya October 22, 1987, di boletše gore: “‘Moruti o tee go basodoma ba bararo’ . . . Lesolo la go raka basodoma ‘le tla tswalela Kereke ya Engelane.’” Dipego di tsopotše “moruti” yo e lego mongwaledi-pharephare wa Mokgatlo wa Bokriste wa Basodoma ba Basadi le ba Banna, a re: “Ge e ba kgopelo ye e ka amogelwa, gona e tla senya Kereke gomme Mopišopo yo mogolo wa Canterbury o tseba seo. Ge e le ka palo ya kakaretšo, re dumela gore magareng ga 30 le 40 lekgolong ya baruti ba Kereke ya Engelane ke basodoma. Le gona, ke batho ba mafolofolo kudu bao ba thekgago bodiredi bja Kereke.” Ga go na pelaelo gore go fokotšega ga dipalo tša bao ba yago kerekeng go bakwa ke go šišimišwa ke bodiredi bjoo bjo bo atago ka lebelo bja bosodoma.

Lekgotla la kereke le ile la phetha ka gore’ng? Palo e kgolo kudu ya ditho tše 388 (95 lekgolong ya baruti) e ile ya dira kgetho ka go rata gore go tima-timetšwe kgopelo yeo. Mabapi le se, The Economist ya November 14, 1987, e begile gore: “Kereke ya Engelane e lwantšha mediro ya basodoma, eupša e sego kudu. Lekgotla la kakaretšo, yona palamente ya Kereke, le naganne ka baruti ba basodoma, le boletše bekeng ye gore ditiro tša basodoma ka go se swane le bootswa le bohlotlolo, ga se sebe: Ba ‘hlaelelwa fela ke kgopolo’ ya gore ‘kopano ya botona le botshadi ke tiro ya tumelelano yeo e swanetšego feela tswalanong ya sa ruri ya lenyalo.’” Go bapiša boemo bja Mopišopo yo mogolo wa Canterbury le polelo e lebanyago ya moapostola Paulo go Baroma 1:26, 27, ruri The Economist e bontšhitše mantšu a tsopotšwego a Paulo ka godimo ga seswantšho ka gore, “Mokgethwa Paulo o be a tseba seo a se bolelago.”

Jesu Kriste le yena o be a tseba seo a se bolelago gomme o ile a se bolela ka mantšu a kwagalago. O boletše gore “e tla ba mo go kgotlelelegago kudu bakeng sa naga ya Sodoma Letšatšing la Kahlolo,” go feta badumedi bao ba nyaditšego molaetša wa gagwe. (Mateo 11:23, 24) Jesu mo o be a diriša polelo ya pheteletšo go bontšha gore baetapele bao ba bodumedi bao ba bego ba gana Morwa wa Modimo le thuto ya gagwe, ba be ba solega kudu go phalwa le ke batho ba Sodoma. Juda 7 e bolela gore batho bao ba Sodoma ba wetšwe ke “kahlolo ya mollo o sa felego,” yeo e bolelago phedišo ya sa ruri. (Mateo 25:41, 46) Ka gona, kahlolo ya bao ba bitšwago baetapele ba Bokriste bao ba hlahlago ka bofofu mehlape ya bona gore e široge melao e phagamego ya boitshwaro ya Mmušo wa Modimo, gomme ba ba lahlele ditseleng tša go dumelela dilo tšohle tše di gobogilego tša lefase, e tla ba e kgolo gakaakang! (Mateo 15:14) Lentšu le le tšwago legodimong le goelela ka go akgofa mabapi le bodumedi bja maaka, e lego Babele o Mogolo, le re: “E-tšwang go yena batho ba-ka, ge e ba le sa nyake go ba le kabelo le yena dibeng tša gagwe, le ge e ba le sa nyake go amogela karolo ya dikotlo tša gagwe.”—Kutollo 18:2, 4.

[Diswantšho go letlakala 275]

Legodimong go kwagala Dihaleluya tše nne, go tumišwa Jah ka baka la phenyo ya gagwe ya mafelelo ya go fenya Babilona o Mogolo