Ditšhupetšo tša Pukwana ya Seboka sa Bophelo bja Rena le Bodiredi
DECEMBER 2-8
MAHUMO AO A LEGO KA LENTŠUNG LA MODIMO | KUTOLLO 7-9
“Jehofa o Šegofatša Lešaba le Legolo Leo le sa Balegego”
(Kutollo 7:9) Ka morago ga dilo tše ka lebelela gomme ka bona lešaba le legolo leo go sego motho yo a kgonago go le bala, le le tšwago ditšhabeng tšohle, melokong yohle, merafong yohle le malemeng ohle le eme pele ga sedulo sa bogoši le pele ga Kwana, le apere diaparo tše telele tše tšhweu; le swere makala a mopalema ka diatleng.
it-1-E 997 ¶1
Lešaba le Legolo
Se se dira gore re ipotšiše gore: Ge e ba “lešaba le legolo” e le batho bao Modimo a tlago go ba phološa gomme ba dula mo lefaseng, ke ka baka la’ng go thwe lešaba le “le eme pele ga sedulo sa bogoši le pele ga Kwana”? (Kut 7:9) Gantši ka Beibeleng lentšu “eme,” le šupa go motho yo a emego pele ga motho goba batho bao ba mo amogetšego. (Ps 1:5; 5:5; Die 22:29, AT; Lu 1:19) Ka mohlala, Kutollo kgaolo 6, e re “dikgoši tša lefase le bahlankedi ba ba phagamego le balaodi ba bahlabani le bahumi le ba matla le mohlanka yo mongwe le yo mongwe le motho yo mongwe le yo mongwe yo a lokologilego,” ba nyaka go ikuta gore ba se bone ‘sefahlego sa yo a dutšego sedulong sa bogoši le bogaleng bja Kwana, gobane letšatši le legolo la bogale bja bona le tlile, gomme ke mang yo a ka kgonago go ema?’ (Kut 6:15-17; bapiša le Lu 21:36.) Ka gona re ka re “lešaba le legolo” ke batho bao ba tlago go phologa bogale bja Modimo gomme ba tla ‘ema’ pele ga Modimo le Kwana go bontšha gore ba ba amogetše.
(Kutollo 7:14) Gona moo ka re go yena: “Morena wa ka, ke wena o tsebago.” A re go nna: “Ba ke bao ba tšwago masetlapelong a magolo gomme ba hlatswitše diaparo tša bona tše telele ba di šweufatša mading a Kwana.
it-2-E 1127 ¶4
Masetlapelo
Mo e ka bago ka morago ga mengwaga e 30 Jerusalema fedišitšwe, moapostola Johane o ile a botšwa ka lešaba le legolo la batho bao ba tšwago ditšhabeng ka moka le merafong ka moka gore: “Ba ke bao ba tšwago masetlapelong a magolo.” (Kut 7:13, 14) Taba ya gore lešaba le legolo ‘le tšwa masetlapelong a magolo,’ e bontšha gore lešaba leo le kgonne go phologa masetlapelo ao. Ditiro 7:9, 10 e thekga taba ye ka mantšu ao a rego: “Modimo o be a na le [Josefa], a mo hlakodiša ditlaišegong tša gagwe ka moka.” Jehofa o ile a thuša Josefa gore a kgotlelele mathata a gagwe, a ba a mo thuša le gore a tšwe ka gare ga ona.
(Kutollo 7:15-17) Ke ka baka leo ba lego pele ga sedulo sa bogoši sa Modimo; ba mo direla tirelo e kgethwa mosegare le bošego ka tempeleng ya gagwe; Yo a dutšego sedulong sa bogoši o tla phurollela tente ya gagwe godimo ga bona. 16 Ba ka se hlwe ba swarwa ke tlala le ge e le lenyora, le gona letšatši le ka se hlwe le ba fiša le ge e le go fišwa ke phišo le ge e le efe e babolago, 17 gobane Kwana yeo e lego kgauswi le sedulo sa bogoši e tla ba diša, e tla ba iša didibeng tša meetse a bophelo. Modimo o tla phumola megokgo ka moka mahlong a bona.”
it-1-E 996-997
Lešaba le Legolo
Lešaba le Legolo re le Tseba ka Eng? Kutollo kgaolo 7 le mangwalo a mangwe ao a sepedišanago le yona, e re thuša go tseba gore “lešaba le legolo” ke bomang. Kutollo 7:15-17 e bontšha gore Modimo o tla ‘phurollela tente ya gagwe godimo ga lona,’ gomme Kwana ya le iša “didibeng tša meetse a bophelo.” Lengwalo le le oketša ka gore Modimo o tla phumola ‘megokgo ka moka mahlong a lona.’ Ge re bala Kutollo 21:2-4, re hwetša mantšu ao a sepedišanago le ao a lego go Kutollo kgaolo 7. A re: ‘Tente ya Modimo e tla ba bathong, a phumola megokgo ka moka mahlong a bona,’ gomme ‘lehu la se sa ba gona.’ Dilo tše go bolelwago ka tšona mo mangwalong a, ga di tle go direlwa batho bao ba lego legodimong, moo ‘Jerusalema e Mpsha e theoga e etšwa gona,’ eupša di tla direlwa batho bao ba lego mo lefaseng.
Go Epa Matlotlo a Moya
(Kutollo 7:1) Ka morago ga se ka bona barongwa ba bane ba eme dikhutlong tše nne tša lefase ba kakatletše diphefo tše nne tša lefase, gore go se be le phefo e fokago lefaseng goba lewatleng goba sehlareng le ge e le sefe.
Go Swaya Isiraele ya Modimo
4 Barongwa ba ba bane ka ntle le pelaelo, ba emela dihlopha tše nne tša barongwa bao Jehofa a ba dirišago go thibela go dirwa ga kahlolo go fihlela nakong e beilwego. Nakong ya ge barongwa ba lokolla diphefo tšeo tša bogale bja Modimo gore di tšutle ka nako e tee go tšwa leboa, borwa, bohlabela le bodikela, ruri tshenyego e tla ba e kgolo kudu. E tla swana le mola Jehofa a diriša diphefo tše nne go gašanya ba-Elama ba bogologolo gomme a ba robakanya le go ba fediša, eupša mo lebakeng le e le ka tekanyo e kgolo kudu. (Jeremia 49:36-38) E tla ba sesesedi se segolo seo se senyago kudu go feta “ledimo” leo Jehofa a kilego a senya setšhaba sa ba-Amoni ka lona. (Amosi 1:13-15) Ga go na karolo ya mokgatlo wa Sathane lefaseng yeo e tlago go kgona go ema letšatšing la bogale bja Jehofa, ge a lwela bogoši bja gagwe bjo bo tlago go ba gona ka mehla le mehla le ka mo go sa felego.—Psalme 83:15, 18 (83:16, 19, PK); Jesaya 29:5, 6.
(Kutollo 9:11) Di na le kgoši e di bušago, e lego morongwa wa sekoti. Leina la yona ka Seheberu ke Abadoni, eupša ka Segerika leina la yona ke Apolione.
it-1-E 12
Abadoni
Abadoni yoo gape a bitšwago morongwa wa sekoti ke mang?
Go Kutollo 9:11, lentšu “Abadoni” ke leina leo le filwego “morongwa wa sekoti.” Leina la Segerika e lego Apolione, leo le swanago le leina Abadoni, le ra gore “Mofediši.” Lekgolong la bo-19 la mengwaga, batho ba be ba leka go hlatsela gore leina le le šupa go Mmušiši Vespasian, Muhammad le Napoleon, gomme morongwa wa sekoti go be go thwe ke “morongwa wa Sathane.” Eupša re swanetše go gopola gore Kutollo 20:1-3 e bontšha gore morongwa yo a theogago a etšwa legodimong a swere “senotlelo sa sekoti” ke moemedi wa Modimo. Ga se “morongwa wa Sathane,” ka gore lengwalo le le re morongwa yo wa Modimo o tla tlema Sathane gomme a mo lahlela sekoting. The Interpreter’s Bible e hlalosa Kutollo 9:11 ka gore: “Abadoni ke morongwa wa Modimo, e sego wa Sathane. Morongwa yo o kwa taelo ya Modimo ya gore a fediše dilo tšeo Modimo a di hloilego.”
Lentšu ʼavad·dohnʹ ka mangwalong a Seheberu le swantšhwa le Sheol (Bodulabahu) le lehu. Go Kutollo 1:18 Jesu o re ‘o phela go iša mehleng ya neng le neng gomme o na le dinotlelo tša lehu le Bodulabahu.’ Le gona, Luka 8:31 e bontšha gore Jesu o na le matla a go lahlela Sathane le batemona ba gagwe sekoting. Bohlatse bja gore o na le matla a go fediša, go akaretša le go fediša Sathane, bo hwetšagala Lengwalong la Baheberu 2:14. Lengwalo le le bontšha gore Jesu o bile le kabelo mading le nameng, e le gore “ka lehu la gagwe a fediše yo a nago le mokgwa wa go baka lehu, e lego Diabolo.” Kutollo 19:11-16 e bontšha gore Modimo o kgethile Jesu gore e be Mofediši legatong la gagwe.—Bala APOLLYON ka go it-E.
Mmalo wa Beibele
(Kutollo 7:1-12) Ka morago ga se ka bona barongwa ba bane ba eme dikhutlong tše nne tša lefase ba kakatletše diphefo tše nne tša lefase, gore go se be le phefo e fokago lefaseng goba lewatleng goba sehlareng le ge e le sefe. 2 Ka bona morongwa yo mongwe a rotoga bohlabatšatši, a na le leswao la Modimo yo a phelago; a goeletša ka lentšu le le hlabošago barongwa ba bane bao ba dumeletšwego go senya lefase le lewatle, 3 a re: “Le se senye lefase goba lewatle goba dihlare go fihla ge re swaile bahlanka ba Modimo wa rena diphatleng tša bona.” 4 Ka kwa palo ya ba ba swailwego e le dikete tše lekgolo-masomenne-nne (144 000), ba swailwe go tšwa molokong o mongwe le o mongwe wa barwa ba Isiraele: 5 Molokong wa Juda go swailwe ba dikete tše lesomepedi (12 000); molokong wa Rubeni ba dikete tše lesomepedi (12 000); molokong wa Gada ba dikete tše lesomepedi (12 000); 6 molokong wa Ashere ba dikete tše lesomepedi (12000); molokong wa Nafutali ba dikete tše lesomepedi (12 000); molokong wa Manase ba dikete tše lesomepedi (12 000); 7 molokong wa Simeone ba dikete tše lesomepedi (12 000); molokong wa Lefi ba dikete tše lesomepedi (12 000); molokong wa Isakara ba dikete tše lesomepedi (12 000); 8 molokong wa Sebulone ba dikete tše lesomepedi (12000); molokong wa Josefa ba dikete tše lesomepedi (12 000); molokong wa Benjamini go swailwe ba dikete tše lesomepedi (12 000). 9 Ka morago ga dilo tše ka lebelela gomme ka bona lešaba le legolo leo go sego motho yo a kgonago go le bala, le le tšwago ditšhabeng tšohle, melokong yohle, merafong yohle le malemeng ohle le eme pele ga sedulo sa bogoši le pele ga Kwana, le apere diaparo tše telele tše tšhweu; le swere makala a mopalema ka diatleng. 10 Le dutše le goeletša ka lentšu le le hlabošago, le re: “Phološo e tšwa go Modimo wa rena yo a dutšego sedulong sa bogoši, le go Kwana.” 11 Barongwa ka moka ba be ba eme go dikologa sedulo sa bogoši le bagolo le dibopiwa tše di phelago tše nne, ke moka ba wa ka difahlego tša bona pele ga sedulo sa bogoši ba rapela Modimo, 12 ba re: “Amene! Anke tšhegofatšo le letago le bohlale le tebogo le kgodišo le matla le bokgoni e be tša Modimo wa rena go iša mehleng ya neng le neng. Amene.”
DECEMBER 9-15
MAHUMO AO A LEGO KA LENTŠUNG LA MODIMO | KUTOLLO 10-12
“‘Dihlatse tše Pedi’ di Ile tša Bolawa, ka Morago tša Bušetšwa Bophelong”
(Kutollo 11:3) Ke tla dira gore dihlatse tša ka tše pedi di porofete ka matšatši a sekete-makgolopedi-masometshela (1 260) di apere mašela a mokotla.”
Dipotšišo tše Tšwago go Babadi
Dihlatse tše pedi tšeo go bolelwago ka tšona go Kutollo kgaolo 11 ke bomang?
Kutollo 11:3 e bolela ka dihlatse tše pedi tšeo di bego di tla porofeta ka matšatši a 1 260. Ke moka pego ye e re sebata se be se tla “lwa le tšona sa di fenya gomme sa di bolaya.” Eupša ka morago ga “matšatši a mararo le seripa,” dihlatse tše tše pedi di be di tla bušetšwa bophelong, gomme bao ba bogetšego ba makala.—Kut. 11:7, 11.
Dihlatse tše tše pedi ke bomang? Ditaba ka botlalo tša pego ye di re thuša gore re di tsebe. Sa pele, re botšwa gore “di swantšhetšwa ke mehlware e mebedi le dihlomapone tše pedi.” (Kut. 11:4) Se se re gopotša ka sehlomapone le mehlware e mebedi tšeo di hlalositšwego boporofeteng bja Sakaria. Mehlware yeo go boletšwe gore e swantšhetša “batlotšwa ba babedi,” e lego Mmuši Serubabele le Moperisita yo a Phagamego Joshua, “bao ba emego kgauswi le Morena wa lefase ka moka.” (Sak. 4:1-3, 14) Sa bobedi, dihlatse tše tše pedi di hlaloswa di dira mehlolo yeo e swanago le yeo e dirilwego ke Moshe le Eliya.—Bapiša Kutollo 11:5, 6 le Numeri 16:1-7, 28-35 gotee le 1 Dikgoši 17:1; 18:41-45.
Mangwalo a a mabedi a swana ka eng? Le lengwe le le lengwe la ona le bolela ka batlotšwa ba Modimo bao ba ilego ba etelela batho ba gagwe pele nakong e thata ya go lekwa. Ka gona e le go phethagatša Kutollo kgaolo 11, bana babo rena ba batlotšwa bao ba bego ba etelela pele nakong ya ge Mmušo wa Modimo o hlongwa legodimong ka 1914 ba ile ba dira boboledi ka nywaga e meraro le seripa ba apere “mašela a mokotla.”
Mafelelong a boboledi bja bona ba apere mašela a mokotla, batlotšwa ba ba ile ba bolawa ka tsela ya seswantšhetšo ge ba be ba lahlelwa kgolegong ka nakwana, e lego matšatši a mararo le seripa a seswantšhetšo. Go manaba a batho ba Modimo, modiro wa bona o be o fedišitšwe gomme seo sa dira gore baganetši bao ba thabe kudu.—Kut. 11:8-10
Lega go le bjalo, boporofeta bja Kutollo kgaolo 11 bo ile bja phethagala gomme mafelelong a matšatši a mararo le seripa dihlatse tšeo tše pedi tša bušetšwa bophelong. Ga se feela gore batlotšwa ba ba be ba lokolotšwe kgolegong eupša bao ba ilego ba dula ba botega Modimo o ile a ba nea kabelo e kgethegilego a diriša Morena wa bona Jesu Kriste. Ka 1919 ba be ba le gare ga bao ba ilego ba kgethwa gore ba hlankele e le “mohlanka yo a botegago le wa temogo” gore ba hlokomele batho ba Modimo moyeng mehleng ya bofelo.—Mat. 24:45-47; Kut. 11:11, 12.
Se se kgahlišago ke gore Kutollo 11:1, 2 e tswalanya ditiragalo tše le nako ya ge tempele ya moya e tla be e elwa goba go hlahlobja. Maleaki kgaolo 3 e bolela ka go hlahlobja mo go swanago ga tempele ya moya, moo go latelwago ke nako ya go hlwekišwa. (Mal. 3:1-4) Modiro wo wa go hlahloba le go hlwekiša o tšere nako e kaaka’ng? O ile wa thoma ka 1914 gomme wa fela mathomong a 1919. Lebaka le la nako le akaretša bobedi matšatši a 1 260 (dikgwedi tše 42) le matšatši a mararo le seripa a seswantšhetšo ao go bolelwago ka ona go Kutollo kgaolo 11.
Ruri re thabišwa ke gore Jehofa o ile a rulaganya modiro wo gore a hlwekiše batho ba itšego bakeng sa mediro e mebotse! (Tito 2:14) Go oketša moo, re leboga kudu mohlala woo o beilwego ke batlotšwa ba botegago bao ba ilego ba etelela pele batho ba Modimo nakong yeo ya go lekwa gomme ya ba dihlatse tše pedi tša seswantšhetšo.
(Kutollo 11:7) Ge di feditše go nea bohlatse, sebata se se rotogago sekoting se tla lwa le tšona sa di fenya gomme sa di bolaya.
(Kutollo 11:11) Ka morago ga matšatši a mararo le seripa moya wa bophelo o tšwago go Modimo wa tsena go tšona, tša ema ka dinao gomme poifo e kgolo ya wela bao ba di bonego.
Go Epa Matlotlo a Moya
(Kutollo 10:9, 10) Ka ya go morongwa gomme ka mmotša gore a mphe lengwalo la go phuthwa le lenyenyane. A re go nna: “Le tšee o le je gomme le tla dira gore teng ya gago e lome, eupša ka ganong ga gago le tla ba bose go etša dinose.” 10 Ka tšea lengwalo la go phuthwa le lenyenyane seatleng sa morongwa ka le ja gomme ka ganong ga ka le be le le bose go etša dinose; eupša ge ke šetše ke le jele, teng ya ka ya loma.
it-2-E 880-881
Mangwalo a go Phuthwa
A Dirišitšwe ka Tsela ya Seswantšhetšo. Beibele e diriša polelwana “lengwalo la go phuthwa” go swantšhetša dilo tše dintši. Hesekiele le Sakaria ba ile ba bona “lengwalo la go phuthwa” leo le ngwadilwego ka mahlakoreng ka moka. Ka ge ka tlwaelo lengwalo la go phuthwa le be le ngwalwa ka lehlakoreng le tee, ge le be le ka ngwalwa ka mahlakoreng a mabedi seo se be se bontšha gore kahlolo yeo e ngwadilwego moo e be e le boima kudu. (Hes 2:9–3:3; Sak 5:1-4) Ponong yeo e lego lengwalong la Kutollo, Johane o ile a bona yo a dutšego sedulong sa bogoši a swere lengwalo la go phuthwa leo le tlemilwego ka mahuto a šupago, go thibela gore go se be le motho yo a bonago tšeo di ngwadilwego ka gare pele Kwana ya Modimo e le bula. (Kut 5:1, 12; 6:1, 12-14) Ka morago o ile a newa lengwalo leo la go phuthwa gomme a botšwa gore a le je. Ge a le ja o ile a kwa le le bose eupša ge le fihla ka mpeng ya gagwe la dira gore teng ya gagwe e lome. Ka ge lengwalo leo le be le sa tswalelwa, seo se bontšha gore Johane o be a swanetše go kwešiša molaetša woo. Go be go le “bose” ge Johane a amogela molaetša wo o lego ka lengwalong la go phuthwa, eupša o be o galaka ka kgopolo ya gore ditaba tšeo a di hweditšego ka gare ga lona, tšeo a bego a swanetše go di botša batho, di be di le boima. (Kut 10:1-11) Hesekiele le yena o ile a newa lengwalo la go phuthwa leo ‘le bego le ngwadilwe dikoša tša sello, go tsetsela le go golola.’—Hes 2:10.
(Kutollo 12:1-5) Pontšho e kgolo ya bonwa legodimong, gwa bonwa mosadi yo a tšhephilego ka letšatši, kgwedi e le ka tlase ga dinao tša gagwe, hlogong ya gagwe a rwele mphapahlogo wa dinaledi tše lesomepedi, 2 gomme e le moimana. A goeletša a šokwa e bile a le bohlokong bja go belega. 3 Pontšho e nngwe ya bonwa legodimong. Gwa bonwa drakone e kgolo ya mmala wa bohwibidu bja mollo ya dihlogo tše šupago le dinaka tše lesome gomme dihlogong tša yona go na le mefapahlogo e šupago; 4 mosela wa yona wa goga karolo ya boraro ya dinaledi tša legodimo wa di lahlela lefaseng. Drakone ya fela e eme pele ga mosadi yo a bego a tla tloga a belega, gore ge a belega e je ngwana wa gagwe. 5 A belega morwa, mošemanyana, yo a tlago go buša ditšhaba ka moka ka molamo wa tšhipi. Ngwana wa gagwe a ubulwa a išwa go Modimo le sedulong sa gagwe sa bogoši.
it-2-E 187 ¶7-9
Mahloko a Pelego
Moapostola Johane o ile a bona pono ya mosadi yo a lego legodimong a goeletša “a šokwa e bile a le bohlokong bja go belega.” Mosadi yoo o ile ‘a belega ngwana wa mošemanyana, yoo a tlago go buša ditšhaba ka moka ka molamo wa tšhipi.’ Le ge drakone e ile ya dira sohle seo e ka se kgonago gore e mo metše, ‘ngwana wa mosadi yoo o ile a ubulwa a išwa go Modimo le sedulong sa gagwe sa bogoši.’ (Kut 12:1, 2, 4-6) Modimo o ile a tšea ngwana yoo go bontšha gore o mo amogetše bjalo ka morwa wa gagwe. Mehleng ya kgale go be go tlwaelegile gore ge lesea le sa tšwa go belegwa, le išwe go tatago lona gore a le amogele. (Bala BIRTH ka go it-E.) Ka gona “mosadi” yo go bolelwago ka yena, ke “mosadi” wa Modimo, ke “Jerusalema ya godimo,” e bile ke “mmago” Kriste le bana babo ba moya.—Gal 4:26; Heb 2:11, 12, 17.
Ka ge “mosadi” wa Modimo a phethagetše, ge a belega a ka se kwe bohloko bja kgonthe. Ka gona bohloko bja go belega bjo go bolelwago ka bjona bo swantšhetša gore “mosadi” o be a tla lemoga gore o kgauswi le go belega.—Kut 12:2.
‘Ngwana wa mošemanyana’ e be e tlo ba mang? O be a tlo “buša ditšhaba ka moka ka molamo wa tšhipi.” Mantšu a go boletšwe ka ona e sa le pele go Psalme 2:6-9 gore Modimo o tla kgetha Mesia gore e be Kgoši. Eupša ge Johane a bona pono ye, e be e le kgale Jesu a šetše a belegwe e bile e le kgale a tsošitšwe bahung. Ka gona go bonagala pono ye e bolela ka go tswalwa ga Mmušo wa Modimo woo kgoši ya ona e lego Jesu Kriste, yoo a ilego a tsošwa bahung gomme ka morago a ‘dula ka letsogong la le letona la Modimo, go fihla Modimo a bea manaba a Jesu e le bogato bja dinao tša gagwe [Jesu].’—Heb 10:12, 13; Ps 110:1; Kut 12:10.
Mmalo wa Beibele
(Kutollo 10:1-11) Ka bona morongwa yo mongwe yo matla a fologa legodimong a tšhephile ka leru, molalatladi o le hlogong ya gagwe, sefahlego sa gagwe se le bjalo ka letšatši gomme maoto a gagwe a le bjalo ka dikokwane tša mollo, 2 ka seatleng sa gagwe o be a na le lengwalo la go phuthwa le lenyenyane le le butšwego. A gata ka lenao la gagwe la le letona lewatleng gomme lenao la gagwe la le letshadi a gata ka lona lefaseng, 3 a goeletša ka lentšu le le hlabošago go etša ge tau e rora. Ge a goeletša, gwa kwala mantšu a medumo e šupago. 4 Bjale ge medumo e šupago e bolela, ke ge ke loketše go ngwala; eupša ka kwa lentšu le le tšwago legodimong le re: “Dilo tše medumo e šupago e di boletšego di boloke e le sephiri, o se ke wa di ngwala.” 5 Morongwa yo ke mmonego a eme lewatleng le lefaseng a emišetša letsogo la gagwe la le letona legodimong, 6 a ena ka Yo a phelago go iša mehleng ya neng le neng, yo a bopilego legodimo le dilo tše di lego go lona le lefase le dilo tše di lego go lona le lewatle le dilo tše di lego go lona, a re: “Go ka se hlwe go eba le tiego; 7 eupša matšatšing a ge morongwa wa bošupa a le kgauswi le go letša phalafala ya gagwe, sephiri se sekgethwa seo Modimo a se tsebaditšego e le ditaba tše dibotse go bahlanka ba gagwe, e lego baporofeta, ruri se phethagaditšwe.” 8 Ka kwa lentšu le etšwa legodimong le bolela le nna gape le re: “Eya o tšee lengwalo la go phuthwa le le butšwego leo le lego seatleng sa morongwa yo a emego lewatleng le lefaseng.” 9 Ka ya go morongwa gomme ka mmotša gore a mphe lengwalo la go phuthwa le lenyenyane. A re go nna: “Le tšee o le je gomme le tla dira gore teng ya gago e lome, eupša ka ganong ga gago le tla ba bose go etša dinose.” 10 Ka tšea lengwalo la go phuthwa le lenyenyane seatleng sa morongwa ka le ja gomme ka ganong ga ka le be le le bose go etša dinose; eupša ge ke šetše ke le jele, teng ya ka ya loma. 11 Ba re go nna: “O swanetše go porofeta gape ka merafo, ditšhaba, maleme le ka dikgoši tše dintši.”
DECEMBER 16-22
MAHUMO AO A LEGO KA LENTŠUNG LA MODIMO | KUTOLLO 13-16
“O se ke wa Tšhaba Dibata Tšeo di Boifišago”
(Kutollo 13:1, 2) Drakone ya ema pho lešabašabeng la lewatle.Ka bona sebata se rotoga lewatleng se na le dinaka tše lesome le dihlogo tše šupago, dinakeng tša sona go na le mefapahlogo e lesome, eupša dihlogong tša sona go na le maina a maroga. 2 Bjale sebata seo ke se bonego se be se swana le lepogo, eupša marofa a sona a le bjalo ka a bere gomme molomo wa sona o le bjalo ka molomo wa tau. Drakone ya nea sebata matla a sona le sedulo sa bogoši sa sona le taolo e kgolo.
Jehofa ke “Moutolodi wa Diphiri”
6 Mafelelong a lekgolo la pele la nywaga C.E., Jesu yo a tsošitšwego o ile a bontšha moapostola Johane dipono tše di makatšago ka go latelelana. (Kut. 1:1) Go e nngwe ya dipono tšeo, Johane o ile a bona Diabolo, yo a swantšheditšwego ke drakone, a eme lebopong la lewatle le legolo. (Bala Kutollo 13:1, 2.) Le gona Johane o ile a bona sebata se se makatšago se etšwa ka lewatleng gomme Diabolo a se nea matla a magolo. Ka morago ga moo morongwa o ile a botša Johane gore dihlogo tše šupago tša sebata sa mmala o mohwibiduhwibidu, e lego seswantšho sa sebata sa Kutollo 13:1, di emela “dikgoši tše šupago,” goba mebušo. (Kut. 13:14, 15; 17:3, 9, 10) Nakong ya ge Johane a be a ngwala ditaba tše, tše hlano tša tšona di be di šetše di wele, e nngwe e be e buša ka nako yeo, gomme e nngwe e be “e sešo ya fihla.” Mebušo yeo e be e emela eng? Anke re ahlaahleng e nngwe le e nngwe ya dihlogo tše tša sebata seo go boletšwego ka sona pukung ya Kutollo. Re tla bona le kamoo pego ya Daniele e re thušitšego go kwešiša e mengwe ya mebušo ye, ka dinako tše dingwe e le dilo tšeo di diragetšego nywagakgolo pele ga ge e ka thoma go buša..
(Kutollo 13:11) Ka bona sebata se sengwe se rotoga lefaseng, sona se be se na le dinaka tše pedi tše di swanago le tša kwana, eupša sa bolela bjalo ka drakone.
(Kutollo 13:15) Sa dumelelwa gore se nee seswantšho sa sebata mohemo, e le gore seswantšho sa sebata se bolele le go dira gore go bolawe ka moka bao ba ganago go rapela seswantšho sa sebata.
Go lwa le Dibata tše Pedi tše Šoro
26 E ka ba ofe? Ke Mmušo wa Lefase wa Maisemane le ma-Amerika, wona wo o swanago le hlogo ya bošupa ya sebata sa pele, eupša e le ka karolo e kgethegilego! Go o arola ponong o le bjalo ka sebata se se ikemetšego, go re thuša go bona gabotse kamoo o gatago mogato ka gona ka go ikemela boemong bja lefase. Sebata se sa seswantšhetšo sa dinaka tše pedi se bopilwe ka mebušo e mebedi ya bopolitiki yeo e lego gona ka nako e tee yeo e ikemetšego, eupša e le yeo e dirišanago. Go ba ga sona le dinaka tše pedi “tše di swanago le tša kwana,” go bolela gore se itira se boleta le seo se sa lwego, ka go ba le sebopego sa mmušo o kwešišago woo lefase ka moka le swanetšego go retologela go wona. Eupša se bolela “bjalo ka drakone” ka ge se diriša kgatelelo le go tšhošetša gaešita le bošoro bjo bogolo ge fela pušo ya sona e sa amogelwe. Ga se sa ka sa kgothaletša gore go ikokobeletšwe Mmušo wa Modimo wo o lego tlase ga pušo ya Kwana ya Modimo, eupša go e na le moo, se kgothaletša go ikokobeletša dikgahlego tša Sathane, yena drakone e kgolo. Se tšweleditše dikarogano tša botšhaba le lehloyo leo le oketšago borapeding bja go rapela sebata sa pele.
Go lwa le Dibata tše Pedi tše Šoro
30 Go phethega ga histori go bontšha seswantšho se e le lekgotla le le rulagantšwego, la tšweletšwa gomme la thekgwa ke Brithania le United States, gomme le ile la tsebja pele e le Kgwerano ya Ditšhaba. Le tla tšwelela ka morago go Kutollo kgaolo 17, le le ka sebopego se se fapanego e lego sa sebata se sehwibidu se se phelago le go hema, seo se lego gona ka go ikemela. Lekgotla le la ditšhaba tšohle le ‘bolela’ ka kgopolo ya gore le ikgantšha ka gore ke lona feela leo le kgonago go tliša khutšo le polokego bathong. Eupša ge e le gabotse, le fetogile motheo bakeng sa gore ditšhaba tšeo e lego ditho tša lona di arabišane ka mantšu a bogale le a maroga. Le tšhošetša ka tlhokofatšo goba go hlokomologwa ka mo go feletšego ga setšhaba le ge e le sefe goba batho le ge e le bafe bao ba sa khunamelego matla a lona a taolo. Ge e le gabotse, Kgwerano ya Ditšhaba e rakile ditšhaba tšeo di paletšwego ke go sepela ka dikgopolo tša yona. “Dinaka” tša bohlabani tša seswantšho se sa sebata di tla phetha karolo ya go baka phedišo, mathomong a masetlapelo a magolo.—Kutollo 7:14; 17:8, 16.
31 Ga e sa le go tloga Ntweng ya II ya Lefase, seswantšho sa sebata seo mo nakong ye se tšwelelago e le mokgatlo wa Ditšhaba tše Kopanego, se šetše se bolaile ka tsela ya kgonthe. Ka mohlala, madira a UN ka 1950 a ile a tsena ntweng e bego e le magareng ga Leboa la Korea le Borwa bja Korea. Madira a UN gotee le ma-Korea a ka Borwa a ile a bolaya ma-Korea a ka Leboa le ma-China a ka bago 1 420 000. Ka mo go swanago, madira a Ditšhaba tše Kopanego go tloga ka 1960 go ya go 1964, a be a e-lwa kua Congo (Kinshasa). Lega go le bjalo, baetapele ba lefase go akaretša mopapa Paul VI le mopapa John Paul II ba ile ba tšwela pele go bolela gore seswantšho se ke kholofelo ya mafelelo le e kaone ya motho bakeng sa khutšo. Ba ile ba tšwela pele go bolela gore, ge e ba batho ba palelwa ke go se hlankela, gona moloko wa batho o tla ipolaya. Ka gona, ka mokgwa wa seswantšhetšo ba dirile gore go bolawe batho ka moka bao ba ganago go dumelelana le seswantšho gotee le go se rapela.—Doiteronomio 5:8, 9.
(Kutollo 13:16, 17) Se gapeletša batho ka moka ba banyenyane le ba bagolo, bahumi le badiidi, ba lokologilego le bahlanka gore ba swaiwe seatleng sa bona sa le letona le phatleng, 17 le gore go se be le yo a rekago goba a rekišago ka ntle le motho yo a nago le leswao, leina la sebata goba palo ya leina la sona.
Dintlha tše Kgolo go tšwa Pukung ya Kutollo—II
13:16, 17. Go sa šetšwe mathata ao re ka kopanago le ona ge re phetha mediro e bjalo ya letšatši le letšatši, bjalo ka go “reka goba go rekiša,” ga se ra swanela go dumelela sebata se gapeletša go laola maphelo a rena. Go amogela ‘leswao la sebata seatleng sa rena le phatleng,’ go tla swana le go dumelela sebata se laola ditiro tša rena goba menagano ya rena.
Go Epa Matlotlo a Moya
(Kutollo 16:13, 14) Ka bona dipolelo tše di buduletšwego tše tharo tše di sa hlwekago tše di swanago le digwagwa di etšwa molomong wa drakone le molomong wa sebata le molomong wa moporofeta wa maaka. 14 Ge e le gabotse, ke dipolelo tše di buduletšwego ke batemona gomme di dira dipontšho, di ya go dikgoši tša lefase ka moka go di rapela ntweng ya letšatši le legolo la Modimo Ramatlaohle.
Dintlha tše Kgolo go tšwa Pukung ya Kutollo—II
16:13-16. ‘Dipolelo tše buduletšwego tše di sa hlwekago’ di swantšhetša phatlalatšo ya maaka ya batemona yeo e reretšwego go kgonthišetša gore dikgoši tša lefase ga di tutuetšwe ke go tšhollwa ga merufsi e šupago ya bogale bja Modimo eupša go e-na le moo di rapelwa go ya go lwa le Jehofa.—Mat. 24:42, 44.
(Kutollo 16:21) Sefako se segolo seo leswika le lengwe le le lengwe la sona e lego la boima bjo e ka bago bja talente sa wela batho se etšwa legodimong, ke moka batho ba roga Modimo ka baka la kotlo ya sefako seo, gobane kotlo yeo e be e le e kgolo ka mo go sa tlwaelegago.
“Topollo ya Lena e a Batamela”!
9 Nakong ya masetlapelo a magolo ga re tlo bolela ‘ditaba tše dibotse tša Mmušo.’ Nako ya go dira seo e tla ba e fetile. E tla ba e le nako ya gore “bofelo” bo tle! (Mateo 24:14) Batho ba Modimo ba tla be ba bolela ka sebete molaetša o matla wa kahlolo yeo e tlago go tlela batho ka moka. Go ka direga gore molaetša woo e be wa gore lefase le kgopo la Sathane le kgauswi le go fedišetšwa sa ruri. Beibele e swantšha molaetša woo le sefako ge e re: “Sefako se segolo seo leswika le lengwe le le lengwe la sona e lego la boima bjo e ka bago bja talente sa wela batho se etšwa legodimong, ke moka batho ba roga Modimo ka baka la kotlo ya sefako seo, gobane kotlo yeo e be e le e kgolo ka mo go sa tlwaelegago.”—Kutollo 16:21.
Mmalo wa Beibele
(Kutollo 16:1-16) Ka kwa lentšu le le hlabošago le le tšwago sekgethweng le re go barongwa ba šupago: “Eyang le tšhollele meruswi e šupago ya bogale bja Modimo lefaseng.” 2 Morongwa wa pele a ya gomme a tšhollela moruswi wa gagwe lefaseng. Batho bao ba bego ba na le leswao la sebata le bao ba bego ba rapela seswantšho sa sona ba tlaišwa ke sešo se bohloko se sešoro. 3 Wa bobedi a tšhollela moruswi wa gagwe lewatleng. La fetoga madi a bjalo ka a mohu gomme gwa hwa moya o mongwe le o mongwe o phelago, ee, dilo tše di lego ka lewatleng. 4 Wa boraro a tšhollela moruswi wa gagwe dinokeng le didibeng tša meetse. Tša fetoga madi. 5 Ka kwa morongwa yo a lego godimo ga meetse a re: “Wena Yo a lego gona le yo a bego a le gona, Mmotegi, o lokile, gobane o ntšhitše dikahlolo tše, 6 gobane ba tšholotše madi a bakgethwa le a baporofeta, o ba neile madi gore ba a nwe; ba swanelwa ke seo.” 7 Ka kwa aletare e re: “Ee, Jehofa Modimo, Ramatlaohle, dikahlolo tša gago ke tša therešo le tša go loka.” 8 Wa bone a tšhollela moruswi wa gagwe letšatšing; letšatši la dumelelwa gore le fiše batho ka mollo. 9 Batho ba fišwa ke phišo e kgolo, eupša ba roga leina la Modimo yo a nago le matla godimo ga dikotlo tše, gomme ba se ke ba itshola le go mo nea letago. 10 Wa bohlano a tšhollela moruswi wa gagwe sedulong sa bogoši sa sebata. Mmušo wa sona wa swifala, batho ba itoma maleme ka baka la bohloko bjo ba bo kwago, 11 eupša ba roga Modimo wa legodimo ka baka la mahloko ao ba a kwago le ka baka la dišo tša bona gomme ba se ke ba itshola medirong ya bona. 12 Wa botshelela a tšhollela moruswi wa gagwe nokeng e kgolo ya Eforate, meetse a yona a gopa e le gore dikgoši tše di tšwago bohlabatšatši di lokišetšwe tsela. 13 Ka bona dipolelo tše di buduletšwego tše tharo tše di sa hlwekago tše di swanago le digwagwa di etšwa molomong wa drakone le molomong wa sebata le molomong wa moporofeta wa maaka. 14 Ge e le gabotse, ke dipolelo tše di buduletšwego ke batemona gomme di dira dipontšho, di ya go dikgoši tša lefase ka moka go di rapela ntweng ya letšatši le legolo la Modimo Ramatlaohle. 15 “Tsebang gore ke tla bjalo ka lehodu. Go thaba yo a dulago a phafogile gomme a apere diaparo tša gagwe tša ka ntle, e le gore a se ke a sepela a hloboletše gomme batho ba lebelela dihlong tša gagwe.” 16 Tša di kgobokeletša lefelong le le bitšwago Haramagedone ka Seheberu.
DECEMBER 23-29
MAHUMO AO A LEGO KA LENTŠUNG LA MODIMO | KUTOLLO 17-19
“Ntwa ya Modimo e tla Fediša Dintwa ka Moka”
(Kutollo 19:11) Ke moka ka bona legodimo le bulega gomme ka bona pere e tšhweu. Yo a e nametšego o bitšwa Mmotegi le Morereši gomme o ahlola le go lwa ka go loka.
(Kutollo 19:14-16) Le gona, madira a legodimong a be a mo latela a nametše dipere tše tšhweu, a apere linene e tšhweu, e hlwekilego e botse. 15 Molomong wa gagwe go tšwa tšhoša e telele e bogale gore a otle ditšhaba ka yona, gomme o tla di buša ka molamo wa tšhipi. Godimo ga moo, o gatakela le segatelo sa morara sa bogale bja kgalefo ya Modimo Ramatlaohle. 16 Kobong ya gagwe ya ka ntle, ee, seropeng sa gagwe, o na le leina le le ngwadilwego le le rego: Kgoši ya dikgoši le Morena wa marena.
Haramagedone—Ntwa ya Modimo ya go Fediša Dintwa ka Moka
Ge feela batho ba kgopo ba sa dutše ba buša, batho ba lokilego ba ka se be le khutšo le tšhireletšego. (Diema 29:2; Mmoledi 8:9) Therešo ke gore re ka se kgone go aroganya kgobogo le bokgopo bathong bao ba bo dirago. Ka gona, batho ba kgopo ba swanetše go fedišwa e le gore go be le khutšo ya sa ruri le toka. Salomo o ngwadile gore: “E mobe ó tlo ba selefa sa yo boló.”—Diema 21:18.
Ka ge Modimo e le Moahlodi, re ka kgonthišega gore ka mehla o tla ahlola batho ba kgopo ka toka. Aborahama o ile a botšiša gore: “Naa Moahlodi wa lefase ka moka a ka se dirê se se swanetšexo naa!” Karabo yeo Aborahama a ilego a e hwetša ke gore ka mehla Jehofa o dula a nepile. (Genesi 18:25) Ka godimo ga moo, Beibele e re kgonthišetša gore Jehofa ga a kgahlišwe ke go fediša batho ba kgopo; o dira bjalo ge e ba ba sa fetoše ditsela tša bona.—Hesekiele 18:32; 2 Petro 3:9.
it-1-E 1146 ¶1
Pere
Moapostola Johane o ile a bona Jesu Kriste yo a tagafaditšwego a nametše pere e tšhweu a latelwa ke madira ao le ona a nametšego dipere tše tšhweu. Seo Johane a se bonego ponong yeo se bontšha gore ntwa yeo Jesu Kriste a tlago go e lwa le manaba ka moka a Jehofa ke ya go loka. (Kut 19:11, 14) Ge Kriste a be a thoma go buša, go ile gwa tšwelela masetlapelo ao a swantšhetšwago ke banamedi ba dipere tša go fapafapana.—Kut 6:2-8.
(Kutollo 19:19, 20) Ka bona sebata le dikgoši tša lefase le madira a tšona ba kgobokanetše go lwa le yo a nametšego pere le madira a gagwe. 20 Sebata sa swarwa, gwa swarwa le moporofeta wa maaka yo a bego a dira dipontšho pele ga sona tšeo ka tšona a bego a timetša bao ba amogetšego leswao la sebata le bao ba bego ba rapela seswantšho sa sona. Ba lahlelwa ka bobedi letsheng la mollo leo le tukago sebabole ba sa dutše ba phela.
Kgoši Yeo e Lego Mohlabani e a Fenya ka Haramagedone
24 Sebata sa dihlogo tše šupago le dinaka tše lesome seo se tšwelego lewatleng seo se emelago mokgatlo wa bopolitiki wa Sathane, se lahlelwa boemong bja go se sa gopolwa gomme se lahlelwa gotee le moporofeta wa maaka, e lego mmušo wa bošupa wa lefase. (Kutollo 13:1, 11-13; 16:13) Ge ba sa dutše ba “phela,” goba ba sa dutše ba kopane gotee go ganetša batho ba Modimo lefaseng, ba lahlelwa “letsheng la mollo.” Na le ke letsha la mollo wa kgonthe? Aowa, ka gobane le sona sebata ga se sa kgonthe gotee le yena moporofeta wa maaka ga se wa kgonthe. Go e na le moo, ke seka sa go fedišwa ka mo go feletšego le ga makgaola-kgang, e lego lefelo leo go elwago ruri go lona. Mo ke moo ka morago go tlago go lahlelwa lehu le Hadese gotee le Diabolo. (Kutollo 20:10, 14) Ruri, ga se dihele tša mollo tše di fišago kudu tša tlhokofatšo ya ka mo go sa felego ya ba babe, ka ge Jehofa a hloile yona kgopolo yeo ya lefelo le bjalo.—Jeremia 19:5; 32:35; 1Johane 4:8, 16.
(Kutollo 19:21) Eupša ba bangwe ka moka ba bolawa ka tšhoša e telele e tšwago molomong wa yoo a nametšego pere. Dinonyana ka moka tša khora dinama tša bona.
Kgoši Yeo e Lego Mohlabani e a Fenya ka Haramagedone
25 Ba bangwe ka moka bao e bego e se karolo ya mmušo ka go lebanya, eupša e le bao e bego e le karolo e sa fetogego ya lefase le le gobogilego la batho, le bona ba “bolawa ka tšhoša e telele ya yo a nametšego pere.” Jesu o tla ba bolela e le bao ba swanelwago ke lehu. Ka ge tabeng ya bona go sa bolelwe ka letsha la mollo, na re swanetše go lebelela gore ba tla tsoga? Ga go na mo re botšwago gore bao ba bolailwego ke Moahlodi wa Jehofa nakong yeo, ba tla tsošwa. Ka moka bao e sego “dinku” bjalo ka ge Jesu ka noši a boletše, ba ya “mollong o sa felego o lokišeditšwego Diabolo le barongwa ba gagwe,” ke gore “phedišong ya ka mo go sa felego.” (Mateo 25:33, 41, 46) Se se ruma “letšatši la kahlolo le la tshenyego ya batho ba sa boifego Modimo.”—2Petro 3:7; Nahume 1:2, 7-9; Maleaki 4:1.
Go Epa Matlotlo a Moya
(Kutollo 17:8) Sebata seo o se bonego se be se le gona, eupša ga se sa le gona, fela se tla tloga se rotoga sekoting gomme se tla ya tshenyegong. Bao ba dulago lefaseng, e lego bao maina a bona a sa kago a ngwalwa lengwalong la go phuthwa la bophelo go tloga go theweng ga lefase, ba tla makala ge ba bona sebata seo se bego se le gona eupša se se sa le gona, fela se eba gona gape.
Sephiri Seo se Boifišago se a Utollwa
5 “Sebata . . . se be se le gona.” Ee, se be se le gona e le Kgwerano ya Ditšhaba go tloga ka January 10, 1920 go ya pele, gomme ka nako e nngwe sa bopa ke ditšhaba tše 63. Eupša ka morago Japane, Jeremane le Italy di ile tša ntšha ka hlogo gomme seo e kilego ya ba Soviet Union se ile sa tlošwa Kgweranong. Ka September 1939 mmuši wa nkgwete wa Nazi wa Jeremane o ile a thoma Ntwa ya II ya Lefase. Kgwerano ya Ditšhaba ka ge e ile ya palelwa ke go boloka khutšo lefaseng e ile ya wela ka sekoting sa go se dire selo. Ka 1942 e be e fetogile yeo e bego e le gona. Jehofa ga se a ka a hlathollela batho ba gagwe se se bolelwago ka botlalo ke pono ye pele ga mo goba ka nako e nngwe ya ka morago, eupša o ile a e hlatholla yona nakong yeo e thata! Kopanong ya Pušo ya Modimo ya Lefase le Lefsa, N. H. Knorr o be a ka bolela ka go dumelelana le boporofeta gore “sebata . . . ga se sa le gona.” Ka gona o ile a botšiša potšišo e rego, “Na Kgwerano e tla dula e le ka sekoting?” Ge a tsopola Kutollo 17:8, o ile a araba ka gore: “Lekoko la ditšhaba tša lefase le tla tsoga gape.” Go ile gwa ba ka wona mokgwa woo, e le go hlatsela Lentšu la Jehofa la boporofeta e le la therešo!
Go Rotoga Sekoting
6 Sebata sa mmala wa sekareleta se ile sa rotoga e le ka kgonthe sekoting. Ka June 26, 1945, ka go letšwa ga diphalafala tša lešata kua San Francisco, U.S.A., ditšhaba tše 50 di ile tša boutela go amogela Molao-theo wa mokgatlo wa Ditšhaba tše Kopanego. Mokgatlo wo e be e le wa go “boloka khutšo le polokego tša ditšhaba ka moka.” Go be go e-na le go swana mo gontši magareng ga Kgwerano le UN. The World Book Encyclopedia e re: “Ka ditsela tše itšego, UN e swana le Kgwerano ya Ditšhaba yeo e ilego ya rulaganywa ka morago ga Ntwa ya I ya Lefase . . . Tše dintši tša ditšhaba tšeo di thomilego UN e be e bile tšona gape tše di thomilego Kgwerano. Ka go swana le Kgwerano, UN e ile ya hlongwa bakeng sa go thuša go boloka khutšo magareng ga ditšhaba. Ditho tše dikgolo tša UN di swana kudu le tšela tša Kgwerano.” Ka gona, UN ge e le gabotse ke go tsošološwa ga sebata sa mmala wa sekareleta. Ditho tša yona tša ditšhaba tše di ka bago 190 di feta kudu tšela tša Kgwerano tše 63; le gona e na le boikarabelo bjo bogolo go feta yeo e tlilego pele ga yona.
(Kutollo 17:16, 17) Dinaka tše lesome tše o di bonego le sebata, di tla hloya mogweba-ka-mmele tša mo šwalalanya le go mo hlobodiša gomme tša ja dinama tša gagwe tša ba tša mo fiša ka mo go feletšego ka mollo. 17 Gobane Modimo o tsentšhitše dipelong tša tšona gore di phethe kgopolo ya gagwe, ee, gore di phethe kgopolo ya tšona e tee ka go nea sebata mmušo wa tšona, go fihlela ge mantšu a Modimo a tla be a phethagaditšwe.
Jehofa o Utolla Dilo “tše di Tlago go Direga Kgauswinyane”
17 Lega go le bjalo, bodumedi bja maaka bo ka se no hwelela. Mogweba-ka-mmele o tla dula a na le tutuetšo e matla, a leka go laela dikgoši gore di dire seo a se ratago go ba go fihlela ge Modimo a tsenya kgopolo e itšego ka dipelong tša babuši. (Bala Kutollo 17:16, 17.) Go se go ye kae Jehofa o tla dira gore mekgatlo ya dipolitiki ya tshepedišo ya Sathane, yeo e emelwago ke Ditšhaba tše Kopanego, e hlasele bodumedi bja maaka. Mekgatlo yeo e tla fediša tutuetšo ya gagwe gomme ya senya le mahumo a gagwe. Nywagasomeng e mmalwa e fetilego, tiragalo e bjalo e ka ba e be e bonagala e ka se kgonege. Lehono, mogweba-ka-mmele o dutše godimo ga sebata sa mmala o mohwibiduhwibidu ka go tekateka. Lega go le bjalo, a ka se we moo ganyenyane-ganyenyane. O tlo wa ka tšhoganetšo le ka tsela e sehlogo.—Kut. 18:7, 8, 15-19.
Mmalo wa Beibele
(Kutollo 17:1-11) Yo mongwe wa barongwa ba šupago bao ba bego ba swere meruswi e šupago a tla a bolela le nna, a re: “Tlaa, ke tla go bontšha kahlolo ya mogweba-ka-mmele yo mogolo yo a dutšego godimo ga meetse a mantši, 2 yoo dikgoši tša lefase di otswitšego le yena gomme badudi ba lefaseng ba tagišitšwe ka beine ya bootswa bja gagwe.” 3 A nthwala ka matla a moya o mokgethwa a nkiša lešokeng. Ka bona mosadi a nametše sebata sa mmala o mohwibiduhwibidu seo se bego se tletše maina a maroga le seo se bego se na le dihlogo tše šupago le dinaka tše lesome. 4 Mosadi yoo o be a apere seaparo sa mmala o mophepolo le o mohwibiduhwibidu, a ikgabišitše ka gauta le leswika le bohlokwa le diperela gomme seatleng sa gagwe a swere senwelo sa gauta seo se tletšego makgapha le dilo tše di sa hlwekago tša bootswa bja gagwe. 5 Phatleng ya gagwe go be go ngwadilwe leina leo e lego sephiri leo le rego: “Babilona o Mogolo, mmago bagweba-ka-mmele le mmago makgapha a lefase.” 6 Ka bona gore mosadi o be a tagilwe ke madi a bakgethwa le madi a dihlatse tša Jesu. Bjale, ge ke mmona ka makala kudu. 7 Ka gona morongwa a re go nna: “Ke ka baka la’ng o be o maketše? Ke tla go botša sephiri sa mosadi le sa sebata seo se nago le dihlogo tše šupago le dinaka tše lesome seo se mo rwelego. 8 Sebata seo o se bonego se be se le gona, eupša ga se sa le gona, fela se tla tloga se rotoga sekoting gomme se tla ya tshenyegong. Bao ba dulago lefaseng, e lego bao maina a bona a sa kago a ngwalwa lengwalong la go phuthwa la bophelo go tloga go theweng ga lefase, ba tla makala ge ba bona sebata seo se bego se le gona eupša se se sa le gona, fela se eba gona gape. 9 “Se se nyaka gore motho a be le monagano o nago le bohlale. Dihlogo tše šupago di swantšhetša dithaba tše šupago tšeo mosadi a dulago godimo ga tšona. 10 Go na le dikgoši tše šupago. Tše hlano di wele, e nngwe e gona gomme e nngwe ga e sešo ya fihla, eupša ge e fihla e tla dula lebakanyana. 11 Sebata se se bego se le gona fela se se sa le gona, e bile ke sona kgoši ya seswai, eupša se tšwa go tše šupago gomme se ya tshenyegong.
DECEMBER 30–JANUARY 5
MAHUMO AO A LEGO KA LENTŠUNG LA MODIMO | KUTOLLO 20-22
“Bonang! Dilo ka Moka ke di Dira tše Mpsha”
(Kutollo 21:1) Ka bona legodimo le lefsa le lefase le lefsa; gobane legodimo la pele le lefase la pele di be di fetile, le lewatle ga le sa le gona.
Legodimo le Lefsa le Lefase le Lefsa
2 Jehofa o be a ile a botša Jesaya nywageng e makgolo pele ga mehla ya Johane gore: “Ke tlo hlôla maxodimo a mafsa le lefase le lefsa; tša kxalê di ka se hlwê di tsebywa, le mo pelong ya motho di ka se hlwê di rotoxa.” (Jesaya 65:17; 66:22) Boporofeta bjo bo ile bja phethagala la mathomo nakong ya ge Bajuda ba botegago ba be ba boela Jerusalema ka 537 B.C.E. ka morago ga bothopša bja bona bja nywaga e 70 kua Babilona. Ka nako yeo ya tsošološo, ba ile ba bopa lekoko le le hlwekišitšwego, e lego “lefase le lefsa” leo le lego tlase ga tshepedišo e mpsha ya mmušo, yeo e lego “magodimo a mafsa.” Lega go le bjalo, moapostola Petro o ile a šupa go go phethagala mo gongwe ga boporofeta bjo, ka gore: “Eupša go na le magodimo a mafsa le lefase le lefsa tše re di letetšego go ya ka kholofetšo ya gagwe, gomme toko e tla aga go tšona.” (2 Petro 3:13) Johane bjale o bontšha gore kholofetšo ye e phethega nakong ya letšatši la Morena. “Legodimo la pele le lefase la pele,” e lego tshepedišo e rulagantšwego ya Sathane ya dilo gotee le thulaganyo ya yona ya mmušo yeo e tutuetšwago ke Sathane le batemona ba gagwe, di tla feta. “Lewatle” leo le bilokanago la batho ba babe ba marabele, le ka se hlwe le sa ba gona. Sebakeng sa lona go tla ba le “magodimo a mafsa le lefase le lefsa,” e lego lekoko le lefsa la lefaseng tlase ga mmušo o mofsa, Mmušo wa Modimo.—Bapiša le Kutollo 20:11.
(Kutollo 21:3, 4) Ke moka, ka kwa lentšu le le hlabošago le le tšwago sedulong sa bogoši le re: “Bonang! Tente ya Modimo e bathong, o tla dula le bona gomme e tla ba batho ba gagwe. Modimo ka noši o tla ba le bona. 4 O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”
“Bonang! Dilo ka Moka ke di Dira tše Mpsha”
“[Modimo] o tla phumola megokgo ka moka mahlong a bona.” (Kutollo 21:4) O tla phumola megokgo ya mohuta mang? E sego megokgo ya lethabo goba yeo e šireletšago mahlo a rena. Kholofetšo ya Modimo e šupa go megokgo yeo e bakwago ke tlaišego le manyami. Modimo a ka se fo omiša megokgo yeo; o tla e phumola ka mo go feletšego ka go tloša dibaki tša megokgo yeo e sa nyakegego, e lego tlaišego le manyami.
“Lehu le ka se hlwe le sa ba gona.” (Kutollo 21:4) Ke’ng seo se bakilego megokgo e mentši e sa nyakegego go feta lenaba leo e lego lehu? Jehofa o tla lokolla batho ba kwago ditlemong tša lehu. O tla dira seo bjang? Ka go fediša sebaki sa kgonthe sa lehu: sebe seo se abetšwego go Adama. (Baroma 5:12) Jehofa o tla lebiša batho bao ba kwago phethegong motheong wa sehlabelo sa topollo sa Jesu. Ke moka lenaba la mafelelo, e lego lehu, le tla “fedišwa mafelelong.” (1 Bakorinthe 15:26) Batho ba botegago ba tla kgona go phela go ya kamoo Modimo a bego a rerile gore ba phele ka gona—ka mo go sa felego ba phetše gabotse mmeleng.
‘Le ge e le bohloko bo ka se hlwe bo sa ba gona.’ (Kutollo 21:4) Ke bohloko bja mohuta ofe bjo bo ka se hlwego bo sa ba gona? Bohloko ka moka bja monagano, bja maikwelo le bja mmele bjo bo bakilwego ke sebe le go se phethagale bjo bo šulafaleditšego batho ba dimilionemilione bophelo, bo ka se sa ba gona.
(Kutollo 21:5) Yo a dutšego sedulong sa bogoši a re: “Bonang! Dilo ka moka ke di dira tše mpsha.” Gape, a re: “Ngwala, gobane mantšu a a botega e bile ke a therešo.”
Jehofa, Modimo wa Therešo
14 Re swanetše go tšeela godimo seo Jehofa a re botšago sona ka Lentšung la gagwe. Ke seo a rego ke sona, gomme o tla dira seo a rego o tla se dira. Re na le mabaka ka moka a go bota Modimo. Re ka dumela ge Jehofa a re “ba ba sa kwexo Ebangedi ya Mong wa rena Jesu Kriste, ó tlo ba lefetša ka dikxabo tša mollô.” (2 Ba-Thesalonika 1:8) Le gona re ka dumela seo Jehofa a se bolelago ge a re o rata bao ba phegelelago go loka, ge a re bao ba bontšhago tumelo o tlo ba nea bophelo bjo bo sa felego le ge a re o tla fediša bohloko, dillo gaešita le lehu. Jehofa o ile a gatelela go botega ga kholofetšo ye ya mafelelo ka go nea moapostola Johane taelo ye: “Ngwala, xobane ’taba tšé ké tša xo rereša le xo bôtêxa.”—Kutollo 21:4, 5; Diema 15:9; Johane 3:36.
Go Epa Matlotlo a Moya
(Kutollo 20:5) (Bahu ba bangwe ka moka ga se ba ka ba phela go fihla ge nywaga e sekete (1 000) e fedile.) Ye ke tsogo ya pele.
it-2-E 249 ¶2
Bophelo
Ge Modimo a be a nea Adama molao, o be a bontšha gore ge a ka mo kwa, o be a ka se hwe. (Ge 2:17) Ka mo go swanago, ge lenaba la batho e lego lehu le tla be le fedišitšwe, batho bao ba kwago Modimo ba ka se sa hwa ka ge ba tla be ba se sa na sebe. Ba tla phela ka mo go sa felego. (1Ko 15:26) Lehu le tla fedišwa mafelelong a pušo ya Kriste, yeo puku ya Kutollo e bolelago gore e tla tšea mengwaga e sekete (1 000). Puku ye e bolela ka bao ba tlago go buša gotee le Jesu Kriste e le dikgoši le baperisita gore ba tla “phela gomme ba buša e le dikgoši le Kriste ka nywaga e sekete (1 000).” “Bahu ba bangwe ka moka” bao ba ka se kego ba phela “go fihla ge nywaga e sekete (1 000) e fedile,” ke batho bao ba tlago go phela ge mengwaga e sekete e se no fela, eupša seo se tla direga pele ga ge Sathane a ka lokollwa sekoting gore a leke batho. Ge mengwaga e sekete e se no fela, batho bao ba lego mo lefaseng ba tla be ba phethagetše, gomme ba swana le Adama le Efa nakong ya ge ba sešo ba ba le sebe. Ka nako yeo batho ba tla be ba se na sebe. Ke moka bao ba tla bego ba botegetše Jehofa ge Sathane a ba leka la mafelelo, ba tla phela ka mo go sa felego.—Kut 20:4-10.
(Kutollo 20:14, 15) Lehu le Bodulabahu tša lahlelwa letsheng la mollo. Se se swantšhetša lehu la bobedi, letsha la mollo. 15 Go feta moo, mang le mang yo a sa hwetšwago a ngwadilwe pukung ya bophelo a lahlelwa letsheng la mollo.
it-2-E 189-190
Letsha la Mollo
Ka Beibeleng polelwana ye go bolelwa ka yona feela ka pukung ya Kutollo, gomme e no ba seswantšhetšo. Puku ye e re ‘letsha la mollo le swantšhetša lehu la bobedi.’—Kut 20:14; 21:8.
Ditemana tše dingwe ka pukung ya Kutollo di bontšha gore polelwana e rego ‘letsha la mollo’ ke seswantšhetšo. Temana e nngwe e hlalosa gore lehu le tla lahlelwa ka letsheng la mollo. (Kut 19:20; 20:14) Seo ga se bolele gore lehu le tla swa ka tsela ya kgonthe. Diabolo yoo e lego sebopiwa sa moya, le yena go hlaloswa gore o tlo lahlelwa ka letsheng la mollo. Ka ge e le sebopiwa sa moya a ka se swe ka tsela ya kgonthe.—Kut 20:10; bapiša le Ek 3:2 le Baa 13:20.
Letsha la mollo le swantšhetša “lehu la bobedi,” le gona Kutollo 20:14 e re “lehu le Bodulabahu” di tla lahlelwa ka letsheng la mollo. Go molaleng gore letsha la mollo ga le swantšhetše lehu leo le bakilwego ke sebe sa Adama (Rom 5:12), e bile ga le swantšhetše Bodulabahu (Sheole). Letsha la mollo le swantšhetša mohuta o mongwe wa lehu, leo go se nago tsogo go lona, ka gobane ga go na mo Beibele e bontšhago gore “letsha” la mollo le tla ntšha bahu ba lona, go swana le ge lehu leo le bilego gona ka baka la sebe sa Adama le Bodulabahu (Sheole) di tlo ntšha bahu ba tšona. (Kut 20:13) Ka baka leo, bao ba tla bego ba sa ngwalwa ka “pukung ya bophelo,” e lego batho bao ba ganetšago bogoši bja Modimo e bile ba sa itshole, ba tla lahlelwa ka letsheng la mollo, e lego go fedišwa ka mo go sa felego, goba lehu la bobedi.—Kut 20:15.
Mmalo wa Beibele
(Kutollo 20:1-15) Ka bona morongwa a theoga legodimong a swere senotlelo sa sekoti le ketane e kgolo seatleng sa gagwe. 2 A swara drakone noga ya kgale, yeo e lego Diabolo le Sathane, a e tlema ka nywaga e sekete (1 000). 3 A e lahlela sekoting a se tswalela gomme a bea seka godimo ga sona, gore e se ke ya hlwa e timetša ditšhaba go fihla ge nywaga e sekete (1 000) e fedile. Ka morago ga dilo tše ka moka e swanetše go lokollwa lebakanyana. 4 Ka bona didulo tša bogoši gomme bao ba dutšego go tšona ba newa matla a go ahlola. Ee, ka bona meoya ya bao ba bolailwego ka baka la bohlatse bjo ba bo neilego ka Jesu le ka baka la go bolela ka Modimo. Ga se ba ka ba rapela sebata le ge e le seswantšho sa sona, bao ba sa kago ba amogela leswao diphatleng tša bona le diatleng tša bona. Ba phela gomme ba buša e le dikgoši le Kriste ka nywaga e sekete (1 000). 5 (Bahu ba bangwe ka moka ga se ba ka ba phela go fihla ge nywaga e sekete (1 000) e fedile.) Ye ke tsogo ya pele. 6 Yo a thabago le yo e bilego e le yo mokgethwa ke mang le mang yo a nago le kabelo tsogong ya pele; lehu la bobedi ga le na matla go bona, eupša e tla ba baperisita ba Modimo le ba Kriste gomme ba tla buša le yena e le dikgoši ka nywaga e sekete (1 000). 7 Bjale gateetee ge nywaga e sekete (1 000) e fedile, Sathane o tla lokollwa kgolegong ya gagwe, 8 o tla tšwela go timetša ditšhaba tšeo di lego dikhutlong tše nne tša lefase, Gogo le Magogo, go di rapela ntweng. Palo ya bona e etša lešabašaba la lewatle. 9 Ba tšwela lefaseng ka bophara gomme ba dikanetša mešaša ya bakgethwa le motse wo o rategago. Eupša mollo wa theoga legodimong wa ba tšhuma. 10 Diabolo yo a bego a ba timetša a lahlelwa letsheng la mollo le sebabole, moo sebata gotee le moporofeta wa maaka ba bego ba šetše ba le gona; ba tla hlokofatšwa mosegare le bošego go iša mehleng ya neng le neng. 11 Ka bona sedulo sa bogoši se segolo se sešweu le yo a dutšego go sona. Lefase le legodimo tša tšhaba pele ga gagwe, gwa se be le bodulo bjo bo hwetšwago bakeng sa tšona. 12 Ka bona bahu ba bagolo le ba banyenyane ba eme pele ga sedulo sa bogoši gomme mangwalo a go phuthwa a bulwa. Eupša lengwalo le lengwe la go phuthwa la bulwa; ke lengwalo la go phuthwa la bophelo. Bahu ba ahlolwa ka dilo tšeo di ngwadilwego mangwalong a go phuthwa go ya ka ditiro tša bona. 13 Lewatle la ntšha bahu ba lego go lona, lehu le Bodulabahu tša ntšha bahu ba lego go tšona, gomme yo mongwe le yo mongwe wa bona a ahlolwa go ya ka mediro ya gagwe. 14 Lehu le Bodulabahu tša lahlelwa letsheng la mollo. Se se swantšhetša lehu la bobedi, letsha la mollo. 15 Go feta moo, mang le mang yo a sa hwetšwago a ngwadilwe pukung ya bophelo a lahlelwa letsheng la mollo.