6. (a) Johane o bona lešaba lefe, gomme ke’ng seo se bolelwago ke mantšu “ba bagolo le ba banyenyane”? (b) Dimilione tše di sa balegego tšeo di gopolwago ke Modimo di tla tsošwa bjang ka ntle le pelaelo?

⁶ Lega go le bjalo, Johane o bona lešaba la batho ba bantši kudu leo le fetago lešaba le legolo leo le phelago. Le tla balwa ka dikete tše dimilione! “Ka bona bahu ba bagolo le ba banyenyane ba eme pele ga sedulo sa bogoši, gomme mangwalo a go phuthwa a bulwa.” (Kutollo 20:12a) “Ba bagolo le ba banyenyane” ba akaretša batho ba ba tsebegago gotee le ba ba sa tsebegego bao ba kilego ba phela gomme ba hwa mo lefaseng le nakong ya nywaga e 6 000 e fetilego. Jesu Ebangeding yeo moapostola Johane a ilego a e ngwala gatee-tee ka morago ga go ngwala Kutollo, o boletše ka Tatagwe gore: “O mo [Jesu] neile matla a go ahlola, gobane ke yena Morwa wa motho. Le se ke la makatšwa ke se, gobane nako e a tla yeo ka yona bohle bao ba lego mabitleng a kgopotšo ba tlago go kwa lentšu la gagwe gomme ba tšwa.” (Johane 5:27-29) A modiro o makatšago gakaakang, e lego go fedišwa ga mahu le dipoloko historing ka moka! Ka ntle le pelaelo, dimilione tšeo tše di se nago palo tše di gopolwago ke Modimo di tla tsošwa ganyenyane-ganyenyane e le gore lešaba le legolo—leo ge le bapišwa le tšona e lego le lenyenyane kudu—le tle le kgone go rarolla mathata ao mo gongwe a ka tšwelelago ka baka la ge bao ba tsošitšwego mo gongwe mathomong ba ka latela tsela ya bona ya kgale ya bophelo gotee le mafokodi a bjona a nama le mekgwa ya bjona.

Ke Bomang Bao ba Tsošwago le go Ahlolwa?

7, 8. (a) Ke lengwalo lefe le le phuthollwago, gomme go direga’ng ka morago ga moo? (b) Ke bomang bao ba ka se kego ba tsoga?

⁷ Johane o oketša ka gore: “Eupša lengwalo le lengwe la go phuthwa la bulwa; ke lengwalo la go phuthwa la bophelo. Bahu ba ahlolwa ka dilo tšeo di ngwadilwego mangwalong a go phuthwa go ya ka ditiro tša bona. Lewatle la ntšha bahu ba lego go lona, lehu le Hadese tša ntšha bahu ba lego go tšona, gomme ba ahlolwa yo mongwe le yo mongwe go ya ka mediro ya bona.” (Kutollo 20:12b, 13) A pono e makatšago gakaakang! ‘Lewatle, lehu le Hadese,’ e nngwe le e nngwe e tšea karolo e itšego, fela hlokomela gore mantšu a ga a bolele dilo tše di aroganego tšeo di sa tswalanego.a Nakong ya ge Jona a be a le ka mpeng ya hlapi gomme a le gare-gare ga lewatle, o ile a ipolela a le lebitleng. (Jona 2:2) Ge motho a tantšwe ke lehu leo le bakilwego ke Adama, gona go bonagala a sa dutše a le lebitleng. Mantšu a a boporofeta a nea kgonthišetšo e tiilego ya gore ga go na yo a tlago go lebalwa.

Lengwalo la go Phuthwa la Bophelo

11. (a) “Lengwalo la go phuthwa la bophelo” ke’ng, gomme ke maina a bomang a ngwadilwego lengwalong le? (b) Ke ka baka la’ng lengwalo la bophelo le tla phuthollwa nakong ya Pušo ya Nywaga e Sekete?

¹¹ Johane o bolela ka “lengwalo la go phuthwa la bophelo.” Ye ke pego ya bao ba lego boemong bja go amogela bophelo bjo bo sa felego go Jehofa. Maina a bana babo Jesu ba tloditšwego, a lešaba le legolo le a banna ba botegago ba bogologolo ba bjalo ka Moše, a ngwadilwe lengwalong le. (Ekisodo 32:32, 33; Daniele 12:1; Kutollo 3:5) Go ba go fihla ga bjale, ga go le o tee wa “ba sa lokago” bao ba tlago go tsošwa yo leina la gagwe le lego lengwalong le la bophelo. Ka gona lengwalo la bophelo le tla phuthollwa nakong ya Pušo ya Nywaga e Sekete, go dumelela go ngwalwa ga maina a ba bangwe bao ba tlago go swanelega. Bao maina a bona a sa ngwalwego lengwalong la go phuthwa, goba pukung ya bophelo, ba “lahlelwa letsheng la mollo.”—Kutollo 20:15; bapiša le Baheberu 3:19.

12. Ke’ng seo se tlago go laola go ngwalwa ga leina la motho lengwalong le phutholotšwego la bophelo, gomme Moahlodi yo a beilwego wa Jehofa o ile a bea mohlala bjang?

¹² Ka gona, ke’ng seo se tlago go laola go ngwalwa ga leina la motho lengwalong leo le phutholotšwego la bophelo nakong yeo? Lebaka le legolo e tla ba le le swanago le lela la mehleng ya Adama le Efa: go kwa Jehofa. Go bjalo ka ge moapostola Johane a ile a ngwalela Bakriste-gotee le yena ba rategago gore: “Lefase le a feta gomme go bjalo le ka kganyogo ya lona, eupša yo a dirago thato ya Modimo o dula a le gona ka mo go sa felego.” (1 Johane 2:4-7, 17) Moahlodi yo a beilwego wa Jehofa o beile mohlala tabeng ya go kwa: “Gaešita le ge [Jesu] e be e le Morwa, o ithutile go kwa dilong tšeo a tlaišegilego ka tšona; gomme ka morago ga ge a dirilwe yo a phethagetšego o ile a ikarabela ka phološo ya ka mo go sa felego ya bohle bao ba mo kwago.”—Baheberu 5:8, 9.

Go Phutholla Mangwalo a Mangwe

13. Bao ba tsošitšwego ba swanetše go bontšha go kwa ga bona bjang, gomme ke melao efe ya motheo yeo ba swanetšego go e latela?

¹³ Ba ba tsošitšwego ba swanetše go bontšha go kwa ga bona bjang? Jesu ka noši o boletše ka ditaelo tše pedi tše dikgolo, ge a re: “Ya pele ke ye, ‘Kwa, Wena Isiraele, Jehofa Modimo wa rena ke Jehofa a nnoši, gomme o rate Jehofa Modimo wa gago ka pelo ya gago ka moka le ka moya wa gago ka moka le ka monagano wa gago ka moka le ka matla a gago ka moka.’ Ya bobedi ke ye, ‘O rate moagišani wa gago go etša ge o ithata.’” (Mareka 12:29-31) Le gona go na le melao ya motheo ya Jehofa yeo e lego kgale e le gona yeo ba swanetšego go e latela, e bjalo ka go lahla bohodu, maaka, go bolaya le boitshwaro bjo bo gobogilego.—1 Timotheo 1:8-11; Kutollo 21:8.

14. Mangwalo a mangwe ao a phuthollwago ke afe, gomme a rwele’ng?

¹⁴ Lega go le bjalo, Johane o sa tšwa go bolela ka mangwalo a mangwe ao a tlago go phuthollwa nakong ya Pušo ya Nywaga e Sekete. (Kutollo 20:12) Mangwalo ao e tla ba afe? Jehofa ka dinako tše dingwe o neile ditaelo tše kgethegilego bakeng sa maemo a itšego. Ka mohlala, mehleng ya Moše o ile a nea lelokelelo le le kgethegilego la melao yeo e bego e bolela bophelo go Baisiraele ge e ba ba be ba ka e-kwa. (Doiteronomio 4:40; 32:45-47) Ditaelo tše mpsha di ile tša newa lekgolong la pele la nywaga, go thuša bao ba botegago gore ba latele melao ya motheo ya Jehofa tlase ga tshepedišo ya Bokriste ya dilo. (Mateo 28:19, 20; Johane 13:34; 15:9, 10) Johane bjale o bega gore bahu ba tla “ahlolwa ka dilo tšeo di ngwadilwego mangwalong a go phuthwa go ya ka ditiro tša bona.” Ka gona, go molaleng gore go phuthollwa ga mangwalo ao go tla tsebatša ditaelo tša Jehofa ka botlalo bakeng sa batho nakong ya nywaga e sekete. Ka go diriša maphelong a bona ditaelo le melao ya mangwalo ao, batho ba kwago ba tla kgona go lelefatša matšatši a bona gomme ba feleletša ka go hwetša bophelo bjo bo sa felego.

15. Ke lesolo la mohuta ofe la thuto leo le tlago go nyakega nakong ya tsogo, gomme tsogo mo gongwe e tla dirwa bjang?

¹⁵ A lesolo le legolo kudu gakaakang la thuto ya pušo ya Modimo leo le tlago go nyakega! Ka 2005, ka kakaretšo Dihlatse tša Jehofa lefaseng ka bophara di be di swara dithuto tša Beibele tše 6 061 534 mafelong a fapa-fapanego. Eupša ga go pelaelo gore nakong ya tsogo go tla swarwa dithuto tše dimilione tše di sa balwego tšeo di theilwego Beibeleng le mangwalong a mafsa! Batho ka moka ba Modimo ba tla swanelwa ke go ba barutiši gomme ba katane. Ge bao ba tsošitšwego ba dutše ba tšwela pele, le bona ka ntle le pelaelo ba tla ba le karolo lenaneong le le legolo la go ruta. Mo gongwe tsogo e tla dirwa ka tsela yeo bao ba phelago, ba tlago go thabela go amogela le go ruta ditho tšeo e bego e le tša malapa a bona gotee le bagwera ba bona, bao le bona mo gongwe ba tlago go amogela le go ruta ba bangwe. (Bapiša le 1 Bakorinthe 15:19-28, 58.) Dihlatse tša Jehofa tšeo di fetago dimilione tše tshela tšeo di swaregilego ka go gaša therešo lehono, di thea motheo o mobotse bakeng sa ditokelo tšeo di holofelago go ba le tšona nakong ya tsogo.—Jesaya 50:4; 54:13.

16. (a) Ke maina a bomang ao a ka se kego a ngwalwa lengwalong la go phuthwa, goba pukung ya bophelo? (b) Ke bomang bao tsogo ya bona e tlago go ipontšha e le ya go tsogela ‘bophelo’?

¹⁶ Jesu o boletše mabapi le tsogo ya lefaseng gore ‘bao ba dirilego dilo tše dibotse ba tla tšwa ba tsogela bophelong, bao ba tlwaetšego go dira dilo tše mpe ba tla tsogela kahlolo.’ Mo ‘bophelo’ le “kahlolo” di a bapišwa, e lego go bontšha gore bao ba tsošitšwego gomme ba ‘tlwaela go dira tše mpe’ ka morago ga ge ba rutilwe tšeo di lego Mangwalong a buduletšwego le mangwalong a mangwe a go phuthwa, ba ahlolwa e le bao ba sa swanelego bophelo. Maina a bona a ka se ke a ngwalwa lengwalong la go phuthwa, goba pukung ya bophelo. (Johane 5:29) Se le gona e tla ba sa therešo go mang le mang yo a kilego a latela tsela ya potego, eupša e le yo ka baka la lebaka le itšego a fapogago nakong ya Pušo ya Nywaga e Sekete. Maina a ka phumolwa. (Ekisodo 32:32, 33) Ka lehlakoreng le lengwe, bao ka go kwa ba latelago dilo tše di ngwadilwego mangwalong a go phuthwa, ba tla dira gore maina a bona a ngwalwe fase, e lego lengwalong la bophelo, gomme ba tla tšwela pele ba phela. Tsogo go bona e tla ba e ipontšhitše e le ya go tsogela ‘bophelo.’